MANIPUR EXPRESS | JULY 18, 2016

SP/CCpur in Behiang pha
Lamka, July-17: Khamchinpau @ K. Zou, Advocate in July 14, 2016 in SP/CCpur kiang ah  Singngat Area a Army te’n kilawmloutak a singtangmite  soisa  gige uh chi’n SP/CCpur kiangah  action lading in ngen hi. Huaiziakin L. Mangkhogin Haokip, IPS, SP/CCpur in Liensong Haokip, OC/Singngat PS tonpih in Behiang vapha a, Assam Rifles camp apan Gari DI No.207 MN1S-2137 dan (law) dungzui in lakhia a, tunitak in Lamka hongtung hi. K. Zou in a gendan in Lamka apan Songtal, Suangdoh, Lungthul, Parbung, Thanlon, Tipaimukh, Santing, Aina leh Mizoram  zuan gari driver-te leh passenger-te soisa zel uh chih leng za hi’n taklang hi. Arm Forces Spl. Power Act. (AFSPA) nuai ah Army te’n mi nautang (civilian) te soisak theihna ding dan (law) omlou a, himahleh ikipumkhat mateng uh  muhsit nam ihi gige ding chi hi. I gam a army omte’n pitek-putek leng zahtaklou in  soisa zel uh chihthu leng za hi’n K. Zou Advocate in gen hi.

HEADLINES:
Party teng in ‘national interest’ ngai poimawh hen : Modi
Parliament Monsoon Session kipan ding:All Party Meet om
New Delhi, July-17: Parliament ah zingchiang (July 18) a Monsoon Session kipan ding tawh kisai in GST Bill leh bills khenkhat pending-te passed ahihtheihna ding leh Parliament session lamzangtak a pai theihna din tuni’n All Party Meeting om a, huai hunah Prime Minister Narendra Modi in ‘national interest’ ngai poimawh dingin party makaite chial kawm in, thildang teng sang a tungnung sak zaw dingin chial hi.
    Parliament Monsoon Session hun a genkhawm dingte lakah GST bill pen opposition pawlin gupna apiak ziakun passed himaithei chihthu om a, Whistle Blowers Protection (Amendment) Bill, 2015, Consumer Protection Bill 2015 leh Benami Transactions (Prohibition) Amendment Bill, 2015 leng genkhawm hiding hi.
    Value added Tax (VAT) tawh kisai a bill poimawh mahmah GST (Goods and Services Tax) Bill ahihleh official takin "The Constitution (122nd Amendment) Bill, 2014" minvuah hi a, Lok Sabha ah May 6, 2015 a passed ahihnung in tutung in genkhawm hiding hi. Hiai bill tungtawn in manufacture-te kiangah indirect tax lak hiding a, national level a sale leh consumption of goods leng huamkha ding hi. Huailou in Central leh State government in goods leh services tawh kisai a all indirect taxes a lak tengteng GST in khengkhe (replace) ding hi. Hiai bill ahihleh passed ahihnung in kum 5 sung etkhiakna om ding , tua hunsung state te adia manna a om leh central govt. in amaute compensate ding hi.
    Tuni a All Party Meeting ahihleh Monsoon Session huna Opposition party-te gupna ngah theihna dinga government in a sap hi’n kigen a,  Prime Minister Narendra Modi banah Union Minister - Rajnath Singh, Arun Jaitley, Ananth Kumar leh Congress MP - Ghulam Nabi Azad, Mallikarjun Kharge, Anand Sharma, NCP leader -  Tariq Anwar leh D P Tripathi banah Samajwadi Party MP Naresh Agarwal leh BSP MP Satish Mishra telin party tuamtuam apan makaite kihel uhi.
    Monsoon Session  hun in houlimna sousang mahmah ding chihthu om a, Opposition pawlin Supreme Court gupna tungtawn a Arunachal Pradesh thubuai tawh kisai vualzawhna angah ziakun innpi houlimna ah pawlut ding uh a, Jammu & Kashmir tungtang leng pawlut ding uhi. Huailou in Nuclear Suppliers Group membership a lawhsapna tungtang ah leng houlimna sousang ding hi’n thusuakin gen hi.
    Tuni a All Party Meeting zawhsiang hun a Rajya Sabha Opposition leader Ghulam Nabi Azad in  GST bill tungtang Congress in support ding chi a, India mipite adia hoihzaw ding peuhmah Congress in gupna bawl ding chi hi. Parliament Monsoon session bel July 18-August 12, 2016 sung om ding a, tua hunsung in sitting 20 om ding hi.


