HEADLINES:
President dingin Khailianthang Tonsing ching
Tuni’n YPA Gen HQ a makai ding telna om
Lamka, June-3: Hiangtam Lamka a YPA GHQ hall ah tuni’n kum 2016-19 sunga YPA Gen HQ makai ding telna om a, pailai paikhawmte’n President dingin Khailianthang Tonsing telching uhi. Hundang banglou in tutung YPA Gen HQ election husa ngaih mahmah a, block leh unit tuamtuam apan candidate 38 in nomination file uh a, scrutiny ah paisuak vek uhi. Zinglam dak 11:00 in vote khiak kipan a, YPA Gen HQ, Central Executive Committee leh Cabinet Member , YPA Gen HQ Advisory Board Member, Honorary Patron, Honorary Life Member, Patron Member leh Life Member, YPA GHQ leh YPA Block apan palai 6 banah leh Adviser teng leh Unit teng apan palai 7 in vote khia uhi.
Kitelna ah Presiding Officer in LT Juan Tonsing pang a, Polling Officer in Rev. Khen P Tombing leh H. Nengsong pang uh a, palai paikhawmte’n candidate 38 lak ah Central Executive Committee(CEC) ding in mi 17 tel uh a, huaite’n amau lakah Officer Bearer ding tel uhi. CEC member dia telching thakte Presiding Officer in kichiamsak a, Rev. E. Paukhanlian, Divn., Supdt, Lamka South Division, EBC in thumsak hi. CEC thakte’n Central Cabinet ding tel uh a, President in Khailianthang Tonsing, Vice President in M. Luahkhanchin, General Secretary in Lianmuanthang Valte, Joint Secretary in K. Thangkhochin leh Thathang Langgel; Finance Secretary in V. Chinkhenmung leh Treasurer in Vungzapau tel uhi.
Tuaban ah, CEC Chairman dingin Chin Ngaih Pau, Vice Chairman di’n Paukhanmawi Guite telching uh a, member in- Thangkhochin Ngaihte, Awnsuanhau, Haukhenpau, V. Khankhup Guite, Khanpau Ngaihte, Singnunsiam Ngaihte, H. Pauzathang Ngaihte leh T. Thangkhangou guang uhi.
Vote khethei ding palai 416 lak ah 359 te’n vote khia uh a, huailak ah valid vote 353 leh invalid vote 6 om hi. Telching thak leh a luite’n June 4, 2016 sunnung dak 3:00 in charge kipe ding uh hi’n kigen hi. Programme teng zawhin Rev. Khen P. Tombing, Sr. Adviser in kipahthu genkawm in thumna in hunkhak hi.
Buaina ziaka misite’ lakah Mathura Supdt of Police leng tel
Mathura ah gam thu ziakin buaina om: mi 24 si
Lucknow, June-3: Uttar Pradesh a Mathura khawpi ah tuni in buaina thupitak om a, tua ah mi 24 si a, misite lakah Mathura a Superintendent of Police Mukul Dwivedi leng telkha chih thu kiza hi. Police leh lou nei gamkekte kalah buaina piang masa hi’n kigen a, tua nungin buaina in mipi ban peh chih ahi hi. Huai ‘anti-encroachment drive’ a thiltung India gamsung adingin chiamtehtham ching hi’n kigen hial hi.
Buaina husa zak phet in security force tamtak leh police in kidelh huan uh a, Police in buaina mun ah mi 368 vel pikhia in khahkhe nailou(detained) in koih uh chihthu kiza hi. Misite laka tel Mathura Supdt of Police Dwivedi ahihleh kum 1995 batch IPS officer hi a, kha 7 lel paisa akipan SP (City) Mathura hihna lenpan ahi hi. Government in mipi khawlna munding leh zalentaka a om theihna munding uh a khualna ziak un ‘Park’ a bawl uh hihbuaisawmte tawh kisukbuaina kalah Supdt of Police Dwivedi leng si kichi hi.
Uttar Pradesh’ Chief Minister Akhilesh Yadav in thiltung tawh suizui hiding chih puang a, Dwivedi tela mi tamtak a sih tungtang uh hoihtaka suizui hiding chi hi. UP a govt bawl Samajwadi Party (SP) adin tuni a thiltung nuam hetlou hidingin gintak-huai sakthu mi tamtak in gen hi. Kum nawn February 2017 velin Uttar Pradesh ah assembly election om ding a, tua hunah UP state govt adingin maizumna tamtak om theiding in leng kilang chih ahi hi. UP a BJP state thupuangtu Vijay Bahadur Pathak in Mathura thiltung tawh kisai gen tuamtuam nei a, Samajwadi Party lam in leng deihkhop in douthuk uhi. Bahujan Samaj Party (BSP) leh Congress leader tuamtuam in leng state Government mawhsakthu gen uhi.
Operation area khua a hausate’n CO puan silhsak
25th Madras Regt. te’n June 5 in Manipur nuse ding
Lamka, June-3: 25-Madras Regt., Khuga Battalion-te’ CCpur dist ah kum 3 vel a omnung un June 5, 2015 in kisuankhe ding uh a, 6th Sikh Light Infantry te’n kheng ding uhi. A kisuankhiak ding ziakun tuni’n Khuga Dam ah farewell programme om a, huai hun official takin zangkei mahle uh Lunminthang Haokip, IAS DC/CCpur, Smt. Mannuamching, IAS, CEO/CCpur banah L. Mangkhogin Haokip, IPS, SP/CCpur leh Khuga Dam area/amau operational bial sunga omkha khua hausa 15 vel leng tel uh a, amau 25-Madrs Regt a Commanding Officer Col Anil Kumar tunga kipah latsakna in Vaiphei (Puandum leh Khiangkawi) silhsak uhi. Mata hausa Lallunkam in agenna ah Khuga Battalion in amau operational area ah bitna pia uh a, a nasep uleh panlakna uh phat-huai chi hi.
Col. Anil Kumar in a genna ah CCpur a omsung ua hausa leh mipi kithuahpihna ziakin zahlaklou in Lamka nuse thei dia a om kipak ahihdan gen a, maban ah leng posting na ding deihtel thei hileh Lamka mah tela hongpai nawn lung-gulh ahihdan gen hi.Khuga Battalion in a om sungun nahoih tamtak a sepkhiakte lak uah taklat theih khenkhat ahihleh June, 2014 in kum 10 val paitheilou lupna tung ngak Pauginmuang (13) s/o Ginzamuan of Khominthang awlmawh in amau sungah guhlam doctor-te’ enkolsak in, lupna leh thil tuamtuam in panpih uh a, kum 2015 a tuilian ziaka haksatna tuak Zoumunnuam khua leng panpih uh a, huailou in Khuga Dam vehte’ khualna in Dam lutna bul ah toilet set 6 bawlkhia hi. Siamsinna lam Civil leh Defence Service a lunglut tuailaite adi’n free coaching & counselling centre kichi pankhia uh a, Lamka a tuailai tamtak in phattuampih uhi. Amau thakheng dingte leng Khuga Dam ah omta uhi.
LOCAL NEWS:
Kholmun MDC in panpihna pekhia
Lamka, June-3: Kholmun a Tuibuong SDO/BDO office ah tuni zinglam in Khaipao Haokip, MDC (Kholmun) in Tuibuong Sub-Divn.nuai a huihpi, vuahpi’n inn leh lou ahihsiat-te kiang ah govt. guideline dungzui in panpihna pekhia hi. Huai hun ah James Doujapao Haokip, SDO/BDO Tuibuong leh staff te’n uap uhi. Tuibuong Sub-Divn. nuai a huihpi, vuahpi hihsiat ziaka application thak omte DC/CCpur office ah piaklut hita a, DC/CCpur in Imphal ah forwad ding hi’n kigen hi.
Rev. S. Prim Vaiphei in peace award sang ding
Lamka, June-3: Tribal Development, Govt. of Manipur in peace award sang di’n Rev. S. Prim Vaiphei telkhia a , June 14, 2016 in TRI, Chingmeirong ah piakkhiak hiding hi. Ama’n peace (lemna) ding deih in chihtakna tawh naktak a panlak ziakin hiaibang award ngahdia telkhia hi’n kigen hi.
