MANIPUR EXPRESS | JUNE 26, 2016

Bodo MP Daimary leh Romeo Hmar in Lamka hongpha
Lamka, June-25: Manipur Assembly in Bill 3 a passed uh deihlouh ziaka singtangmite’n kiphinna a neih June 26, 2016 in ni 300 ching ding a, huai tawh kiton in tuni’n New Delhi akipan in Biswajid Daimary,MP (Rajya Sabha) leh Romeo Hmar, Convenor, Manipur Tribals Forum Delhi (MTFD) in tuni’n Lamka hongpha uh a, morgue ah salpha 9-te luang aveh ban uah kikhopna uap uhi. MP leh Convenor  tuni zinglam  dak 11:00 in Imphal Airport hongtung uh a, sunnung dak 12:45 velin Lamka hongtung uhi.

    Police station kong akipan All Manipur Tribal Women Union (AMTWU) leh All Tribal movement of Lamka (ATML) makaihna in mipi’n ana vaidawn in pakkhi oksak in nang lukhu khusak uh a, morgue tan zawngtung uhi. Morgue ah cold storage hong in makai 2 te’n salpha 9-te luang en uh a, minute 1 sung dai dide in suun uhi. Morgue kong a mipi mai ah Romeo Hmar in Lamka hongphakna ziak uh ahihleh MP in thil omdan diktak a mit mahmah a muh alunggulh ziak hi’n gen hi. Biswajit Daimary ahihleh Assam state a Bodoland Territorial Council phukhetu a makai hi a gen in, Manipur buaina tawh kisai awlmawh in Rajya Sabha ah leng naktaka tangkoupih hi’n gen hi.
MP (Rajya Sabha) in a thugenna ah amau dan in kizawn kichi deih huailou himahleh Lamka a singtangmite’n ngaihnat etsakna hibang abawl uh thupi in hampha kisa mahmah hi’n gen hi. Manipur a singtang mite’ lak ah Sixth Schedule deihpawl, Separate / Autonomous state deihpawl om in deih kibanglou hunkhop om ahih thei mahmah hi’n gen a, himahleh tuate singtangmite bitna ding hivek ahihna ah a ngatna kibang chi hi.
    Tutung buaina serious mahmah ziakin India govt in pan alak poimawh petmah a, amah ngei in leng theitawp suah a panla in Rajya Sabha Chairman kiang ah tamveitak Parliamentary Committee bawlkhe dia ngen hi’n gen hi. Thubuai tawh kisai a Central govt a kigolh taktak theihna dingin amun mahmah ah thil omdan muh poimawh a, tutmun a panlak in central thuzawhlou ding chih ziakin hangsan taka panlak theihna dingin  tuni a Lamka hongpha ahihdan gen hi.
    Delhi phualpi a makai tuamtuamte’n thubuai tawh kisai a genkhak chiangun helpawl atel leh ganhing banga gamtat leng poisalou hidan in gen mahle uh amun hongtun chiangin a thuzakdan tawh kilehbulh  hi’n gen hi. July khatawp in Parliament monsoon session kipan dinga huai hun chiangin tutung hong zinna tawh kisai a muhte Parliament ah puangkhe ding ahihdan gen hi. Manipur Assembly in Bill 3 a passed-te tu’n pending in om mahleh bill dang leng pass thei uh ahihna ah singtangmite bitna dinga pan laden ding hi’n gen hi. Assam  a Bodo te’n Sixth Schedule a ngetlai un tuailai 1000 val in a hinna uh pia ahihman in, lungkelou in pang lehang khatveitei lawhchin lam-et thu gen hi. Aman martyrs 9-te innkuante puan 1 chiat leng pia hi.MP in morgue a thugenna aneih zawhin JAC-AATB makaite tawh meeting  nei uhi. Amah June 26, 2016 in Lamka akipan kik ding hi’n kigen hi.