Pema Khandu tuni’n Arunachal CM dingin kichiam
Itanagar, July-17: Arunachal Pradesh ah zan in  Congress Legislature Party(CLP) meeting in leader thak dinga a tel uh Pema Khandu in tuni in Arunachal Pradesh Chief Minister 9na dingin hi.  Governor Tathagath Roy in tuni’n Itanagar a Raj Bhavan ah Pema Khandu kichiam sak a, Dy Chief Minister ding in Chawna Mein leng kichiamsak hi.
Khandu ahihleh Chief Minister-lui (late) Dorjee Khandu tapa kum 37 lel mi hilai a, Tawang district sunga Moktu assembly constituency  akipan MLA a telching ahi hi. Congress MLA tamtak in Chief Minister Nabam Tuki a deihlouh ziakin a dinmun dengdel mahmah a, zan in Chief Minister ahihna banah CLP leader ahihna apan kitawp a, huai zawh a CLP meeting ah Nabam Tuki mah in CLP leader dingin  Khandu min proposed a, CLP member tengin kituaktak in pom uhi. Khandu bel Arunachal Pradesh kia hilou in India pumpi a Chief Minister teng laka naupangpen hi’n kigen hi.


LOCAL NEWS:
JAC-AATB in emergency meeting
Lamka, July-17: Joint Action Committee against Anti- Tribal Bills (JAC-AATB) in tuni’n H. Mangchinkhup, Chief Convenor tenna inn ah emergency meeting nei uh a, huai ah Outer Manipur Tribal’s Forum (OMTF) tawh meeting neih nawn hun a agenda puaklut ding genkhawm uhi. Emergency meeting ah Hmar Inpui, Thadou Innpi telin Zomi Council nuai a tribe tuamtuam a makaite leh JAC member-te tel uh hi’n kigen hi. July 18, 2016 in Salphate’ Pumbuk ah JAC dharna ah JAC apan Dr. Lalkhawlien Pulamte leh D. Angam Gangte makaihna in Tangnuam, Zion Veng (New Lamka) leh V. Munhoih tuding uh a,  Pastor D. Kamchinmang tel ding hi.


DTO fencing kipai dek
Lamka, July-17:Dist. Transport Office (DTO), CCpur umkual a kibawl fencing Tedim Road lampang mun khat khangin kipai thei pah ding in awn hi. Fencing ahihleh lui mahmahta a, tukha bul vel a khang(Crack) hi’n kigen a, a puksiatma a kisaipih deptt. te'n a etkai deihthu mi tamtak in gen uhi.


2016-19 sunga President dingin Rev. Vanmawia
BSI/CCpur Branch Annual conference om
Lamka, July-17: Bible Society of India (BSI), CCpur branch in Zomi Colony a ZPCS Biakinn ah Annual Conference-2016 neih tunitak in zou uhi. Tuzing dak 10:30 a mipi kikhopna ah Rev. Lalramlawm Inbuon, ICI Presbyterian Saikot in thugen a, nitak a mipi kikhopna  ah  Rev. Stephen Chinzathang, Exe. Secy, ZPCS in thugen  hi.
    Zan zinglam in business session leh kum 2016-19 sunga vaipaw ding telin agenda tuamtuam genkhawm uhi. Business session ah Secy leh Finance te’n report pia in, promotional Secy-te kha lawh Rs. 500 a khansak dingin thupuk uh a, 2015-16 sunga kul leh poimawh a zatding in Rs. 10 lakh bikhiah uhi. Annual Gift leng Rs. 5000/-  hiding in thupuk uhi. Kum 2016-19 sung President din Rev. Vanmawia, Vice President in Dr. Lalzakung, Secretary in Dr. TK Muana, Asst. Secy in Rev. SK Manlun leh Treasurer in Upa Vanlallawm tel uh a, Rev. E. Paukhanlian, Divnl Supdt., Lamka North Divn, EBC in thumsak hi.


