MANIPUR EXPRESS | JULY 26, 2016

HEADLINES:
AN-32 tuahsia atel H. Ginzasiam tanchin theih hinailou
Lamka, July-25:  Indian Air Force AN-32 lenna July 22, 2016 in Bay of Bengal tuipi tungzawn a leng lai a tanchin theihlouh a a om  tunitan in theihchet  hilou a, Army, Navy leh Air Force te’n zonglai uhi. Huai AN-32 lenna in  Andaman & Nicobar Island a Port Blair zuan hi a, July 22, 2016 zing dak 8:30 in Chennai Air Base akipankhia , hun bangtanhiam a len nungin Bay of Bengal tuipi tungzawn ah thuzak theihlouh in mang hi’n kigen hi. Lenna sungah  mi 29 (Air Force personnel 11, civilian 8, Navy 1, Coast Guard 1 leh Army personnel 1) tuang uh hi’n kigen a, huailak ah Manipur  akipan   H. Ginzasiam (Army No. 4381505-L)  (21) s/o H. Tualkhanlian & Achung of  Dorcas Veng, New Lamka telkha hi.

A innkuante’ gendan in Aug 2013 in Indian Army (15-Assam Regt- Coy ‘B’) ah  lut a, Jammu & Kashmir ah kum 3 vel a om nungin Andaman & Nicobar a posting ding chih ziakin May 2016 khatawp lam in ni 50 sung suty la in inn hongpha a, July 16, 2016 in a posting-na ding paisawm in Chennai ah ki-report hi’n gen uhi. A unit kibatpih innlam a suty omte tawh Ginzasiam tungtang kithuzak zel uh a, a zonna pailel ahihdan thu tun uhi. Thiltung tawh kisai in Manipur Express staff  te’n tuni’n anu’ leh apa’ houlimpih uh a, Ginzasiam’ pa  in ‘tunitan ni 4 chingta mahleh ginna tawh a tapa dam a muhkik kilam-en in si ding a koihthei nailou hidan in gen a, anu’n bel dam a muhkik lam-en nawnlou hi’n gen hi. H. Tualkhanlian in tulel in 6th IRB ah sem a, a tapa H. Ginzasiam bel ata pasal 4te lak a 3na hi’n gen hi.


Member 9 omna Committee in thiltung suizui ding
Parliament a video latu AAP MP Bhagwant nawhkhia
New Delhi, July-25: Parliament Videographer chia minvuah a om Bhagwant Mann kiangah Lok Sabha Speaker Sumitra Mahajan in Monsoon Session a kihel nawnlou dia theisak kawm in  tuni’n nawhkhia hi. Speaker in mi 9 omna Committee khat phutkhia in, Bhagwant gamtatdan suizuina makaih di’n BJP’ Kirit Somaiya guang a, amaute’n August 3, 2016 tan a report apiakma uh Bhagwant in Monsoon Session uap thei nawnlou dingin gakna bawl hi. Lok Sabha speaker in Bhagwant Mann kiangah zingchiang zinglam dak 10:30 tan in thil omdan hilhchetna bawl ding in leng theisak hi.
    Lok Sabha Speaker in Bhagwant Mann tawh kisai thupuan khauhtak abawl ziakin, BJP, Congress leh Akalis te’n Punjab mipite Aw ngaikhe nuamlou in, 2017 Punjab assembly election a AAP minsiat theihna ding zong uh hi’n Bhagwant Mann in tuni’n ngawhna bawl zui ngal hi. Facebook a Parliament sung-le-pua a khahkhiak ngaihdam ngen mahleh, AAP adia melma party dang-te thuvekdan apan Video tawh kisai vuak hilou ahihdan chiang mahmah chi hi. Punjab a Sangrur bial MP, Bhagwant Mann in Parliament kong a journalist-te akimuhpihna ah Speaker thupukna pom ding hi’n gen a, August 3 tan Parliament session uap theilou dia gakna a tuahte pawna mahmah hi’n gen hi. Punjab mipite’n amah tungtawn a Parliament a issue tuamtuam a tangkoupih ut te uh vuaksuak ding hi’n leng Bhagwant in gen a, Monsoon Session a kihel theihlouh ding pen, MP khat in tanvou leh dikna aneihte bawhsiatna vuak hilou in, Punjab mipi lakh tampite dikna lakmangsak a om hi’n gen hi.
    Bhagwant Man in minute 12 a sau Video a khahkhiak ah, parliament a security barricade leh gate munte dawk a, security dinmun dengdel sak chih ziakin political party teng in mawhpaih in gawtna piak ding deih uhi. Social Media a video akhahkhiak ziaka buaina om nung in Bhagwant in delete nawn hi’n kigen hi. Video tungtang AAP MP in agenna ah, abial mipite’n Parliament mu ngeilou in question kibawldan leng theilou uh chi a, mimawl tampite adia navakna tungsak dia video khahkhia hizaw hi’n gen hi. Tuni a Speaker thupuan in amah vuak khoihkha lou in, AAP hihniam ut ziak hi’n Bhagwant in ngawh a, Modi government policy kalhtute ahihman un tuabang a bawlsiatna thuak hi’n gen hi. Kumnawn Punjab assembly election ah AAP in majority ngah ding uh ahihdan Modi government in a theihchet luat ziaka patau in Parliament ah tanvou aneihte lakmangsak uh hi’n leng Bhagwant in ngawhna bawl hi.


