MANIPUR EXPRESS | JULY 23, 2016

HEADLINES:
IAF, Navy leh Coast Guard te’n lenna zong lel
Bay of Bengal tungah sepaih 29 tuanna AN-32 tuahsia
New Delhi, July-22: Tamil Nadu khawpi Chennai apan kipankhia khia AN-32 aircraft alenkhiak nung sawtlou Bay of Bengal tuipi tungahithuzak theih nawnlouh in mangthang hi. AN-32 ahihleh Chennai a Tambaram airbase apan Port Blair zuan a lengkhia hi a, akipatkhiak nung sawtlou huihkhua feet 23,000 aleng apan buai in zinglam dak 8.46 leh minute 16 tan radio tungtawn in kihou thei uh a, huainung kihou thei nawnlou uh chih ahi. AN-32 sungah sepaih tuamtuam mi 29 tuang ua, tua lakah officer 4 tel uh a, huaite lak ah H. Ginzasiam (22) s/o H. Tualkhanlian of Dorcas veng, New Lamka leng tel hi'n kigen hi.

    AN-32 aircraft ahihleh IAF, Navy leh Coast Guard banah tuinuai long (submarine) telin aircraft 8 leh longpi 13 te’n lenna muhkhiak theih hiding hiam chih ngaihtuah in panla lel uh chihthu kiza a, Tambaram air base apan lenna hunkhop leng hutkhiakna nasep sem dingin mansa in om uhi. Union Defence Minister Manohar Parrikar in agenna ah, lenna leng muhkhiak teitei sawm ahi a, tualou in siluangte muhkhiak tup masakpen ahi chi hi. Air Force’s Workhorse ah mi 29 tuang uh a, amaute mangthang vek ding dinmun ah om uh chi hi. Indian Navy leh Indian Coast Guard te’n hutkhiakna nasepna ah long (ships) 17 zang uh a, MoS Defence Dr. Subhash Ramrao Bhamre in thiltunna mun ahihleh Chennai akipan km. 270 vel ding a gamla hidan in gen a, hutkhiakna nasep pen nitak tanpha a sutzop hiding in gen hi. Thiltung tawh kisai in IAF aircraft a tuangte sungkuante thuzak in om khinta uh, chi hi.
    Indian Air Force in 1980 lak vel akipan AN-32 aircraft pen IAF a guanlut nung un accident tamtak om a, tua ma in bel accident vang mahmah in kigen hi. AN-32 aircraft ah mi 29 tuang uh a, amaute si vek uh hidan in kigen hi. Misite ahihleh Air Force personnel 7, Army 2, Navy 9, Coast Guard khat leh crew member 6 hi uh hi’n thusuak in taklang hi.


Fogging machine zangin thoukang thahna kap uh
CCpur Dist ah JE natna vei mi 2 mukhia
Lamka, July-22: Japanese Encephalitis (JE) natna vei CCpur dist. ah 2 muhkhiak  hi a, huai natna hii leng akipan kiven poimawh sak ziakin medical deptt. in tuni’n khawpi sung mun tuamtuam ah fogging machine zangin thoukang thahna damdawi kap uhi. Med deptt apan kizadan in Lamngaihvung (37) w/o Kamlunmang of Gouchinkhup Veng, New Lamka leh Sagang PHC bial Siden khua a om Demkhosei(12) in huai natna vei uh a, tu’n Imphal a JNIMS leh RIMS ah etkol in om uh kigen hi.
    Lamngaihvung a khawsik ziakin Lamka a Dist Hospital ah  admit hi  a, doctor te’n JE natna vei hidia gingta in JNIMS ah refer uh a, a sisan test result tungtawn in JE natna vei ahih theihkhiak hi’n gen uhi. Demkhosei leng Dist Hospital akipan RIMS ah refer hi a, July 19, 2016 a sisan test akipan matkhiak hi’n kigen hi. Medical deptt te’n tuni nitaklam in Gouchinkhup Veng ah thoukanglou (Pyrethrum extract) kap uh a, July 23 zingkal dak 6:00 akipan in TCYA Hall ah JE vaccination camp om ding hi.Amau khawpi sung thoukang thahna damdawi kapsuak sawm in panla uhi.
    DIO makaih in July 21, 2016 in Siden khua ah JE Vaccination Camp sai in  thoukanglou kap uh a, khua 8 cover in mi 1000 vel JE dalna damdawi kap uh a, July 24, 2016  in kum 15 tunglamte JE dalna in kap hiding hi.
    JE natna thoukang chikhat ‘Culex mosquito ’in a keih ziaka kipan hi a, natna veikha-te  khawsik ban ah luna in, luaksuak uh a, chi pumlin in, thazoi, lung-am chihte in om ua, huihkhua tungtawn a kilawhsawn theih ahihman in pilvan ngai in, huchibang a omte’n a kinlam a doctor ki-etsakpah poimawh kichi hi.