Assembly session om hun ah ILPS tawh kisai bill thak passed hiding –All Political Parties 
Political parties meeting in ILPS bill draft thak ding lemsa
Imphal, June-25: Tuni nitaklam dak 3.00 in CM Cabinet Hall ah Chief Minister O. Ibobi makaihna in All Political Parties meeting om a, India President in ‘The Protection of Manipur People Bill 2015’ lemsakpihna suai a piaklouh (withheld) ziakin Manipur tualsuak mite humbitna ding bill thak draft hiding in thupuk uhi. Huai dingin dan theimi (legal expert & constitutional expert)te’n ILPS tawh kisai Bill thak draft dingin mawhpuakna pia uhi. Tuni a All Political Parties meeting ah tuma zekin Manipur a unit kihong thak National People’s Party(NPP) telin Political parties tallang deuhteng tel uh a, himahleh Naga People Front (NPF), Lok Jan Shakti Party leh JD(S) party-te bel tellou uhi.
    CM makaihna a All Political Parties meeting in Manipur a pawl (society/section ) om tengin a pomtheih ding uh Bill thak ding tungtang ah thupukna tuamtuam 3 bawl uh a, CM banah All Political Parties meeting a Chairman O. Ibobi in meeting proceeding  suaikai in copy hawmkhiak in om hi. Huai dungzui in legal leh constitutional expert te’n bill thak draft ding uh a, Manipur govt in Manipur mite ahumbit theihna dingin Manipur singtangmi leh phaijang mipi’ deihdan leh kithulualna bang bawlkhiak ding chih ahi hi. Huai bill thak zawhfel (finalisation) ma in akisaikhakpih Manipur singtanggam mipi leh phaijang mipi deihdan et hiding chih hi a, Manipur Assembly session om nawn hun ah bill thak puaklut a passed hiding chi’n kithukim uhi.
    Tuni a meeting a tel tengin Manipur mipi teng in lemna leh muanna kembit chiat ding in ngetna bawl uh a, political parties-te leh state govt in dan thak (new legislation) bawlna dinga pan alakna  uh lawhchinna ding in leng kuapeuh in kithuahpih dingin ngen uhi. Huai meeting ah JD(U) President N Tombi in JCILPS makai-lui Kh. Ratan tunga ‘wanted tag’ puan a om tungtang genkhawm ding in pawlut in govt in enthak dingin ngen mahleh meeting ah genkhawm a omlou hi’n kigen hi.


6th Sikh Light Inf., Khuga Bn saina in Ex-Servicemen rally
Lamka, June-25: Khuga Dam a om 6th Sikh Light Infantry, Khuga Bn saina in tuni’n Khuga Dam ah sepaih pangluite adi’n ex-servicemen rally om a, huai ah Lunminthang Haokip, IAS, DC/CCpur; Brig. Ajay Kumar, Commander, 27- Sector, Assam Rifles, Col.  Aditya Verma, CO 7- Assam Rifles banah Major (retd) Gangte telin sepaih panglui mi 200 val paikhawm uhi. Huai ah Col. Vijay Hooda, CO Khuga Battalion in vaidawnthu gen a, CCpur dist honglut akipan activity a neih masakna pen uh hilai chi a, kha 3 dan a hibang hun zat zel sawm uh hi’n gen hi.
    DC/CCpur in gam humbitna dia hinkhua tamzaw ana zang ex-servicemen-te zahna pia in, a kipiak zawhna uh thupi mahmah hi’n gen hi. Brig. Ajay Kumar in ex-servicemen-te’ haksatna dawnzangkhai dia om uh ahih dungzui in chiklaipeuh in a haksatna uh tunthei uh hi’n gen hi. Major (retd) Gangte telin mi tuamtuam te’n thugen uhi.
    Huai rally ah Ex-Servicemen-te’n pension sum kimtak banah bonus kibawlte alut kim leh lut kimlouh theihna ding in pension sum lakna tawh kisai buaina neite adi’n Suvigya Cell kichi hong uh a, AWES Cell, SBI/CCpur leh Axis Bank te’n leng stall khat tuak hong in, CSD Canteen leng hon in om hi. Free Medical camp leng om a, damlou ki-ensakte manbei in damdawi pia uhi.


LOCAL NEWS:
Tribal martyr 9te suunna leh kiphinna ni 300 chin zatna
Lamka, June-25: JAC against Anti-Tribal Bills thusuak dungzui in Tribal martyrs 9te suunna leh Anti-Tribal bills 3te ziaka kiphinna ni 300 a chin tawh kiton in June 26,2016(Pathianni) sunnung dak 1.00 akipan Hiangtam Lamka a YPA GHQ Hall ah Tribal Martyrs 9te suunna leh singtangmite kipumkhatna dinga thumkhawmna om ding hi. Huai huna telding Gari neite leng zalentaka a paichiat theihna ding un tuma a Shutdown/bandh om ding kichi leng huchibang shutdown leh bandh bangmah omlou ding chih ahi hi.


