MANIPUR EXPRESS | JUNE 29, 2016

HEADLINES:
PM Modi , Cong chief Sonia leh makai tuamtuam in suunthu puang
NSCN(IM) Chairman Isak Chisi Swu damlou in si 

Imphal, June-28: NSCN(IM) co-founder banah tutan Chairman apang  Isac  Chishi Swu (87)  hun sawttak kal(kidney)na ziaka damlou a om Vasant Kunj,New Delhi a Fortis Hospital ah kha 1 paisa akipan etkol in om nawn mahleh hoihthei tuanlou in tuni sunnung dak 12:40 velin si hi.Amah kal(kidney) leh urinary tract infection lama buaina a neih ziak Fortis hospital ah July 5, 2015 apan sawttak a ki-enkol sak a, kha 1 paisa akipan buaisia hi’n kigen hi. Prime Minister Narendra Modi in Naga helpawl makai Isak Chisi Swu suunthu puang in, a nutsiat a innkuante leh Naga mipite  adin khamuanna ngetsak a, India khangthu adia chiamteh thamching,

Naga Peace Accord tungtawn in Isak Chisi Swu theih gige hiding chi hi. Congress president Sonia Gandhi in leng suunthu puang a, Swu lunggulh bangin Naga mite’n lemna a neih  uh deihsak ahihdan gen hi. Muntuam tuam apan makai tuamtuam te’n leng suunthu puang uhi.
    NSCN(IM) Chairman  Isac Chishi Swu luang June 30, 2016 sun dak 12.00 in Delhi akipan Dimapur Airport tung a,huai ah Naga Hoho makaihna Naga mipite’n  ana vaidawn ding uh a,Dimapur kianga camp Hebron mun tut hiding hi.Hebron ah July 1, 2016 in suunna(state condolence service) om ding a, Dimapur khawpi a Agri-Expo mun ah July 2,2016 in mipi in sunna leh zahna a piak theihna ding un aluang koih hiding hi.Huchi’n July 3,2016 in a pianna khua Zunheboto district a  Chishilimi khua tut hiding a, July 4, 2016 in kivui ding chihthu om hi.         
    The Naga Mirror thusuak in a gendan in Nagaland state sung Zunheboto district a Sema (Sumi) Naga-te khua Chishilimi Naga village ah kum 1929 in Isak Chisi Swu piang a, apa Kushe Chishi Swu ahi hi. Aman Chishilimi a American Mission School ah laisim kipan a,huai nungin  Kohima a Govt. High School ah laisim sunzom a, Shillong a St. Anthony’s College akipan Political Science (Honours) in graduate hi.Aman kum 1950 tawp kuan in
    AZ Phizo makaihna Naga National Council (NNC) zom in Foreign Secretary dinmun len hi.  NNC ahihleh Naga mite adia political organization hi a, kum 1940 tawplam  apan 1950 kum bul tung lam teng a hat hun sung uh chi’n gen uhi.
    Angami Zapu Phizo makaihna nuai ah kum 1940 in NNC te’n India apan zalenna muh sawm in  sual mahle uh lawhsam  a, Chishi Swu leng  Foreign Secretary  akipan  NNC a Vice President hi. NNC leh India govt. in Shillong Accord  a suai akaih uh pom theilou im Isak Chishi Swu, Thuingaleng Muivah leh S.S. Khaplang te’n Jan 31, 1980 in National Socialist Council of Nagaland (NSCN) bawlkhia uh a, huai ah Chairman in pang hi. Kitheihsiam louhna ziak in NSCN-te faction 2 – S.S. Khaplang makaihna  NSCN(K) leh  Isak Chisi Swu leh Thuingaleng Muivah makaihna NSCN(IM) hong piangkhia hi. NSCN-IM in India govt. tawh kal ah kum 1997 in ceasefirepuang in  kihouna pan mahle uh thubuai suk veng ahih nailouh banah huai sung pan a pawl tuamtuam piangkhia hi.
    NSCN-IM Chairman Isak Chishi Swu in azi Khulu tawh tapa 5 leh tanu 1 nei uhi.


