MANIPUR EXPRESS | JULY 9, 2016

HEADLINES:
Union Council of Ministers 78 lakah crorepati 72 om
New Delhi, July-8: India PM Narendra Modi in zanzek in Council of  Ministers kekletna nei a, tua ah Ministers 5 paikhia in mi 19 lalut thak hi. Ministers ding a laklut mi 19 ten neih lem a puankhiak uh average in Rs. 8.73 crore tungpha hidan in Delhi pansan think-tank Association for Democratic Reformd (ADR) te’n taklang uhi. Ministers ding a mi 19 laklut tawh kiton in Narendra Modi makaihna nuai ah Ministers crorepati mi 72 om uh a, tua lakah mi 24 ten criminal case neih hidan in taklang uhi. Union Council of Ministers ten gou neih leh lam a taklatna uh average a lak khawm nungin Rs.12.94 crore bang tungpha hi.

    Ministers ding a laklut thak Madhya Pradesh apan Rajya Sabha member MJ Akbar in a gou neih leh lam Rs. 44.90 crore hidan in taklang hi. Tua zawh in Rajasthan apan Rajya Sabha members mah PP Choudhury leh Vijay Goel te’n Rs. 35.35 crore leh Rs. 29.97 crore nei uh hidan in taklang uhi. Tua banah, Minister thak Ramesh Jigajinagi, Purshottam Khodabhai Rupala, Anupriya Singh Patel, Mahendra Nath, Faggan Singh Kulaste, Rajen Gohain, SS Ahluwalia, Arjun Ram Meghwal, CR Choudhary, Mansukhbhai Laxmanbhai Mandaviya leh Krishna Raj te’n a gou neih uh crore khat val ngen hidan in taklang uhi.
    ADR thusuak in Union Council of Ministers 78 lakah mi 9 te’n a gou neih leh lam uh Rs. 30 crore val hidan in taklang uh a, Union Finance Minister Arun Jaitley in Rs. 113 crore, Food Procession Minister Harsimrat Kaur Badal in Rs. 108 crore leh Power Minister Goyal Piyush Vedprakash in Rs. 95 crore hidan in taklang hi. Council of Ministers ding a laklut thak Anil Madhav Dave in a gou neih leh lam Rs. 60.97 crore hidan in taklang a, minister thakte lakah gou nei tawmpen in kigen hi.
    ADR in  a taklatna ah, Union Ministers 78 lakah kum 31-40 kikal mi 3 om ua, kum 41-60 kikal mi 44 leh kum 61-80 kikal mi 31 om uhi. Minister-te lakah numei 9 om uh a, Minister 78 lakah 14 te’n class 12 tan zoulou uh a, 63te ahihleh graduate leh huai tunglam zou uhi.


Cabinet in Dept. tuamtuam a appointment ‘ban’ khahkol
Tuni’n CM makaih in Cabinet Meeting om
Imphal, July-8: CM Secretariat a conference hall ah tuni nitaklam dak 3:00 in Chief Minister O. Ibobi makaihna in Cabinet Meeting om hi. Huai ah Thoubal district sung Lilong sub-division a Nungei khua ah June 27, 2016 a buaina thiltung a si Md. Arif Khan innkuan pihte compensation Rs. 5 lakh piak ding in thupuk uhi. Huailou in Manipur govt. nuai a sem district tuamtuam a employee tamtak a retire (pension) ziak un Cabinet in appointment ‘ban’ a puan uh khahkol in Agriculture, Sericulture, Social Welfare, Forest & Env., Co-operation leh Rural Development & Panchayati Raj dept. ah post awng zah appointment bawl ding in thukim uhi.
    Govt. thupuangtu Rural Development & Panchayati Raj Minister M. Okendro in a gendan in Manipur govt. in National Hydro Power Corporation (NHPC) tawh agreement bawl in Tamenglong district a Tousang village ah Loktak Downstream Hydroelectric Project ki bawl a, fund zat ding behlap lemsa uh a, huai project tungtawn in Manipur in electric meivak Mega Watt 90 ngah ding hi’n kigen hi. Huai project sem ding in Manipur govt. in NHPC tawh Feb 12, 1999 in agreement ah suikai uhi. Leimata luitung a huai project kibawl tutan in Rs. 164 crore bei a, zawhsiang na ding in Rs. 1325.78 crore bikhiah thak in om hi.
    Tuni a Cabinet Meeting in Lilong Nungei a vangtah huaitak thiltung tawh kisai tutan khua om dan genkhawm uh a, huai buaina a si Arif Khan innkuante tungah govt. paidan dungzui in compensation Rs. 5 lakh piak ding in leng thupuk uhi.