Antang kg.1 ah Rs. 3 azuak di’n theisak
Lamka, June-3: Thangkhosuanmung Guite, EM, ADC (15-Hiangtam Lamka) in ama’ bialsung a National Food Security Act. tawh kisai Rationing agent teng zan in kimuhpih a, mipi khualna ziaka govt in NFSA antang kg 1. Ah Rs.3/- azuakdia abikhiah kuapeuh in zuichiat ding in theisak hi.
Bongbal case ah mi 3 jail ah: 2 kikhahkhia
Lamka, June-3: Bongbal area a T. Lala Vaiphei’ JCB driver kidnap case FIR No. No.24 (5) 2016 CCP-PS U/S 400/365/34 IPC & 25 (1-C) A.Act tungtawn in CCpur Police custody a omlel mi 5- Lunliansiam Vaiphei (22) s/o Letzathang Vaiphei of Salam Patong village,Sadar Hills, Letkhogin Vaiphei (47) s/o Nekthang Vaiphei of Salam Patong Village, Sadar Hills, Mrs.Tingngaineng (30 ) w/o (late) Thanglallian Vaiphei of Salam Patong village, Sadar Hills, Jangkhohao Khongsai @ Haopu (39) s/o Thenkhothang of Pangjol village leh Thenkhosei Baite (35) s/o Khuplet Baite of L.Bualkot village, tuni’n Police te’n JCM court ah pawkhia uhi. CJM in thupiak bang in Police te’n Jail ah Lunliansiam Vaiphei, Letkhogin Mrs.Tingngaineng koih uh a, bail in Jangkhohao Khongsai @ Haopu leh Thenkhosei Baite pawtkhia uhi.
Online tungtawn in SSC exam omding
Lamka, June-3: CCpur Dist. khangthu adia masapen ding in Staff Selection Commission (SSC) saina in Laitui Medico opposite a NEILIT CCpur Extention Centre ah Delhi Police leh CAPFs nuai a Sub Inspector leh CISF nuai a Asst. Sub Inspector laknang in June 4- 7, 2016 sung computer tungtawn in online examination 2016 omding a, CCpur Dist. ah candidate 360 om hi. Morning batch zinglam dak 10:00-12:00 leh, evening batch 2:00-4:00 pm sung hiding a, shitf 1 ah mi 45 zel exam ding uhi.
Salpha Pumbuk ah social work omding
Lamka, June-3: The Singtangmite WhattsApp group makaih in June 4, 2016 zinglam dak 9:30 apan in Hiangtam Lamka a Salpha Pumbuk ah social work omding hi. The Singtangmite WhattsApp group member te ban ah midang phatuam ngai kuapeuh social work ah kuan a, tempawng, tupi, kawite ban ah loupa attan theihnang tawichiat ding in ngen uhi.
World Environment Day, 2016 zat hiding
Lamka, June-3: Autonomous Dist. Council/CCpur leh Divisional Forest Officer, Southern Forest Divn./CCpur pangkhawm in June 5, 2016 (Sunday) sunnung dak 2:30 in Bungmual a Council Complex ah ‘Join the race to make the world a better place’ chih thupi zang in“World Environment Day 2016” zatna leh singnou suanna omding hi. Huai ah KS Tawmbing, Divl.Forest Officer in keynote address gen ding a, huai zawh in Langkhanpau Guite, Chairman ADC/CCpur in thugenna neiding hi. Program zawh nitaklam dak 3:00 in Chairman,ADC/CCpur makaih in MDC member-te leh DFO/CCpur staff te’n singnou suanding uhi.
5-days program on Curriculum Adaptation Training
Lamka, June-3: Mannuamching, IAS, CEO/CCpur in tuni zinglam in Tuibuong govt. Jr. H/S ah SSA nuai a Inclusive Education for Disability (IED)/CCpur in asai "5-days program on Curriculum Adaptation Training' hong in Functional President in T.Goukhomang, ZEO/CCpur pang hi. Huai ah ZEO nuai a school 33 leh CEO nuai a school 24 a teacher-te tel uh a, special teacher 10 te’n June 7, 2016 tan sinsak ding uhi.
CEO in agenna ah Right to Education Act. om akipan govt in kum 14 nuailamte alou theilou a education piak ding chih om ziakin education system kikhek a, khentuam omlou a education piakding kichi RTE Act hi’n gen hi.Training kichi thil thak theihna hi a, training loute kuaman englou ding, nasepna ah improvement om ding ahihdan thei dingin teacher-te hasuan hi.
ZEO in agenna ah SSA/RTE-IED record dungzui in CCpur dist. ah disabled student 940 om a, amaute normal person bang a pilna leh siamna aneihna ding un teacher te’n ni 7 training uh a, tuni a training sepsuah theihna ding in lunglut tak a training ding in hasuan hi. Govt in IED tungtawn in scheme tuamtuam bawlkhia a, huaite disabled person te’n phattuampih ding a panlak hi’n gen hi.
President soisatu action la di’n theisak
Lamka, June-3: Tunitak dak 10:00 velin CCpur Police Station huangsung ah CDSU President (Interim) Th. Thonglunthang Simte soisak a om hi a puang in mi soisatu constable tunga action la ding in CDSU in theisak uhi. Police Station kong a street light nuai a limkil a a om gari 2te Police te’n a sawlkhiak nungun a dinmun uh kanchian dinga vakuanlai constable khat in thu bangmah dong masalou a zep hi’n CDSU Secretary Thangkhanlun Samte in gen a, soisak a om pen Hospital casualty tut hi a, mun 2 kikhui hi’n kigen hi. Hiai tawh kisai OC, CCpur PS in theikhalouhi’n gen a, zan sawt nung a lim kilate paikhe phot ding in Police te’n sawlmah uh hi’n gen hi. District Police te’n thil omdan kanchian masalou a khutkha sekte khengval hi’n CDSU makaite’n gen uh a, thiltung mawhpaih kawm in constable gawtna piak ahih keileh maban a thiltung banghiam a omleh CDSU in mawhpawlou ding hi’n Secy in Hospital casualty ah gen hi.
Naupang khat candle ziakin kangliam
Lamka, June-3: Tunitak dak 8:30 velin lupna kiang a Candle in lupna a puan omte peh in, mi 2 lupna’ ah meikuang om a, Damlenmang(8) s/o Gougin of Torbung kangliam hi. A kiang a lum midang khat bel kang manlou hi’n kigen hi. Tuni nitak mah in hospital casualty ah Damlenmang etkol in om a, a puanteng kangsia hi.
IMPHAL NEWS:
CM makaih All political party-te zinkhia
Imphal, June-3: Chief Minister O. Ibobi makaihna in BJP apan K. Bhabananda, President, BJP; RK Sivachandra, L. Basanta Sharma, Sh. Shantikumar, Th. Bishwajit; LJD apan Karam Shyam; N. Sovakiran, President, MPP; Th. Shyamkumar Presidnet MPTCC (Trinamool Congress); CPI(M) apan Gen. Secy., Shanta Kshtrimayum leh Sarat Salam; Th. Manihar Goswami, AAP, Manihar Goswami JD(S) leh political party dang apan palai te’n Manipur Assembly in Aug 31, 2015 a bill 3 a passed-te India President in lemsakna pedia nawh ding in tuni’n New Delhi ah zin uhi. Nitaklam in T.N. Haokip, President, MPCC; K. Ranjit, MLA leh Congress apan MLA 2- leng New Delhi zuan in zinkhia uhi.Nibang zah hiam paisa in O. Joy, BJP leh Moirangthem Nara, Gen. Secy., CPI-te New Delhi tungkhin uh a, All Political Party delegation-te tawh New Delhi ah kisutuah ding uh hi’n kigen hi. Official thusuak in agendan in delegation teamte’n appointment a ngetma un New Delhi ah internal discussion nei masa ding uh hi’n kigen hi.
