MANIPUR EXPRESS | JULY 15, 2016

HEADLINES:
UZO GHQ makaite’n tuni’n Haupi  Block veh uh
Lamka, July-14: United Zou Orgn (UZO) GHQ in UZO Block 14 omte a veh uh sunzom zel uh a, tuni’n UZO Haupi Block HQ  M. Lunmuol khua ah Block makaite kimuhpih uhi. Huai ah Haupi Block a khua 17 omte lakah  UZO Unit, Block makaite ban ah Hausa-te tel uhi. Upa M. Hauchinkap, Block President in report pia a, M. Lunmuol  hausapu, Thangkhanmang in Haupi Block sik-le-tang in UZO GHQ President puan laisan awk-sak hi.

    Chinlunthang, President, UZO GHQ in UZO Policy & prog ramme tutan a sepsuahte leh maban a sepding omlaite  pangkhawm a tawh sepsuah  touh zel ahihdan gen hi. Maban ah UZO GHQ thupiak  dungzui a semtou zel dia panla dingin kikhawmte ngen hi. Education policy sukpichinna ding a panlak  touhzel ding hi’n gen hi. Kum 2017 pen Zogal kum 100 chinna ding ahihziak in Zogal Tangthu leh Zo/Zou history laibu bawlkhiatna ding in UZO in   Ph.D a neihte uh  seh a om hi’n gen hi.
    Gouzalal Tungnung, Vice President UZO GHQ in  UZO hanta din, Unit leh Block te’n kum tenga  meeting 3/4 nei in  Block conference sai zel ding leh buaina neite’n  nampi platform zanga genveng zel dingin hasuan hi. Sum-le-pai omlou a pawlpi hat theilou ahihziak in UZO Annual Fund leng hoihtak a pechiat ding in ngen hi.
    Thangzamang, Gen.Secy.UZO GHQ in UZO policy & programme-te tomkim in report  a,  gamsung  a buaina Anti-Tribal Bills 3te ah UZO panlakdan gen hi. Bill 3te lakah India President in “The Protection of Manipur People Bill” phalna pekei mahleh Bill 2 omte lak a ML & LR Act lauhuai mahmah ahihdan gen hi. Tutan in singtanggam a khua 98  ah  MLR & LR Act zat  hita a, Lamzang khuatan huamkha  hi’n  gen hi. Maban ah mipi leh hausate pilvangtak a panlak a, pankhawm poimawh ahihdan gen hi.
    Khaizamang, Jt Secy UZO GHQ in Saptuam ngaih poimawh bang a Nam zong ngaih poimawh  hileh nam hatsem ding  chi hi. Jamgenthang, Treasurer, UZO GHQ in nam asih leh Zou tate kua hing tuan  ding hian? chih dotna bawl in nam it dingdan nasatak in gen hi.


