MANIPUR EXPRESS | JULY 17, 2016

HEADLINES:
DC/CCpur in footbridge kibawlthak hongkhia
Lamka, July-16: CT Lian Guite, MDC (16-New Lamka West) leh a teamte’n Lanva leh Dorcas Veng gamgi Lanva-lui tunga footbridge (Children Yellow Bridge) a bawl uh mipi zattheih din tuni in Lunminthang Haokip, IAS DC/CCpur in hong a, Pastor K. Zamkhansuan, thumna in lan hi.
    DC/CCpur in a genna ah Team CT Lian in hibang lei a bawlkhiak uh ettontham ching a, Dist. Admn in kipahpih hi’n gen hi. Khantouhna kichi thil neuchik akipan hi a, hiai footbridge leng Pathian vualzawlna ahi chi’n gen hi.

    CT Lian Guite in agenna ah koimah akipan fund zanglou in lawm-le-vualte kithuahpihna tungtawn a Rs. 65,000/-  bei in ‘Team CT Lian’ min zangin bawl hi’n gen a, huai lei feet 50 asau leh feet 2 leh inch 8 alian hi’n gen hi. Lei bawlna ding fund bikhiahsa omlou in, sum neih dandan kaikhawm in, Dist. Admn phalna in khawpi sunga solar street light khuam kizang nawnloute leh sikvan tuamtuam aneihsate zanga bawl hi’n gen hi.
    Huai hun ah Dorcas Veng V/A, Gouchinkhup Veng leh Lanva V/A makaite banah  mun tuamtuam apan mipoimawh te’n uap in thugen uh a, school naupangte’ awlmawh ziaka fund omsa hilou lei thupitak bawlkhia CT Lian Guite leh a teamte’ pahtakthu gen uhi. Huai lei ahihleh Lanva leh Dorcas Vengte kikawmtuahna dia a poimawh ban ah school naupangte’ adia poimawh diak hi’n kigen hi.


Arunachal Chief Minister Nabam Tuki in tuni’n kitawpna pia
MLA 43 in CLP leader dingin Pema Khandu tel uh
Itanagar, July-16: Arunachal Pradesh Governor Tataghata Roy in Arunachal a Congress ministry a Chief Minister Nabam Tuki kiangah tuni’n Assembly ah MLA tamzaw nei(majority command) hina hiam chih chian ding in thupe mahleh Chief Minister Nabam Tuki in tuni in  Governor kiangah kitawpna pia hi. Nabam Tuki in Congress Legislature Party (CLP) leader hihna akipan inleng kitawp hi. Tuni mah in Congress Legislature Party meeting om a, huai ah  MLA 43 in CLP leader dingin Pema Khandu kituaktak in telching uhi.
    Govt thupuangtu Bamang Felix in agendan in Congress Legislature Party leader thak dingin Nabam Tuki in Pema Khandu min proposed(vokkhia) a, CLP meeting atel Congress MLA tengin leng kituak takin pom uhi.Tuni a meeting ah Nabam Tuki deihlou a kiphin Congress MLA 11te banah huaite leader Kalikho Pul leng tel hi. CLP meeting zawh in Pema Khandu in Raj Bhavan vapha in Governor Tataghata Roy kiangah MLA tamzaw nei ahihdan va theisak kawm in govt bawlsak dingin ngen hi. Pema Khandu in assembly member 60 om lakah aman Independent MLA 2 telin member 47 in support uh hi’n Governor kiang ah gen hi.
    CLP leader thak dinga telching a om  Pema Khandu ahihleh Chief Minister-lui Dorjee Khandu’ tapa kum 37 lela upa hi a, Tawang district a Moktu Assembly constituency akipan  MLA ching ahi hi. AIR correspondent in agendan in Chief Mnister Nam Tuki tuni in a kitawp ziakin assembly ah amah tunga muanzawhlouhna puaklut a om (no confidence motion) leng genkhawmna bangmah omlou hi. Pema Khandu in CLP leader dinga telching ahihna tungah Congress President Sonia leh Rahul Gandhi tung ah kipahthu gen a, amah Chief Minister ahih hun ah social sector leh employment generation ngaih poimawh masakpen hiding chi’n gen hi. Congress State Unit President Padi Richo in Arunachal Pradesh a thil omdan akipan BJP in sinlai(lesson) la uhen chihsan hi.
    Arunachal ah hun sawtlou sungin political paidan kikheng zungzung a, Governor in Chief Minister Nabam Tuki deihlou Congress MLA-te’ makai Kalikho Pul makaihna in BJP MLA 11 te’n pawlam apan support pia in govt  bawlsak hi. CM hilai khenkhiak a om Nabam Tuki leh Congress in Supreme Court ah a thu tun uh a, Supreme Court in sawtkuam a ngaihtuah nung in July 13, 2016 in Arunachal Governor in assembly tawh kisai thupukna a bawl Constitution kalh chi’n Nabam Tuki makaihna Congress govt koihthak nawn hi. Acting Governor Tathagata Roy in CM Nabam Tuki kiangah July 16,2016 in Assembly ah MLA tamzaw nei mah hiam chih taklang(show) din thupia hi.
    CM Nabam Tuki in tuni’n CM hihna leh CLP leader ahihna apan kitawp a, amah mah in CLP leader dingin Pema Khandu min vokkhia hi. Huai meeting ah CM Nam Tuki khengkhia Kalikho Pul telin Congress MLA kiphin teng tel uh a, amau Congress tawpsan hilou in Nabam Tuki khenkhiak ahih phot leh lungkim hi un gen uhi.