Punjab apan AAP MP Bhagwant in ngaihdam ngen
Parliament video khahkhiak ziakin RS leh LS buai
New Delhi, July-22: Punjab state sung Sangrur apan AAP lawmaker Bhagwant Mann in Parliament sunga mun tuamtuam video alakte social media a akhahkhiak ziakin, tuni’n Lok Sabha leh Rajya Sabha ah tutkhawmna khawlsak a om in buaizak a, member tamzaw in action lak khum dingin Lok Sabha speaker leh Rajya Sabha Chairman kiangah ngen uhi. Bhagwant Mann in pilvan louhna ziakin a inn uapan Parliament kikal, a khualzinnate khahkhe mah hi’n Lok Sabha Speaker Sumitra Mahajan kiangah gelhthawh in hilhchian a,  ngaidam ding in ngen mahleh, huai issue pen ngaihdam ngetna vuak in hihveng theilou ding hi’n Speaker in zasak a, gawt a om ding hi’n leng hilh hi. Parliament sung leh pua a khahkhiak in security dengdelsak ahihdan Speaker in Bhagwant Mann kiangah gen a, thiltung hun in Parliament ah om hileh action lakkhum ngal ding hi’n leng theisak hi.
    Social Media a Parliament sung leh pua ettheih dia khahkhiakna tawh kisai in Rajya Sabha member lungkimloute tuni’n kikouzak uh a, Naresh Gujral, Anand Sharma leh Sitaram Yechury te’n  action la ding a chairman a nget lai un, BJP member tuamtuam in Chairman' podium ah slogan sam in kikou uh a, action lakkhum ngeingei ding in ngen uhi. Aam Aadmi Party MP Bhagwant Mann gamtatdan BJP, Akali Dal, Biju Janata Dal (BJD), Rashtriya Janata Dal, Janata Dal-United, Samajwadi Party telin party tuamtuam apan member te’n mawhpaih uh a, maban ah parliament a gamtatna khengval om nawnlouhna ding in action khauhtak lakkhum deihthu gen uhi.
Congress floor leader Mallikarjun Kharge in Video tungtang ngaihdam theih vual hilou chi a, Parliament sunga security dengdel vuak hilou in democracy tanpha dengdelsak hi’n gen hi. Tuabang kalah Lok Sabha  a Congress President Sonia Gandhi a omlai in, BJD MP B. Mahtab in, December 13, 2001 in Parliament a security dengdel ziakin mi 13 thah a om uh ahihdan gen a, Parliament a security tawh kisai serious mahmah ahihman in 2001 a thiltung hun in Sonia Gandhi in PM Atal Behari Vajpayee kiangah suizui ding in theisak hial, chi hi.


LOCAL NEWS:
Lamka leh akim ah khawsik hiileng
Lamka, July-22: Lamka leh akim area ah tulai in naupang lak a seasonal Viral Fever hii leng a, tamtak a damlouh ziakin school khenkhat tuni apan ni 6 sung suty (holiday) puang uhi. Huai tawh kisai DFWO/CCpur apan kizadan in viral fever bangziak a om hiam? chih theihna dingin blood sample collect a, Kolkota a Laboratory ah test ahihkei leh aziak diktak gen theihlou hi’n gen hi. Viral fever a damloute chisa, hitang in om uh a, huih (air) apan kilawh sawntheih ziakin naupang lakah kilawhsawm baihlam mahmah a, akivenna ding in muk tuam(musk) hiphot a, chisa om dungzui in Antibiotic damdawi piak ngai a, akintheilam a doctor ki-etsak a poimawh banah JE (Japanese Encephalitis) tawh kibanglou hi’n gen hi. Viral fever ahihleh piching lak sangin naupang lak ah kilawhsawn baihlam hi’n DFWO/CCpur in gen hi.


