MANIPUR EXPRESS | JULY 2, 2016

HEADLINES:
Vuah zuk ziakin toilet; inn leh thil tamtak hihsia

Pic: Sangai Express

Lamka, July-1: Tuni dak 12:00 velin Lamka khawpi leh akim ah vuah tamtak zu a, huaiziakin Lanva-lui leh khawpi sunga lui leh hawkguam omte dim in tuiluang hi. Lamka khawpi sungah huchilua in tamkei mahleh khawpi pawlam deuh tumlampang ah vuah tam mahmah a,  New Bazar, Zenhang Bazar banah Tipaimukh, Tedim Road-Nehru Marg junction telin  hawkguam let in lamlai ah tuiluang a, khe a paina vual ahihlouh ban ah gari a taite tanpha buai uhi.

    Chiengkon -lui khangin EBCC Hiangtam Lamka-te retaining wall leh fencing telin thil tamtak hihsia a, himahleh Hmar Veng, Zoumunnuam ah bel hundang banglou in hawktui tam lawlou a, thil hihsiat a omthu   zak hilou hi. Khawpi tumlam pang a vuah tamtak a zuklai in suahlam (eastern) ah bel huchilua in tamlou zel hi. D. Phailian, Compound Veng a Grace Hostel neitu Lalkithang huang umna (fencing) tui in phupuk a, compound sungah tui dimlet in hostel window tan tui in tumtou a, ground floot teng tum in, computer room a  hihsiat ban ah inn neite omna building ah leng khuk (knee) tanpha tui om hi.Huai hostel a warden in a gendan in, innkiangte tawh kikal a fencing thakhat a tui in phupuk  in, fencing bul a computer room leng tui in nawksia  a, tui tam petmah ziakin fencing khanglam leng phusia  a, inn tamtak nawk suk hi’n gen hi.
    Tangnuam a Tuibuang-lui leng naktak in khang a, Tangnuam Bethel Veng leh Lanva khua ah inn leh thil tamtak hihsia chihthu kiza hi. Tangnuam, Bethel Veng a Thangchinkhup h/o Chiinngaihlian; Vungzagin Guite h/o Dimzaniang, N. Chinkhanpau h/o Ningkhohau, Kaikhanpau h/o (late) Dimkhanmang te dailen-inn  tuahmang in, buh-hum pot 15 leh anntang bag 2 tui in tum hi. Lanva khua  Pumzalian h/o Thuamngaihvung, Kapsonkhum h/o Chingbiakmuan, Ngilkhanpau h/o Vungneihhoih, M. Doukhanlian h/o Thianzakim  leh K. Ginzalian h/o Donzakim ekbuk leng tui in hihsia a, innkim teng tui in tum hi’n kigen hi.
    Chiengkawm-lui kianga  Lalchin’ inn leh K. Ngulkhanthang’ inn luahte omna gei a protection wall a kichip ziakin Lianminthang (39); Ngangam (40) leh Chingkhup (38), Goukhup (57); Ginlianpau (40) leh Mrs. Lawmthang (63) inn ah tui leh buannawi lutin phatuamngaite’n van hepkhiakpih uhi. EBCC Hiangtam Lamka Sunday School’ protection wall leng Chiengkonlui in phuchim a, akhanglak ah  protection wall khenkhat leng kichim dingin kisa hi.
    Chingmang Veng, Lhangjol khua ah menchim (landslide) om a, Soiminlian h/o Lallawmlhing te tenna inn nawk kha in kise zek hi. Bungmual Hausa Veng ah leng tenna inn khat  leitolh(soil erosion) in   delhkha a, luahtheih nawnlouh dingkhopin kisia hi. Assam Rifles leh bialtu MDC CT Lian in thiltunna mun delh uh a, khawsungmite’n innsung van hepkhiakpih uhi.
    Sielmat leh Chingmang Veng kikala Buansan luitui leng khangin Ginzathang of Chingmang Veng, Lhangjol Village septic toilet phusia in, zat taklou  hi’n kigen hi. Beulahlane a om Chinsuanthang’ protection wall 60 ft ding vel Lailam lui in nawksia a, inn leng kichim dek a,belhngam huai nawnou hi’n kigen hi. Kamchinthang’ protection wall leng feet 30 vel Lailamlui in phusia hi. Huai banah, Tedim Road apat Bijang lutna bul leh Tuibuong/Tuibong bazar a lamlai ah hawktui tamtak luangin, lamkhang lam a om inn hunkhop hihbuai hi’n kigen a, Zoumunnuam khua ah leng inn bangzah hiam hihbuai in thil hihsiat a omlam bel zak hilou hi.