UP state assembly election:
CM candidate di’n Delhi CM lui Sheila Dikshit puang
New Delhi, July-14: Mi tamtakte’ ngaihsutna khel lamah Congress in leng maban a state tuamtuam a assembly election om ding ah panmun khawhlel ua, huchihlai in 2017 kumbul a Uttar Pradesh state assembly election om ding ah Delhi Chief  Minister lui Sheila Dikshit pe’n Chief Ministerial candidate dingin puangkhe daih uhi. Congress thusuakin agendanin Ms Dikshit in Delhi ah kum 15 sung akizom in Chief Minister hihna len in experienced hoihtak nei ahi chi ua, a nasep hoihte banah National capital apuahdante tungtawn in Uttar Pradesh state Chief Minister dingin chin (fit) mahmah ahi chi uhi.
    Congress leader Ghulam Nabi Azad (i/c of Uttar Pradesh) in agendanin, Chief Ministerial candidate ding mi tuamtuam etkhiak ahihnung in Dikshit tuk a chin ding muh ahihlouh manin amah pe’n muangtaka seh ahi chi hi. Election strategist Prashant Kishor in Congress heutu hunkhopte’ dinmun ngenteltaka study abawl nung in Dikshit tuk a khauh ding mulou ahihdan gen in, AICC high command ah leng recommend bawl hi. Dikshit bel ahitakin namsang innkuan Punjabi Khatri family apan hi a, taksa upat lam ah kum 78 chingta hi.
    Tualou in UP apan Congress veteran banah mi minthang mahmah asita Uma Shankar Dikshit mounu (daughter in law) leng ahi hi. Uma Shankar in Union minister hun sawtkuamtak a letban ah state tuamtuam ah leng Governor hihna lenkha hi. Dikshit in Delhi Chief Minister hihna kum 15 alet nungin 2013 in Arvind Kejriwal makaih AAP te’n khenkhia uhi. CM candidate dinga Dikshit guan ahih tawh kitonin UP Congress chief dingin actor-turned-politician Raj Babbar  guanin om hi. Azad leh party leader Janardan Dwivedi in party hatna dingin pan naktakin kila thak ahi chi ua, campaign committee ahihleh Sanjay Singh leh Pramod Tiwari in makaih ding uhi. Dikshit in hiai bang mawhpuakna angahna tungah kipahthu gen a, huai kawmkawmin a lawm dingin Priyanka Gandhi (Vadra) poimawh ding ahihdan gen hi.


LOCAL NEWS:
Zomi Court member-te lalut
Lamka, July-14: Hiangtam Lamka a PTC Conference hall ah tuni in Zomi Council Cabinet Committee in Zomi Court member dia aguan thakte laklutna om a, Rev. Lamkhogin Khaute in hasotna thu gen in  thumsak hi. Zomi  Court member-te  P. Sonthang of Chiengkawnpang, L. Langkhenpau Mate of Simveng, T. Khupzadou of Ngathal, L. Suankhogin of Lamjang, Khup Lian Mang Hatzaw of New Lamka, Thangchinkhai of Tangnuam, S. Chinsuanlian of Zoumunuam (Court Secy) leh L. Sanga Vaiphei of Lingsiphai hi uhi. Huai hun ah ZC nuaia Tribe 9 a President- te ban ah Zomi Council member-te’n uap uhi.


TWA Tuibong block  makaite kichiamsak
Lamka, July-14: Vahchiin Thadou, President, Thadou Women’s Assn(TWA) GHQ  in  tuni sunnung in Hmar Veng a Nazarene International Ministry Centre complex ah Thadou Women’s’ Assn. (TWA) Tuibong block honna leh makaite kichiamsak hi. President  in block hong in makai dingte kichiamsak a, Rev. Thenkim Singson, Dist Supdt, Church of Nazarene in thumsak hi.
    President in  TWA CCpur dist ahihleh March 5, 2016  a Tribal Research Institute, Imphal ah honkhiak hi a, TWA GHQ in April 17, 2016 a thupukna  alak dungzui ua TWA Tuibong block hon hi’n gen a, a term kum 3 sung hiding  hi. TWA Tuibong block makaite Chairperson-Chinsawnching, Secy- Deikhochong Kipgen, Vice Chairperson- Tingkhochong Haokip, Asst. Jt. Secy - Nemjanieng Haokip, Finance Secy- Lhingneiting leh Information Secy - Hatlhing Singson ban ah executive member 13 om  uhi. Huai hun ah Sadar Hills apan TWA GHQ member hunkhop tel uh a, Phalneo, Secretary, TWA GHQ in panlakna pulak in constitution simkhia hi. 