Prayer-cum-Youth Fellowship om
Lamka, June-25: Nationwide Gospel Music Festival Organizing Committee saina in tuni’n Hebron Veng a EBC Gospel Centenary Hall ah “Hong un Toupa kiang ah ikik ding uh” thupi zangin Prayer-cum-Youth Fellowship om hi. Huai ah khawpi sung leh a kimvel a saptuam tuamtuam akipan mi tamtak paikhawm uh a, hunpi 2 in kikhen hi. Tuni zinglam dak 10:00 in hunpi 1na kipan a, Rev. N. Pumsuanmung, Event Co-ordinator in vaidawnna thu gen in, Rev. LB Angam, General Secretary, Kuki Christian Leaders Forum in Pathian thu gen hi. Centre Choir tuamtuam te’n Worship Team-te tawh kithuah in Hallelujah Chorus sa uh a, Rev. H. Nengzatun, Chairman, Haleluiyah Prayer Band in thugenna hun zang a, T. Thangthuam, Chairman, Nationwide Gospel Music Festival in keynote address gen hi. Rev. Reobert H. Vaiphei, Director of Missions, EOC makaih in mipi paikhawm te’n thumkhawmna nei uhi. Hunbi 2na nitak dak 6:00 in kipan a, huai ah Rev. L. Jessai Neitham, District Supdt, EFCI leh Rev. Ros Infimate, Chairman, Hmar Christian Leaders Forum te’n Pathian thu gen uh a, Rev. Hemkhomang Haokip, Vice Chairman, NGMF in hasotna thu gen hi. Programme hunsung in Rev. S. Vungminthang, General Secy, EBC makaih in mipi paikhawm te’n gam leh nam a dingin thumkhawmna nei uhi.


ZSP Career share-cum-Award Distribution om
Lamka, June-25: Zoveng a Zogal Memorial Hall ah tuni in Zou Sangnaupang Pawlpi (ZSP) GHQ saina in Career share-cum-Award Distribution 2016 om a, Chief Guest in Lunminthang Haokip, IAS, DC/CCpur pang hi. Functional President ding  Chinlunthang, President UZO GHQ atel theilouh ziak in ama’ sik in John Hauliankhup, Inf. Secy UZO GHQ pang a, Guest of Honour in M. Lawrance Kapkhenmang, MPS; M. Thangsuansang Zou (success in UPSC exam, 2015); M. Khamsuanhang Zou (success in MPSC exam 2015) leh P. Tonkholian,(success in MPSC/MSPDCL exam 2015) pang uhi. Rev. Tualzachin, Sr. Executive Secy. ZPCS in class X, XII passed te ban ah UPSC & MPSC nuai a lawhchinna ngahte a ding in Pathian kiang ah thumsak hi.
    Award hawmkhiat ma in Career Share program om a, panelist 3- M. Lawrence Kapkhenmang, M. Thangsuansang Zou leh M. Khamsuanhang Zou  makai in class X & XII passed student te’n career tawh kisai in discussion & sharing nei uhi. Award hawmkhiat hun ah Chief Guest in Science stream ah career hoihtak bawltheih bang in Arts stream ah leng bawltheih hi’n gen hi. Mi tengin civil service kia mitsuan lou in khawsung, vengsung leh gamsung khantouhna ding a poimawh trade/line  tuamtuamte zong ding in deihthu gen hi.
    Award ngahte BSEM (HSLC) ah Vungdeiniang d/o T. Thangsuanlal of Don Bosco Hr. Sec School in (late) Thangkhanlal Meritorious Award (Overall topper in Class X), (late) Tongzapau Memorial Award (Highest mark in Class-X, Maths) leh (late) Rev. Doupu Memorial Award (Highest mark in MIL (Zou) sang hi. Niangdeikim d/o T. Goukhomang of Don Bosco Hr Sec School in (late) Tongzapau Memorial Award (Highest mark in Class-X, Maths) sang hi. COHSEM (Class XII) ah Marina Chingdeinuam d/o Marcus Mangkhankhai of Herbert School, Chingmeirong in (late) Thangkhenkhup Meritorious Award (Overall topper class-XII, Science), leh (late) Suohzahau Meritorious Award (overall topper class XII) sang hi. Lalmuankhup Zou s/o Kapginthang of Ebenerzar Academy in (late) David K.Samte Meritoriou Award (Highest mark in Arts Stream) leh Ka Pu Saipu Memorial Award (Highest Mark in class XII MIL (Zou) sang hi.
    CBSE (class X) ah P.Hangmunlun Zou s/o P.Daiminthang Zou of JNV, Mawphlang, East Khasi Hills, Meghalay in (late) Jem Douzakham Tungnung Meritorous Award (Overall toppter in Class X) sang hi. CBSE (class XII) ah Olivia Lhingneiniang d/o Michael Ginzasuan of St. Paul’s Institute in (late) Chinniang Meritorious Award (Overall toppter in class XII) sang hi.


