MANIPUR EXPRESS | JUNE 25, 2016

Worldwide Mourning & Mass Prayer zat hiding
Lamka, June-24: Manipur Assembly in Aug 31, 2015 a Bills 3 a passed ziak un JAC against Anti-Tribal Bills makaihna a singtangmite’ kiphinna June 26, 2016 in ni 300 ching ding a,huai ni in total shutdown leh  bandh omlou ding a, leitung pumpi huap in salphate suunna leh mipi thumkhawmna (Worldwide Mourning & Mass Prayer) a zat hiding chi’n JAC aganist Anti-Tribal Bills thusuak in gen hi.  Anti-Tribal Bills ziaka buaina nasatnapen ‘epicentre’ Lamka ah mipi’n June 26, 2016 sunnung dak 1:00 in Hiangtam Lamka a YPA GHQ Hall ah program zang ding a, Rev. Khamkhosiam Hangnung, Executive Secy, NTBCA in thumna in hun hong ding hi. L.Z .Fanai, Member, JAC makaih in mipi’n Tribal Martyr-te’ suunna om ding hi.

    Joseph Lalrothang, President, Hmar Inpui; Lalrinliana, President, Mizo People Convention; James YT Thadou, President, Thadou Inpi, GHQ;  B. Dongzalian Simte, Chairman, Zomi Council; Gaidon Kamei, President, United Naga Council; Rev. Dr. S. Lalpi Vaiphei, President, Tribal Churches Leaders' Forum Manipur & Chairman, EOC (ECCI) te’n thugen ding uhi. Rev T. Ding Gin Lian, Youth Secy. CBA in Pathian kiang ah Tribal Movement Flag lan (dedicate) ding a, All Manipur Tribal Women Union (AMTWU) makaih in mipi’n thumkhawmna nei ding uhi. Program sung in Church Choir tuamtuam akipan Pathian phatna la ngaih hiding a, program zawh in Rev. Huolthangsei Thiek Executive Director, EAC in thumna in hunkhak ding hi.


UK Prime Minister in October in kitawpna peding
Kum 43 nungin European Union apan UK pawtkhia
London, June-23: United Kingdom (Britain) ah European Union Referendum nihveina result  tuni’n puankhiak in om a, mipi 17,410,742 (51.9%) te’n EU pawtsan ding deih a vote khia in vualzou uh a, kum 43 nungin EU apan Britain pawtkhe ding hi. Kum 1975 in Britain leh European Community (Common Market) area kizopna maban ding tawh kisai referendum neih in om ngeita a, huai hunah 67.2% in European nuaia om ut in vote khia uhi. EU pawtsan ding deihlou mipi 16,141,241 (48.1%) te hehnem kawm in, EU nuaia om utlai ahihdan British Prime Minister David Cameroon in tuni’n gen a, a vuallelh ziakin adinmun apan October khasunga kitawpna peding hi’n gen hi.
    European Union apan United Kingdom pawtkhiak ziakin EU maban lungzinhuai hi’n French President Francois Hollande in tuni’n gen a, UK tungtawn a EU khangtou hi’n leng gen hi.  Referendum tawh kisai German Foreign Minister Frank-Walter Steinmeier  in, Europe gambup adia ‘lungkhamna ni’ thupipen ahi chi a, tunung in EU member-te a pawtkhiak nawnlouhna ding ua panlak hun hi’n gen hi.
    Tuabang kalah, Britain pawtkhiak ziakin European Union dengdel tuanlou ding hi’n EU President Donald Tusk in gen a, Britain mipite’n EU pawtsan ding zekaisak lou di’n leng ngen hi. Bank of England Governor Mark Carney in thusuah abawlna ah tuni akipan economy keniam dingin kilang mahleh, monetary leh financial market dinmun kepbitna dinga poimawh bangkim ngaihtuah hiding chi hi.
    Tutung a referendum ah 72 percent in vote khia uh a, 1993 apan vote khiak tampen hun hi’n kigen hi. Local authority 382 ah ‘Leave’ adia vote khia 17, 410,742 om uh a, ‘Remain’ ah mi 16, 141,241 te’n vote khia uhi. EU referendum tungtawn in Scotland inleng zalenna amuh hunding naita hi’n Scotland' first minister Nicola Sturgeon in gen a, tunung in Scotland ah Independence vote neih hiding chi hi. UK nuaia om Scotland mipi 62% te’n EU a om ding in vote khia uh a, EU pawtsan ding in 38% in khia uhi.


