MANIPUR EXPRESS | JULY 22, 2016

HEADLINES:
CT Lian Guite leh a teamte’n kithuahpih
Advance hospital ah Thangmuansiam operation kibawl
Lamka, July-21: Master Thangmuansiam s/o Nengkhantuang & Chinggouniang of Gangpimual  a pian khiak a  ngeina banglou(ataw bing) a om CT Lian Guite, MDC (16- New Lamka West) leh a Team CT Lian in hun sawttak a buaihpih nungun tuni’n Imphal a Advance Hospital ah operation bawlin om a, doctor te’n sunnung dak dak 1:30- 4:30 sung in lawhchingtakin zouthei uh hi’n kigen hi.

Tu zingkal in Bungmual a MDC tenna inn ah Pastor H. Ginkhochin, Local Pastor, Bethany EBCC in thumna tawh khakhia a, YPA Ambulance in Imphal ah puak in om hi. CT Lian in a gendan in, RIMS ah naupang 3vei etsak hi a, RIMS ah Dr. Kh. Kishore Singh, Super Specialist, Paediatric Surgeon in vanzat hoihzaw omna Advance Hospital a kawkmuh ziakin huai ah operation in om chi hi. Thangmuansiam kuapeuh in awlmawh in, aki-etsak tengin Dr. Jamthianlal, Dr. Donna leh Dr. Dikboi te’n makaih in, RIMS ah Jo Tonsing in kithuahpih a, operation bawlna dingin mimal leh pawl tuamtuam akipan Rs. 79,000 vel lut hi’n gen a, tuni’n Rs. 60, 000 vel bei hi’n kigen hi. Master Thangmuansiam  apian in doctor te’n emergency operation bawlin a gil ah ek-pawtna ding vuhvang sak uh a, tun bel ngeina bangin ataw ah ek-tha theita ding a, hospital ah ni 4/5 vel etkol hilai di’n kigen hi.


BJP/CCpur Dist. office honna leh makai 3 kipahpihna om
Lamka, July-21: CCpur Dist. BJP office ding honna leh BJP makai 3- K. Bhabananda Singh, President, BJP Manipur Pradesh; Th. Chaoba, ex. Dy. CM, ex-Union Minister & Convenor, BJP Election Management, Manipur  leh V. Hangkhanlian, ex- Minister  & Vice President, BJP Manipur Pradesh kipahpihna tuni zinglam dak 10:30 in Tedim Road a Ngursanglur, ex. Minister’ building Light House Lane ah om hi. Huai ah V. Hangkhanlian in Dist. BJP office ding hong in Rev. Sousuanthang, MELC in thumna in lan a, Th. Chaoba in party flag kaipalh hi.
Programme ah Hauneilal, Gen. Secy (Orgn) BJP CCpur Dist in welcome speech gen in, VIP-te introduction nei a, Dist. Mandal Committees, State Councillors & Pratinidhis nei a, mipi paikhawmte’n tribal martyrs 9-te suunna in 1 minute silent prayer nei uhi.
Th. Chaoba in  Congress govt. in Manipur a kum 15 vaihawm sunga kineksiatna leh nekgukna apan suahtakna dingin mipi’n kum  2017 a assembly election ah BJP party support dingin ngen hi. Prime Minister Narendra Modi in development vision aneih road leh industry kia hilou in singtangdawna teng meithai-tagah leh gentheite’n electricity leh gas connection a ngah ding uh chih hi  a, Manipur ah singtanggam leh phaijang a khantouhna omna di’n Manipur a Congress govt. khekkhiat ding hi’n gen a, Congress govt. khenkhiat hileh nekgukna leng bei ding chi hi.
V. Hangkhanlian in a gendan in state President in July 18, 2016 a official lehkha pia in office hong dinga a theihsak ziakin huai dungzui a office hong hi’n gen hi. BJP party in kum 2017 assembly election ah lawhching in govt. bawlding ahihman in, CCpur dist. mipi’n CCpur dist a Constituency 6 laka 5 tan bek ah MLA achin zawh kei leh zahlak in vangsia kihi ding chi a, maban ah BJP party mah support dingin  mipi ngen hi.
         K. Vungzalian, President, BJP CCpur dist. in vote of thanks gen in, CCpur A/C tuamtuam a MLA  candidate ding: V. Hangkhanlian, Paokholal Haokip, Ngursanglur, Chinlunthang, Letzamang Haokip leh Jainson Haokip-te mipi ma a dingsak in pulak a, Elder Kaineipau, Executive Member in thumna in hunkhak hi. Huai hun ah Mangi Singh, State Vice President; Adim Pamei, State Vice President; I. Mangitou Singh, State Vice President leh O. Manglesh Singh, State Secy telin Imphal apan executive member hunkhop ban ah Dist. Mandal tuamtuam apan tamtak paikhawm uhi.


