MANIPUR EXPRESS | JULY 3, 2016

HEADLINES:
PM Modi in Bangladesh PM kiangah thiltung poisakthu hilh
Bangladesh terror attack ah mi 20 si: India numei telkha
New Delhi/Dhaka, July-2: Bangladesh khawpi Dhaka a security khauhna mun mahmah a om Restaurant khat tuni in ISIS helpawlte’n va luhin gamdangmi (foreigner) 20 va gawl atlup  ua, tua ah India mi numei khat leng telkha chihthu kiza hi. Hiai thiltung mulkimhuai zakphet Indian Prime Minister Narendra Modi in Bangladesh Prime Minister Hasina houpih ngal hi. Indian External Affairs Minister Sushma Swaraj in "Dhaka khawpi a thiltung mulkimhuaitak om ah India mi Tarushi a telkhak poi kasa a, lusunna tuak innkuante nakpitakin ka thuakpih a, apianna pa Sanjeev Jain kiangah leng ka thuakpihthu ka khak” chi hi. ISIS helpawlte’n ahihleh Restaurant a om gamdangmite pawtkhe theilou dingin bukhum ua,  huchi’n ban thah uhi.

Commando te’n delhzui ngalin huchih lai in foreigner 20 te thahin om man ua, commando te’n leng thau khahin mi khoihtu ISIS helpawl mi 6 kaplum in khat hingmat uh  uhi. Tuni a thiltung pen Bangladesh khangthu adia terror attack thupite’ lakah chiamtehin om hi. Director of Military Operations Brigadier General Nayeem Ashfaq Chowdhury in agendanin, thah a omte ahihleh atamzaw agawl ngen ua atlup a om ahi chi hi. Operation neih zawh in siluangte zonna kipan ngal in Holey Artisan Bakery compound sung ah muh vekin om a, Combined Military Hospital morgue ah ahihna uh chetding in puaklut hi uhi.
Prime Minister Narendra Modi in Bangladesh PM Sheikh Hasina kiangah thiltung poi kasa petmah a,  India in naktakin hon suunpih chi hi. Modi in thiltung  mawhpaihna sangpen pia ahihdan gen a, helpawlte douna ah gamnihte naksem a pankhop poimawh chi hi. Helpawlte’n restaurant aluhna mun uh ahihleh gamdangmite tamna mun hidanin kigen a,  ISIS te’n zan nitak apan hiai restaurant a omte pawtkhe theilou dinga abukhum uh hi a, commando te’n hentang a omte athah khak ding uh lauh ziakin kap ngam pahlou in tuni in va luh uhi.


Zillai Gen. HQ in lawhchinna ngahte kipahpih
Lamka, July-2: Zillai GHQ in tuni zinglam in Imphal a TRI Auditorium ah class X & XII examna a lawhchingte kipahpihna zatpih uh a, Chief Guest in T. Manga Vaiphei, Minister PHED pang hi. Guest of Honour in Vungzagin Valte, Parliamentary Secy leh Functional President in Khatkhotong Baite, President, VPC GHQ pang a, special invitees in Soiminlian Lengen, MCS; Sokhongam Baite, MCS leh Mangminlian, MCS pang uhi.
    Chief Guest in lawhchingte kipahpih thugen in maban ah leng a lawhchin zel uh deihsak thu gen hi. Zillaite’n laizilna lam ah hahtaka panlak poimawh a, bandh/agitation ah kigolhlou ding in ngen hi. Bandh/agitation in siamsinna naktakin subuai a, huai in academic environment tanpha hihbuai chi’n gen hi.
    Guest of Honour in ngaina taka Zillai te’n a chial uh kipahthu gen a, Zillai ah leng politics poimawh  a, Maite khua apiang Thangkai leh Lungpau’ ziaka khawvak kimu chih Zomite’n haihlou dingin ngen hi. Amau gel memorial road adi’n naktak in panla hi’n gen a, kha leh taksa in amaute pahtawi poimawh chi hi.
    Zillai member class X leh XII ah 1st divn a pass mi 200 valte certificate piak hi uh a, huailak ah class X (MIL Vaiphei) Paulalminthang s/o Lalvul of Kangvai, CCpur leh class XII (MIL Vaiphei) ah Gracy Lalpiakhoi d/o Luapau of Pengjang, class X (BOSEM) ah topper in Chawnglemmawi Khaute  d/o Kamlalmuan Khaute of Red Cross Road. Hill Town, CCpur; CBSC ah Kamlalthien Vaiphei s/o Khaineilun Vaiphei of HQ Veng, CCpur; class XII (CoHSEM) a Arts & Commerce stream ah Lorita Hatjoukim d/o Hauneilal of Munpi, CCpur; Science stream ah Thangboilal Vaiphei s/o Paogin Vaiphei of L. Phaikot, Senapati dist. banah class XII (CBSE & others) a Arts & Commerce stream ah Marvin Khailalven s/o Thangliankhup of Red Cross, CCpur leh Science stream ah Kim Meralin d/o Thangmuan Vaiphei of Lungchuang, CCpur hi uhi.MIL topper 2-te memento + cash award Rs. 5000/- tuak banah topper dang 6te  memento + cash award Rs.10,000/-  chiat piak hi  uhi.


