MANIPUR EXPRESS | JULY 8, 2016

HEADLINES:
India in Mozambique apan Pulse lalut di’n kilemna bawl
New Delhi, July-7: Tuni’n India Prime Minister Narendra Modi leh Mozambique President Filipe Nyusi-te Maputo khawpi ah kihou uh a, huai ah India a pulse taksapna om gige sukbei ahih ngimna in Mozambique apan Pulse lalut dingin long-term agreement signed uhi. Prime Minister Modi in genna ah, pulse lei ding tawh kisai kilemna bawl hi a, huai in Mozambique gam a farmerte naktak in phungvuh ding a, alehlam ah India in adeihzah pulse ngahthei ding hi’n gen hi. Modi in Mozambique pen “lawm muanhuai” leh “kikoipih tak” ahihdan gen in, AIDS kepna dinga poimawh damdawi (medicines)

telin lam tuamtuam ah panpih ding hi’n gen hi. Aman agenzelna ah, Mozambique’s security forces-te sukhatna ding inleng India in kithuahpih ding hi’n gen a, mipi hamphatna ding a khantouhna banah economic khantouhna kia hilou in mipi bit leh galmuang  om ding  India in a deihpen hi’n joint media interaction hun ah gen hi.
    Modi in agenzelna ah, terrorism pen khawvel adia lauhuai pen hi a, tuaziakin India leh Mozambique gamte Indian Ocean tungtawn a kizom ahihman in security leh defence lam a sukhat ngai hi’n gen a, huai dingin leng kilemna bawl ahi chi’n gen hi. Tuipi tunga  bitna om theihna dingin gam 2te’n security leh defence lamah pankhawm dingdan hoihtak bawl ding chi’n leng gen hi.
    Gam 2te kitanauna pen hihtheihna (capacity) leh lunglutna (interest)  ziak hi a, Mozambique hihtheihna India in poimawh a, huai bangin Mozambique inleng India poimawh hi’n gen hi. Agriculture, healthcare, energy security, security, defence leh skill development lam a gam 2te nak zawsem a pankhawm poimawh hi’n gen a, huaite lakah agriculture development pen top priority piak hiding a, infrastructure leh haichi gahpha/tampiangzaw a om theihna dia akinlam a sepsuah dia koih uh hi’n gen hi. Modi in Mozambique pen “gateway” to Africa chi a, India in Africa a investment abawlte laka seh 4 suah seh 1 pen Mozambique gam a omkha hi’n gen hi.
    Huai hun ah, PM Modi in Mozambique President kiangah Indian High Commission in English pau a bawl uh booklet khat pia hi. Booklet ahihleh India a investment bawl nuamte adia lamhilhtu hidan in kigen hi. Prime Minister Narendra Modi in tuni mah in Mozambique Parliament pha in, India mi omte tawh leng kithuahkhawm uh a, nitaklam in Mozambique nusia in South Africa khawpi Pretoria zuan hi.


Sickle Cell Anaemia Survey-cum-School Health Card
Lamka, July-7: Seilal Veng a Upper Primary School ah tuni in ‘Sickle Cell Anaemia Survey-cum-School Health Card Program’ honna om a, Chief Guest in Langkhanpau Guite, Chairman, ADC/CCpur leh Functional President in Mrs Mannuamching, IAS, CEO/ADCC pang hi.
    Chairman in Sickle Cell kichi nu-le-pa akipan tate’n alaksawn uh natna (hereditary disease) chikhat hi a, India Prime Minister in Northeast  bial a singtanggam ah hibang natna a om leh omlouh survey bawl ding chia program a bawlkhiat hi’n gen hi. Sickle natna vei student-te’ thachau a, sisan neilou bang in daang(pale) uh chi hi. HIV/AIDS natna banglou in nu-le-pa akipan tate’n a laksawn uh natna (hereditary disease) veitheih chikhat hi a, hiai natna veite sisan (RBC shape) pen oval shape lou in sickle shape (koi ngiungiau) chi hi.
    CEO in July 20, 2016 tan in  ADC nuai a School 170  ah Sickle Cell Anaemia Survey-cum-School Health Card program paipih hiding a, huai dingin ADC/CCpur in Imphal ah Master Trainer mi 17 training in sawlta a, amau teacher-te training pesawn ding uh chi hi. Program hon  ahihtak ziakin ADC/CCpur nuai a school  student-te Health Card piak banah l registered bawl hiding a, teacher-te’n kum tengin student-te' damtheihna Health card a registered bawl in up-date bawl ding uh chi hi. Program zawh in Chief Guest leh Functional President in singnou suan uh a, Master Trainer, ADC medical staff leh teacher te’n student-te’ Medical check-up bawl uhi.