India leh B’desh PM in W.Bengal a checkpost hongkhia
New Delhi, July-21: West Bengal a Petrapole checkpost tuni’n India Prime Minister Narendra Modi leh Bangladesh Prime Minister Sheikh Hasina in video conferencing tungtawn in hongkhia uh a, West Bengal Chief Minister Mamta Banerjee leng videoconferencing  ah Kolkata apan in kihel hi. Petrapole checkpost in India-Bangladesh bilateral trade 50% huamkha a, economic development leh khawsuahna dinga India leh Bangladesh khualzinna lamzangtak a paitou zelte lakah  tuni a kihongkhia checkpost pen khantouhna chiamteh thamching hi’n PM Modi in gen hi.
    India-Bangladesh kizoptuahna ding central government in ngai poimawh ahihdan Narendra Modi in gen a, gamnihte’n kikawmtuahna hoihtak aneihtheih hun un economic development  muhtheih in khangtou ding chi hi. Petrapole Checkpost ah immigration tawh kisai banah custom leh border security clearance omding hi’n kigen hi. India in a innvengte siatna ding ngaihtuahlou in, amaute lawmbawl a kizopna bawlhoih zawk ding thiltup lianpen a nei hi’n PM Modi in gen a, huai sepsuahna in international border huamsung ah land custom station 7-te Integrated Checkpost a dopsang in om chi hi. Integrated Checkpost dia custom station 7 dopsang tungtawn in gamdangte leh India mite kithuzaktuahna baihlam ding hi’n PM in gen hi.
    Bangladesh Prime Minister Sheikh Hasina in video conferencing tungtawn a Petrapole checkpost  ahonkhiak zawh in gamnihte kitanauna hoihsem ding ahihdan gen a, tuni a kihongkhia pen Bangladesh mipite’n mangngilh nawnlou ding uh chi hi. Petrapole checkpost bel India-Bangladesh gamgi a Integrated checkpost nihna hi a, connectivity, trade leh people-to-people contact omtheihna dinga gamnihte’n a tunding uh hi’n kigen hi. Checkpost honkhiak a om pen Prime Minister Modi in June 2015 a Bangladesh aveh hun a thuchiam abawl hi’n leng kigen a, India a khangtouh bangin Bangladesh leng khangtou ding hi’n PM in huai hunah gen hi.


LOCAL NEWS:
MGNREGS thu genkhawm
Lamka, July-21: DC/CCpur office chamber ah tuni’n SDO/BDO-te leh DRDA staff te’n joint meeting nei uh a, MGNREGS 2016-17 tawh kisai gen uhi. Ministry of Labour, govt of India leh state govt deihna bang in Agriculture tawh kizoitawn nasepna dingte MGNREGS tungtawn a sepding; Job card leh Aadhar card kizom (linkage) ding ziakin BDO te’n atamthei pen linkage bawl ding, Geo MGNREGS (MGNREGS 2016-2017) tungtawna nasepna teng GIS tungtawna photo upload vek ding banah Lamka block, Tuibuong block leh Saikot block ah MGNREGS  tungtawna lampi gei a singnou suan ding chi’n genkhawm uhi. Huailou in Job card transfer tamtak ziakin 1st phase nasepna ding sanction theihlouh leng kinlam a hihfel ding in genkhawm uhi.


