MANIPUR EXPRESS | JULY 16, 2016

Web-offset Colour Machine hong thonkhe dekta uh
Manipur Express office a zat ding web-offset Colour machine kum 2014 tawpkuan akipan  instalment dana sum piak kipan a, hileleng  sumlam haksatna ziakin aman ding zah kimtaka piak zawhpah hikei mahleh June 27, 2016 in  full payment kibawl zoupan hi. Machine a part kithuah khenkhat zatlouh a sawt koih lemtangloute koihhoih thak uh a, June 29, 2016 in thuah (assembled) nawn uhi.
    Tu’n part neudeuhte packing bawlzou  uh a, tulelin thonkhiak theih ding in machine a unit tuamtuamte packing bawl panta uhi.  July 25, 2016 velin Web-offset colour machine hong thonkhe ding uh chi’n Company akipan kiza hi.

HEADLINES:
India telin gamtuam tuam in terror attack mawhpaih
France National Day zangte mi 84 gawilup in om
Paris, July-15: France simlam Nice khawpi a Bastille Day (France National Day) zangte lakah gari (lorry) khat tailut in mi 84 gawilum a, midang 100 val gawiliam a om hi’n French President Francois Hollande in tuni’n gen hi. French Police-te gendan in Nice khawpi a Bastille holiday zatna a mipi tamtak omkhawmte laka mipi tamna mun ah zan nitak dak 11:00 velin speed hattak tawh gari tailut a, mipi a gawi masakna akipan km 2 tan ah taisuak a, sawtlou nung in Police te’n gari hektu kaplum uhi.
    French President Francois Hollande in thiltung mawhpaihthu puang in, terrorist attack ahi chi a, France’ anti-terror unit te’n suizui lel uh hi’n gen hi. November 2015 terror attack ziaka state of emergency puan a om pen July 26 in bei ding himahleh, zan nitak a terror attack ziakin kha 3 sung behlap nawn hiding chi hi.
    Indian President Pranab Mukherjee in terror attack mawhpaih kawm in France gupthu puang a, terrorism douna ah France tawh thuksem in India kalsuan ding chi hi. Prime Minister Narendra Modi inleng misi sungkuante thuakpihthu puang hi. European Council president Donald Tusk in France National Day zatna a mihing hinna latute mawhpaih a, leitunga gam omteng in helna douna ah France kithuahpih ding ahi chi hi. US President Barack Obama inleng terror attack om thak nawn mawhpaih a, misi sungkuante thuakpih thu puang hi. US presidential candidate nihte - Democrat Hillary Clinton leh Republican Donald Trump inleng mawhpaih kawm in misite suunthu puang uhi. Russian President Vladimir Putin  in hiamgamna leh sualna doudal poimawh ahihdan huai thiltung in langsak chi a, terrorist douna ah Russia in theihtawp suah in panlakna sunzom ding chi hi.


Kum 10 nungin PM Modi leh CM teng kimu ding
Modi makaih in Inter-State Council meet om ding
New Delhi, July-15: Prime Minister Narendra Modi makaih in internal security, economic, social planning, inter-state relations tungtang genkhawm di’n tuni (July 16) in ‘Inter-State Council Meet’ omding hi. Huai hunah State chih akipan Chief Minister teng kihel ding uh a, kum 10 nunga Inter-State Council meeting a om nawn patna ding hi’n leng kigen hi. Meeting hunah Union minister 17 te’n akhatveina dingin chief minister tuamtuam tawh dawhkan khat ah houlimna nei ding uhi.  Meeting a kihel dingte lakah Home Minister, Sushma Swaraj (External Affairs), Arun Jaitley (Finance), M Venkaiah Naidu (Urban Development), Nitin Gadkari (Road Transport) leh Manohar Parrikar (Defence) leng telkha uhi.
    Meeting huna genkhawm dingte lakah Centre-State relation tawh kisai a Punchhi Commission tungtang, India khua-le-tui te theihchetna dia Aadhaar zat ding dan, subsidy adia Direct Benefit Transfer zatna ding leh public services, school education hoihzawkna ding leh internal security banah thupoimawh tuamtuam genkhawm ding uh a, huailou in Jammu & Kashmir buaina leng genkhawm ding uh hi’n kigen hi.
    Inter-State Council ahihleh Indian Constitution Article 263 tungtawn a Presidential Order (dated May 28, 1990) pansan a neih a omsek hi a, Central government makaite leh state makaite’n dawhkan khat a issue tuamtuam agenkhopna ding ua kibawl hi’n thusuakin gen hi.