DFO/CCpur makaih in Kangvai khua ah singnou suan uh
Lamka, July-7: Divisional Forest Officer, Southern Forest  Divn, CCpur saina in tuni sunnung in Kangvai Model Village Community hall ah ‘One Tree, One Family’ thupi zangin 67th Van Mahotsav- 2016 zangin singnou suan uhi. Huai ah Chief Guest in Lunminthang Haokip, IAS, DC/CCpur pang a, Special Guest in CT Lian Guite, MDC (16-New Lamka West) pang hi.
    Chief Guest in a genna ah mihing adi’n singkung poimawh a, singkung omlou in hinna om theilou  a, Pathian thilsiamte lakah  singkung in poimawhna liantak nei hi’n gen hi. Gamsung ah catchment area-te kepbit poimawh a tuadan a singkung I phuk leh  maban lungzinhuai  ding ahihman in  ‘One Tree, One Family’ phawk a  singkung kembit kawmin  atam theilam suan dingin mipi ngen hi. 
    Special Guest in mihingte i hin sungin kipahna ding eimah in kibawl ngai ahihdan gen in, damsunga hong kipaksak thei ding bawl poimawh chi hi.Singnou khat suan in kum bangzahhiam nungin hong lungkimsak thei ahihman in  innkuan khat in singnou kung 1 chiat bek suan dingin ngen hi.
    Kham Suanmung Tawmbing, IFS, DFO/CCpur in Van  Mahotsav kichi kuapeuh in singkung poimawhdan a theihna ding leh khawlum- khawvot kikhen lamdang  dalna in kum 1950 in  huai hunlai a Union Minister  KM Munshi in a patkhiak hi’n gen a, huai apan kumteng a July first week sung zat hi a, tukum tutan in Forest deptt. in singnou 30,000 val hawmkheta chi hi.
    Programme hun ah “Suanni Maw” teamte’n special item lahna nei uh a,  YVA Kangvai Unit, Zillai Kangvai block, NSS Rayburn College Unit leh DFO staff-te’n singnou suante kithuahpih uh a, Kangvai ah singnou 250 val suan uhi.  Huai hun ah Seiminthang Lenthang, SDO/BDO Kangvai telin mi tuamtuam in uap uhi.


YMA Lamka Branch in Cultural Dance Competition sai
Lamka, July-7: Hmuia Veng a Young Mizo Assn(YMA) Hall ah tuni zinglam in YMA Lamka Branch kum 60 achin Diamond Jubilee lopna in Cultural Dance competition om a, huai ah  YMA Lamka Branch nuai a Taitensena section, Neuva section, Vanapa section leh Chawngbawla section te’n competition nei uh a, Chief Guest in Lalzawmliana, President, YMA Lamka Branch pang hi. YMA makai mi 20 vel stage  ah dingkhia in la(music) play uh a, hall sunga om aneupen akipan a lianpen tanph  lamkhawm dupdup uhi. Tuni nitak dak 6:30 program zat hun ah Cultural Festival leh program tuamtuam nei uhi.
      July 8, 2016 zinglam dak 11:00 in main day Diamond Jubilee lop hiding a, Chief Guest in JC Ramthanga, IAS, Principal Secy/Manipur leh Lungmuana Lakher, IAS, Principal Secy/ Manipur hiding uh a, Jubilee Pa in Lalbiakzuala, President, Central YMA pang ding hi. J.C Ramthanga in Diamond Jubilee suang hong ding a, khualliante makaih in Jubilee dakpi  60 vei tumging ding uhi. B.Lalramsanga, ex-Secy,. YMA Lamka Branch makaih in member sisate suunna om ding a, Lungmuana, IAS in Souvenir hongding hi. Khualliante akipan thugenna ban ah Sports Sub Comm apan kipahman hawmkhiak hiding hi.  President, Central YMA makaih in pahtawina hun om ding hi.Program zawh in PC Lalchhuanawma, ex-Secy. YMA Lamka Branch in thumna in hun khak ding a, huchi’n Diamond Jubilee lopna in nitak ankuang umkhawm ding uhi.


