MANIPUR EXPRESS | JULY 28, 2016

HEADLINES:
Suuna in tukal school kikhak ding: Asst. Head
JE natna ziakin T. Donglianpau i/c Head. Vimala H/S si
Lamka, July-27:  Headquarter Veng a Vimala Raina Govt. High School a  i/c headmaster & DDO lenlel T. Donglianpau (43) s/o Jamkhansut of  New Lane, Bungmual tuzing dak 7:00 velin Japanese Encephalitis (JE) natna ziakin RIMS, Imphal ah si a, July 28, 2016 in Bungmual hanmual ah kivui ding hi. T. Donglianpau sih tawh kiton in T. Goukhomang, ZEO/CCpur in Education deptt. sik-in sunnthu puang in, CCpur Dist a Education deptt. in a kineppih mahmah in a hunlou tak a a sih naktak a sun ahihdan gen in, Dist. adia manna lianpi ahi chi hi. Aluang ahihleh Imphal  Games Village  a sanggam  T. Chinzakhup inn tut masak hi a, huai apan Lamka puaktung in om hi. Kangvai khua ah staff-te

banah mipi’n na vaidawn ua student te’n school kiang lampi pang tuak ah kivual uh a, school ah sunna hun zang uhi. Huai zawh New Lamka Bethel Veng a innpi uh puaklut hi a, hun saulou zat ahihnungin a tenna inn New Lane Bungmual tut in om hi. Hiai hun ah ZEO/CCpur banah DI/CCpur Block telin official tamtak kihel uh a, Headquarters Veng V/A, Chiengkonpang V/A leh Headquarters Veng Youth Organization makaite, G. Thangkhosuanmung, EM/ADCC leh CT Lian Guite, MDC te’n leng uap uhi. Huai hun ah Class VIII-X student-te banah outgoing student tel in Mid Day Meal Worker-te leh ngainatu tuamtuam te’n pak leh puandum in a luang tuam uhi.
    Thanglienlal Gangte, Asst. Headmaster in sunna in tukal sung school kikhak ding in gen hi. T. Donglianpau ahihleh 2007 kum in Graduate Teacher a lut in, Vimala Raina H/S ah kum 7  a sep nung 2014 kum in F. Lalzuithangi apan headmaster incharge hihna la in, siamsinna lam ngaina leh siamsin naupangte awlmawhna liantak nei in theihtawp suahin panla a, Vimala Raina H/S pukse ding lai tung ding thak a, kumteng in student kibehlap in tutan in 700 val om hi’n kigen a, CCpur dist a govt. school lak ah student hau pawl in pang hi. A nasep hoih ziakin State Awardee for Best Teacher award ngah dinga nominate/recommend a om hidan a leng gen in om hi. T. Donglianpau bel kalmasa in alu nasa in, tulai a natna kithang JE  hidia muanmawh ziakin doctor ki-ensak a, July 22, 2016 in RIMS Imphal ah puaksuk in om hi. Dist. Medical deptt. apan kiza dan in, asihna ziak pen in clinical in JE confirm himahleh Laboratory tungtawn in confirm bangmah om nailou hi’n kigen hi. T. Donglianpau sih ziak in thuthak om masiah Thanglienlal Gangte in i/c headmaster mawhpuakna lending hi.