Anganwadi leh Helper-te’ kiphin
Lamka, July-21: Thanlon sub-divn a Anganwadi Worker leh Helpers semte’n kha 8 sung honorarium a muhlouh uh thangpai in tuni’n CDPO kiang ah thil omdan theisiam sakdingin ngen uh a, Anganwadi Centre ading van tuamtuam hawmkhiak ding leng khawlsak phot uhi. Honorarium piaklouhte ni 5 sunga hihfel dingin CDPO in achiam nungin felthei pan hi. Hoineingai, Chairperson Anganwadi Workers Assn/Thanlon sub-divn in a gendan in, Oct 2015 akipan honorarium telin transportation ngah nawnlou in nutrition items ava kia  ngah uh a, thil omdan theihchian utziak in  worker leh helper-te’ kikhawm hi’n gen a, block dangte’n bel ahun hun in ngah uh chi hi. Red Cross Road a ICDS Thanlon Project office ah Ksh. Ragina Devi, CDPO, ICDS Thanlon Project makaih in Micro Nutrients leh phek telin van tuamtuam hawmkhiak sawm uh a, workers leh helper-te’n honorarium muh mateng lalou ding in pang uhi. Thiltung awlmawh in Langkhanpau Guite, Chairman, ADCC in amun delh in thil omdan kansui a, CDPO in thil paidan teng a theihsak nung in, hunchiam sunga sufel teitei ding in theisak hi.  Thanlon Sub-divn a hAnganwadi Centre 144 om a, Centre 1 ah Worker leh helper 1 zel om  a, worker in kha 1 in honorarium Rs. 3,000/- leh helper in Rs. 1,500/- ngahsek uhi.


Manipur ah 6th position in pang
Lamka, July-21: Tuma zekin Manipur University nuai a BA/B.Sc (Honours) 6th Semester examination 2016 result suak ah Jamesbond Neihsial s/o Thangkhokam Neihsial of Tuibuong  in Anthropology subject  tungtawn in Manipur pumpi ah 6th position in pang hi. Jamesbond bel CCpur govt College a kai hi a, Anthropology subject ah amah kia Top 10 lak ah telkha hi.


Kayakalp Award ading assessment bawl
Lamka, July-21: Kayakalp Award assessment tawh kisai Monitoring & Supervision team te’n tuni’n Behiang PHC leh Singngat PHC pha uh a, PHC 2 te ah damtheihna leh sianthouna tawh kisai Kayalp Award ngah theihna ding  thil poimawh tuamtuam assessment bawl uh a, 1 select hiding in kigen hi. Monitoring & Supervsion team apan Dr. Thangchinkhup Guite, CMO; Dr. J. Songoukham Samte, Med Suptd/Dist. Hospital; Seiboi Mate, DPM leh Vung Mary, DCM tel uhi.


Dress Code tungtang meeting
Lamka, July-21: Paite Cultural Society (PCS) in tuni’n Lamka a PTC gen HQ Conference hall ah  meeting nei uh a, dress code leh thu tuamtuam genkhawm uhi. Huai ah numeite dress code puan-ak silh 7, silh khat Rs. 1,500 bei a bawlsak a om pom in, pasalte silh  ding silh 300, a than a omlaite, mawhpuakna piak a omte mah in saitou a, Wete Centre, Hebron Veng, New Lamka khut a piak din thupuk uh a, zawh ahih chingin thupitaka hong dingin thupuk uhi. Dress Code honkhiak hi naikei mahleh adeihte’n PCS office ah order theih dingin kigen hi. Member paikhawmte’n Finance Secy len S. Chinkhanlam mun luah din V. Zamzagin guang uhi.


NFSA antang hawmkhiat hiding
Lamka, July-21: CCpur dist. ah National Food Security Act. tungtawna Rationing Agent te’ antang hawmkhiat dingdan Civil Supply dett/CCpur te’n tentative program bawl uh a, 6th Phase tana hawmkhiat hiding hi. 1st phase ah CCpur A/C; Saikot A/C; Singngat A/C; Thanlon A/C; Tipaimukh A/C leh Henglep A/C hiding a, 2nd phase ah Saikot A/C; Singngat A/C; Thanlon A/C; Tipaimukh A/C; Henglep A/C leh CCpur A/C hiding hi. 3rd phase ah Singngat A/C; Thanlon A/C; Tipaimukh A/C; Henglep A/C; CCpur A/C leh Saikot A/C hiding a, 4th phase ah Thanlon A/C; Tipaimukh A/C; Henglep A/C; CCpur A/C; Saikot A/C leh Singngat A/C hiding hi. 5th phase ah Tipaimukh A/C; Henglep A/C; CCpur A/C; Saikot A/C; Singngat A/C leh Thanlon A/C hiding a, 6th phase ah Henglep A/C; CCpur A/C; Saikot A/C; Singngat A/C; Thanlon A/C leh Tipaimukh A/C hiding hi.


