MANIPUR EXPRESS | JUNE 24, 2016

HEADLINES:
Modi leh China PM minute 50 sung kihou
India in NSG member hihna di'n China gupna ngen 

New Delhi, June-23: Nuclear Suppliers Group (NSG) member khat hiding India in ngetna abawlte lawhchin theihna dingin Chinese President leh Indian Prime Minister Narendra Modi tuni’n minute 50 sung kihou uh a, lungsim siangthoutak tawh China in India gupna pe ding in Modi in ngen hi. Shanghai Co-operation Organisation (SCO) a India alut nuam ziakin Chinese President  in kipahthu puang a, Prime Minister Modi inleng NSG block tungtang a China in gupna pe dia lam-en ahihdan hilh in kipahthu gen hi. SCO Summit uap ding in Prime Minister in tuni’n Uzbekistan capital Tashkent zuan a, President tawh gamnihte kitanauna hatsak dingdan genkhawm uhi.

    Nuclear sector enkaitu NSG member in gam 48 om uh a, NSG member te’n  nuclear technology tawh kisai gamdangte kiangah zuaksawn thei uh a, gamdangte’n leng amau kiang ah nuclear tawh kisai vanzat poimawhte pekhe thei uhi. Tulel a NSG member-te bel Argentina, Australia, Austria, Belarus, Belgium, Brazil, Bulgaria, Canada, China, Croatia, Cyprus, Czech Republic, Denmark, Estonia, Finland, France, Germany, Greece, Hungary, Iceland, Ireland, Italy, Japan, Kazakhstan, Republic of Korea, Latvia, Lithuania, Luxembourg, Malta, Mexico, Netherlands, New Zealand, Norway, Poland, Portugal, Romania, Russian Federation, Serbia, Slovakia, Slovenia, South Africa, Spain, Sweden, Switzerland, Turkey, Ukraine, United Kingdom leh United States hi uhi.
    India in NSG membership a nget tungtang Turkey, Austria, New Zealand leh Ireland  in gupna pelou in kalh uh a, China inleng avangkim in India laklut deihlou ahihdan taklang ngei hi. China telin gamdang bangzahhiam in NSG membership ah reservation nei uh a, India inleng China gupna angah leh member khat hithei ding hi’n kigen hi.


Regional Party 6 in NDA nuaia NEDA zom uh
Guwahati, June-23: Northeast India region kichi India malsuahbial a regional political party 6 in BJP makaihna National Democratic Alliance(NDA) nuai a party thak North East Democratic Alliance (NEDA) kichi zom uh chihthu om hi. Tuate lak ah Mizo National Front(MNF) leh Assam a Asom Gana Parishad(AGP) leng tel uhi. AGP leh MNF in NEDA a zop utawh kiton in huai in India malsuahbial a state dangte ah gen nei ban ding a gintak hi a, mi tamtakin ngaihven uhi. Zan in Guwahati a meeting ah Asom Gana Parishad, Mizo National Front leh Bodoland Peoples Front (BPF) makaite tel uh a, tua hun a a genkhawm teng uh media tungtawnin kimtakin puankhiak hilou hi.
    North East Democratic Alliance (NEDA) bel BJP makaih National Democratic Alliance (NDA) atel hi a, thusuak kingahdanin, Guwahati a meeting ah BJP General Secretary Ram Madhab in uap chihthu om hi. Huai ah  Northeast state a Chief Minister khenkhat leng  tel uh a, bangteng genkhawm uhiam chih theih hikei mahleh tunung sawtlou in Northeast state khenkhat telin state tuamtuam a   assembly election ding tungtang genkhawm uh hidan a gintak hi a, kum 2019 chianga Lok Sabha election om ding leng genkhawm uh chihthu om hi. Assam Education Minister banah NEDA convenor Himanta Biswa Sarma in  July 13, 2016 in  NEDA  convention(khawmpi) masa Guwahati ah  om ding  chi hi.
    NEDA member-te’ lakah Meghalaya apan UDP leh NPP te leng tel uh a, amaute banah Mizo National Front, Peoples’ Party of Arunachal, Asom Gana Parishad, Bodoland People’s Front leh Indigenous Peoples Front of Tripura tel uh hi’n kigen a, Arunachal Pradesh, Nagaland, Assam leh Mizoram Chief Minister-lui Zoramthanga  meeting a telin thugenna hun leng zang uh chih ahi hi. Hiai hunah India malsuahbial khantouhna ding telin thu poimawh tuamtuam kikumkhawm uh chih unofficial thusuak in gen hi.