LOCAL NEWS:
CT Lian in lei abawl DC in hong ding
Lamka, July-15: CT Lian Guite, MDC in Lanva-tui tungah New Lamka leh Lanva kikawmna dinga  Lei (low cost children iron foot bridge) abawl feet 50 asau banah feet 2.8 alian Lunminthng Haokip, IAS, DC/CCpur in July 16, 2016 zingsang dak 7.30 velin hong ding hi. Huai bawlna dingin CT Lian in mun tuamtuam akipan sik (iron) kaikhawm a, a inn ua om sing tuamtuam zangin lei bawl a, sum a tuat in Rs. 65,000/- vel hiding in kigen hi. Lei honna hun kuapeuh in uap dingin chial hi.


IDCF tawh kisai Official 3 in enkhia
Lamka, July-15: CCpur Dist. ah Intensified Diarrohea Control Fortnight (IDCF) tawh kisai a nasepdan enkhe dingin tuni’n State HQ apan official 3- Dr. S. Sucheta Devi, Dy. Director, Trg. & Family Planning, Dr. Kh. Usha, RCH Consultant leh L. Jeeta Devi, State Trg. Asst. Lamka hongpha uh a, Dr. Thangchinkhup Guite, CMO/CCPur tawh hun bangtan hiam a houlim zawh un  Dist Hospital leh Saikot PHC telin Sub-Centre tuamtuam pha in enkhia uh a, nitaklam in Imphal ah kik uhi. Official team te’n a phakna uh health centre-te ah zinc corner kibawl a, laktheih ding in kigen hi. IDCF ahihleh India govt in naupang kum 5 nuailam sungkhoh ziaka si omlouh ding tupna in 2014 kum in pankhia a, Manipur pumpi ah July 11-23 sung in neih hiding chih ahi. Huai hunsung in health centre leh sub-centre tuamtuam ah ORS leh Zinc Tablet a thawn in hawm ding uh a, ASHA worker te’n inn chih ah kikepsiang dingdan sinsak ding uhi.


June 2016 in HIV veithak 23 mukhia
Lamka, July-15: Dist. AIDS Prevention & Control Unit (DAPCU), CCpur in June 2016 report a suahkhiakna uah HIV positive thak 23 mukhia hi’n taklang hi. Report dungzui in General Client ah mi 725 in HIV test lakah positive 21 om a, mi 20 te’n ART Centre ah registration bawl in mi 7 in ART damdawi ne pan uhi. Naupai mi 554 test lak ah positive 1 om a, ART Centre ah registration bawlin ART damdawi leng nepan ngal hi’n taklang uhi. Khamtheih hih pasal 102 leh numei 122 sisan test  uh a, positive muhkhiak hilou a, Female Sex Worker mi 134 sisan test lak ah positive 1 mukhia in, ART Centre ah registration bawlin ART damdawi leng ne ngal hi’n taklang uhi.


Anngawl thumna nei uh
Lamka, July-15: All Manipur Tribal Women Union (AMTWU) makaih numei te’n Dist Hospital huangsung morgue ah gam leh leitang humbitna dinga July 11, 2016 apan anngawl thumna aneih uh, July 16, 2016 in zou ding uhi.  Anngawl thumna ahihleh zinglam dak 7:00 apan sun dak 12:00 sungin nei uh a, tamtak paikhawm in a vangkim in lasak tawh thuah uhi.