I-Day thu meeting ding
Lamka, July-22: DC/CCpur makaih in DC office a BRGF Resource Centre ah July 28, 2016  sunnung dak 1:00 in Independence Day lopna ding tawh kisai Dist. Level Coordination Committee meeting om ding a, akisaipih Dist. Level Officer teng telding in DC/CCpur in theisak hi.


Manager in a kaisang
Lamka, July-22: Miss Jessie Lalhmingmawi Pakhuongte d/o Lalrinlien Pakhuongte of Nehru Marg, tulel a Union Bank, New Delhi ah Asst. Manager semlel, tunai zek in Manager in kaisang hi.


Medical teamte’n Suangdoh pha
Lamka, July 22: Suangdoh khua banah Lungthul area ah tulai in khawsik(viral fever) hii leng a, damlou ahunkhop om chihthu theih in bialtu MDC G. Suanchinpau leh Singngat PHC a Medical office i/c Dr Jamthianlal’ panlakna in Singngat PHC apan doctor leh nurse bangzah hiam te’n tuni’n Suangdoh khua pha uhi.Amau te’n Suangdoh, G.Bualzang, Lungthul (L), Lungthul (T), Lungthul (D) a damloute en ding uh a, damdawi poimawh bangbang leina ding bialtu MDC G.Suanchinpau in pawkhia hi’n kigen hi.


Dy. Manager telin mi 3 in join thak
Lamka, Jul-22: Manipur State Power Distribution Company Ltd. nuai a semding a lakthak H. Thangchinlun, Dy. Manager (Elect); P. Thongkholian, Asst. Manager (Elect) leh Thangminlien Haokip, Asst. Manager (Elect) te’n tuni’n Bijang a Electricity  office ah join thak uhi.


Dakkal 24 bandh puang
Lamka, July-22: All Manipur Written Test Successful Candidate of Police Constable Male 2013 Batch, CCpur branch pawlin tuni’n IB Road a KKL complex ah joint meeting nei uh a, huai ah dist tenga written Test successful candidate te’n July 23 zankim akipan July 24 zankim tan dakkal 24 sung Manipur pumpi total bandh a puang uh  a, CCpur dist. ah leng khauhtak a panla dingin thupuk uh hi’n Pesident L. Samuel in gen hi.
    Aman agendan in kuapeuh in support dingin dingin ngen a, total bandh tawh kisai in dist. a  innpi teng banah student leh joint women orgn, CCpur te’n leng support  ahihdan gen a, bandh sungin media house, water supply, electricity, medical leh emergency thil banah saptuam tawh kisai khahkhol hidin gen hi.


PASS in vanzat hawmkhe ding
Lamka, July-22: People Advanced in Social Services(PASS) in July 29, 2016 in New Mata a Bliss Island School campus ah khawzakna leh khawmuhna hoihloute ading vanzat tuamtuam hawm ding uh a, Chief Guest in Lunminthang Haokip, IAS, DC/CCpur pangin pekhe ding hi. Zinglam dak 11:00 in registration kipan ding hi. PASS in ALIMCO tawh kithuah in May 23, 2016 in Synod hall ah assessment camp asai ua tellou vanzat deihte’n July 28, 2016 tan in New Mata PASS office ah document leh passport size copy 2 tawh kingetna piaktheih hi’n gen uhi.


Police te’n Traffic Point bawlthak
Lamka, July-22: Traffic Control Police te’n traffic control theihna ding in Forest Gate, Tuibuong/Tuibong a lampi nawl a Traffic Point pen Tedim Road lampilai ading in suan uh a, nasepna pailel kalnawn sungin zawh hidin kigen hi.


Mi 200 val JE dalna kikap
Lamka, July-22: Dist. Immunization office (DIO)/CCpur ah tuni'n Japanese Encephalitis (JE) natna apan kivenna ding damdawi in mi tamtak kikapsak uh a, sunnung 2:00 tan in mi 280 val kikap uhi. JE dalna damdawi dose 1 ah mi 5 tan kikap thei hi.