Chavang Kut 2015 report Laibu honkhiat in om
Lamka, July-2: Celebration of Brotherhood Chavang Kut 2015 Committee saina in tuni zinglam dak 11:00 in M. Songgel Community Hall ah "Chavang Kut 2015 (Celebration of Brotherhood) Report laibu official in honkhiat in om hi. Lunminthang Haokip, IAS, DC/CCpur in Report laibu hongkhia a, P.S. Haokip, President, KNO inleng hiai hun uap hi.
    Ginsuanhau Zou, MLA (60-Singngat) in Chief Guest hihna tawh uap ding chih himahleh hoh theilou a, a sikin Lunminthang Haokip, DC/CCpur pang in Singngat MLA in telephone tungtawn in mipi lak ah thuchah point 3 vaikhak a, aman (DC) a nung-ama theihpihlou leh bang tupna ziaka vaikhak hiam chih leng theihlou chi hi. Point 3-te bel TN. Haokip, MLA Saikot & President, MPCC leh Minister T. Manga Vaiphei te'n a ut dandan un CCpur Dist. pha thei uh a, bangziak a JAC Against Anti-Tribal Bills makaih a mipi'n amah doudal sese uh hiam? President of India in Bills 3te nawlkhin ta a, JAC-AATB makaih a mipi'n bang ding a kiphinna a sutzop uh hiam? chih leh Brotherhood Celebration-te’ nasep kipahpih thu hi’n gen hi.
    PS Haokip, President, KNO in Manaseh tate'n Israel gam tel in khawvel gam tuamtuam 20 ah unau aneih-te uh kiangah Pathian hotdamna thu gending a, Pathian in sapna (calling) bawl ahihdan gen hi. Naga Nam kichi a tawm a tawm, Kuki sang aleng tawmzaw hi a, himahleh Kuki Nampi kaikhawm/gawmkhawm ding mi a omlouh ziak in minority suak chi hi. North East India ah Nam lian 4- Khasi, Jantia, Garo leh Kuki om ahi chi hi.


LOCAL NEWS:
JAC-te Kangvai Bazar ah duty uh
Lamka, July-2: JAC against Anti-Tribal Bills in singtangmi MLA-te’n singtanggam sik theilou dingin boycott a puangkhum uh a, Chavang Kut 2015 Committee saina in M. Songgel Community hall ah Kut Souvenir honna ah Chief Guest di’n Ginsuanhau, Singngat MLA chial in om hi. Huai tawh kiton in JAC te’n tuni in Kangvai khua ah lamtan in Bazar ah dharna tu uh a, huai ah New Lamka, Bungmual, Rengkai telin mun tuamtuam akipan mi 200 val  paikhawm te’n dharna tukawm in MLA honghawh ding sunnung dak 1:00 tan ngak uhi.
Sadar Hills akipan Vahchiin Thadou, President, Thadou Women Association (TWA) makaih in mi hunkhop JAC makaih dharna tute huhding in hongkuan uh a, MLA hongpai louh manin TWA makaite tung hun in mipi tamzaw paikhinta uh a, JAC makaite tawh hun saulou zangkhawm in maban panlak dingdan kikum uhi. Dharna hun ah mipi painang gari thohte tung ah JAC in kipahthu gen hi.