Kum 3 sungin State teng in compensation 100% mu ding
Lok Sabha ah Lokpal & Lokayukta (Amendment) Bill passed
New Delhi, July-27: Union Cabinet in Goods and Services Tax Bill 2016 tuni’n pom uh a, kalnawn sungin Modi government in Parliament ah puaklut sawm uhi. Prime Minister Narendra Modi makaih in tuni’n Union Cabinet meeting om a, huai hunah cabinet member-te’n kituaktakin GST bill pom uh chihthu om hi. GST tungtang a State leh Centre kala kitheih siamlouhna a om leh GST Council etkai dingin koih uh a, GST council ah state leh centre in palai nei chiat ding uhi. GST bill zat hun chiang in state government in local tax tungtawn a revenue akaihkhop uh abei ding ziakin, central government in zangnadopna (compensation) dan in kum 3 sungin 100% pe ding  a, kum 4na ah 75% piakbeh in kum 5na ah 50% pe ding hi.
    Union Cabinet member te’n tuni a GST Bill tungtang a genkhawmna uah inter-state sale 1% a punsak ding tungtang pomlou in koihkhia uhi. Inter-state tax pen GST rate tunglam a koih ding tawh kisai lakkhiak ahihziakin Opposition Congress pawlin Rajya Sabha ah GST Bill gupna pe ding un kilang hi. Tuabang kalah Empowered Committee of  State Finance Minister pawlin zan a meeting aneih hun un, tax tawh kisai a Revenue neutral rate (RNR) deihlou member tamtak om uhi. State tuamtuam in GST bill paizia deihlou dinga akilat ziakin,  Rajya Sabha a GST Bill  puaklut ahihma ngei in MP tuamtuam tawh central government in kithukimna neih sawm uhi. Chief Economic Advisor  in tax rate abikhiahte state tamzaw in deihlou hi’n Kerala Finance Minister Thomas Isaac in gen a, rate bikhiah ding zah leng kithukimna om theilou chi’n gen hi.
    Tuni a Union Cabinet meeting ah Bhatinda (Punjab) a All India Institute of Medical Sciences  bawl ding in thupuk uh a, Rs. 925 crore bei in lupna 750 om theihna bawl di’n lemsa uhi. Huailou in Pradhan Mantri Swasthya Suraksha Yojana tungtawn a specialty hospital bawl di’n leng kithukim uhi. Cabinet in thupukna abawl dangte lakah Indian Stock Exchange a foreign shareholding limit 5 percent apan 15 percent bikhiah ding chihte leng telkha hi. National Automotive Testing and research and development Infrastructure Project (NATRIP) tawh kisai a cost estimate  Rs. 3727 crore leng Union Cabinet in pom uh a, India a global test centre om theihna di’n NATRIP project teng zawhsiang din  lemsa uhi.
    India a longkhawlna munte puahphat ding in Cabinet in thupukna bawl uh a, Central Agricultural University Act (CAU), 1992 tungtawn in CAU Imphal nuaia Nagaland omsak di’n leng thupukna bawl in om hi. Central Agricultural University (Imphal) etkolna nuaia College of Veterinary Sciences (Nagaland) bawlkhiak ahihchiang in NE bial ah animal husbandry khangtou ding a, Nagaland mipite’n leng huangvulh ganta tungtawn a nekzonna ah masawnna nei ding uh hi’n leng thusuakin gen hi.  
    Thusuak dang ah tuni’n kikupkhawmna omlou in Lok Sabha ah Lokpal and Lokayukta (Amendment) Bill 2016 passed uhi. Huai bill tungtawn in public servant teng in, government sepna a join hun un gou neih (asset) puangkhe ding uhi. Public servant te’n government sepna azop nung uh ni 30 tan a gou neihte pulak ding tungtang lemsalou in koihkhiak in om hi. Tuni’n Lok Sabha ah anti-black money etkaina ding Benami Transactions (Prohibition) Amendment Bill, 2015 leng passed in om hi.


LOCAL NEWS:
Nominate MDC 2 kichiamsak ding
Lamka, July-27: Lunminthang Haokip, IAS, DC/CCpur in July 28, 2016 nitaklam dak 3:00 in Tuibuong/Tuibong a Dist. Council Hall ah Governor of Manipur in Dist. Council/CCpur a nominated member  2- Holkhojang s/o (late) Limlhun of D. Phailien leh M. Chungpa Kom s/o (late) M. Thangloson Kom of K.K. Haotak village kichiamsak ding hi.


School ni 7 sung khak di’n theisak
Lamka, July-27: CCpur Dist. ah Japanese Encephalitis (JE) natna muhkhiat ahihziakin Dist. Administration leh CMO/CCpur pangkhawm in apoimawh bangbang nasem uh a, JE dalna damdawi mipi lak ah kapsak a om banah thoukang tui (egg) thakna area thei om leh mipi’n Dist. Administration/ CMO theisak ding in DC/CCpur in ngen hi. JE natna kithehdalhna apan kivenna ding in July 28, 2016 apan ni 7 sung CCpur Dist. sung a Head of  Educational Institution  teng in school khak (close down) chiat ding in DC/CCpur in theisak hi.


ZEO/CCpur in laibu pekhia
Lamka, July-27: Directorate of  Education (S) apan ZEO nuai a Higher Sec. School leh High School tuamtuam a library ah koih ding  laibu  tamtak tung a, T. Goukhomang, ZEO/CCpur in tuni zinglam dak 11:00 in CCpur Govt. H/S Campus ah Headmaster/Headmistress-te kiang ah pekhia a, High School 34 leh Hr. Secondary School 1 (Rengkai) telkha hi.