Kha 1 sung in gari 127 kibehlap 
Lamka, July-17: Dist.Transport Office/CCpur ah June 2016 in gari tuamtuam 127 registration kibawl a, Truck 19, Car13, Jeep 4, Auto Rickshaw 5, 2-wheelers 86 pha hi. April-June 2016 sung in gari registration kibawl teng 345 pha a, huailak ah Truck 29, Van 7, Car 36, Jeep 8, Auto Rickshaw 17, 2-wheelers 247 leh others ah 1 tel hi. Huailou in June 2016 in revenue Rs. 7,92,886/- mukhia uh a, April-June 2016 sung in Rs. 19,14,219/- mukhia uhi.


RKSK Module Training omding
Lamka, July-17: Dist. Health Society/CCpur saina in July 19-30, 2016 sung Synod Hall, IB Road ah CHC leh PHC nuai a ANM, MHW (Male Health Worker) leh Mupti-Purpose Worker-(MPW) te’ ading in Batch 4 a kikhen in Rastriya Kishor Swasthya Karyakram (RKSK) Module training omding a, Imphal apan mi bangzah hiam te’n sinsak ding uhi. July 19-23, 2016 sung 1st batch ah ANM mi 28 leh 2nd batch ah ANM mi 31 training ding uh a, July 26-30, 2016 sung MHW leh MPW kigawm 3rd batch ah mi 30 leh 4th batch ah mi 31 te’n training ding uhi.


PASS kiang ah ngaihven theih ding
Lamka, July-17: People Advance in Social Service (PASS) a Secretary apan kizadan in, Kanpur a ALIMCO akipan vualphaloute’a ding vanzat tuamtuam (wheelchair, rotator, walking stick, smart white cane leh hearing aid) hongtung a. New Mata a PASS office ah om lel a, applicant te’n ngaihven theih ding chi uhi. Vanzat ngen thak nuamte’n passport size copy 2, disability certificate leh income certificate tawi in application piak theih ding a, thuchian kimzaw leng PASS office ah kan theih ding hi.


Kha 6 sung in TB positive 49 mukhia
Lamka, July-17: Revised National TB Control Programme/CCpur ah January-June 2016 sung in OPD case 12647 om a, mi 928-te’ khaksuah (sputum) a thak in test in om a, mi 167-te’ khaksuah alui test (follow-up) uhi. Huai hunsung in TB positive 49 muhkhiat hia, mi 28 mah TB natna apan damsiang uh a,  mi 27 te’n TB damdawi a course kim in ne uh a, mi 72 mah damdawi in enkol thak uhi.


“Tribal Euphony Solo Hunt” Promotional Tour omding
Lamka, July-17: Tingteila Production House, Chingmeirong, Imphal in 'Tribal Euphony Solo Hunt’  Manipur, Season-I chih minvuah in zingchiang July 18 (Seppatni) sunnung dak 2:00 in YPA GHQ Hall, Hiangtam Lamka ah Season-I  Promotional Tour/Concert hong nei ding uhi. Huai hunah Top 12 finalist Foreman Gangmei; WL Thaniwar Anal; Urngayam L Shimray; Gaanmei Rongmei; Asem Wngbe Koren; Thotson Langhu; Sganchuiphy Keishing; Jenny Thomte; D Ambrose Kamei; DK Dziiphro Ariicho; Hatchinneng Kipgen leh Thanreiphy Kashun kihel ding uhi. Concert adi’n Ticket Rs. 100 in amun ah leitheih ding a, ticket pansan in vote piak theih ding hi’n kigen hi. Huai hunah  3 Bills ziaka martyr 9te leng suunna om ding hi. Amau pawlin July 11 in Tamenglong, July 13 in Senapati, July 14 in Chandel, July 16 in Ukhrul ah tour nei uh a, July 18 in Ccpur ah tour zousiang ding uhi.  July 19 in Sendra ah grand finale om ding a, huai ah mi 6 paikhe ding ua, tuazoh in MFDC Imphal ah final round om ding hi. Huai hunzatna zintun HAA, KAPU leh ZAA in mipite’n uap di’n chialna bawl uhi.