YMA Lamka Branch in tuni’n kum 60 chinna lawm
Lamka, July-8: Hmuia Veng a YMA hall ah Young Mizo Assn (YMA)  Lamka Branch in zan apan kum 60 chinna Diamond Jubilee lawm uh a, tuni zinglam dak 11:00 in main day program zang uhi. Huai ah Chief Guest in JC Ramthanga, IAS, Principal Secy/Manipur leh Lungmuana Lakher, IAS, Principal Secy. Manipur pang uh a, Jubilee Pa in Lalbiakzuala, President, Central YMA pang hi. J.C Ramthanga in Diamond Jubilee suang hong a, khualliante’ makaih in Jubilee dakpi 60 vei tumging uhi. Hall Programme ah B. Lalramsanga, Ex-Secy, makaih in member sisate suunna om a, Lungmuana, IAS in Souvenir hong hi. Tua banah, Sport Sub-Committee te’n kipahman hawmkhia uh a, YMA Lamka Branch Cultural Troupe te’n cultural dance a neih ban uah Jubilee Zaipawl te’n YMA lapisa uhi.YMA Lamka branch in poimawh banga zat ding 407 Pick-up truck a lei uh, Rev. Vanmawi in Pathian kiangah la'n hi.


LOCAL NEWS:
Dist Level awareness prog. om
Lamka, July-8: National Commission for Protection of Child Right (NCPCR), Manipur Comm. for Protection of Child Rights (MCPCR) leh Manipur State Legal Services Authority (MASLSA) saina in tuni’n Tuibuong/Tuibong a Dist. Training Centre ah  POCSO Act, Justice & Juvenile Act, Right to Education Act leh Child Labour (Prohibition & Regulation) Act tawh kisai Dist. Level Awareness programme om hi. 
    L. Mangkhogin Haokip, IPS SP/CCpur in  mahni dikna leh tanvou diktak ngah theihna dia Act tuamtuamte theih poimawh a, sual thilhihtheihna douna ding in  kuapeuh pangkhawm dingin ngen hi. Leikho Kipgen, CJM/CCpur leh Kim Shoute, Dist & Sessions Judge, CCpur te’n leng uap in thugen uhi.
    Technical session ah Bobby Singh, Consultant, MCPCR; Sangboi Gangte, Police deptt., K. Pradipkumar, member MCPCR; S. Shyamcharan Singh, member MCPCR; Binobala Nongmeikapam, Dy. Dir. (WP) leh Kh. Rajlakhshmi Devi, member MCPCR te’n thupi tuamtuam zangin sinsak uh a, Civil Police leh Civil Society Orgn. tuamtuam akipan makai tamtak tel uhi.


Dist. Level Sc Exhibition & Maths competition om
Lamka, July-8: ZEO/CCpur nuai a Dist. Board of Edn, SSA saina in tuni’n Vimala Raina H/S ah ‘Dist Level Science Exhibition & Mathematics Competition for Upper Primary Schools 2016’ om a,  Science competition ah ‘Science: Water Harvesting’  leh Mathematics competition ah ‘Mathematics: Daily Mathematics’ chih thupi zangin govt school  tuamtuam 7 akipan student 14 kidem  uhi. Sunnung in prize hawmna om a, huai ah Chief Guest in T. Goukhomang, ZEO leh Functional President in Lalthanzam Infimate, BO HQ, DC/CCpur uhi. Science exhibition ah L. Lamsuanpau Ngaihte of  Vimala Raina H/S 1na la  a, Chingmuankim of  Phungkhothang Govt. H/S  2na leh Angeli Kumari of Tuibuang Jr. H/S in 3na la hi. Maths competition ah Letminlun Haokip of INA H/S in 1na la a, Chingroumawi of Phungkhothang Govt. H/S in 2na leh Thanggoulal of Tuibuang Jr. H/S in 3na la hi. Competition ah 3na tan  kipahman in Gold Medal, Certificate ban ah Rs. 1,000/-, Rs. 800/- leh Rs. 500/- piak hi uh a, a telteng consolation prize  Rs. 300/- + certificate piak hi  uhi.