Anngawl thumkhawmna om
Lamka, June-25:   Miss May Rose leh Rev. Lalpienglawm  makaihna  in tuzing dak 10;00 akipan sunnung dak 1;00 kikal in Rengkai Community hall ah an-ngawl thumna om a, huai ah mun tuamtuam akipan mi 50 vel paikhawm uhi.  Rev. Lalpienglawm, AGEI in session masa makai in Rev. Lalngailien, RPC in session 2na leh Rev. Benjamin Sakum, EFCI in session 3na makai   a, gam-le-nam leh khawtang damna dingin Pathian buan in thum uhi.


Simte MIL lopna leh prize hawmna om
Lamka, June-25:   Board of Sec Education, Manipur (BSEM) in 2016-17 academic session akipan Simte pau a class IX leh class X  ziltheih dia a phalsak dungzui in tuni’n Simveng a Simte Inn ah Simte Literature Society leh Khangthah Zuun Pawl GHQ kithuah in kipahthu genna leh a lopna om hi. Huai ah Chief Guest in Th. Jamchinthang, MDC(Thanlon)  pang a, Guest of Honour in M. Gouzamang Guite, EM/ADCC pang a, Functional President in  T. Goukhomang, ZEO/CCpur leh Chief Host in B. Dongzalian Simte, President, Simte Tribe Council pang uhi.
    Simte Literature Society in June 11, 2016 in   spot essay competition a sai uh kipahman hawmkhia uhi. Competition ah T. Henminlun in 1na la a, Tabitha Chingnunsiam in 2na  leh Kamsuanthang in 3na la a, Rs. 3,000/-, Rs. 2,000/- leh Rs. 1,000/- sang uh a, donor T. Kammuanlal, MCS in pekhia hi. Kum 1994 in Simte Literature Society kichi kiphuan a, kum 1999 in registered  ahihnung in kum 2015 kum in language recognition ngah uhi. Class I apan class VIII student te’n Simte laibu sin theihna ding in phalna a ngah nungun May 2016 in BSEM in class IX leh class X ah Simte MIL subject telsak a om hi’n kigen hi.


PTC Mizoram President thak tel uh
Lamka, June-25: Mizoram a Teikhang Community Hall ah Paite Tribe Council (PTC) Mizoram HQ Presidential election om a, President ding in Muana Hangshing telching uhi. John K. Ngaihte, Gen. Secy PTC GHQ makaih in Chinkhanmang Ngaihte, Secy. (Orgn) leh H. Pauzalal, Secy (Int.) te’n election neihpih uh a, unit 19 apan palai 112 te’n vote khia uhi. John K. Ngaihte in President thak kichiamsak a, Rev. Nengdoulian, Divnl. Supdt. EBC, Mizoram in Pathian kiang ah thumsak hi. PTC Mizoram HQ a Presidential election ahihleh etkhiakna (trial) dan hiding hi a, kum 2016-2019 sung Presidential Council  in kivaipuak ding uh a, PTC Mizoram HQ in hoih asak zawk uleh Presidential Council paipih ding hi’n kigen hi. Election neih zawh in 2nd session ah business session nei uhi.


Co-ordn Committee te’n Governor mu
Lamka, June-25: Co-ordination Commitee of six Autonomous Dist. Council, Manipur ban ah six Autonomous Dist. Coucil a Chairman teng in tuni nitaklam dak 5:00 in Manipur Governor Shanmuganathan kimuhpih uhi. Huai hun ah ADC power devolution, ADC thu, Manipur Assembly in Aug 31, 2015 a Bills 3 apassed thu ban ah ADC hatsem dingdan kikum uh hi’n  thusuak kingah hi.