CT Lian in naupang operation ngai ding kithuahpih
Lamka, June-28: Kum 1 leh kha 9 a upa Thangmuansiam  s/o Nengkhantuang of Gangpimual  August 2015 in Lamka a Dist Hospital ah  piang a, a pian a kipan vangtah huaitak in a taw bing hi. A innkuanpihte’n kintakin Imphal a RIMS tunpih uh a,  huai ah doctor-te’n a gil ah  ek pawtna ding vuhvang sak  uh a, kum 1 ½ a phak chiangin a taw-vang ding bawltheih pat hidin gen uhi.
    Thangmuansiam tu’n kum 1 leh 6 val mahleh  a nu-le-pa niteng nektawm zong a  ahihman un operation bawlna ding sum neilou uh a,  beidawng taka a om ziakin CT Lian Guite, MDC 16-New Lamka West kianga vatai in panpihna va-ngen uhi. CT Lian in panpih ngai ahihdan social media tuamtuam ah athu kapkhia a,  mi tuamtuam akipan panpihna sum Rs. 67,700/- lut a,tu’n Thangmuansiam’ nu-le-pa’  haksatna veng theiding dinmun ah om hi.
    CT Lian Guite  in panpihna pe utte’n piak theih ahihdan social media tuamtuam a a kapkhiak zakin  Canada a om Thang Guite in Rs.30,000/- a kithuahpih ding ahihdan theisak a, USA a om Shelly Biakmoi in  Rs. 30,000/- panpihna pia hi’n gen hi. Train Up a Child kich te’n Rs. 500 banah Zenhang Lamka a om Tungnung in Rs. 1,000, Tombing Mung in Rs. 4,700, Siammuanlal, Singnunsiam leh David Hangshing te’n Rs. 500 chiat in kithuahpih uh a, tutan in Rs. 67,700/-  phata hi’n gen hi. Sum g lutkim naikei mahleh operation bawl thei ding dinmun  a om in JNIMS ah admit  bawl dingdan ngaihtuah hilel a, doctor bangzah hiam leng houpih khinta ahihdan CT Lian in  gen hi.
    Thangmuansiam’ nu Chinggouniang in  doctor te’n a gil a bypass a bawlsak ziakun daileng thei hamham ahihdan gen a,a  immune system  hatlouh ziakin natna vei pahpah a, a ki-atna ma glucose tui tawh pat (cotton)  zang a siak-hul  ngai gige in buaipih det ngai chi hi.Lungkham leh mangbang a hun a zatlai un CT Lian in pan alakpih ziakin  mi tuamtuam akipan panpihna a ngah uh Pathian’ hoihna ziak ahihdan gen hi.


LOCAL NEWS:
Chairman makaih in informal meeting
Lamka, June-28: Langkhanpau Guite, Chairman, ADC/CCpur in tuni zinglam  in Tuibuong a ADC office a ama chamber ah MDC-te’ informal meeting neihpih a, huai ah District Council in infrastructure tuamtuam a etkaite tawh kisai kikum uhi.  Dr. Ginlianlal Buhril, Sr. Prof., Director Corporate Governance  leng huai hun a vetel in ‘Road Map to Lamka’ chih pansan in Lamka khawpi khantouhna ding tawh kisai a lemgel  aneihte pulak a, khantouhna taktak om theihna dingin MDC-te dopsang poimawh chi hi. Huai meeting ah EM leh MDC tamzaw tel uh a, Genneikhup Vaiphei, EM & Secy HPA in Delhi a zinna report pia hi.


Meithai Fellowship omding
Lamka, June-28: Division Baptist Dorcas Fellowship, Lamka South Divn EBC saina in Lamka South Divn huamsung a om meithaite adi’n June 29, 2016 zinglam dak 10:00 apan sunnung dak 3;00 sungin Zion EBCC ah  meithai fellowship om ding hi. Huai hun Rev. V. Nenglian, Divisional Supdt, Lamka South Divn in hong ding a, thugentu in Mrs. Chinzavung pang in, Pastor Chinzamang, Local Pastor, Zion EBCC in hun khak ding hi.


PTC GHQ makaite hongtung
Lamka, June-28: PTC Mizoram HQ Presidential election adia zinkhia GHQ akipan John K. Ngaihte, Gen. Secy makaih in Chinkhanmang Ngaihte, Secy (Orgn) leh H. Pauzalal, Secy (Internal) te’n  zan in PTC Thanlon Block ah kum kum  2016-19 sung vaipaw ding election neihpih uhi.  President ding in Thangkhenmang, Vice President in T. Paukhansum, Secy in K. Joyful, Asst. Secy in Lianlemthang, Finance Secy in Mangkhansiam leh Treasurer in T. Jamkhanlian telching uh a, office bearer member din Zenzalam, H. Vungkhansuan leh H. Tuanminthang guang uh a, John K. Ngaihte in kichiamsak hi. PTC GHQ makaite tuni’n Lamka hongtung uhi.


