EDITORIAL
Lamka khawpi leh tui
United Nations Organisation (UNO) in climate change ahihkeileh Global warming tawh kisai in khawlum deuhdeuh tungtang leh sing-le-guate’ banah luidungte humbit ding a poimawhdan a tangkoupih uh thildik mah ahihdan hong tangtung touzelin tu in eilak mahmah hong sukhata hi. India a state bangzahhiam ah khawlum in mi hunkhop haai lumta a, tukum in bangzah a sih tuahbeh lai ding hiam chih theihngam huailou hi. Huchi kalah, Lamka khawpi a khawlumdan uang deuhdeuh a, khawlum i thuak nungun tui lam ah haksatna bangzahta in i tuak lai ding uhiam chih theihzawh hilou hi.
Khaw hun kiheidan lamdang mahmah a, Lamka ah vuah azuk leh Bishnupur/ Moirang area ah zua himhim zulou thepthup zel a, Imphal ah nisa viuveu mai chih khawng ahi a, India a state tamtak ah ni asat lai in state hunkhop mah ah vuah tamluat ziakin tuilian in khawpi khekhat tum(submerged) chih khawng gen in om sek hi. Ahi a, i gen ut-te laka poimawh mahmah khat ahihleh, Lamka khawpi sungah vuah tamtak zu leleng ahuih pe’n lum humhum in omtheita mawk a, tua in ngaihtuahna sunuam hetlou hi.
Vuahzu leh nisa thutuam hitaleh ahuih lum hehu pe’n bangziak hiding hiam chih ngaihtuahna nei theite adingin ngaihsuttham pha hi. Jhum cultivation(tuilou/wet cultivation) i pibawl mahmah ua, a loutheilou leng hikha in teh, ahihkeileh, luiguam a suang leh piaunel om sunsunte i lakkhiak khiak ziak uh leng hikha in teh, sing-le-gua i neih sunsunte tu in melmuh phak hinawntalou uhi. Luiguamte keugawp, sing-le-loute lah vulgawpta ahihman in i maban ua khawlum pe’n vaigam i gengente’ sangin hong khauhzaw lai maithei hi. Vaigam ah bel a luidungte uh humbit uh a, sing-le-gua om kei leleng meivak kiningching a ngah ziakun a zia om a, huchih lai in leng kumteng in khawlum thuaklah in mihing aza aza in si veve uhi. Eilawi in amau thuak bang thuak tazen lehang bang i suakding ua chih ngaihngam huailou hi.
bangtanhiam paisa akipan Pathian’ vualzawlna vuahtui hongzu a, a ziazia om hi. Huchi hi keileh Lamka khawpi ah tui haksatna bangzahta a uang ding ahiam chihtheih in om hi. Tui (water) kichi mihingte’ adingin a loutheilou ahi hu. Tuni in akisaipih PHED in a ngaihtuah ding uleh a kisakkholhna ding uh tamtak om hi. Tunung sawtlou in vuahtui hong kangin khaal hun hongtung leh mipite tuibuai in ibuai nawn ding hi. Zone I- Koite Lui, Zone-II Lanva lui leh Zone-III Khuga-lui tungtawn in bangchileh mipite’ poimawh zah tui supply a om theiding hiam chih tuhun a a kisakkholh uh poimawh mahmah hi.
Lamka khawpi adia tuinek supply ding tui kiningching mahmah hi. Lanva lui leh Koite lui bel kingakna taktak tham ching hikei mahleh Khuga Dam akipan tuinek laklutna pen poimawh petmah hi. Khuga Dam a tuilakna munpi akipan Lamka khawpi sung supply thei ding tui kiningching (sufficient) om ahihdan theih hi a, tua ziakin a kisaipih department in khaw khaal hun ding amuh kholh uh kisam hi. Electricity tawh kisai privatise ahita a, MSDPCL khut ah om in tuanung nasatakin a paidan (system) hong kikheng a, pre-paid telin paidan tuamtuam hong omkhia hi. State govt in leng water supply tawh kisai privatise bawl le uh mipite’n a hamphatpih zawkha diam chih theihin om hi. Ahih ziakin, hibang lentu ding private company muanhuai leh honglut ut i gam ah a om diam chih hizel hi.