LOCAL NEWS:
Dy. Lieutenant Khumi T. Burton in Lamka hongpha
Lamka, June-24: India  akipan England gama khawsa   ettontham ching leh ngaihsanhuai mahmah a tulel a Greater Manchester a Deputy Lieutenant lenlel (late) TC Tiankham,(retd) IAS’ tanu Mrs. Khumi T. Burton w/o (late) Sidney Burton of  Cheshire, North West England tulel a  India hongzin  tuni’n Lamka hongpha in tunitak dak 6: 00 in V. Dongzathang, IRS (retd) leh a innkuante’n Pearsonmun a inn uah an nekpih uh a, huai ah Gentinlal Vaiphei, Dy. Commandant, STC/BSF leh azi telin mi poimawh tuamtuam in uap uhi. Khumi T. Burton in press-te kiang a gendan in kum 1964 in Guwahati University akipan Graduate in Mumbai ah MA a zawh in Air India ah sem a, Beirut, Hongkong, Perth leh London  ah kum 5 vel a sepnung in a pasal Sidney Burton, (retd) Major Cheshire Regiment tawh kitheikha in kum 1976 in kiteng uh a, huai apan tuni dong a pasal-te gam ah khawsa den hi’n gen hi.
      Kum 40 hial  England gam a khawsak nung kum 19 paisa a 1 vei hongphak chihlouh tutung a  hong phanawn  pan hi’n gen a, nidang sangin Lamka changkangzawta ahihdan gen hi. Kum 2 paisa in a pasal (Sidney Burton) in sihsan a, ta a neihlouh ziakun tu’n amah kia khawsa hi’n gen hi. England kumpi in a khutzat mahmah khat ahihna ah mawhpuakna liantak letsak in om a, huai dungzui in kum 1998 akipan Manchester Bench, Adult Court ah Magistrate in pang a, kum 1994 akipan Manchester Central & South a Gen. Commissioner, Income Tax in sem a, kum 2003 in Dy. Lieutenant dia  guan in om hi. Amah July 10, 2016 in Delhi zuan in paikik ding a, Delhi ah ni 2/4 tam in Cheshire ah kik nawn ding hi’n kigen hi.


Voksa leh tehna tawh kisai in meeting
Lamka, June-24: M. Gouzamang Guite, EM/ADC (Town) makaih in a tenna inn Vengnuam, New Lamka ah khawpi sunga sa zuakte’n meeting neih uh a, June 15, 2016 a CEO/ADCC in order a suah bawhzuina a meeting nei uh hi’n kigen hi. MDC) te’n  June 14, 2016 a sitting  thupukna dungzui in khawpi sunga vok goute’n a mul bawh ding leh electronic weighing machine zatding chi a June 15 a CEO/ADCC in order asuah  bawhzuina a meeting uh hi’n EM M. Gouzamang Guite in gen hi.  CEO order  dungzui in vok goute’n a mul bawhthawh ding uh a, haksatna tuamtuam omte July 14, 2016 tan in EO (Town)kah report ding ua, report dungzui in  genkhawm zel hiding chi hi.
      Mihing damtheihna ding leh a hoihna ding gelna a  MDC 24 te’n kithutuak taka thupukna lak uh ahih dungzui in khauhtak a paipih hi ding a, dan bawhsia a omleh Manipur (Hill Areas) District Council Act, 1971 a section 49na pansan a gawt hiding in leng gen hi.  Delhi, Shillong leh khawpi tuamtuam ah vok goute’n amul bawhthawh uh a, pu-pate’n leng ana zawhsa uh ahihziakin haksalou ding a, zuichiat dingin concern EM in ngen hi. Meeting ah G. Thangkhosuanmung, EM/ADCC, Ngamhao Touthang, EM ADCC, T. Khaikhomang, Chairman, Finance Committee leh Khaikhanmung Vualnam, MDC/ Zenhang Lamka, T. Kamzagin, Executive Officer (Town) tel uh a, Thanghulian makaih in New Bazar leh Damkam Bazar a sazuak pawl akipan mi 9  ban ah Tp. Sianzaneng leh Thanglalmuan Hauzel, Chairman, LATSEA leng tel  uhi.


Police-te’n numei soisatu Jail ah koih
Lamka, June-24: Police te’n tuni’n CJM/CCpur ah Md Najir Hussain (34) s/o (late) Md Salimuddin of  Keibul Mayai Leikai, Thoubal dist. pawkhia uh a, court thupiak bang in Police te’n Jail ah koih uhi. Md Najir in June 20, 2016 nitak in New bazar, Bus parking area ah  Hatneihthieng @ Thiengnu sister of Lalsiemlien of  Lhangvem village a vuak ziakin Police te’n man uh a, FIR No.2 (6) 2016 WPS-CCP U/S 354/338/325 IPC registered uhi.


Police te’n Airport paidingte escort pia
Lamka, June-24: JCILPS pawl in June 22, 2016 zankim apan Manipur ah dakkal 48 sung general strike apuan ziak un Imphal hawh ding ban ah Airport ah mi kha leh pi ding te’n buaina thupitak  tuak uh a, LM Khaute, IPS, DGP, Manipur panlakna ziak in zan in Imphal Airport apan mi hunkhop escort in Lamka hongtung uhi. Tuni’n leng DGP panlakna ziak in Imphal hawh ding, Airport a mi kha ding bus 1, winger 1 leh car 2 in tuzing dak 7:00 in Lamka Police station mai apan Kangvai khua tan Police te’n escort uh a, Kangvai pan Moirang Commando te’n Nambol post tan, huai apan Bishupur te’n Airport tan escort uhi.


