MANIPUR EXPRESS | JULY 29, 2016

HEADLINES:
Aadhar neiloute tawh kisai in Rajya Sabha tutkhawmna buai
New Delhi, July-28: India gamsungmi Aadhar card neiloute kianga government akipan subsidy khawlsak tungtang ah tuni’n opposition party te’n Rajya Sabha hihbuai uhi. Rajya Sabha tutkhawmna ah TMC, Left, SP, BSP leh Congress telin opposition party te’n Aadhar Card tawh kisai tangkoupih uh a, tunitan in India khua-le-tui hihna neite lakah tamtakin Aadhar card aneihlouh ziakun government akipan subsidy mulou hi’n gen uhi. Aadhar card thubuai tungtang central government in akintheilam a enkai ding inleng TMC leh SP in ngen uhi. Opposition pawlin Aadhar tungtang lungkimlouh langsak in Rajya Sabha ah tuni’n slogan tuamtuam sam uhi.

    Aadhar tawh kisai in opposition pawlin dotna tuamtuam bawlte uh Venkaiah Naidu (Union Minister of Urban Development, Housing and Urban Poverty Alleviation & Parliamentary Affairs) in hilhchetna pia in, aadhar card tungtang khawlsan hilou ahihdan gen hi. Aadhar card neiloute adi’n nasep pailel lai chi a, tunung in India mite adi’n poimawh mahmah ding ahihman in UID (Aadhar) card neiloute kiangah leng subsidy tawh kisai hamphatna piak poimawh ding chi hi. Mizawng leh gentheite kianga subsidy beisak a om chi in Opposition party te’n ruling party mawhsa uh a, UID card neiloute leng panpih a nekding pe di’n slogan sam uhi. Huai tungtang ah tuni’n Rajya Sabha khawlsak in om hi.
    Rajya Sabha ah tuni’n Compensatory Afforestation Fund Bill, 2016  pomna bawl in om a, huai tungtawn in state te’n afforestation tawh kisai in Rs. 42,000 crore ngah thei ding uhi. Afforestation Fund Bill zat hun in state leh central government in enkai khawm ding uh a, singnou-suan tungtang leh gammang (forest) humbitna ding banah sing-le-lou kepbitna dia vanzat kaihkhawmna di’n Afforestation Fund zat hiding hi. Huailou in Lok Sabha ah zan a passed a om Lokpal and Lokayukta Amendment Bill 2016 tuni’n Rajya Sabha ah pomkipna (approval) bawl uhi. Lokpal and Lokayukta Amendment Bill 2016 tungtawn in public servant te’n ni 30 sunga gouneih apuanzak ding uh tawh kisai, hunchiam kibawlte lakkhiak hi a, government in asset puankhiak theih hun ding abikhiah dan-dan zuih hita ding hi.


LOCAL NEWS:
Director makaih in enkhia
Lamka, July-28: Dr .O. Ibomcha Singh, Director Health Services makaih in Imphal apan Dr. H. Ranjit, Addl Director; Dr. P. Shyam Sunder Singh, Adl. Director, Dr. Shashi Kumar, Addl Director; Dr. Gojendra, SNO (Medicine); Dr. Nanda Kishore, SNO (Immunisation) leh  Rajiv, SPN/NHM te’n tuni’n Lamka hongpha uh a, Dist. Hospital ah tulai a JE dalna leh Viral Fever virus tawh kisai damloute enkhia uhi. Director leh anungzui te’n Med Supdt. office chamber ah CMO telin Doctor-te kimuhpih uh a, maban a panlak dingdan kikum uhi. Mass vaccination alou theilou ahihdan Director in gen a, state govt ah thil omdan report bawl ding uh hi’n CMO leh a teamte theisak uhi.