Numeite’ sum muh dingdan sinsak
Lamka, July-8: SBI-RSETI sensakna tungtawn in CT Lian Guite, Faculty, SBI-RSETI in tuni sunnung dak 2:30 in Elim Veng a KG Colony ah Elim Veng huapsung a numeite’ entrepreneurship awareness programme neihpih a, huai hun ah mi 15 vel kihel uhi.  CT Lian in, khut nasep a sum muhkhiak dingdan, mahni pasalte sum muhkhiakte invest banah sum koihching ding dan tawh kisai sinsak hi.  Zinglam in New Lamka  bazaar nupite neihpih in, tamtak in phattuampih ahihdan gen uhi.


AMWTSPC-M (2013 Batch)  pawl meeting ding
Lamka, July-8: All Manipur Written Test Successful Candidate of Police Constable Male- AMWTSPC-M (2013 Batch) pawlin July 10, 2016 suunung dak 1:00 in IB Road a KKL Complex ah joint meeting nei ding uh a, huai hun ah maban kalsuan dingdan genkhawm ding uhi. Huai meeting ahihleh CCpur branch in makaih dinga, Hill Dist tenga makaite’ leng kihel ding uh hidan in thu kiza hi. Member admit card xerox copy leh membership fee pe nailoute’n meeting hun ah tawi dingin leng theisak uhi.


JAC makaih in consultative meeting
Lamka, July-8: JAC against Anti-Tribal Bill makaih in July 9, 2016 zinglam dak 10:00 in Hiangtam Lamka a YPA GHQ Hall ah joint consultative meeting om ding a,  huai ah bill 3-te tawh kisai a maban kalsuan dingdan kikum ding uhi. Hiai hun ah Manipur singtangmite maban ding awlmawhna nei kuapeuh tamtheilam tel di’n JAC in ngen hi.


Police te’n Jail ah koih uh
Lamka, July-8: Police te’n zan in CJM/CCpur ah Seiminlal Haokip @ Lalboi Haokip (25) s/o Seimang Haokip of Laijang village pawkhia uh a, court thupiak bang in Police te’n Jail ah koih uhi. Seiminlal Haokip ahihleh June 29, 2016 nitak dak 8:00 velin Khawmawi lei (bridge) ah Lalbabu Gupta (34) s/o (late) Anandi Shah of B. Vengnuom in a zat Honda Activa  (No. MN02B-3287) alaksak ziaka Police te’ mat hi a, Police te’n FIR No.34 (6) 2016 CCP-PS U/S 397/34 IPC registered uhi.


Nodal Officer, MDM in pekhia
Lamka, July-8: Kaikhanlian Guite, Nodal Officer, Mid Day Meal & DI of schools, CCpur Block in tuni zinglam dak 11:00 in CCpur govt H/S ah ZEO leh ADC/CCpur nuai a Mid Day Meal ngah (enjoy) school 462 te’ ading towel leh detol handwashing hawmkhia hi. School tuamtuam tuni a lakhalou te’n July 11, 2016 in laktheih ding hi.


HSLC Comparmental exam om
Lamka, July-8: HSLC Private Centre Committee saina in  New Lamka a Ebenezer Academy ah tuni’n  Class X (HSLC Compartmental) exam om, ZEO/CCPur in exam centre enkhia in exam siangthou mahmah hi. Exam hun ah damlouh ziaka buaisia omkhak leh chi’n Medical Deptt. te Ambulance gari tawh duty uh a, student te’n  Maths, English, Science, Social Science, Home Science, Meitei Mayek leh Higher Mathematics subject exam uhi. Regular candidate compartment mi 396 lak ah mi 2 kia absent uh a, external compartmental exam mi 17te bel avek un present uhi.


Workshop on New Pension Benefit Scheme
Lamka, July-8: CCpur Dist. Council Teachers’ Assn. (CDCTA) saina in tuni zinglam dak 11:00 in IB road a Synod Hall ah “One Day workshop on New Pension Benefit Scheme” for 2006 &  2010 batch) om hi. Huai ah Tualkhanlal, President CDCTA in 2006 leh 2010 batch-te govt pension in huamkha nawn kei mahleh govt in sum koihching nang scheme tuamtuam bawl thak hi’n  gen hi. Huai hun ah SBI/CCpur Branch apan S. Minlun Neihsial in teacher-te adia hamphatna tuamtuam bank in a bawlsakte pulak in apply theih ding dan tawh kisai sinsak a, SBI Life Insurance Company, Imphal Branch apan S. Daren, Bussiness Development Manager in Life Insurance tawh kisai sinsak hi.