IMPHAL NEWS:
JCILPS volunteers te’n mi 47 hentang
Imphal, July-17: Joint Action Committee on Inner Line Permit System (JCILPS) volunteer te’n tuni zinglam dak 10:00 velin North AOC ah Guwahati apan Inter-state bus a Imphal hongtung kum 18 nuailam mi 9 telin non-local mi 47 te’n India gammi hihna document kichiantak a neih louh ziak un hentang in JCILPS office tun uh a, huai ah mi 9 te’n document khat leng nei lou uh a, mi 15 te’n I-card photocopy nei uh chi’n gen uhi. Hiai thu tawh kisai in tuni’n press conference om a, huai ah BK. Moirangcha, Convenor-in-charge, JCILPS in non-local 47 lakah mi 29-te Assam a Dubri district apan hi uh a, Bishnupur a ST Xavier School bawlna ah nasem ding leh mi 9 dang te’n JNIMS leh Shyam Power India Private Ltd. ah nasem dia hongkuan uh chi’n gen hi. Contractor leh inter-state buses service te’n koi apan hong kipan uh hiam chih theihlouh non-local-te Manipur ah pawlut lou dia tam veitak theihsak himahle uh a thupiak zui omlou chi’n gen hi.


Candidate te’n kiphinna pat sawm
Imphal, July-17: All Chandel District’s Written Test Successful Candidate of Police Constable, Male 2013 te’n Ziontlang Village Community Hall ah tuni’n meeting nei uh a, huai hun ah kiphinna pat ding thupukna bawl uh hi’n kigen hi. Hiai thu tawh kisai a Mk. Ramjanglin, President, (ACDWTSC) in state govt. nuai a akisapih thuneite’n Police Constable lakna dia July 20, 2016 tan a Viva voice puangkhiak ding a lawhsap ua leh kiphinna pan ding uh hi’n taklang hi.


Chandel ah tuni’n zinling
Imphal, July-17: Chandel district ah tuni zingsang dak 8:00 velin 3.2 magnitude a hat zinling om a, huai hun ah si leh liam banah van kisia omlou hi’n gen uhi. Gujarat ah leng tuni zinglam dak 9:25 velin zinling magnitude 4.5 a hat om a, thiltung tawh kisai in National Centre for Seismology te’n zinling kipatna mun ahihleh leinuai km 10 tan akipan hi’n taklang uhi.


Km 7000 kitaidemna ah taitung
Imphal, July-17: Manipur apan Opendro Thoubam in Trans Am Bike Race km 7000 a sau kitai demna ah India banah Asia pumpi adia kitai demna ah lawhching masapen hiding in gen uhi. Huai kidemna a ding in Thoubam in cycle kum 6 kizang sa lei a, Bike race in mualsang tak, gammang, singtang dawn leh mun tuamtuam tawn a, gam tuamtuam apan Cyclist paikhawm te’n a nek ding uh banah niteng van zat poimawh teng kipuak uh a, Thoubam in km 7000 ki tai demna pen  ni 27 leh dakkal 7 a zou in, mi 67 lakah position 30na a pang hi’n gen uhi. Huai kitai demna ah tel ding in Thoubam in kha 2 paisa in dakkal 20 sung lel training bawl hi’n gen uh a, Thoubam ahihleh tulel in Bangalore ah Software professional na sem a, student ahihlai apan kitai demna lamah lunglut a, Bangalore a Cycle kidai demna tuamtuam ah leng tel zel hi’n taklang uhi.