PTC Block election leh kipolhkhawmna
Lamka, July-21: Paite Tribe Council (PTC) GHQ makaih in July 23, 2016 in PTC Tuivai Block leh PTC Valpakotsuah Block ah election om ding a, PTC Singngat Block ah makaite tawh kithuahkhawmna om ding hi. Zinglam in PTC Tuivai Block te’n Mualnuam a Block office ah election nei ding uh a, PTC Valpakotsuah Block te’n leng zinglam B. Kalkang a Block office ah election nei ding uhi. Nitak dak 6:30 in PTC Singngat Block te’n Unit-te tawh Block office ah kithuahkhawmna nei ding uh a, huai ah PTC hatsem dingdan,  maban paiding dan leh unit-te dinmun tawh kisai genkhawm ding uhi.


SUUNNA:
Upa S.Ngilkhothang (79) s/o (late) Evan. Dongthang of Khominthang, New Lamka tuni nitaklam in cancer in si a, July 22, 2016 in YPA hanmual, New Lamka ah kivui ding hi. Amah bel Rev. (retd) S. Thanglian’ sanggam ahi.


IMPHAL NEWS:
Yairipok ah bomb kipai puakzak
Imphal, July-21: Yairipok Aided High School mun a power sub-station bawl ding deihlouhna panla JAC adviser-te lakah khat Maibam Ibotombi (60) s/o Lairen of Yairipok Bishnunaha Pukhri Achouba Mapal  tenna inn ah tuni zingsang baihtak dak 12:30 velin meltheihlouh pawl khat in a verandah ah hand grenade a paih uh puakzak a, himahleh a si leh liam kuamah omlou hi’n kigen hi. Huai thiltung mawhpaihna leh lungkimlouh latsakna in huai bial mipite’n tuni’n  Yairipok Bishnunaha Pukhri Achouba Mayai mun ah sit-in-protest tu uh a,  thiltung tawh kisai KCP (Poirei Meitei Lup)ten amau thil hilh hi’n kipuang uh chihthu om hi.


Dakkal 48 sung bandh om ding
Imphal, July-21: All Manipur Written Test Successful Candidate of Police Constable Male 2013 a Secretary in tuni a thusuah a bawlna ah akisaipih thuneite’n result puangkhe ding a ngetna in memorandum tamvei tak a piak banuah sit-in-protest leh mass rally a sai nung ua lampi bangmah thuthak om louh ziak in July 23, 2016 zankim apan dakkal 48 sung Manipur pumpi ah bandh puang din gen uhi. Hiai tungtang ah Civil societies, NGOs  leh human rights activities te’n panpih leh gum ding in ngetna bawl a, candidate te’n interview hun ding ngak a om uh hi’n leng taklang uhi.


Independence Day boycott ding in vau
Imphal, July-21: Joint Action Committee against Anti-Tribal Bills (JACAATB) leh Outer Manipur Tribal Front (OMTF) te’n Imphal a Haokip veng ah July 18, 2016 ni in joint meeting nei uh a, huai hun ah point 7 tawh kisai in thupukna bawl uh hi’n kigen hi. Huai lakah a kintheipen a Manipur Governor kimuhpih ding, huai nung a OMTF leh JACAATB pailai te’n Delhi a Union Minister(s) leh Central govt.-te thil omdan theisak ding, tribal MLAs leh MP tungah boycott tawh kisai a thupukna namkip thak banah tribal area sung ah gamtatna a neih ziak ua buaina a om leh JACAATB leh OMTF te’n mawhpaw lou ding uh a, MLAs leh MP boycott kithuahpih mimal ahihkeileh organisation-te anti-tribal minvuah hiding uh a, bill 3 pass a om tawh kisai Congress party mawhpuakna ahihziakin singtang bial ah July 18, 2016 ni apan boycott ahih tawh kiton in Congress office teng khak hiding a, bill 3 lakah bill 2 leh tribal martyr 9-te thudika vaihawm ding ngak in thubuai suk veng hinailou a, India govt. in Aug 11, 2016 tan a 3 bill tawh kisai a thubuai a sukveng keileh Independence Day boycott ding banah  Aug 31 ni ‘Tribal Unity Day’ a zat ding chihte tel hi.