SSPP GHQ leh CDLSA saina in Legal Awareness
Lamka, July-16: SSPP GHQ in CCpur Dist. Legal Service Authority (CDLSA) tawh kithuah in tuni zinglam dak 11:30 in Hiangtam Lamka a YPA GHQ Hall ah ‘Legal Awareness Programme’ sai uh a, Chief Guest in Justice N. Kotiswar, Judge, High Court of Manipur & Executive Chairman Manipur State Legal Services Authority (MSLSA) pang a, Guests of honour in RK Memcha, Member Secy, MSLSA & Vigilance, High Court of Manipur; Kimneinieng Shoute, Dist & Session Court Judge, CCpur; Letkho Kipgen, CJM/CCpur leh Advocate Ch. Noren, High Court of Manipur pang uhi.
    T. Lianchinpau, Vice President (Internal), SSPP GHQ in vaidawn thugen a, Ch. Noren, Advocate in ‘Consumer Rights’ tawh kisai sinsak a, programme  hun ah Nokthane Party Manipur a filmstar minthang tuamtuamte’n lemchin (drama) lahna nei uhi.
    Chief Guest in constitutional rights leh law(dan) lam a career bawl ding dan tawh kisai sinsak in, dan kichi khawtang khaikhawmtu ahihman in kuapeuh in theih poimawh a, dan theihlouh pen suanlam chinglou(aban pek 4na ah)
SSPP GHQ leh CDLSA.....pek 1na zopna
ahihman in theih ngai chi hi. Fundamental rights dungzui in dan (law) nuai ah miteng kikim a, kikhentuam theih hilou chi hi. Awareness hun ah Lamka leh a kim a Private, Mission leh Govt. school tuamtuam 13 apan student 545 leh teacher guide 19 kigawm mi 564 tel uhi.


LOCAL NEWS:
DM thupiak bang in eviction om
Lamka, July-16: Dist. Magistrate/CCpur thupiak bang in Sub-Divisional Magistrate, Tuibuong/Tuibong leh staff te’n tuni zinglam dak 7:00 in SP office apan Dist. HQ kikal ah  phalna bei a inn, dukan leh hotel kibawl 45-te  eviction bawl uh a, Police te’n apoimawh bangbang in panpih uhi. Eviction hun ah inn neitute’n amau inn chiat kiphel uh a, gari zang in innvan leh innsung vanzat-te pawkhia uhi. SP office leh Dist. Council office kikal ah tuzing apan eviction omding chih theih ziakin zan nitak in innkuan bangzahhiam kihemkhia uh hi’n kigen hi.


Zou Gazetted Officers & Pensioners Assn.
Lamka, July-16: Zou Gazetted Officers te’n tuni zingkal in Mannuamching, IAS, CEO inn ah meeting nei uh a, Zou Gazetted Officers and Pensioners Assn. bawlkhiat ding in thupuk uhi. Huai ding in  enrolment fee (inservice-te  Rs. 5000, pensioner-te Rs. 2500) ban ah annual fee (inservice-te Rs.1000, pensioner-te Rs. 500) hiding ban ah member kuahiam sihna tuak om leh galna Rs. 10,000/- piak ding in thupuk uhi. Assn. in a tuppi pen ahihleh Zou Gazetted Officer kibehlapna di'a panlak ding, khat leh khat kimeltheih tuah semnang, lailam tawh kisai panpih ngai leh panpihtak om leh panpih ding chihte hi’n kigen hi.