LOCAL NEWS:
MDC te’n informal meeting nei
Lamka, July-25: Langkhanpau Guite, Chairman, ADC/CCpur officer chamber ah tuni in MDC member te’n informal meeting nei  uhi. Huai h Aug 1, 2016 a  ‘Council Day’ zat ding tawh kisai telin thu tuamtuam genkhawm uh a, thupukna bangzah hiam bawl uhi.
    Dist. Hospital a morgue ah Tribal Martyr  9 te’ luang a omlai ziakin kumdang banglou in  Council Day  thupitak a zatlouh ding, victims family-te tawh morgue ah hun zat ding, ADC/CCpur complex banah Bungmual ah singnou suan ding in thupuk uhi. Huaiban ah Dist Council/ CCpur in nominate mi 2-M. Chungpa Kom s/o (late) M. Thangloson Kom of  K.K. Haotak village leh Holkhojang s/o (late) Limlhun of D. Phailian laklut ding tawh kisai official order mu nailou uh hi’n kigen hi.


Joint Artist Assn. in vaidawn
Lamka, July-25: Chingmeirong (Imphal) a Tingteila Production House in 'Tribal Euphony- The Solo Hunt' Manipur Session-1, 2016  a sai uh July 23, 2016 in Manipur Film Dev. Corpn (MFDC) hall ah grand finale om a, huai ah 3na apang Jenny Zawnkhanhoih Thomte d/o (late) Damzamang Thomte of  Vengnuam, New Lamka tuni’n Kangvai ah Joint Artist Assn- Hmar Artistes' Assn. (HAA), Kuki Artistes'  Progressive Union (KAPU) leh Zogam Artistes' Assn. (ZAA) makaih in vaidawnna om a, a tenna inn uah kikhopna neihpih uhi. Huai hun ah HAA, KUGAA, ZAA makaite banah Gouzamang Guite, EM/ADC CCpur, CT Lian Guite, MDC leh YPA GHQ makaite tel uh a, kipahpihna thilpiak ban ah hasotna thugen uhi. Jenny in Pathian leh Joint Artist Assn-te ziaka hiai tan tungthei ahihman in kipahthu gen hi.


