Manipur Express | May 7, 2016

KIC in President, HI leh Chairman, ZC kipahpihna nei

 
Lamka, May-6: Tuibuong a Kuki Innpi Churachandpur office ah tuni zinglam dak 11:00 in Kuki Inpi CCpur in Joseph Lalrothang, President, Hmar Inpui Gen HQ leh B. Dongzalian, Chairman, Zomi Council kipahpihna program neihpih uhi. Huai ah Thangjang Haokip, President KIC in mi 2te kipahpihna in pakkhi pia in singpi dawnpih uhi.

    Thangjang Haokip in makai thak 2te kipahpihthu gen a, Dist. sung ah buaina tuamtuam om hun in hoihtaka panlak theihna ding a KIC in kimeltheih tuahna program sai hi’n gen hi. CCpur Dist. sung ah buaina leh a dangdang om hun chiang in nam makaite a pangkhawm keileh mite simmawh/muhsit a ki-omding ahi chi hi. Dist. sung ah kidnap case omte nam heutu/makaite’n hoihtak a panlak khawm keileh maban ah buaina omtoutou thei ding hi’n gen hi.
    B. Dongzalian Simte in KIC tung ah kipahthu gen in maban ah CCpur Dist. sung a Innpi te’n buaina tuamtuam aneih hun a pangkhawm a hihfel/hihveng poimawh chi hi. Joseph Lalrothang in Manipur a Dist. tuamtuam ah Non-Naga Tribe tuamtuam omte apangkhawm keileh kua nam (tribe) in lawhchinna mulou ding chi hi. Anti-Tribal Bills thu a Movement kipat tung lai in JAC nuai a nam tuamtuam-te kituaktak a pankhawm bang in, pankhawm touh zel theihna ding a  kingaihtuah thak a, kituaktak leh khekhat a dingkhawm, kalsuan khawm thak ding in Inpi makai te chial hi.
    Program sung in CCpur Land records, CCpur Dist. sung ah bandh/strike kibawl dan, food security kibawl dan tungtang, JAC Againts Anti-Tribal Bills te’n May 10, 2016 ma teitei a Inpi te’n representative 3 chiat sawl ding a ngetna abawl uh tungtang, CCpur Dist. sung ah Parents/Guardians Association form ding tawh kisai, kidnap tungtang genkhawm uhi. Tuni a genkhaklouh omte May 9, 2016 a Simte Inn, Simveng ah joint/next meeting hun a genkhawm ding in lemsa uhi.



HEADLINES:
Delhi a rally buaizak: Congress lungkimlou
Prime Minister-lui Manmohan, Sonia leh Rahul matin om
New Delhi, May-6: AgustaWestland chopper deal tungtang ah tuni’n parliament sousang mahmah a, AICC Chief Sonia Gandhi in alangtang in Modi government thulimlou ahihdan leh thuzuau tungtawn a mipi zawhsawm uh ahihthu puanzakna nei a, hiai in Congress-te a hihbuai (nervous) zoukei ding chi hi. Hibangkalah, Congress makaih a Delhi khawpi a rally om pen buaizak a, police te’n Prime Minister-lui Dr Manmohan Singh, AICC Chief Sonia Gandhi, Congress Vice President Rahul Gandhi banah Congress heutu hunkhop man uh a, hiai tungtang ah, Congress party in khasiat thu puang uhi.
    National Capital New Delhi a Jantar Mantar mun ah Congress makaih rally om a, huai ah Sonia Gandhi in, “Kuaman Congress party nepbawl hetkei ni, mipi zalenna hihbuai  thei ding partyte theihtawp suah a nan ahi ding” chi hi. Tuni a 'Save Democracy' rally neih un gah kipahhuaitak hon suan ka kineppih mahmah a, mipi thahatna mahin thudik a vaihawmna pawtkhesak ding ahi chi’n Sonia Gandhi in gen hi. Congress Partyte ahihleh Jantar Mantar apan Parliament zuan a rally a kipat hun un dal in om ngal uh a, huai ah top leader teng matin om ngal uh a, ahihziakin, hun sawtlou nungin khahin om uhi.