JAC makaih in dharna tu uh
Lamka, July-22: Joint Action Committee against Anti-Tribal Bills (JAC-AATB) makaih in tuni’n ‘Salphate Pumbuk’ ah sit-in-protest om a, Hiangtam Lamka, Hmar Veng leh Tuinom apan tamtak paikhawm uh a, JAC akipan GK Zalal leh M. Kamkhenpau  te’n makai uhi. Dharna hun sungin Pastor Khupdokhen in kul bangin hunzang a, avangkim in thumkhawmna nei in, mi tuamtuam in thugen uhi. July 23, 2016 in JAC apan Ngulchinthang leh Thangsang etkaina in Hiangtam Lamka, Lhangjol leh Salem Veng tu ding uh a, Rev. Mangthianlal in hunzang ding hi. Dharna tut hun zinglam dak 11:00 apan sunnung dak 2:00 tan hi a, thuthak om masiah sutzop hidin kigen hi.


SUUNNA:
Miss Khuolzahoih (23) d/o (late) K.Thanglienmang of Gangpimual tuni nitaklam dak 4:30 velin khawsikpi in si a, July 23, 2016 in Gangpimual hanmual ah kivui ding hi.


IMPHAL NEWS:
Manipur ah JE natna vei 9 om
Imphal, July-22: Manipur ah tulel in Japanese natna kichi JE (Japanese Encephalitis) vei mi 9 om hi’n Medical Dept. in suikhia uhi. O. Ibomcha, Director, Health Services in a gendan in tulel in CCpur, Imphal West leh Imphal East ah JE a damlou 2 chiat om a, Chandel, Ukhrul leh Thoubal ah leng damlou 1 chiat om hi’n gen hi. Damloute tulel in JNIMS hospital ah etkol a om uh hi’n kigen a, natna vei kibehlap thei dia patauhhuai sak ziakin Dept. in kivenna lam leng hahtak in panla chi’n Director in gen hi. Hiai natna akipatna mun Chandel district sung Tengnoupal bial hi’n kigen a, tuni in Health Minister D. Korungthang in va pha a, huai mun kimkot km 200 ah thoukang thahna damdawi kap ahih banah mipite leng kivenna ding in JE vaccination in kikapsak uhi.


Room kidaihlou; verandah ah class nei
Chandel, July-22: Sajik Tampak Govt. High School ah class room kidaih louh ziak in student te’n Assam Rifle-te store room verandah ah class la uh hi’n kigen hi. Hiai tungtang KSO Chandel a President Doumang Haokip makaihna nuai in zan a school etkhiakna hun a theih khiak hi a,  Class-I section A, B leh C te’n class room kidaih louh ziak in 21-A/R te’n store room dia a zat uh verandah ah class la uh a, huai ma in Tuilelon village a community hall zang uh a, campus sungah toilet kichian tak omlouh ziak in student leh staff te’n haksatna tuak uh hi’n kigen hi. Sajik Tampak a Assam Rifle te’n campus a luah ziak un student leh A/R te’n gate khat zang khawm uh a, A/R-te store room leh school building tawh kizom hi’n gen uhi. Hiai tungtang ah Doumang Haokip in thuneite’n enkai ding leh akisaihpih contractor te’n class room extension kibawl lel leng quality hoihtak a bawl dingin ngen uhi.


DESAM in bandh zukkik di'n ngen
Imphal, July-22: DESAM te’n July 24, 2016 ni a AIPMT leh NEET ding ziakin All Manipur Written Test Successful Candidate of Police Constable Male, 2013 te’n July 23, 2016 zankim apan dakkal 24 sung bandh bawl a sawm uh zukkik ding in ngetna bawl uhi. Hiai tawh kisai in tuni’n DESAM office ah press conference om a, huai ah N. Edison, Gen. Secy., DESAM in Manipur ah Centre tuamtuam 10 ah candidate 5,000 vel in medical entrance test gelh ding uh a, candidate te’n bandh ziak a test pe theilou hile uh kuate’n mawhpaw ding uh hiam chih dotna bawl a, DESAM te’n mimal leh pawl tuamtuam in thilphut-te tangtung sakna dia bandh a bawl uh tawpsan din tam veitak ngetna bawl mahle uh JACs leh pawl tuamtuam-te  bandh ziak in student-te a thuak pipen in pang uh chi hi. Aman agenzelna ah bandh control theihna ding in DESAM te’n bandh bawl mimal leh pawl tuamtuam tungah PIL file ding uh a, state govt. in anti-bandh regulation bawlkhe dingin phutna bawl uh hi’n leng gen hi.