Justice S. Serto Kom kipahpihna nei
Lamka, July-2: CCpur Dist. Bar Assn. te’n tuni zinglam in Khuga Dam a IB ah Justice S. Serto Kom, Justice Manipur High Court kipahpihna program nei uh a, Justice S. Serto Kom’ zi leng hong tel hi. Program hun ah Kimneinieng Shoute, Judge, Dist. & Session Court ban ah Letkho Kipgen, Chief Judicial Magistrate/CCpur te'n leng uap in presentation leh Memento pia uhi. Justice S. Serto Kom in program zawh in Tuibuong/Tuibong a CJM leh Dist. & Session Court pha in Imphal ah kiknawn hi. Justice S. Serto Kom in hunsawt tak, CJM/CCpur ana len ngei hi.


Khua 3 ah innkuan tamtak buai
Lamka, July-2: Zan akipan Lamka khawpi sung leh asehvel ah vuahzuk ziak in luita (stream) ah tuilian a, Sielmat lui a protection wall kichip ziak in khua 3-Hiangzou, New Zoveng leh Zoumunnuam ah innkuan tamtak buaisia uh a, tunitak in innkuan 30/40 vel munbit zaw ah giak ding in kinawnkhia uhi. Tuilet ziak in New Zoveng ah inn 20, Hiangzou khua ah inn 50 vel buaisia uh a, Zoumunnuam ah Tuithalui kim ateng innkuan bangzahhiam buai in  munbit zaw ah zan giak ding in kinawnkhia uh a, vuah azuk zawm zel leh innkuan tamtak kinawnkhiat ngai ding hi’n thusuak kingah hi.


ZYO Lamka Block election om
Lamka, July-2: Zogal Memorial Hall Complex, Zoveng ah tuni'n kum 2016-19 sung a Zou Youth Orgn. (ZYO) Lamka Block makai ding ZYO GHQ a Election Commission-te saina in election nei om a, President in ML Thanghau telching uhi. Vice President- S. Paugenthang, Secretary- Stephen Lamzamuanthang, Asst. Secy.-David Goukhanmuan, Finance Secy.- Englian, Treasurer- Jamkhanthang, Secy (Info & Pub)- Thathang, Secy. (Arts & Cult) -Dr. Robert Ginlunmang hi uh a, amaute Nangzathang Samte, Vice President, ZYO GHQ in kichiamsak hi.


Block makaite kithuahkhawm
Lamka, June-2: YPA New Lamka block makaih in tuni sunnung dak 1:00 in New Lamka YPA hall ah block executive meeting leh block huapsung a unit chih a office bearerte’ kithuahkhawmna nei uhi. Huai hunah block leh unit 12 akipan makaite’ kihel uh a, S. Chingngaihpau, Ex-President YPA GHQ inleng uap in thu gen hi.