Mipi'n khawsung lampi bawl sunzom
Lamka, July-14: Zan akipan Muolvaiphei V/A makaih in HYA, HSA, HWA le MYC te’n suml kidongkhawm in RCC thum lei uh a, Muolvaiphei khawsung a lampi hoihlouhna munte leh aniamna munte ah phum in  khawsung lampi bawlhoih uh a, tuni’n sunzom  uhi. Mipi'n khawsung lampi bawlna dia  zatdin Lalhrillien, MDC-Saikot in Shaktiman khat thawh a, T.K. Simte, AC to DC/CCpur in Truck khat thawh a, V/A te’n Truck khat mah ngaihtuah in huaite zang in lampi hoihlouhnate ah suanghum sung uhi. Lampi niamna mun a kiphum RCC 3 te Rs. 36,000/- vel man hi’n kigen a, lampi hoihloute bawl hoihna ding in Rs. 3 lakh vel bei ding hi’n gen uhi.


ZRO in hilhchetna thusuah bawl
Lamka, July-14: Zomi Re-unification Orgn (ZRO) a Defence PRO  Moses min zangin  ZRA President tawpsak hidan a July 13, 2016 a social media tuamtuam a press release kapkhiak tawh kisai Ministry of Defence, ZRO/ZRA in tuni’n hilhchetna  bawl in  ZRA President tawpsak chih Press Release kapkhiak a om bulbal omlou leh phuahtawm ahihman in theihpihlou  hi’n taklang hi. Defence PRO in President tawpsak theihna (power) a nei kei a, a thu in leng paikhe theilou a, hibang thuzuau kapkhetu pawlpi’n enkai lel a,  pawlpi sung siatna ding thil bawl leh pawlpi kalh a gamtang peuhmah a kituahpih bang action lak hiding chi hi. Pawlpi tawh kisai peuhmah chetna omlou in  kuaman printed media leh social media tuamtuam a suahlou ding in theisak hi.


One Day  Legal Awareness om ding
Lamka, July-14: Siamsinpawlpi (SSPP) leh Dist. Legal Services Authority pangkhawm in July 16, 2016 zinglam dak 11:30 in Hiangtam Lamka a YPA GHQ Hall ah ‘One Day  Legal Awareness Program’ omding a, Chief Guest in Justice N.Kotiswar, Judge, High Court of Manipur & Executive Chairman, Manipur State Legal Services Authority pang  ding hi. Guests of Honour in RK Memcha, Member Secy. Manipur State Legal Services Authority & Vigilance, High Court of Manipur; Kimneinieng Shoute, Dist & Session Court Judge,CCpur; Letkho Kipgen, CJM/CCpur leh Advocate Ch. Noren Singh, High Court of Manipur pang ding uhi. Awareness  ah Justice N.Kotiswar  leh , Advocate Ch Noren in sinsak ding uhi. Program ah govt school leh Private School apan student tamtak telding hi’n kigen hi.


TKSU GHQ in kipahthu puang
Lamka, July-14: DC/CCpur leh a team/staff te'n CCpur dist. sunga khua leh veng tuamtuam lutna munte ah signboard a takkhiat uh Thadou-Kuki Students’ Union, Manipur GHQ in kipahpihthu puang uh a,  mipi phattuamna ding a sep-le-bawl a neihte ziakin vangphatna tangta hen chi’n DC/CCpur leh a staff-te Best Wishes bawl uhi.


UTLA/KNO in mi 2 khawlsak
Lamka, July-14: S.T. Singsit, Gen Secy. United Tribal Liberation Army(UTLA/KNO) in thupuan a bawldan in Nov 6, 2015 a Cabinet meeting thupukna  dungzui in Orgn/ constitution kalh leh bawhsiat  zia in UTLA/KNO primary membership akipan Ngambom @ Bom, Secy. Education & Statistics leh Paominthang @ Diana, C.O. tawpsak (dismissed)  hi’n puang hi. Mi 2 te’n mimal/mipi lak ah sepkhelh, bawlkhelh a neih uleh ngaidam ding in Orgn in ngetsak hi. Mi 2 tungtawna Orgn khatpeuh ading new recruitment phal hilou a, huai thu KNO nuai a C-in-C te kiang ah theihsakna piak  hi’n talang hi.