Kiphinna nei MLA 9 te’n vote khe theilou ding: SC
May 10, 2016 in Uttarakhand floor test om ding
New Delhi, May-6: Supreme Court thusuakin tuni a agendanin, May 10, 2016 (Sepnawnni) chiangin Uttarakhand state assembly ah floor test om dinga, hiai hunah, Chief Minister apan paihkhiaka om Harish Rawat in majority command (mi tam nei zaw mah hiam) hiam etkhiakna om ding hi.
    Hibangkalah, Supreme Court in hiai vote khiakna hunah kiphinna nei Congress MLA 9 te’n vote khe theilou ding ahi chi uhi. MLA 9te ahihleh Assembly speaker in disqualified abawlsa ahi hi. Centre government sik-le-tang ading attorney general Mukul Rohatgi in Supreme Court kiangah hiai ki-etkhiakna poimawhtak om ding ah court inleng theihpihtu danin observer guang hen chi’n ngetna bawla, huai leng retired chief election commissioner tanbek hihen chi hi.
    Uttarakhand ah Congress leh BJP kal kibeihna sousang mahmah a, Chief Minister Harish Rawat makaih Congress ministry pen BJP te’n phuk hilhel uh chih ngawhna liantak om hi. Rawat in bel a ministry sungthu ah bangmah buaina omlou a, MLA tamlou kiphin om ziaka BJP in ut le dah a ministry hon peibuai uh hizaw chi hi. Disqualified a om MLA 9 te’n vote akhiak theih ngeingei uleh Rawat paisuak ding dinmun ah omlou a, amau Uttarakhand high court ah vote khiak theihna ding ngetna pelut nawn uh a, May 7, 2016 in  High Court in hiai thu genkhawm nawn ding uhi. SC thupukna pen Rawat leh akaihzatamte adingin kipahhuai mahmah dingin kilang hi.


LOCAL NEWS:
Singngat Comt. Hall ah DLCC meeting
Lamka, May-6: Lunminthang Haokip, IAS, DC/CCpur makaih in tuni sun dak 12:00 in Singngat Community Hall ah Dist. Level Co-ordination Committee-cum-review meeting om hi.
Huai ah SDO/Tuibuong in SAGY tawh kisai, DAO/CCpur in PMKSY tawh kisai, Dy Manager, NHPC in CCPur Dist. ah Loktak project tungtawna electric meivak supply tawh kisai leh DLO khenkhat te’n report pia uhi. Singngat khua ah DLCC meeting omna ziak ahihleh local official, Singngat area mipi leh line Deptt tuamtuamte nasepna awareness neih ding deihna ziaka kinei hi'n kigen hi. Singngat khawsung lutnang mun ah Singngat Vision 2020 Implementation Committee leh JPO-te makaih in student te’n DC/CCpur leh ateamte banner ah “We demand immediate restoration & functioning of SDO/BDO’s office in Singngat” chih tawh vaidawn uhi.


Chief Minister kiangah memorandum pia
Lamka, May-6: CCpur Dist sunga nam tuamtuam a makaite’n sum deihtakna ziaka kipimang (kidnap) omsekte tawh kisai sukbei ahihnang a panla dingin Manipur Chief Minister kiangah ngetna bawl in, DC/CCpur tungtawn in joint memorandum pia uhi. Memorandum in a taklatdan in, tulai in CCpur Dist ah sum deihtakna ziaka kipimang tam mahmah ahihdan taklang in, March 2016 sung in galvantawi pawlkhat in nasem a om Lingsiphai khawmi 2- Suanmang leh Muanthang a pimang nungun April 26, 2016 in Tribal Revolutionary (TRA) kichi te’n Singngat MLA Ginsuanhau Zou PRO  Thangsianbiak @ Biabiak Rs. 70 lakhs a tatkhiak din pimang uh hi’n taklang uhi.  Huai tawh kisai Civil Org. tuamtuam te’n theihtawp suah pan alaklai un  May 3, 2016  in galvantawi pawlkhat in Lingsiphai a om T. Lala Vaiphei, Special Contractor JCB driver  Khumanthem Tondonba Singh (18) s/o Kh. Kwaklei Singh of Pukhao Naharup Awang Leikai, Imphal East pimang in om nawn a, kha 2 sung lelin leng CCpur Dist ah mi 4 pimang in omta a, tutan Thangsianbiak leh Kh. Tondonba Singh-te omna theih hinailou in, Rs. 70 lakhs tuak demand uh hi’n leng taklang uhi.
Huai tawh kisai in CCpur Dist pansan tribe leader tuamtuam te’n State Govt.  kiangah hiaibang thilte beisak ahi theih nanga panla ding leh tulel a mi 2-te damtak a khahkhiak ahihnang ua panla dingin ngen uhi. Joint memorandum ah Simte Tribe Council, United Zou Organization, Tedim Chin Union, Hmar Inpui, Vaiphei Peoples Council, Paite Tribe Council, Gangte Tribe Council, Kuki Inpi, CCpur, Mate Tribe Council, Thangkhal People’s Organization leh Mizo People’s Convention a President tengin suai kai uh a, DC/CCpur omlouh ziakin T. Kammuanlal Simte, AC to DC in memorandum sang hi. Innpi/Councils makaite ngetna Manipur CM kiang a kinlam a tungsak ding ahihdan gen hi.