Tingpaklian tui a kia in si; Lingsiphai  ah kivui ding
Lamka, July-1: Lamka khawpi leh akim ah tuni a vuahzuk ziakin luiguamte tanpha ah tuilian a, huchihlai in Gangpimual ah Tingpaklian (4) d/o Khaizakham of Thiakbung, Thanlon sub-divn a omna inn ua step apan kekha in tui in tai a, ZYA GHQ panlakna tungtawn in Lamka damdawi inn tut himahleh dam zoulou in si hi.
    Misi innkuante gendan in vuah atam laitakin a innkiang ua Gangpimual leh Tangnuam gamgi a luita (nullah tawh kibang) a tui naktak in khang a, a inn nunglam ua pak akoihte uh tui in tum(submerge)  thei ding in om a, api tawh pak (flower) hemkhe lai tangkhial kha in guam sungah kia  a, tui in a taih ziakin kintak a delh uh himahleh  metre 50 vel a gamla tuilou lai ah delhpha uh hi’n kigen uhi. Huchi’n Dist Hospital delhpih pah himahleh damzou nawnlou in si chih ahi hi.Tingpaklian ahihleh apu (Thangzavum, Chief of Thiakbung) inn pansan a school kai hi a, Covenant School ah Prep sinlel hi’n kigen hi. July 2, 2016 in a palian inn pansan in Lingsiphai hanmual ah kivui ding hi.


LOCAL NEWS:
Coordinator Secy di’n guang
Lamka, July-1: Delhi Govt. in, Northeast India Support & Monitoring Cell a Coordinator Secretary ding in Romeo Hmar guang hi. Romeo Hmar tulelin Manipur Tribals Forum, Delhi ah Convenor hi a, Manipur govt. in Bill 3 a passed deihlouhna ziaka Delhi a singtangmite kiphinna makai in pang hi. Convenor Secy dia guan ahihtawh kiton in HYA GHQ in kipahpih thu puang uhi.


Mercie Gangte in Ph.D ngah
Lamka, July-1: Mercie Gangte d/o Frankie P. Gangte of Chiengkawnpang Jawaharlal Nehru University (JNU)New Dehi ah “Sociological Study of Kinship and Gender among the Gangtes of Manipur” chih thesis tungtawn in ‘Doctor of Philosophy’ (PhD) ngah hi.
Aman Mount Carmel School, New Delhi apat CBSE nuai ah Class – X passed a, huai mun mah ah class XII passed in Jesus & Mary College, New Delhi ah BA (Hons) Sociology zoukhia a, JNU, New Delhi ah MA (Sociology), M.Phil (Sociology) leh PhD (Sociology) ngah hi.


ZEO in school building thak hong
Lamka, July-1: T. Goukhomang, ZEO/CCpur in tuni sunnung dak 2:00 in Thingchom khua ah SSA fund 2012-2013 nuai a 3ACRS Building thak kibawl hongkhia uhi. Huai hun ah ZEO makaih in school campus ah singnou hunkhop leng suan (planted) ngal uhi.