I gam ah tulelin bel tui kidaih tadih a, ahih ziakin azat dan i siamlouh ziak uleng hithei a, hiai tungtang ah kihilhpilna (awareness) neih tanpha poimawh ding hi. Mi tamtakin tui alei lai un tamtak in bangmahlou dingin a tanky uah tui leetsak ziahziah mai uh chih ahi a, lui/guam khawng ah athawn in kai khesak liahliah uh chih ahi hu. Tua ziakin, Lamka khawpi supply zou ding tui kiningching mahmah tadih a, himahleh, bangchileh mipite’n tui leilou a khawsa thei ding i hihiam chih ngaihtuah poimawh hi. Mizoram khawp Aizawl te’n bangchibanga tuila uhiam, NCT Delhi te’n bangchibanga tui hawmzak uhiam chihte bang leng ngaihsut taktak poimawh mahmah hi.
Re-exam ah Science topper fail
Bihar ah Class-XII rank holder 13 in exam thak uh
Patna, June-4: Bihar Class-XII result puankhiak huna Humanities subject full mark 500 laka 444 muh ziaka Topper hihna latu, Ruby Rai in local media-te apan ‘Political Science’ bang subject hiam chih dotna adawn hun ah ‘Cooking’ tawh kisai ahihdan agen nung in thubuai sautak piang a, rank holder dang khenkhat inleng dotna haksalou chikchik te a dawn theihlouh ziakun tuni’n exam pethak dinga theihsak hi uhi.
Bihar School Examination Board in rank holder 14 kiang ah tuni a exam pe thak ding a theihsakna apiak ah Humanities Topper kihel lou a, damtheihlouhna ziakin mundang a zinkhia hi’n apianna pa’n Bihar Board (BSEB) kiangah gelhthawh in laithon khak hi. Ruby leh Science topper Saurabh Kumar bel Bishun Rai College, Bhagwanpur, Vaishali district akipan hi uh a, Media tungtawn in minsiatna liantak tuak uhi.
Science stream akipan Saurabh Shrestha inleng full mark 500 lakah 485 mu mahleh Science tawh kisai dotna pang-ngai tanpha dawng khial a, local media-te’n Electron leh Proton adot lai un theichianlou a, tuni a exam apiak thak hun ah fail hi’n leng kigen hi. Thusuak dang in agendan in tuni a exam thak hun ah kihellou in Rajashthan a Medical entrance a interview dia zinkhia ahihdan apianna pa’n gen hi.
Ruby Rai in local media-te interview hunah, Class-XII a subject omzah tanpha dawng theilou a, Political Science leng “Prodical Science” chi’n gen hi. Tuni a exam dia akuanlouh tawh kisai anu gendan in ni bangzah hiam apan adamtheihna kiam a, BSEB in exam pethak dia atheihsak ziaka kingaisia in muntuam ah ensak uh chi hi. Re-exam a telloute action khauhtak lak hiding a BSEB chairman Lalkeshwar Prasad in thupuan abawl dungzui in tuni mah in thupukna la uh a, Bihar Board in minsiatna liantak tuak hi.
Kidney racket tungtang ah mi 5 matin om
New Delhi, June-4: Delhi Police te’n kal (kidney) zuak a kipei ziakin mi 5 man ua, tualakah Apollo hospital a sem mi 2 leng telkha chi uhi. Amau tawh kizopna nei midang 3 leng mankhawm uh hidanin gen uhi. DCP South East Mandeep Singh Randhawa in media te mai a gendanin, mat a omte’ lakah Appolo hospital asem doctor te’ adia Personal secretaries Aditya Singh leh Shailesh Saxena-te leng hikha ua, amau kizoppih midang 3 Aseem Sikdar, Satya Prakash leh Devashish Moulik te leng matin omta uh chi hi. West Bengal, UP leh India gamsung mun tuamtuam apan khawsak haksa deuhte Delhi ah kipawtung sekin a kal (kidney) uh Rs 3/4 lakhs in zuaksak sek uh chi uhi.