UZO GHQ te’n block-te veh uh
Lamka, June-28: United  Zou Organization (UZO) GHQ makaih te’n UZO nuai a Block omteng vehsuak sawm uh a, tuni zinglam in Zogal Memorial Hall Complex ah UZO Lamka block te veh uhi. Huai ah UZO GHQ makai-te leh Lamka block makai te’n UZO policy tuamtuam te sepsua ding dan tawh leh maban paidingdan  genkhawm uhi.


Tuibong chih zang di’n DC in puang
lamka, June-28: Manipur Gazettee Notification No. 20/39/69-D dated 12/11/1969 dungzui in Tuibuong kichi pen Tuibong hia, records/correspondence teng in nomenclature dikpen “Tuibong” zang chiat ding in DC/CCpur in mipi theisak hi.


CHC Parbung leh PHC Thanlon enkhia
Lamka, June-28: Health deptt leh National Health Mission  a Addl. Director (Planning & Finance) Dr. H. Ranjit Singh, makaihna official  team in  June 23-25,2016 sung CHC Parbung leh PHC Thanlon a enkhi uhi. Amau CHC Parbung a Operation Theatre omna ding a poimawh tuamtuamte  leh infrasture component tuamtuam enkhia uhi. Amau  Parbung  V/A leh pawl tuamtuam a makaite tawh joint meeting nei uh a, Dr Mary Joy, Medical officer i/c CHC Parbung khut ah CHC Parbung a zatding in 2-KV Generator (Diesel)1; D & C Set 2; Delivery (nauneihna vanzat) set 2 leh instrument/articles bangzah hiam pia uhi. Addl Director Health Services team te Lamka apan Seiboi Mate, Dist.Program Manager, NHM/CCpur in kithuahpih hi.


‘1st Remna Ni’ zat hiding
Lamka, June-28: Mizo People Convention (MPC) Sub HQ Zone-I office, H.Dalzamang’ inn ah June 30, 2016 sunnung dak 1:00 in Lamka adia masapen ding in “1st Remna Ni” Live at peace with everyone chih thupi pansan in zat hiding hi.Thangpau,President Zone-I in bangziaka Remna Ni kizang hiam chih genna neiding a, huai zawh in minute 1 sung daidi in suunna zat hiding hi. Elder LS Gangte, Consultant, MPC in Live at peace with everyone chih thupi zangin thugenna neiding a, huai zawh in Mass Prayer omding hi. FP Gangte, Consutant, MPC in thugenna neiding a, Zomi Council; Hmar Inpui; Kuki Inpi,CCpur; Thadou Inpi; MPC; PTC, STC, UZO leh VPC te’n thugenna saulou neiding uhi.


Financial Literary Awareness
Lamka, June-28: SBI/CCpur Branch saina in June 29, 2016 sunnung dak 2:00 in Saikot HYA Hall ah Financial Literary Awareness Program omding a.PMEGP loan leh Agriculture loan lakha a, din zoulou khenkhat te ading I n 30% Discount bank in bawlsak thei ding a, huai bel loan ditzohlouh lak apan 30% ngaihdam a suk vaiveng theihdan lampi bawlsak thei  ding hi.PMEGP leh Agriculture loan lakha a bank apan sapna lai mute ban ah sapna mulou himahleh mimal kuahiam discount tangthei ding te’n ngaihven theih ding a, kuapeuh lunglut teltheih ding in SBI/CCpur branch te’n chialna bawl uhi.


LLIN 90 % kihawmkhe ta
Lamka, June-28: Malaria natna pua thoukang doudalnang a Malaria Deptt te’n  Long Lasting Insecticide Net/Insecticide-Treated Net (LLIN/ITN) ahawmkhia uh Vangai range leh Sangang PHC chihlouh ah kua/veng tuamtuam ah 90% vel hawmkhe zouta uh hi’n Dr. Liankhawjam, DMO/CCpur in gen hi. Aman genbehna ah tentative program/schedule bang a deptt in monsoon season beima in LLIN/ITN hawmkhiat sawm in panla lel hi’n gen hi.