EM in Cemetery store room hong
Lamka, July-25: Thangkhosuanmung Guite, EM/ADC in tuzing in HQ Veng Cemetery store room hong a, Upa Kamkholam in Pathian kiang ah thumna in lan hi. EM/ADC in agenna ah sihna  kichi miteng tuah ding hi a,  phatuam ngaitaka panla hanmual committee member-te pahtakthu gen hi. Cemetery store room tungtawna khawsung mipi’n sihna, manna atuah hun ua phatuamtak  a zat uh deihsakthu gen hi. Thangkhosuanmung Guite in Store room bawlna ding a langva bundle 7 apiak ziak in Cemetery Board ten kipahthu gen uhi.


Claim proposal submit lou
Lamka, July-25: MGNREGS 2016-17 a khua/veng tuamtuam te’n Job Card nasepna ding in SDO/BDO tungtawn in claim proposal submit ngai a, SDO/BDO te’n DC office a DRDA ah claim proposal a submit nailouh ziak un block 10 a Job card nasepna ding DRDA te’n sanction theilou uhi. MGNREGS nasepna ah document poimawh tamtak Central govt ah submit zel ngai a, sum om mahleh khua/veng ah nasepna ding claim proposal omlou in Job card  nasepna ding leh material cost ading sum sanction theihlouh hi’n  kiza hi.


26-A/R te’n galvan tawh mi 3 man
Lamka, July-25: Police apan kizadan in Singngat a 26-Assam Rifles te’n thuguk  azak  dungzui un Singngat sub-divn  a Tangpijol-Likhai khua kikal ah July 23, 2016 nitak dak 8:05 velin meihol pua gari (MN02B-1580) a check ua leh meihol bag sung apan galvan hunkhop mukhia uh a, mi 3 mankhia uhi. Mat a omte- Enkhanmang (46) s/o (late) Thanghuatkam of Nghathal; KL Muan (23) s/o Enkhanmang of Nghathal leh Hauvanglian (26) s/o Khanpau of  Vengnuam, New Lamka hi uhi. Army te’n galvan a mat-te  uh 5.56MM Auto MA-2 MK-II khat, 5.56MM MA-3 MK-II  nih; 5.56MM magazine khat; 5.56MM magazine ( round 20 capacity) magazine khat leh  5.56MM (30 round capacity) magazine 4 hi a, 26-A/R te’n Singngat Police Station ah galvante leh mi 3 pekhia uh chihthu om hi.  CJM court  in July 28, 2016 tan Police custody a om ding in phalsak a, Singngat Police te’n FIR No. 4 (7) 2016 SGT-PS U/S 25 (1-C) A. Act registered uhi.


Degree leh HSE topper-te kipahpihna
Lamka, July-25: Rayburn Chapel, New Lamka ah July 26, 2016 sun dak 12:00 in Degree & HSE Toppers 2016 te kipahpihna  om ding a, Langkhanpau Guite, Governing Board Chairman in uap ding a, Khual Tonsing, Dean of Exam makaih in awards hawmkhiak hiding hi. Rev Dr TK Muana, Governing Board Member in hasotna  thu gen ding a, Rev Khen P. Tombing, Principal, Rayburn College in  Topper Student-te’ ading in Pathian kiangah thumsak ding hi. MU degree Rank holder-te leh class XII a  stream topper 2016 te- Jangkholam,1st position, B.Com (Hons); Wellborn Ginkhankhual, 4th position, BA (Hons) History; Lunmalsawm, 5th position, BA (Hons) Political Science; Chiinngaihmawi, 10th Position BA (Hons) History; Neihlianching, 10th Position BA (Hons) English; Chinggoulun Buansing (XII Arts-85.4%); Doudikthang (XII Science-80.4%) leh Ginsuankhup Tonsing (XII Commerce -66.8%) hi uhi.1st position Jangkholam in kipahman Rs.10,000/- ngah ding a, adangten Rs. 5000/- chiat ngah ding uhi.