ZHFC in Football Tourney sai ding
Zogam Hoihnu Football Club (ZHFC) in hongtung ding July 25, 2016 in New Lamka PT Sports Complex ah 3rd ZHFC Day of Open Football Tournament sai ding uhi. Hiai ding tawh kisai in telnuam teams/clubs/ Schools/Orgn. ten entry form July 13, 2016 akipan in United Motor, Hebron Veng; Bungmual Pharmacy; Songbul Agency, New Bazar; Phailian Pharmacy; TRATDA Office, Tipaimukh Road; Sumkong bazaar, Tuibuang leh Sai-a Hai Dawr, Rengkai Road te ah muhtheih ding hi. Entry form bel July 23, 2016 tan in piaklut theih ding hi. Entry fee ahihleh security deposit tawh kigawm in Rs. 1500/- hiding hi.
    Champion team in Rs. 10,000/- sang ding a, runners-up in Rs. 6000/- leh Best team in Rs. 2000/- sang ding uhi. Tua banah, Best keeper, Best defender, Best midfielder, Hero of the tournament leh Top-scorer chihte individual award om ding hi.


SUUNNA:
Lhingkim (57) w/o Genpu of Kangvai tuni nitaklam dak 3:30 velin Kidney fail ziakin Langol a Shija hospital ah si a, July 15, 2016 in Kangvai hanmual ah kivui ding hi. Lhingkim ahihleh sungkhawh akipan hi a, a taksa chauh luat ziaka kidney fail in, a khuak tanpha buai hi’n kigen hi.
Chinkhongai (68) w/o Thangvom of C. Munpi tuni sunnung dak 2:30 velin sungna ziakin si a, July 15, 2016 in YVA hanmual, Pangzawl ah kivui ding.


IMPHAL NEWS:
Lt. Gen. Singh in Sainik school veh
Imphal, July-14: Lt. Gen. K. Himalay Singh, UYSM, AVSM, YSM, Commandant, Infantry School in tuni’n Imphal a Sainik School vehna nei hi’n gen uhi. Capt (IN) Vinay Tiwari, Principal; KV Sijomon, Squadron Leader, Vice-Principal; Major Vivek Kumar, Administrative Officer; O. Dheinachandra Singh, in-charge, Senior Master leh Cadet Debabarta Laishram, School Captain te’n Sainik School Goalpara a Alumni Lt. Gen. K. Himalay Singh ana dawn uh a, tua zawh in kihouna hun ah Cadet te’n amah hinkhua leh military lam tawh kisai a dotna tuamtuam bawl uh a, Lt. Gen. in dotna-te a dawng nung in a school kailai tawh teh in tulai a khangthak-te pilna sang zaw hi’n gen hi. Sainik School a paisan ding kuan in memento piak in om hi.


CISF te’n naupang 20 hunkhia
Imphal, July-14: India gamsung a state tuamtuam ah puakkhiak ding in tuni’n Imphal Airport a security personnel te’n kum 20 ching nailou naupang 20 hunkhia uh hi’n gen uhi. Akigendan in CISF personnel te’n zinglam dak 11:00 a Indigo flight 6E-202 a Kolkata zuan ding Muslim community apan naupang 20 banah amaute makaih mi 2 hentang uh a, Police-te khut ah pekhia uhi. Police te’n Manipur State Commission for Protection of Child Rights a Official-te kiangah naupang-te pekhia uh a, naupang teng Thoubal district akipan ahihziak un mi 2-te Thoubal Police-te kiangah pekhia uh hi’n kigen hi. Police thusuak in mi 2 te’n naupang 20-te Kolkata a tung pih chiang un seh 2 a khen in Train in Maharashtra leh Gujarat zuan ding uh chi’n taklang uhi. Manipur ah tate school kaisak zawh louh ziakin nu-leh-pa khenkhatte’n mundang ah a tate uh manbei a school a kai theih ding uh deih ziak in mikhem-te kiangah pekhe zel uh a, school kaisak naksang in thagum a nasem in suak-leh-sal dia zat a om uh hi’n gen uhi.