ZRO leh HPC (D) makai-te hongtung
Lamka, July-1: NSCN (IM) Chairman Isak Chishi Swu gal akuan Calvin H. Vice President ZRO; Ketheos, Director Ministry of External Affairs, ZRO ban ah L. Sanga Hmar, Defence Secy, HPC (D) tuni’n  hongtung uhi. NSCN (IM) Chairman galna program ah Calvin H. in ZRO akipan condolence message simkhia a, Zomi nam puan leh Hmar Thangsuah puan in NSCN (IM) Chairman’ luang tuam uh a, makai poimawh tuamtuamte tawh houlimna leh annek khawmna leng nei uhi.


Only Grace Home panpihna pia
Lamka, July-1: New Lamka a ZMA Road, Vengnuam a naupang kepna Only Grace Home ah phatuamngai tuamtuam in panpihna pia uhi. June 20, 2016 in Kuki Women Union makaite’n antang bag 2 pia uh a, June 23, 2016 in Ms Joycee Canada in antang bag 5 a piak banah June 26, 2016 in BCD Baptist Children deptt te’n antan bag 1 leh chikhum (sweet) packet 3 pia uh chi’n a saite akipan kipahthu a gen uh thutut kingah hi.


Essay Writing Competition omding
Lamka, July-1: National Legal Services Authority, New Delhi leh Manipur State Legal Services Authority akipan thu om ziakin CCpur Dist.Legal Services Authority te’n July 10, 2016 sunnung dak 1:00 apan dak 3:00 kikal in Bungmual a Lalpuithluaii Foundation School ah ‘Essay Writing Competition’ saiding uhi. Student lunglut te’n min, address, pa min, school min leh class, school Indentity card xerox July 7, 2016 sunnung dak 3:00 tan in CJM Court ah submit theihding hi. Competition Categroy- 1 ah Class VIII-X hiding a, topic in Fundamental Rights and Duties of Citizen (wards 500) hiding a, 1st Rs.1500/, 2nd Rs.1000/-, 3rd Rs.800/, mi 10 kiang ah Consolation Rs.500/- hi. Category-2 ah Class XI-XII hiding a, topic in ‘Fundamental Rights and Duties of Citizen (ward 700) hiding a, 1st Rs.2500/, 2nd Rs.2000/-, 3rd Rs.1500/, mi 10 kiang ah Consolation Rs.700/ piak hiding a, thuchian kimzaw JCM office ah kantheih ding hi.


NYCs a semding in mi 10 kila
Lamka, July-1: NYK/CCr  nuai ah kum 2016-17 sung National Youth Corps (NYCs) semding zan in Selection Committee te’n DC office ah interview nei uh a, fresh ah mi 10, term extended ah mi 12 hi uh a, akisaipih te’n akinlam in H.Doungel, DYC, NYK/CCpur kimuhpih ngaiding hi. Mi 10 lak thakte- Langminlun; Lunkhohao; Ngamlawmsang Joute; TH Tunmuanlal Simte; Sonminlal Haokip; Mangminlal; Hatzalam; Margareth Aimol; Lhingneikim leh Melody Vungthianching Singson hi uhi. Term Extended te- T.Solenmang Haokip; Thanglenpao; Manglenthang Khongsai; Kimngaihlian; Lhingneichong; Pauvanglien Gangte; Haungaihnem; K.Kamjakap Chongloi; Tinneikim Haokip; Kinnunnem; Lydia Chinglianmawi Simte leh Thangkholen Haokip hi uhi.


SUUNNA:
H.Pumlunsang (40) s/o H.Damzachin of Vaalveng, New Lamka zannitak in sinna in si a, tuni’n YPA hanmual, New Lamka ah kivui hi.
H.Vumzakap (75) s/o (late) Vumkhogin of Gangpimual, tuni sun dak 12:00 velin Aizawl Civil Hospital, Dinthar Veng, Mizoram ah zunkhum leh BP stroke ziakin si a, tuni mah in hongkipua a, Gangpimual hanmual ah kivui ding hi.
N.Dalkhanpau (45) h/o Chongneihoih of D.Phailian tuni zinglam in Dist. Hospital ah sungna in si a, nitaklam in  D.Phailian hanmual ah kivui hi.
Chinghau (76) m/o Lianpau of New Lamka (G) tuni nitaklam in kalna in si a, July 2, 2016 in CYA hanmual ah kivui ding hi.
Ninggou (37) d/o Sanglian of Bethel veng, New Lamka tunitak dak 7:00 velin lampi a   pailai kipuk in si a, July 2, 2016 in YPA hanmual, New Lamka ah kivui ding hi.