SP/CCpur kiangah action la di'n ngen
Lamka, July, 16: Khamchinpau Zou @ K. Zou in SP/ CCpur kiangah Behiang khua om Assam Rifles te gamtatna tawh kisai complaint thehlut in action la dingin ngen hi. Thusuak kimu in a taklatna ah, Behiang khua a om  Assam Rifles te minautang tung ah kilawmloutak in gamtang ua, khawsung mite a dingin nawngkaina tun a, tua ziakin thil omdan enkhia a, Behiang khua a minautangten haksatna a tuahte uh hihveng dingin ngetna thehlut hi.


HPC-D (C) makaih in consl. meeting
Lamka, July-16: Hmar Peoples' Convention- D (Chairman) pawlin Rengkai a VTI Auditorium ah tuni’n consultant/political adviser ban ah Hmar nam sunga pawl tuamtuam ah makaite’n consultative meeting nei uh a, huai hun ah thu poimawh tuamtuam genkhawm uhi. Makai paikhawmte’n HPC-D (Chairman) pawlin kum 30 sung nam adia panlakna uh theihpih in, Mizoram a Hmar movement pailel ah HPC-D (Chairman Pawl) panlakna kisuanpih huai hi’n puang uhi. Ahun ding genkholh theih kihei mahleh Mizoram govt. leh HPC-D (Chairman pawl) in kihouna (talks) nei dia om ahihman in, hun sawt kidiah nawnlou ding hi’n makai paikhawmte mai ah gen uhi. Meeting ah Hmar Inpui Gen. Hqtrs leh anuai a pawl tuamtuam- HCLF, HYA, HSA, HWA, HACS, HNU, HAA, DHWA, HKI, HMARTOB ah makaite tel uhi.


Article writing, painting leh laphuah kidemna
Lamka, July-16: Tuailai 1434 Pro leh Central BYF in “Thutak leh diktatna a kibulphuh thakna” chih thupi zang in tuni zinglam dak 10:00 in Ebenezar Academy ah article gelh kidemna, spot painting competition om hi. Article gelh kidemna ah mi 22, Spot painting competition ah mi 30 tel uh a, sunnung dak 1:30 in EBC Dorcas Jubilee Guest House, Auditorium, New Lamka ah laphuah kidemna om a, huai ah mi 10 tel uhi. Item 3 kidemna ah 1st te’n Rs. 5,000 + Certificate; 2nd te’n Rs. 3,000 + certificate leh 3rd te’n Rs. 2,000 + Certificate ngah ding uh a, kidemna a, tel teng kiang ah participation certificate piak ding ban ah tunung sawtlou in result puankhiat hiding in kigen hi.


Solo Hunt zintun din kisakhol
Lamka, July-16: Chingmeirong (Imphal) a Tingteila Production House in 'Tribal Euphony Solo Hunt' asai uh top 12 tan tungta in July 18, 2016 in YPA GHQ Hall, Hiangtam Lamka ah Hmar Artistes' Assn (HAA), Kuki Artistes' Progressive Union (KAPU) leh Zogam Artistes' Assn (ZAA) zintunna in ‘promotional tour/concert’ neih sawm uh a, huai ding tawh kisai tuni sunnung dak 3:00 in Artist Assn 3-te’ makaih in lasiam tuamtuam te’n ZAA Office ah rehearsal nei in programme neih ding dan tawh kisai kikumkhawm uhi.
    Benny Khongsai in agenna ah Tribal Euphony Solo Hunt ahihleh Manipur a singtangmi lasiamte dopsang ding tupna ahihman in kuapeuh in kithuahpih dingin ngen a, concert ding tawh kisai in Organizing committee in ticket abawl Rs. 100/-  a zuak hiding in gen a, kuapeuh in kithuahpihna a leisak dingin leng ngen hi.