Chinglianmawi in Ph. D ngahthak
Lamka, July-15: Mrs. Chinglianmawi d/o K. Zathuam of Dorcas Veng, New Lamka in Dr. Kh. Pradipkumar Singh panpihna nuai ah Geography subject tungtawn in “Land Use Changes and Management in CCpur Dist.” kichi thesis zang in Manipur University, Canchipur ah     Doctor of Philosophy (Ph.D) ngah hi. Mrs Chinglianmawi bel  H. Kamchinlian of  Lamlian Veng, Bungmual’ zi ahi.


Career Guidance Counseling nei
Lamka, July-15: Molnom a om Sunshine English High School in tuni’n student-te adi’n Career Guidance Counselling Prog. nei uh a, session masa ah Haokhongam Haokip, Asst. Comandant (SSB) in ‘ time management and how to build up our career from high school life’ thupi zangin sinsak a, 2nd session ah Lunminthang Haokip, Jr. MCS in ‘ How to prepare for competitive examination with different subjects and how to take decision’ chih thupi zangin sinsak hi. Resource person 2-te ahihleh Sunshine English High School product hi uh a,   Class VI – X student  tamtak kihel uhi.


Handwashing material la vek di’n theisak
Lamka, July-15: Kaikhanlian Guite, Nodal Officer, Mid Day Meal & DI of schools, CCpur Block in July 8, 2016 apan CCpur govt. H/S ah ZEO leh ADC/CCpur nuai a Mid Day Meal ngah (enjoy) school 462 te’ ading towel leh detol handwashing hawmkhiat in om hi. Towel leh detol handwashing la nailou school te’n akimtheilam alakhe ding in Nodal Officer, Mid Day Meal in theisak hi. Tunitan in CCpur Block ah school 96; Henglep block ah 43, Singngat block ah 31, Thanlon block ah 20, Samulamlan block ah 19, Tipaimukh block ah school 12 kia in lapan uhi.


Financial Literacy Awareness Camp
Lamka, July-15: SSPP Rayburn College Branch, Degree Section in Lead Dist, Manager, SBI tawh pangkhawm in tuni sunnung dak 1:30 in Rayburn College Auditorium ah ‘Financial Literacy Awareness Camp’ nei uh a, huai ah special guest in Nengzamang Tonsing,  (retd) Asst. General Manager pang hi. Aman a thugenna ah siamsin naupangte tunung chianga innsung, khawtang banah gam leh nam makai ding ahihman un, mimal phattuamna ding kia a laisim hilou ahihlam uh phawk  kawm a panla dingin ngen hi.
    Nengkhanpau Hauzel, Lead District Manager in “Financial Management & Planning” thupi pansan in sinsak a, Pauneihthang Valte, Chief Manager, SBI/CCPur Branch in bank tungtawn a scheme tuamtuam omte gen in, bank tawh kisai a cyber crime omte banah cyber crime apan kihumbit dingdan sinsak hi. M. Devakishore Singh, Managerm SBI/RBO, Imphal West in centre govt  sponsor scheme tuamtuam PMJDY, PMSBY leh APC pulak in, apply dingdan tawh kisai sinsak hi.  Huai hun ah Rayburn College a Degree Section apan student tamtak kihel uhi.


VDF pawlin thupuan bawl uh
Lamka, July-15: All Manipur VDF Welfare Assn (AMVDFWA) a Gen. Secy Laltingen Vaiphei in thusuah bawl kimu ah Manipur govt tung ah khasiatna tuamtuam aneihte uh taklang kawmin ADC election ah Hills leh Valley ah VDF personnel-te ni 15 sung duty dia zat hi uh a, commander piak ahihlouh ban uah TA/DA Rs. 500/- lel piak hi uh a, VDF te’n honorarium Rs. 4000/- sang uh a, uniform 1 khuisak nangin kidaih hamham a, Sept. 29, 2015 in cabinet in honorarium Rs. 1000/- a khangsak di’n lemsa mahle uh tunitan a hamphatpihlou uh hi’n taklang hi. VDF personnel-te’ adi’n insurance khat mah leng bawlsak hilou ahihman in, vangsiatthu in sih le man, damlouh hitang tuah hun ah govt in bang lawh ding hiam chi a, VDF-te tung ah kichiamna hih buchin omlou a state govt in Police/MR/Follower alak VDF-te adi’n vangtah huai mahmah hi’n taklang hi. A haksatnate uh maban assembly session ah pawlut a, state govt in ngaihtuahsak dingin ngen uhi.


