CHILDREN YELLOW BRIDGE

(Lanva Bridge - Dorcas veng leh Lanva area kikawmtuahna lei lunpen)
-CT Lian Guite, MDC 

Hiai lei (bridge) hong pian dan tamlou sutkhawm leng ichi hi. Hiai mun ah nidang pek in cement a kibawl lei om hi. Hun hon paipai in Lanva nak lam a suang lakna atam luat ziakin tui in suang hum hon taitai in, lui khuk pen hong dim in lui khuk hon dai gawp hi. Hichi bang  ziakin  a lei niam gop in, kum 2014 a tuilet ziakin nin teng hiai lei ah kikholkhawm in, tui tampi hon kiching in akim akiang ah tui hong let zuazua in huai ziakin tui paitheina dingin  hiai lei pen JCB in kila khia hi. 

Huai nung apan hiai mun ah lei om nawnlou in Lanva leh Dorcas veng kikawmtuahna bei in School kaite leh mipi nautangte ading in buaina liantak tun hi. Aveng upa te’n 1vei ka kiang ah hong gen uh a, government lam koikoi hiam a i taitai chia le development fund omlou(no more BRTF leh Finance Commission development fund). Hichi bang ahihziakin  ka hihtheihkhom gua (bamboo) leina dingin sum tamlou kana pia tei a, amaute leng mimal a kithawhkhom in gua lei hon bawl uhi. Ahihziak in hiai lei pen deih bangin sawt daihlou in chim gop pah in, tui in tai zaw mah hi. 

Hiai lei bawl poimawh sa mahleng fund zonna lam teng ah kilawhsam ahih chiangin ngaih tuah vengveng in 1vei DC/CCpur pa kiangah lampi nawl a street solar light kisete kava ngen a, pole 5 ka la hi. Hiaite apan in lei engineer vai tak in akum kiukeu ding a gelin nasep ka pan hi. Ahihziakin kapan ni zingchiang nitak a vuah tui atam ziakin lui tui lian in, alai a lei douna ana ituah mang hi. A kalnawn in 1vei kipan nawn in, huai leng naupangte’n ana tottot ziak un kuai sia nawn zel hi. Electric department-te’ electric khuam khel zen in lei ka pawkhia uh a, workshop tun in, huai ah bawl masa in, workshop a bawlsa kon tuah lut uleh nasep sutzop thei in om a, tu in huai lei CHILDREN YELLOW FOOT BRIDGE  kichi 50ft x 2.8ft alian Rs 6, 5000/- bei in zawhkhiakna dan khat inei theita ua kipahhuai isa petmah hi.
Hichi bang a public fund lou a zattheih/tottheih ding lei i bawlzawh theihna ding a hon panpih lawm-leh-vual, vengsung nu-leh-pate, banah lei kipah mahmah naupangte tengteng tungah kipahthu igen hi. Hiai bang mitampite poimawh semsuahtu a pankhak hampha kisai in, kipak petmah hi. 

Hiai lei apan in “itup leh lampi om ahi” chih kuapeuh in phokthak leng deihhuai hi. Eite problem a tawp, i problem masapen igen uh lah sum, sum omlou chih i paulap nak pen uh i tawpsan uh poimawh a, maban ah kuapeuh problem a tawp mailou in zong teitei leng Pathian in lampi  hon gelsak zel ding ahihdan i theih thakna uh hong hileh chih deih huai i sa petmah hi. 

PROBLEM PEN I TAWPNA A ZANG NAWNLOU A, PROBLEM PEN I KIPAT THAKNA HONG HIH TAK I LAM-EN HI. KAKIPAK TOUPA.