Mun 2 ah JE dalna kap hiding
Lamka, July-27: Dist. Immunisation Office (DIO) ah JE dalna damdawi beisiang a, tuni’n leng kikap sak ding mi tamtak kik uhi. Dr. VC Pau, DFWO/CCpur apan kizadan in Central govt tungtawn in Kolkata ah tuni’n JE dalna damdawi tamtheilam indent bawl uh a, nitaklam in Flight tungtawn in Imphal hongtung a, July 28, 2016 in abaihthei lam in DIO staff te’n Imphal ah vala ding uhi. Damdawi hong tun hunhun in DIO leh Dist. Hospital campus ah Med Suptd Dist. Hospital panlakna in counter 1 kihong ding a, mun 2 ah JE dalna damdawi abei masiah mipi kap (injection) hiding in gen hi. CCpur Dist. ah July 26, 2016 tan in Siden village, New Lamka (G) a TCYA Hall, Bungmual YPA Hall ban ah DIO office ah JE dalna in mi 7500 kikap ta a, damdawi leng vial 1550 kizang beita hi’n DIO staff-te apan kiza hi.


Traffic Stand thak ah duty pan
Lamka, July-27: Traffic Control Police te'n hoihzaw sem a Traffic control theihna ding un Tedim Road apan SP office luttouhna bul ah Traffic Stand abawl uh tuni'n zousiang uh a, huai mun pansan in tuni’n Traffic Police te’n duty pan uhi.


RAC te'n 3rd meeting nei
Lamka, July-27: Viral Epidemic/Outbreak (JE) tawh kisai CCpur Dist. Rapid Action Committee te’n tuni sunnung in CMO’s office chamber ah 3rd meeting nei uh a, Dr Thangchinkhup Guite, CMO makaih in Dr J. Son Gokham, MS/CCpur; Dr T. Pumzathang, DTO/RNTCP, CCpur; Dr Liankhojam Guite, DMO/CCpur; Dr VC Pau Tonsing, DFWO/CCpur; Dr Phirthanglien Buhril, DACO/CCPur; Seiboi Mate, DPM/NHM leh Angelyn H. Vaiphei, DM/IDSP te tel uhi.
     Meeting hun ah DIO/DFWO, DMO leh MS/Dist. Hospital te'n report pia uh a, DIO/DFWO in Siden, New Lamka leh Bungmual ah outreach vaccination camp 3 sai uh a, July 20-24, 2016 in Siden PHSC, July 23, 2016 in New Lamka (G) leh July 25, 2016 in Bungmual ah nei in mipi lak ah JE dalna kap uh chi hi. JE confirmed area ah DMO leh a team te'n Fogging kap (Spray) uh a, MS/Dist. Hospital in July 23-26, 2016 sung in Fever Clinic (COPD) ah ki-ensak mi 808 leh MOPD a ki-ensak 411 kigawm in mi 1219 ki-ensak uh a,  huai lakah JE dia muanmawh case omlou hi.


EA in Evangelistic week nei
Lamka, July-27: Ebenezer Academy in July 29, 2016 tan daih ding tuni’n Hebron EBCC ah ‘Evangelistic Week’ pan uh a, huai hun zinglam dak 9:00 in school mun ah Pastor H. Jamkhanpau, Local Pastor, EBCC/Hebron in hongkhia a, naupangte ading in thumsak hi. Hiai  hunsung in Pastor K. Pumsuanthang, Local Pastor, Pethuel EBCC chialpihna  tawh thuah in thugen ding hi. Tua banah Bible action, Solo, action song leh Bible recitation telin item tuamtuam ah kidemna leng om ding hi.


Head-te adin orientation prog.
Lamka, July-27: ADC, CCpur saina in tuni’n Dist. Council hall ah ADC nuai a school tuamtuam ah headmaster/headmistress te a dingin one day orientation programme om a, huai hun Mannuamching, CEO/CCpur in hong hi. Programme hunsungin V. Nemzathuam, Inspt. of  Schools in ‘classroom management’ tawh kisai sinsak a, H. Thangkhankham, D.I.S  leh H. Paokhothang, D.I of School te’n ‘headmaster as an administrator’ leh ‘teaching method’ thupi pansan in sinsak uh a,  ADC nuai a school 170 apan head 140 vel kihel uhi.


PLS BOD memberte meeting ding
Lamka, July-27: Paite Literature Society (PLS) a board of director member te’n July 30, 2016 sunnung dak 1:00 in PLS Office ah meeting nei ding uh a, huai ah Sahitya Akademy, Manipur in ‘Convention on Paite Literature’ a saisak ding tawh kisai genkhawm ding uh a, kuapeuh in ngai poimawh a telchiat dingin Secretary in theisak hi.