ZSF GHQ in mawhpaih thusuah bawl
Lamka, May-6: Zomi Students’ Federation (ZSF) GHQ a Secretary Info & Publicity in thusuah abawl in a taklatdan in, April 26, 2016 ni a Tribal Revolutionary (TRA) kichi te’n Singngat MLA Ginsuanhau Zou PRO  Thangsianbiak @ Biabiak banah May 3, 2016 a galvantawi pawlkhatin  T. Lala Vaiphei, Special Contractor in JCB driver  Khumanthem Tondonba Singh (18) s/o Kh. Kwaklei Singh of Pukhao Naharup Awang Leikai, Imphal East a pimang uh tawh kisai  mawhpaih thusuah bawl uhi. March  2016 inleng sum demand ziakin Lingsiphai khawmi Suanmang leh Muanthang-te a sepna mun (worksite) ah pimang ana hingei uh hi’n thusuak in taklang hi. Hiai bang thiltung ziakin Dist ah community kal ah kitheihsiam louhna piangthei dinmun a om thei ding dinmun in om a, a kisaipih arm group te’n a pimangte damtak a khahkhe dingin ngen uhi.  Dist ah lemna leh muanna hihsiat ahihlouh nang in arm group tuamtuam te’n hibang thilchin hoihlou tawpsan ding inleng ngen uhi. Huai banah Join Philanthropic Organization (JPO) te’n leng natak in mawhpaih thusuah bawl uhi.


Kha 1 sung in gari 123 kibehlap
Lamka, May-6: Dist. Transport Office/CCpur ah April 2016 khasung in gari tuamtuam 123 registation bawl in om a, huaite truck 4, van 5, car 11, jeep 2, auto rickshaw 8, 2-wheeler 92 leh others ah 1 tel hi. Huaiban ah April 2016 khasung in revenue Rs. 640018/- mukhia uh a, govt ah challan in submit uh chihthu kiza hi.


Utilized teacher te’n DI kimuhpih ngai
Lamka, May-6: ZEO/CCpur control na nuai a DI of schools Singngat block sung a Utilized teacher omkha teng in akintheilam a kimuhpih ding in DI of schools/Singngat in theisak hi.


Morgue ah hun zanglou phot ding
Lamka, May-6:  All Manipur Tribal Women Union (AMTWU) makaih numei pawl te’n Dist Hospital morgue ah salphate luang tutpih kawm a lengkhawm leh lasakkhawmna aneih uh sunzom zel uh a, tuni’n leng veng tuamtuam apan mi 100 vel paikhawm uhi.  Numei pawlte’n gamsung buaina tawh kisai awlmawhna ziakin  May 2, 2016  in anngawl thumna apat uh leng tutan in sunzom uh a,  thumkhawm a tel numeite’n gam leh leitang a ding ban ah makai tuamtuamte a dingin naktak in thum uhi. May 7, 2016 ‘Missionary Day’ leh May 8 Nute Ni (Mother’s Day) ahihziakin  morgue ah programme omlou ding a,  May 9, 2016 in  pan nawn ding uh hi’n AMWTU makaite apan kiza hi. Manipur Govt in Bill 3 a passed ziaka tribal te’n kiphinna aneih uh tuni tanin ni 249 hita hi.


EYE saina in football tournament pailel
Lamka, May-6: Eimi Youngster Footballer (EYF) te saina in Bijang Mawltual ah ‘(late) Miss Kimmuan Under 16 Football Tournament’  tuni’n  knock-out match ah Seikam Memorial Team leh POGO te’n vualzawhna   tang tuak in  quarter-final lut in, May 14 in zousiang ding uhi. Tournament ahihleh April 18, 2016 in kipan a,  club/team 35 kihel uhi. Champion team in kipahman Rs. 10,000/-+ Trophy + medal sang ding a, Runners-up in Rs. 3,000/- + trophy + medal  sang ding hi. Best Goalkeeper, Best Defender, Best Midfielder leh Best Striker banah Top Scorer leh Emerging Player of the Tournament kiangah leng kipahman piak hiding uh a, tournament board in player 11 telkhe ding a, amaute  EYF min in tournament tuamtuam ah kimawl ding uh hi’n kigen hi.