DC in MDC thak 2 kichiamsak
Lamka, July-28: ADC/CCpur  ah tuni nitaklam in Manipur govt. in ADC/CCpur a MDC dinga nominate member 2 a guan- M. Chungpa Kom s/o (L) M. Thangloson Kom of KK Haotak Village, CCpur leh Holkhojang s/o (L) Limlhun of D. Phailien, CCpur-te Lunminthang Haokip, IAS DC/CCpur in kichiamsak hi. Programme ah CEO/ADCC in Manipur Gazette order simkhia in, member thakte Langkhanpau Guite, Chairman, ADC/ CCpur in MDC dia laklut ahihdan uh puangkhia in thumsak a, MDC dangte’n kipahpih etsakna in thilpiak tuamtuam pia uhi. Huai hun ah EM/MDC tamzaw leh member thak 2-te innkuante leh ngainatu tamtak tel uhi.


JE dalna damdawi kikap mi tam
Lamka, July-28: DFWO/CCpur, Med Suptd/Dist. Hospital leh Dist Immunisation Staff-te panlakna in DIO office leh Hospital campus a counter 2 ah JE dalna damdawi kap (injection) in om a, mipi tamluat ziak in VDF leh Police-te duty uhi. JE dalna damdawi vials 2150 tuni’n zatbei in om a, mi 10245 kikap uhi. Damdawi bei ziakin July 29, 2016 in DIO staff te’n Imphal ah lanawn ding uh a, sunnung dak 1:00 in DIO office leh Dist. Hospital campus ah JE dalna kikap theihnawn ding hi.


Court in mi 2 pawtsak, mi 1 jail ah
Lamka, July-28: Singngat Police te’n tuni’n Tuibong a CJM court ah Enkhanmang (46) s/o (late) Thanghuatkam of  Nghathal; Kamlalmuan @ KL Muan (23) s/o Enkhanmang of  Nghathal leh Hauvanglian (26) s/o Khanpau of Vengnuam, New Lamka pawkhia uh a, court thupiak bang in Police te’n Jail ah Kamlalmuan koih uh a, midang 2 te bel court in bail in pawtkhe sak hi. Mi 3 te bel Singngat post a om 26-Assam rifles te’n July 23, 2016 nitak dak 8:05 velin meihol pua gari (MN02B-1580) apan galvan 3 tawh amat uh hi a, Singngat Police te’n FIR No. 4 (7) 2016 SGT-PS U/S 25 (1-C) A.Act registered uhi.


Chairman, ADC/CCpur’ gari ding lan
Lamka, July-28: ADC/CCpur in Chairman zatding gari (Scorpio) a lakthak uh latna tuni’n Council Office ah om  a, CEO ADC/CCpur in Pastor Kamzamuan Guite, Local Pastor EBCC/Delhi khut ah gari chabi pekhia a Pastor in lan (dedicate) hi. Langkhanpau Guite, Chairman, ADC/CCpur in agenna ah gari ahihleh term beisa (2010) a Dist Council member te'n thupukna alak dungzui ua constituency fund leh office expense tuamtuam zanga kilei hidan in gen hi.


DC makaih in DLCC meeting om
Lamka, July-28: DC/CCpur makaih in tuni sunnung in Dist. Level Coordination Commmittee (DLCC) meeting om a, Aug 15, 2016 Indian Independence Day lop ding dan kikum uhi. Tukum in Tuibong Peace Ground ah Independence Day 2016 lop ding in thupuk uh a, DRDA te’n main gate bawl ding uh a, CMO/NHM te’n Police Station kiang ah welcome gate, Dist. Council te’n Tuibong Forest gate leh PWD & PMGSY te’n Khawmawi ah welcome gate bawl ding uhi. Meeting ah CMO/CCpur in tulai a Lamka leh akim a JE natna leh Viral Fever virus tawh kisai Deptt. panlakdan report pia hi.