ITI Saikawt ah Wiremen interview
Lamka, July-27: ITI Saikawt ah July 29, 2016 zinglam dak 10:00 in Wiremen Training ding interview omding a, applicant 66 lak ah mi 16 merit dungzui in training ding a select hiding un thusuak kingah hi.


Hepatitis-C Virus Screening ah mi 31 tel
Lamka, July-27: Stride Shasun, Imphal saina in tuni zinglam apan Dist. Hospital a Blood Bank ah Hepatitis-C Virus Screening camp om hi. Huai ah H. Sandeep Singh, Therapy Manager, Strides Shasun, Imphal makaih in technician te'n khua leh veng tuamtuam apat mi 31 sisan test  uhi. Hepatitis-C Virus ahihleh natna lauhuai mahmah hi a, mipi'n awareness hoihtak aneihtheih na ding ua screening camp kibawl hi’n kigen hi.


Advocacy meeting on Hepatitis omding
Lamka, July-27: SHALOM saina in July 28, 2016 sun dak 12:00 in CMO Mini-Conference Hall ah ‘No Hep: Elimination Viral Hepatitis’ chih thupi zang in Advocacy Meeting on Hepatitis omding a, Dr Thangchinkhup Guite, CMO in hongkhia in thugen ding hi. Program hunsung in Dr. V.C. Pau Tonsing, DFWO/CCpur; Lalruatpuii Pachuau, Project Director, SHALOM leh Dr. Phirthanglien Buhril, DACO/CCpur te'n thugen ding uhi.


Tuailai 1434 Pro saina a kidemna result
Lamka, July-27: Tuailai 1434 Pro leh Central BYF Sub Committee, EBC saina a Ebenezar Academy ah July 16, 2016 in article gelh kidemna, spot painting competition leh laphuah kidemna om in result puankhiat in om a, September 9, 2016 nitak in Mega Workshop Program hun ah kipahman-te hawmkhiat hiding hi.
    Spot painting ah 1st in Liansonmuan Hauzel of Hebron Veng, New Lamka; 2nd in Mangminlian Tunglut of  Pearsonmun leh 3rd in H. Thawnkhansiam of Tribal Colony, Imphal hi uhi. Article gelh kidemna ah 1st in T. Pauzalam of  Singngat; 2nd in Daniel KB Muan of Singngat leh 3rd in G.K Zalal of Vengnuam, New Lamka hi uhi. Laphuah kidemna ah 1st in K. Thangchinlian of  Zion Veng, New Lamka; 2nd in T. Thanggoulian of  Vengnuam, New Lamka leh 3rd in Th. Suankham of  G. Mualkoi hi uhi.


SUUNNA:
Siakzahau (80) of  Hiangtam Lamka, Tipaimukh Road in tuzing dak 7:30 velin teknat in si a, nitaklam in Lamka hanmual ah kivui hi.
Thangzagou @ K. Vawmcha (94) s/o (L) Soikhai of Chiengkawnpang tunitak dak 5:20 vel in teknat in si a, July 28, 2016 in YMA hanmual, Chiengkawnpang ah kivui ding.


IMPHAL NEWS:
World Record holder kiangah Rs. 5 lakh
Imphal, July-27: CM Office Chamber ah tuni’n CM O. Ibobi in Maibam Itomba Meitei in Guinness World Record a “the most consecutive pinky chin ups” ah record a ngah kipahpihna om a, CM in Maibam kiangah Rs. 5 lakh pia hi. Maibam in kum 2014 in a khut me (little finger) kia zang in second 30 sung a ‘pull-up’ 16 vei a bawlzou World Record book ngah hi. Hiai hun ah Dy CM Gaikhangam, G. Konthoujam, Minister (C & I) leh W. Brajabidhu Singh, Lamshang A/C MLA-te tel uh hi’n kigen hi. Huailou in tuni’n National Commission for Women a member Smt. Rekha Sharma in CM kimuhpih a, CM in Souvenir  pia hi’n leng gen uhi.