Community Hall bawlsak
Imphal, July-14: IGAR(S) thusuak in a gendan in Churachandpur Assam Rifle Sector nuai a Aina Battalion te’n Thanlon sub-division sung a Phaijang village-te adia community hall a bawlsak uh zan in piakkhiakna nei uhi. Hiai tungtang ah Phaijang khawmi te’n Aina Battalion-te tungah kipah thupuang uhi.


Sepna zong mi 7.51 lakh om
Imphal, July-14: DIPR saina in tuni a press conference hun ah Samjetsabam Bijoy Singh, Addl. Director, Directorate of Employment in a thugenna ah Employment Exchange teng ah March 31, 2016 tan in sepna zong ki register mi 7,51,376 om a, huai lakah pasal 5,31,313 leh numei 2,20,063 pha hi. Manipur ah District Employment Exchanges, Physically Handicapped person-te Special Employment Exchange, MU ah University Employment Information and Guidance Bureau 1, Kangpokpi, Jiribam, Saikul, Sugnu, Moreh leh Tamei telin in Employment Exchange 17 om a, huai teng a dia sanctioned post 123 himahleh mi 88 te’n exchange 17 enkai uh hi’n gen hi. Huailou in Central leh state govt. banah Autonomous body, local bodies, private sector-telin pay roll tungtawn in Manipur pumpi ah employee 73,660 om hi. Imphal West, Imphal East leh  University Employment Information & Guidance Bureau-te Science & Technology Dept. nuai a Pilot Project tungtawn in kum 2008-09 apan Employment Exchange-te computerised hi a,  kum 2010-11 apan Thoubal leng computerised hi a, District Employment Exchanges dang te’n e-District Project nuai a IT tungtawn a compurterised hi’n leng taklang hi.


Cong MLA te’n BJP zom di'n gingta
Imphal, July-14: S. Premananda, Organising Secy., BJP Manipur Pradesh in tuni’n Nityaipat Chuthek a BJP office ah media-te tawh kimuhna ah Prime Minister N. Modi nasep hoih ziak in Congress MLAs telin political party dang a makai leh member te’n kum 2017 election ma a BJP zom ding ua gingtak hi’n gen hi. Guwahati ah tuni a North East Democratic Alliance (NEDA) meeting pen North East bial ah non-Congress party-te hihhat tupna hi a, BJP candidate ding tawh kisai in National leader te’n candidate chitna nei ding-te survey bawl lel uh hi’n gen hi. BJP Manipur Pradesh Acting President M. Hemanta in BJP kichi party kithunun, gamtatdan siam leh makai-te muang khawm vek uh a, Congress vaihawmna state-te ah dan (law) om lou tawh kibang hi’n leng taklang hi.


TUNI THUPI:
Huchiin mouneipa aw leh mou aw, na sung ah kiza nawn kei hial in chin: na sumsinte leitung kumpipate ahi ngal ua; na bumsiamna in nam tengteng tuh khemin a omta ngal ua.” - Kilakna 18:23