KSO/CCpur te’n Press-te kimuhpih
Lamka, July-28: KSO/CCpur te'n tuni sunnung in Sumkong Kaimun a KSO Information Centre ah Press-te kimuhpih uh a, DC/CCpur office a Dist Information Officer Ganeshore  kha 2 sung office a kailouh ziak Higher Authority te'n sui a office kaisak ding, akai tuan kei leh action la ding in ngen uhi. JE natna tawh kisai DC/CCpur in school teng ni 7 sung akhak sak kipahpihthu puang uh a, Dist. Hospital kia hilou in CHC, PHC, PHSC centre te ah JE natna dalna kap theihna din Dist. Admn leh CMO in panla din ngen uhi. Vuah chiangin  Lighthouse kiang apan Khawmawi kikal  buannawi ziakin student te’n haksatna tuak uh a, RCC Slab culvert 2 eh hawkguam (nullah) bawl dingin June 18, 2016 in CE/PWD ngen uh a, student-te leh mipi khualna bawl ding in PWD-te ngen uhi. Tuibuong Forest Gate kiang, lampi khanglam a Traffic Stand/point kikoih lampi lai a koih dingin  DC kiang a ngetna abawl uh DC in abuchin sak ziakin DC tung ah kipahthu gen uhi.


Bialtu MDC in thoukang thahna kapsak
Lamka, July-28: CCpur Dist. a Japanese Encephalitis (JE) natna hileng tawh kisai in 17-New Lamka East MDC M. Gouzamang Guite, EM/ADCC in zan akipan abial sung mun tuamtuam ah Japanese Encephalitis (JE) natna pua thoukang (Culex Mosquito) thahna damdawi (Pyrethrum extract) malaria deptt-te kapsak a tuni’n leng veng tuamtuam ah sunzom uh a, bialsung pumpi kapsuak hidi’n kigen hi.  Bialtu MDC in agenna ah JE natna kichi thoukang chikhat (Culex Mosquito) akipan ahihman in huai natna apan kivenna dingin kuapeuh in sianthouna ngai poimawh a, innkim a thoukang omtheihnate hahsiang poimawh hi’n gen hi. JE  natna thoukang in ganhing akipan a laksawn ahihman in vok (pig) khoite a dingin pilvan poimawh chi hi. Tunitan in Zion Veng, Vengnuam, Khominthang, Kanaan Veng, Nghathal, Hebron Veng area fogging zouta uh hi’n kigen hi.


Mass cleanliness drive neih hiding
Lamka, July-28: DC makaih in tuni’n SDO/BDO-te, PO-te leh DRDA staff te’n joint meeting nei uh a, town area ah Japanese Encephalitis outbreak tawh kisai July 29, 2016 a Mass cleanliness drive neih ding in thupuk uhi. Block, village authority te’n khaw mipi kaikhawm a, mahni area chiat ah mass cleanliness drive nei a, hawkguam (nullah) leh khawkim khawkiang hahsiang a, report pelut ding in DC/CCpur in theisakna bawl hi.


Phaneikim Haokip omna kitheilou
Lamka, July-28: Phaneikim Haokip @ Kimneo (17) w/o Khaiminlal Haokip & d/o Seimang Haokip of T. Sijang village, Tuibong sub-divn.,  July 25, 2016 zinglam dak 8:00 vel a inn apat pawtkhia, tunitan inn tungkik lou in a omna kitheilou hi. Huai thu ah a pasal Khaiminlal Haokip in Police Station ah report bawl a, amah mukha leh omna theite’n thuzak ding  in ngen hi.


HM leh electrician adin interview
Lamka, July-28: National Skill Dev. Prog tungtawn in tuailai sepna neiloute’n company tuamtuam a sepna  aneih ding uh ngimna in 27-Sector Assam Rifles nuai a om 7th  AR in JCRE Skill Solution tawh kithuah in hospitality management leh electrician lunglutte tunung sawtlou in training piaksawm uhi. Huai tawh kisai in tuni’n HQ Veng a 7th Assam Rifles camp ah interview om a, mi 60 val paikhawm a, interview board in Major Arun, Lalrobul, James Vaiphei leh Thangsangkham tu uhi. Hospitality management a dingin mi 20 leh electrician ah mi 15 lak hiding in kigen hi. Skill dev. Programm training ah sen leh pan om teng 7-Assam Rifles in seng ding uh a, JCRE Skill Solution in kha 2 sung training pia in, hoihtaka training zoute placement leng ngaihtuahsak ding uh hi’n kigen hi. Interview a telkhiak-te JCRE in August 1, 2016 in final selection bawl ding a, huaini mah in training kipat hunding puankhiak hiding hi.


