MANIPUR EXPRESS | JULY 21, 2016

HEADLINES:
Police 4 suspend, mi 16 mankhia, statewide bandh puang
Dalit mi 4 soisak ziakin Parliament Session sousang
New Delhi. July-20: Gujarat a Gir-Somnath district ah bawng humbit dinga kipawlkhawm 'gau-rakshak' pawlin Dalit tuailai mi 4 a soisak ziakun tuni’n Lok Sabha Session sousang hi. Una khawpi a thiltung tawh kisai in police official 4 tawpsak hi uh a, huhamtak a gamtatna a kigolh mi 16 matkhiak a om hi’n Union Home Minister Rajnath Singh in Lok Sabha session ah gen hi. Tuabang kalah Dalit Panthers pawlin zingchiang akipan Gujarat state pumpi ah bandh puang uh a, organisation 10 valin support uh hi’n Rahul Parmar, General Secretary, Gujarat Dalit Panthers in tuni’n gen hi.

    Dalit leader Mayawati in Parliament ah huaithu tangkoupih a, mawhna neite tung a action lakkhum ahihkeileh tuasang a nasa zawsem kiphinna om ding hi’n gen hi. Home Minister Rajnath Singh in huai thiltung suikhiakpah ahihtheihna di’n CBI khut a piakkhiak hi’n gen hi. Dalit mite thiltuah thuakpih latsakna in Congress pawlin Rajya Sabha adjourned dingin ngen uh a, Congress vice-President Rahul Gandhi leh Nationalist Congress Party leader Praful Patel ten July 21, 2016 in Gujarat ah Dalit mi 4 leh a sungkuante uh kimuhpih ding chihthu om hi.
    Gujarat govt. in huai thiltung tawh kisai ahuntak a enkai hi’n Home minister in Lok Sabha session ah gen a, kuapeuh adi’n July 11, 2016 a Dalit mi 4 soisakna mawhsak huai hi’n gen hi. Thusuakin agendan in Dalit mi 4 in bawngsa apuak ziak un Gau Rakshak pawlin Una khawlai ah mankhia uh a, chiang leh kawnggak zang in mipi muh in zep uhi. Dalit mi 4 soisakna mobile tungtawn a kila video clip khat internet a khahkhiak ahih in Gujarat state sung muntuam tuam ah buaina om a, tuni’n leng Ahmedabad a Amraiwadi ah mipi hawlzakna di’n police te’n teargas zang uhi.
State acting DGP V.M. Pargi in police panlaknate tuni a agendan in  mi 16 matkhiak hita a, ni 30 sung in chargesheet bawlkhum ding uh a, mawhna nei a theihkhiakte gawtna khauh thei pen piak hiding chi hi. Gujarat CM Anandiben Patel in tuni’n Una khawpi vapha a, soisak liam a omte leh asungkuante uh va veh hi’n kigen hi. Rajkot hospital ah leng CM in aliamte veh hi.


Angels’ Vision office leh Head-end Control Room hong
Lamka, July-20: Angels' Vision Cable Network in Digital a cable piakkhiak sawm in panla lel uh a, tuzingkal in New Lamka a Awnsuak road ah Angel’s Vision office leh Digital Head-end Control Room hong uhi. Rev. S. Vung Minthang, Gen. Secy, EBC in Angel’s Vision office ding hongin Pathian kiang ah lan a, Rev. Khen P. Tombing, Chief Co-ordinator, PCI (R) in Head-end Control Room hongin lan hi. Rev. S. Vungminthang leh Rev. Khen P. Tombing te’n hasotna thugen uh a, Angels’ Vision in maban kalsuanna ah Pathian bel tinten ding in deihsakthu gen uhi.
    T. Ginkhopau, Proprietor in agenna ah Central Govt. in Digital India pansan in gamsung ah cable operator tengin leng digital a cable pekhe di’n theisak a, Ministry of Information and Broadcasting  thusuak dungzui in kum 2017 akipan Analog signal piakkhiak hithei nawnlou dingin gen hi. Huai hun ah Langkhanpau Guite, Chairman, ADC/CCpur telin Executive Member, MDC, District Level Officer leh ngainatu hunkhop in uap uhi.