JCILPS in dakkal 48 sung General strike apuan khauh
DGP panlakna in khualzin tamtak Lamka tungthei
Lamka, June-23: Manipur govt in JCILPS Convenor-lui Kh. Ratan tung ah wanted tag a koih lakkhiak deih  JAC te’n June 22 zankim apan dakkal 48 sung state-wide bandh a puan ziakun tuni’n Manipur ah hindan ngeina buai a, Imphal leh Dist HQ-te kikawmna nawngkai vek hi’n kigen  hi.
    Bandh volunteer-te Moirang leh Tronglaobi ah duty uh a, Lamka-Imphal kikawmna nawngkaisak uh a, zinkhe dnga airport zuante leh Imphal a ki-ensak dia kuante tanpha  a hihbuai ziakun lenna  a zin dingte tamtak pai theilou uhi.
Gamdang akipan hongpai airport ah tangden a hunkhop om ziakin, nitaklam dak 3:00 velin LM Khaute, IPS, DGP (Manipur) in escort a ngaihtuahsak ziakin Lamka hongtung thei uh hi’n kigen hi. Bishnupur commando, Nambol Post a omte’n Airport-Bishnupur tan escort uh a, Bishnupur commando te’n Moirang tan, Moirang commando te’n Moirang- Kangvai tan escort uh a, Kangvai akipan CCpur police te’n Lamka tan escort uhi. General strike bel June 24, 2016 zankim tan omlai ding hi’n kigen  hi


LOCAL NEWS:
TN Home a om naupang 12-te pikhia
Lamka, June-23: Tamil Nadu state a Mary Daina Samuel Children Home, Poliwakam, Thiruvallur a om CCpur Dist. apan naupang kum 10­15 kikal mi 12 te tuni zinglam dak 10:30 velin District Child Protection Unit (DCPU), CCpur te’n damtakin Imphal Airport hon tunpih uh a, DCPU te’n Child Welfare Committee (CWC), CCpur khut ah pekhia in CWC te’n naupang-te’ nu-le-pa kiangah pekhia uh hi’n Ms Florence Haokip, Chairperson, CWC apan kiza hi.
Naupang 12 te bel nu-le-pa khawsak haksat ziakin kum 2011 in Tamil Nadu a Children Home ah koih in om uh a, nu-le-pa te’n apikhiat dek chiang un pikhe theilou uh a, amau leng DCPU te kiangah thil omdan report bawl uhi. CDPU in Child Welfare Committee/CCpur leh Deptt. of Social Welfare, CCpur panpihna tungtawna naupang 12-te pikhethei  uh hi’n kigen hi.


S.K Oil Sub Dealer-te’n la di’n theisak
Lamka, June-23: DC/CCpur in CCpur Dist. ah S.K Oil Sub Dealer te’n tukha sung a June 2016 quota direct a DC office in Advice List apiak dungzuia Sub Dealer te’n identity card tawia kilak chiat ding in theisak hi. DC office a issue Identity card nei Sub Dealer te’n K.Oil issue zah (quantity), date of issue leh signature bawlchiat ding in DC/CCpur in theisak hi.


CM tawh kilemtheih kei leh new recruitment khak di’n thupuk uh
Lamka, June-23: All Manipur Written Test Successful candidates of Police Constable (AMWTSCPC) Male -2013 batch, CCpur branch pawlin tusun dak 12:00 in IB Road a KKL complex ah meeting nei uh a, thupukna tuamtuam bawl uhi. Meeting thupukna tawh kisai L. Samuel, Chairman apan kizadan in, July 4, 2016 a Manipur Chief Minister tawh kihou ding tawh kisai genkhawm uh a, huai ah CM in a kichiamna bang a tangtun kei a viva voce suah nang tawh kisai a gelhthawh apiak kei leh dan tawh kituak in hekna bawl a rew recruitment khaksak dingin thupuk uh hi’n gen hi. Police Constable Male- 2013 lakna dingin post awng 2000 om a, huailak ah Phaijang mite adia 800, SC/ST/OBC leh a dangdang adingin post 1200 hi a, CCpur Dist ah written successful candidate 913 om hi’n kigen hi.