Manipur in IT sector ah makai
Imphal, July-22: PK Singh, Commissioner, Information Technology (IT) Manipur in North East bial a ding in IT sector lam ah Manipur in hih hoih pen chi’n tuni’n DIPR complex a press conference hun ah gen hi. N. Deven, Addl. Director, IT in Assam tawh teh in Manipur state lian kei mahleh IT sector lam ah Manipur in masuan zel a, NE bial a IT Park omsun Manipur hi’n gen hi. Mantripukhri a IT park ah IT enabled service agency 5 te’n na sem uh a, huai banah IT SEZ dia building leng March 2017 a luah theih ding hi’n gen hi. Digital India project tawh ki zawi tawn in Manipur IT dept. te’n state govt. application leh website-te host theihna ding in State Data Centre (SDC) bawlkhia uh a, huai mun ah tulel in Crime & Criminal Tracking System (CCTNS), State Portal leh e-District software-te hosting bawl uh hi’n gen hi.


‘Aadhaar’ poimawh ding
Imphal, July-22: Ministry of Tribal Affairs a Secy in theihsakna a bawl tawh kiton in Directorate of Tribal Affairs, Hills & SC in tuni’n thusuah bawl uh a, huai ah centrally fund scholarship nuai a Post-Martic leh Pre-Matric Scholarship mu dingte theihtumna dia (identification) ‘Aadhaar’ zat ding ziak in ST student/parents teng in Aahaar number a nei ding uh banah bank account seeding a zawh uh ngai hi’n gen uhi.


2/5 GR te’n ATSUM Info. Secy. soisa
Imphal, July-22: Satudai village a Khoupum te’n airtel network connectivity a ngah theihna ding un zan a airtel company te’n free SIM hawmkhiakna in Canopy/Road Show sai uh a,  huai hun ah Khoupum village apan ATSUM a Info. Secy. & Pub. Micah Kamei leng panla tu hi a, Khoupum a 2/5 GR post a personnel te’n Road show member-te va mu in SIM card number leh a latute detail va ngen uhi. Micah te’n Imphal Head office a piak lut dia saifel nailou banah Head office a ngetna bawl dia a theisak ziak in Army-te zahtak louh banah Army-te phalna tellou a SIM card  hawmlou ding in Army te’n thupia uhi. Micah-te a kiklam un Khoupum a 2/5 GR post ah kihou dia saplut hi a, huai ah Lieutenant 1 in Micah maibet a, huai nung in Captain Sourap Choudury in a vek ua kaplup theihnang thu nei leh UG tawh kizopna nei dan a ngawh thei hi’n gen hi. Hiai tungtang ah ATSUM te’n mawhpaihthu puang uh a, Lieutenant leh Captain tungah gawtna piak ahihkeileh sai maimai lou ding uh hi’n taklang uhi.


Sekmai ah non-local 147 pekhia
Imphal, July-22: Advance Women Society leh Awang Sekmai Protection-te leh JCILPS supporter te’n Sekmai ah tuni’n Dimapur akipan Inter-state bus-te checking tuni’n bawl nawn uh a, huai ah nasem ding a honglut hihna kichian leh lai poimawh (document) kichian tak neilou non-local 147 man in Sekmai Police Station ah pekhia uh a, Thoubal a Shyma Power India Private Ltd., NIT Langol leh Moirang a St. Savior School-te ah nasem ding in kigen uhi.


TUNI THUPI:
“Huchi’n, Jesu’n a kiang uah, Mi damtheiten daktor a kiphamawh kei ua, mi damtheilouten a kiphamawh zaw uh.”- Luka 5:31