IMPHAL NEWS:
Ibobi in India constitution kalh
Imphal, July-1: Nityaipat Chuthek a BJP Manipur Pradesh office ah tuni’n press conference om a, huai ah Th. Chaoba, ex-President, BJP Manipur Pradesh in media-te tawh kimuhna hun ah Manipur a Congress govt-te term 3na a kipat tung a Chief Minister O. Ibobi in Oct 10, 2012 ni a parliamentary secretary 5 a sehte leh Minister of state-te dinmun a kibat ziakin Indian constitution a Article 164 nuai a provision kalh hi’n gen hi. Article 164 sub section 2(1A) ah State chih ah Council of Minister lakah Chief Minister telin Minister om zah in Legislative Assembly a member om zah 15% a pelh louh ding banah Chief Minister telin Minister om zah 12 sang a tawm zawlou ding chih hi a, Manipur a Minister om zah sang a legislator tawm zawk na ah CM telin Minister 12 om thei a, Indian Constitution a 91st amendment dungzui in Minister om zah in 12 pel theilou chi hi. Chief Minister in amah telin Cabinet minister 12 a laklut banah parliamentary secretary 5 a seh nawn in Constitution kalh a, gazette thusuak in Salaries and Allowances of Minister Manipur Act 1972 dungzui in parliamentary secretary te’n Minister of state tawh kibang a salary leh allowance hamphatpih ding uh chih in ‘India Constitution a Article 164’ kalhna hi a, BJP in hiai tungtang Supreme Court banah Central govt. theisak ding uh hi’n leng taklang hi.


Lt. Gen. MK Unni in DGAFMS len
Imphal, July-1: Lt. Gen. Manoj Kumar Unni in tuni akipan Director General Armed Forces Medical Services (DGAFMS) len ding in charge la hi’n kigen hi. Lt. Gen. Unni in Pune a Armed Forces Medical College (AFMC) ah graduate a, Army Medical Corps ah sem ding in Feb 27, 1977 in laklut hi a, aman paratrooper training zou in Special Force – elite 9 Para Commandos ah Regimental Medical officer hihna len a, Major General Medical Northern Command ahih banah Director General Medical Service (Army) a let ma in Delhi Cantt a Army Hospital (Research & Referral)  enkol hi. A nasep hoih ziakin commendation leh awards hunkhop, President award 2, VSM leh AVSM sang a, Army Medical Corps ah kum 2014 in Colonel Commandant dia telkhiak hi a, July 1, 2015 in Honorary Surgeon to the President of India dia seh a om hi’n leng taklang uhi.