Career Guidance om ding
Lamka, July-8: The Helping Hand Free Coaching, Mualkoi saina in July 9, 2016 zinglam dak 10:30 in Covenant Children’s Home Auditorium ah Career Guidance om ding hi. Session 1 ah Motivation pansan in Chingboi Tombing, Counsellor in sinsak ding a, Session 2 ah Entrepreneurship tawh kisai CT Lian Guite, MBA , Session 3na ah Professional Career tawh kisai Dr. Ginsuanthang Suantak, MBBS, Session 4na ah General Career tawh kisai Major C. Tonsing, Gorkha Regiment in sinsak ding hi.


HNA in thusuah bawl
Lamka, July-8: Japhet CC Mawia, Secy., Information, Hmar National Army apan thusuah kimu in ataklatdan in, July 5, 2016 a huhamtak a HNA Founder President Lalthangsang Intoate thahna tawh kisai hoihtak a suizui  hilel a, atung uah HNA in action khauhtak la ding hi’n gen hi. President om nawnkei mahleh HNA beilou a, nam dam ding a naktak a panla zel ding hi’n taklang hi.


SUUNNA:
Mr. Paukhojam (75) h/o Demkhovung of Mualveng, Hiangtam Lamka tuni zinglam dak 9:45 velin awmna in si a, sunnung in Lamka hanmual ah kivui hi.


IMPHAL NEWS:
CM in kisakhawl di'n ngen
Imphal, July-8: Congress Bhavan ah tuni’n Imphal Municipal Corporation (IMC) a Mayor, Dy. Mayor leh Congress Councilor-te kipahpihna hun zatna om a, huai ah Chief Minister O. Ibobi in Election nawn ah Congress te’n vaihawmna a let theihna ding un Congress leader leh worker-te kisakhawl ding a ngetna bawl hi. Congress party te’n term 3 a kizom in mipi adia nasem in project leh welfare scheme tuamtuam semsuah uh a, himahleh project leh scheme khenkhat zawh siang louh-te tu term sung a zawhsiang man ding hilou a, huai ziakin Congress te’n election nawn ah vaihawmna a let uh ngai chi’n gen hi. IMC poll dungzui a Congress in mipi muanna ngah lai hi’n gen hi. Helpawl khenkhatte’n kum 2012 a election hun in Congress-te campaign a neih ding ‘ban’ in party dangte khahkol mahle uh Congress in vualzawhna ngah veve a, 2017 kumbul a election om dia gingtak hi a, huai ah election campaign dia govt. nasepkhiak-te taklat ngai hi’n leng gen hi.


Business leh deposit bawl thei ding
Imphal, July-8: Manipur govt. thunuai a SPSUs & SLASs, Local bodies leh statutory banah non-statutory bodies-te busineess leh deposits kum 2016-17 sung adia sai thei dingin bank 16 in chitna nei uh a, huai bank-te Maharashtra, Canara Bank, Central Bank of India, HDFC Bank, Industrial Development Bank of India, Punjab National Bank, State bank of India, Syndicate Bank, United Bank of India, UCO Bank, Union Bank of India, Manipur Rural Bank, Imphal Urban Cooperative Bank Ltd, Manipur Cooperative Bank Ltd, Moirang Primary Cooperative Bank leh Manipur Women Cooperative Bank hi uhi. Official thusuak in March 31, 2016 tan a performance dungzui a CD ratio a tawmpen a  40%, Annual Credit Plan (ACP) - Minimum achievement of 75% of the target for the Financial Year 2015-16 leh Priority Sector Advance- atleast 50% of the target for the priority sector lending under ACP 2015-16 chitna nei bank-te hi’n taklang uhi.


Manipur apan nurse 100 ngen
Imphal, July-8: Dr. O. Ibomcha, Director, Health Services, Manipur govt. in tuni a media-te tawh kimuhna ah Trinidad leh Tobago gam a Ministry of Health a Director General khat in March kha a Yaoshang festival hun in phone tungtawn a Manipur apan trained Nurse 100 pe ding in ngetna bawl a, Nurse te’n lakh 1 sang a tam zawlou lawh la ding uh chi’n gen a, himahleh Nurse-te bitna piak theihna ding in Union Minisitry of External affairs tungtawn a ngetna bawl dia theisak hi’n gen hi. Chief Minister in JNIMS a May 13, 2016 ni a International Nurses day zatna hun ah India gamsung mun tuamtuam a Manipur nurse-te nasep hoihlam ah minthang ziak a Japanese Embassy in Japan a sem dia Manipur apan Nurse 15,000 lak sawm uh chih a gen tungtang theikha lou hi’n leng taklang hi.


