MANIPUR EXPRESS | JULY 25, 2016

HEADLINES:
Vanman kiamna di’n Centre in local tax lakhe di’n ngen
New Delhi, July-24: Niteng nekding poimawhte man akiam theihna di’n state government chih in local tax alakte uh tawpsan ding in Central government in tuni’n ngen a, local tax ziakin  minautangte adi’n vanman tam hi’n puang hi. Essential commodity-te etkai poimawh ahihdan Union Department of Consumer Affairs in State 29 leh Union Territory 7 a  Chief Secretary-te kiangah gelhthawh in theisak a, vanman kiamsak theihna ding lampi omsun, state chih in local tax a kiamsak ding uh hi’n theisak hi.

    Agriculture Produce Market Committee Act zui a panla ding in Union Department of Consumer Affairs in theisak a, mizawng pen te’n alei zawh ding tan ua vanman bikhiah ding in ngen hi. State mipite haksatna dawn zangkhai ahihtheihna di’n Price Stabilization Fund Scheme  zang ding in nget hi a, nopbawlna hunbite ah black market etkai ding banah akheng-aval a nekding hihsiatnate beisak ding in ngen hi.
    Hem Pande, Secretary, Ministry of Consumer Affairs, Food and Public Distribution in state Chief Secretary-te kianga theihsakna apiak na ah lounasemte ngai poimawh masa ding in ngen a, amaute’n lou apan piangkhia, haichi tuamtuam zuak khiakna lam a haksatna aneihte uh enkai dingin theisak hi. Union Ministry in state-te kianga theihsakna abawlte sepsuah a om hiam chih enzui ding uh a, Essential Commodities Act and Prevention of Black Marketing leh Maintenance of  Supplies of  Essential Commodities Act tungtawn in India a state leh UT teng a essential commodity-te dinmun suizui ding uhi. State te’n khateng in report pe ding a theihsak ahihbanah Department of Consumer Affairs website ah Action Taken Report submit chiat ding in Hem Pande in theisak hi.


Jenny Jawnkhanhoih @ Jenny Thomte vaidawnna om ding
Lamka, July-24: Tribal Euphony -The Solo Hunt Manipur 2016 a Top 3 ngah Jenny Thomte d/o Damzamang Thomte of  Vengnuam, New Lamka vaidawnna, zingchiang (July 25) in Hmar Artistes’ Assn (HAA), Kuki Artistes’ Progress Union (KAPU) leh Zogam Artistes’ Assn (ZAA) makaih in om ding a, ngainatute kihel ding in chial hi uhi. Jenny Thomte in Imphal ah zan in Top 7 competition hun in 3na la a, Lamka pansan Artiste’ Assn 3 te’n kipahpihthu puang uhi. Vaidawnna hun a kihel dingte zingchiang zinglam dak 10:00 in Dorcas Hall, New Lamka ah kingakkhawm ding uh a, huai mun apan Kangvai ah thupitak in vaidawnna om ding chihthu kiza hi. Jenny Thomte in Hotel Imphal akipan Lamka hon zuan ding hi’n kigen hi. Tribal Euphony -The Solo Hunt Manipur 2016 ahihlehTingteila Production House (Chingmeirong) te’n Manipur singtangmite laka lasiampente telkhiakna dinga asai uh hi a, district tuamtuam akipan lasiam tamtak kihel uhi.
    Hiai kidemna ah 1st in kipahman in Rs. 2 lakhs sang a, tua banah audition a thawn in bawlsak hiding hi. Zan in MFDC Imphal mun ah final round nei ua, tua ah Shanchuiphy in khatna la in Rs. 2 lakhs sang a, nihna in Thantiwar Anal pang a, aman kipahman in Rs. 50,000/- sang a, thumna Jenny Jawnkhanhoih @ Thomte in Rs. 25,000/- sang hi. HAA, KUGA leh ZAA te’n a giahna uh Hotel Imphal ah July 25, 2016 zingkal in Jenny vala khe ding uh, huai akipan in Lamka hontun ding uh hidan in kigen hi.


LOCAL NEWS:
MDC te’n informal meeting nei ding
Lamka, July-24: Langkhanpau Guite, Chairman, ADC/CCpur makaih in ama’ office chamber ah MDC member te’n July 25, 2016 sunnung dak 1:00 in informal meeting nei ding uh a, ‘Dist. Council Day’ August 1, 2016 a zat dingdan kikum ding uhi. Tribal Martyr-te’ luang kivuikhiat nailouh ziak in Council Day leng social work program in zatsawm uh a, member tamzawte deihdan ahihleh khawpi sung a lampi siatna diak (pot hole) ah suanghum sung in social work sawm uhi.