EDITORIAL:
I meivak dinmun uh!
I pau uh a hausa nai hetkei a, electricity, light leh solar chihte i genchiangin MEIVAK kichi in kankhawm vek bangin ngaihsut theih hi. Manipur Chief Minister Ibobi Singh in 2019 tanin Manipur state pumpi ah electric power supply pen 24x7 hiding chi’n zanzek mahmah in mipi mai ah genkhia a, kipahhuai mahmah hi. Himahleh, tuama in Power Minister tuamtuam te’n thuchiam hon neihna uah 2016 tanin ‘every state should be electrified’ hon chi uh a, tuapen tuni dong tangtun zawh ahikei.
    Sinzawl khua te’n meivak ginatlouh ziak banah electrification tawh kisai nautang adia lauhhuai ahi chih ziakin a guiteng zankhia in power sub-station ah va koihkik uh chihthu i za hi. Manipur government in bang power company-te zangkha ahi di ua leh? State govt in ahitakin mipi kiangah niteng a dakkal 24 sung electric hon piak zawhding uh agintakzawh louh ziak ua solar hawmhawm mai uhiam chih ut phial hi. Ahi alah, hithei bang hileh, solar bang inn chih ah hon hawm theile uh environment tawh kisai hoih tuan mahmah dinga, huihsiang leh khawvot mipi’n kidong ding bang zel hi.
    Manipur state government in electricity tawh kisai privatise piandeuh in company khat khut ah hon koihkhia uh a, meivak dinmun hong hoihzaw dawm deuh dingin mipi’n lametna liantak nei uhi. Electric post/pole leh a guite mahmah leng khentuak tamtak om dinga, privatise ahih vetleh tuabangte leng a kisaipih company te’n spot enquiry hong nei uh deihhuai mahmah a, a fit/ fixed sa uh hileleng a etkai uh kipha mawh mahmah hi. Tuk hong tung semlai henla, huihpi, vuahpi hong nung taktak leleng i electric guite uleh akhuamte muanhuai huntawkna ding hiam chih etzui hun laitak ahi hi. Tuma zekin i lakah zinling banah huihpi/vuahpi’n hon zial zek uh a, mipi kibuai zengzung mai hi.
    India malsuahbial adingin meivak lam a zawngkhal pen Manipur ahi maikei ding maw chi nuam ihi lai hi. Government official lamte’n mipi vau sek in, illegal connection khempeuh matkhiak vek ding in puang matmat sek uh a, prepaid metre hong om a, revenue lam ah sum a lakh asim amukhia uh chih zanzek mahmah in i thei hi. Himahleh, Khengjang leh Khominthang Power station kalah buai ahihkeileh, Ningthoukhong kalah buai chih hiden mawk hi. Mobile phone ineihte leng pre-paid ngen ahi a, network abuai hun chiangin kithangpai mahmah a, electricity leng pre-paid ahih tawh kitonin a hong mit phutphut leh sawtpi taktak hong buai chiangin mipi thangpai mahmah hi.
    Akigen dan tuamtuam tungtawnin, a poi penpen zaw Minister/MLA/Department tuamtuam leh office poimawh taktak te’n a Lakh /a sing a sim electric fee ba uh a, mipi bat sang mah in tamzaw sek hi’n kigen a, electric chauh lou leng, tui fee, telephone fee bangzah a ba ding ua chih theih hilou hi. Private company piching leh liandeuh in electric enkai ngeingei le uh mipi’n dakkal 24 sung power supply i mu ding uh chih chiang mahmah hi. Kum 30/40 paisa apan electric dinmun kibang toutou lai ahih leh bang option dang om hiam chih leng expert team in a etkai uh poimawh mahmah a, tu in Power portfolio pua O Ibobi Singh Chief Minister in panlak ding dan tuamtuam taklang sek mah leh a taka sepsuah hong hina diam chih mipi lungbuaina leh a etkhiak lellel uh ahi hi. Power supply hoihlouh ziak in i gam in bangteng mansuah hiam chih bang leng sui tuak mahmah a, power a hoih ma teng i gam ah khantouhna a om kei ding chih theihsa ahi hi. MSPDCL te’n hangsantaka pan honlak touh uh mipi kinepna mahmah hi’n muhtheih hi.
    Agriculture product tuamtuam gen in, haichi chiin ding tanpha kisinsakna nasatak in nei mah le hangleng, cold storage supply tu ding power kidaih i neih ma teng i thugen uh vai lak zunthak tawh kibang lel ding hi.