Defence Service utte adi’n career guidance
Lamka, June-24:  Rayburn Chapel ah tuni in  Rayburn College a kai Defence Services lam a lunglut-te adingin Career Guidance om a, Rayburn College apan graduate Captain. Hermon Hava Thanghlun, Regt. of Artillery; Captain T. Mang Min Thang, 6th DOGRA Regt. leh Sub. Inspector Chinthianlal Simte, 206 COBRA te’n a, defence service tawh kisai theihtuak tuamtuam omte sinsak uh a, huai atel  College student 62 leh High School student 40 te’n  dotna tuamtuam a bawlte uh dawng uhi.


Guta te’n Sony TV LCD gumang
Lamka, June-24: Lalmalsawm Selate, Editor Hmasawnna Thar, Light House Lane leh asungkuante zatlai Sony TV LCD tuzing dak 4:30 vel in gutate’n gukmangsak uhi. Editor Hmasawnna Thar apan kizadan in zingbaihtak morning walk apaikal in asungkuante kuamah zingthou nailou uh a, common room ah azatlai uh Sony TV LCD kigumang a, TV player leh thil tuamtuam bel kigumang lou a, guta mi 1 hiding in gintakthu gen hi. Mi kuahiam gutate’n Sony TV LCD zuak om leh contact No. 9862752872/ 9089866134 ah theisak ding in ngen hi.


Bodoland MP hongzin ding, tuni’n social work om
Lamka, June-24:  Assam  a Bodoland akipan MP  telching a om Biswajit Daimarya in June 25, 2015 in Lamka hongpha in, Dist hospital morgue ah thu agenn ding ban ah JAC against Anti-Tribal Bills makaite tawh meeting ding uhi.  MP in hongphak ding ziakin All Manipur Tribal Women Union (AMTWU) makaih numei pawlte’n tuni’n social work nei in morgue kim a hahsiang ban uah lenkhawmna mun leh salpha mi 9-te hankuang kikoihte hoihtak in tuamthak vek uhi. MP Biswajit Daimarya ahihleh Romeo Hmar, Convenor, MTFD in hongzui ding a, amau zinglam dak 11:00 velin Imphal Airport akipam Lamka hongtung ding uh hi’n kigen a, numeite’n Police Station kong a  vaidawn in huai akipan morgue tan zawng ding uh hi’n kigen  hi.


Meltheihlouhte’n Abung thau in kap
Lamka, June-24: Meltheihlouh pasal khat in tuni zing dak 6:10 velin Apollo veng a om  N.Abung Singh s/o (late) Khelemba Singh of Khumujamba thau in kap a, vangphat huaitak in bangmah chilou hi. Abung  in New Bazar ah aksa leh van tuamtuam zuak a dawr bawl hi a, dawr hong ding in Honda Activa (MN02A/9054) zangin kuan a, pasal khat in a nunglam akipan pistol in  kap mahleh khalou a, gari handle taklam pang ah thautang lutna ma muh ding om hi. Abung in a gendan in Apollo veng atun  in thilging khat za in aman leng a gari pei puaktam hidia gingta in khawl a, gari pei a etleh bangmah chilou in, a khang ah pasal khat in a kawng ah pistol guanglut mu in, thau akap omlam theipan hi’n gen a, mi kaptu leng activa a taimang  hi’n gen hi. Hibang thiltunna dingin mi tawh kitheihsiamlouhna a neihlam theilou hi’n leng gen hi. March 31, 2016 in leng a compound sung ah meltheihlouh pawl khat in Chinese handgrenade pailut ngei uh hi’n kigen hi.


World Population Day 2016
Lamka, June-24: World Population Day 2016 zatnang tawh kisai slogan in “Zimmedari Nibhao, Plan Banao” chih zat hiding a, June 27- July 10, 2016 sung Mobilization Fortnight hiding a, July 11- July 24, 2016 sung Service Delivery Forthnight (Family Health Mala Fortnith) a zat hiding hi. Huai tawh kisai DFWO/CCpur in CHC/PHCs/PHSCs/PPC &UFWC/CCpur a Medical officer i/c teng in activity omthei bangbang semsuah a, report format kibawl zangin niteng (daily) report bawl ding in theisak hi.


Food Bank in disabledte panpih
Lamka, June-24: Humanitarian Organisation Northeast FoodBanking Network (NeFN) te’n tuni nitaklam in “Food for Disabled” chih thupi zang in CCpur Dist. Disabled Union (CDDU) member 11 te kiang ah nekding allu kg 2 leh antang kg 5 chiat pia uhi.
    Khamlianlal, Founder &Director, NeFN in agenna ah igam uah disabled-te lak ah food security niam mahmah ahihdan gen a, deisakna leh hehpihna ziak in panpihna kipia hi’n gen a, Diesabled te kingaise mailou a, mi tengteng Pathian in akibang a honbawl ahihdan theithak ding in hanthawn hi. NeFN in panpihna apiakte-Pumtuahkim of  Vengnuam, New Lamka; Stephen Sanglun of Bijang; Letminlal Misao of Kipgen veng; Ngamgim Kipgen of Boljol; Thangthian of Rengkai; Benjamin Lalroutghak of Muolvaiphei; Mary Lallawmum of Hmarveng; John Malsawmthang of Rengkai; Anthony Haukhansiam of New Zoveng; Muanniang of New Lamka; Genevieve Lalthangpuih of Hmarveng hi uhi.