Suresh Prabhu in Manipur pha ding
Imphal, July-27: Union Railway Minister Suresh Prabhu in July 30, 2016 in Manipur ah ni 1 om di’n hongpha ding a, aman Malom Bhamdier ah Imphal Railway Station bawl kipatna dia suangphum ding hi’n kigen hi. Huai ni mah in Jiribam-Tupul railway line in a tawtkhak ding Tamenglong district a Kotlien mun ah tunnel no. 12 bawl nang a nasep patna dia suangphum ding a, tunnel no. 12 bawl zawh ahih chiang in India ah tunnel saupen hiding a, July 31, 2016 ni a Agartala zuan ding hi’n gen uhi.


ST demand te’n kiphinna pan ding
Imphal, July-27: ST Demand Committee (STDC) te’n Aug 7, 2016 ni in volunteer 100 te’n  relay hunger strike leh Sept 18, 2016 ni a mass rally pan ding uh hi’n kigen hi. Convenor Mutum Churamani in Indian Constitution a article 342(1) nuai ah Meetei/Meitei te’n vengbitna poimawh uh chi hi. Aman a genzelna ah STDC te’n Union govt. ah memorandum a piak utawh kisai in May 29, 2016 in dawnna om a, huai ah state govt. in Indian tribal list ah Meetei/Meitei-te telsak theihna dia relevant leh supporting document peding in theisak mahle uh state govt. in tunitan bangmah neilou uh chi’n gen hi.


Sharmila thupukna theihpih lou
Imphal, July-27: Irom Chanu Sharmila in zan in August khasung a anngawl nuakna tawpsan ding leh Election tuh ding a gen tungtang a sanggampa Irom Singhajit in theihpih kha lou chi hi. Sharmila in Manipur ah AFSPA lakkhiak ding a sual (struggle) panpihna in ‘Just Peace Foundation’ kichi ana phutkhia a, Sharmila thupukna in Foundation-te kiguih sak a, thupukna a bawl ma in a innsungmite banah activist-te thuzaklou a, Sharmila in thupukna amah thuneihna mah hi a, himahleh a pianna nu damlou a om kiangah Sharmila thupukna a hilh leh hilh louh ding tungtang lungbuai a, a nu in Sharmila thiltup a tangtung masiah Sharmila mulou ding a kichiam hidan in kigen hi.
    Sharmila in a lawm ngaih Desmond Coutinho ziak a thiltup khek hiding leh Research and Analysis Wing (RAW)-te agent dia ginglel hi’n leng gen hi.


Helpawl a tel 1 mankhia
Imphal, July-27: Bishnupur Police Commando leh 2/5 Gorkha Regiment combine team te’n Bishnupur district a Joypur Khunou ah tunitaklam dak 3:30 velin KCP a hardcore cadre 1 mankhia uh hi’n kigen hi. Mat a om O. Somenchandra Singh @ Moirangjao @ Karangjao (33) s/o O. Rajen Singh of Thanga Karang Mamang Leikai hi a, KCP leh NRFM min a dan kalh a gamtang hi’n Police te’n gen uh a, amah kipuanna ah Moirang CDPO Phulobati Devi a vau banah Bikram tawh kithuah khawm in  Phulobati residence ah June 2016 in bomb supuak uh a, Moirangthem Jugindro tenna inn a bomb hihpuak tawh kisai leh Moirang a Kerosene pump ah IED koih pawl ah kigolh hi’n gen hi.


Jr. MCS apan MCS Grade II in kaisang
Manipur govt. nuai a Jr. MCS (Sr. Grade) sem officer 4 MCS Grade-II Pay scale PB:2; Rs. 9,300 - 34,800 plus Grade Pay Rs. 5,400 per month in kaisang uhi. Amaute:
1.    Tongminleng Haokip
2.    A. Biren Singh
3.    N. Brajamohan Singh
4.    Kh. Chaoba Singh


TUNI THUPI:
Toupa’ kiangah “A khialpa keimah ka hi. Thil hihkhialtu kei ka hi. Hiai mipi’n bang ahia ahih uh, kei leh ka innkuante ahi gawt  a om ding” achi a - 2 Sam 24:17