Beneficiary te’n PS ah antang pekhia
Imphal, July-1: Lamlai A/C a Ksh. Biren Singh, Minister (CAF & PD) bialsung a National Food Security Scheme (NFSS) beneficiary te’n antang kg 30 chiat ngah ding uh himahleh kg 13 lel a hawmkhiak ahihziakin beneficiary-te lungkimlou in tuni’n Seijang khua a beneficiary te’n  NFSS agent inn va luh uh a, huai ah antang om teng pawkhia in police station ah pekhia uh hi’n kigen hi. Hiai tungtang ah zan in Seijang village a beneficiary te’n meeting nei uh a, huai ah telding banah antang khenkhiak tawh kisai a hilhchetna bawl ding in NFSS agent a chial uh a tel louh ziakin mipi thangpai te’n a tenna inn luh sawm lai police-te tung man in kham dai uh a, anntang a lak-te uh Lamlai Police Station ah pekhia uh hi’n kigen hi. Seijang village te’n JAC of NFSS beneficiaries of Lamlai A/C-te tawh thupukna dungzui a antang pekhia uh chi’n gen uhi. Mutum Thoibisana, Secy., JAC in Agent te’n July 1, 2016 ma ngei a National Food Security Act (NFSA) nuai a beneficiary-te adia antang bikhiah zah kg 30 hawmkhe dingin thutawp pia uh a, khalui inleng CAF & PD Minister bialsung a AAY beneficiary te’n antang kg 30 bikhiahna lakah kg 13 lel a hawm ziakin la nuamlou uh a, April kha a NFS scheme zat ahih apan antang bikhiah zah hawmkhiak ahihlouh ziak a complain tuamtuam om hi’n leng taklang hi.


State Bank Day zatna om
Imphal, July-1: Babupara a State Bank of India Regional office ah tuni’n SBI kum 210 chin lawpna in Bank Day zatna om hi. Huai hun ah SBI te’n Mantripukhri a Christ Jyoti School-te ading in Computer 1, note book 100 leh sweet pia uh a, Mongsangei a Old Age Home a ding in antang bag 3, alu bag 1, mehkanna sathau, dal, phulun san leh van tuamtuam pekhia uh hi’n kigen hi.


Manipur phaijang bial ah vuahtam
Imphal, July-1:Imphal khawpi leh Manipur phaijang bial mun tuamtum  ah tuni in vuah tamtak zu a, MET deptt thusuak in a gendan in Manipur telin Northeast state tuamtuam ah tuban ni tamlou sung vuah zulai ding chi’n kigen hi.


Md. Nahaethoi sihna tawh kisai khalou
Imphal, July-1: Police a SI Md. Jakaur Rehman (36) s/o  Badru Rehman of Thoubal Moijing in Md. Nahaethoi of Thoubal Moijing vuaklup ahih tawh kisai in amah leh a sanggam Md. Etum (34) leh Riaz Khan (40)-te tunga ngawhna pm pen thuzuau leh pansan bulbal neilou hi’n gen hi. Hiai thu tawh kisai in tuni’n Manipur Press Club ah press conference om a, huai ah Md. Jakaur Rehman in Moijing area ah Thoubalmayum Mahala Maszid Committee (TMMC) Member te’n khamtheih zuak a kipei chi’n Md. Nahaethoi leh Md. Eliyas Khan man uh a, Nahaethoi innsung mite’n amah leh asanggam-te tungah FIR a bawl uh lamdang sak thu gen a, a sihna tawh kisai a kigolh khakna a neih louh banuah kihih minsiat sawmna hi’n gen hi.
    Huailou in Md. Sahabuddin, Gen. Secy., TMMC in vengsung ah Md. Nahaethoi leh Md. Eliyas Khan te’n khamtheih a zuak ziak un a tenna mun chiat uah June 29, 2016 nitak dak 10:30 velin mankhia uh a, mi 2 te’n a thil zuak uh tawpsan dia thutawp piak himahleh a tawpsan tuan louh ziak un soisa ua, si uhi. Amau sihna tan hial dia soisa lou uh hidan in gen ua, hiai tungtang ah akisaipih thuneite’n khentuam neilou a suizuina pan ding in leng ngetna bawl uhi.