Sr. member-te’n chin-leh-ha suangin dal ding- L. Haokip
BJP/ CCpur office hon ding Sr. member-te’ lungkimlou
Lamka, July-20: CCpur dist. a BJP senior member kichite’n tuni’n Hmar Veng a BJP office ah press-te kimuhpih uh a, senior member-te theihpihna tellou a party office honkhiak ding chih  theihtawp suah a dal ding uh hi’n gen uhi. BJP senior member banah CCpur dist a President term 2  len ngei Lhunkhojang Haokip in Nov. 2015 in BJP vaipawte hun (term) bei a, himahleh senior member-te theihpihlouh in pawlkhat in Imphal ah election nei uh a, Dist. President in K. Vungzalian guang uh chi’n in gen hi. Aman a gendan in President thak deihlouh ziak hilou in, senior member-te thuzak ahihlouh banah executive member dia khat leng telsak ahihlouh uh poisakthu gen a, thil paidan pomtheih hilou in athu Centre ah tun hi’n gen hi.
    Centre BJP in State BJP kiangah enkai dia theihsak ahih dungzui in July 18, 2016 in State BJP President K. Bhabananda Singh makaih in State Executive Member-te tawh kihouna nei uh a, state makaite’n party itna ziaka  buaina bawllou ding in ngen uh chi’n Lhunkhojang Haokip in gen  hi. Aman a genzeldan in State President in ama table ah  makaite’ sam in kitheihsiam tuahna bawlpih ding leh executive member ding kichiantak guan ahih masiah kuaman bangmah bawllou phot dingin thukim uh chi’n  gen hi. Huchih lai in senior member-te theihpih louh in tuni’n member thak te’n Party office honkhiak asawm uh lamdang sa in, amau theihpihlouh  a party office hon ding theihtawp suaha  dal ding uh hi’n gen hi. Tuni’n leng Mahila pawlin Kangvai, Torbung leh Tuibuong ah chang uh hi’n gen a, tuni a bandh suanlam in July 21, 2016 adia suan uh hi’n gen a, kithukimna tellou a honkhiak tup ziaka buaina a om leh State BJP leh member thakte’ mawhpuak hiding chi hi.


LOCAL NEWS:
HSA Jt. HQ thusuah theihpihlou
Lamka, July-20: Hmar Inpui, Gen HQ a President Joseph Lalrothang leh Gen Secy., Francis Songate in thusuah abawlna ah Hmar Students’ Assn. (HSA), Jt. HQ/CCpur  in Students’ Orgn. dang khat tawh July 18, 2016 a Newspaper leh Social media a JAC-AATB tawh kisai a thusuah abawl ngaisiamlou leh pomtheilou hi’n taklang uhi. Hibang nam issue lian leh thupi student body a Joint HQ in a ut-dandan a thusuah abawl bawlchi hilou in pilvang dingin Gen HQ in theisak uh a, Hmar nam min zanga thusuah ding amau mawhpuakna hilou chih theisak kawm in, HSA Jt. Hqtrs in Hmar nam dinmun leh dinsan theichianlou uh hi’n taklang uhi. Hmar Inpui, Gen HQ in dawhzou taka thupiak abawl nelhsiah a, abawlzom zel uh leh maban ah haksatna leh buaina atuah uleh leng Hmar Inpui, Gen HQ in mawh pawlou ding hi’n taklang uhi.


Morgue ah RTI tawh kisai sinsak
Lamka, July-20:  All Tribal Women Union (ATWU) HQ/CCpur makaih numeite’n Lamka Damdawi inn huangsung morgue ah Salpha 9-te luang tutpih a lengkhawm aneih uh sunzom zel uh a, tuni’n mun tuamtuam apan tamtak paikhawm uhi. Huai hun ah MK Lal Gualnam in Right to Information (RTI) Act tawh kisai sinsak hi.