Block Level Neighbourhood Youth Parliament
Lamka, June-24: Nehru Yuva Kendra (NYK)/CCpur saina in M. Songgel Community Hall ah June 25, 2015 zinglam dak 11:00 in Block Level Neihbourhood Youth Parliament omding a,  Suonkholam Gangte, Asst. Prof. Young Pillars College in ‘Personality Dev.” chih pansan in sinsak ding a, Lenkholal Haokip, Founder & Prop. Little Champ Academy, Kaprang in “Skill Development” chih pansan in sinsak ding hi.


Zenhang Lamka area ading pre-paid gui
Lamka, June-24: Electric deptt./CCpur te’n Zenhang Lamka area ah electric pre-paid zatnang in cable gui khung uh a, Lamka Police Station a transformer apan cable gui fitzou in Zenhang Lamka area electric pre-paid hoihtak in pekhe theita ding uh hi’n kigen hi.


EBC Doctrine leh kivaipuakna sinsak hiding
Lamka, June-24: EBC Lamka North Division a Division Baptist Children Deptt. saina in June 25, 2016 zinglam dak 10:00 in EBCC Newlane, Bungmual ah EBC Doctrine leh Kivaipuakna kichi kisinsakna omding hi. Program ahihleh Session I & II in kikhending a, Rev. L. Kham Kho Lun in sinsak ding a, program zawh in Pastor H.Laithang,Local Pastor EBCC New Lane in thumna in hunkhak ding hi.


GFI saina in Vai naupangte adi’n camp
Lamka, June-24: Gospel For India (GFI) in Lamka khawpi a Vai naupangte a dingin Kawnpui a Gilead Tlang ah June 22, 2016 akipan ‘Vocation Children Development Programme’ a neih uh tuni’n zou uhi. Pastor N. Pauliankap in camp a honkhiak hi a, tunitak in Elder Thuamson, Executive Member,Gospel for India in khak hi. Camp ah Vai naupang  24 tel uh a, Pathian phatna la leh khutsiam silbawl tuamtuam sinsak ahihban uah thugenpi in Pr. Laltinsang Khawbung, Missionary pang hi.  GFI ahihleh Pastor Zamlal Vaiphei makaih in kum 2010 a kiphutkhia hi a, Lamka khawpi sunga om ginglou mite laka tanchinhoih puangzak atamtheilam gingtu suahsak ding chih a tuppen hi’n kigen hi. GFI in kum paisa in leng VBS telin naupangte hun zatpih uhi.



SUUNNA:
Nemzahat Samte (89) m/o Chinkholal Samte of P.Kamdou Veng,  tuzing baihtak in teknat in si a, sunnung in P.Kamdouveng hanmual ah kivui hi.
Mrs. Manching (72) m/o  K Thiangin of Pearsonmun, tuni nitaklam dak 5:30 velin kalna (kidney failure) in si a, June 25, 2016 in kivui ding hi.
Mrs. Lalrothieng (65) m/o Alfred Lalhlungsang Sungte of Bethel, tuni sunnung in damlou in si a, June 25, 2016 in Bethel hanmual ah kivui ding hi.
Mrs. Kimneikhol Haokip w/o Lunminthang Haokip, Sub Inspector (CISF) of Tuilaphai, tuni’n heartcase in si a, June  25, 2016 in kivui ding hi.
Lalsanhim Faihriem @ Buonga Faihriem(46) s/o (late) Chalkung Faihriem of Muolhoi, Kanan Veng, Guwahati ah ki-ensak dia kuanlai,Guwahati tungmanlou in tuni nitaklam dak 5:00 velin si hi.


IMPHAL NEWS:
JCILPS supporter te’n non-local hunkhop hentang
Imphal, June-24: JCILPS supporter te’n tuni zinglam dak 11:00 velin NH-2 in a tawtkhak Pheidinga mun ah Guwahati apan Imphal zuan night super bus a checkna uah document kichiantak neilou non-local mi 50 val mankhia uh hi’n kigen hi. Bandh supporter te’n a gendan un document nei non-local 1 in Manipur ah sepna piak ding chiam in mi 50-te a tonpih hi’n gen uh a, non-local a hentang-te uh lawh ding dan theilou in JCILPS office ah theisak uh hi’n taklang uhi.