Anngawl thumkhawmna om ding
Lamka, June-23:  June 25, 2016 zinglam dak 10:00 akipan sunnung dak 1:00 kikal in Rengkai Community hall ah “Hieng ang hun a ding hin ani el nawm a nih lalnina I chang hi” thupi zangin ann-ngawl thumkhawmna om ding hi. Huai ah Miss May Rose leh Rev. Lalpienglawm-te convenor in pang ding uh a, Rev. Lalpienglawm, AGEI in session masa makaih in Rev. Lalngailien, RPC in session 2na leh Rev. Benjamin Sakum, EFCI in session 3na makaih ding hi. Huai hun ah gam leh nam leh khawtang siatna tawh kisai  awlmawhna neite telthei ding uh hi’n kigen hi.


Galvan leh khamtheih tawh mankhia
Lamka, June-23: Police apan kizadan in 7-Assam Rifles te’n Lamka leh Moirang kikal ah galvantawi hidia ginlelh leh khamtheih zuak a kipei (drugs peddlers) om chih report amuh ziak un June 22, 2016 nitaklam dak 5:35 velin Koite road ah frisking bawl uh a, mi 3 mankhia uhi. Amaute- Seitinlal (29) s/o Jangthang of D. Vaison village; Zangkhogin (37) s/o Seikhopau of V. Bethel leh Tongmang Guite (28) s/o Doukhothang of Saikul, Senapati Dist. hi uhi. 7- A/R te’n mi 3 apan country made 9mm pistol 2, magazine 2, atang 2, mobile phone 5, simcard 2, memory card 1, Scooty Yahama Ray- 2 (No. MN01C-8081), Honda Activa (No. MN02A-7928), Rs. 3492, SP tang 344, Heroin (No.4) gram 5 mukhia in June 22, 2016 nitak dak 9:30 in CCpur PS ah pekhia uhi. Police te’n tuni’n mi 3 te CJM/CCpur ah pawkhia uh a, court in June 30, 2016 tan Police custody ah omding in phalsak a, FIR No.32 (6) 2016 CCP-PS U/S 21  NDPs Act & 25 (1-C) A. Act. registered uhi.


Biakinn 7 kigawmte’n VBS zang zou
Lamka, June-23: Kamdou veng leh Tuibuong area a Biakinn 7 kigawm GENZLP (Gangte Baptist Association, Emmanuel Church, New Life Baptist Church, Lutherans leh Presbyterian Church) te’n June 20, 2016 apat Grace Academy School, Tuibuong ah 4-Days Vocation Bible School (VBS) anei uh tuni’n uhi. Tuni program ah Rev. Dr. Ginkhanmung, MELC in Marka 10:14 pansan in naupangte Pathian thuhilhna nei a, Vangam (paradise) pen naupang bang a lungsim siangthoute a ding a kibawl ahi chi’n gen hi.


MLPO in kipahthu genna leh kipahpihna
Lamka, June-23: Munluo Phungpi Organisation (MLPO) HQ makaih in June 29, 2016 zinglam dak 10:30 in Chinkham Modern School, Zomi Colony ah MLPO sung a lawhchinna ngahte kipahpihna leh kipahthu genna program omding hi. 1st Session ah mipi’n thumkhawmna neiding uh a, Pastor Khamkhansuan in Maitam latna, IRS apan Bank PO a lawhchinna ngah mi 7 banah tukum a class X & XII passed-te Pathian kiang ah thumsak ding hi. 2nd Session ah kipahpihna program om ding a, Dominic K. Munluo, Secy. MLPO in lawhchinna ngahte pulakna, present piakna nei ding a, Upa Chinkham, Chief of Zomi Colony, Dr. DK Mang leh Michael Ginzasuan, DSO/CCpur te’n hanthawnna thu gending uh a, lawhchinna ngahte apan thugenna omding a, tua zawh in  ankuang umkhawm ding uhi.