HSA CCpur Jt HQ in school 8 enkhia
Lamka, May-6: Hmar Students’ Assn. (HSA) CCpur Jt. HQ a President Lalthanzaua makaih in HSA CCpur Jt HQ makaite’n amau area sung ah tuni zinglam dak 11:00 in govt school 8 inspection bawl uhi. School 8 lak ah school 4- Thenmuol JB school, Muolvaiphei UP school, Saidan JB school leh Thingchom JB school te hoihtak in kai in function uhi a, school in facililty hoihtak ngahlou hi’n mukhia uhi. Himahleh school 4 te bel school kailou, function lou leh school building vuak om hi’n mukhia uh a, school function lou 4 a Headmaster/Headmistress teng HSA CCpur Jt. HQ te’n explanation call uh a, maban ah school hoihtaka function theih nang in HSA CCpur Jt. HQ in panlak sawm hi’n President HSA CCpur Jt. HQ apan kiza hi.


Kidnap a om mi 2-te khahkhiat hinailou
Lamka, May-6: Tribal Revolutionary Army (TRA) pawl in April 26, 2016 nitaklam dak 5:30 vel a Imphal bazar ah Thangsianbiak @ Biabiak of Laimanai, Imphal tulel a Imphal Zou Youth Orgn.(ZYO) Vice President leh PA to Ginsuanhau, MLA (Singngat A/C) kidnap uh, tunitan khahkhiat hinailou a, kidnap tute’n Rs.70 lakh demand uh hi’n kigen hi. Huailou in meltheihlouh galvantawi mi 7 vel te’n May 3, 2016 zan dak 11:30 velin Bongbol leh Takvom khua kikal ah T.Lala Vaiphei of Lingsiphai’ nasemtute lak a JCB driver Khumanthem Tondonba Singh (23) s/o Kh. Kwaklei Singh of Pukhao Nakarup Awang Leikai, Imphal East Dist. kidnap uh a, khahkhiat ahih nailouh ban ah kidnaptute’n Rs. 70 lakh demand uhi.


Diamond Jubilee Campaign & Motivation
Lamka, May-6: Zomi Colony road a Central Church, Zou Presbyterian Church Synod (ZPCS) ah May 8, 2016 sunnung dak 1:00 in Zou Presbyterian Youth Fellowship (ZPYF) Diamond Jubilee Celebration Committee (DJCC) makaih in Rev Khamminlian, Leader ZPYF in ZPYF Diamond Jubilee Campaign & Motivation patna in kick-off program hongkhe ding hi. Huai ah  H. Kapneithang, Chairman, DJCC in competition booklet leh Action Plan hong ding a, Rev Stephen Chinzathang, Executive Secy, i/c Youth, ZPCS in DJCC & ZPYF makai-te thumsakna leh hanthawnna thu gen ding hi. Program ah PYF Central Church, PYF Zomi Colony, PYF Lailam Veng, PYF Hiangzou, PYF New Zoveng, PYF Tuibuong, Zopa Band, John Thangsianpiang leh Ms. Chiindeikim te'n Pathian phatna la sading uh a, program zawh in Diamond Jubilee campaign & motivation na in balloon khahkhiat hiding hi.


PCS in dress code thu genkhawm
Lamka, May-6:  Paite Cultural Society (PCS) makaite’n tuni zinglam dak 11:00 in Hiangtam Lamka a PTC Conference hall dress code telin thu poimawh tuamtuam genkhawm uhi.  Meeting hun ah Asst. Secy lenlel L. Ginzahau leh Member M. Ginzapau, Ex-MDC-te sunna hun zang uh a, mi 2-te mun awng luahtu guan dingdan genkhawm uhi. Dress Code bawl nang a sum kaihkhawm dingdan gen uh a, design leng felta a New Delhi a company khat tawh kizom in  company te’n sample leng thon khinta uh a, dress code bawlkhiak nangin Rs. 3 lakh val lut ding hi’n kigen hi.