Shopping complex thak muan huailou
Imphal, June-24: Thoubal Wangmataba Bazar ah tunaizek in sawng 2 a sang Shopping complex kihong thak pen chimphut thei dia a kilat ziak in complex sung a dawr neite’n nuse (vacate) ding in Thoubal Municipal Council te’n theihsakna bawl uhi. Bobochana, Secy., Dukan Assn. in Complex sung ah dawr 30 vel om a, state PWD-te etkaina nuai a Kolkata pansan a Simplex company-te bawl hi a, kha 3 paisa apan Dawr neite’n a luah pat uh hi’n gen hi. Akigendan in kum 2013 in complex bawlna a nasep kipan in 2015 kum kim a zawh siang hi a, dawr neite khut ah tukum a piak khiak pat himahleh Thoubal river lam ah chimsuk ding a kisa hi’n gen uhi.


Arunachal Pradesh ah CAG len ding
Imphal, June-24: Hautinlal Suantak, Indian Audit and Account  Service (IA & AS) s/o S. Minlianthang Vaiphei, IAS of Bazar veng, Tuibuong in Mizoram ah kum 4 sung Deputy Account General (DAG) a let nung in tunaizek in Arunachal Pradesh ah Controller and Auditor General (CAG) of India len ding a order suak hi’n thusuak kimu hi.


Chairman lui leh Driver thahna ah kipuang
Imphal, June-24: Imphal a 7th MR Campus sung ah June 21, 2016 nitak a PREPAK Chairman lui N. Nabachandra @ Laba @ Nongdren Khomba (57) s/o (late) N. Iboyaima of Thangmeiband Lourung Purel Leikai leh Driver L. Sanjit @ Chingkhei (41) s/o L. Lal Singh of Thangmeiband Hijam Dewan Lekai-te thahna tawh kisai a PREPAK a Red Army-te khutnung hi’n kipuang uhi. Hiai thu tawh kisai a  Captain Achouba, Publicity Officer, PREPAK in agendan in N. Nabachandra in pawlpi nusia in melmate kiangah a kibuk banah sum tamtak a zat thelthang ziak leh L. Sanjit in a huh ziak a that uh a, Nabachandra kithuahpih te’n diklou tak a mipi apan sum a khon-te uh a kintheipen a PREPAK-te kiangah pe ding in theihsakna bawl ua, huai dungzui in - Thokchom Dwijendra @ Ibai (47), s/o (late) Th. Maimu of  Kyamgei Maning Leikai, Heibong Makhong leh Th. Inaocha Devi, d/o Th. Biren Singh te’n Rs 1,87,50,700; R.K. Doren Singh (52) s/o R.K. Biramangol of Thangmeiband Kabrabam Leikai, College Gate in Rs.1,50,00,000;  Wahengbam Boy (52)  s/o (late) W. Mangi Singh of Waheng Leikai Lairembi leh Sapam Nonibala @ Memcha (50), d/o (late) S. Tiken of Singjamei Sapam Leikai te’n Rs 1,30,00,00; K. Thamarjit, MLA (46), s/o Karam Shyam Singh of Kyamgei Mamang Leikai in Rs. 40,00,000; Ningthoujam Kumar (58) s/o (late) N. Chandramani of Thangmeiband Meisnam Leikai in Rs. 40,00,000;  Mutum Romiyo (48) h/o N. Sapana Devi, s/o (late) M. Harideva of Basikhong Torban in Rs. 38,00,000; Ningthoujam Bimol (46) s/o N. Omor Singh of Heirok Part II leh Thounaojam Leima @ Tombi (44) d/o Ibotombi of Heirok Part II te’n Rs. 18,00,000; Koijam Sanjoy @ Bale @ Ngaocha (43) s/o K. Bijoy Singh of Kyamgei Mamang leh Angomjabam Nandini Devi ( 41)  d/o (late) A. Shantikumar, Sagolband Nepra Manjor te’n Rs. 35,00,000, 9mm Pistol 2 leh 2.2mm silencer Pistol 1 hi a, Ningombam Kisan @ Mantri Singh  s/o N. Sana Singh of Okram Chuthek in Rs. 5,00,000 a piak ding hi’n taklang uhi.


Cong MLA 28 te’n BJP makai-te kimuhpih
Imphal, June-24: Congress MLA 28 vel ding te’n zannitak in BJP makai Himant Biswa Sarma, Convenor, NEDA leh Ram Madhav, National Gen. Secy. Coordination and in-charge Northeast region-te a tuam tuak in va mu uh a, Congress MLA khenkhat tuni’n Delhi leh Guwahati ah zinkhia uh hi’n kigen a, Manipur ah Congress govt. tunung kha 2 sung a puksiat sakna dia panlakna hi’n gen uhi. Thusuak in a taklatna ah Cabinet Minister 2 telin Congress MLAs te’n BJP makai 2-te kiangah final list pia uh a, huai list ah Congress MLA 28 min tel a, BJP ah laklut ding dan buaipih lel ua, Ram Madhav in Imphal Hotel ah zan a Congress MLAs-te kimuhpih hidan a ngawhna nial in thil selguk om ahihdan taklang hi.
    Delhi ah Congress MLA-te screening bawl ding in personal visit dan a chial hi uh a, Manipur ah tulel a om BJP makai 2-te leh Congress MLA te’n Arunachal Pradesh model tawh kibang a kilemna bawl uh hiding gintak hi a, huai ahihleh final list a tel MLAs te’n CM O. Ibobi tungah ‘no confidence  motion’ file ding ahih keileh August khasung in mass resignation bawl ding ua, huai nung in govt. thak ding telna election om thei pan ding hi. Congress MLAs-te hihna taklat hi nailou a, political party dan apan MLA khenkhat leng tel uh a, BJP Central leader te’n screening bawl lou a kuamah laklut sawmlou uh hi’n leng taklang uhi.