Imphal East dist ah 144 Cr PC
Imphal, June-3: District Magistrate/Imphal East district in dankalh a gamtangte’n buaina leh siatna thil ahih ding uh dalna dingin tuni zingsang dak 6.00 akipan Aug 2, 2016 zingsang dak 6.00 tan daih dingin Jiribam bial telin Imphl East district pumpi ah 144 Cr PC puang hi.144 Cr PC zat ahih sungin pawlam munkhat ah mi 5 sanga tamzaw omkhawm phal hilou ding a, hiamhei leh galvan tawikhia leng om theilou ding chih ahi hi. Police leh security duty-te bel 144 Cr PC in huamkhalou ding chi’n Magistrate thusuak in taklang hi.
JCILPS convenor in hilhchian
Imphal, June-3: JCILPS convenor Kh. Ratan in social networking site tuamtuam a ki-upload banah Newspaper khenkhat a kisuah UNLF flag alet laitak lim tungtang a hilhchetna ah amah minsiatsakna dinga bawltom kisuahkhia hi’n gen a, aman helpawl tawh kizopna bangmah neilou hi’n gen hi.Ratan in a genzelna ah ILP movement a buaisiat deihte thilhih hizaw a gen in mipite’n thudik mah lenkip zaw dingin ngen hi.
Thudang kizadan in Kh. Ratan leng tuni’n JCILPS a convenor hihna apan kitawp a, convenor dingin BK Moirangcha in charge la hi’n kigen hi. Thouda Bhabok Leikai a JCILPS office ah tuni a press meet ah BK Moirangcha, Convenor in-charge, JCILPS in Ratan in amah tungah ngawhnate ziaka ILPS phutna a kiphinna a nawngkai louhna dingin kitawp a, Manipur govt. in Ratan tunga ngawhna omte mipi maiah chetna a bawl ding uh hi’n gen hi. Maban a panlak ding dan tawh kisai in May 4, 2016 in general body meeting om ding hi’n leng gen hi.
Chandel district ah tuni’n mass rally om
Chandel, June-3: Chandel District’s Civil Society Organisation (CSO) leh Joint Action Committee (JAC) against construction of District Court Complex-te saina in ‘Revenue Quarter line gei ah District Court Complex’ bawl ding deih lou latsakna leh kum 2015 a Relief fund-te khahkhiak louh mawhpaihna in tuni’n Chandel district HQ ah mass rally om hi’n gen uhi. Rally ahihleh Mini Indoor Stadium ah kipan in Japhou Bazar tawn in DC office Complex ah Rober Singh Kshetrimayum, DC/Chandel kiangah memorandum pia uh a, rally hun ah CSO makai, village chief, khaw tual leh nupi te’n placard tuamtuam tawi uhi. Eally kipat ma in Mini Indoor Stadium ah public meeting om a, huai ah Ws. Kanral Anal, President, CNPO, Ng. Benithan, Convenor, JAC leh Wng. Prem Anal, Secy., JAC te’n thugenna nei uh hi’n leng kigen hi.
KSO te’n govt. kiangah ngetna bawl
Jiribam, June-3: Kuki Students’ Organization (KSO) Jiribam leh Tamenglong branch te’n Jiribam a Contract teacher-te haksatna leh a thilphut-te uh a kisaipih thunei te’n enkai ding in ngetna bawl uh a, teacher-te lunglutna leh haksatna a tuah-te uh etkai ahih keileh education lamah student-te masawnna leng sukha thei hi’n gen uhi. Mun dang tawh teh in education lam leng tuan tual a, hiai tungtang ah govt. in panla dia ngetna bawl uh hi’n leng taklang uhi.
Thadou Students' Assn. te’n thusuah bawl
Imphal, June-3: James Haokip, Gen. Secy., Thadou Students’ Association – GHQ (TSA-GHQ) in tuni a thusuah a bawlna ah Manipur Legislative Assembly in Aug 31, 2015 ni a bill 3 a pass uh tawh kisai in a dinmun uh taklang kawm in thubuai vengsak ding dan gen a, bill 3 –te lakah Protection of Manipur People Bill ah Manipur mi kichi ding-te National Register of Citizen (NRC) 1951 census report leh Village Director (VD) of 1951 a min a om ding leh a khang sawm-te uh hi ding kichi tawh kisai in huai hun in Manipur singtang gam-te ah administrative leh recording system gina om louh banah tribal tam zaw-te lekha sim leh gelh thei lou uh a, huai ziak a tribal-te min NRC leh VD ah om ding gintak huai lou chi’n gen a, huai banah bill-3 te anti-tribal ahihdan tawh kisai in thu tuamtuam taklang a, bill 3-te zukkik ahihlouhleh tribal-te a sukkhakna-te paih khiak masiah TSA, Thadou Inpi, Thadou Youth Assn. leh Thadou Women’s Assn-te pangkhawm in JAC against anti-tribal bills-te makaihna tribal movement gupthu puang uh a, tribal-te lung muan theihna dia Manipur govt. in singtang bial ah India dan bupi nuai a 6th Schedule a zat ding uh chi’n gen a, Manipur govt. leh Central govt. in nam 1 kia deihtelna a gamtang lou ding a ngetna bawl hi’n leng taklang hi.
Transfer and posting
1.M.H. Khan,IAS, Principal Secretary(Consumer Affairs, Food & Public Distribution) as Principal Secretary(MOBC/Adult Edn) & Secretary,State Commission for OBC.
2.BB Sharma,IAS, Commissioner(Adult Edn) as Commissioner(Consumer Affairs, Food & Public Distribution)
3.Th. Gopen Meetei,IAS, Secretary(IFC/Agri/Fisheries/MOBC) & Secretary, State Commission for OBC) as Secretary(IFC/Agri/Fisheries).
TUNI THUPI:
“Mi thudik huai in vai ahawm ding hia? Huchi’n adik leh hat amah na mawhpaih ding hia?” – Job 34: 17
EDITORIAL:
Zuauthu thehdalh a poina...!
I economy dinmun theiloupi in tate’n ahon nget ziakun neilou sasa in ‘smart phone’ tampipi man i leisak ua, huaite bangchibang a zang uh ahiam chih nu-le-pate’n i enzui tuankei uhi. I gam ah smart phone hong om tunglai in ‘sex clip’ atam mahmah a, mi bangzahhiamte’n a ngaihzawngte chizauhuai taktakin lem kilakpih uh a, tamtakte’n a ngaihzawngte utawh a kipolhlai tanpha uh lem kilakpih uh a, tua lemlak leh video-te hong leaked zungzung hun omsek a, vok gou pawltawh, sumliau pawltawh a pumdim sim man hi. Technology a advance hat mahmah a, huai zangsiamloute ihi ua, smart phone i tawi zek leh tumlam gam (western countries) te’ paidan zui ut pahte ihi uhi. Kimawhsak luatna ding bel om pahkei a, kipahpih hilehang leng pilvanglou pipi a kibawl siatna leh kigapna om thei ding tanpha i na ngaihsut ziaklouh uh leng hikha thei hi.
Photoshop tungtawnin lemlak tuamtuam bawl danglam theih a, mobile tungtawn mahin thuzuau tuamtuam vek theihluat ahihdan chiang deuhdeuh hi. Kum 10 val paisa a tumlam gamte’ nuamtalna eilawi in tulai hun in tuakkha hihang chihtheih in om hi. Internet tungtawn a face book leh WhatsApp te’n tulai in i gam hon luah uhi. Tua ah group tuamtuam kibawlin banghiam thiltung a om zek leh second khat sungin leitung pumpi dengsuak ding thil kapkhe thei mawk uhi. Information masa amuh uh dik hia diklou chih leng omlou a muh uleh azak uh hon kapkhiak chiangun tua in mi tamtak sawiling zel a, tamtakte adingin ihmut mawhna suak sek hi. Technology tawh kisai a i advance na uh i zatkhelh (mis-used) ua leh a thuaktu ding eimah ihi lel hi.