Essay Writing Compt. hun suan
Lamka, July-28: All Tribal Movement of Lamka (ATML) in thusuah abawlna uah Class XI & XII student-te ading essay writing competition phase 3na College tenga saiding in lemsakna la mahle uh Japanese Encephalitis (JE) natna ziaka DC/CCpur in school/college teng suty dia a puan ziakin educational institution  teng kikhak a, hun lemtang masapen ah neih hidin taklang uhi.


WHD zatna dan in advocacy meeting
Lamka, July-28: SHALOM in DAPCU tawh kithuah in tuni’n ‘World Hepatitis Day’ zatna danin CMO Conference hall ah advocacy meeting nei uh a,  CMO/CCpur in hong hi. Huai hun ah ASHA Facilitator leh Block Programme Manager teng tel uhi. World Health Organization (WHO) in khawvel pumpi ah Hepatitis  natna beisak tupna in July 28 pen ‘World Hepatitis Day’ in puang a, kum 2011 apan  zatpat in om hi. DACO/CCpur leh Advocacy Officer, SHALOM te'n thupi tuamtuam zangin sinsak uhi.


Pastor Ministerial workshop
Lamka, July-28: Evangelical Organization Church (EOC) in Kawnpui a Gilead Tlang ah July 26 apan EOC nuai a Pastor-te a dingin ‘Pastors Ministerial Workshop’ nei uh a, Rev. Kaitinkap, G/D (ECCI); Rev. Dr. S. Lalpi Vaiphei; Rev. Dr. Kh. Khaizakham; Rev. K. Kamchinkhup leh Rev. Lamkhogin Khaute in  thupi tuamtuam zangin sinsak uh a, Rev. H.P Runremthang thugen hi.


HSA in mipi pilvang dingin ngen
Lamka, July-28: HSA Jt. Hqtrs thusuakin  a gendanin, tulai a natna hileng JE tawh kisai a CMO panlakna kipahpih mahmah uh ahihdan gen taklang uh a, huai kawmin Primary Health Centre chih in panla chiat din ngen uhi. Hibangkalah, DC/ CCpur in Ni 7 sung school khempeuh khak dinga ngetna hon bawl kuapeuhin kithuahpih dingin ngen ua, tuaban ah, kuapeuhin dailen zawhchiang a khut hoihtaka silsiang a, thildang ah leng, sianthouna himhim ngai poimawh dingin mipi ngen uhi.


Thangkholen vuak in om
Lamka, July-28: Zan nitak dak 11:50 velin meltheihlouhte’n Dist Hospital a doctor leh nurse duty-te a poimawh bangbang a kithuahpih sek Thangkholen s/o Lalkholun of  Koite vua uh a, a mittung mun 2 kikhui hi. Aman a avawte leh avuakna ziak uh theilou hi’n gen hi. Thangkholen ahihleh mi tamtak in Hospital MDC chi a a theih uh ahi.


Block 3 ah nasepna ding sanction
Lamka, July-28: Executive Director, DRDA/CCpur in MGNREGS 2016-17 1st phase ah Job Card holder te’n ni 18 nasepna ding in block 3 ah sum sanction a, block dang claim prosopal pelut masasa sum sanction ding uh hi’n kigen hi. Job Card holder  ni 18 sung nasepna ding sum sanction te-Lamka block ah khua 60; Thanlon block ah khua 46; Singngat block ah khua 96 hi’n kigen hi.