Muk (lip) omlou in naungek 1 piang
Lamka, July-20:  Zomi Colony a om kum 27 ding vela upa pangal (muslim) nupi khat in nau nei a, naungek pen chidam takin piang mahleh amuk(lip) hemsa in om hi. Naungek nu’n agendan in, July 18, 2016 (Seppatni) zinglam dak 9:30 in a tenna inn uah amah kia om in nau-nei a, si le nai teng kisiak in nau nungzui (lam) tanpha kikoihkhiak hi’n gen hi. Naungek ahihleh ta 5na hita a, ata masa kum 10 vel a upa Dist. hospital a neih chihlouh adangteng innmun a nei hi’n gen hi. Naupai lai in doctor ki-ensak khalou in, ANC abawl khaklouh ban ah ultrasound leng kilalou hi’n gen hi. Naungek ahihleh amuk tunglam omlouh ban ah veilam nak tawh akam kimat a, a taklam nakvang bel ngeina in om a, medical term ah ‘cleft lip’ kichi a, naungek bel et-in damtheih mel hi. Nupi ahihleh Red Cross Road junction, New Bazar a ngasa zuaka innkuante enkol hi’n kigen hi.


CM kiangah memorandum pia
Lamka, July-20: All Manipur Written Test Successful Candidate of Police Constable (AMWTSC) Male 2013 batch pawl July 4, 2016 in CM makaih Minister 5 telin kihou uh a, huai ah CM in July 20, 2016 tan a final result suaksak dia achiam atangtunlouh poisakthu taklang uh a, hill dist tenga makaite’n  July 22, 2016 in IB Road a KKL complex ah joint meeting nei ding uh hi’n taklang hi. AMWTSC (Male-2013) batch pawlin  thupukna omsa bangin July 18 & 19, 2016 in  MLA leh Minister teng  memorandum pia uh a,  result pending tawh kisai monsoon session ah  pawlut a, ngaihtuahsak dingin taklang uhi. July 22 a Joint meeting ah candidate-te banah nu-le-pate leng kimtak a tel dingin  chial uhi.


JE dalna mi 250 kap uh
Lamka, July-20: Dist. Health Society/CCpur saina in Siden khua ah tuni zinglam in‘1-Day Awareness campaign on JE-cum-JE vaccination’ om a, Dr .Belamy, OSD, Dist. Hospital in Japanese Encephalitis (JE) natna apan kiven dingdan sinsak a, Nurse te’n JE dalna damdawi in mi 250 kap uhi.


DI in free uniform hawmkhia
Lamka, July-20: Kaikhanlian Guite, DI of Schools, CCpur block in tuni sunnnung in Hiangtam Lamka a Phungkhothang govt H/S ah student-te’ ading free school uniform hawmkhia hi.
    Aman agenna ah govt. school ah student te’n kumteng in free text book leh uniform sang/ngah zel uh a, private school ah huaibang omlou ahihziak in student-te hampha mahmah uh hi’n gen hi. Private school ah kailouh ziak a student-te lungkelou dingin theisak a, laisimna leh sep-le-bawl ah hahpan chiat ding in hanthawn hi. Phungkhothang govt H/S ah free school uniform ngah ding student 530 vel hi’n kigen hi.