PTC Mzr HQ election sai di’n zinkhia
Lamka, June-23: PTC Mizoram HQ in June 25, 2016 in Teikhang khua Mizoram ah General Assembly cum Presidential Election nei ding uh a, huai hun zatna uap leh election sai ding in John K Ngaihte, Gen. Secy, PTC-GHQ makaih in H. Pauzalal, Secy (Internal), PTC-GHQ leh Chinkhanmang Ngaihte, Secy (Orgn), PTC-GHQ –te tuzing dak 7:00 in Hiangtam Lamka a PTC Office akipan L. Pumlianpau Ngaihte, President, PTC GHQ in khakhia in C. Hangshing, Member, CWC in thumsak hi. Huai hun ah Hiangtam Lamka Hausa G. Thangkhosuanmung, EM ADC/CCpur leh T. Khaikhomang, Chairman, Finance Committee, ADC/CCpur leng telin kul leh poimawh a zat di’n sum bangzahhiam tuak pia uhi. 


SUUNNA:
T. Chinzabiak (34) s/o T. Kamkhosuan of Tuithapi village, zannitak in Raj Polyclinic, Imphal ah hepatitis ziakin si a, tuni’n kivui hi.
C. Lalthansanga (82) s/o (late) Liante-a of Hollywood Street, Hiangtam Lamka tusun dak 12:45 velin sinna in si a, June 24, 2016 in Lamka hanmual ah kivui ding hi.
Lamkholhing Lupheng (53) w/o Limkhopao Lupheng of  Thingkangphai, tuni nitaklam dak 5:00 velin cancer in si a, June 24, 2016 in kivui ding hi.
Luaifelkim (2 ½ yrs) d/o Paukhomlian of Lingsiphai zanitak dak 8:35 velin awmna in Dist hospital ah si a, tuni'n Lingsiphai hanmual ah kivui hi.


IMPHAL NEWS:
CM secretariat ah press conference om
Imphal, June-23: CM Secretariat a cabinet hall ah tuni nitaklam dak 4:00 velin press conference om a, huai ah CM O. Ibobi in Union Ministry of  Youth Affairs & Sports (YAS) in Manipur ah National Sports University (NSU) bawlkhiakna dia gam acre 200 poimawh ding a proposal a bawl uh state govt. in Union Ministry of YAS kiangah gam acre 336.93 a lian pekhin uh a, NSU bawl khiatna mun ding Ministry a expert team te’n Aug 2014 in mun 6 enkhia chi’n gen hi. Huai nungin Ministry of  YAS tungtawn a Govt. of India  leh state govt. in Thoubal district a Yaithibi Khunou ah NSU bawlkhiak ding in Aug 27, 2015 in kilemna bawl uh a, huai ding a state govt. in Yaithibi Khunou village ah manbei in gam acre 336.96 a lian pia a, maban hun ah NSU keklet theihna dia state govt. in acre 400 tan piak sawm chi hi. Ministry of  YAS in acre 200 a ngetna lakah state govt. in acre tamzaw pia hidan in gen hi. India govt. in NSU  bawlkhiak theihnang in parliament ah a kisaipih bill pass a hih theih nang leh Khuman Lampak Sport Complex ah infrastructural facilities om hun ah Sports University nasep pat theih nang a kithuahpih ding in ngetna bawl a, hiai hun Chief Secretary leh Council of Minister te’n uap uh hi’n gen uhi.