HSA State CorCom leh Jt HQ in ITI enkhia
Lamka, July-25: Hmar Students’ Assn. State Co-ord Comm, Manipur leh HSA CCpur Jt HQ makaite’n tuni’n Saikawt ITI a student examte enkhia uh a, Y. Achouba, Singh, Supdt. Saikawt ITI leng kimuhpih uhi. HSA makaite’n ITI Saikawt masawnna ding telin thil tamtak genpih uh a, building thak kizang naikei mahleh sedek phiala om poisakthu gen uh a, ITI Saikawt masawnna dinga HSA in kithuahpih zel ding hi’n theisak uhi. Y. Achouba Singh in govt. in building leh thil dang deihbang in  bawl zoulou a, staff quarter omlouh ziakin staff te’ galkai uh a, maban ah computer, hair & skin training koihsawm hi’n HSA makaite theisak hi.


Thousilen zanglou tamtak om- DMO 
Lamka, July-25: Dr. Liankhawjam Guite, Dist. Malaria Officer/ CCpur  makaih in Singngat PHC, Sinzawl PHC leh Thanlon PHC bialsung a khaw tuamtuam ah malaria deptt te’n thousilen, Long Lasting Insecticide Nets (LLINs) a hawmkhiat uh thousilen ngahte’n zang mah uh hiam chih enkhia in July 21, 2016 in Lamka apan zinkhia  July 23 in hongtung uhi. DMO leh staff te’n Guite road zui in Taipaimukh road ah hongkik uh a, thousilen kihawmkhia tamtakin zanglou uh a, thousilen zangchiat ding in theisak  uh hi’n gen uhi.


DFO saina in nga-khawite sinsakna
Lamka, July-25: Dist. Fishery Officer/ CCpur saina in July 27 tan daih ding “3-days Training Program on Aquaculture” sinsakna tuni’n kipan hi. Chief Guest in S. Kulla Mangang, Adviser Fish Farmer Assn/CCpur pang a, Functional President in S. Umananda Singh, Dist. Fishery Officer/CCpur pang hi. Huai ah ngavulhna pukhri bawl fish farmers tuamtuam tel uhi.
    Chief Guest in CCpur dist ah farm bawl hileh nek-le-tak thil tuamtuam ah dist. kitoudelh zou ding a, training a telte’n chitak leh lunglutna tawh gahsuah  ding a panla dingin hasuan hi. Training ah mi 32 vel tel uh a, fishery officer in theory class neih pih a, July 26 & 27 in Thanga  Fish Farm, Bishnupur Dist ah practical nei ding uhi. Practical ah Imphal apan Fishery deptt a resource person te’n nga khoidan sinsak ding uh a, huai ah fish injection leh fish egg collection tawh kisai sinsak ding uhi. National Fisheries Dev Board, Hyderabad sponsor-na in Manipur a dist. tengah training om hi’n kigen hi.


AMTWTSCPC Male 2013 batch te’n kipahthu gen
Lamka, July-25: All Manipur Written Test Successful Candidate of Police Constable Male 2013 Batch te’n state govt. tungah kiphinna a neih hun ua kithuahpihna pia student leh pawl tuamtuamte tungah kipahthu gen uhi.


SUUNNA:
Pastor Lal Daniel Haokip @ MV Lal Damiel (54) s/o Thongngam Haokip of Molnom zan nitaklam dak 4:30 velin kalna & BP ziakin si a, tuni’n kivui hi. Aman Kuki Nampi Taona (KNT) Chairman term 4 sung len hi.