1st State Coordination Committee
Lamka, July-2: Hmar Students’ Assn. (HSA) office, Rengkai road ah tuni’n Lalrobul Pudaite, Coordinator, HSA State Coordination Commmitte leh Malsawmthang Ralsun, Secy. HSA State Coordination Commmittee makaih in HSA 1st State Coordination Committee meeting nei uh a, Jt HQ tuamtuam Jiri-Vangai, Imphal, CCpur leh Hmarram apan makai-te tel uhi. Meeting hun ah Hmar community sung a socio-political leh education thu genkhawm uh a, thupukna leng hunkhop bawl uhi. Maban ah HSA GHQ theihpihna tawh State Level issue, community dang tawh relationship thu, community dang a organization-te tawh kikal HSA State Coordination Committee te’n mawhpuakna (responsible) la ding uh a, HSA Jt. HQ/CCpur leh KSO/CCpur te’n June 25, 2016 a Joint Press Release abawl uh leng theihpih uh hi’n Richard Laltanpuia, Asst. Gen. Secy, HSA GHQ in taklang hi.


Counselling Centre Noah’s Ark hong
Lamka, July-2: Daniel L. Traite of  Muollum, Rengkai in counselling centre ‘Noah’s Ark’ kichi abawl tuzing dak 8:00 in a tenna inn ah Chief Guest in Prof. Dr. Lallukhum, (Retd) Dir., RIMS  pangin hongkhia a, Rev. Lalthanglien, Director, Agape Care Centre in la’n hi.
    Daniel L. Traite in Noah’s Ark kichi HOPE-Empowerment & Development Foundation nuai ah om in, khamtheih banah haksatna tuamtuam ziaka lungsim buaina neite Jesu Kris tungtawn a hinna thak aneih ding uh tupna kipankhia hi’n gen hi.
    Chief Guest in agenna ah khawvel ah natna tuamtuam 80 percent te lungsim lam ngaihtuahna kipan ahihman in khawvel khanghat ahihman in lungsim lam thawmhau leh subuai thei ding pung deudeuh ahihman in khawtang adia hibang counselling centre poimawh hi’n gen hi. Huai hun Lalramsang Infimate, MCS, Addl. DC/Bishnupur telin hunkhop in uap uhi.


Tuilian ziakin inn 1 phel
Lamka, July-2: Tulai a vuah a hahzuk luat ziakin Chiengkawn lui khang in retaining wall hunkhop a phutsiat ziak in Zomi Colony area ah innkuan bangzahhiam-te inn ah giak ngamlou uh a, munbit zaw ah kisuankhia uhi. Tuni zinglam tan in Chiengkawn lui in kiamlam a manawh louh a, sunnung a vuahzuk kuan in luigei a teng innkuan 1/ 2 patau uh a, Zomi Colony saklam lei (bridge) khang a teng Zamlunthang s/o (late) Upa Vaipau in a innsung vante munbit zaw ah a tuahkhia in; atenna inn leng phelkhe (dismantle) hial hi'n kigen hi.


Financial Literacy Awareness Camp om
Lamka, July-2:  Lead Bank Office, CCpur saina in tuni’n New Lamka a Mini Auditorium, Dorcas Hall ah EBC Worker-te adi’n ‘Financial Literacy Awareness Camp’ om a, Rev. S. Ginmalsawm, Director (Social & Dev.)  in sunma dak 11:00 in hongkhia hi.
    Nengkhanpau Hauzel, Chief Manager & LDM in eimite’n sum zeek dan leh saving bawl i siamlouh ziak ua ahi ding bangin kikhangtou theilou chi a, huai awlmawhna ziak a hibang program kisai hi’n gen hi. Rev. S. Vungminthang, General Secretary, EBC in leng hun saulou thugen in, bank tawh kisai interaction session nei uhi.
    Thangchinkhup Guite, AGM & DDM/NABARD, Pauneihthang Valte, Chief Manager, SBI/CCPur Branch te’n thupi tuamtuam zangin sinsak uhi.  Programm ahihleh  NABARD huhna tungtawn a sai hi a, EBC nuai a Pastor leh Saptuam Upa telin semtu 70 val kihel uhi.