SUUNNA:
Niang Mary Vaiphei (24) d/o Kapchinkhup of Laizon veng, Tuibuang tuni’n heart problem ziakin si a, May 7, 2016 in Tuibuang hanmual ah kivui ding hi.
T. Vungzasuan s/o Upa T. Thangtiang of Khominthang, New Lamka tunitak dak 9:00 in si a, May 7, 2016 in YPA hanmual, New Lamka ah kivui ding hi.
Kholiankhup @ Khuppi Manlun s/o (late) Chinzahau of Zoveng, Zenhang Lamka tunitak dak 9:25 in si a, May 7, 2016 in kivui ding hi.


IMPHAL NEWS:
Social welfare dept. in mipi huhna sunzom
Imphal, May-6: State govt. nuaia Social Welfare Dept te’n (I) Social Defense (Prohibition and social security for the Aged), (ii) Welfare programmes for persons with disabilities, (iii) Integrated Child Protection schemes, (iv) Women and Child Development including supplementary nutrition programmes and other development schemes te tungtawn in state sunga mipi, adiakin taksa upate huhna sunzom uh a, Old Aged Pension Scheme tungtawn in taksa upa tamtak kiangah peta uhi. Rape thuakte kiangah 2011-12 akipan in huhna pia uh a, victim khat tungah case dungzui in Rs. 70,000/- apan Rs. 1,20,000/- pia uh a, Meithai huhna poimawh diakte kiangah Rs. 2000/- pia uh hi’n taklang uhi.


KNF(D) leh TRA leader omna hilhtheite Rs. 1 lakh pe ding
Imphal, May-6: Mi tuamtuam pimangna tawh kisai a kigolh Kuki National Front (D) leader Douthanglen Kipgen @ Lelen Kipgen @ John Hangshing s/o (late) Thangkholet Kipgen of Bongbal Khullen, Senapati Dist. matkhiakna dinga thuguk petheite kiangah Manipur Police in kipahman Rs. 1 Lakh piak chiam ahihdan Manipur Police a PRO in tuni a thusuah abawl kimudan in taklang hi. PRO/Manipur Police in thusuah abawlna ah Douthanglen Kipgen in KNF (N-Douthanglen) leh TRA min zang in sum a tatkhiak ding in mi tuamtuam pimang hi. Thusuakin agenzelna ah huai tawh kisai in mun 3 ah FIR bawl in omta a, huaite bel Sekmai PS ah 19(4)2016 U/S 307/326/34 IPC; Imphal PS ah 107(5)/2016 U/S 364-A IPC leh Ccpur PS ah 24(5)2016 U/S 400/365/34 IPC & 25(1-C) Arms Act te chiamteh a om hi'n taklang hi. Douthanglen omna hilhtheite, amau mimal hihna (identity) te midang theihsak hilou ding in puang hi. Thuguk theite'n Imphal West a Addl. SP(Ops.) Mobile 9862497906, Addl. SP(L/O) Imphal West Mobile 9402882416 banah OC/Commando (Imphal West) Mobile  9436028172 thuzak ding in ngen uhi.


Thoubal ah A/R te’n IED hihsia uh
Imphal, May-6: Thoubal dist. sunga Wabagai-Sugnu road ah tuzing in 28-A/R nuaia om 22-Assam Rifles pawlin IED bomb om chihthu azak ziakun ‘Explosive Detector Dog’ zangin lampi dung ah bomb zong in mukhia uhi. A/R te’n bomb amuhkhiak uh RCIED ahihdan theichian in bomb disposal team te’n enkai uh a, huai hunsung in gari taituahte khawlsak a om in, hun sawtlou nung in mipi patauhna beisak thei uh hi’n PIB (Defence Wing) apan thusuakin taklang hi.


Police te’n NSCN (IM) apan driver 2 hunkhia
Imphal, May-6: NSCN (IM) helpawlin apimang uh gari driver nihte Thoubal Police Commando team in hunkhia uh a, Chandel dist. a Tengnoupal Police Station huamsung Tuisimi village munah tuni’n driver 2te damtak a hutkhiak hi un kigen hi. Police thusuak in a gendanin Pallel Forest Gate apan zan nitaklam in NSCN(IM) pawlin Md Indra Ahamad (45) s/o Md Mubarak leh Md Sabir (26) s/o Md Jalaudin of Waithou Samgomshang  pimang uh a, agari uh tawh kem uh hi’n gen hi.