UKLF a Secy. (External Affairs) kivui
Chandel, July-8: Chandel district sung Sugnu kianga Kholim village ah zan in postmortem bawl zawh nungin United Kuki Liberation Front (UKLF) a Capt. M. Jamkholal Zou @ George @ JM Zou, Secy. (External Affairs) vuiliam in om a, huai ma in a tenna inn ah suunna hun zat in om a, UKLF te’n hankuang UKLF flag in tuam uhi. Huai ah UKLF Chairman SS Haokip in kipumkhatna leh muanna leh bitna omna ding in kum 2000 apan hun tuamtuam ah  KNO tawh kilemkikna bawl uh a, himahleh KNO te’n phattuamna a zang in peace deal nung tanpha a UKLF makai thahsak uh chi’n gen hi. KNA/KNO  Chief in Command (C-in-C) lui Khaimang Haokip @ Vipin Haokip in kum 2003 in kilemna bawl ding in palai 3 vei a sawl ziakin UKLF te’n ana pom uh a, kilemna om nung kha 2 zawh in Asst. Project Officer Alex Zou leh Sgt. Maj. Houlal Haokip that uhi. Khaimang sihnung in KNA a C-in-C thak Seijang Haokip in kilemna dia pan alak thak dungzui in Sita village ah Village Chief leh CSO makai-te telin kilemna om nawn a, huai nungin KNA te’n kilemna kalh in kum 2006 in Jamkhothang Zou @ Solomon, Home Secy. leh Hemsei Mate @ Thoma, PRO telin cadre 4 kaplum uhi. KNO President PS Haokip in hunpaisa-te mangngilh a kingaidam tuah dia a nget dungzui in a 3veina din Tengnoupal ah Oct 24, 2015 in kilemkikna om a, huai hun Politician tallang, Saptuam leh CSO makai tuamtuam te’n uap uh a, kha 8 leng pai nailou in KNO-te khut ah Capt. Jamkholal Zou pianna pa’n a hinna a mansuah bang in aman leng mansuah a, KNLF/KNO te’n July 2, 2016 in Moreh apan pimang in a vuaklup nungun a siluang lui a pai uh hi’n gen hi. KNO-te gamtatna kuapeuh in a mawhpaih ding uh chi’n gen a, KNO te’n Capt. Jamkholal Zou thahna a kigolkhakna neite tungah capital punishment a piak ua leh UKLF te’n kilemna beisak lou ding uh hi’n leng taklang hi.


Accident a liam naupang 1 si :
Mihing guh vuak mukhia
Imphal, July-8: Mayang Imphal a Uchiwa mun ah zannitak dak 9:30 velin Tata (No. MN03T-0337) leh Auto rickshaw kiphu kha a, huai ah Auto a tuang Md. Ismat Khan (6) s/o Md. Tajuddin of Yairipok Santhel Makha Leikai a liam ziakin RIMS Emergency ward ah etkol himahleh a liamna thuak zoulou a si hi’n gen uhi.
    Huailou in Ukhrul district a Shangshak Police Station in a huamkhak Farung village ah zan nitaklam dak 3:30 velin Nungsang luidung a nga beng te’n mihing guh vuak muhkhia uh hi’n kigen hi.


TUNI THUPI:
 “A panna a na migenthei vaihawmna na hekkawi ding ahi kei.”
– Eksodas 23:6