Tuni chiangin gam-le-nam it i tam mahmah a, bangchibang a gam-le-nam it ihiam chih aneupen akipan alianpen tan kivel poimawh hi. Internet izat theih uh kipahhuai mahleh, i zatdan uah pilvan poimawh mahmah hi. Ka thuzak leh muhte ‘first information’ dik mah hiam chih velchian leh suichian selou a i kapkhiak pahpahte un mi tamtak su lungphawng a, adik ahih lebel internet zangdik ihi ding uhi. Adik kei leh a kapkhetu (te’n) thuzuau veek hikha ding hi. Tualou in, naupang kum chinglou tanpha mobile hoih taktak tawi i tamta ua, mi piching leng tamtak mahin mobile hoih taktak i kikep chiat ua, information ahat mahmah chih mailouh gending omlou hi. WhatsApp a thu tuamtuam kivekte gam-le-nam hoihna ding deihbang, ahihkeileh a siatna ding deihbang om dingin koihtheih a, poi mahmah hi. Tualou in, fake account zangkawm a inn-mun apan ana chiakchiak, lah ahihna uh theihzawh butlouh kichi bangleng om thei a, mi hunkhop in a blanket nuai u alum kawmin mite tawhphur na dingin a mobile phone uh a zang uh chih haihvual hilou zel hi.
I gam-le-nam maban hoihzawkna ding khualna in Open Secret khat gen ni, tuni(May 3,2016) in YPA Gen HQ level a election om a, candidate 38 lakah mi 17 telkhiakin om uhi. Ni tamlou paisa apan WhatsApp group tuamtuam ah candidate 38 lakah hiaite huaite pawl, huaite hiai group, hiaite hiai ate chih khawngin gen in om zialzial a, tuape’n thil poitak ahi hi. Thudik leng ahithei a, thuzuau leng ahi thei. Internet tungtawn a hibang thil i kapkhiakte un kipumkhatna sangin a selam tunzaw thei ahi hi. YPA kichi Philanthropic Organisation ahi a, amel hih hemlouh deihhuai hi. Joint Philanthropic Organisation (JPO) nuai ah YPA om a, tualou in Philanthropic Organisation tamtak om hi. JPO nuai a om organisation tuamtuam in leng maban ah election hong neih hun uh a om ding a, tua hunchiang in hibang a internet tungtawn a kikaptuahnate kuama’n a chiinlouh uh deihhuai a, huchibang chindan in kipumkhatna sangin a selam tunzaw sek hi. Pathian in mihingte abawl a, Ama bawl tungtawnin society hong piangkhia hi. Civil society/ Philanthropic Organisation a makaite’n lawh neilou in nasem uh a, mahni kipum piak liauliau ahi uhi. Huai kawmin a sung ah MDC/ MLA/ MP ahihkeileh electoral politics kuaman kigolhsak kei ni. Thuzuau thehdalh leh a poina tamtak om a, a khawnung in khetbuk ding thupi mahmah maithei ahi. Pathian hing biate ngen hilou ihi uhiam?
EURO-2016
Group-B Squad:
England ten qualifying ah vualzawhna tang vek in nuamtak in qualify uhi. Amau bel Wales, Russia leh Slovakia-te tawh omkhawm uh a, group stage palsuak zou ngei ding ua gintak hi uh. England Manager Roy Hodgdson in players naktak in khek lamdang a, naupang lam a guan ziakin bangtanhiam tung ngei ding ua gintak hi uh. Wales te’n Chris Coleman nuai ah 1958 a Euro a qualify nung un tutung in kihel nawn pan ua, hiai tan a tun theihna uh kuadang ziak hilou in Real Madrid winger Gareth Bale ziak ahi. Qualifying a kimawl dan uh et in nihna tangkha zou ding ua koih hi uh. Russia te’n qualifying lai in Manager Fabia Capello khek khia uh a, ahihziakin suakta veve ua, himahleh bangmah tung ding ua gintak hilou uhi. Amau group ah thumna a tang uh gintak ahi. Slovakia te bel 2010 World Cup a qualify zawh un Euro ah hong kihel nawn uhi. Amau qualifying ah Spain te nihna ah koihsuk zou ua, Ukraine te leh Spain te zou uhi. Huaiziakin, Slovakia te mawk simmawh theih hilou ding uhi.
ENGLAND
Goalkeepers: Joe Hart (Manchester City), Fraser Forster (Southampton), Tom Heaton (Burnley).
Defenders: Gary Cahill (Chelsea), Chris Smalling (Manchester United), John Stones (Everton), Kyle Walker (Tottenham Hotspur), Ryan Bertrand (Southampton), Danny Rose (Tottenham Hotspur), Nathaniel Clyne (Liverpool).
Midfielders: Dele Alli (Tottenham Hotspur), Ross Barkley (Everton), Eric Dier (Tottenham Hotspur), Jordan Henderson (Liverpool), Adam Lallana (Liverpool), James Milner (Liverpool), Raheem Sterling (Manchester City), Jack Wilshere (Arsenal).
Strikers: Wayne Rooney (Manchester United), Harry Kane (Tottenham Hotspur), Jamie Vardy (Leicester City), Daniel Sturridge (Liverpool), Marcus Rashford (Manchester United).
RUSSIA:
Goalkeepers: Igor Akinfeev (CSKA Moscow), Yuri Lodygin (Zenit St Petersburg), Guilherme (Lokomotiv Moscow).
Defenders: Aleksei Berezutski (CSKA Moscow), Vasili Berezutski (CSKA Moscow), Sergei Ignashevich (CSKA Moscow), Dmitri Kombarov (Spartak Moscow), Roman Neustadter (Schalke), Georgi Schennikov (CSKA Moscow), Roman Shishkin (Lokomotiv Moscow), Igor Smolnikov (Zenit St Petersburg).
Midfielders: Igor Denisov (Dynamo Moscow), Dmitri Torbinski (Krasnodar), Aleksandr Golovin (CSKA Moscow), Denis Glushakov (Spartak Moscow), Oleg Ivanov (Terek Grozny), Pavel Mamaev (Krasnodar), Aleksandr Samedov (Lokomotiv Moscow), Oleg Shatov (Zenit St Petersburg), Roman Shirokov (CSKA Moscow).
Forwards: Artem Dzyuba (Zenit St Petersburg), Aleksandr Kokorin (Zenit St Petersburg), Fedor Smolov (Krasnodar).
SLOVAKIA:
Goalkeepers: Matus Kozacik (Viktoria Plzen), Jan Mucha (Slovan Bratislava), Jan Novota (Rapid Vienna).
Defenders: Peter Pekarik (Hertha Berlin), Milan Skriniar (Sampdoria), Martin Skrtel (Liverpool), Norbert Gyomber (Roma), Jan Durica (Lokomotiv Moscow), Kornel Salata (Slovan Bratislava), Tomas Hubocan (Dinamo Moscow), Dusan Svento (Cologne).
Midfielders: Marek Hamsik (Napoli), Juraj Kucka (AC Milan), Miroslav Stoch (Bursaspor), Vladimir Weiss (Al-Gharafa), Robert Mak (PAOK), Patrik Hrosovsky (Viktoria Plzen), Jan Gregus (Jablonec), Viktor Pecovsky (Zilina), Stanislav Sestak (Ferencvaros), Ondrej Duda (Legia Warsaw).
Forwards: Michal Duris (Viktoria Plzen), Adam Nemec (Willem II).
WALES:
Goalkeepers: Wayne Hennessey (Crystal Palace), Daniel Ward (Liverpool), Owain Fon Williams (Inverness Caledonian Thistle).
Defenders: Ashley Williams (Swansea City), James Chester (West Bromwich Albion), Ben Davies (Tottenham Hotspur), James Collins (West Ham United), Chris Gunter (Reading), Neil Taylor (Swansea City), Jazz Richards (Fulham).
Midfielders: Joe Ledley (Crystal Palace), Joe Allen (Liverpool), David Vaughan (Nottingham Forest), Jonathan Williams (Crystal Palace), David Edwards (Wolverhampton Wanderers), George Williams (Fulham), Aaron Ramsey (Arsenal), Andy King (Leicester City).
Forwards: Gareth Bale (Real Madrid), David Cotterill (Birmingham City), Hal Robson-Kanu (Reading), Simon Church (MK Dons), Sam Vokes (Burnley).