IMPHAL NEWS:
Manpiur ah JE natna vei 12 om, 1 si
Imphal, July-25: Manipur ah tulel in Japanese Encephalitis (JE) vei mi 12-te RIMS, JNIMS, Shija leh Dr. Ratan’s Mother Care Children Hospital and Research Centre-te ah etkol a om uh hi’n kigen a, JE natna vei 1 si hi. Misi ahihleh Imphal East a Changamdabi village apan naupang numei kum 4 vel hi a, a nu-leh-pa in dawi (demonic possession) mat dia a gintak ziak un maibi/maiba-te enkolsak uh a, JNIMS hospital a puaklut nung uh sawtlou a preliminary test tungtawn a JE natna ahihdan chet himahleh a blood sample test lel uh hi’n JNIMS official te’n gen uhi. JE natna vei dia gintak mi 2-te result negative  a, JE natna vei 12 lakah Guwahati ah etkol dia mi 1 puakkhiak in om a, Manipur ah JE test na dia lab nei omsun JNIMS hospital hi’n gen uhi. Imphal West apan JE a damlou 3 om a, Thoubal, Imphal East leh CCpur ah damlou 2 chiat om a, Senapati, Chandel leh Ukhurl ah leng 1 chiat om hi’n gen uhi.


Tadubi ah menchim om : pitek 1 suakta
Imphal, July-25: Sadar Hills telin Senapati district ah ni bangzahhiam paisa apan vuah a chiin  ziakin hindan nawngkai a, niteng a nektawm zong, student leh office kai te’n buaina tuak uh hi’n kigen hi. Kangpokpi leh Senapati DHQ a mun niamna munte ah tuilian a, NH-2 lampi mun tamzaw ah tuichim ziak in lampi kuakna munte pelhna din buaihuai petmah hi’n gen uhi. Tadubi town a NH-2 in a tawtkhak mualpang a menchim in stall 6 hihsia a, huai stall neitu L. Henia of Tadubi in innkuan 4 luahsak a, nga, aksa leh grocery van tuamtuam zuak uhi. Menchim om hun in stall 1 ngak a om S. Koshuni (81) suakta a, liam mahleh a liamna thupi vaklou a gen in om a, menchim nung a stall 6 te’n ahihleh meh zuak sunzom nawn pah uh hi’n kigen hi. Kangpokpi mun ah khawtual te’n Imphal River pen Gundung River chi uh a, vuahzuk ziak a lui khang hi’n leng gen uhi.


Van driver pimangna a ginglelte mankhia
Galvan hunkhop leng mukhia
Imphal, July-25: Imphal West SP office ah tuni’n press conference om a, huai ah AK Jhaljit , SP/Imphal West in Van driver L. Toto Singh, hawker Y. Kenedy banah Van (No. MN-04A-0755) pimang na tawh kisai in Imphal West Police Commando te’n July 23, 2016 ni in NSCN (IM) a self styled lieutenant Dangshankwas Leidong (39) s/o Dk Anglourung of Khudei Khullen tulel a Wangsangram village, Chandel a om leh a sungpa (father-in-law) Molung Leidunshim Maring (42) of Sandang Shenba Village, Senapati district-te man uh a, Leidong in amah thupiakna in a nuai a te’n Imphal-Moreh lampi a van taite, mipi leh businessmen-te apan thagum in sum khon uh a, NSCN(IM)-te min a van driver leh hawker-te pimang in khahkhiak na dia sum hunkhop la hi’n kipuang hi. Police te’n Leidong tenna inn a luhna uah mobile handset 1, driving license 1, Aadhar card 1, sumtang Rs. 40,000, .32 pistol 1 leh tang 3, M16 tang 2, .303 rifle tang 2, AK tang 3 leh Honda Activa 1 mukhia uh a, van gari banah pimang a omte tatkhiakna dia sum a lak uh Rs. 46,000 leng muhkik in om hi.