Saikot  mipi’n lampi bawl uh
Lamka, July-16: Saikot Village Authority makaih in tuni’n Chura-Sugnu Road in a tawt khak Shan Veng junction apan Saikot tan mipi’n social work nei in lampi bawl uh a, vengsung mipi za a sim kuan uhi. James L. Tova Hmar, Jt. Secy Saikot V/A & Spokesperson gendan in, lampi ahihleh neuchik himahleh Sugnu area a tengte a dingin poimawh (lifeline) hi a, lamsiat tawh kisai concern MLA, DC leh PWD kiang ah bawlhoih di’n tamveitak gen mahle uh ngaihsak ahihlouh manun V/A makaih mipi’n neih dandan thawhkhawm in bawl uh hi’n gen hi. Vuahzuk hun in lampi ah tui leh buannawi kithuah luang in, khe apai school naupangte’’n haksatna atuah ban uah gari neu a taite tanpha adi’n haksa hi’n gen hi. Lampi bawl zawhna munte ah ‘No MLA, No cry; We don’t want Pond road; Don’t come after the bill for this work; Corrupted metal road;’ telin placard tuamtuam takkhia uhi.


Bunglon ah ‘Buonsilthak Kut’ zang
Lamka, July-16: Bunglon khaw mite’n kum bangzahhiam paisa apan ‘Buonnsilthak Kut’ kichi Tuilou ah buh suan zawh a program ana zat zel uh tuni zinglam dak 11:00 in Bunglon Community Hall ah zang uhi. Upa Th Mangngul, Chairman, ESC in Bunglon khawmi loukai-te/tuilou bawl-te ading in Pathian kiang ah vualzawl ngetsak in thumsak hi.
    Program ah Chief Guest in Th Siehsat, Social Worker, Functional President in Lulkhopau Social Worker leh Guest of Honour Havildar Kamkhopau Singsit pang uhi. Buonsilthak Kut kichi kumteng in Bunglon Loukai Pawl-te panlakna in zangzel uh a, tukum a Kut lawpna 12vei na hita a, nitaklam in ‘Kut”ankuang umkhawm uhi.


ZSP Lamka Block Freshers’ Meet
Lamka, July-16: Zogal Memorial Hall Complex, Zo Veng ah tuni zinglam dak 11:00 in Zou Sangnaupang Pawlpi (ZSP) Lamka Block Fresher Meet 2016 program om a, Rev Khamchinkhai in Fresher student 27-te’ Pathian kiang ah thumsak hi. Huai hun ah Chief  Guest in Chinlunthang, President, UZO/GHQ pang a, Functional President in Nengkhosoi, President, ZSP/GHQ leh Guest of Honour in Jamkholian Munluo pang hi.
    Chief Guest in agenna ah Social, Religious leh Politics lam ah Nampi’n khantouhna nei a, himahleh Education leh Employment lam ah deihbang lou chi hi. Huaiziakin tuni a’ paikhawm student te’n theihtawp suah a panla ding in chial hi.
    Functional President in “survival of the fittest” khang a khawsa ihihdan uh kuapeuh in theigige a, sep-le-bawl leh laizilna lam ah kuhkal leh chitak suah a panla ding in student-te theisak hi.  Guest of Honour in  Self-confidence leh tup kichian nei a, tuni’a paikhawm student te’n “I can do, I will do & I must do” chih tawh kalsuan ding in hanthawn hi.


Sunday School building ground floor hong
Lamka, July-16: EBCC Pethuel, Vengnuam South te’n kum 2014 bullam apat Sunday School building abawl uh ground floor zousiang uh a, tuzing dak 6:30 in Pastor K. Pumsuanthang, Local Pastor in hongkhia in Pathian kiang ah thumna in lan (dedicate) hi. Building Committee lam apan Sunday School bawlna report om a, tunitan in ground floor bawlna ah sum kiseng teng Rs. 22.5 lakh vel hi a, room 9 om hi.


Prize hawmna leh Office latna  nei
Lamka, July-16: Northeast FoodBanking Network (NeFN) office, Tedim Road, Hmarveng ah NeFN in July 6-14, 2016 sung "Tree Plantation Photo Competition 2016" asai uh prize hawmna leh office thak latna nei uhi. Huai ah Pastor Kamminthang in NeFN office thak Pathian kiang ah thumna in lan hi. Khamlianlal, Founder & Director NeFN in environment kepbit ding ban ah huihsiang om nang in govt kia in singnou suanlou a, mimal, innsung, vengsung leh NGOs tuamtuam te’n panlak adeihthu gen hi.
    Competition ah 1st in Miss Manmuanching of  Zoumunnuam (Rs.1000/- + Certificate), 2nd in Lamzamuan of  Tuining village (Rs. 600/- +  Certificate), 3rd in Henry Letminthang Haokip of Quarter Veng, Tuibuong/Tuibong (Rs. 400/- + certificate) ban ah Miss. N Cheerysha Haokip ( Certificate of appreciation) in Youngest participant award ngah hi.