CCpur Photographers’ Meet nei
Lamka, July-24: Zogam photography club leh Eimi photographer whatsapp group saina in tuni sunnung in Pearsonmun a Minlun Tonsing @ Dindin photography inn ah masapen dingin CCpur Photographers' meet om a, CT Lian Guite in special guest hihna tawh uap in photography tawh kisai  theihtuak tuamtuam omte gen in, maban ah panlak dingdan poimawh tuamtuam sinsak hi. Member paikhawm te'n self introduction leh limlak lunglut patdan gen uh a, mini workshop nei in, maban paiding dan kikumkhawm uhi. Hun lemchang masapen ah photo exhibition neih ding, town sunga kitenna (wedding) hun ah ni 1 in Rs. 5000/- lak ding in thupuk uhi.


Kargil Vijay Dewas Day zat hiding
Lamka, July-24: Ex-Servicemen League makaih in July 26, 2016 zinglam dak 10:00 in Hiangtam Lamk a YPA GHQ Hall ah Kargil Vijay Dewas Day zang ding uh a, Ex-Servicemen leh Widows (Army sisa-te’ zi-te) telding uhi.


Gutate’n Bolero Camper gumang
Lamka, July-24: Meltheihlouh kuate hiam in tuzing baihtak in Bethel Veng, New Lamka a om N. Dongkham’ compound sung a kikoih gari Bolero Camper (No. MN02B-3461) Chassis No. MA1RU4GHKG3A89007, Engine No.GHF4M69216 “Merina Kimkim” kichi Lamka leh Bukpi khua kikal a passener pua a taituah gumang uhi. Gari neitute’n Police ah report bawl uh a, Police te’n FIR No. 37 (7) 2016 CCP-PS U/S 380/34 IPC registered uhi.


Result suahlouh ziakin bandh bawl
Lamka, July-24: All Manipur Written Test Successful Candidates (AMWTSC) of Police Constable, Male 2013 batch pawlin July 23 zankim apan Manipur pumpi huap in total bandh abawl uh tu zankim in bei hi. Total bandh hunsung in dist highway teng khaktan uh a, passenger pua gari leh private gari-te’ taisaklou uhi. CCpur branch inleng total bandh nakta ka gum (support) in, Imphal-CCpur kawmtuah passenger leh private gari-te taisaklou uh a, bandh volunteer-te Kangvai telin tedim road dung ah duty in khawpi sunga gari taituahte khamkhawl in taisaklou uhi. Manipur Govt. in Police recruitment 2013 batch result July 20 in suaksak dingin chiam mahleh ahih buchinlouh banah recruitment thakte’ tuni a written test  neihsak ahih uh deihlouhna a bandh bawl uh hidan in makaite’ apan kiza hi.


ZSB in 35th annual fresher-cum-facilitation zang
Lamka, July-24: Zillai Shillong Block (ZSB) in zanin EFCI Centenary hall, Demthring  ah ‘the 35th Annual Fresher’s Meet cum Felicitation programme’ zang uh a, huai ah GK Chin Khaute, Financial Advisor, NEC & Adviser ZSB  in Zillai meisel hal (flame) hi. Kumdang banglou in tukum in chief guest telin guest dangdang samlou in fresher-te guest hihvek uh a, Upa HT Lianthang in Fresher-te a dingin thumsak hi. Rev. Lemngak, leh  Rev. H Paukhawkai te’n fresher-te adin hasotna thugen uh a, fresher’s register kibawl 28 val om in, programme hunsung in zilna lam a lawhchinna tuamtuam ngah mi 57 kiang ah kipahihna thilpiak pia uhi. Programme hunsung in C. Hoiniang, Eunice, Hatlalkim leh Kailallun Khaute te’n lasa uhi.


SYO/Gen Hqtrs leh SYO Town Unit-te kithuahkhawm
Lamka, July-24: Simveng a Simte Inn ah tuni sunnung in Simte Youth Orgn. (SYO)/GHQ makai-te leh SYO Town Area a Unit President leh Secy teng tawh kithuahkhawm uhi. L. Dongchinthang Prez.SYO/GHQ, Adviser-te leh Unit makai-te apat thugen ngaihkhiatna om a, maban ah SYO hatsemna ding kikumkhawm uh a, program zawh in nitak annkuang sawkkhawm uhi.