TAYC makaih in panpihna drive nei
Lamka, July-28: Tuibong/Tuibuong bazar ah July 9, 2016 nitaklam a activa gari in Emi Nengmuanching (6) d/o Lalrochhan Hmar of Zion Veng, Tuibong tulel a Shija Hospital, Imphal ah etkol a om panpihnang in Tuibuong Area Youth Club (TAYC) te’n tuni’n Tuibuong/Tuibong bazar ah panpihna drive nei uhi. Tunitan a TAYC in panpihna akaihkhawm uh khawsung mipi leh tuni a kimukhia teng avek in Rs. 65,251/- leh  antang quintal 2 pha hi. Expenditure ah transportation/ Refreshment/ Publicity ah Rs. 2,000/-; Hospital expenditure (accident) ni Rs. 3,600/-, Misc ah Rs.1000/-hi a, tulel in Rs. 58,651 om hi’n TAYC makai-te apan kiza hi.


SUUNNA:
Thangtinkhum Guite (65) s/o (late) Thangzam Guite of  Vengnuam, New Lamka tuni sunnung dak 1:00 velin Sky Hospital, Imphal ah lungtangna in si a, July 29, 2016 in YPA hanmual, New Lamka ah kivui ding hi.


IMPHAL NEWS:
Nominated member-te kichiam
Imphal, July-28: Kangpokpi a Sadar Hills District Council Hall ah Addl. Deputy Commissioner in tuni’n ADC Sadar Hills a nominated member -Thangkam Lupheng s/o Janglhun Lupheng of Nungka village, Saikul Block, Sadar Hills leh Milan Pradhan s/o Amar Bahadur Pradhan of Kalapahar, Sadar Hills-te kichiamsak hi. Huai hun ah Thangjakam Misao, Vice Chairman, ADC Sadar Hills in Councilor dia pang pen mipi nasepna dia kipahman hi a, hiai tungtawn a mipi hinkhua khektheih hidan in gen hi.


NCW member 2 in Manipur hongpha
Imphal, July-28: National Commission for Women (NCW) a member Rekha Sharma leh Laitabi te’n numeite buaina suizui ding in July 26, 2018 in Manipur hongtung uh a, zan in CM O. Ibobi, L.M. Khaute, DGP leh numei pansan a NGOs banah Anganwadi worker-te kimuhpih uh a, Ema market vehna nei uh hi’n kigen hi. CM tawh kimuh hunah NCW member te’n anganwadi worker leh helper te’n haksatna a tuah uh tungtang gen pih uh a, huai hun ah CM in enkai ding in chiam hi. Anganwadi workers leh helper Union Manipur (AWHUM) te’n NCW member-te kiangah memorandum pia uhi.


Tribal student-te thagum in ILPS rally ah telsak uh : KSO/Imphal
Imphal, July-28: Kuki Students’ Organisation (KSO) Imphal a Gen. Secy. Khaiminlen Doungel in ILPS tawh kisai a kiphinna hun ah students’union te’n tribal student-te thagum a telsak hi’n ngawhna bawl a, Imphal area a Higher secondary school-te ah tribal student-te tunai zek a phutluih in kiphinna ah telsak mawhpaih theih hi’n gen hi. Aman agenzelna ah kiphinna ah telnuam lou tribal numei khat khoih a om banah kiphinna ah telnuam lou-te kampau kilawmlou zat khum leh soisak nung in  classroom sung ah khum uh a, CCpur district ah bill 3 ziak a si pasal 9-te vui nailouh himahleh bill thak bawl ding phutna a Community khenkhat in kiphinna a bawl uh thil kilawmlou hi a, Bill 3 te’n tribal-te kia hilou in phaizang gam-te leng a sukkhak ding banah dan tawh kituak lou a pass ahihziak in KSO Imphal te’n pomthei lou uh chi hi. Bill 3 tawh kisai a School student unions te’n tribal student-te utna tellou a kiphinna ah telsak lou ding in ngetna bawl uh a, tribal student-te dikna, muhdan leh ngaihdan leng a zahtak ding uh ahi chi’n gen hi.