EDITORIAL:
Lamka leh damtheihna
(Health-care in Lamka)
Manipur adia khawpi 2na Lamka banah CCpur district pumpi mahmah ah leng damtheihna (health) tawh kisai leh kivenbitna (care) tungtang panlak taktak poimawh mahmah hi. Tulai in damlouhna leh hileng tuamtuam om ziakin school a hunkhop kikhak a, private school hi’n government school hita leleng khakin om phut hi. Naupangte’ lak ah natna hileng kilawhsawntheih a om hun chiangin school kintak a a khak ding him uleng ahi hi.
    Huchi kalah, CCpur district ichih smart district chih minvuah theihte laka khat hi a, damtheihna tawh kisai leh naupangte lehkha siamna district banah nu-le-pa hunkhop lehkha siam omna hi a ‘lehkha siamna district chihkhop a lawhtheih’ district leng ahi hi. Damtheihna tawh kisai en lehang naupangte ‘very much touted health insurance scheme’ poimawh uh chi lehang dik mahmah inteh. CT Lian leh a teamte’n health care tawh kisai in pan naktakin la uh a kipahhuai mahmah hi. Amau panlakna pen MLA politics tawh kisai maimai hiding in leng gingta khang, sisan piak ngaite pia a, panpih ngaite pahpih chih pen Pathian akipan suak midangte itna leh khualna hidingin gintak-huai hial hi.
    Ahi a, i gam ah, government hospital himhim hoihtaka a function (equipped government hospitals) kidaihzai i neih uh hun mahmahta hi. BJP in zan in siluang 9-te vui ahihlouh lai in a office ding uh hong khanglang uh a, JAC akipan in dalna a omkei a, hiai tungtang a theisiamlou mi hunkhop om hi. I gam puah ut taktak kua party mah a omkei chih ut-huai hial hi. Community Health Centres (CHCs) leh Primary Health Centres (PHCs) te i gam adingin i gou manpha banah health-care institutions pipen himai uh a, mizawng leh gentheite adinga kingakna pipen leng ahi uhi.
    Kuapeuh in baihlamtakin Lamka a District Hospital zuan theilou hi. CCpur dist hospital zotna dingin hun sawtpi lut a, damlou gim leh accident thil a buaina thuakte adin thunuam hilou hi. Damdawi tawh kisai ki-etkolna kin (necessary medicines) banah kihehnepna damdawi(ordinary pain killers) tanpha tanggam bialah omlou ahihman in damtheihna, kivenbitna leh natural calamity tuamtuam a damdawi poimawhte igam ah i neih poimawh mahmah sakin om hi.
    Civil Society tuamtuam in ‘emergency services’ dan in Ambulance i neita a, kipahhuai mahmah. Tua tungtawn in mi tamtakte hinna humbit ahita a, mi phatuamngai tamtak tungtawn in a sisan uh a thawh ziakun damlou hunkhopte a hinna uh humbitin  omta chih ahi. Tu in natna thak Japan natna kichi Japanese Encephalitis (JE) kichi natna vei CCpur district ah muhkhiak hi a, huai natna kithehzak thei ding dinmun ah akilat ziakin medical deptt. in theihtawp suahin panla uh a, tuni’n leng khawpi sung mun tuamtuam ah thoukang thahna damsawi kap(fogging bawl) uhi. Hibang natna i gam ah hong om touzel ding in kilang hi. Naupangte laka kilawhsawn thei natna hiai JE ziaka school tuamtuamte khak a om ahihleh school thuneite’n hihhoih mahmah uh chih ding hi.
    Bangziakin igam ah natna tuamtuam hong kilang toutou ding hiam chih leng ngaihsut huai a, Pathian akipan hamsia hongtung hita hiam chih bang leng ngaihdan om thei mawk hi. Damtheihna kichi Pathian akipan hi a, damtheihlouhna kichi leng om theitham ahihdan i theih uh poimawh hi. Damtheihna lam(health care) tawh kisai in CCpur district ah hon panpih thei ding district hospital telin NGO tuamtuam tam petmah om a, huchi  kalah mahni kivenbit louhna ziaka natna thuak theih ding leng ahunkhop om hita hiam chih theihin om hi. A poimawh pen zaw mahni kikepbit hipen hi. CMO leh District Medical Suptd te’n ahun taka pan alak uh kipahhuai mahmah a, huai kawm in CCpur dist a Private School hunkhop in ‘health care’ tawh kisai ziaka school a khak uh kipahhuai sawnsawn hi. NCT Delhi a Dengue leh Swine flu /Bird flu leh natna hileng tuamtuam in mihingte bawh mawk hi. Huai kawm in natna hileng hia ahihkei leh thil lamdang pipi (abiktakin) naungek lak ah leng gen leh muh in om sek mawk hi.