LOCAL NEWS:
Thailane a School leh lampi nawl ah singnou 100 suan
Lamka, July-7: Divnl. Forest Officer, CCpur makaih in July 1-7, 2016 sung Vanmahotsav Week zat hi a, Rengkai Hr. Sec. School a Principal Th.Tulachandra Singh makaih in tuni’n Thailane, Rengkai makaite leh tangvalte tawh pangkhawm in Thailane lampi siktuak ban ah School compoud ah singnou 100 suan (planted) uhi. Singnou kisuante umna dai (fencing) leh etkolna ah mawhpaw chiat ding in ngen uh a,global warming control-na ding a poimawhpen singnou suan ahihziak in mihing adia poimawh oxygen pekhetu leng singnou kisuante etkolna ah kuapeuh pang chiat dingin Principal, Rengkai Hr. Sec. School in ngen hi.


Bethesda NS ah Leprosy training
Lamka, July-7: Dist. Leprosy Officer,/CCpur makaih in tuni sunnung in Muolvaiphei a Bethesda Nursing School ah Leprosy training om a, nurse zil student-te tel uhi.Dr Kimneilam, Dist. Leprosy officer in keynote address  gen a, Leprosy natna beisak tupziakin  National Leprosy Eradication Programe (NLEP) nuai ah Aawareness programe leh training om zel hi’n gen hi. Leprosy natna nei hdia kiginglelte’n CMO office campus a Dist. Leprosy office naih dingin ngen hi.Training ah T. Lamzapao, NMA in Diagnosis of Leprosy chih pansan in sinsak a, Th. Rajit, Physiotherapist in Deformities and Disabilities of Leprosy chih pansan in sinsak hi.


EE, PHED in CE/PHED ah report
Lamka, July-7: Th.Baite, EE/PHED, CCpur divn. in July 4, 2016 a Lamka khawpi tuinek supply-tu Zone-III Khuga Dam a leftside canal a chip ziakin mipi’n Khuga Dam apan tuinek ding ngah nawnlou ahihdan Chief Engineer/ PHED ah report pia hi. Khuga Dam leftside canal bel IFCD-te bawl  hi a, vuahtam ziakin canal feet 70 vel asau kichim a, huai ziak in Lamka mipi’n Khuga Dam apan tui  ngah nawnlou a, IFCD in canal kichim a bawlhoih masiah uh Khuga Dam apan mipi’n tui ngahlou ding uh chih ahi hi.


School teacher-te training pia
Lamka, July-7:  Siamsinpawlpi GHQ  in  EBC Dorcas Jubilee Guest House a Mini-Auditorium ah Gen. Global Project a Facilitator dia telkhiak a om school tuamtuam a teacher-te tawh training a neih nung un, singtanggam leh Lamka khawsung a school tuamtuam a sem teacher-te  training neihpih nawn uhi.
 Training ah teacher 50 vel tel uh a, Khumi Gangte, District Co-ordinator, SSA in ‘Right to Education’ tawh kisai sinsak a, T. Chinsuanthang, Principal, Saviour Public School in naupangte laihilh dan ding sinsak hi. July 9, 2016 in Rev. S. Ginmalsawm, Director, Social Development, EBC in  training hun  khak ding hi.


GBC ah papi Camp om
Lamka, July-7:  Evangelical Baptist Convention(EBC), Imphal divn,  saina in New Lamka a Grace Bible College ah ‘Ki-enchian un’ chih thupi zangin za nitak in Papi camp kipan a, huai hun Rev. Thangjohnson in hong a, July 10, 2016 in zou ding uh hi’n kigen hi.
Camp om sung in Rev. Dr. Kh. Khaijakham, Evan T. Damkhothang leh Rev. K. Kamchinkhup  thugentu in pang ding uhi. Huai camp ah EBC  Imphal divn. bial sung a saptuam tuamtuam akipan papi 152 vel tel uhi.


AMTWU in mawhpaih
Lamka, July-7: All Manipur Tribal Women Union (AMTWU) pawlin  thusuah a bawlna uah meltheihlouh galvantawite’n mulkimna bei a M. Jangkholal Zou leh Lalthangsang Intaote a thahna tung uah suunthu puangkawm in huham taka gamtangte naktak a mawhpaih uh hi’n taklang uhi. Hibang gamtatna mulkimhuai sa in, kuapeuh in tawpsan a, hinna petu Pathian zahtakna tawh khawsa dingin ngen uhi.


SUUNNA:
Upa Chhawnthanga (65) h/o Chhuani of Ngathal zan nita dak 7:00 velin cancer natna ziakin si a, tuni’n kivui hi.