HIV/AIDS tawh kisai in awarness lecture
Imphal, July-17: PIB (Defence) thusuak in Loktak Brigade nuai a Noney Battalion-te saina in Lamdangmei ah tuni’n HIV/AIDS thu tawh kisai in awareness lecture om hi. Huai ah Lamgdangmei a Post Commander in HIV/AIDS natna theih khiak ding dan leh kikep ding dan banah ki veng dingdan leh ki etkol ding dan sinsak a, khaw mite’n Noney batallion-te panlakna kipahpih thupuang uhi.


Nupi pawl te’n relay hunger strike nei
Imphal, July-17: Singjamei Wangma Bheigyabati apan nupi 3 in JCILPS a convener lui Kh. Ratan tungah ‘Wanted Tag’ zukkik ding phutna in Singjamei Thong gei ah tuni zingsang dak 7:00 apan nitaklam dak 5:00 tan hunger strike nei uh hi’n kigen hi. Nupi 3 - Khomdram Ongbi Momon Leima (72); Soyam Ongbi Brajarani Devi (62) leh Khomdram ongbi Devarani (35)-te hi uh a, kiphinna neite’n social media a limlak ziak a Singjamei Police te’n Kh. Ratan tung ah ‘wanted tag’ a puang un legal procedure a zuih louh banah pansan bei leh kisiamtan nang om lou hi’n leng taklang uhi.


Khurai area ah nupi pawl te’n rallly
Imphal, July-17: Khurai Area All Manipur Nupi Marup-te makaihna nuai ah nupi pawl te’n a kisaipih govt. dept. te’n NFSA nuai a beneficiary-te kiangah ration a hawm khiak louh uh mawhpaihna in tuni’n Khurai leh Kongpal area ah rally nei uhi. Hiai tungtang ah kiphinna nei te’n Khurai A/C sung a food security card neite ration nekguk sakna telin a kinthei pen a beneficiary-te food security card piak ding leh fair price shop hongkhiak ding phut  uhi.


Police in helpawl a tel 2 mankhia
Imphal, July-17: Police thusuak in a gendan in Police te’n apaisa dakkal 48 sung in PLA cadre 2 mankhia uhi. Imphal West Police Commando te’n July 15, 2016 in Thangmeibang Lourulpurel ah search operation bawl uh a, huai ah PLA 1 mankhia uh a,  Imphal Police station ah pekhia uhi. Achangbigei ah PLA cadre 1 mankhia uh a, Heingang Police station ah pekhia uhi.