JCILPS volunteer te’n mi 154 man
Imphal, July-21: Joint Committee on Inner Line Permit System (JCILPS) a volunteer leh supporter te’n tuni’n Manipur honglut document kichiantak neilou non-local mi 154 mankhia uh hi’n kigen hi. Akigendan in NH-2 in a tawt khak Sekmai mun ah tuni zingsang apan Advance Women Society member, Awang Sekmai Protection Committee, local club member leh JCILPS volunteer te’n Dimapur apan Inter-state bus 7 a check na uah document kichian tak neilou non-local mi 154 mankhia uh a, huai nung in Sekmai Police station ah pekhia uh hi’n kigen hi. Atur Rehman, Asst. Secy., JCILPS in media-te tawh kimuhna hun ah inter-state buses te’n document kichiantak neilou-te Manipur ah pawlut lou dia JCILPS-te ngetna ngaisak lou uh chi a, hiai tungtang ah Inter-state bus service thuneite’n panla ding in ngetna bawl a, Contractor leh Company te’n leng nasem dia pawlam apan mi laklut dingte ahihna uh chetna bawl masa din theisak uhi.


Scholarship tungtang genkhawm
Imphal, July-21: S. Minliangthang Vaiphei, IAS, Director Tribal Affairs & SC banah MTDC, Managing Director leh Churachandpur College student Unit apan KSO leh TSA-te tawh tuni’n scholarship munailoute tungtang genkhawm uhi. Huai hun ah Director in Centre in scholarship a ding in Rs. 7 crore sanction beh ding a, sum tung hun chiang in student-te account chiat ah scholarship thunlut hiding in leng gen hi.


BA(Gen.) leh B.Sc (Gen.) 6th sem result suak
Imphal, July-21: Tuni’n MU nuai a B.A. (General) 6th semester leh B.Sc. (General) 6th semester result suak a, B.A. (General) ah candidate 899 om lakah 700 pass uh a, a pass zah 77.86% tung hi. B.Sc. (General) ah candidate  754 exam-te lakah 584 pass uh a, a pass zah 77.04% tung hi.


Kilonser innkuante’n lauthawng
Imphal, July-21: Hillson Pou, Publicity-in-charge, Shepoumaramth region NSCN(K) in thusuah a bawlna ah zan in NSCN(IM) cadre te’n Senapati district a Taphou Phymai village a NSCN(K) a Kilonser S. Hriipunii Vemai’ zi leh tate-te lauthawng tak a koih uh a, huai tungtang mawhpaihthu puang uh ahihdan taklang hi.


TUNI THUPI:
“Amau ziakin ka kihih siangthou a, amau leng thutak a a sianthouna dingun.”  - Johan 17:19