Nupi pawl-te tungah gamtatna mawhpaih
Kangpokpi, June-24: United People’s Front (UPF) te’n Hengbung ah UPF Chairman PSO-te mat banah June 21-22, 2016 nitak a nupi pawl-te tungah 35-A/R-te gamtatna mawhpaihthu puang uhi. Hiai  tawh kisai in Thanglenlal Doungel, Info. & Pub. Secy, in thusuah a bawlna ah KNF a President banah UPF a Chairman ST. Thangboi telin KNF top brass official te’n Hengbung ah June 21, 2016 nitak in Tripartite political talk tawh kisai in meeting a neih hun uah Major Gulati makaihna nuai a 35-A/R te’n meeting va hihbuai in UPF Chairman PSO 4 va man uhi. Major Gulati leh 35-A/R-te gamtatna in ‘Tripartite Political Dialogue’ leh Kuki Community muhsitna hi a, Major Gulati in SoO ground rule tanpha theilou a mawl taktak hiam ahihkeileh Political dialogue sukbuai sawm hiam chih dotna bawl uh a, SoO huamkhakna ah ground rule theipha lou Indian Army Officer om khak  dahhuai hi’n gen uhi. Nupi pawl-te tungah ganhing bang a gamtatna ah mi tamtak liam in Kangpokpi leh Imphal ah enkol hi uh a, huai lakah dinmun lauthawng huai hunkhop om  uhi. Akisaipih thuneite’n Major Gulati makaihna nuai a 35-A/R-te gamtatna dan tawh kituak a gawtna piak ding in ngetna bawl uh hi’n leng thusuak in taklang hi.


Strike in Singjamei area ah hindan nawngkaisak
Imphal, June-24: JCILPS ex-convener Kh. Ratan tungah ‘wanted tag’ zukkik ding leh Manipur ah ILPS zat ding phutna in JAC te’n Jan 22, 2016 nitak zankim apan dakkal 48 sung Manipur pumpi ah general strike a puang un phaizang gam ah hindan nawngkaisak petmah hi. Singjamei leh Kakwa area kikal ah bandh supporter te’n sing leh suang tum banah electric pole zang in lampi khak uhi. Kongba, Khongman leh Wangkhei area ah leng bandh supporter te’n lampi khak uh a, buaina thupi lua omlou hi’n leng gen uhi.
    Huailou in Manipur ah ILPS zat ding phutna in Uripok Kangchup road, RIMS road, Lamphel Sanakeithel, Lilasing Khongnangkhong, Chingmeirong, Dingku road , Khurai lairikyengbam Leikai , Salanthong leh Lamlong Thong mun-te ah sit-in-protest om a, huai nung nitaklam dak 3:00 velin nupi pawl-te khut kilen in lampi ah ding uh a, state govt. in Kh. Ratan tungah ‘wanted tag’ a puan mawhpaihthu puang uh hi’n kigen hi.


TUNI THUPI:
“Pilna kha a ka dimsaksa, mi lungtang pilte tengteng kiangah thu na gen ding, amau Aron puan amah hihsiang dinga a bawl theihna ding un, huchi a aman siampu nasepna muna ka na a septheihna dingin.”
– Eksodas 28:3