Saptuam bangzah hiamte’n Haithak zang
Lamka, July-24: Lamka leh aseh vela Suaptuam bangzah hiam te’n tuni’n Haithak program zang uh a, Saptuam mipi’n huan (kitchen) leh leipi ah mehding, thei gah leh mehgah chituamtuam biakinn ah thawh khawm uh a, Pastor in huai-te Pathian kiang ah thumna in lan hi. July kha Pathianni (Sunday) khat peuhpeuh in Haithak kizang zel a, ani (date) bikhiah omlou in Saptuam te’n amau lemchan hunhun in ani (date) bikhiah zel uhi.


IMPHAL NEWS:
Bandh in hindan nawngkaisak:
Security vengbitna in Written test om
Imphal, July-24: All Manipur Written Test Successful Candidate of Police Constable, Male 2013 (AMWTSCPCM) te’n state govt. ah Viva Voice recruitment results puang khiak ding phutna a zan nitak zankim apan dakkal 24 sung Manipur pumpi ah general strike a puang un
    Chandel district ah hindan nawngkaisak a, bandh supporter te’n Chandel DHQ gei a Liwachangning mun leh Imphal-Moreh lampi in a tawt khak Thamnapokpi gei ah sing, suangtum leh benches zang in lampi khak uh a, himahleh damlou pua gari, All India Pre Medical Test Exam gelh dingte leh emergency thil tawh kisai-te paisuak sak uh hi’n kigen hi. Imphal a Khurai leh Kakwa area, Thoubal district a Moijing area leh Senapati district ah bandh ziak in hindan nawngkai a, district dang-te ah bel bandh khauhlou a, Police te’n bandh tawh kisai in Lilong area ah volunteer 10 mankhia uh hi’n kigen hi.
    Huailou in Manipur Police Dept. a Constable (Male/Civil) lakna ding tawh kisai a PET a ching te’n tuni zinglam dak 11:00 in Khuman Lampak Main Stadium ah Imphal West District Police-te vengbitna nuai ah candidate 8,000 vel ding te’n written test gelh uh a, huai hun ah buaina omlou  a, bandh ziak in written test kipat ma zingsang dak 5:00 apan candidate hunkhop Khuman Lampak Main Stadium tungkhin uh hi’n leng kigen hi.


MU ah consultation meeting kipan
Imphal, July-24: National Research Centre (NRC), Manipur leh Manipur University a Dean Students Welfare-te saina in tuni’n Manipur University ah ni 5 sung om ding Inner Line Permit tawh kisai Consultation meeting om a, huai ah NEC a Secy. Gen, S. Sunil Kanta in a gendan in India ah Manipur laklut ahih akipan state tuamtuam akipan mi tamtak honglut in Manipur a economic, culture leh haksatna tuamtuam om a, huaiziak in political party-te kia hilou in mipite’n leng panlak ding dan genkhawm a lou theilou a poimawh hi’n gen hi. Huai a tel Minister lui R.V. Mingthing in singtang leh phaizang khen tuamlou a, hibang ngaihdan gen khawmna hun lemtang hoihtak ahi chi a, Kim Gangte, ex-MP in ILP kichi Meitei-te a ding kia ahi kei a, singtangmite kalhna leng hi tuanlou a, himahleh community lian mihing tamzaw te’n namdang khenkhat Manipur mi hilou dan a ngaihdan a neih uh thil dik hilou ahi chi’n gen hi. 


Godown bawlna nasep pan din ngen
Imphal, July-24: All Laiching Village Authority Action Committee (ALVAAC) te’n a kisaipih thuneite kiangah Laiching Khunman area a Chandel District FCI godown bawlna a nasep kinsak ding in phutna bawl uhi. Hiai thu tawh kisai a K. Modun Tonthang, Gen. Secy., ALVAAC in thusuah a bawlna ah Laiching Khunman ahihleh Chandel District a Machi Block sung a NH-39 apan km ½ (kim) a gamla hi a, lampi hoih ziak in district dang apan FCI foodgrain puaklutna dia mun lemtang hi’n gen hi. State govt. in huai mun ah godown bawl dia thupukna a bawl uh thil dik ahihziakin Chandel district a CSOs teng in kithuahpih ding leh govt. thupukna kalh dia JAC bawlkhiak louh ding banah akintheipen a godown bawl nang a nasep pan ding in ngetna bawl  uhi.