Lampi km 4376.139 a sau puahhoih
Imphal, June-23:  State Public Works Dept. (PWD) in 2004-05 to 2015-16 sung in lampi km 4375.139 a sau puahhoih uh a, huai lakah Non-Lapsable Central Pool of Resources (NLCPR) fund tungtawn in km 81.80 leh Central Road Fund (CRF) tungtawn in km 163.05 puah hi a, black topping tan in km 2456.39, Sand single in km 678.59 leh WBM tan in km 339.39 puah hi’n gen uhi. Huai sung mahin PWD in lei (bridge) 84 bawl uh a, huai lakah NLCPR fund in lei 20, CRF fund in lei 1 bawl uh a, tunitan in lei 84 bawlna  nasep zousiang uhi. NEC in work 5 leh km 230.72 a sau lampi puah nang banah SBT 1 bawl nang sanction a, lampi km 230.72 lakah km 124.20 tan ah black topping bawl zawh hi’n gen uhi.
Public Administrative Building (PAB) tungtawn in Churachandpur ah Mini Secretariat bawlna  nasep pailel a, NLCPR scheme nuai ah Ministry of  DoNER in work 25 (bridge 21 leh road 4) a ding in kum 2004 apan tunitan in Rs. 13043.73 lakh sanction a, huai lakah Rs. 1064.80 lakh khahkhe ta a, work 25 lakah work 21 ah nasep zawhsiang hi a, work 4 ah nasep pailel hi’n gen uhi. CRF nuai ah kum 2015-16 sung a ding in Rs. 1230.00 lakh sanction na lakah Ministry of  Road Transport in Rs. 667.00 lakh khahkhia a, NEC nuai ah Kangpokpi leh Tamenglong (119.75 km) kikal a lampi bawlna a nasep pailel a, Tamei leh Tamenglong (49.75km) kikal a lampi bawlna a nasep 80% leh Kangpokpi to Tamei (70km) kikal a lampi bawlna a nasep 75% zawh siang hi’n leng taklang uhi.


General strike in hindan nawngkai sak
Kh. Ratan sanggampa pawkhia
Imphal, June-23: State govt. in JCILPS ex-convener Kh. Ratan tungah ‘wanted tag’ zukkik ding leh Manipur ah ILPS zat ding phutna in “JAC Against The Announcement of Wanted Against JCILPS Leader Kh Ratan and on Implementation of  ILPS” te’n zan nitak zankim apan dakkal 48 sung Manipur pumpi ah general strike a puang un hindan nawngkaisak hi. Imphal area ah bandh supporter te’n mun tuamtuam ah lampi khak uh a, private gari chih louh commercial vehicle tai muh ding tamlou a, sumsinna inn, dukan, bank, oil pump leng educational institution teng kikhak hi’n gen uhi.
    Huai lou in Police te’n tuni zingsang in Singjamei Wangma Bheigabati Leikai ah lampi khaktan pawl a bandh supporter lakah tel JCILPS ex-convener Kh. Ratan sanggampa Kh. Poireiton @ Bobby (33) kichi thudot ding in pawkhia uh a, huai nungin mipi thangpai te’n huai vengsung ah gari taite windshield khet siak sak uh hi’n kigen hi.


Imphal-Moreh kikal ah bandh call off
Imphal, June-23: KSO-GHQ te’n state govt. in June 21, 2016 nitak dak 8:30 vel a Bongjang village gei ah Police commando te’n mi 2 a soisak banuah sum a suhsak uh tawh kisai a kigolh khakna neite dakkal 24 sung a matkhiak ahih keileh June 24, 2016 apan Imphal-Moreh kikal ah bandh bawl sawm uh a, hiai tungtang ah KSO-GHQ leh state govt. lam apan Clay Khongsai, IGP te’n tuni’n Imphal ah meeting nei uhi. Huai hun ah IGP in KSO-GHQ te thilphut etkai banah a kinthei pen a kigolh khakna neite matkhiak ding a chiam ziakin bandh call off uh a, state govt. lam apan thilchiam sepsuah ahih keileh kiphinna khat peuh pan ding uh hi’n taklang uhi.


Gamgi thu ah kikaptuahna om; mi 10 liam
Imphal, June-23: Senapati dist. a Maram Khunou leh Khabung Karong khua-te tuni zingsang dak 3:30 velin in gamgi thubuai tawh kisai in thau in kikaptuah uh a, huai ah Khabung Kkarong apan mi 10 liam uh hi’n kigen hi. Liamna tuak mi 10 lakah mi 5 – Th. Viinii (19) s/o P. Thole of Vakho leh Sahiiinii s/o Daile of  Vakho-te Shija Hospital  leh  Raj Hospital ah P. Daihrii, V. Paul leh A. John-te puaklut in om uh a, lauhthawng huai dinmun a om uh hi’n kigen hi.
    Akigendan in Maram Khunou leh Khabung Karong te’n hun sawt sim apan gamgi tawh kisai in thubuai nei uh a, khua 2 kal ah luita khat mahleh Maram Khunou te’n kal 3 paisa in lui kan in Khabung Karong khua lam ah inn 60 val bawl uhi. Maram Khunou-te kiangah inn bawl tawpsan ding a thupiak himahleh a tawpsan louh ziak un Khabung Karong apan mipi kipun khawm te’n tuni zingsang in inn kibawl-te hihse ding in va kuan uh a, huai hun ah Maram Khunou te’n thau kapkhum uh hi’n kigen hi. Thiltung zak phet in Senapati police leh 35-A/R te’n va delh in mipi sousang-te kham dai uh in thil deihhuai lou tunkhak ding venna in District Administration in 144Cr PC a puan banah khaw nihte vengbit din Senapati police-te koih in om uhi.