NLYC saina in Block Level Neighbourhood Youth Parliament om
Lamka, July-2: New Lamka Youth Club (NLYC) in Nehru Yuva Kendra/CCpur tawh kithuah in Lamka Block nuai a youth club tuamtuamte kimawlna lam a dawpsang ding lam-etna in New Lamka a Mini Auditorium, Dorcas Hall ah tuni sunnung dak 1:00 in Block Level Neighbourhood Youth Parliament om hi. Huai ah Chief Guest in Thanglalmuan Hauzel, Chairman, LATSEA pang a, Guest of Honour in CT Lian Guite, MDC pang hi.
Chief Guest in  kimawlna kichi line tuamtuam om ahihman in  mahni siam theihlam paipih poimawh chi a, Guest of Honour in  thil khempeuh vaipaw dingte’ mah in asai leh  khantouhna om chi a, hihtheihlam zongkhia a huaipen lunglut tak a paipih poimawh hi’n gen hi. Suonkholam, AGT, RMSA, T. Kammuanlal Simte, MCS, AC to DC, SDO/Sangaikot te’n thupi tuamtuak pansan in sinsak uhi.


IMPHAL NEWS:
DIPR campus ah press conference
Imphal, July-2: Manipur govt. nuai a dept. tuamtuam 24 te’n a nasep khiakte uh mipi theih ding a puankhiak deihna in Directorate of Information and Public Relation (DIPR) te saina in DIPR campus ah July 4 - Aug 11, 2016 sung press conference om ding a, session 2 in kikhen dinga, sunnung dak 1:30 leh nitaklam dak 3:00  hiding hi. Chief Secretary O. Nabakishore in July 4, 2016 ni a conference kipat ma in press conference om ding tungtang pulakna nei ding a, hiai hun ah Manipur govt. nuai a Heads of department teng in programme, schemes,
a nasepkhiakte uh banah lawhchinna a ngahte uh taklang ding uhi. Huai dungzui in July 4, 2016 sunnung dak 1:30 in  Director, Agriculture, nitaklam dak 3:00 in Director, Horticulture and Soil Conservation; July 5, 2016 sunnung dak 1:30 in Director, Veterinary & Animal Husbandry, nitaklam dak 3:00 in Principal Chief Conservator of Forest; July 7, 2016  sunnung dak 1:30 in  Director, Art & Culture, nitaklam dak 3:00 in Director, Adult Education; July 8  sunnung dak 1:30 in Director, CAF & PD leh nitaklam dak 3:00 in Director, Command Area Development Authority te’n press conference hun ah thugenna nei ding uh a, programme dang-te awl a suahkhiak hiding in taklang uhi.


UPSC Topper in Manipur hongpha ding
Imphal, July-2: All India Confederation of SC/ST organisation, Manipur Branch-te chialna dungzui in Union Public Service Commission (UPSC) 2015 examna ah Topper Tina Dabi in ni 2 om ding in July 3, 2016 in Manipur hongpha ding a, Kakching a Library and Information Centre ah SC/ST Confederation leh Sahitya  Seva Samithi Manipur-te saina in vaidawnna om ding hi. Hiai hun mun tuamtuam apan student leh academicians te’n uap ding uh a, interaction program leng om ding hi’n gen uhi. India pumpi a Schedule Caste lakah UPSC examna ah topper masapen Tina Dabi hi a, aman Kakching a Good Shepherd School vehna nei ding hi’n leng kigen hi.


Meltheihlouh te’n thau kap khum
Imphal, July-2: Senapati district a Kangpokpi Police Station apan km 10 vel a gamla ah meltheihlouh galvantawi te’n Imphal-Dimapur (NH-2) lampi ah Imphal zuan Truck 1 tuni’n thau kapkhum uh hi’n kigen hi. Thautang 4 in truck kha mahleh driver leh handyman-te si leh liam omlou uh a,  Kangpokpi Police Station ah truck om lel hi.