Ni 2 ni in dharna tu uh
Lamka, June-28: Hiangtam Lamka a Salphate Zahna Pumpuk ah JAC against Anti-Tribal Bills makaih in tuni ni 2 ni Pearsonmun, Khominthang (New Lamka), Gangpimual leh Apollo Veng te sit-in-protest/dhana tu uh a, JAC lam apan Thangzamang leh Henkholun Gangte tel uh a, Pastor/Rev lam ah Rev. BL Sandam tel hi. Rev BL Sandam in Pathian thu genna nei in thumkhawmna makaih hi. June 29, 2016 in JAC lam apan K.Paukhansuan leh Zam Khua Cin ban ah Rev Zathangsung Zate tel in Tangnuam, Zion Veng leh V.Munhoih te tuding uhi.


Dist. e-Govenance a post 2 adi’n mi 5
Lamka, June-28: Dist. e-Governance Society/CCpur nuai ah Dist. Level Resource (Dist. Manager) post 2 laknang in mi 9 te’n DC office ah application form pia uh a, eligibility criteria dungzui in mi 5 te’n June 30, 2016 zinglam dak 10:00 in DC office ah written-cum-interview neiding uhi. Mi 5 te-Sangsang Hauzel; Esther Nuamneiniang; Kamkholal Khongsai; Peter G.Bieklien leh Michael Paul Haokip hi uhi. CCpur Dist. ah Dist.e Governance nuai ah Common Service Centre (CSC) 91 omlak ah tulel in 3/4 kia function hi’n kigen a, adang CSC function loute Dist. Manager 2 lakthak ding te’n enkai a, function sak ding hi’n kigen hi.


SUUNNA:
Mrs. Zamniang (88) m/o Mahajon N.Chinkhalian of Elim Veng, New Lamka, tuzing baihtak dak 1:00velin awmna in si a, sunnung in YPA hanmual, New Lamka ah kivui hi.
Upa Pauzahang Vaiphei h/o Tingngaipau of Kashmir veng, D.Phailian, tuni nitaklam dak 5:00 velin si a, June 29, 2016 in kivui ding hi.


IMPHAL NEWS:
NH-2 omdan dinmun taklang
Imphal, June-28: Sadar Hills a Civil Society Orgn. leh Mayangkhang Area Youth Orgn. (MAYO)  te’n NH-2 a Imphal-Dimapur lampi sia ngaihkhawk huai asak dan uh taklang uh a, hiai tungtang ah tuni’n Kangpokpi ah joint meeting nei uh hi’n kigen hi. Huai hun ah Highway puah hoih din state govt. ah tamveitak ngetna  bawl mahle uh ngaihsak louh a om tungtang mawhpaihthu puang kawm in Gamgiphai leh Taphou Kuki kikal ah lampi kisia ngaihkhawk huai a sak dan uh taklang uhi. State govt. banah a kisaipih department te’n lampi a puah louh ziak un a tawn kha-te adin nawngkaina lianpi tun a, tulel a Trans Asian Highway No. 1 dinmun kum 100 val paisa a lampi tawh a kikhiatna omlou a, Shaktiman kia taithei hi’n gen uhi. State govt. in a kinthei pen a lampi a puah keileh kiphinna khauhtak pan ding uh hi’n leng taklang uhi.


8th IRB personal 1 sisa in kimukhia
Imphal, June-28: Heingang Police station in a huamkhak Khabeisoi a 7th Manipur Rifles (MR) campus a police duty te’n tuni zinglam dak 10:00 velin dil (pond) sung ah siluang kilam (float) khat mukhia uhi. Misi ahihleh Silshi Lamka (28) s/o S.S. Angtil of Chandel Mantripantha village hi a, Heingang Police te’n siluang vala in JNIMS morgue ah postmortem bawl ding in koih uh a, bangziak a si hiam chih theih chet hilou hi’n gen uhi.