ST 12,000 leh SC 560 te’n hamphatpih
Imphal, July-1: Manipur govt. panlakna in Department of Tribal Affairs, Hills & Scheduled Caste nuai a family oriented income generation scheme –land development, rearing of animal leh assistance to tribal weaver chihte ST 12,000 leh SC 560 te’n hamphatpih uh hi’n kigen hi. Welfare programme nuai ah ST innkuan 10,262 leh SC innkuan 420-te kiangah GCI sheets, post leh pre-matric scholarship leh tribal weavers 980-te kiangah panpihna sum piak hi’n gen uhi. Disabled tribal 1050-te kiangah wheel chair, tri-cycle leh hearing aid piak hi a, Skill development training tungtawn in ST 200 leh SC 18-te kiangah trade tuamtuam sinsakna piak hi’n leng gen uhi. Tamenglong, CCpur leh Ukhrul a ADC te’n kum 2014-15 sung in health center 3 bawl uh a, kum 2014-15 sung in first aid centre 30 honkhiat hi a, tunung sawtlou a centre 30 honkhiak hi ding a, tribal student 60,000 kiangah health card piak banah 6 health camp/anti addiction camp kum 2016-17 tan sai hiding in leng taklang uhi.


Doctor day zatna om
Imphal, July-1: IMA Manipur State Branch-te saina in Lamphelpat a IMA hall ah tuni’n Doctors’ Day tawh kiton in Dr. Bidhanchandra Roy phawk gigena hun zatna om hi. Huai ah Dr. Th. Bhimo, President, IMA in India govt. in Dr. B. Roy kipiak zawhna leh a nasepkhiak-te phawk gigena dia thupuan a bawl dungzui a July 1, 1991 apan Doctor day zat a om hi’n gen hi.


Transfer & posting
(MANIPUR FINANCE SERVICE OFFICERS)
1.Md Ziour Rahaman,DFA(Commerce & Indus)  as DFA (Commerce & Indus) and i/c  DFA(Social Welfare).
2.Thongam Gunindro, Sub-Treasury Officer/Kakching as FO/Sericulture.
3.N. Sumorjit Singh, FO/Taxation as Sub-Treasury Officer/Kakching.
4.Ng. Rajesh, AFA/PWD as  Asst-Treasury Officer/Bishnupur.
5.Taher Ali Shah, FO/Minor Irrigation as Audit Officer,LFA.
6.M.A. Gafur, FO/Co-op as Asst Teasury Officer/Chandel.


TUNI THUPI:
“Huchi’n, tua na ma ua ka koih, dan leh vaihawm teng zui dingin na pilvang ding uhi.”- Diuteronomi 11:32