TA & H Dept. ni 10 sung hunpia
Imphal, July-25: Tribal Affairs & Hills Dept. te’n New Delhi a Ministry of Tribal Affairs apan fund tuamtuam ki sanction-te tawh kisai in ni 10 sung a hilhchetna  ‘white paper’ luikhe ding in KNF (Nehlun) te’n vau uh hi’n kigen hi. Th. Baite @ Gogou Vaiphei, Secy., Info. & Pub., KNF (Nehlun) in a kum a sim Tribal Affairs & Hills Dept.-te nasep etkhiak ahihnung in Official khenkhatte’n singtangmite adia fund pai-te zang thelthang uh chih muhkhiak hi a, KNF (N) investigation team in DDO, EE Engineering Cell leh Jt. Director & OSD (retired) Binodini te’n Ministry of Tribal Affairs apan I.V.R., Animal Husbandry, Medical, Agriculture, Housing, Scholarship banah scheme tuamtuam tawh kisai in KNF(N)-te GHQ Daitwi Base Camp ah ni 10 sung a ‘white paper’ a luikhiak ding uh chi a, huai ahihkeileh Official te’n department a nutsiak ding uh ahihkeileh a tung uah action lak hiding in gen hi. KNF(N) te’n a kisaipih department a thunei sangzaw te’n Officer-te tungah action a lak kei ua leh amau leng hawi hituan lou ding hi’n taklang hi.


Jewel of India Awards sang
Imphal, July-25: New Delhi a Krishna Menon Bhavan a National Seminar on ‘Education & Socio-Economic Development’ hun ah Tamil Nadu Governor lui Bishmanarayan Singh in Council of Scheduled Caste-Scheduled Tribe Advancement (CSSA) lam ah Yanglet Haokip nasep hoih theihpihna in Indian Solidarity Council (ISC) apan Jewel of India Award pia uhi. Award ahihleh certificate of Excellence, Gold Medal leh Memento tawh paikhawm a, Yanglet Haokip in CSSA Pallel a Chief Executive Officer dinmun len hi.