Mera Paibi-te makaih in sit-in-protest om
Lamka, June-25: Meltheihlouh kuate hiam in New Bazar ah a dukan hongdia kuan N Abung Singh (35) s/o (late) Khelamba Singh of Kumujamba, Apollo Veng ah zan zingin activa  tailai kap mahle uh khalou uhi. Huai mawhpaihna in tuni zinglam dak 10:30 apan nitaklam dak 3:00 tan Khumujamba ah Mera Paibi makaih in mipi’n sit in protest nei uhi. Abung kap sawm ahih tungtang ah  Police te’n FIR No.33 (6) 2016 CCP-PS U/S 307 IPC & 25 (1-C) A.Act registered uhi.


SUUNNA:
Gin Go Kap (58) h/o Cinno of New Lamka (G) near St. Paul’s School tunitak dak 8:00 velin zunkhum ziakin si a, June 26, 2016 in CYA hanmual, New Lamka ah kivui ding hi.


IMPHAL NEWS:
RBI a Dy. Governor in CM kimuhpih
Imphal, June-25: Chief Minister bungalow a CM office ah tuni zinglam in S.S. Mundra, Dy. Governor, RBI in CM O. Ibobi va kimuhpih a, huai hun ah banking lam a scheme tuamtuam tungtang genkhawm mahle uh puankhiak hilou a,  CM in Dy. Governor kiangah souvenir pia hi.


RMSA nuai ah school 159 upgrade
Imphal, June-25: RMSA nuai ah naupang kum 14-17 kikal te’n secondary education a hamphatpih ding uh tupna in Jr. High School 159-te High school tan adia upgrade hi a, School mapping exercise tungtawn a upgrade banah Education (S) a Engineering Wing leh Manipur Development Society (MDS)-te executing agencies hi uhi. Kum 2009-10 in Jr. High school 44 upgrade in om a, 2010-11 in school 23, 2011-12 in school 49, 2013-14 in school 9, 2014-14 in school 12 leh 2015-16 in school 22-te H. School tan ah upgrade hi’n gen uhi. RMSA ahihleh Ministry of Human Resource Development, Govt. of India nuai a India pumpi ah public school a secondary education-te puahna dia central sponsor scheme hi’n leng gen uhi.


Shopping Complex dinmun etkhiakna nei
Imphal, June-25: Nimaichand Luwang, ex-Minister makaihna a state BJP team leh L. Basanta Singh makaihna a BJP Thouba Mandal te’n tuni’n Thoubal shopping complex enkhia uh a, huai hun ah Nimaichand Luwang in a kinthei pen a state govt. in shopping complex tungtang suizui dingin BJP te’n phut uh chi’n gen hi. Mihing bawltawm hilou a tuahsiatna (natural calamity) omkei mahleh complex tungtang vangsiat huai a, complex kim leh kiangah lei khang (crack) ziak a chim thei dinmun a om hi’n gen hi. BJP Manipur Pradesh te’n state govt. in hilhchetna banah complex bawlna dia fund sanction tungtang kimtak a taklang ding in phut uhi. A kigolh khakna neite banah Contractor-te tungah action lak ding chi’n gen hi.


CM kiangah memorandum pia
Imphal, June-25: Concern Citizen of Manipur-te sik leh Manipur ah nam om teng huamkha a kigen Women leader te’n singtang leh phaizang bial-te ah muanna leh bitna om nawn theihna dia panla ding a ngetna in CM O. Ibobi kiangah tuni’n memorandum pia uh hi’n kigen hi. Hiai thu tawh kisai in Manipur Press Club ah tuni’n press conference om a, huai ah Binalakshmi Nepram, founder, Manipur Women Gun Survivors Networks in Imphal ah June 22, 2016 in Manipur Peoples’ Consultation for peace of Manipur leh June 11, 2016 in New Delhi ah Manipur People’s Convention of Hill and Valley hun a thupukna bang in CM kiangah memorandum pia uh  a, huai ah CM in Manipur ah thubuai vengsakna dia JCILPS leh JAC Churachandpur-te a tuamtuak a houpih ding in ngetna bawl uh a, Churachandpur a thau khahna ah si-te vuiliam theihna ding leh kigolh khakna neite suspend leh FIR bawl ding banah lusuunna tuak innkuante enkai dingin ngetna bawl uhi. Hiai hun tribal women leader  Rose Mangshi Haokip, Pantibonlui Gonmei banah Manipur Muslim apan Sitara Begum te’n uap uhi.