MLA gamtatdan poisakthu gen
Imphal, July-24: Imphal West a Lilong Nagar Panchayat Vice Chairperson Arambam Urmila in Manipur Press Club ah tuni a press conference hun ah local bodies te’n govt. nuai a development/construction nasep pailel om hiam chih thubuai a neih uh akisaipih thuneite’n enkai dia ngetna bawl hi’n gen uhi. Aman a genzelna ah Lilong Nagar Panchayat Councillor team leh Singjamei Police Station te’n tuni’n Langthabal A/C sung  etkhiakna a neih hun uah Nagar Panchayat theihpih louh in Lilong Chajing Mairelkhong Lampak ah construction work mukhia uh a, phalna tellou a nasepna pen Aganwadi Home dia K. Shyam, MLA theihpihna a kibawl hi a, Panchayat team te’n nasep a khawlsak dek hun uah K. Shyam kigolh hi’n gen hi. MLA in kampau kilawmlou a zat banah dan kalh a agamtatna vangsiat huai a, local bodies dan dungzui in construction nasep peuhmah a kisaipih local bodies te’n a theihpih ding uh ahi chi’n taklang hi.


Education (S) ah offer form laktheih
Imphal, July-24: Deputy Secretary (Education/S) in thusuah a bawlna ah Manipur Public Service Commission (MPSC) saina a Lecturers lakna ding tawh kisai in selected/recommended candidate te’n July 23-26, 2016 sung in Education (S) ah office hour sungin appointment tawh kisai offer form/memorandum la thei ding uh a, huai banah document poimawh teng Aug 1, 2016 tan a pelut lou te’n offer pomlou a ngaih hiding chi’n taklang hi.


Juvenile Justice tawh kisai  prog
Imphal, July-24: Social Welfare Dept., State Legal Services Authority leh Manipur Judical Academy-te saina in Manipur High Court Auditorium ah Juvenile Justice board, Child welfare committee leh Juvenile Police Unit banah legal cum provision officer-te adin ni 3 sung daih ding ‘Juvenile Justice’ tawh kisai in training programme tuni’n kipan a, Prof. Joydip Majumdar, Jayapraksh Institute of Social Changes in technical session hun ah mundang ah education piak ding suanlam a naupang puak khiak tungtang a ngaihdan gen a, naupang tamzaw-te dan kalh a nasep sak a om uh hi’n gen hi. Hiai hun R. Ranjan Prasad, Chief Justice, Manipur High Court, Justice Kh. Nobin, K. Moses, Principal Secy., Social Welfare leh mi tuamtuam in uap uhi.


Police-te kiangah non-local 83 pekhia
Imphal, July-24: JCILPS volunteer, Advance Women Society leh Awang Sekmai Protection te’n July 20, 2016 akipan state pawlam apan Manipur honglut Inter-state bus-te Sekmai ah spot verification drive sunzom zel uh a, tuni’n  document kichian tak neilou naupang 2 telin mi 83 hentang uh a, huai lakah mi tamzawte Bihar leh Uttar Pradesh apan hi uhi. Sekmai Police station ah mi 83-te pekhia uh a, July 20, 2016 apan tunitan in mi 353 vel ding police khutah pekhia uh hi’n kigen hi. Thangjam Amubi, Secy., Advance Women Society in media-te tawh kimuhna hun ah Imphal-Dimapur lampi tawn in Manipur honglut migrant worker te’n punlam a nawt ziak in state govt. in hiai tungtang etkai theihna dia a kintheipen a Manipur ah ILPS a zat  ngai chi’n gen hi.


TUNI THUPI:
“Ka mukte’n thu taklou a gen kei ding, ka lei in leng khemna thu agen kei ding.”
– Job 27:4