TUNI THUPI:
 “Aw Toupa, na hotdamna ka ngak gige hi.” – Genesis 49:18


EDITORIAL:
India adia vualzawhna ni:
Kargil Vijay Diwas
India sepaihte’ adia hun poimawh mahmah ahihleh, July 26  ahi hi. Bangziaka hiai Ni Indian Army-te adia hichi poimawh ahihiam chih enzui lehang ut-huai hi. Amasa in India leh Pakistan Army-te gamgi kituhin kumteng gentaklouh hunteng phialin akal uh buai a, buai deuhdeuh theilai dinmun ah om hi. Phalbi hunchiang ngialin Pakistan Army-te’ tawsawn helpawl tuamtuam khawvot leh vuk khal omlai hunlem a zangin agukin India gamgi lam a hong kinawn in India gam ah buaina bawlsawm in honglut sek uhi.
    Kargil Vijay Diwas kichi ahihleh, India leh Pakistan gamgi zula ni 60 vingveng kikaptuahna om nunga India sepaihte’ vualzawhna genna hi a, huai operation code min  ‘Operation Vijay’ chihin om hi. Mual-le- guam sangtak omna mun ah kha 2 sung kikaptuahna a om nungin India sepaihte  vualzou uh a, tua ziakin July 26, 1999 akipan tuni dong Kargil Vijay Diwas min zangin kumteng in a lopna om hi. Kargil kichi Pakistan tawh gamjul a om Jammu & Kashmir state a Ladakh district a om hi a, khaw votna mahmah mun hi a, a tuk akhal chih omlou in vukkhal den hisim mai hi. Kum 1999 kumin gamgi zul (Line of Control) ah India sepaihte leh Pakistan sepaihte banah Pakistan ISI-te’ tawsawnte tawh kikaptuahna thupitak om a,  Pakistan lamte aguk a honglut in India sepaihte’omna  mun out post khenkhat luahzou mahle uh Naga Regiment, Gorkha Regiment leh sepaih hangsan tuamtuamte’  hangsantak a pangin  huai post-te India sepaihte’n luahkik thei nawn uhi. Thagum a India gam leh leitang bangtanhiam hong luahman (Pakistani intruders) te tamtak sih uh a, India sepaihte  leng ahunkhop si uhi. Huai Kargil galpi (war) pe’n India hi’n Pakistan khangthu ah amang nawnkei ding chihtheih hi. India adingin huaini pen Victory Day thupitak leng ahi hi.
    Ni 60 sung  kidouna leh sisan kisuahna a om nungin July 26, 1999 in India  vualzou a, Pakistan tawh kidouna a si  India sepaih hangsante’ min leng  New Delhi a India Gate ah gelh in om a, President, Prime Minister leh mi poimawh tuamtuamte’n kum tengin zahna pezel uhi. July 26, 2016(Tuesday)  in leng India gate a Amar Jawan Jyoti mun ah zahna thupitak piakin a om ngei ding chih a chiangsa ahi hi.
    Hun paisa  enkik zual lehang, kum 1971 in Indo-Pakistani War thupitak  om a, huai ma akipan leh huai nung  tuni dongin kigamgi helhel gamnih kalah ‘issue’ tuamtuam ziakin kitheihsiamna om zekzek mahleh buaina thupilua hiam kidouna taktak om nawn taktaklou hi’n kilang hi. Gamnih makaite’n mite’ theihin kilemna chi tuamtuam bawl mahle uh a guk takin kituahna taktak bel om dingin gintak-huailou a, kilemna (agreement) a bawl tamzawh peuh ualeh gamgi bulah kikaptuahna hiam ahihkeileh mun tuamtuam ah bomb puak hizaw bangin ngaihsut theih hi. Foreign Minister-te hiam ahihkeileh Union External Affairs Secretary-te MoU a bawlni  tata bang un gamnihte ah bomb puak utse hi’n kilang hi.
    Mun poimawh mahmah Kargil ah Manipur mi sepaih hangsan bangzahhiam in sihlawh khinta uh hidia gintak ahi hi. Siachen leh Kargil a vuktolh ziakin leng sepaih hunkhop vuklumta a, Pakistan apan India honglut helpawl/ Pakistani army-te tawh kituahna ziakin leng asi i om thamta ua, Lamka mite’n India khua- le-tui humbitna dingin leng panlakna (contribution) thupitak  nei chih haihvual hilou hi. A zauzaw deuh gen lehang, zanzek mahmah in Maoists-te tawh kikaptuahna ziakin Manipur state mi CRPF jawan khat si a, thil omdan en vengveng lehang, India gam  humbitna dingin Manipur phaizangmite’ leh singtangmite asi a hunkhop a omta chih gensau ngailou a chiangsa ahi hi. Hiai Kargil tungthu ah phattham ching leh chiamteh tham ching (credit piaktak) ahihleh Naga regiment leh Gorkha regiment-te ahi chi uhi.
    Hibangkalah thudang khat gen lehang, huihkhua a feet 23,000 asang a leng Indian Air Force-te’ lenna AN-32 khat zanzek in Tamil Nadu khawpi Chennai a kipankhia  in Port Blair zuanlai Bay of Bengal tuipi tung ah mangthang a, a omna theihlouh in zon hilai  chih ahi hi. Huai ah Lamka mi it-huai leh a pammaih mahmah tuailai feltak khat leng telkha chih  hi. A selam kipezual lehang a tuanna uh lenna tawh  tuipi kawm a tumsuk  leng ahithei a, mitsin na khat atuah zenzen ua leh a innkuanpihte uh nakpitakin i sunpih  uhi. India khua-le-tui adia pasal hangsan hibang mun poimawh a duty kha ahihkeileh panmun (position) hoihtak lenkha pe’n  zahtakhuai mahmah suak hi. Central Govt in a zahtak dinga, state govt in leng zahna liantak apiak gintak-huai a, mipite’n ‘pasal hangsan’ zahna ape sawnlai ding hi. Bangteng hileh i it in i ngai mahmah ua, damtaka muhkhiak ahih uh ikinem lai hi.