Mao gate ah Martyr-te zahna pia uh
Imphal, May-6: United Naga Council (UNC) tawh pangkhawm in Mao Council makaihna in Mao Gate a martyrs Park ah tuni’n (late) Meli Chakho leh (late) Dikho Loshuo sihchampha 6veina zat in om hi. Kum 2010 in Mao Gate a Manipur Police te’n student 2 athahna uh theihgigena hun ah  United Naga Council (UNC) president Gaidon Kamei in Naga thubuai pen political issue hi’n gen a, political thil ahihman in political tak a sukfel theih lel ding chi hi. Manipur CM Ibobi leh Dy. CM Gaikhanngam te’n amau thiltup tangtunsakna dingin Naga mipite bawl genthei uh chi a, Manipur a communcal government nuai ah Nagate bit nawnlou uh hi’n leng UNC president in gen hi. Huai hunah Naga Students’ Association Manipur (ANSAM), Mao Students’ Union, Naga Students’ Federation, Naga Women Union, NMA, NPMHR, ZB banah Naga pawlpi tuamtuam a makaite leh mipi tamkhop kihel uhi.


Public Curfew in hindan nawngkai sak
Imphal, May-6: JCILPS pawlin May 5 zankim akipan zingchiang (May 7) nitaklam dak 6:00 tan daih ding Manpur pumpi a dakkal 42 sung Public Curfew apuan ziakun tuni'n Imphal khawpi sung ah gari taituah muhding omlou a, hindan nawngkai mahmah hi. Curfew hunsung in Kakwa, Singjamei, Khongman Mangjil, Keishampat, Uripok leh Tera area ah bandh volunteer tamkhop duty uh a, lampi lai ah gari tyre hal in mun khenkhat ah police tawh kinawktuahna piang hi. Huai thiltung ziakin City Police te'n Keishampat junction ah tunitaklam in Manipuri Students' Federation (MSF) volunteer 4 mankhia uh a, sawtlou nung a mi 3 khahkhia uhi.


Asia adia biakinn lianpen Nagaland state a Zunheboto ah kibawl
Imphal, May-6: Asia gambup adia biakinn lianpen hidia gintak, Nagaland’ Zunheboto district a Sumi Baptist Church Zunheboto (SBCZ) biakinn Rs. 25 crores, 30 lakhs budget in mipi 8500 kikhop theihna ding bawlna pailel a, nasemtu 2000 val in hiai biakinn sawng 8 bawl lel uhi. Biakinn sungah room 27 om hi’n Senapati district headquarters pansan Herald Today in taklang hi. Hiai biakinn a dak (bell) kizang Rs. 15 lakhs man  hi a, biakinn kim-le-kiang a khua 20 te’n chiangtakin hiai biakinn muthei uh hi’n kigen a, kum 2017 tan a zawhsiang dinga lam-et ahi. Saptuam makaite’n 2004 in biakinn om dingdan ngaihtuah khe di’n Architect Honoholi K Chishi-Zhimomi mawhpuakna pia uh a, huainung May 5, 2007 in nasep kipan hi. Hiai biakinn aktui (egg) bang a kibawl hi a, feet 197 in sang a, 140 feet in lian hi. Biakinn omna leng feet 156 feet in sang a, biakinn Cross omna leng ground floor akipan feet 97 tan in sang hi.


TUNI THUPI:
“A thiltup, Kris-a a gelkhiak, bangbangin a deihlam thuguk tuh pilna leh theihsiamna ngenin eite hontheisakta ngala;”  – Ephesate 1:9