NRFM-te bomb bawlna mun luhkhia
Imphal, June-23: Manipur Police leh 12-Bihar regiment combine team te’n tuni zingsang dak 3:00 velin National Revolutionary Front Manipur (NRFM)-te bomb bawlna mun dia gintak Yurembam Mayai Leikai a Nameirakpam Mangi @ Yaima (48) s/o N. Kondum Singh tenna inn ah bomb bawlna a kizang van tuamtuam mankhia uh hi’n kigen hi. Van matkhiak-te gelatine stick 27, detonator 50, feet 6 a sau non-electric safety fuse 2, mobile phone 2 leh Honda Activa 1 hi’n gen uhi. Thiltung tawh kisai Dr. AK. Jhalajit, SP/Imphal West in press-te mai ah Mangi in NRFM-te a dingin bomb factory pankhia  a, innsung a van kimukhiate bomb bawlna a kizang hi a, NRFM-te bomb zat teng Mangi bawl ngen hidan in gen hi. . Police te’n mi huansung ah bomb paihlut leh sum demand thu tawh kisai a mun tuamtuam ah operation a bawlna uah NRFM member 9 mankhia uh a, amau-te thudotna apan Mangi tenna inn luhkhiak hi’n gen uhi.


RIMS ah casualty kikhak
Imphal, June-23: Parliamentary Secy. K. Meghachandra in June 21, 2016 nitak dak 8:30 vel in RIMS a PMR ward ah staff 2 a soisak ziak a ngaihdam a nget ding phutna in zan apan RIMS Nurses Association (RNA) te’n kiphinna pan uhi. Hiai thu tawh kisai in H. Priyadashini, Secy, RNA in media-te tawh kimuhna hun ah K. Meghachandra in ngaihdam a nget masiah RIMS Director leh Superintendent te’n thupe le uh leng kiphinna khawlsan lou ding uh hi’n gen a, K. Meghachandra in a tunga ngawhna nial in a thugen tungtang leng mawhpaih uh a, Lamphel Police station ah FIR file sawm mahle uh FIR latu ding omlouh ziak in 2vei lawhsam uh hi’n gen hi. Huai louin nurse-te kiphin ziak in damlou enkai ding  om louh ziak in Doctor te’n Medicine (Derma-Nepro-Onco) Ward apan damlou 20 discharge uh hi’n kigen hi.


Khamthei hunkhop mankhia
Imphal, June-23: IGAR(S) thusuak in a gendan in Pallel Sector a Moreh Battalion te’n kham theih pua om chihthu a zak dungzui un June 21, 2016 in Moreh Ward. No. 2 operation bawl uh a, huai ah Acti Feel tablet strip 20,000 vel ding mukhia uh a, khamtheih muhkhiak-te Moreh Police station ah pekhia uh hi’n kigen hi.


TUNI THUPI:
 “Toupa’n  gitlouhna tengteng laka kipan in a hon suaktasak ding a, a van-gam ah bittak in a hontun ding; Amah kiang ah khantawn a thupina om hen; Amen”
– II Timothy 4:18