UNLF a women cadre 1 mankhia
Imphal, June-25: Kakching Police leh 22-A/R combine team te’n tuni nitaklam dak 4:30 vel a Kakching Lamkhai area operation a bawlna uah UNLF a women active cadre 1 mankhia uhi. Mat a om Army No. 2138 Yumnam Memi @ Lingjeleibi Chanu d/o Y. Ningthemjao Singh of Khorsantabi, Thoubal district hi a, amah apan Micromax handset 1 leh Airtel simcard 1 muhkhiak hi a, Kakching Police station ah pekhia uh hi’n kigen hi.


NFSA card piakkhiak sawm
Imphal, June-25: Lamlai A/C a Sekta Meira Paibi Apunba Lup te’n National Food Security Act (NFSA) zat tungtang ah lungkimlouh thu taklang uh a, hiai tungtang ah Pheijam Ibemma, Secy, Lup in media-te tawh kimuhna hun ah local MLA banah CAF & PD  Minister in-charge Kh. Biren Singh in Lamlai A/C mipi kiangah NFSA nuai ah mi 1 tungah antang kg 5 piak ding chiam mahleh antang hawmkhiak hun ah a thilchiam sang a tawm zaw hawmkhiak hi a, tukha ni 30 tan a 5 kg/head a hawmkhiak ahihkeileh Sekta Awang Leikai, Makha leh Mayai Leikai te’n a kisaipih thuneite kiangah NFSA card pekhe ding uh hi’n taklang uhi.


AMRUT leh Smart Cities Anni. zang
Imphal, June-25:MAHUD, Manipur Urban Development Agency (MUDA), Imphal Municipal Corporation (IMC) leh Town Planning Department-te saina in G.M. Hall ah tuni’n ‘The 1st Anniversary  launch of Atal Mission for Rejuvenation and Urban Transformation (AMRUT) and Smart Cities Mission’ zatna om a, huai ah Chief Guest in R.K. Dinesh Singh, IAS, Commissioner, MAHUD pang hi. Functional President in Soram Sunil Singh, Mayor, IMC pang a, Guest of Honour in Meibon Phaomei, Dy. Mayor, IMC leh N. Gitkumar Singh, Director (MAHUD) and Chief Town Planner-te pang uhi. Chief Guest in PM Modi in Jan 25, 2015 in AMRUT leh Smart city ana pankhia a, Urban area-te ah tuisiang 24x7 a muh ding tupna hi a, mission-te lawhchin theihna dia mipi tungah kinga hi’n leng taklang hi.


TUNI THUPI:
“Luiguam a leitangte amah adin anuam a; mi tengtengin anung azui ua, amah ma a napaite simsenglouh ahi uh.” – Job 21:33