President dingin Khailianthang Tonsing ching
Tuni’n YPA Gen HQ a makai ding telna om
Lamka, June-3: Hiangtam Lamka a YPA GHQ hall ah tuni’n kum 2016-19 sunga YPA Gen HQ makai ding telna om a, pailai paikhawmte’n President dingin Khailianthang Tonsing telching uhi. Hundang banglou in tutung YPA Gen HQ election husa ngaih mahmah a, block leh unit tuamtuam apan candidate 38 in nomination file uh a, scrutiny ah paisuak vek uhi. Zinglam dak 11:00 in vote khiak kipan a, YPA Gen HQ, Central Executive Committee leh Cabinet Member , YPA Gen HQ Advisory Board Member, Honorary Patron, Honorary Life Member, Patron Member leh Life Member, YPA GHQ leh YPA Block apan palai 6 banah leh Adviser teng leh Unit teng apan palai 7 in vote khia uhi.
Kitelna ah Presiding Officer in LT Juan Tonsing pang a, Polling Officer in Rev. Khen P Tombing leh H. Nengsong pang uh a, palai paikhawmte’n candidate 38 lak ah Central Executive Committee(CEC) ding in mi 17 tel uh a, huaite’n amau lakah Officer Bearer ding tel uhi. CEC member dia telching thakte Presiding Officer in kichiamsak a, Rev. E. Paukhanlian, Divn., Supdt, Lamka South Division, EBC in thumsak hi. CEC thakte’n Central Cabinet ding tel uh a, President in Khailianthang Tonsing, Vice President in M. Luahkhanchin, General Secretary in Lianmuanthang Valte, Joint Secretary in K. Thangkhochin leh Thathang Langgel; Finance Secretary in V. Chinkhenmung leh Treasurer in Vungzapau tel uhi.
Tuaban ah, CEC Chairman dingin Chin Ngaih Pau, Vice Chairman di’n Paukhanmawi Guite telching uh a, member in- Thangkhochin Ngaihte, Awnsuanhau, Haukhenpau, V. Khankhup Guite, Khanpau Ngaihte, Singnunsiam Ngaihte, H. Pauzathang Ngaihte leh T. Thangkhangou guang uhi.
Vote khethei ding palai 416 lak ah 359 te’n vote khia uh a, huailak ah valid vote 353 leh invalid vote 6 om hi. Telching thak leh a luite’n June 4, 2016 sunnung dak 3:00 in charge kipe ding uh hi’n kigen hi. Programme teng zawhin Rev. Khen P. Tombing, Sr. Adviser in kipahthu genkawm in thumna in hunkhak hi.
Buaina ziaka misite’ lakah Mathura Supdt of Police leng tel
Mathura ah gam thu ziakin buaina om: mi 24 si
Lucknow, June-3: Uttar Pradesh a Mathura khawpi ah tuni in buaina thupitak om a, tua ah mi 24 si a, misite lakah Mathura a Superintendent of Police Mukul Dwivedi leng telkha chih thu kiza hi. Police leh lou nei gamkekte kalah buaina piang masa hi’n kigen a, tua nungin buaina in mipi ban peh chih ahi hi. Huai ‘anti-encroachment drive’ a thiltung India gamsung adingin chiamtehtham ching hi’n kigen hial hi.
Buaina husa zak phet in security force tamtak leh police in kidelh huan uh a, Police in buaina mun ah mi 368 vel pikhia in khahkhe nailou(detained) in koih uh chihthu kiza hi. Misite laka tel Mathura Supdt of Police Dwivedi ahihleh kum 1995 batch IPS officer hi a, kha 7 lel paisa akipan SP (City) Mathura hihna lenpan ahi hi. Government in mipi khawlna munding leh zalentaka a om theihna munding uh a khualna ziak un ‘Park’ a bawl uh hihbuaisawmte tawh kisukbuaina kalah Supdt of Police Dwivedi leng si kichi hi.
Uttar Pradesh’ Chief Minister Akhilesh Yadav in thiltung tawh suizui hiding chih puang a, Dwivedi tela mi tamtak a sih tungtang uh hoihtaka suizui hiding chi hi. UP a govt bawl Samajwadi Party (SP) adin tuni a thiltung nuam hetlou hidingin gintak-huai sakthu mi tamtak in gen hi. Kum nawn February 2017 velin Uttar Pradesh ah assembly election om ding a, tua hunah UP state govt adingin maizumna tamtak om theiding in leng kilang chih ahi hi. UP a BJP state thupuangtu Vijay Bahadur Pathak in Mathura thiltung tawh kisai gen tuamtuam nei a, Samajwadi Party lam in leng deihkhop in douthuk uhi. Bahujan Samaj Party (BSP) leh Congress leader tuamtuam in leng state Government mawhsakthu gen uhi.
Operation area khua a hausate’n CO puan silhsak
25th Madras Regt. te’n June 5 in Manipur nuse ding
Lamka, June-3: 25-Madras Regt., Khuga Battalion-te’ CCpur dist ah kum 3 vel a omnung un June 5, 2015 in kisuankhe ding uh a, 6th Sikh Light Infantry te’n kheng ding uhi. A kisuankhiak ding ziakun tuni’n Khuga Dam ah farewell programme om a, huai hun official takin zangkei mahle uh Lunminthang Haokip, IAS DC/CCpur, Smt. Mannuamching, IAS, CEO/CCpur banah L. Mangkhogin Haokip, IPS, SP/CCpur leh Khuga Dam area/amau operational bial sunga omkha khua hausa 15 vel leng tel uh a, amau 25-Madrs Regt a Commanding Officer Col Anil Kumar tunga kipah latsakna in Vaiphei (Puandum leh Khiangkawi) silhsak uhi. Mata hausa Lallunkam in agenna ah Khuga Battalion in amau operational area ah bitna pia uh a, a nasep uleh panlakna uh phat-huai chi hi.
Col. Anil Kumar in a genna ah CCpur a omsung ua hausa leh mipi kithuahpihna ziakin zahlaklou in Lamka nuse thei dia a om kipak ahihdan gen a, maban ah leng posting na ding deihtel thei hileh Lamka mah tela hongpai nawn lung-gulh ahihdan gen hi.Khuga Battalion in a om sungun nahoih tamtak a sepkhiakte lak uah taklat theih khenkhat ahihleh June, 2014 in kum 10 val paitheilou lupna tung ngak Pauginmuang (13) s/o Ginzamuan of Khominthang awlmawh in amau sungah guhlam doctor-te’ enkolsak in, lupna leh thil tuamtuam in panpih uh a, kum 2015 a tuilian ziaka haksatna tuak Zoumunnuam khua leng panpih uh a, huailou in Khuga Dam vehte’ khualna in Dam lutna bul ah toilet set 6 bawlkhia hi. Siamsinna lam Civil leh Defence Service a lunglut tuailaite adi’n free coaching & counselling centre kichi pankhia uh a, Lamka a tuailai tamtak in phattuampih uhi. Amau thakheng dingte leng Khuga Dam ah omta uhi.
LOCAL NEWS:
Kholmun MDC in panpihna pekhia
Lamka, June-3: Kholmun a Tuibuong SDO/BDO office ah tuni zinglam in Khaipao Haokip, MDC (Kholmun) in Tuibuong Sub-Divn.nuai a huihpi, vuahpi’n inn leh lou ahihsiat-te kiang ah govt. guideline dungzui in panpihna pekhia hi. Huai hun ah James Doujapao Haokip, SDO/BDO Tuibuong leh staff te’n uap uhi. Tuibuong Sub-Divn. nuai a huihpi, vuahpi hihsiat ziaka application thak omte DC/CCpur office ah piaklut hita a, DC/CCpur in Imphal ah forwad ding hi’n kigen hi.
Rev. S. Prim Vaiphei in peace award sang ding
Lamka, June-3: Tribal Development, Govt. of Manipur in peace award sang di’n Rev. S. Prim Vaiphei telkhia a , June 14, 2016 in TRI, Chingmeirong ah piakkhiak hiding hi. Ama’n peace (lemna) ding deih in chihtakna tawh naktak a panlak ziakin hiaibang award ngahdia telkhia hi’n kigen hi.