Lilong police station ah kiphinna om
CM kiangah memorandum pia uh
Imphal, June-28: Nungei Muslim village te June 26, 2016 nitak in security personnel-te tawh kinawktuah uh a, huai nung in Nungei Meitei village-te leng a tel ziak un namkal buaina tung thei dia a kilat ziak in Thoubal District Magistrate in June 27, 2016 nitaklam dak 5:00 apan Curfew puang  uhi.
Kinawktuahna  ah security te’n thau a kapna uah Md. Arif Khan (15) si a, kum 25 a upa khat  liam hi. Tua tawh kiton in Nungei a security personnel-te tungah NIA dan a Central agency te’n inquiry pat ding phutna in tuni’n Nungei Muslim village te’n Lilong Police Station ah kiphinna nei uhi. Huai banah Kh Sanjoy Meitei (38) s/o Yaiskul; L. Mukta Singh (40) s/o (late) Sekho; H. Dinesh Sigh (28) s/o Ibocha; H. Budha Singh (4th IRB Riflemen) (35) s/o Tomba; Laishram (o) Premila Devi w/ o Mukta Singh; Th. Iboyaima (45) s/o (late) Bijoy Singh leh L. Ranjit Singh (38) s/o (late) Gourachan Singh-te matkhiak ding banah Nungei a state security force-te lakkhiak a huai ah central force-te koih ding phut uhi. Hiai tungtang ah JAC kibawl khia te’n thubuai suk venma siluang lalou ding in thupukna bawl uh a, Md. Arif Khan sih tungtang in a thilphut-te uh tawh kisai a Chief Minister kiangah memorandum pia uh hi’n kigen hi. Lilong Dam ah tuni zinglam dak 10:00 velin meeting om a, huai ah Md. Arif Khan sihna tawh kisai a kigolh khakna nei state personnel-te dakkal 48 sung a matkhiak leh gawtna piak ding in state govt. a phut ding in thupukna bawl uh a, Lilong Turel Ahanbi Dam a Five Star English High school a student, management committee leh staff te’n Md. Arif Khan suunna hun zang uh hi’n kigen hi.


Culture and Film Inst. munte enkhia
Imphal, June-28: CM O. Ibobi thupiak dungzui in Ksh. Biren Singh, Minister (Works) leh PWD a akisaipih engineers te’n tuni’n Manipur University of Culture (MUC) leh Manipur State Film & Television Institute (MFI) a office building leh classroom ding-te etkhiakna nei uhi. Amau Art 7 Culture Complex, Manipur State Film Development Society Complex leh Shri Shri Govinda Nartalaya mun-te enkhia uhi. MUC ahihleh Manipur University of Culture Act 2015 nuai a phuhkhiak banah North East bial a dia masapen hilai a, academic session nawn apan Degree course 5 – Visual Arts, Umang Lai Haraoba, Thang-Ta, Dance leh Music-te ziltheih ding hi’n gen uhi. University ah nasep pat theihna ding in Manipur govt. in Vice-Chancellor di’n N. Khagendra Singh leh Registrar din L. Joychandra Singh-te koih uhi. Dept. of Personnel and Administrative Reforms, Govt. of  Manipur te’n zan a thusuah a bawlna uah A. Subhash Singh, MCS in MUC/MFI ah OSD(Admin) banah Dy. Secy. (DP) len ding a, N. Sudip Singh, MFS in MUC/MFI ah OSD (Finance)/Dy. Director (PIC), Special Officer (MIS) leh Under Secy. (Cabinet and Finanace) len ding hi’n taklang uhi.


Mun tuamtuam ah sit-in-protest om
Imphal, June-28: Manipur ah ILPS zat ding phutna a JCILPS-te saina in Kwakeithel, Moirangpural Leikai, Konjeng Leikai, Ningthemcha Karong, Laishram Lekai leh Huidrom Leikai-te ah tuni’n sit-in-protest om hi’n gen uhi. Huai nung nitaklam dak 3:00 velin kiphinna nei te’n  khut kilen in lampi dung ah ding uh a, huai hun ah ‘ JCILPS convener lui Kh. Ratan tungah ngawhna omte lakhiak ding leh Bill 2-te dan suah dia chi’n slogan kikou uh hi’n leng taklang uhi.


‘Build back better Manipur’ Mission
Imphal, June-28: Habitat for Humanity India (HFHI)-te saina in Langol a RNBA Church ah tuni’n ‘Build back better Manipur’ Mission kichi  London Olympic Bronze Medallist MC Mary Kom in hongkhia hi. Aman a thugenna ah zinling ziak a inn kisia-te bawlhoih thakna dia panlakna a atelkhak hampha kisa a, tuahsiatna (disaster) nung a poimawh pen ahihleh mite dinmun ngei a koihnawn (rehabilitate) chi hi. HFHI te’n phase masa pen ding in Tamenglong ah Jan 4, 2016 ni a zinling hun ah kisia innkuan 51-te adia disaster resilient house baw sak ding uh a, HFHI leh NE India Committee on Relief and Development (NEICORD)-te kithuah khawm ding uh hi’n leng taklang hi.