Nasepna Maj. S. Sreekant in enkhia
Lamka, July-20: Muolvaiphei V/A makaih in mipi’n Sugnu Road, Shann veng apat Saikot ITI tan lampi siatna July 13, 2016 apan in bawl uh a, tuni sunnung in Major S. Sreekant, OC, Khengjang CoB, 7th AR in lampi siatna mun-te enkhia hi. Aman agenna ah lampi siatna bawlhoihna ah Assam Rifles te’n panpihna peding hi’n gen hi. Muolvaiphei V/A makaih in lampi siatna bawlhoih nang in MLA, PWD leh DC kiang ah ngetna pemahle uh fund omlouh ziak in member 5 omna Commission kibawlkhia in huai-te panlakna a lampi kibawlhoih hi’n Muolvaiphei V/A te’n gen uh a, tunitan in mipi kiphalte piakkhawm Rs. 30,000/- phata a, expenditure Rs.1,20,000/- vel pha hi’n leng gen uhi. July 21, 2016 in Muolvaiphei V/A makaih in Sugnu lampi siatna bawlhoih nang in badge zuak ding uh a, huai area a taituah garite’n panpihna peding in ngen uhi.


Thousilen hawmna enzui  ding
Lamka, July-20: Dr. Liankhawjam Guite, Dist. Malaria Officer/Dist. Nodal Officer, NVBDCP/CCpur  makaih in Thangthianmun, Dist. Consultant, NVBDCP/CCpur leh Soitinpau, Field Worker te’n Singngat PHC, Sinzawl PHC leh Thanlon PHC huapsung a khua tuamtuam ah Malaria Deptt te’n thousilen, Long Lasting Insecticide Nets (LLINs) a hawmkhiat uh enkhe ding in July 21, 2016 in Lamka apan zinkhe ding uh a, July 23 in hongtung uhi. Malaria Officer makaih in khua tuamtuam a thousilen (LLINs) kihawmkhia kidaihzou hiam? mipi’n hamphatpih uh hiam? thousilen tangkha te’n zang taktak uh hiam? chih enkhe ding uh a, IEC/BCC acitivities leh sensitization program saikawm ding uhi.


Sinlung Sermei & Highland Musings
Lamka, July-20: Hmar Literary Circle (HLC) saina in July 22, 2016 nitak dak 6:00 in Life Café, Rengkai Road JJ Plaza ah “Sinlung Sermei & Highland Musings” honkhiat hiding hi. Huai ah Prof. Laldena Intoate, ( retd) Prof & Senior fellow, Indian Council of Social Science Research in Sinlung Sermei kichi laibu hongding a, Issac Pakhuongte, Principal, Sielmat Christian Hr. Sec. School in Highland Musings hongkhe ding hi. Program sung in Joseph Lalrothang, President, Hmar Inpui GHQ in thugen ding a, Upa Darliensung in thumna in hun khak ding hi.


CMO makaih in joint meeting om
Lamka, July-20: Dr. Thangchinkhup Guite, CMO makaih in ama’ office chamber ah tuni sunnung in DFWO, Med. Suptd. Dist. Hospital, Dist. TB Officer leh Dist. Malaria Officer te’n joint meeting nei uh a, tulai in viral fever tam mahmah tawh kisai genkhawm uhi. Kuapeuh in innsung, inn kim leh vok (pig) vul te’n vokbuk hahsiang gige ding leh khawsik (fever) neikha te’n akintheilam a Heath Centre/Doctor naih pah ding in mipi ngen uhi.


IMPHAL NEWS:
Dy. CM in pakkhi piakna nei
Imphal, July-20: Maoist leh CRPF a Unit 205 Cobra Battalion-te zan a kikaptuahna ah Manipur apan K. Upendra Singh s/o K. Maniyaima of Heirok Part-II Maning Leikai kaplup in om a, a luang tunitaklam in Imphal Airport hongtung hi. Huai ah Dy. Chief Minister Gaikhangam, M. Okendro Singh, Minister (RD & PR), L.M. Khaute, DGP leh Dr. J. Suresh Babu, Principal Secretary (Home) te’n  Upendra hankuang tungah pakkhi pia uh a, Upendra ahihleh Unit 205 Cobra Bn a Head Constable hi’n kigen hi.