Govt. in compensation pe ding:
Khawmi te’n a khua uh taisan
Imphal, July-2: Md. Arif Khan sihna tawh kisiai a JAC kibawlkhia leh State govt. te’n tuni’n kihouna nei uh a, huai hun ah state govt. in compensation Rs. 10 lakh piak ding, Md. Arif Khan innsung mite sepna piak ding leh Thoubal Nungei a Md. Arif Khan min a Memorial library bawl ding chi’n kihou lem uh a,  JAC te’n siluang la ding uh hi’n kigen hi.
    Huailou in Nungei Meitei village te’n kha 2 paisa apan permanent security post koih dia a nget uh piak ahihlouh ziakin tuni’n mi 440 vel ding te’n a khua uh nusia in Lilong Chaijing Community hall ah kikulh uhi. Sanjoy Khaidem, Convenor, JAC against Cruel firing at Nungei Meira Paibi in permanent security post om louh ziakin khaw mite bit kisa nawnlou ua, namdang te’n fish farm apan nga a laksak banuah a tuilou-te uh leng hihsiat sak uh a, nitak hun ah meltheihlouh galvantawi kawm a kivei om hi’n leng gen hi. Md. Abdul Nasir leh K. Shyam, Langthabal A/C MLA te’n Lilong Chajing a relief camp va pha uh a, tunitaklam a CM tawh meeting hun ah thil omdan theisak uh hi’n leng kigen hi.


Vuahzuk ziakin Imphal area ah tuilian
Imphal, July-2: Manipur ah zan nitaklam apan mun tuamtuam ah vuah a tam ziak in Imphal khawlai dung ah luang Nambol river khang a, Expert te’n ni 2 sung vuah a zuk lai leh Keishamthong, Sagolband leh Naoriya Pakhang A/C-te a tuichim ding hi’n gen uhi. Tunitaklam in  Leikumrembi Leirak a Uripok Chirap Court Complex sung leh a kim a vengte ah tuilian in khuktan pha a, mi hunkhop te’n a vante uh mun bitzaw ah koihkhia uhi. Keishamthong, Sagolband, Dharamsala leh Paona bazar-te ah tuilian zek a, mun khenkhat a tuilian om chih ziak in IFCD official te’n Ithai barrage a gate 5 om lakah gate 2-te hong in tui khahkhia uh hi’n kigen hi. Official data dungzui in Kangpokpi ah vuah tam dan 15mm, Saikul area ah 28 mm, Litan ah 26 mm, Imphal a Rajbhavan ah 24mm leh Lamphel ah 26 mm hi’n taklang uhi.


NH-37 ah menchim hahsiang zoulou
Imphal, July-2: Manipur ah ni bangzahhiam paisa apan vuah a zuk ziakin Tamenglong district a NH-37 in a tawt khak Nongdolan area ah Imphal-Jiribam lampi km 1 vel ding a sau kal a mun tuamtuam ah menchim om ziak in June 29, 2016 apan truck 100 leh passenger gari tuamtuam tang a, passenger-te adin nawngkaina lianpi a tun hi. Border Road Orgn (BRO) te’n menchim hahsiang mahle uh vuahzuk ziak in nasep nawngkai a, vuah a zuk tou zel leh buai huai zaw sem lai ding hi’n gen uhi.