Afghanistan-India Friendship Dam tuni’n honkhiakin om
PM Modi in gam tuamtuam 5 pha dingin zinkhia
New Delhi, June-4: Prime Minister Narendra Modi in tuni in gam tuamtuam 5 pha dingin zinkhia a,aman Afghanistan, Qatar, Switzerland, US leh Mexico phading chihthu om hi. Tuni nitak a Afghanistan gam atun phet in Airport ah amah vaidawnna thupitak om a, tua zawhin PM Modi in ‘Afghanistan-India Friendship Dam’ kichi hunpaisa a ‘Salma Dam’ chih a om sek kibawlthak hong hi. Huai hunah Afghan President Ashraf Ghani telin mi poimawh tamtak tel uhi. Huai Dam in electricity 42 Mega Watt piang khesak zouding chih hi a, loubawlna adingin gam 75 ,000 hectares ah a poimawhzah tui pekhe ding chih ahi hi. Afghanistan leh India kalah kizopna hoihzaw leh thukzawsem om theihna ding telin thu tuamtuam genkhawm uh chihthu om hi.
Afghanistan gam apan Prime Minister Modi leh a teamte’n tunitak sawt nungin energy tawh kisai gam hausa mahmah Qatar gam zuanding uh hidanin kigen hi. Huai hunah energy, trade leh investment partnership tungtang houlim ding uh a, Workers' Camp a om India nasem mite tawh leng Prime Minister Modi kimu ding uh hi’n kigen hi. Qatar ah tulelin India mi nitenga kilawh 6,00,000 vel om hi’n kigen a, Prime Minister Modi khualzinna in gen neiban mahmah ding chih ahi hi, PM Modi in business leader tuamtuamte leng kimuhpih in kihouna nei ding uh a, tua in India leh Qatar gam nih kala kisumdawntuahna leng hatsak sem ding ahi kichi hi. Modi bel Qatar akipan Switzerland zuan ding a,huai ah ni 2 a om sung in
Swiss President Schneider- Ammann tawh ‘black money’ tungtang a genkhawm uh gintak ahi hi. Aman Switzerland akipan Mexico gam phading hi.
India in ‘48-member Nuclear Suppliers Group’ ah member hih asawm ziakin Modi in huai thu tha-it mahmah hi’n kigen hi. June 7, 2016 chiangin Washington ah Modi leh US President Obama kihou ding uh a, huai pe’n leitung in aguk in ngaihven mahmah chih ahi hi.
Felicitation-cum-Functionalization
Lamka, June-4: KSO/Sangaikot Block saina in June 11, 2016 zinglam dak 11:00 in Saingaikot a SDO/BDO complex ah ‘13th Felicitation-cum-Functionalization of SDO/BDO office omding a, Chief Guest in D. Korungthang, Minister (Health & FW, GAD & CADA) pang ding hi. Huai ah Guest of Honour in T.N Haokip, MLA & President MPCC; Functional President in Ginsuanhau, MLA pang ding hi. Felicitator in Lunminthang Haokip, IAS, DC/CCpur leh Chief Host in Pumtulthang Lianzo, MDC Sangaikot pang ding hi. Mangcha, Gen Secy. KSO Sangaikot block makaih in KSO Sangaikot block a class X & XII passed-te present piak hiding a, Pastor Paominsei, Area Pastor GTA (ECA) in Pathian kiangah thumsak ding hi.
Online tungtawn in SSC exam om
Lamka, June-4: Staff Selection Commission (SSC) in recruitment a saite online tungtawn exam hita ding chi’n policy a bawl dungzui in tuni’n India gam pumpi ah amasapen di’n Delhi Police leh Central Armed Police Forces (CAPFs) a Sub-Inspector (SI) banah CISF a Asst. Sub-Inspector (ASI) lakna dingin re-exam om a, CCpur dist a candidate 360 te’n NIELIT, CCpur Extension office zangin online in exam kipan uh a, June 7, 2016 in zou ding uhi. SSC saina in SI leh ASI lakna di’n May 2016 in exam om mahleh question paper leak ziakin re-exam om hi’n kigen hi.
New Lamka(W) MDC makaihin meeting
Lamka, June-4: New Lamka West MDC CT Lian Guite makaih in tuzing in a tenna inn Bungmual, Zoar Veng ah New Lamka West ADC bial a Village Authority tuamtuam omte’n meeting nei ua, tua ah tui (water) tawh kisai telin developmental project tuamtuam omte leh omtheite tungtang genkhawm uh chihthu kiza hi.