EDITORIAL:
Helpawlte leh i maban ding!
Naga helpawl  NSCN(IM)  leh Assam a ULFA pawlin Centre government tawh kikap leh operation kibawlkhum khawl ding a kithukimna(SoO)  nei uh a, NSCN(IM) leh India govt in kihou lemna  lam naihtou zelin ‘frame work agreement’ tanpha neita uhi. Ahi a, NSCN(IM) leh ULFA in a demand uh ‘Sovereignty’ koihkhia uh hin teh maw chih mipite ngaihdan ahi hi. Huai hikei leh government tawh lamzangtak a kihouna om dingin gintak-huailou hi. Huchi kalah huai thilte mupha in  Manipur phaizang bial ah kiphinna omtou den ahi diam chih leng ngaihdan  om thei a, i maban ding uh kua khut a kinga hiam chih dotna liantak omthei hi.
    ULFA heutu tuamtuamte’ demand poimawh mahmah- tribe 5 te ST status piak dingin Union Home Ministry in pomsak chih ahi hi. Huchih lai in, eisung ah leng ngaihsut ding tamtak om a, Naga-te hi’n ULFA-te hitaleh mihing (population) tam  mahmah tuak hi uh a, ei lawi  2/3 lakh phalahte bangziaka khekhat suankhawm theilou leh  kipumkhat theilou a omden ihi uhiam chih ngaihsut tham ching hi. I kim i kiang banah, Manipur politics dinmun thuktak a ngaihsut hunta  a, mite’n bang plan leh policy nei ahi uhiam chih  tuni dong man thei nailou ihih ualeh heutu lawh sam, Nam lawhsam i hikha diam chih ngaihsuttak ahi hi. SoO a om helpawl leader bangzahhiam mulkimna bei in thah in omta a, hong omtou zel lai dingin kilang hi. Huai in kipumkhatna sangin siatlam nawtzaw dingin kilangsak  hi.
    I maban ding uh kua khut ah kinga ding hiam chih dotna liantak ahi a, khangthakte’ a dingin leng ngaihtuahna piak hun petmah hi. University tuamtuam ah research scholar hunkhop i omta a, tuate’n hon ngaihtuah vengveng ua, ma hon phut uh kisam hi. Unau Nagate’n lampi teng phusuak khopin kilangta a, eilawi pau kibang, tawndan kilam danglou leh khawsa khawmte tuni chiang a paidan tuamtuam nei a i om uh hun nawn mahmah lou hi. Kipumkhatna tellou in i tup a lawhching  kei ding chih theihchet poimawh  hi.
    Maban ding sautak enkawm in gen lehang, Manipur a office tamzaw ah pau kitheituah eimi   officer bangzahhiam  om uh a, tualou in staff leng tamtak i om ua, Pathian vualzawlna thupitak  i chilou theikei hi. IAS/IPS/IFS/IRS/MCS /MPS/MJS ahihkei leh top officer 300/400 bang i omzou phial diam chihtheih hi. Mipi palai dia telkhiak MLA-te leh bureaucrat te’ kal ah kizopna leh kitheihsiamna poimawh petmah dingin gintak-huai a, tua ziakin mipi palaite’n i officer-te uh a muhsit (under estimate) hetlouh uh deihhuai hi.
    A protocol dan tak hileh MLA-te dan bawl leh vaihawmtu ahihziak mah un IAS/IPS officer leh adangdangte amau nuai a om mah ahi ua, himahleh, amau pilna leh siamna ziak liauliau a hiai tan tung uh ahihman in nelhsiah theihvual hilou uhi.Adiak in state in IAS/IPS/IRS i chih te thuneihkhum  mahleh centre a liauliau hizaw un a kilatna om hi. Manipur telin India gam koimun peuh hitaleh top official khat in thil ahihtheih lianlaw mahmah a, tuaziakin MLA-te tawh plan/strategy hoihtak a khawhkhawm ua, gamsung khantouhna dia pan alak  tuak ualeh bangziaka i gam khangtou tuanlou ding hiam chih theih in om hi. MLA khat in lehkha thei in theikei leleng, IAS/MCS leh atuamtuamte ama nuaia om  himahleh a nelhsiah bawl a, amah thutum a vai asai leh kituisa buahthei a, top official te’ kithuahpihna tellou a MLA khat in na kizom zarzar a sepkhiak chih thil haksa mahmah hi dingin up-huai hi.
    Officer -te lah ki-officer saklua, MLA-te lah ki-MLA saklua chih pen hun paisa in state khenkhat ah leng  omkha zeuhzeuh mahleh tu in bel eilak ah hibangte om dingin ngaihsutna i neikei a, MLA chih ziaka officer-te a suak-le-sal bang a zattheih vual ahihlouh dan uh mipil leh siamte’n theilel  uhi. Tuamah bangin, MLA pen bangchiteng mawl leleng officer-te’ adingin  nelhsiah  vual hilou a, khut kilen a a pankhawm diamdiam uh kiphamawh hi.
    Manipur a assembly seat 60 om lakah phaizangbial ah seat 40 om  a,  singtang gam akipan  seat 20 lel om hi. Seat 20 lak ah seat 11 te Naga bial ah lut a, adang 9te eimi kichi theite lelte hihang  hi. Seat 9 lak ah CCpur apan seat 6 leh Sadar hills apan seat 3 ahi hi. I dinmun  uh hiai dan ahih manin, ei kigawm kei lehang kuaman hon gawmlou ding a, iki gawm a kal i suankhawm leh Manipur ah dou vual hilou khop a mite’ huphulh thamching ding ihihdan kilang  hi.