IMPHAL NEWS:
67th Vanmohatsava zatna om
Imphal, July-7: Lamboikhongnangkhong a Trade-cum-permanent Exhibition Centre ah tuni’n ‘The 67th Vanamohatsava 2016’ zatna om a, huai ah Chief Guest in CM. O. Ibobi pang hi.  Functional President in Dy CM Gaikhangam pang a, Guest of Honour in G. Konthoujam, Minister (Commerce & Industries); O. Nabakishore, Chief Secretary; Sambhu Singh, Addl. Chief Secy., leh P.N. Prasad, Principal Chief Conservator of Forest-te pang uhi. Huai ah CM in India gamsung pumpi ah Vanamohatsava zat ahih tawh kiton in Manipur ah leng zat hi a,  kumteng a singnou suanni chi’n gen a, tuni a haichi tang suan pen bulpantu hi a, a khanglet theihna ding ua kepbit pen kuapeuh mawhpuak hi a, maban hun ding i thil hih uah a kingak ziak in natural resource-te kephoih ngai ahi chi’n gen hi. Tuazawh in Exhibition Campus ah singnou suanna om a, laibu ‘A book on Sacred Groves of Manipur’ kichi honkhiatna om a, Forest dept. Official-te kiangah award leh citation hawmkhiakna om hi.


August kha in session kipan ding
Imphal, July-7: DIPR campus ah tuni a press conference hun ah Dr K Sushila, Director, Arts and Culture in August kha in Manipur University of Culture ah session pan ding a, himahleh department bangzah hongkhiat ding hiam chih theihchet hinailou hi’n gen hi. Teacher lakna ding in process pailel a, huai ding a mi 200 in application pelut uh a, academic season kipat ma ngei a recruitment process zawhsiang hiding a, fund taksap ziak in development work lam ah nawngkaina khenkhat om chi’n gen hi. Film and Television Institute bawlna mun ding Khundrakpam Chinkhu ah gam leikhiak banah session a kintheipen a pat hiding a,  Imphal Art College leng full-fledged govt. college ding a panlak hi a, hiai dia govt. in teacher 220 lakding lemsakna pia chi’n taklang hi. Huailou in  Aheibam Romeo, Nodal Officer, Adult Education Department, Govt. of India in district 4 – Thoubal, Senapati, Tamenglong leh Chandel-te ah Adult Education Centre (AEC) 321 honkhiat hi a, CONCOR nuai ah AEC 20-te Model AECs tan adia upgrade hi’n gen hi.


Bank luhte lakah 1 kipekhia
Imphal, July-7: Meltheihlouh pawlkhat in July 4, 2016 ni a Thoubal a HDFC bank a luh nung un Thoubal police te’n mi 3 – Dilip, Jayenta leh Thokchom Suresh-te  mankhia in Charangpat Mayai Leikai ah zan in sum leh gold hunkhop mukhia uhi. Tuni’n Yairipok Police Station a Sarangthem Hemanta, SDPO kiangah bank luhte laka tel Thiyam James s/o Kennedy kichi va kipekhia a, Jayenta apan bank luhna a kizang Honda Dio muhkhiak banah Dilip apan Rs. 20,000 muhkhiak beh uh hi’n leng thusuak in taklang hi.


Lilong river ah tuikia in 1 si
Imphal, July-7: Nambol Awang Leikai gei a Lilong lui ah tunitaklam a tui kia in mi 1 si hi. Misi Haorungbam Dhananjoy @ Bomba Singh (58) s/o (late) Joyo Singh of Nambol Awang Leikai hi a, aman nga len (fishing net) a lakkhiak sawmna lam ah ki awk kha in tui a kelut hi’n gen uhi.


Lampi leh drainage bawlna munte enkhia
Imphal, July-7: RK. Anand, MLA in Kwakeithel Kongjing Leikai a lampi leh drainage kibawlte etkhiakna va nei uh a, huai ah media-te tawh kimuhna hun ah development work nasep pat ahihma a mipi ngaihdan lakkhawm poimawh a, mi 1 deihna a thil sai in bangmah tan tunlou a, Kwakeithel Kongjing Leikai a lampi bawl louh a omte scheme tuamtuam tungtawn a bawlhoih ding chiam hi’n gen uhi.