EDITORIAL:
Private interest maw, Public interest?
Ut hunhun a bandh chihmawk!
India i chih mipi’ vaihawmna gam chih kuamapeuh in i theichiat uhi. Huai kawm in zalentakin a ut-ut in bandh, blockade, total shutdown leh buaina tuamtuam hon bawlkhum phutphut  uh sek uh a lungzinhuai mahmah hi.Hibang ut hunhun hiam ut dandan a kiphinna bawl phutphut kichi  private interest maw ahihkei leh public interest chih kal omthei  hi. Ut hunhun a Manipur bandh chih mawk leng dik ding hiam chih lung himawh huai mahmah hi. Manipur state adia pau ninhuai leh zakchimtak huai mahmah ahihleh ‘Bandh/ Strike/ Blockade, Total shutdown’ chih kammalte ahi hi.
    A kuamah kawktuam hikei hang, himahleh ut hunhun a Manipur  ah bandh bawl phutphut pen hoih khollou maithei hi. India i chih chiangin sahkhua tawh kisai in lam tuamtuam ah zalenna thupitak om a, sahkhua  zalenna in zuilai hi. Kipahhuai chiphot ni. Ahih ziakin hibanga zalenna i neihpen uh bangchizat i hihiam chih ngaihsut kisam a,hamphatna zangkhial i hikha diam chih  bang leng ngaihtuahtham ching mahmah hi. Bangtan Manipur in Bandh tawh kisai a haksatna leh nawngkaina tuak lai ding i hihiam, bangtan ut hunhun a mipi buaisakte i kithuneih khumsak dia chihte pilvangtang a et vengveng hun ahi hi.
    Bandh kivaihawm khumsak chih tungtang  gen theih ding tampi a om ding a, bandh leh strike banah blockade tuamtuam bawlte  bangtan kithuzawhsak  sawm ihi dia le? Etsakna dingin kumlui Aug 31, 2015 in Manipur  assembly in amau tumta in Anti- Tribal bill 3 tawh kisai hong  passed khanglang uh a, tuaziakin a it-huai mahmah mi 9 te’n singtanggam leh mipi adin etna in a hinna uh pia uhi. Centre govt hi’n state govt in leng tunitan singtangmite issue lungtunhuai khopa pan alak tuanlouh ziakin Tribal martyr 9te a luang uh tutan vuikhiak theihlouh suak lai a, chik chianga vui hiding hiam chih ngaihsut bat hilou hi.
    Bandh i kibawlkhum dan uh i et vengveng chiangin privatise ‘bandh’ abatna ton om sek a, hibang paidan bangtan zuitou ding ihi uhiam? Inn haal culture ihita uhia le? chih ut huai phial hi. Huaiziak mah in kuapeuh in mipite hihbuai thei ding himhim in ‘chance’ la ngamta uh bang hi. Private interest maw ahihkeileh public interest chih kikal dotna liantak om thei hi. Ka ‘righsts’ alian e, zalenna thupitak ka nei chi mahlehang leng, India Constitution tunga  kuamah ki-om tuanlou hi. Total Shutdown/ Bandh/strike/blockade kichite mite’n a bawl chiang un ‘ felhuai’ takin bawl uh a, akisaipih  authority te’n  leng ‘chance’ pezel uh a, kihouna tungtawn in issue hunkhop hih  vaiveng zel uhi. Bangchidan in eilak ah issue tuamtuam tuni dong hih vaiveng a om thei nailou hiam chih dotna khauh mahmah ahi hi. Tua ziakin, bandh leh  strike ahihleh economic blockade banghiam a om dek chiangin issue base deuh hi henla, mipite hih buailouh teitei hileh chih deihhuai hi. Mimal hamphatna ding lel ngaihsutna ziaka bandh leh strike i bawl sek in bangzahta a eilawi hon buaisak  hiam chihte ngaihtuahhuai isa mahmah hi.
    Mipi lamte ipau ngamlouh ziak hia ahihkeileh bangziak ahi ding, i life-line neih sunsun uh Imphal-Dimapur lamlian leh Imphal-Jiribam lamlian hunteng in sukbuai in om veu sek a, bangtan hihbuai hilai ding hiam chih i theikei hi. Life-line dang neilou i hih phot chiangin mipite’n sialpi vuah thuak a ithuaktouh ngeungeu uh ngai mailou ding hia? I kim le kiangte’ khaw heidan leh  i gam dinmun kuapeuh in mat hun mahmahta a theih ahi a, hiai tanin mipite kibumhai lailai sak kei ni chi ut ihizaw hi.
    I state dinmun i etchiangin lung himawhhuai mahmah a, utdandan a bandh leh strike kibawlkhum zatzat in nek a piangsakna diam chih ngaihtuahtham ching hi. Tuaziakin, strike/blockade/ total shutdown leh adangdang kiphinna banah bandh i neih dek ngeingei leh issue piching leh midangte’ pompihpih theih hileh phatuam mahmah dingin ngaihsut theih in om hi.
    Zalengam gam chikhat Manipur state ah i teng a, India ukkhumna nuai ah om mahle hang, i zalenna(rights) te uh zatkhelh ding lauhuai mahmah hi. I innkuan sungah, i khawtang (society), saptuam sungah leh politics thil ah i zalennate uh i zatkhelh ngeingei leh ki baibulik tun ding hihang.