URF cadre 1 soisa
Imphal, July-28: Manipur govt. tawh kilemna suaikai pawl a tel URF a cadre khat in security force-te apan vauna leh soisakna tuak hi’n gen hi. Hiai thu tawh in Manipur Press Club ah press conference om a, huai hun ah Ningombam Naoba of Khuidrom in media-te tawh kimuhna  ah URF in state govt. tawh MoU a kaih nung a tenna inn ah kum 1 val omta mahleh nitak teng in Assam Rifles leh Manipur Police te’n amah leh a innsung mite vau gige uh a, zan nitak a Manipur Police team te’n a sanggampa a soisak ziak un a lu liam chi’n gen hi. Security force te’n thagum a sum ngen leh URF min a sualna bawl a ngawh in mat sawm uh chi a, Lamlai Police Station ah complain bawl mahleh Police lam apan panlakna bangmah omlou in daitak in om uh a, Home Dept. in enkai ding in ngetna bawl hi.


World Hepatitis Day zatna om
Imphal, July-28: Hepatitis Forum of  Manipur leh Network of +ve people Manipur-te saina in ‘Elimination’ chih thupi a zang in tuni’n North AOC a Hotel Classic ah ‘World Hepatitis Day’ zatna om a, Chief Guest in DK. Korungthang, Minister (Health) pang hi. Functional President in RK Imao, MLA pang a, Guest of Honour in H. Warshang, Project Director, Manipur State AIDS Control Society leh Dr. Kh. Lokeshwor, Associate Prof., JNIMS-te pang uhi. Huai hun ah Health Minister in Manipur ah Manipur State Aids Control Society nuai a NGO khenkhat te’n nasem hoihlou uh a, fund zang thelthang leh a hiding bang a zanglou NGO-te tungah action lak hiding in leng taklang hi.


Bus tailai apan pasal 1 kia
Imphal, July-28: CCpur district leh Imphal kikal a tai bus a tuang mikhat zan in Bishnupur district a Ningthoukhong mun ah a kia in RIMS hospital tut in om a, himahleh a dinmun lauhthawnghuai ziak in Raj Medicity ah referred in om hi. Thusuak in a gendan in bus tailai in a mailam kongkhak apan mi 1 kia a, kua hihiam chih theih chet hikei mahleh a khawphok hun in thil tamlou gen man a, huai dungzui in a min Raj chi a, apa Meitei leh a nu Nepali chih gen man hi. Bus neitu M. Herojit leh Imphal-CCpur bus owner and Worker Assn. a member te’n enkai uh a, Sangaithel Bazar akipan hiding in gingta uh a, ahihna thei te’n Bishnupur Police Station a OC ahihkeileh Raj Medicity thuneite theisak ding in ngetna bawl uhi.


TUNI THUPI:
“Huchi’n a mit ua kipan in khitui tengteng a nulhul ding a; huchi’n sihna a om nawn kei dinga; lusun leh kah leh natna himhim leng a om nawn kei hi, a chi a.” – Kilakna 21:4