EDITORIAL:
Sianthouna i chihchih uh!
 Autonomous District Council (ADC)/CCpur in centre government policy leh target khat SBA kichi nakpitakin hongkhia uh a, kipahhuai hi. Huchi kalah, New Lamka West MDC banah social activist CT Lian Guite leh a teamte’n na tamtak sem uh a, singnou tamkhop  suan in, ‘Suan Ni Maw’ chih music video tanpha a bawl ua kipan mipi’ lakah halhna chikhat hong piang bangin ngaihsut theih hi.
    Mipi’n huihsiang mah dik uhen chih lunggelna ziakin Centre government in Swachh Bharat Abhiya (SBA) kichi pankhia uh a hoih mahmah hi. India a state tamtakin huai SBA hamphatpih  in lampi kim-le-kiangah singnou suanna nasep pibawl mahmah uh a, khawpi laizang a factory leh industry tuamtuam omte khawpi nawl a suankhia in tuate ‘industrial site’ chih in om hi. Singnou tampi suan ding, mipi’n huihsiang a dik ding uh chih centre govt in plan leh policy hoihtak a bawl uh kipahhuai law mahmah hi.
    Sianthouna i chih chiangin gendan tuamtuam om a, India kichi sahkhaw thil ah leng dan in hon phalsakna bangin i zalen mahmah uh a, Hindu, Muslim, Christian, Sikh, Parsis, Jain leh sahkhaw dangdang zui  i om tiltel hi. Sahkhua tawh kisai himhim kuamah kisim mawh i omthei kei a, ahihziakin akhen chiangin kitheihsiamlouhna ziakin buaina tuamtuam ana  om khasek hi.
    Tuni in hiai SBA tawh kisai sahkhaw thil lamah hizawlou in mi nautangin sianthouna tungtawn a mihing damtheihna kepbit ding hizaw dan in pomtheih hi. I kim-le-kiang hih siangthou ding, sapte gendan hileh, streets, lanes, parks ahihkeileh mipite kipunkhawmna public place-te himhim hihsiangthou ding chih ahi hi. India in British-te akipan zalenna a ngahna kum 70 ching ding hita a, bangziaka India gamsunga khawpi leh khawta banah singtangbialte kihhuai leh thanghuai  nemnum a omsak  gige lai ding ihihiam chih ngaihsutna liantak omthei  mah hi.
    “Swachh Bharat Abhiyan” bel Nampi Pa ‘Father of the Nation’ kichi Mahatma Gandhi dungsun a patkhiak ahi chih hi a, Gandhi kichi mi tamtakin putek sia bangin ngaihsun mahlehang, zingkal dak bangzah a thou a, tuanunga biakna hun minute bangzah zang hiam, zingkhangpi in bangchik hun a kisil gige hihiam chih a theilou tamzaw i hingei ding hi. Mahatma Gandhi in sianthouna ngai poimawh mahmah a, ama’ zahtak-huaina sangin  innkim le a omna kim(area/veng) hihsiang gige mi ahi kichi hi. Mahatma Gandhi paidan khat ahihleh, ikim-le-kiang i sianthousak aleh  huihsiangin eilam hon manawh a, tua tungtawn in mihingte’n leng damtheihna ngah ahi chi a, huai doctor siamte’ muhdan leng ana hitouden hi.
    Prime Minister Narendra Modi makaihin apaisa October 2, 2014 in Mahatma Gandhi pian champha Gandhi Jayanti ni chitchiat in New Delhi a Gandhi han Rajghat ah Swachh Bharat Campaign patin om a, huai ah BJP makaihna NDA govt thiltup ahihleh ‘make India clean’ chih hitop mai a, innkuan chih in ekbuk a neih ding uh, ninte paihna munding hoihtak a neih ding uh, khawsung ahih siangthou ding uh, khawchih leh innkuan chih in dawnding leh zatding tuisiang kiningching angah ding uh chih ahi hi. Tua ziak mahin October 2, 2019 tanin India kilchih a teng tengteng in hibang thil azar zou ding uh ahi chih hi a, tua dingin BJP makaih NDA govt in naktakin pan ala lel chi uhi. Tuahun chiangin Father of the Nation Mahatma Gandhi pian champha leng kum 150 pha ding a, huai lopna kawmin India gamsung pumpi gamdangte tawh kibangin siangthou in namtui mahmahta ding ahi chi uhi.
    Eilawi hon pitu dingin BJP ahihkeileh Congress-te i deih in i gum chihna hituan hetlou in sianthouna leh damtheihna(cleanliness & hygienetic) kichi ngaih poimawh huai mahmah hi. I gam ah diesel auto telin gari lui kibehlap semsem a, anhekna khawl (rice mill) hunkhop banah gari bawlna(workshop) leh sik souna(iron & steel welding) tamtak khawpi kongzing ah muhtheih in omlai hi. Tuate’n mihing’ damtheihna bangzahta a sukha a i tuap (lung) keusak  deuhdeuh hiam chih ngaihtuahphate ihi kei zel uhi.