Glass container zanglou hunkhop om
Lamka, July-15: MDC member te’n June 14, 2016 a sitting aneih hun ua thupukna khenkhat sepsuah dingte kha 1 sung a sepsuah ding in thupukna bawl uh a, huai-te lak ah lampi dung a phalna tellou a, aksa zuakte, aksa glass container a koih ding, thil dang tawh zuak khawm louh ding, voksa zuakte’n  amul bawhkhiat thawh ding, trader teng in weighing scale azat uh electronic weighing machine a khekkhiat vek ding chih te tel hi. MDC sitting thupukna tuamtuam te sepsuah nang a hun kipia kha 1 sung July 16 in bei ding a, khawpi sung leh lampi gei ah aksa (chicken)  zuak hunkhop in glass container ah koihlouh in khaikhe seuhsouh uh a, glass container sung ah aksa kikoih muh ding vang mahmah hi.


DSO in RO hawm hiding
Lamka, July-15: National Food Security Act nuai a Rationing Agent-te’ ading in July 18, 2016 in Release Order (RO) hawmkhiat hiding hi. Rationing Agent-te’n RO lakma in kha 1 quota ading sum deposit masa ding in  M. Ginzasuan, Dist. Supply Officer/CCpur in theisak hi.


IMPHAL NEWS:
National Sports Univ.bill luikhe ding
Imphal, July-15: Chief Secretary O. Nabakishore in tunitaklam a DIPR campus ah press conference ah Parliament session nawn ah National Sport University (NSU) Bill luikhiak hiding in gen a, hiai tungtang ah amah telin state govt. official te’n Delhi ah va delhzui in Youth Affairs & Sports (YAS), Govt. of India a Official-te tawh meeting hun ah NSU bill lemsakpihna pe ding a chiam uh hi’n gen hi. Union Finance Minister in June 10, 2014 ni a budget speech puangkhiakna ah Manipur a University bawlkhiakna dia Rs. 100 crore proposal bawl a, huai ding in gam acre 200 a lian poimawh mahleh Manipur govt. in Thoubal district a Yaithibi Loukon ah gam acre 336 a lian pekhia a, gam acre 34 a lian tawh kisai a thubuai om leng govt. in July 31, 2016 tan in suveng ding a, Parliament session nawn ah Bill luikhiak theih ahihleh kum nawn in University academic activities kipan thei ding hi’n leng gen hi.


Naupang-te verification din hentang uh : Child Right Commission
Imphal, July-15: Imphal Airport ah zan in CISF te’n Indigo flight a Kolkata zuan ding Muslim community apan naupang 21 a kham khawl thu tawh kisai in ngaihdan tuamtuam om a, tuni’n Manipur Commission for Protection of Child Rights a Convenor Keisam Pradipkumar in hilchetna bawl a, CISF personnel te’n naupang 21-te thagum zanglou a khamkhawl in Child line ah complaint a bawl uh dungzui in naupangte theihtupna dia (verification) hentang uh chi’n gen hi. Supreme Court in naupang kum 12 nuai lamte a nu-leh-pa ahihkeileh a innkuan upa lamte omlou a state paw lamah laizil ding ahih keileh thildang hih dia a potkhiak louh ding uh chi’n dan bawl hi’n gen hi.