Lawhchingte kipahpihna om ding
Lamka, June-4: Suangdoh V/A leh SSPP Suangdoh Block saina in tuni’n Suangdoh Govt. High School ah Suangdoh Govt. High School akipan Class X pass masapen Master Mangsuanlian Guite kipahpihna programme om a,huai ah President, SSPP Gen HQ leh Executive member 9 in va uap uhi. Nitak in Lungthul (D) khua ah SSPP Lungthul Block saina in Class X leh Class XII lawchingte kipahpihna uap uhi. June 5, 2016 in SSPP GHQ President in SSPP Tuima Unit hong ding hi.
News late kianga zaksakna
Tuibuong area ah receipt tellou in news lakman(fee) khon om a, aman a chindan hoihlou tawpsan dinga theihsak ahi hi. News late’n leng receipt tellou a fee piak himhim office tunglou in a khontu in a nekguk ahihdan thei ding leh tuban receipt tellou in kuamah fee pelou dingin i kizasak hi.
Huailou in Agent No. 15 (Bijang area) leh Agent No. 19 (Molnom area) a damlouh ziakun zan akipan news hawmkhiak theihlouh suak ahihman in latute’n ana theisiam ding in kon ngen uhi.
–Manipur Express
Thanlon khua ah public awareness campaign om
Lamka, June-4: JAC against Anti-Tribal Bill saina in zan in Thanlon khua ah public awareness campaign om a, Thanlon Sub-divn a khua 35 akipan mi tamtak paikhawm uh a, Thanlon V/A in zintun hi. Huai ah JAC banah tribe council tuamtuam akipan makaite tel uh a, Thangzamang (JAC member delegate from United Zou Organization), Rev. Dr. Lalkhawlien Pulamte (JAC member delegate from Hmar Inpui), James YT Thadou (President, Thadou Inpi Gen HQ), KG Tungnung (Speaker, Zomi Council), Thangzamuan Tombing (Tribunal General, ATSUM) leh H. Mangchinkhup (Chief Convenor – JAC) te’n anti-tribal bills 3- te tungtang gen uh a, Bill 3te douna ah Manipur singtangmite’ pankhawm poimawh ahihdan tangkoupih uhi.
Programme ah Manipur Assembly in Aug. 31, 2015 a anti-tribal bill 3 a passed-te mawhpaih uh a, anti-tribal bills-te singtanggam ah zat ahikei ding a, Manipur Assembly in a lakkhiak/phiat ding, bill 3-te douna ah Thanlon Sub-division mipi pangkhawm dingin leng thupuk uhi. Huai banah Thanlon Sub-divn huamsunga nam tuamtuamte’n JAC against 3-Anti Tribal Bills bawlkhiak ding, huai dingin Hausa/VA te mawhpuakna piak ahih banuah Commitee bawlkhiakna dinga Convenor in Dongchinpau, Chief of Thanlon leh Co-Convenor in khua 7 a hausate guang uhi.
TPO in lawhchingte kipahpih
Lamka, June-4: Thangsing Phungpi Organization (TPO) in tuni in Rengkai Road a TPO office ah Class X leh Class XII lawhchingte kipahpihna hun zang uh a, Rev. Ginzamang Thangsing in thumsak hi. Dr. Chinkholal Thangsing, President, TPO in hasotna thugen a, lawhchinna dingin laisiamna kia hunlou a, khawtang a kizat leh nasep poimawhdan leng gen a,class X lawhchingte memento 1 chiat pia hi. Thangsing Phungpi akipan Class X (BSEM & CBSE) ah student 14 (I Div 9 leh II Div ah 5) Class XII (CoHSEM & CBSE) ah student 20 (I Div 8 leh II Div 12) om uhi. Prog sungin Johnson Thangsing, Joseph Thangsing leh David Thangsing’ makaih in Career Guidance om hi.
Pumbuk ah social work in hahsiang
Lamka, June-4: Singtanggam leh mipi adia hinna pia Tribal Martyr 9te theihgigena dingin Hiangtam Lamka a Community hall huangsung a ‘Salphate Zahna Pumbuk’ ah tuni’n The Singtangmi (Tribal Movement) kichi Whatsapp Group a member te’n social work nei in hahsiang uhi. Hiangtam Lamka hausa G. Thangkhosuanmung, EM ADC/CCpur in social work-te veh a, refreshment man teng piaksak hi. Huai pumbuk ahihleh Hiangtam Lamka V/A leh mipi’n Salpha 9-te zah etsakna a abawl uh hi a, Sept 21, 2016 in JAC Chief Convenor H. Mangchinkhup in hong hi.