Antang kg.1 ah Rs. 3 azuak di’n theisak
Lamka, June-3: Thangkhosuanmung Guite, EM, ADC (15-Hiangtam Lamka) in ama’ bialsung a National Food Security Act. tawh kisai Rationing agent teng zan in kimuhpih a, mipi khualna ziaka govt in NFSA antang kg 1. Ah Rs.3/- azuakdia abikhiah kuapeuh in zuichiat ding in theisak hi.
Bongbal case ah mi 3 jail ah: 2 kikhahkhia
Lamka, June-3: Bongbal area a T. Lala Vaiphei’ JCB driver kidnap case FIR No. No.24 (5) 2016 CCP-PS U/S 400/365/34 IPC & 25 (1-C) A.Act tungtawn in CCpur Police custody a omlel mi 5- Lunliansiam Vaiphei (22) s/o Letzathang Vaiphei of Salam Patong village,Sadar Hills, Letkhogin Vaiphei (47) s/o Nekthang Vaiphei of Salam Patong Village, Sadar Hills, Mrs.Tingngaineng (30 ) w/o (late) Thanglallian Vaiphei of Salam Patong village, Sadar Hills, Jangkhohao Khongsai @ Haopu (39) s/o Thenkhothang of Pangjol village leh Thenkhosei Baite (35) s/o Khuplet Baite of L.Bualkot village, tuni’n Police te’n JCM court ah pawkhia uhi. CJM in thupiak bang in Police te’n Jail ah Lunliansiam Vaiphei, Letkhogin Mrs.Tingngaineng koih uh a, bail in Jangkhohao Khongsai @ Haopu leh Thenkhosei Baite pawtkhia uhi.
Online tungtawn in SSC exam omding
Lamka, June-3: CCpur Dist. khangthu adia masapen ding in Staff Selection Commission (SSC) saina in Laitui Medico opposite a NEILIT CCpur Extention Centre ah Delhi Police leh CAPFs nuai a Sub Inspector leh CISF nuai a Asst. Sub Inspector laknang in June 4- 7, 2016 sung computer tungtawn in online examination 2016 omding a, CCpur Dist. ah candidate 360 om hi. Morning batch zinglam dak 10:00-12:00 leh, evening batch 2:00-4:00 pm sung hiding a, shitf 1 ah mi 45 zel exam ding uhi.
Salpha Pumbuk ah social work omding
Lamka, June-3: The Singtangmite WhattsApp group makaih in June 4, 2016 zinglam dak 9:30 apan in Hiangtam Lamka a Salpha Pumbuk ah social work omding hi. The Singtangmite WhattsApp group member te ban ah midang phatuam ngai kuapeuh social work ah kuan a, tempawng, tupi, kawite ban ah loupa attan theihnang tawichiat ding in ngen uhi.
World Environment Day, 2016 zat hiding
Lamka, June-3: Autonomous Dist. Council/CCpur leh Divisional Forest Officer, Southern Forest Divn./CCpur pangkhawm in June 5, 2016 (Sunday) sunnung dak 2:30 in Bungmual a Council Complex ah ‘Join the race to make the world a better place’ chih thupi zang in“World Environment Day 2016” zatna leh singnou suanna omding hi. Huai ah KS Tawmbing, Divl.Forest Officer in keynote address gen ding a, huai zawh in Langkhanpau Guite, Chairman ADC/CCpur in thugenna neiding hi. Program zawh nitaklam dak 3:00 in Chairman,ADC/CCpur makaih in MDC member-te leh DFO/CCpur staff te’n singnou suanding uhi.
5-days program on Curriculum Adaptation Training
Lamka, June-3: Mannuamching, IAS, CEO/CCpur in tuni zinglam in Tuibuong govt. Jr. H/S ah SSA nuai a Inclusive Education for Disability (IED)/CCpur in asai "5-days program on Curriculum Adaptation Training' hong in Functional President in T.Goukhomang, ZEO/CCpur pang hi. Huai ah ZEO nuai a school 33 leh CEO nuai a school 24 a teacher-te tel uh a, special teacher 10 te’n June 7, 2016 tan sinsak ding uhi.
CEO in agenna ah Right to Education Act. om akipan govt in kum 14 nuailamte alou theilou a education piak ding chih om ziakin education system kikhek a, khentuam omlou a education piakding kichi RTE Act hi’n gen hi.Training kichi thil thak theihna hi a, training loute kuaman englou ding, nasepna ah improvement om ding ahihdan thei dingin teacher-te hasuan hi.
ZEO in agenna ah SSA/RTE-IED record dungzui in CCpur dist. ah disabled student 940 om a, amaute normal person bang a pilna leh siamna aneihna ding un teacher te’n ni 7 training uh a, tuni a training sepsuah theihna ding in lunglut tak a training ding in hasuan hi. Govt in IED tungtawn in scheme tuamtuam bawlkhia a, huaite disabled person te’n phattuampih ding a panlak hi’n gen hi.
President soisatu action la di’n theisak
Lamka, June-3: Tunitak dak 10:00 velin CCpur Police Station huangsung ah CDSU President (Interim) Th. Thonglunthang Simte soisak a om hi a puang in mi soisatu constable tunga action la ding in CDSU in theisak uhi. Police Station kong a street light nuai a limkil a a om gari 2te Police te’n a sawlkhiak nungun a dinmun uh kanchian dinga vakuanlai constable khat in thu bangmah dong masalou a zep hi’n CDSU Secretary Thangkhanlun Samte in gen a, soisak a om pen Hospital casualty tut hi a, mun 2 kikhui hi’n kigen hi. Hiai tawh kisai OC, CCpur PS in theikhalouhi’n gen a, zan sawt nung a lim kilate paikhe phot ding in Police te’n sawlmah uh hi’n gen hi. District Police te’n thil omdan kanchian masalou a khutkha sekte khengval hi’n CDSU makaite’n gen uh a, thiltung mawhpaih kawm in constable gawtna piak ahih keileh maban a thiltung banghiam a omleh CDSU in mawhpawlou ding hi’n Secy in Hospital casualty ah gen hi.
Naupang khat candle ziakin kangliam
Lamka, June-3: Tunitak dak 8:30 velin lupna kiang a Candle in lupna a puan omte peh in, mi 2 lupna’ ah meikuang om a, Damlenmang(8) s/o Gougin of Torbung kangliam hi. A kiang a lum midang khat bel kang manlou hi’n kigen hi. Tuni nitak mah in hospital casualty ah Damlenmang etkol in om a, a puanteng kangsia hi.
IMPHAL NEWS:
CM makaih All political party-te zinkhia
Imphal, June-3: Chief Minister O. Ibobi makaihna in BJP apan K. Bhabananda, President, BJP; RK Sivachandra, L. Basanta Sharma, Sh. Shantikumar, Th. Bishwajit; LJD apan Karam Shyam; N. Sovakiran, President, MPP; Th. Shyamkumar Presidnet MPTCC (Trinamool Congress); CPI(M) apan Gen. Secy., Shanta Kshtrimayum leh Sarat Salam; Th. Manihar Goswami, AAP, Manihar Goswami JD(S) leh political party dang apan palai te’n Manipur Assembly in Aug 31, 2015 a bill 3 a passed-te India President in lemsakna pedia nawh ding in tuni’n New Delhi ah zin uhi. Nitaklam in T.N. Haokip, President, MPCC; K. Ranjit, MLA leh Congress apan MLA 2- leng New Delhi zuan in zinkhia uhi.Nibang zah hiam paisa in O. Joy, BJP leh Moirangthem Nara, Gen. Secy., CPI-te New Delhi tungkhin uh a, All Political Party delegation-te tawh New Delhi ah kisutuah ding uh hi’n kigen hi. Official thusuak in agendan in delegation teamte’n appointment a ngetma un New Delhi ah internal discussion nei masa ding uh hi’n kigen hi.