ADC admin. building thak hong ding
Imphal, July-15: Kangpokpi a Sadar Hills ADC-te Administrative building thak July 19, 2016 ni in hongkhiatna om ding a, hiai hun Dy. CM Gaikhangam, Ngamthang Haokip, Minister (IFCD), T. Manga Vaiphei, Minister (PHED), Nemcha Kipgen, MLA leh Yamthong Haokip, MLA te’n uap ding uh a, Chief Host in Haokholal Hangshing, Chairman, Sadar Hills ADC pang ding hi. Kuki, Naga leh Nepali-te telin nam tuamtuam te’n cultural dance lahna nei ding uh a, Naemi Haokip, Lamneilhing Haokip leh Maneithangza te’n la sa ding uhi. Sadar Hills ADC administration te’n  July 19, 2016 ni a kuapeuh in bandh, blockade, general strike, public curfew banah kiphinna tuamtuam bawl lou ding in ngetna bawl uhi.


FCI Godown tawh kisai in hilhchian
Imphal, July-15: Robert Singh Kshetrimayum, DC/Chandel in 2500 Matric Tonne capacity FCI Godown bawlna mun ding Laiching Khuman mun a suankhiak tawh kisai in tuni’n media-te kimuhpihna nei in hilchetna bawl a, mi khenkhatte’n aman a thuneihna zang in Liwa Khullen ah FCI Godown kibawl ding pen Laiching Khuman ah suankhia chi’n diklou tak in ngawhna bawl uh chi a, hiai tungtang ah DC in thuneihna neikha lou hi’n gen hi. Agenzelna ah akisaipih Department thupiak dungzui a official te’n Laiching Khuman ah suan in gam letdan leh man zah tawh kisai department a pelut uh hi’n leng taklang hi.


Petrol leh Diesel man kiam
New Delhi, July-15: July 2016 khasung a thautui man nihvei akiamna dingin tuni in Petrol leh Diesel man kiam nawn hi.  Petrol man ahihleh litre khat ah Rs. 2.25 in kiam a, Diesel man ahihleh litre khat ah paise 42  in kiam hi. Tua tawh kiton in National Capital New Delhi ah Petrol litre ah litre khat a Rs. 64.76 a kilei pen tunitak akipan in litre ah Rs. 62.51 man ding a, Diesel ahihleh litre a Rs. 54.70 a kilei pen litre ah Rs. 54.28 man ding hi.


Kum chinglou numei sual in om
Imphal, July-15: Dimapur a Thilixu village ah NSCN(IM) cadre 1 in a innveng uh tulel a class IV simlel kum 7 vel a upa numei 1 thagum a sual hi’n gen uhi. Akigendan in NSCN(IM) a cadre in naupangnu sanggampa dawr ah thil lei ding in sawl khia a, huai sung in thagum a sual in naupang nu innkuante thah ding tanpha a vau ziakin naupang nu’n hiai tungtang kal 2 vel (2 week) genkhe lou chi’n gen uhi. Hiai tungtang  ah Dimapur a Women Cell ah FIR khiaklut in om a, July 13, 2016 in police te’n naupang sualtu man uh a, medical report ngak hilel hi’n gen uhi.


TUNI THUPI:
“Hehpihna ka ngetna awte a ngaihkhiak ziakin TOUPA phatin om hen.”
– Sam 28: 6