Court dang ah Kh. Ratan case pekhia
Imphal, July-20: Manipur High Court (MHC) ah zan in Kh. Ratan tungtang tawh kisai a case ngaihkhiakna khawl sak nung in tuni’n sutzop hi nawn a, huai hun ah govt. palai Advocate General Manipur Th. Ibohal in tuni a local newspaper khenkhat te’n zan a case hearing thu tawh kisai minsiatna (scandalous) dia thusuah bawl uh chi’n ngawhna bawl in, a tungah criminal contempt proceeding bulh khum dia ngetna a bawl division bench a Chief Justice RR Prasad leh Justice S. Serto te’n  nawlkhin uh a, convenor lui Kh. Ratan thu tawh kisai a case pailel leng Court dang a dia refer bawl uh hi’n kigen hi.


Japanese Encephalitis vei mukhia
Imphal, July-20: Chandel district a Tengnoupal A/C sung ah Japanese Encephalitis natna vei muhkhiak hi’n gen uhi. Bebi Naothem d/o J.K. Mang of Zion village, Tengnoupal in July 18, 2016 ni a Japanese Encephalitis vei chih chet ahih tawh kiton in Moreh a District Immunization officer leh Chandel District Malaria Officer-te makaihna in Aimol Tampak sub-centre  a Nurse leh Tengnoupal Primary Health Centre te’n Zion village leh a kim a khua-te ah vaccination bawl uh hi’n kigen hi. Dr. S. Priyokumar Singh, District Immunization officer Manipur in mipi theih ding in thusuah bawl a,  thoukang tungtawn a natna-te apan kivenna ding in inn kim leh kiang kem siangthou ding in theihsakna bawl a, Japanese Encephalitis apan kivenna ding in affected area ah fogging leh vaccination sunzom ding uh hi’n leng taklang hi.


JCILPS te’n kiphinna pan nawn ding
Imphal, July-20: Joint Committee on Inner Line Permit System pawl in Manipur Assembly in Manipur mite humbitna ding Inner Line Permit tawh kisai bill thak a kinthei pen a apass uh phutna in kiphinna (mass sit-in-protest) patsawm nawn uh chihthu om hi. Huai dungzui in July 22, 2016 in Keishampat Machin-Wahengbam Leikai-Tera Keithel ah mass sit-in-protest nei ding uh a, July 23, 2016 in Uripok Machin-Uripok RIMS road – Nagamapal RIMS Road leh Ishing Chaibi ah sunzom ding uhi. July 25, 2016 in Nagamapal RIMS Road Machin Khoyathong – Thangmeiban Lilashing Khongnangkhong - Chingmeirong – Shangakpham banah Keishampat Machin-Heirangoithong leh July 26, 2016 in Moirangkhom-Kakwa Keithel ah mass sit-in-protest om ding hi’n gen uhi.


Digitalisation tawh kisai workshop
Imphal, July-20: Ministry of Information and Broadcasting, Government of India saina in Chingmeirong a Hotel Classic Grande ah tuni’n ‘Cable TV Digitalisation’ thu tawh kisai in workshop om a, huai ah Yogendra Pal, Advisor, Ministry of Info. & Broadcasting in North East bial a Nodal officer-te a dia Cable Television Network Regulation Act tawh kisai genkhawmna dia workshop sai hi a, Act kalh-te leh phalna neilou a channel khah-te tungah action lakding dan genkhawm hi a, hiai hun Manipur leh Nagaland apan Nodal officer te’n uap uhi. Akigendan in Ministry in India ah Cable TV Network-te digitalize na ding in hunbikhiah a, huai dungzui in Phase-I hun Oct 31, 2013 in bei a, Phase-II March 31, 2013, Phase-III Dec 31, 2015 leh Phase-IV Dec 31, 2016 in a hunbei ding a, Manipur ahihleh Phase IV na ah tel hi’n gen uhi.