Helpawl a tel 2 mankhia
Imphal, July-7: Thoubal Police Commando te’n Thoubal district mun tuamtuak ah zan in KYKL cadre 2 mankhia uh hi’n kigen hi. Mat a om Moiranthem Lukeshower @ Nanao (30) s/o M. Ibochouba of Yairipok Chingtha leh Chingtham Jadu @ Radu (59) s/o (late) Modon Singh of Yairipok Bishnunha-te hi uhi.


Moirang river tungtang ah meeting nei
Imphal, July-7: Moirang lui a luanglet tawh kisai in tukum adia a 3 veina ding in Moirang Community hall ah nupi pawl te’n meeting nei uh a, a kisaipih thuneite’n hun sawtpek apan Moirang lui hahsiang louh banah Moirang lui pang a gam kek-te ziak hi’n gen uhi. Gamkek-te ziak in vuah zuk zek chiang in leng tui luanglet a, gamkek-te a dia eviction order suahkhiak himahleh a tak a sepsuah bangmah omlou hi’n gen uhi. Hiai hun Moirang Mayai Leikai, Siribon Leikai leh Moirang Chinggei Leikai apan nupi pawl te’n uap uhi. Huai louin  Moirang bial ah NFSA beneficiary te’n tunitan in bangmah mulou uh a, hiai tungtang ah a kisaipih thuneite’n enkai ding in ngetna bawl uh a, huai ahihkeileh general election 2017 boycott ding uh hi’n taklang uhi.


Mun tuamtuam ah Eid-Ul-Fitr zang
Imphal, July-7: Manipur ah Muslim omte’n Ramadan bei tawh kiton in tuni’n mun tuamtuam a Mosque ah Eid-Ul-Fitr zang uhi. Thoubal  Moijing a Muslim omte’n Moijing Idiga ground ah Eid-Ul-Fitr tawh kisai a tuni zingsang in Namaz zang uh a, Kabar Giyarat kichi leng nei uhi. Md. Abdul Waris, Secy., Eidgah Committee Moijing in Eid-Ul-Fitr tawh kiton in Manipur ah muanna leh bitna om ding a deih thu taklang hi.
    Huailou in Lilong Dam a ANJUMAN office ah 12-Bihar Regiment leh ANJUMAN-te saina in Eid-Ul-Fitr zatna om a, huai ah Captain Abhishek Kumar makaihna a 12-Bihar personnel leh AJUMAN member te’n nek-leh-tak tuamtuam bawl uh a, mipi tawh nek khawmna hun zang uh hi’n kigen hi.


Defamation case file ding
Imphal, July-7: Babupara a Oinam A/C MLA Dr. Ibohanbi official quarter ah tuni’n press meet om a, huai ah Oinam A/C sung ah dam keh (breach) na mun omlou a, thu zuau thehzak-te tungah defamation case file khum ding in gen a, amah sukmin siat sawmna hi’n  gen hi. Aman a genzelna ah Susendro of Oinam kichi in Minor & Irrigation Dept.te’n  dam a bawl uh Khuman canal leh Khujairo canal kisuktuahna mun ah canal chim in tuilou acre 200 vel tum chia a gen tungtang thuzuau leh pansan bei a, tuichim pen Mang lui a embankment kichip ziak hizaw hi’n taklang hi.


Curfew dak kal 14  khahkol hiding
Imphal, July-7: Thoubal district a Lilong sub-division sunga om Nungei village leh huai khaw kimkot metre 200 huamsung a Curfew kikoih July 8, 2016 in zingsang dak 4.00 akipan nitak dak 7.00 tan dakkal 14 sung khahkol hiding chi’n District Magistrate/Thoubal in tuni nitaklam in order suah hi. Huai curfew tuni in zingsang dak 5.00 akipan nitaklam dak 6.00 tan khahkol in om hi.


TUNI THUPI:
“Huchi’n, kithahna thupitak ni-a galvenna singte achip niin, tangsang teng ah leh mual vum sang tengah luipite leh luite tuiluang khawng a hong om ding.”– Isai 30:25