TUNI THUPI:
“Keimah loungal pathian dang na nei ding ahi kei.”
- Eksodas 20:3


EDITORIAL:
Legal Awareness Campaign
Ni khat lel khawng paisa in New Bazar area ah pasal khatin numei khat biang ava zut sak ziakin ‘case’ khat omdek man chihthu zak ahi. Aneupen apan alianpen tanin dan (law) tawh kisai banah i dikna (rights/ legal) tawh kisai ithei uh poimawh mahmah ta hi. Dan leh dun tawh kisai buaihuai mahmah a, himahleh mipi lampi diktak a vengtu leh gaktu ahihdan itheih chiat uh kisam hi.
    Mimal chihin ‘rights’ inei uh a, innkuan inleng ipanlak theihna tan uh thuneihna (rights) inei uh a, society (khawtang) inleng inei uhi. Hun sawt painai hetlou in ei lak mahmah ah legal awareness campaign thansak mahmah in om a, ahoihlam genin thil kipahhuai ahi hi. Hibang campaign tamsem hong om theileh mipi’n hamphatpih mahmah dingin gintakhuai hi.
    I gam ah, numei naupang hehpihna tel hetlou a sual leh suallup in omta a, poi petmah hi. Numei-naupang’ tungah hehpihna bei petmahta hita hiam chihtheihin om phialphial hi. Numei naupang soisakna ziakin mi bangzahhiam lawm- le- vual phalou omta a, mi bangzahhiam in HIV/ AIDS veilawh uh a, liam- le- bai mi tamtak om uhi. Poi petmah. Legal Awareness Campaign tungtawnin khangthak adiakin student-te’ khuak (brain) i khuah sawh leh hoih mahmah ding hi. Legal Awareness campaign tamsem ikiphamawh mahmah hi.
    Organisation tuamtuam leh civil society tuamtuamte’n hibang dan tawh kisai a nautangte’ theihtuakte a sai (organize) zel uh deihhuai mahmah mahmah hi. India context et in dan tunga thuneitu omlou a, President mahmah leng dan nuai ah om in Constitution nuai ah kankhum in om hi. Thiltung naipen enzual lehang, Arunachal Pradesh ah Government phiat (dissolved) ahihnung in BJP gupna tawh ministry thakkhat dinkhiak himahleh, Supreme Court in ‘Installation’ chih thugelh ‘term’ hon gelh a, Central government a BJP makaih NDA adingin minsiatna tawpkhawk hongtung hi.
    Eilawi in dan i maingal uh a, itheih louh ziak uh ahi hi. Vaigam a teng leh laithei mite’n dan (law/Constitution) bang hihiam chih thei law mahmah uh a, dan leh thupiak enkoltute zahtak mahmah uh a, mob violence ahihkei nak leh police personnel chiang khat mahmah tawi khat leng zahtak petmah uhi. Eilawi in police hi’n para military force-te ingap thawh dan pen tuantualvai (un-civilised) khasek a poi mahmah hi. Dan (legal) tawh kisai tulai in i gam ah hong kipibawl mahmah a, kipahhuai mahmah hi. Aneupen apan alianpen tanin atheih di, huai kawmkawmin sinsak a omte leh sinsaktute’n leng ginom leh chitak taka a zuih ding uh chih ahi. Supreme Court/ High Court ahihkeileh session judge tuamtuam a vaihawmtute leh CJM tela vaihawmtute’n hibang campaign naksem a hon neih uh deihhuai mahmah hi.
    Thu neuchik leng thupitak suakthei chihbang pian in, gam leh leitang (politics vai hilou) in, i lungsim uh kawchik law mahmah hi. I innsak/ innkhang ahihkeileh i kong feet khat tanpha mite’ adia pekhe ngamloute ihi uh a, huai in i lungsim neuna(narrow mindedness) hon taklang mahmah hi. Gamkek ut ihih leh i upate gendanin ‘I luangtatna ding ikek zawhchiangin kichai’ chih hilel mai hi. Na kong mai lampi aneu ngeingei leh na lungsim neuna kilang ahi a chih uh na inn ah kilang mahmah ding ahi chi’n British paunak in gen a, dik toutou leh kilawm hi. 
    Dan (Legal) tawh kisai tuni chiangin mipi nautang kipilvang hiaihiai in kilangta a, kipahhuai mahmah hi. Hibang in dan tawh kisai nautang lakah hun paisa sawtpi apan kisinsakna leh kitheihsiamna om hileh mi tamtak adingin hamphatna tunding in gintakhuai hi. I sungthu gen ta mawkmawk lehang, Hausa vai a kituhna, numei-pasal kal, gam thubuai leh adangdang tampi petmah om kha maithei a, student-te’ haksatna tawh kisai leng gending omkha maithei in i tuat mawkmawk hi. Student-te’ bag gikdan, School Van a apaidan uh (capacity), class room a student te’ capacity tungtang telin i gam ah awlmawhhuai thil tampi om hi.


SUUNNA:
Thangmuanlian (17) s/o Khupzadong @ Dongpi of Zion Veng, New Lamka, tuzing baihtak in New Bazar a Bus Parking ah over dose a sisa in kimukhia a, sunnung in YPA hanmual, New Lamka ah kivui hi.
Vungkhanniang (56) m/o Thangthianlal of Sinzawl village tuni sun dak 12:10 velin awmna ziakin si a, July 18, 2016 in kivui ding hi.