SP office ah candidate list kitakkhia
Lamka, June-4: Police deptt nuai a Police constable 2052, Follower 564 leh M/R a Riflemen 441 post kila ding ah CCpur district a apply teng min Tuibuong a SP office ah kitakkhia a, mahni Sl. No ettheih ding hi.
May kha in malaria positive 5 mukhia
Lamka, June-4: Dist. Malaria deptt./CCpur te'n May 2016 sungin damlou mi 1463 sisan test uh a, malaria positive 5 mukhia uh a,huaite lakah PF 1 om hi. Huailou in January-May 2016 sungin damlou mi 6518 sisan test uh a, huai lak ah malaria PF 1 telin positive 7 mukhia uhi.
Felicitation-cum-Career Guidance
Lamka, June-4: Mate Student Orgn(MSO)/CCpur dist. te'n tuni’n Tuibuong a Dr S. Radhakrishnan Foundation School ah ‘Felicitation-cum- Career Guidance, 2016’ om hi. Lucy Mate, Education Secy/MSO, CCpur in class X passed mi 10 leh class XII passed mi 20 te puangkhia a, present piak ahihban uah Pr. Chungkhojam Mate in Pathian kiangah thumsak hi. Career Guidance hun ah Ngamkhokhai Mate. Asst Prof. CCpur College ; Dr Jangkholun Mate leh Michael Mate in thupi tuamtuam zangin sinsak uhi.
NGMF kisakkholhna paitou zel
Lamka, June-4: Nationwide Gospel Music Festival (NGMF)-te saina in June 25, 2016 in EBC Gospel Centenary Hall, Hebron Veng, New Lamka ah Prayer-cum-Youth Fellowship om ding tawh kisai in tuni’n Worship Team te’n New Lamka a Dorcas Hall ah rehearsal nei uhi. Huai hun ah saptuam tuamtuam akipan tuailai tamtak tel uhi.
All political party delegate-te New Delhi tung
CM leh Dy. CM tunitak a tung dia gintak ahi
Imphal, June-4: Chief Minister O. Ibobi makaihna nuai a All political party delegation team-te zan in New Delhi tung uh a, himahleh Kolkata ah CM a zan giah ziakin panlakna bangmah neilou uh a, Dy CM bel tunitaklam in New Delhi ah zinkhe pan hi’n kigen hi. K. Bhabananda, President, BJP Manipur Pradesh makaihna a BJP team te’n tuni nitaklam dak 2:15 velin Union Home Minister Kiren Rijiju va kimuhpih uh a, huai hun in Manipur ah ILPS zat ding phutna a road blockade, nupi leh student movement tungtang minute 40 vel meeting nei uh a, Kiren Rijiju in amah lam apan panpih theihna teng ah panpih ding in chiam hi. BJP team te’n Minister tuamtuam muh sawm uh hi’n leng taklang uhi.
Felicitation cum career counselling
Chandel, June-4: Kuki Students’ Organisation (KSO) Gunpi Block te’n HSLC leh HSSLC 2016 examna a lawhching-te a dingin Sugnu a St. Joseph’s Hr. Sec. School Auditorium ah tuni’n ‘Felicitation cum Career Counselling program’ om a, huai ah Chief Guest in Letkhopao Haokip, Social Worker pang hi. Functional President in Lungkhomang Khongsai, Addl. SP/Tamenglong leh Guest of Honour in Rev. Fr. Stephen Touthang, Parish Priest, St. Joseph’s Parish-te pang uh hi’n kigen hi. Huai hun (aban pek 4na ah)
Felicitation cum career ah HSLC Exam 2016 na a 12th Position holder M. Lhunkhomang Haokip leh HSLC & HSSLC examna a 1st Division a pass student 51-te kiangah memento pia uhi. Huai banah Gunpi Area Private School Assn. (GAPSA) nuai a Thadou-Kuki Teacher Peter Thangkholun Baite leh Ismail Limkhopao Baite-te kiangah Best Performer School leh Best teacher of the year award in memento pia uhi. Chief Guest in HSCL leh HSSLC exam om nawn hun ah top 10 position a telte kiangah Rs. 10,000 piak ding chiam a, hiai hun Pious Houdem Guite, Chairman, Kuki Chief Assn. (KCA) Gunpi Block’s, Rev. PK. Lianmang, Presbyterian, Sugnu, Catechist Joseph Baite, teacher, Head Master leh student te’n uap uhi.