EDITORIAL:
Kithah, kimat leh kisoisakna
I tenna Manipur state ah kithah, kimat leh kisoisakna kichi thuthak ahikei a, kum tamtak paisa  a kipan hita hi. Tuakia  hilou in thagum a kipimang kichi leng thansak mahmah in om a, kithah ut ziaka kipimang ahihkeileh sum-le-pai deihna ziaka kipimang (kidnapping for ransom) kichi leng om mun mahmah hi. India adin gal muangpen leh muanna gam ‘most peaceful state’ chih minvuah phak  i hihna ding uh gamla mahmah lai hi a theihin om hi.
    Mi nautang, sumdawngmi(businessman), politician ahihkeileh contractor-te pimang a thah a om tawh kisai thukhatin koih phot lehang, tunai chin a thiltung tuamtuam in lungsim phawng mahmah a, helpawl leader-te thahna tawh kisai leng bang thuguk kiphumgu om hiam chih theih ut-huai hi. Ni tamlou sungin Manipur ah helpawl leader 3 hial mulkimna bei in thah in om a, hiai tungtang ah bang intelligence agency-te kigolh kha uhiam chih bel theikei hang, himahleh, a sungthu ah akibualkha om ngei dingin gintak-huai hi.
    Thah a om helpawl leader-te ahihleh tripartite talks (state leh centre government tawh kitheihsiamna) hoihtak neite ngen hi uh a, amaute’n ginom tak a national mainstream a zom dnga kisalai  thah a a om mawk  uh thil lamdangtak ahi hi. Mimal hiam pawlpi kala kitheihsiamlouhna ziak leh kimuhdahna ziak leng bel a hikha thei a, himahleh, a sunggiltak etin tuabangte kua’ tawsawn leh kua’n  policy a bawl hiding hiam chih ngaihtuahna (thoughts) piak poimawh hi. I gensa British-te’n  hon gou nutsiat uh ‘Divide and Rule policy’ zuisiam mihing i lakah  atam mahmah.
    SoO group nuaia om Hmar National Army (HNA) Chairman Lalthangsang Hmar mulkimna bei in a gate bul uah zanhal zinglam dak 1:00  velin kaplup in om a, huai in mipi lungsim phawng petmah hi. CCpur district ah hibang a  kithah, kimat leh kisoisakna kiamta hi a  theih ahihlai in mipite’ adingin dipkuatna thupitak hong tung nawn maimah  hi. District mipite’n hun paisa in thauging kiza mun mahmah a, huai leng kichimtak-huai  mahmah  hi. Huchihlai a, helpawl leader khat thakhat thu a kaplup phut a om in kuapeuh lungmuang hetlou in koihthei hi.
    Huchih lai in United Kuki Liberation Front (UKLF) a self-styled captain Jamkholal Zou tuma zekin  Chandel district ah mulkimna om hetlou in thah in om hi. Amah taksa tungah thautang  lut hiam chihzaw  theikhang, himahleh, a pumpi leh amel etdanin tem a satlup hidingin muanmawhhuai  a, phetlou in mei (fire) tanpha a bawng em/vok em bang mai a soisak ahi hial diam chih ut-huai hi. A luang pe’n luiluang a paih ahihnung in zan(July 7,2016)in muhkhiak hita hi. A thattute hiam ahihkeileh thah a omte kuamah ei mawhsak phak hikei mahleh, tuhun pe’n kithah, kimat leh kisoisak hun hi lailai hiding hiam chih ut ihizaw hi.
    Ei singtangmite  sung kia ahikei, apaisa April 21, 2016 in SoO nuai a om mah PREPAK Chairman-lui Ningombam Nabachandra leh a gari driver   kaplup hi uhi. Amau sihdan  lamdang mahmah a, Imphal East District a om 7th Manipur Rifles huangsung a 'safe house' muna kaplup a om hi ahi uhi. Bangchidan a high security zone sunga zalentaka kaplup a om thei mawk uh ahiding? Sentry post a duty omlou ahidiam ahihkeileh bangchidan a huai thiltung thei ahi mawk hiam?
    Thil paidan leh omdan i et vengveng chiangin policy thuktak banghiam kigolh om hidingin gintak-huai hi. Huai hikeileh, SoO nuai a om helpawlte top leader tuamtuam khoihkhiak  leh thah a om ding un gintak haksa hi. Amau leh amau hong kikhoih tuah le uh chi a lungpi ana gelpawl om ahi diam chih bangleng theih haksa hi. Tulelin Manipur ah singtangmi helpawl group 15 leh phaizangmi helpawl 3 in government tawh kitheihsiamna (SoO) ah suaikai ua, huchih lai in SoO nuai a om helpawl leader hunkhop banah cadre tamtak ‘thautang’ ziak mahin sita uhi. Hithei hileh  hiai tungtang Union Home Ministry in a etkai vengveng a, state government kiangah thil omdan a kanchet uh kisam hi’n kilang hi.