EDITORIAL:
Vuahzu mahleh natna hi leng!
Singngat sub division a om Lungchin khua ah khawlum vuahpi a kithuah ziakin natna hileng  om chihthu zak hi a, Dr Jamthianlal Valte makaih in amun delh uh hidanin kigen hi. Vaigam leh eilak a khawlum leh khawvot omdan nakpitakin kidanglam mahmah om a, eilawi kivom hulhul mahleh mundanga khawlum thuak mite ngou deuhdeuh chih kal bangleng climate tawh kisai in tehkak ding om hi. Huchi kal ah khua hong lum zekleh bang ziak a natna hileng hichitamsek  ahidiam  chih ngaihsutna liantak hon pethei hi.
    Lamka khawpi a vuah a zuk chiangin hawktui in Tedim road leh Tipaimukh road zui mah leleng ataktak in India malsuahbial ah vuahzu kiam hiaihiai ahihdan chiangtak mai in taklat hita a, huai in  i gam akeu hiaihiai chih hoihtakin  taklang hi. Tudan bang zel a thil a paitouh leh Manipur pumpi adiakin CCpur district in tunung in leng  natna hileng tuamtuam, i tuahtouh ding uh thil baihlam mahmah ahi hi. Delhi khawpi leh a kimlaka  natna hileng i gal gen-gente eilak ah leng hongtung  ding bangin gintak huai in kilang  hi. Vangphat huaitakin tukum in vuahtui i mu tam ua, kum 2016 July kha adia alailak geih ah idingta ua, vuah hong zuk ziakin mi tamtak in tui leilou in khawsa thei uhi. Nidang in bel July kha tanin Lamka khawpi telin Manipur phaizang mun tamtak ah tuilou kaihtheih hilou a, buh suan nailou adim in om a, a kisuansa khenkhat asi maimah  tamtak leng om a,tukum in bel i vangpha lai uh  bang tadih hi. Himahleh, hibang vangphatna hongtung gige ding hiam chih gen ngam huailou a, tua iakin  mipi palaite’n pan a lak uh deihhuai mahmah hi. Vuahzu pe’n kipahhuai mahmah a, himahleh maban ah natna hileng tuamtuam bangchi’n i tuak zawmah lai ding uhiam chih ngaihtuahtham ching hi.
    Eilak gen lehang vuahzuk hun (rainy session) chiangin i Dam minthang uh Khuga Dam canal-te puakzak sek a, lungkhamhuai mahmah hi. Tulai ngialin Newspaper ah niteng phialin hiai thu suahkhiak in om a, a taktak in state government adingin zahlak-huai petmah hi. I gam dinmun theih a haksa a, vuah zukdan telin thil omdan vel taktak ngai hi. Chiamnuih a kimawlpih theih himawklou ahihdan kuapeuh i theih uh poimawh hi. I Dam neihsun uh Khuga Dam in electric lah petheilou a, irrigation project leng failed dimdem a, canal ah tui khah ahih chiangin tuiluangte’n leisai kiching maimai canal bang(wall) phuchim sek hi. I Khuga Dam ziak mahmah a leng natna hileng kibehlap ahidiam chihtheih in om a, nidang a huihsiang hiauhiaute tuni chiangin lum vutvut mai in, humidity a san ziak mah in i chi man dukduk thei gige in om mawk hi.
    Khawvot gamte’ sangin khawlum gam tuamtuam ah natna hileng  tamzaw a, hat leng a hatzaw kichi hi. Leitung pumpi’n a buaipih mahmah global warming ahi a, mite’n bangchi bang zahta  a pan ana la uhiam chih i theihlouh lai in, eilak mahmah ah leng khaw omdan in thil tamtak hon pawsuahta hi’n muhtheih hi.  Nidang in khawvot gam leh khawlum gam chi’n ana kikhen top a, moderate climate/moderate rainfall chihte ana om a, tuni chiangin om thou lai mahleh akoi  akoi ah gam lum vekta a theih in om phialta hi. Tuni chiang in khawvot gam deuh a chiamteh omthou mahleh nidang tawh kibang nawnlou in, khawvot hun pen kiam hiaihiai bang a chiamteh hi a, vuahtui kia pen tawm hiaihiai a, nisa in vuk khal a khawh tui zawhlouhna gamte leng tu in a khawhtui zungzungna bang omta hi.
    Bangziak a India khawpi New Delhi ah natna hileng hichitam diak ahi ding chih ngaihtuahtham ching a, eilak ah leng atung theilou thil hilou a, tunung sawtlou in ahong tungpah  ding chih gintak-huai  hi. Bangziakin? i theihchiatsa bang un Delhi i chih khawlum mahmah mun hi a, nitak khat light/power a mit zenzen leleng zinglam dak 3 tan a ihmu lou a dim in om ding hi. Mi hausate’n bel AC kineih in a poimawh leh generator tanpha tawh pang uh hi’n kigen a, ahihziakin midang 80% te mizawng ahihman un natna hileng om chiang in leng bawh baihse bang hi. Lamka khawpi ah natna hileng tuamtuam banah numei apan naungek piandan  danglam pipi a piangsekte leng ngaihtuahtham pha  a theih ahi hi.