EDITORIAL:
NEDA a khawsuak taktak diam?
Ni 2/3 paisa in India malsuahbial apan kipan BJP tawh kizopna nei deuh politician tuamtuamte’n North East Democratic Alliance (NEDA) kichi  phutkhia uh a, hong khawsuak taktakna ding hiam chih bel mi tamtakin a theih-ut suak  hi. A ziakbel hibang a political party tuamtuam kigawmkhawm a pawl kibawl India malsuahbial(northeast)  ah a tamluat tak ziak hidan in leng muhtheih a, party tuamtuam kigawm kichi himhim atamzawte paisuaklou a theih ahi hi.
    Lok Sabha Speaker-lui (late) PA Sangma makaihin leng North East MP forum telin party tuamtuam phuhkhiak hisek a, himahleh, guitung lawlou hi. Tu in BJP tawh kizopna neideuh NEDA kichi hong piang nawn a, NEDA pe’n central government a makai BJP pawl mai etna mah hong hiding chih achiangsa ahi hi.Central ah BJP makaihna govt ding lel  NDA leh NEDA pe’n khat bang a ngaih ahihman in opposition Congress lam in bangchibang in hon ading uhiam chih theihbut hinailou a, India malsuahbial pe’n NEDA/NDA ‘rule state’ nuai ah hong koih zouvek taktakna ding uhiam chih leng gen ngam huailou hi.
    Party tuamtuam kigawm NEDA kichite’n Northeast bial puah phatna dinga Central in annual fund allocation abawl  Rs 800 crore  khahkhia (release) dingin ngen uh a, Prime Minister Narendra Modi in NEDA ngetna hoihtakin enkai ding chih ahi hi. Non Lapsable Central Pool of Resources (NLCPR) leh Ministry of DoNER  in India malsuahbial puahna dingin kithuzak den uh chihthu om hi. Northeastern State a mi poimawh banah Chief Minister tuamtuam Nagaland Chief Minister TR Zeliang; Assam Chief Minister Sarbananda Sonowal; Arunachal Chief Minister Kalikho Pul; Assam Minister & NEDA Convenor  Himanta Biswa Sarma; Meghalaya MP(Lok Sabha)  NPP President  Conrad Sangma; Mizoram CM-lui banah MNF Chief Zoramthanga leh AGP President Atul Bora; UDP Working President  Paul Lygndoh te’n Prime Minister kiangah India malsuahbial dinmun a gelhthawh mahmah in pia uh chih ahi hi.
    Maban thil paidan ding chiantaka genkholh theih hikei mahleh  NEDA hong khawsuak taktak ding hiam chih theihchet  haksa  mahmah hi. A khenchiang in Central government in NE state-te kimawlpih maimai ahizaw diam chih hun leng om thei mawk  hi. Akhenchiang in lah BJP in Northeast state tuamtuam tulela Congress in govt a bawlna Meghalaya, Manipur leh Mizoram ah govt a bawlkhiak theihna ding a hahtaka panla thei ding chih mitsuan kawm in Assam ah Chief Minister Tarun Gogoi makaihna Congress govt dinlai a kitawp a BJP zom, tutung in  Assam a BJP govt ah Minister poimawhtak len Himanta Biswa Sarma  makaihna a bawlkhia mah hizaw dan in bel kilang hi. Huchi ahihleh BJP makaihna NDA in Central ah govt a bawl sung NEDA leng hong hat hehu ding un gintak huai hi.
    Congress makaihna UPA in central a govt a bawl lai in party tuamtuam in Congress mah mitsuan in party hunkhop mah in bel uhi. Kum 2014 a Lok Sabha election ah Congress hong puksia in BJP mkaihna in Centre a NDA govt hong dinkhiak nungin Congress bel party tuamtuam UPA akipan awl-awl in kizukkik hiaihiai uhi.  Huchibang mah in NEDA a party tuamtuam kigawmkhawmte BJP in  vaihawmna a let zawh nawnlouh hun ah Congress hun tawh kibang mahin hong puk duamduam nawn zel maimah ding uhiam chih ngaihdan omthei mawk hi. India a state dang tuamtuamte  thutuam hileh, India malsuahbial  zaw central government khut nuai a om ihihdan kilang mahmah a, i zawn- ingau ziak mah uh hipen dingin gintak-huai hi.
    Eilawi in ni tamlou paisa akipan diktakna kichi i pibawl mahmah ua, diktatna in bangtan sawksak ding ihiam chih leng ithei kei a, a gen tampen leh a gelhtampente a diktatloupen suahkhak ding lauhuai mahmah hi. Tunung sawtlou in malsuahbial mun tuamtuam ah Assembly election hong om ding a, tua hunah kua party hong hat ding uhiam chih i theikei a, chiamnuih thugen in genlehang  a vek ua hong hat uh i deihsak hi.
    Election anai ziak leng ahidia, tu in NEDA kichi forum  hong piangkhia a, Nagaland Congress telin regional party tuamtuam in bangchidan in election a tuh(fight ) ding uhiam chih i theikei hi. Bangteng hileh India malsuahbial ah election policy leh maban etna kawm tawh party tuamtuam kibawl khe mahleh ataktakin lampi zuisiam party worker-te mah election result puanni chiangin nuiding uh hi’n kilang hi. Huchih lai in, Northeast  adingin political forum tuamtuam NEDA tela adangdang bawlkhiak phatuam mahding hiam chih ngaihsut-huai tham ching hi.


Civil Services examna a lawhching
M. Thangsuansang Zou, IRS tawh houlimna
Union Public Service Commission (UPSC) saina Civil Services Examination 2015 ah Manipur akipan singtangmi lawhching omsun M. Thangsuansang Zou s/o M. Haulianthang Zou leh Mrs. Manngaihchin of V. Bethel village (near Geljang), CCpur dist in lawhchinna a ngah tawh kiton in Manipur Express palaite’n houlimpihna anuai abangin kinei hi.
 

ME: Manipur Express  | MTZ:  M Thangsuansang Zou 

ME: Education Qln. & School background nawn genthei diam?
MTZ: Kum 2006 in St. Paul’s Institute akipan in class X (2nd divn) in ka zoukhia a, kum 2008 in Rayburn College ah class XII (Arts stream) Ist  divn a  zou in, Manipur ah top 4 in ka pang hi.Kum  2011  in Delhi University  nuai a St. Stephen College ah BA (Gen) II- divn in kaa zou a, kum 2014 in Campus Law, D. Centre, Delhi University (DU) ah LLB  leng II- divn mah in kana zou hi.