Imphal East dist ah 144 Cr PC
Imphal, June-3: District Magistrate/Imphal East district in dankalh a gamtangte’n buaina leh siatna thil ahih ding uh dalna dingin tuni zingsang dak 6.00 akipan Aug 2, 2016 zingsang dak 6.00 tan daih dingin Jiribam bial telin Imphl East district pumpi ah 144 Cr PC puang hi.144 Cr PC zat ahih sungin pawlam munkhat ah mi 5 sanga tamzaw omkhawm phal hilou ding a, hiamhei leh galvan tawikhia leng om theilou ding chih ahi hi. Police leh security duty-te bel 144 Cr PC in huamkhalou ding chi’n Magistrate thusuak in taklang hi.
JCILPS convenor in hilhchian
Imphal, June-3: JCILPS convenor Kh. Ratan in social networking site tuamtuam a ki-upload banah Newspaper khenkhat a kisuah UNLF flag alet laitak lim tungtang a hilhchetna ah amah minsiatsakna dinga bawltom kisuahkhia hi’n gen a, aman helpawl tawh kizopna bangmah neilou hi’n gen hi.Ratan in a genzelna ah ILP movement a buaisiat deihte thilhih hizaw a gen in mipite’n thudik mah lenkip zaw dingin ngen hi.
Thudang kizadan in Kh. Ratan leng tuni’n JCILPS a convenor hihna apan kitawp a, convenor dingin BK Moirangcha in charge la hi’n kigen hi. Thouda Bhabok Leikai a JCILPS office ah tuni a press meet ah BK Moirangcha, Convenor in-charge, JCILPS in Ratan in amah tungah ngawhnate ziaka ILPS phutna a kiphinna a nawngkai louhna dingin kitawp a, Manipur govt. in Ratan tunga ngawhna omte mipi maiah chetna a bawl ding uh hi’n gen hi. Maban a panlak ding dan tawh kisai in May 4, 2016 in general body meeting om ding hi’n leng gen hi.
Chandel district ah tuni’n mass rally om
Chandel, June-3: Chandel District’s Civil Society Organisation (CSO) leh Joint Action Committee (JAC) against construction of District Court Complex-te saina in ‘Revenue Quarter line gei ah District Court Complex’ bawl ding deih lou latsakna leh kum 2015 a Relief fund-te khahkhiak louh mawhpaihna in tuni’n Chandel district HQ ah mass rally om hi’n gen uhi. Rally ahihleh Mini Indoor Stadium ah kipan in Japhou Bazar tawn in DC office Complex ah Rober Singh Kshetrimayum, DC/Chandel kiangah memorandum pia uh a, rally hun ah CSO makai, village chief, khaw tual leh nupi te’n placard tuamtuam tawi uhi. Eally kipat ma in Mini Indoor Stadium ah public meeting om a, huai ah Ws. Kanral Anal, President, CNPO, Ng. Benithan, Convenor, JAC leh Wng. Prem Anal, Secy., JAC te’n thugenna nei uh hi’n leng kigen hi.
KSO te’n govt. kiangah ngetna bawl
Jiribam, June-3: Kuki Students’ Organization (KSO) Jiribam leh Tamenglong branch te’n Jiribam a Contract teacher-te haksatna leh a thilphut-te uh a kisaipih thunei te’n enkai ding in ngetna bawl uh a, teacher-te lunglutna leh haksatna a tuah-te uh etkai ahih keileh education lamah student-te masawnna leng sukha thei hi’n gen uhi. Mun dang tawh teh in education lam leng tuan tual a, hiai tungtang ah govt. in panla dia ngetna bawl uh hi’n leng taklang uhi.
Thadou Students' Assn. te’n thusuah bawl
Imphal, June-3: James Haokip, Gen. Secy., Thadou Students’ Association – GHQ (TSA-GHQ) in tuni a thusuah a bawlna ah Manipur Legislative Assembly in Aug 31, 2015 ni a bill 3 a pass uh tawh kisai in a dinmun uh taklang kawm in thubuai vengsak ding dan gen a, bill 3 –te lakah Protection of Manipur People Bill ah Manipur mi kichi ding-te National Register of Citizen (NRC) 1951 census report leh Village Director (VD) of 1951 a min a om ding leh a khang sawm-te uh hi ding kichi tawh kisai in huai hun in Manipur singtang gam-te ah administrative leh recording system gina om louh banah tribal tam zaw-te lekha sim leh gelh thei lou uh a, huai ziak a tribal-te min NRC leh VD ah om ding gintak huai lou chi’n gen a, huai banah bill-3 te anti-tribal ahihdan tawh kisai in thu tuamtuam taklang a, bill 3-te zukkik ahihlouhleh tribal-te a sukkhakna-te paih khiak masiah TSA, Thadou Inpi, Thadou Youth Assn. leh Thadou Women’s Assn-te pangkhawm in JAC against anti-tribal bills-te makaihna tribal movement gupthu puang uh a, tribal-te lung muan theihna dia Manipur govt. in singtang bial ah India dan bupi nuai a 6th Schedule a zat ding uh chi’n gen a, Manipur govt. leh Central govt. in nam 1 kia deihtelna a gamtang lou ding a ngetna bawl hi’n leng taklang hi.
Transfer and posting
1.M.H. Khan,IAS, Principal Secretary(Consumer Affairs, Food & Public Distribution) as Principal Secretary(MOBC/Adult Edn) & Secretary,State Commission for OBC.
2.BB Sharma,IAS, Commissioner(Adult Edn) as Commissioner(Consumer Affairs, Food & Public Distribution)
3.Th. Gopen Meetei,IAS, Secretary(IFC/Agri/Fisheries/MOBC) & Secretary, State Commission for OBC) as Secretary(IFC/Agri/Fisheries).
TUNI THUPI:
“Mi thudik huai in vai ahawm ding hia? Huchi’n adik leh hat amah na mawhpaih ding hia?” – Job 34: 17
EDITORIAL:
Zuauthu thehdalh a poina...!
I economy dinmun theiloupi in tate’n ahon nget ziakun neilou sasa in ‘smart phone’ tampipi man i leisak ua, huaite bangchibang a zang uh ahiam chih nu-le-pate’n i enzui tuankei uhi. I gam ah smart phone hong om tunglai in ‘sex clip’ atam mahmah a, mi bangzahhiamte’n a ngaihzawngte chizauhuai taktakin lem kilakpih uh a, tamtakte’n a ngaihzawngte utawh a kipolhlai tanpha uh lem kilakpih uh a, tua lemlak leh video-te hong leaked zungzung hun omsek a, vok gou pawltawh, sumliau pawltawh a pumdim sim man hi. Technology a advance hat mahmah a, huai zangsiamloute ihi ua, smart phone i tawi zek leh tumlam gam (western countries) te’ paidan zui ut pahte ihi uhi. Kimawhsak luatna ding bel om pahkei a, kipahpih hilehang leng pilvanglou pipi a kibawl siatna leh kigapna om thei ding tanpha i na ngaihsut ziaklouh uh leng hikha thei hi.
Photoshop tungtawnin lemlak tuamtuam bawl danglam theih a, mobile tungtawn mahin thuzuau tuamtuam vek theihluat ahihdan chiang deuhdeuh hi. Kum 10 val paisa a tumlam gamte’ nuamtalna eilawi in tulai hun in tuakkha hihang chihtheih in om hi. Internet tungtawn a face book leh WhatsApp te’n tulai in i gam hon luah uhi. Tua ah group tuamtuam kibawlin banghiam thiltung a om zek leh second khat sungin leitung pumpi dengsuak ding thil kapkhe thei mawk uhi. Information masa amuh uh dik hia diklou chih leng omlou a muh uleh azak uh hon kapkhiak chiangun tua in mi tamtak sawiling zel a, tamtakte adingin ihmut mawhna suak sek hi. Technology tawh kisai a i advance na uh i zatkhelh (mis-used) ua leh a thuaktu ding eimah ihi lel hi.