EDITORIAL:
7th Pay Commission leh Manipur
Congress makaihna UPA govt. hunlai Sept 25, 2013 in Prime Minister Manmohan Singh in 7th Pay Commission bawlkhiakna ding lemsakna pia a, Feb 4, 2014 in Justice L.K. Mathur in 7th Pay Commission makai ding chi hi a, huai dungzui in 7th Pay Commission recommendation dungzui in Jan 1, 2016 a kipan zat ding chih ahi hi. Hun hon paizel in BJP makaihna NDA govt. in June 29, 2016 in 7th Pay Commission dungzui a Central govt. employees-te khalawh 14% pung beh ding in recommend uhi.
    Himahleh Central govt. employees-te lungkim lou in kum 70 paisa hun a kipan lawh khandan deih huailou pen leh a tawmpen hi’n puang uh a, India Railways, Ordnance Factories and Posts and Telegraph department telin Central govt. employees te’n July 11, 2016 in strike ding in puang uhi. Central employees-te gendan in 5th Pay Commission leh 6th Pay Commission ah lawh 14% a puang himahleh 7th Pay Commission in 14.27% lel a pung ding a Union Cabinet in lemsakpihna a bawl deihlou uhi. Hunpaisa ah lawh tawm pen leh a tampen kikal 1:12 akipan 1:8 kikal hi a, 7th Pay Commission in huai hihniam sang in 1:14 in sang zaw chi’n lungkim louh thu puang uhi.
    Central employee te’n a thil nget uh govt. in a etzui keileh July 11, 2016 in a lou thei lou a strike ding chih a tawlh louh ziak un govt. in employee-te lungkim louhna leh a thil nget uh High Level Committee in ngaihtuah ding a a chiam ziakin Central employees te’n July 11, 2016 a strike a neih sawm uh kha 4 sung hungaih phot ding uh hi’n puang uhi. Huchi’n Center govt. in July 25, 2016 in Central govt. employee-te khalawh leh pensioner-te pension sum Jan 1, 2016 akipan pung ding in order suah a, huai dungzui in Centre govt. employees 47 lakh leh pensioner 53 lakh in huai tawh kituak kha lawh mu ding uh a, huaite lakah defence force a sem 14 lakh leh defence pensioner 80 lakh-te leng tel uhi. Huai dungzui in tuma in govt. nasem te’n lawm tawmpen kipatna Rs. 7,000 akipan Jan 1, 2016 in Rs. 18,000 per month lawh la ding uh a, lawh tampen Cabinet Secretary in tulel a Rs. 90,000 a lawh leng Rs. 2.5 lakh hita ding chih ahi.
    Centre govt. employees te’n Aug 2016 kha akipan 7th Pay la ta ding uh a, January-June 2016 kikal ate arrear dan in seh 2 a suah in la ding uhi. Employees-te thilphut bang in dearness allowance chihlou allowance dangte tawh kisai Finance Secy. leh Secy (Expenditure) makaihna in enthak ding uh a, huai ah Home Affairs, Defence, Health and Family Welfare, Personnel and Training, Railway board a Chairman-te member hiding uh a, amau kha 4 sung in report pelut ding uhi.
    Centre govt. employees-te duhthusam bang in a lawh uh tam in khang keimahleh hunpaisa a lawh a lak zah sang un tam zaw himhim ta hi. Himahleh state govt. tuamtuam bangzah in 7th pay commission tawh kituak lawh a pe zou ding uh hiam, state bangzah in pezou lou ding uh hiam chih ngaihtuah tham ching hi. Etsakna ding in Manipur govt. in tuni tan in 6th pay commission recommend na tawh kibang state govt. employee-te pezou deklou a, huai sang a tawm zaw tham a piak lel leng sum leh pai buai in buai lai hi. Huaiziakin tu tan a 6th pay commission leng zui zou nailou Manipur govt. a dingin 7th pay commission tawh kibang state govt. employee-te lawh piak ding kichi thil hithei vual lou suak bang hi. Manipur govt. employee-te kigawm khawmna Joint Administrative Council te’n bang tan govt. a phuzou ding uh hiam maban ah hong kichian di’n ging huai hi.
    Hibang kalah Manipur govt. in Centre sponsor scheme leh Centre funded project tuamtuam sepkhiakna ding a Centre apan sum hong paite ahi ding bang a azat louh ziak un Centre in tun deih bang in sum hong release lou uh hituak hi. May 23, 2006 tan in kum 2008-2009 leh 2014-2015 kikal a project tuamtuam a dia sum zatna Rs. 3969.57 crore vel Centre ah utilization certificate pethei lou chih ahi hi. Huchih ziak mah in Manipur govt. in Centre apan Non-Plan leh Plan sum a muh sun-te a tam zaw employee-te lawh ding in pia uh a, adangte Electric power leina leh loan interest a dia zang uh hi’n kigen hi. Tu dinmun a bat zel leh Manipur in RBI ah overdraft (bat) tampi neipah ding hi’n kilang a, Sept/Oct 2016 velin govt. employee-te leh pensioner-te lawh piak ding tasam gawp maithei hi’n kigen hi.