IMPHAL NEWS:
Sadar Hills ah accident in 1 si, 2 liam
Imphal, July-16: Sadar Hills a Sapormeina Police Station in a huamkhak Charhajare bazar ah tuni nitaklam dak 3:30 velin Dio (No. MN01L-1955) a kipua mi 3 in truck a phuk khak ziak un amun ah mi 1 si in, 2 liam hi’n gen uhi. Akigendan in Dimapur zuan a tai Dio scooty a kipua mi 3 te’n Imphal lam zuan Truck (No. NL07A-6725) mailam phusuk uh a, huai ah scooty driver Sapam Sanathoi (21) s/o (late) S. Priyokumar Singh of Khurai Chingangbam Leikai, Imphal East a mun ah si a, Khurai Chingangbam Leikai apan tuak Rambo Wahengbam (27) s/o Ibotombi Wahengbam leh Denao Singjam (18) s/o Mega Singjam-te a liam ziak un Police te’n RIMS casualty ward ah pawlut uh a, siluang RIMS morgue ah koih uhi. Rambo dinmun lauhthawnghuai hi’n kigen hi.


Health Sector lam ah hihhoih
Imphal, July-16: Dr. O. Ibomcha, Director, Health Services, Govt. of Manipur in tuni a DIPR campus a press conference hun ah Manipur in India pumpi ah Maternal Mortality Ratio (MMR) a naungek piang tung damsuah tamna pen in 1na luah tou den a, institutional delivery leh Janani Surakhsha Yojana (JSY) ziak hi a, Manipur in Infant Mortality Rate (IMR) sukniam ziak in 13th Finance Commission apan Rs. 1,057.01 crore award sang hi’n gen hi.  Directorate a official data dungzui in state health dept. nuai ah medical doctor 862 om a, huai lakah 177-te specialist hi uhi. RIMS leh JNIMS a Doctor-te telin Manipur ah doctor 1333 om a, huai lakah doctor 172 te’n private leh nursing ah sem uhi. Govt doctor te’n private clinic leh private hospital-te ah a septhuah uh beisakna ding in department te’n panla mahle uh lawhsam uh chi hi.


Imphal West district ah 144 CrPC
Imphal, July-16: District Magistrate/Imphal West in muanna leh bitna hihse thei ding banah buaina bawl sawm om chih report om pansan in tuni nitak dak 6:00 akipan in thuthak om nawn masiah Imphal West district pumpi ah 144 CrPC puang a, huai kizat sung pawlam mun khat ah mi 5 sang a tam zaw om khawm phal ahihlouh banah police leh security-te chih louh midang hiam hei leh galvan tawi khia omthei lou ding in puang hi.


Police constable lakna di’n written test
Imphal, July-16: Manipur Police Dept. a constable (male/civil) lakna ding a PET lawhchingte a ding in khua (weather) om dan a hoih leh Khuman Lampak main stadium ah July 24, 2016 (Sunday) zinglam dak 11:00 in Written Test om ding chi’n Chairman DPC in theihsakna bawl hi. Candidate-te Khuman Lampak stadium ah zinglam dak 9:00 in Admit Card, Clip board leh Ball point pen tawi kawm a ki report ding in theisak hi uh a, huai hun ah mobile phone, bag, wallet leh a dangdang tawilut theilou ding uh a, himahleh candidate te’n vainiliap (umbrella) bel tawi thei ding uhi.


School Van in Escort gypsy phu, mi 5 liam
Imphal, July-16: Imphal Hotel gei ah zan nitak dak 9:00 velin School van (No. MN05A-0719) in Lamphel SDPO escort gypsy (No. MN01X-1468) phu a, huai ah van driver leh police 4 liam uh hi’n kigen hi.