EDITORIAL:
Democracy zatkhelh theih!
India gam kichi mipi’ thuneihna, vaihawmna leh zalenna(democracy) gam hi a, mipi’n a ut teng bawlthei in a ut hunhun un kiphinna neithei uhi. Hiai pen gamsung kivaihawnna tawh kituak ahih phot leh Dan (Indian Constitution) inleng ahon phalsak ahi hi. India mipi’n issue tuamtuam ziakin kiphinna neithei ma hi hi a, himahleh, kiphinna pen hiamgamna tellou ‘peaceful’ ahih ding chih ahi hi.
    Zalenna kichi mihingte’n i zatkhelh khak ding uh alauhuai mahmahna bel omthei tham hi. Ka zalen chih ziaka gamteng sawk chihleng thil kilawm leh dik hituanlou a, government dan in hon kanna tan om thouthou hi. India constitution bel hoih mahmah in thilteng huamvek bangin ngaihin om phial a, England telin gam tamtakin India Danbupi(Constitution) hong koppih uh bang hialin ngaihtheih hi. Thagum-thatang a ut dandan kipumpa veina pen India danbupi inleng phal tuanlou a, tualou in kuate hiam fuihna leh a tawsawnna ziaka buaina bawl chih leng phal hilou hi. Thagum a kinawhna (under duress) ziaka kibeihna tuamtuam omte leng government dan in phal tuanlou hi. India Danbupi a khauhna lam ah bel  mahmah in zahhuai mahmah  hi. India kichi mipi kivaihawmna gam (democratic country) ahi a, huaipen i zatkhelh ding thil lauhuaitak  ahi hi.
    Niteng hunteng chihtheih phialin Manipur state ah buaina a om chi lehang khial hetlou ding hi. RIMS a nurse te’n lungkimlouhna tuamtuam a neih ziakun RIMS hospital nasepna buai mahmah a, tualou in a ut-ut in ut-ut hunhun a bandh/ general strike ahihkeileh economic blockade kichi bawl phutphut ahihdan kuapeuh in ithei hi. 3 Bills deihleh deihlou kalah paidan kikalh nasatak om a, bangtan a omtou lai ding hiam chih theih but ahi kei a, India a democracy i zatdan uh gelthak poimawh petmah hi’n kilang hi. Mipi’ thuneihna, kivaihawmna leh mawhpuakna hi leleng a state government a kinga mahmah dingin muh theih in om hi.
    Manipur in state force tamtak a nei a, tuate leng a gamtat uh kisam mahmah hi. Kua hiam in gari  in kuahiam a hetkhak zek leleng JAC kichi bawlkhia a lampi khaktan theiding mi tamlaw mahmah a, hiai pen i gam paidan ahi i chih nilouh khak ding lauhuai hi. India i chih ‘democracy gam’ ahi a, hiai i zalenna pen ahilou lama izatkhak ding uh lauhuai mahmah hi. I gen taksa bang in Manipur state i chih neuchik ahi a, state government nuai kia security force omte leng tamtak hi a, mun neuchik ah bandh/ blockade ahihkeileh general strike omhun ah leng lampi a zin leh pai mipi nautangte venbitna (protection) pezou ding khopin kiching mahmah uhi.
    Civil society tuamtuam banah mipite’n leng ut hunhun a bandh leh strike bawl phutphut pen i zalenna zatkhelhna hi maithei a, mipi vaihawmna ahi chih ziaka ut dandan a gamtat pen mipi mah hih gentheihna leng hi a, huai in India Danbupi khoihban maithei hi. Tua ziakin a poimawh pen ahihleh, state government hi masa a, azom in district tuamtuam a administrator-te hi uhi. Mipi’ lakah leng hiai tungtang kitheihsiam sak poimawh mahmah ding a, huchi ahihkeileh denchiang in communal feeling ahat tawh kitheihsiamlouhna thupisem tungthei ding in atauh huai hi. Theihkholhlouh ‘bandh’ phutphut ziakin lamkalah mi tamtak thangpaita a, singtangmi hi’n phaizangmi (Chingmi-Tammi) kalah kitheihsiamna hoih zawsem a omna dingin democracy i zatdan uh pilhuai zawsem dia kitheihsiamsakna (awareness campaign) poimawh hi.
    State dangte’n India a democracy paidan zahtak mahmah uh a, Manipur state in democratic country i hihna uh bangchidan a paipih i hihiam chih khawng hon ngaihtuahsak a, singtangmi hi’n phaizangmi hitaleh ut hunhun a bandh bawl phutphut thei itam ziakun atawp chiangin huai in India Danbupi hon kalhkha ngeingei dingin gintak-huai hi. India a ‘democracy’ kizatdan tawh kisai legal expert te’n hon etkik uh a ngaidiam chihtheih phialin om mawk hi.