EDITORIAL:
Democracy nopnehna maw?
India Danbupi dungzui in "curfew" i chih dan leh thupiak etkolna tawh kisai hi a, magistrate in thil omdan enveng veng kawma apuansek ahi hi. Dan leh thupiak (law & order) tawh kisai etkolna liauliau a, district magistrate tuamtuamte’n amau opkhumna bialsung (jurisdiction area) a etkolna uh hi a, himahleh, tuni chiangin human rights pansana neikawma curfew kichi bangleng a khengval a lakha ihita diam chihtheih in om hi. 144 CrPC i chih chiangin mi 5 sanga tamzaw omkhop theihlouh hi a, tualou in singkhuah telin mi sukha theiding vanzat chi tuamtuam tawi phallouh ahi hi. Public curfew ahih chiangin, kuaman inn pua himhim kan theihlouh chih hi a, gambuaina taktak ah hiai bang thupuan zat himahleh Manipur ah bangchidan a a utut in ut hunhun a public curfew puangthei mawk ading? I zalenna uh nopneh gawpna ihi ding uam chih uthuai phialta hi.
    Bangchibanga Public curfew puan theihna right nei ihia chih lehkhathei leh khuakzangtheite adingin ngaihtuahna poimawh mahmah hi. Section 144 a ithuneihna zang kawmkawm a ‘online curfew’ puanglel idiam chih theihin om hi. Manipur state ah bandh chih min a gin naknak leh mipi patau in buaise ngala, commercial gari-te tailou ngalin, bazaar ah mi muhding omlou sek hi. Democracy nopnehgawp ihita hia leh? Indian government in Punjab a beihpi asuahbang bang un hon suah hinta le uh kua ahia ding ngam taktak ding? J& K a flag march hunte ah mi hangsanteng kibumang a azawngkhal tengin thuak chihkhawng ahi hi.
    India kichi mipi vaihawmna ahih dungzui in dan tunga thunei zaw kuamah omlou ahi chih pen genvuallouh a thudik ahi a, Supreme Court ahihkeileh President in amau ut thu leh deihtelna in kuamah nuaisiah thei mawklou uhi. State tuamtuam ah kiphinna tuamtuam hunteng in a om chih haihvual ahikei a, huai  kawmkawm in mipi’n kong pua kantheilou ding chi in PUBLIC CURFEW puangsek uhi. Hiai chindan pen India danbupi tawh kikalhna a omkha keiding maw chih ngaihtuahtham ching a, tua ziakin igam a dan siamte’n hibang thu hon luikhiak uh poimawh mahmah hi.
    Emergency hun hiam ahihkeileh, thubuai tawpkhawk hunah atangpi in Public Curfew puan hisek a, huchi lou a civil society hiam ahihkeileh organisation tuamtuam in amau ut thu a mipi’n kong pua kankhe theilou ding uh chih thupuan aneih uh dikthei mah diam hiam chih ngaihdan tamtak om hi. Hun paisa enzual-le hang, Patel community te’n job quota a nget ziakun buaina thupitak pianga, tua-in Gujarat state tengin state dang hunkhop liingsak hi. ‘Mandal politics’ chih bang hong lar man mahmah chi ni. Public Curfew kichi bawltheih mah e, ahih ziakin, ibawlna san ‘issue’ piching a om poimawh hi. India ah mipi’n constitution dungzui a zalenna lian khengval ingah ziakua hiai teng tung adiam chih bangleng dotna lian mahmah ahi hi. Gujarat High Court in Section 69A of Information Technology Act leh CrPC  Section 144 nuai ah mipi’n i mimal zalenna uh kizangkheng valthei ahihdan ana taklangta uhi.
    Section 144 Cr.P.C kichi district magistrate in buaina om hun taktakin koih (imposed) thei a, huchi kawmkalah, eilak ah organisation tuamtuam te’n I44 Cr PC phetlou a public curfew tanpha hon imposed theih zatzat uh bang constitution nuai a om ahi di? Bang power leh zalenna zanga state pumpi hiaitan bawlthei uh ahi dia? Sapte gendanin hun (time) manpha mahmah a, second khat lel leng pammaih mahmah hi. Dakkal 48 sung public curfew bawltheihna dinga India zalenna leh ki-ukna (constitution) bangtan ahihpha dia le?
    Huaikawmkal ah, Manipur singtangmite adingin leng pilvanna ding poimawh mahmah tam hi. Manipur tribal-te ahihleh, atangpi in buaina omna munmun thagum tawh delhpahte, thauging a om leh amun kidelhhuan, bomb apuah leh kidelh huan chihte i khawtang hindan uh hita a, huai in i mawlna taklanga, mawlna phetlou hilou in haina hilai a, ahih ziakin i sisan lum mahmah ahihdan hon theisak mahmah hi. Tu in leng maban ding theikhang, Manipur state hongbuai tou deuhdeuh khathei a, gulbang apil, vakhu banga nunnem kawm tawh state dinmun agal apan et khiukhiau dingin deihhuai hi. A koi abang hileh kuapeuh in ut hunhun a total shutdown kichi bawl zatzat, Public curfew kichi khawng pawng hihhih mawk, democracy zangkhial ita diam chih ut huaiphial hi.