Tuni chiangin gam-le-nam it i tam mahmah a, bangchibang a gam-le-nam it ihiam chih aneupen akipan alianpen tan kivel poimawh hi. Internet izat theih uh kipahhuai mahleh, i zatdan uah pilvan poimawh mahmah hi. Ka thuzak leh muhte ‘first information’ dik mah hiam chih velchian leh suichian selou a i kapkhiak pahpahte un mi tamtak su lungphawng a, adik ahih lebel internet zangdik ihi ding uhi. Adik kei leh a kapkhetu (te’n) thuzuau veek hikha ding hi. Tualou in, naupang kum chinglou tanpha mobile hoih taktak tawi i tamta ua, mi piching leng tamtak mahin mobile hoih taktak i kikep chiat ua, information ahat mahmah chih mailouh gending omlou hi. WhatsApp a thu tuamtuam kivekte gam-le-nam hoihna ding deihbang, ahihkeileh a siatna ding deihbang om dingin koihtheih a, poi mahmah hi. Tualou in, fake account zangkawm a inn-mun apan ana chiakchiak, lah ahihna uh theihzawh butlouh kichi bangleng om thei a, mi hunkhop in a blanket nuai u alum kawmin mite tawhphur na dingin a mobile phone uh a zang uh chih haihvual hilou zel hi.
I gam-le-nam maban hoihzawkna ding khualna in Open Secret khat gen ni, tuni(May 3,2016) in YPA Gen HQ level a election om a, candidate 38 lakah mi 17 telkhiakin om uhi. Ni tamlou paisa apan WhatsApp group tuamtuam ah candidate 38 lakah hiaite huaite pawl, huaite hiai group, hiaite hiai ate chih khawngin gen in om zialzial a, tuape’n thil poitak ahi hi. Thudik leng ahithei a, thuzuau leng ahi thei. Internet tungtawn a hibang thil i kapkhiakte un kipumkhatna sangin a selam tunzaw thei ahi hi. YPA kichi Philanthropic Organisation ahi a, amel hih hemlouh deihhuai hi. Joint Philanthropic Organisation (JPO) nuai ah YPA om a, tualou in Philanthropic Organisation tamtak om hi. JPO nuai a om organisation tuamtuam in leng maban ah election hong neih hun uh a om ding a, tua hunchiang in hibang a internet tungtawn a kikaptuahnate kuama’n a chiinlouh uh deihhuai a, huchibang chindan in kipumkhatna sangin a selam tunzaw sek hi. Pathian in mihingte abawl a, Ama bawl tungtawnin society hong piangkhia hi. Civil society/ Philanthropic Organisation a makaite’n lawh neilou in nasem uh a, mahni kipum piak liauliau ahi uhi. Huai kawmin a sung ah MDC/ MLA/ MP ahihkeileh electoral politics kuaman kigolhsak kei ni. Thuzuau thehdalh leh a poina tamtak om a, a khawnung in khetbuk ding thupi mahmah maithei ahi. Pathian hing biate ngen hilou ihi uhiam?
EURO-2016
Group-B Squad:
England ten qualifying ah vualzawhna tang vek in nuamtak in qualify uhi. Amau bel Wales, Russia leh Slovakia-te tawh omkhawm uh a, group stage palsuak zou ngei ding ua gintak hi uh. England Manager Roy Hodgdson in players naktak in khek lamdang a, naupang lam a guan ziakin bangtanhiam tung ngei ding ua gintak hi uh. Wales te’n Chris Coleman nuai ah 1958 a Euro a qualify nung un tutung in kihel nawn pan ua, hiai tan a tun theihna uh kuadang ziak hilou in Real Madrid winger Gareth Bale ziak ahi. Qualifying a kimawl dan uh et in nihna tangkha zou ding ua koih hi uh. Russia te’n qualifying lai in Manager Fabia Capello khek khia uh a, ahihziakin suakta veve ua, himahleh bangmah tung ding ua gintak hilou uhi. Amau group ah thumna a tang uh gintak ahi. Slovakia te bel 2010 World Cup a qualify zawh un Euro ah hong kihel nawn uhi. Amau qualifying ah Spain te nihna ah koihsuk zou ua, Ukraine te leh Spain te zou uhi. Huaiziakin, Slovakia te mawk simmawh theih hilou ding uhi.
ENGLAND
Goalkeepers: Joe Hart (Manchester City), Fraser Forster (Southampton), Tom Heaton (Burnley).
Defenders: Gary Cahill (Chelsea), Chris Smalling (Manchester United), John Stones (Everton), Kyle Walker (Tottenham Hotspur), Ryan Bertrand (Southampton), Danny Rose (Tottenham Hotspur), Nathaniel Clyne (Liverpool).
Midfielders: Dele Alli (Tottenham Hotspur), Ross Barkley (Everton), Eric Dier (Tottenham Hotspur), Jordan Henderson (Liverpool), Adam Lallana (Liverpool), James Milner (Liverpool), Raheem Sterling (Manchester City), Jack Wilshere (Arsenal).
Strikers: Wayne Rooney (Manchester United), Harry Kane (Tottenham Hotspur), Jamie Vardy (Leicester City), Daniel Sturridge (Liverpool), Marcus Rashford (Manchester United).
RUSSIA:
Goalkeepers: Igor Akinfeev (CSKA Moscow), Yuri Lodygin (Zenit St Petersburg), Guilherme (Lokomotiv Moscow).
Defenders: Aleksei Berezutski (CSKA Moscow), Vasili Berezutski (CSKA Moscow), Sergei Ignashevich (CSKA Moscow), Dmitri Kombarov (Spartak Moscow), Roman Neustadter (Schalke), Georgi Schennikov (CSKA Moscow), Roman Shishkin (Lokomotiv Moscow), Igor Smolnikov (Zenit St Petersburg).
Midfielders: Igor Denisov (Dynamo Moscow), Dmitri Torbinski (Krasnodar), Aleksandr Golovin (CSKA Moscow), Denis Glushakov (Spartak Moscow), Oleg Ivanov (Terek Grozny), Pavel Mamaev (Krasnodar), Aleksandr Samedov (Lokomotiv Moscow), Oleg Shatov (Zenit St Petersburg), Roman Shirokov (CSKA Moscow).
Forwards: Artem Dzyuba (Zenit St Petersburg), Aleksandr Kokorin (Zenit St Petersburg), Fedor Smolov (Krasnodar).
SLOVAKIA:
Goalkeepers: Matus Kozacik (Viktoria Plzen), Jan Mucha (Slovan Bratislava), Jan Novota (Rapid Vienna).
Defenders: Peter Pekarik (Hertha Berlin), Milan Skriniar (Sampdoria), Martin Skrtel (Liverpool), Norbert Gyomber (Roma), Jan Durica (Lokomotiv Moscow), Kornel Salata (Slovan Bratislava), Tomas Hubocan (Dinamo Moscow), Dusan Svento (Cologne).
Midfielders: Marek Hamsik (Napoli), Juraj Kucka (AC Milan), Miroslav Stoch (Bursaspor), Vladimir Weiss (Al-Gharafa), Robert Mak (PAOK), Patrik Hrosovsky (Viktoria Plzen), Jan Gregus (Jablonec), Viktor Pecovsky (Zilina), Stanislav Sestak (Ferencvaros), Ondrej Duda (Legia Warsaw).
Forwards: Michal Duris (Viktoria Plzen), Adam Nemec (Willem II).
WALES:
Goalkeepers: Wayne Hennessey (Crystal Palace), Daniel Ward (Liverpool), Owain Fon Williams (Inverness Caledonian Thistle).
Defenders: Ashley Williams (Swansea City), James Chester (West Bromwich Albion), Ben Davies (Tottenham Hotspur), James Collins (West Ham United), Chris Gunter (Reading), Neil Taylor (Swansea City), Jazz Richards (Fulham).
Midfielders: Joe Ledley (Crystal Palace), Joe Allen (Liverpool), David Vaughan (Nottingham Forest), Jonathan Williams (Crystal Palace), David Edwards (Wolverhampton Wanderers), George Williams (Fulham), Aaron Ramsey (Arsenal), Andy King (Leicester City).
Forwards: Gareth Bale (Real Madrid), David Cotterill (Birmingham City), Hal Robson-Kanu (Reading), Simon Church (MK Dons), Sam Vokes (Burnley).
No comments:
Post a Comment