EDITORIAL:
Sihna manpha hileh!
Manipur adia khawpi nihna Lamka’ a HQ veng a om Vimala Raina Govt. High School a  Headmaster lenlai T. Donglianpau (43) s/o Jamkhansut of New Lane, Bungmual  zan in  Japanese Encephalitis (JE) natna ziaka RIMS  a sihna  tawh kisai  printed leh electronic media tuamtuam ah suunthu naktakin taklat hi a, tualou in mobile a internet, face book leh Watts up group tuamtuam ah mi  tamtakin itna thu leh a khiaklah-huaidan kigelh hi.
    Kum tamtak Vimala Raina H/School dinmun segawp leh niamtak a om amah makaihna nuai ah puah hoihthak a om in lun mahmah hi.Hibang khopa mi pammaih himahleh a  ahunlou takin leitung a a hinkhua beita a, amah hinna lakik thei i hihlouh manin ‘a pammaih lua’ chih louhngal  i gen  theih  dang om  nawnlou hi. Mi chitak leh gin-om, education mahmah awlmawh mihing khat i chan uh a, kuapeuhin i zahtakin i suun mahmah  a, a innkuanpihte leng i suunpih a, huchi kalah, si manpha ahi chih ut-huai hi.
    Bangziak hiam i chih leh, unaupa Buonglienkung bangleng mipite’n a laphuah tungtawn a pianthakna a ngah zungzung lai in si a, Saikawt a Pa Chawilien bang leng mi tamtak  Pathian tungtawn a a sukdam khit nungin si hi. T Donglianpau in leng naupang chik himahleh Vimala Raina Government High School a hihtheih tawpsuah a apuah nung in leitung nutsia hi. Mite’ ngaihsang leh mite it te mah Pathian in leng it in ngai ahi diam chih theih in om  a, Pathian in program a bawlsa tungtang ah mihingte akhase theiding i omkei hi.
    Tuni in a tunga i gente leh  Donglianpau tungtawnin eilawi in sinlai (lesson) bangbang i ngahthei uhiam  chih ngaihtuah poimawh mahmah hi.Adiakin Donglianpau  naupang chik ahi a, mipil leh laisiam  mahmah banah a maban ding(future) tawh kisai leng hoih mahmah hi. Headmaster apan AI/DI leh ZEO tanpha leng tungzou mahmah ding a gintak ahi a, education tawh kisai a ngaih poimawhdan chituam hi. Nidang in siamsinna(education) kichi bang hihiam chih tungtang bangleng hoihtakin study ana bawl a, a neulai leh a tangval lai in leng inn ah naupangte samkhawm in lehkha sim pihpih mai kichi hi. Mi tamtakin sum tampipi senga sepna aleikhiak lai un, amah bel  asiamna ziak liauliau in Education deptt mah ah lut a, a lunggulh hih tangtun manlou in khawvel  nusia hi. A ngaplouh lai in leng alunglutna mah ahih ziakin Vimala School vapha teitei a, student-te’n leng ngaina petmah a, hichibang a i gama student- te khualna lungsim leh education ngai poimawh midang a om lai diam chih ut-huai zezen hi.
    I gam ah siamsinna mun(school/institution) a sem ahunkhop a om a, seh nih in khen lehang, Government nuai a employee-te leh private Institution a semte hiding hi. Private school a semte lakah en taktak lehang studentte’ laisiam ding awlmawh panla school pu (teacher) 30% val dinginb gintak huailou  a, Government teacher te’ lakah 1% a om zoudiam chih ahi. Siamsinna (education) ah ikik nawnkei leh eilawi mangthang ding hihang chih muban Government hi’n Private School teacher bangzah a om dia? T. Donglianpau pe’n a mimal a pumphat ihi zenzen kei a, Government school-pu khat hi mahleh zing leh sun in school office tung gige a, Pathian phawk mihing khat ahih thutuam hitaleh, a sepna a a ginomna leh naupangte a khawtuahna lamdang mahmah hi.
    Mahni sepna (posting) na mun a pai utlou, sempeihlou, lawh (salary) kia  deih chih pe’n tuni chiangin thil hithei hinawnlou a, khangthakte hong kipanta dingin om uhi. District Council, State Education deptt leh adangdang ah Government teacher bangzah i om ua, Lamka zanga Government teacher hikawm a biakna limsaktak a om chihte bangleng kisiamtan huai nawn khollou hi. TDonglianpau’ chihtakna, ginomna leh mengmuhna in i gam a Government school teacher-te’ lakah halhthakna (revival) banghiam bek hong tun leh i chi a,amah  i suun mahmah kawmin, tulai khangthak a site’ laka dingin si manpha ahi chi ut teitei lai ihi hi. Sihna kichi chi tampi om a, tualak ah siamsinte awlmawh a, mite’ lak a kigen minthang a om utlou T. Donglianpau sihna pe’n sihna manpha ahi chi thakthak lai hihang.