TUNI THUPI:
 “Huaiziakin ka honhilh ahi, mi a khelhna chiteng uleh Pathian a gensiatna chiteng ua ngaihdam ahih ding uh: Kha hilhial gensiatna zaw ngaihdam ahi kei ding”. – Matthai 12:31


EDITORIAL:
Cyber crime hih-hat  poimawh!
Eilawi in galvantawi peuhmah helpawl i chi maithei uh a, dik leng a dikna tang a om a, i pau ahauhsak zawh nailouh ziakin ‘Helpawl’ chisuk maileng ihi thei hi. Kuahiam in singnuai-gammual bel a galvantawi a kiphin phot helpawl ahi uh chihtheih mah hi. Himahleh, Sapte’ gendan hileh ‘terrorist’ kichi huaise mahmah nawn hi.
    Tuni in helpawlte leh cyber crime tungtang gen zek lehang ut-huai hi. Manipur a singtangmi helpawlte’ dinmun en lehang India government tawh kitheihsiamna  nei uh a, Manipur Government tawh leng kihouna neisek uhi. Tualou in athum un -India govt, Manipur govt leh galvantawi kithuzak theite  ‘tripartite talks’ nei ahih uh kichi sek hi. Hileleng faction tuamtuam kala sisan naisan kisuahna leh kibeihtuahna(clash) a om chiangin  huai in mipi dip hawmsak  a, internet/facebook/whatsapp tuamtuam a thu kigelhte’n mipi nautang lungliap leh galmuanglou takin koih sek hi.
    Ni 2 vel paisa in ZRO a Defence PRO Moses min in ZRA President paihkhiak  chihthu suah khiakin om a, tuapen thuzuau leh phuahtawm ahihdan Moses mahmah in hilhchetna bawl hi. Tuanung in ZRO sung mah ah hibang a thuzuau kapkhiakna mah hong om nawn a, hibang a kikhemna leh pawlpi minsiatna ding om toutou ding ahi diam chihtheih hi. Internet tungtawn a thusia-lasia huaisetak leh pawlpi khat hihsiat tupna pen a kipatna leh a tawpna hilou in khuak tungtawn a kibeih kipatna hilel zaw hithei ding in gintak-huai hi.
    Northeast India ah government tawh tripartite talks nei KNO leh UPF kia hi zenzenlou  uhi. Adiakin mihing tam leh pawlhat taktak Bodo, ULFA leh Naga helpawl(NSCN-IM)te’n internet tungtawn a thuzuau kithehdalh ziakin buaina ana tuak mun chiat uh a, tua nungin Garo leh Karbi helpawlte’ lak hongtung in tu in Manipur state tanpha hongtung bang hi. Letter head leh suai zanga kikhemna (forgery) tuamtuamte tungtawn in peace talks buaisak ut mi hunkhop om ahi chih theih poimawh hi.
    Huchi kalah, Manipur ah assembly election nai mahmahta a, tulela Manipur assembly hun(term)March 18, 2017 a bei ding ahihman in kumthak 2017 bulin assembly election om ding chih kichian mahmah hi.  Manipur Chief Secretary O Nabakishore in a gendan in, Electronic Voting Machine (EVM) leh Election tawh kisai thil poimawh tuamtuamte  etkhiak hilel a, Election Commission of India (ECI) thusuak ngak hilel chi hi. Assembly election a naitak ziakin helpawlte zang ut leh zangtheite kalah leng thu tamtak hong om hiaihiai dingin kilang hi.
    Propaganda kichi thuleng tuamtuam hong tam mahmah ding hi’n kilang hi. Thuzuau hia ahihkeileh thutak hiam chih tanpha theih haksa hunkhop hong kithehdalh  semsem ding a, mipite adingin lung-ap huai mahmah ding hi. Huai hunah mipi adingin pilvan poimawh mahmah ding hi. Self-style politician hong kibehlap lai ding a, huchi kalah, maban a MLA election ngak lah tenten himahleh, nam it hetlou a hunkhop leng hong om dingin gintak-huai hi. Nampi i chidiam pawlpi kisezak leleng poikei chikhop a mahni angma  sialna ziaka kipei mi tampitak a om kha  dingin gintak-huai hi.
    Tua kawmin, i gam paidan et in police department lam inleng cyber crime tawh kisai a ngai poimawh  mahmah ding un deihhuai hi. India adia cyber tawh kisai a thil sau suizoupen Mumbai Police-te ahi kichi hi. Eilak ah leng mobile tungtawn a kivauna atam mahmahta a, blanket nuaia lum khinkhian kawma ut-ut houpih a, ut-ut vau theihna gam ah i khawsata ua leng himai in teh. Helpawlte, politician, official tuamtuam hi’n mi nautangte hitaleh kuapeuhin vauna chi tuamtuam i tuakthei vekta uhi. Anti-Cyber crime tawh kisai Union Home Ministry tawh pangkhawm a hihhat dingdan lampi a om diam chih ngaihdan om thei a, thuzuau vek leh thu hoihlou vekte matkhiak mengmeng ding dan ngaihsut poimawh hi.