EDITORIAL:
I gam ah masawnna tuamtuam
Technology  tawh kisai gen lehang   state dang him gGamdang a omte eilak ah piang theilou ding a i ngaihsut leh hong piang toutou zel a,k ipahhuai mahmah ahi chihtheih hi. Hibang vangphatna thupitakte akipan  mite’ nuaiah i leng  tadih kei uh chihna suak hi’n i pomthei hi. Tu in V. Biaklian of Goukhenpau Road, Vengnuam, New Lamka in lehkha (paper) zang a nou(cup)  bawlna ding khawl ‘paper cup formation machine’  kichi leithak chih ahi a, huchibang paper cup bawlna machine i gam ah leng omthei hiding in a tamzaw in i ngaihsun maithei a,ahi mah leng ahi hi. Biaklian in Kolkata a CORRSA Traders Pvt. Ltd.  akipan huai machine alei hi’n gen a, Lamka ada masapen kia hilou in  Manipur adia masapen ahih banah Jorhat leh Siliguri chihlouh Northeast state mundang ah om nailou hi’n kigen a, hibang ahon ngaihtuahkhiak kipahpih-huai petmah hi.
    Tualou in, pa Langgin Tombing of Bungmual in ama ngaihtuahna khuak mah (original idea) zangin long bawlkhia a, tua long pe’n Khuga Dam ah service sak hi. I gam adinga  masapen dingin tuibuk tepna khawl banah  buhsatna khawl telin a ngaihtuahna (idea) zangin thil hunkhop  bawlkhia a, tuaziak mah in award tuamtuam piakin om hi. Huchibang ngaihtuahna hoih leh manpha(creative) tak nei i lakah h mi kiselgu ahunkhop  om dingin gintak-huai hi. Unaupa V Biaklian in paper nou (cup) tela thil chi tuamtuam bawlna khawl (machine) a leikhiak leng phatthamching  mahmah hi. I gam ah technology sang mahmahta a, i ngaihtuah phaklouh sep a, nekzonna leh innkuan kivaktheih omlua ahih chih theih thakthak in om hi. Hibang technology tuamtuamte tawh kisai i ngaihtuah  vengveng chiangin i gam ah khawksakna dinga kivakna  omlou i saklai in  taima in thilsui peih lehang a theikhia om nailou thil tuamtuam om ngei ding in koih theih hi. .
    Nidang in mineral water kichi mundang akipan kia a laklut ahi a, himahleh tuni chiangin eilak mahmah ah leng  mineral water bawl khethei leh a bawlna nei hunkhop omta a, huaite’n niteng in a deihte  supply senglou phial uhi.Huaiziakin nidanga  Mineral water bawlkhiak kichi technology advance mahmah hi a i ngaihtuah uh himahleh tuni chiangin thil vantang bang phialin i koihtheita uh a,himahleh huai nasemte adin tuni tanpha in leng kivak theihna leh khawsakna dinga kingakna pichingtak suak lai hi.Huchi bang mahin  disposal cup leh ‘paper cup formation machine’ zanga i  poimawh tuamtuam nitenga dakkal 24 sung ahong pethei gige ding i neinawn a, tunung in leng technology tungtawn in huchibang thil poimawh tuamtuam bawlkhiak theihna ding thilthak hong omkhe zel dingin kilang hi.    Chikmah a i phawkphak hetlouh uh i gam a hong om ngeidia igintaklouh uh Ice Cream bawlna machine leng  hong omta a, Vaigam mah bangin azing-azan in Ice cream i ngahthei uhi. Thil paidan i etleh kumlui 2015 sangin i gam ah vuahtui  tawmzaw lai a, khua alumzaw a, pollution a sangzawtham chih a suizuite’ adingin muhtheih mahmah hi. Hun bangtanhiam  akipan en  lehang, Lamka mipite’n i gen tampenh, “Khua lumna e maw” chih ahi ngei ding a, khawlumdan i theihchiat himahleh, thil omdan i phutkhak ziakin i theihchiat vek uh hinapi  khua lumna e maw chih i houlimna  tangpi uh hita hi.
    Eilak ah gari kibehlap deuhdeuh a, adiakin diesel auto mahmah in leng khawlum su uang diak ahidiam chihtheih hi. Khuga Dam a tui kiching demdum in i khaw ul tamsak ahi diam chihtheih a, mi’ gam ah gari tam deuhdeuh in  lampi ah tui bang in luang zungzung mah leh a huihniin pen kiam mahmahta chih ahi hi. Vaigam  tawh ikibatna khat uh ahihleh eilak leng niteng in gari kibehlap zungzung  a, population omdan  a percentage lak ding hileh nikhat a gari kibehlap eilak a tamzaw dingin ginhuai hi. Newspaper ah khateng a gari kibehlap zah hong kitaklang akipan in leng hiai tawh kisai research bawl ut-te’ adingin documentary base omthei din ginhuai hi. Eilak ah gari gas horn zang pumdim lai a, gari model lui taktak banah passenger jeep leh town bus -te ngial 1980s te khawng ahi de aw chih gintak-huai hi.
    I gam ah electric tawh kisai prepaid metre hong kivuah akipan electric meivak azia  om zawdeuh bang a, hun bangtanhiam paisa akipan vukkhal (Ice) hong kibawlkhia a, tuisiang dawn ding mineral water bawlkhia a hunkhop a om banah tu in disposal cup tela thil dangdang bawlkhiak theihna ding machine hong om nawnta a, kipahhuai mahmah hi. Technology thil tuamtuam ah khuakneite mahin i gam adia poimawh thil dangdang  poimawh hong muhkhiak ua hong bawlkhiak uh deihsak huai petmah hi.