EDITORIAL:
JCILPS kichi a paihoih zel diam?
Manipur phaijang biala pawl hat leh minthang mahmah a kigen Joint Committee on Inner Line Permit System (JCILPS)  a Convenor-lui   Kh Ratan in Manipur phaizang helpawl a tel chi’n police in matkhiak ding(wanted ‘tag’) a puankhum nung in huai lakkhiak dinga state govt nawh in JCILPS pawlin dakkal 48 sung Manipur ah general strike puang hial uhi. state government in ‘wanted tag’ lak ah telsak ua, hiai ‘tag’lakkhiakna ding phutna in dakkal 48 sung Manipur state bandh puan in om hial hi. Huai tana hunlou in  mi  poimawh mahmah hidia gintak midang khat a kipan puakzak thei(explosive devices) hunkhop muhkhiak hinawn a, huai leng JCILPS a information lam hidan in police thupuangtu in gen hi. Himahleh JCILPS in bel amau pawla tellou hidan in puang uhi. 
    JCILPS convener-lui  a Kh. Ratan tungah ‘wanted tag’ zukkik ding leh Manipur ah ILPS zat ding phutna in ‘JAC against the announcement of Wanted Against JCILPS Leader Kh Ratan & on Implementation of  ILPS’ kichi  pawl in dakkal 48 sung Manipur pumpi ah general strike a puan theih mawk uh lamdang mahmah a, hun paisa a bandh kibawl leh tutung a bandh kibawlin chituamna riau nei ahihdan muhtheih  a, Lamka mi telin gari a taivel mi hunkhop in thuakkha uh chih ahi  uhi. JCILPS convener-lui Kh. Ratan sanggampa Kh. Poireiton @ Bobby (33) kichi thudot ding in police in pawkhia uh hi’n kigen a,tua phetin mipi sousang mahmah ahihdan kichian hi. JCILPS makai khenkhat leh helpawlte kizom taktak ahi uhiam chih bel chiantaka gen leh puangkhia a omlam theih hilou hi.Amaute state government tawh kitheihsiamna thuktak nei ahi uhiam chih  ngaihsut theih hun om zawmah uhi. Ahi a, thil omdan theihchet haksa mahmah a, ILP deihlou a kiphinte’ lakah leng helpawl cadre hunkhop kigolhkha taktak mah hiding uhiam chih muanmawh huai chi a gen pawl tom veve a, a om leh omlouh bel a gechian thei om tuanlou  hi.
    Tuateng igen kawmin, kum nawn 2017 bul lam in Manipur  ah assembly election om  ding a, huai dingin a sungthu ah kibeihna sang mahmah hi. Chief Minister O Ibobi  in tutung in a hihna a mansuah maimah diam ahihkeileh bang ‘drama’ hong piangkhe diam  chih bel gentheih hilou hi. Assam akipan BJP Minister khat leh Central government akipan BJP leader khat in Manipur hongphak leh Manpur a state govt kisawiling maimah chih zak ahi a, Union Minister poimawh deuh hiam ahihkeileh Prime Minister in Imphal  hongpha bang hita zenleh Manipur ministry pukse dingin kilang khop in om hi. Tua ziakin, Manipur ministry a detdou hetkei chih achiang hi.
     Assam  akipan  Bodoland a MP  telching a om Biswajit Daimarya in Lamka khawpi hongpha a, JAC against Anti-Tribal Bills makaite banah heutu tuamtuam in kimuhpih uhi. Singtangmi mah Daimarya in Lamka hongphak  kipahhuai mahmah a, himahleh, state assembly election nai mahmahta ahihna tawh thuguk kiphumgu dang a om hiam ahihkeileh thiltup (intention) nei hidingin i gingta kholkei hi. Hiai  kalah, i theihding ua poimawh ahihleh Daimarya kichi mi poimawh kua khat ahi a, Bodoland piankhiakna panlate laka makai  poimawh pente’ lak a khat ahi hi. Tribal/ singtangmite’ cause/issue ziaka Lamka hong phak  kipahhuai mahmah a, electoral politics ziaka  hong zin hidingin i ngaihsun kei hi. Mipite’n amah vaidawn in  liangkou ah  zawng uh a, Bodo/ Hindu/ Christianity dan hia chih bel i theitam kei a, hibang zahta a ikipahpih in centre ah a aw(voice)  ngaihdeuh a  hong suah ikinem uhi.
    Eisung leh Manipur phaizang kal i gen kop ngaisek a, JCIPLS in leng kalsuan theihna tengah kalsuan ua, himahleh, a Convenor uh helpawl a  makai chih ziakin mat ding chihthu tutan in police hi’n state govt hileng zukkik tuanlou  a, tualou in  Information Secretary a makai khat leng  awk nawn chih ahi hi. ILP deihlou pawl Manipur singtangmite JAC te’ lakah hibang a kuamah awkkha a omlouh ziakin  a awkthei ding om hiam chih  plan tuamtuam  khawh om khak ding pilvan poimawh hi. Manipur singtangmite’ adingin Dan tawh kituak a  suahtak theihna ding  lampi om chi ahi hi. Tua dingin Dan theimite leng poimawh uh a, huchi kalah  kibeihna tuamtuam sang mahmah hi. JCILPS makaite thildang a  genkhak a omthei ahih leh state gov  leng a khanlawh uh hunta hi. Helpawl tawh kizopna sang mahmah chi a gente panna thudk mah ahi hiam chih dotna omthei hi.