PWD in lamlian km 4376.139 bawl
Imphal, July-20: Manipur a PWD in kum 2004-05 leh 2015-16 sung in km 4376.139 a sau lampi bawl uh a, huai lakah km 81.18 ahihleh NLCPR fund zat hi a, km 163.05 bel CRF fund zang a bawl uh hi’n Chief Engineer PWD in tuni’n DIPR complex a press conference ah gen hi. Aman a genzelna ah km 2456.39 ahihleh black topping tan zawh hi a, a dang km 678.59 bel sand shingle a bawl hi a, km dang 339.39 ahihleh WBM tan in improve work a sep hi’n gen hi. Huai hun sung mah in PWD in lei (bridges) 84 bawl uh a, huai-te lakah 81 zousiang uh hi’n gen hi. Lei 84 lakah 63-te SPA-SCA nuai a bawl hi a, a dang 20-te NLCPR fund hi a, 1 ahihleh CRF nuai a kibawl hi’n taklang hi. Huailou in NEC fund zang in lampi 5 bawl hi a, huaite lakah km 230.72 improvement bawl hi a, 1 ahihleh ISB tungtawn a bawl hi a, tulel in km 124.20 tan black topping zawh hi’n gen hi. PWD in capital complex, High Court complex, Civil secretariat, Hills district 5 leh valley district 2 ah Mini-secretariat 7 bawl a, hill district 3 ah ADC complex 4 leh valley district ah 1 bawl hi. Huaite lakah Mini-secretariat complex 6 leh ADC complex 4 zawhsiang hi’n gen hi. Huailou in SDO office 17 leh SDC office 19 leng bawl zawh hi’n gen hi.


Thoubal Multipurpose Project
Imphal, July-20: G. Robindro Sharma, Chief Engineer/IFCD in Thoubal Mulitipurpose project hongtung ding Sept. kha sung a honkhiat tum a panlak hi’n gen a, tutan in dam nasepna 99%, spill way 98.70%, barrage 100% leh canal system 80% zawh hi a, water transmission system to WTP nasepna leng 24% zawh hi’n gen hi. Chief Engineer in a genzelna ah Dolaithabi barrage project leng tukum december sung a zawh tup hi’n gen a, tunitan in barrage nasepna 95% leh canal system 58% tan zawh hi’n gen hi.


Asst. SO apan SO in 8 kaisang
Manipur Secretariat Service a Assistant Section Officer (ASO) sem mi 8 Section officer (category V) Pay Rs. 9,300 – 34,800 Grade Pay Rs. 4400 in kaisang uhi. Huai mi 8-te a nuai a bang hi uhi.
1.    Th. Mohindro Singh
2.    Kh. Mohini Devi
3.    Sh. Tombimacha Devi
4.    Ms. P. Sobita Devi
5.    Ningshen Pretima (ST)
6.    Chongboi Haokip (ST)
7.    M. Shanti Keshor Singh
8.    B. Rajen Sharma


TUNI THUPI:
“Mi dik kam in pilna thu a gen naknak a, a lei in vaihawm diktatna thu a gen gige hi.”  – Sam 37:30