ILPS kiphinna tawh kisaikhakna neilou
Imphal, June-4: UNLF te’n Manipur ah ILPS zat ding phutna a kiphinna nungthuap chi a ngawhna om pen nial uh a, social media-te ah JCILPS Convener Kh. Ratan limlak a kitheh zak nung a Manipur Police te’n UNLF member hidan in Kh. Ratan ngawh in wanted in puang uhi. Hiaipen India govt. leh Intelligence Agencies te’n JCILPS kiphinna sukbuai a sawmna uh hi’n gen uhi India govt. in ILPS zat ding phutna a kiphinna hihbuai sawm in phaizang leh singtanggam-te ah ‘divide and rule’ policy zang uh a, tribal community khenkhatte’n amau gam ding kibawl khiak sawmna in tualsuak mite humbitna dia kiphinna zom nuamlou hidan in taklang uhi. UNLF in JCILPS tawh kizopna neilou in a thiltup uh India govt. apan zalenna ngah ding chih hi a, JCILPS-te kiphinna bel tualsuak mite humbit nang hi’n gen uh a, Kh. Ratan UNLF member ahihlouh banah UNLF enrolment register ah amin tuangkha lou hi’n leng taklang uhi.
Ward No. 14 a 14/8 polling station ah re-poll om
Imphal, June-4: Imphal Municipal Corporation election ah Soujaijam Leirak a Ward No. 14 a 14/8 polling station ah tuni’n re-poll om a, electorate 85.42% te’n buaina omlou a vote khia uh hi’n kigen hi. State Election Commission a Official te’n re-poll zawh in ballot box-te hoihtak a seal zawh nung in RO Lamphel leh RO Porompat a strong room sung ah koih in om hi. Vote simna bel June 6, 2016 zingsang dak 8:00 in kipan ding a, huai ni mah a result puan khiak hiding in kigen hi.
Maram ah singnou suan
Senapati, June-4: Facebook group LeTzpAiNttHeEaRtHgReEn, Tumuyon Khullen Youth Club (TKYC), KVK Senapati leh National Rural Health Mission te’n June 5, 2016 in World Environment Day ding tawh kisai in tuni’n Maram ah singnou suan uhi. Hiai tawh kisai in T. Hingpa, Gen. Secy., TKYC in a khua a mipi’n singnou a suan ding uh hasot hi a, tua tawh kiton a Maram kim leh kianga singnou 100 val suan uh hi’n gen hi.
College van leh answer sheet hihsia uh
Imphal, June-4: College Student Council of Manipur (CSCM) a volunteer te’n kal lui a Education (U) office a khaksak hun uah Police te’n student 2 a mat-te uh khakkhiak ding phutna in BA leh B.Sc. 4th semester exam boycott a puang uh tawh kiton in tuni’n GP Women’s College ah exam kipan a, huai hun ah computer, laboratory equipment leh school van tuamtuam banah answer sheet susia uh a, teacher-te mobile suhsak nung in hihsiat sak uh hi’n kigen hi. S. Yumnam, Gen. Secy., GP Women’s College in CSCM te’n exam omlai ding-te subuai nawnlou dingin ngetna bawl a, exam zawh nung chiang a ILPS phutna a kiphinna nei nawn ding uh hi’n gen hi. CSCM volunteer te’n DM college ah exam va sukbuai sawm mahle uh security personnel-te ziakin lawhsam uh a, volunteer te’n tuni zingsang in Thoubal College leh Waikhom Mani College a Administration block-te chabi in kalhsak uh a, security personnel-te amun a tun phet un exam sunzom nawn uhi. Tua banah, security-te vengbitna nuai ah YK College Wanging ah exam om hi’n leng gen uhi.
No comments:
Post a Comment