TUNI THUPI:
“Hilhna za unla, pil un, huai tuh deihlou kei un.”
- Paunakte 8: 33


EDITORIAL:
GoI leh N-E helte
Centre a term-lui in Congress makaih United Progressive Alliance (UPA) in government bawl uh a, tua hun a Home Minister ahihleh P. Chidambaram ahi hi. Aman UPA agenda ah state thak piakding bangmah omkhalou ahi chi’n gen mahleh Telangana state bawlkhiak hi a, himahleh, North East a state thak apiankhiak ding pen agenda ah telkha lou hizaw hiam chih bang hon ngaihtuahsak thei mawk hi. Tu in BJP makaihin centre ah NDA government dingkheta a, hiai tungtang ah Union Home Minister Rajnath Singh in state thak bawlkhiak ding leh dinglouh kampau neita dihlou hi’n theihtheih hi.
    NE helpawlte adia a poi mahmah dia gintakhuai khat ahihleh insurgent leader senior pen bangtuk a ngaih NSCN (IM) Chief Isak Chishi Swu sita a, tu in centre government in North East Insurgent group-te hon bangchi kimawlpih ding ua chih ahi. Helpawlte’n demand kilawm leh awmpipi nei chiat uh a, Manipur state ngial ah helpawl tuamtuam 30/40 bang om dia gintak ahi hi. Indo-Naga peace talks a Interlocutor RN Ravi in kha masa in North East ah lemna leh muanna piching omna dingin ngaihtuahna sangtak piakchiat a poimawh ana chi hi. Mizoram state govt leh HPC (D) inleng political talks neihsawm uh chihthu ging hiauhiau a, himahleh, Home Minister Lalzirliana in HPC (D) te hiai kihouna dingah vau khin mah abatna ton leng om hi.
    Assam state en lehang, homeland/statehood ngen tuamtuam Bodo, Dimasa leh Karbi te’n demand aneihte uh centre government ah tamvei pi pulakta uh a, GoI in ahihleh Bodo-te adingin thuneihna sang mahmah Bodo Territorial Council (BTC) kichi pia uh a, huai ah Bodo mipi tamzaw lungkim mahmah ua theih ahi. Himahleh, BTC tan alungkim louh ziakin Bodo helpawlte leng faction hong om hi. Dima Halam Daogah leh United Peoples Democratic Solidarity (UPDS) te’n centre tawh kikapna khawlsan photding in kithukim mah le uh alungkimloute gamnuai mah ah om veve uh a, alungkimte ahihleh designated camp ah government tawh kihou ding ngakin om uhi. National Democratic Front of Bodoland, DHD (Jewel Gorlosa) leh Karbi Longri NC Hills Liberation Front pawlte’n leng tu in kisakthak nawn sawn uh chihthu bang om a, intelligence te’n bildawh mahmah ua theih ahi.
    Manipur state i etchiang in phaizang helpawl adim aha in om a, KCP ngial faction 10 val om uhi. Phaizang helte’ lakah leng government tawh kihouna lunggulhte designated camp ah koihin om uhi. Singtangmi helpawlte ahihleh group hunkhop pha mahleh Non-Naga lakah group nih a kikhai khawm vekin UPF leh KNO nuai ah om uh a, himahleh, government tawh kihouna neih utlou helpawl bangzah hiam bel om veve hi. Naga group ah leng NSCN IM leh Khaplang pawl alianpen a theihin om a, NSCN IM leh GoI in kihouna neilel uh a, amau bel sautak tungtang in centre government tawh ‘framework agreement’ tanpha neita uhi. Khaplang pawlin ahihleh apaidan uh hon khengin Myanmar gamsung pansan a nei zawta uh ahihdan muhtheih ahi nawn hi. Tualou in Tamenglong pansan deuh Zeliangrong United Front (ZUF) te bel gentham chinglua ding un ngaihsut huailou hi. CorCom pawl tawh Centre govt in kihouna aneih ding ulah gintak haksa mahmah hi.
    Thupukna lak taktakna dingin state government in thuneihna piching neilou a, tua ziak mahin kihouna himhim ‘Tripartite talks’ danin pai a, BJP makaih NDA government in India malsuahbial helpawlte amau term sungin alungkimna tan uah kilemna abawlpihna diam? NSCN IM sau atungpen a, a Chairman uh Isak in akung suanpih mahleh agah lou manlou in Naga mipi nusia a, huai in centre government lungtang leng sukha mahmah dingin gintakhuai hi. Prime Minister, AICC Chief, Home Minister telin India adia top leader hunkhop in Isak suunthu puang ua, hiai in Isak kichi kua ahia chih te hon ngaihtuahsak a, a Chairman uh omlouhna pen alehlam ah Nagate’ adia gah kipahhuaitak suangtu hong hizaw kha diam chihin leng om thei hi. Ahi a, disturbed area ahihna ubel zan apanin Home Ministry in kha 6 behlap nawn hi.