EDITORIAL:
Job card Nitha khang!
Prime Minister-lui Manmohan Singh makaih Congress government hunah NREGS/ MNGRES kichi patkhiakin om a, tu in Prime Minister Narendra Modi makaih BJP government in hon sunzom uhi. Job card holder-te adingin kum tengin a lawh ding uh tamlou lou in hong khatou zel a, tu financial year thak adingin leng Rs 7 in hong pungin, nikhat in Rs 197/- lawhta ding uh chih ahi.
    Government in mi tuantual leh zawngkhal diakte adingin plan, policy leh program tuamtuam abawlte hoih thei law mahmah a, ahihziakin implementing Agency lam bangchi bang a om hiam chih hon ngaihtuahsak hi. Congress makaih UPA government hun a kibawlkhia hiai NREGS/ MGNREGA ah innkuan khat apan government sepna neiloute’n hibang hamphatna angah ding uh chih hi a, kum khat sung hiai scheme tungtawn a  ni 100 sung ki lawhtheihna ‘chance’ angah ding chih ahi. Centre government apan sum-le-pai bangzah hong pai ahia chih ithei kei a, himahleh, abiktakin kumkhat sungin Manipur state sunga hill area-te ah ni 100 sung mipi’n nna asem mawngmawng kei chih theih hi.
    2015-16 in Job card tawh kisai mipi’n ni bangzahna i semkhia uale, 2016-17 hun hita, bangzah kisemkhia ahia? Job card ni tha akhanpen kipahhuai mahmah a, ahihziakin kum khat a ni 100 tha isem kei uh a, hiai phungam ding i om tuankei! Hangsantakin gen lehang, NREGS/ MNGRES tawh kisai in sum atawm liai kei a, ni tawmchik hong pailel inleng official khenkhat leh khaw hausa khenkhat adingin gilvahna ding sum- le- pai tun veve kha mawhlou ding hi.
    Labour cost kichi mipi adi liauliau ahi a, huai tanpha neksak ut tuntun Village Authority bangzah i om a le? Naseplouh mandi a cut pawl tawh, sem le ule a cut pawl tawh suanlam tuamtuam bawl Village Authority hunkhop om hi. Government apan banghiam sepding leh bawlding banah form fill-up nengneng ding hong paichiang tanpha a, mipi laka sum cut ziahziah mai hunkhop om hi’n kigen hi. Hithei hileh, hiai NREGS/ MGNREGA tawh kisai district administration in a etkai mahmah kisam a, social audit hun chianga, VLW/SO khawng sawl mailou in, implementation agency apan hilou midang sawl hilou thudik mun tamtak ah pawtding hi. Official bangzahhiam hiai Job card ziaka balloon mutpuak mah banga omta chi uh hilou hiam?
    I gam ah diktatna, lainatna, lemna leh muanna tawh kisai gengen mahle hang, a gen tam tata banah salam leh khalam a ahat diakte bangleng sum duhpen himai thei ua, Government office tuamtuam adiakin mun poimawh mahmah Treasury a saptuam leh heutu tuamtuamte’ makai zite tanpha a uangpen chi a genin om ua, a dik leh diklou zaw theikhang, nuamlou lua hi. Mihingte’n sum le pai i poimawh ua, ahihziakin a uangkheng val a i om chiangin i mimal leh i innkuan sung ah banghiam in thuakkha sek hi.
    Job card nitha tha Rs 7/- in hong pung a, Rs 197 i lata ding  uh chihna ahi a, centre government thathak suahna kipahhuai hi. Himahleh, state government in a 5% share uh a pezou na ding uam chih theih haksa mahmah hi. Government in scheme tuamtuam aneihte hoih thei mahmah a, state a hongtun chiangin hoihtakin kisemkhia (implement) seklou a, poithei mahmah hi. Bangteng hileh tu kumthak 2016-17 ah nadang tawh kisai zaw genban khang, Job card tawh kisai nana hoihtakin semkhe ni. Centre government apan ni 100 thadia hong pai ni 100 le chi ngam zezen khang ni 75 tanbek isemkhe ding ua, percent cut chihte kuamah in bawl lou in mipi khualna tawh hoihtakin na sempeuh mah le hang chih ut huai hi. Christmas kuan a ni 1/2 tha gift kibawl mipi’n kipahpih mahmah ahihleh tua in i economy dinmun gen mahmah ahihdan leng haihkei ni. Job card ni tha kibehlap, kipahhuailua! Ahihkeileh, i job card nitha uh Rs 7/- pen leng Rs 1000/-a kibehlap a beneficiaryte kiangah alut tuankei mawk leh bang hituan di ahia chih leng om ngaihdan omthei hi. Bangchi bangin sepkhiak hong hidiam chih mipi’n entou ni.