ME: High School na kailai in  bangchi’n lai nasim a?
MTZ:  High School ka kailai akipan regular takin( daily basis) in dakkal 2/3sung  lai kasim gige hi.

ME:  Na lawhchinna thuguk bang hi in na thei a?
MTZ: Ka lawhchinna thuguk ahihleh Christian hihna ziakin Pathian theikawm a lasim leh tupna kichian nei, Bible sim a thum, motivation ban ah Pathian i theihkawm a tupguhna  i neih aleh maban hong paipai mai ahi.

ME:  Laisim lai in Church / Social activities a kihel tam hoih hi in na thei hiam?
MTZ:  Mimal adingin laisimlai in Church activities (Saptuam nasepna ) a kihel poimawh mahleh ahunchiang (limit) theih poimawh a, Society activities ah ahihleh ZSP Delhi Branch a Vice President (2012-13) leh Zou Presbyterian Church, Delhi a Auditor in kana pang ngei hi.

ME:  Eimite Civil Service ah bangziak a a lutzou tawm deuhdeuh hidin na gingta?
MTZ: Competition  sang mahmahta ahihman in, kilung-neu in zoudia kingaihtuahna atawm ziakin a lunglut kitawm hiding in ka gingta hi. Huailou in gamsung dinmun siatziak hiam ahih keileh environment  hoihlouh ziak khawng leng hithei a, Civil Services a i luttam theihna dingin motivation neih banah outlook letsak ding, kikhenna(change) role model poimawh mahmah hi.

ME: Govt a sepna muh haksata, laisiam kibehlap deuhdeuh;  hiai tungtang ah laizil sepna mu zoulou pung deuhdeuh a, bangchi panlak hoih ding hiam?
MTZ: Govt. service kia sepna hilou hi. Mihing in maban ding, khawsakna ding (career)  kingaihtuah banah  talent zonkhiak poimawh hi. Huai  dingin in line tuamtuam om a, sports, artist,entrepreneur leh adangdang om ahihna ah lunglutna zonkhiak a,huai  paipih poimawh hi.

ME: Khangthak laisim laite bang na thuhilh nuam a?
MTZ: Tulai in khangthak laisimte’n outlook letsak ngai in ka thei, service peuhpeuh a quota hiam reservation a kingaklouh hoihpen hi. Quota/Reservation chihte ah kinak ngak luatin lungsim neusak tuam mahmah a, laisimna lam ah deihbang in tha kipe zoulou  hi. Siamsin te’n student dang (SC/GEN etc) tawh ki-compete (ki-el) theidia panlak hunta a,lawhchin na dingin thilhih peuhmah  a lunglut a, zou teitei  dia kinepna tawh panlak poimawh hi.
 
ME: Civil Service adingin chik akipan na ki-prepare a, bangzahvei na attempt na ahi hiam?
MTZ:  High School ka kailai akipan in Civil Services lunglut in huai ka paipih den a,kum  2014 akipan in kum 1 sung naktakin  ka kisakhol hi. Experience neihna dingin  2/3 vei ana attempt ngei  himahleng  tutung in bel serious takin ka attempt a, lawh leng ka lawhching  hi.

ME: Civil Services adia na ki-prepared dan non genthei diam?
MTZ: Kum 1 sung Civil Service adia ka kisakkholh (prepare) sungin niteng in lasimna ding in ka hun ka pekhe (dedicate) gige a, ni khat in a tawmpen in dakkal 10 sung vel laisimna hun in ka pekhia hi. 

ME: Coaching koi a la, coaching lou in a haksa diam?
MTZ: General study adi’n ALS, New Delhi ah coaching ka la a, Pol. Science (ka Subject) a di’n bel ka lakei hi. Civil Services exam tawh kisai eimite lak ah proper guidance a om nailouh ziakin coaching lak poimawh lai hi.

ME:  Na lawhchinna kua credit na penuam a?
MTZ:  Ka lawhchinna tawh kisai in amasapen Pathian credit ka pia a, 2na in ka nu leh pa (ka nu leh pa’n Civil Services adi’n innmun zuak zen in hon support uh) ban ah teacher leh lawm leh vualte support-na ziak ahihman in amaute credit ka pia hi.

ME: All India rank ah bangzahna in na pangzou a, ST rank in?
MTZ: All India rank ah 915 in ka pang a, ST ah 30na  vel in ka pang ban hi.

ME: Tu’n Service Allocation kihawmta a,nang  IRS (IT) piak in na om hi. Huai ah na lungkim hun mai hiam?
MTZ: Maban ah Indian Administrative Service (IAS) mah ka tum tinten lai ding a, Indian Revenue Service (Income Tax) ahihleh skip/pending in koih tadih ding a, Civil Service adi’n naktak in ka prepare ding hi.