PET a tel theiloute adin hunlem pia
Imphal, June-28: Manipur Police deptt a Constable (Male/Civil) kila dingah Physical Efficiency Test (PET) om dinga bikhiah ni a tel theiloute’ adin DGP, Manipur in hunlem  khat bikhiahsak a,PET om ni tengin district tuamtuam a candidate-te adin zingsang dak 8.00 zelin kipan ding hi.
1.  July 1-3,2016: Thoubal dist incl supplementary candidates
2. July  4,2016: Imphal East dist incl supplementary candidates
3. July  5-6, 2016: Remaining candidates of CCpur, Chandel, Tamenglong, Ukhrul and Senapti dist including supplementary candidates
4.  July 7-8,2016: Remaining candidates of Imphal West,  Imphal East incl Jiribam, Bishnupur & Thoubal dist including supplementary candidates


TUNI THUPI:
“Gilou paisan inla, thilhoih hih in; lemna zong inla, a delhin delh in.”
– Sam 34:14


EDITORIAL:
Th Muivah khut taklam ding?
Kum 85 a upa NSCN(IM) Chief Isak Chishi Swu in  kal natna ziakin kha 1 val  Delhi a Fortis Hospital a om tuni(June 28,2916) sunnung in  si a, huai in tulel a  Indo-Naga Peace pailel a hihbuai gintak huai kholkei mahleh  hun paisa bangin lamzang  takin  a pai ziahziah veve diam chih ngaihtuahna omthei hi. Kum 85 a upa  Isak Chishi Swu mi pautamlou leh zaidam mahmah hi a, taksa upat ban ah a dam theihna a chauh zziakin India govt leh NSCN(IM) in Indo-Naga talk tawh kisai ‘Frame work agreement’ a bawl hun uah leng  te; theilou hi. Isak Chishi  Swu a sihguih ziakin Naga-te’ maban ding gen haksa mahmah om leh kilawm in kilang hi. A ziak ahihleh amah ‘signatory’ khat leng hithei hi. Indo-Naga peace talks tawh kisai himhim thuguk secrecy/ confidential bang a ngaih hi a, tua ziakin media-te’ ma ah official in puankhiak(disclose) hi ngeilou a, Telangana state a piandek hun tawh a kibatna tam mahmah hi.
    India mainland akipan Civil society organisation tuamtuam banah Naga frontal organisations te’n New Delhi telin Dimapur banah mun tuamtuam a Indo-Naga political issue tawh kisai liauliau in Consultative meeting poimawh neinawn ding uh chih ahi hii. Zanzek in ‘Frame Work Agreement’ tawh kisai genin om a, Naga-te’ adia hunbi poimawhtak leng himah hi. Nagate’n India a state tamzaw thuzawh uh ahi chihtheih phialin om a, tu in frame work a thu kikhungsate in gen nei mahmah ding hihtuak hi.
    NSCN(IM)  Chief Isac a om nawnlouh ziakin  Nagate’ maban ding bang hong chidiam chih gen haksa mahmah hi. Naga Hoho banah, United Naga Council (UNC), Naga Mothers Association (NMA), Naga Peoples Movement for Human Rights (NPMHR), Naga Students Federation (NSF), All Naga Students Association, Manipur (ANSAM), Naga Women Union leh Arunachal Pradesh leh Assam akipan Naga organisations tuamtuam te telin Arunachal Pradesh state apan Indo-Naga Peace talks maban ding a buaipih  uh ngaiding in kilang hi.
    Tulel in Indo-Naga Peace talks ah NSCN(IM) General Secretary Th Muivah zatin om a, amah leng upa huntawkta a, kum 70 valta hi. Ahitakin, mi khauhpai mahmah Muivah pen Centre government in zahna khat nei ua, niamchik apai Isak pe’n ‘deal’dan tuam nei uh ahi diam chih leng ngaihtuahna omthei hi. Indian Government a haikei a, Isak leh Muivah ‘mitsiin’ hun ding ngak uh ahi diam i chih  pen hong tangtung taktak leh kilawm bang mawk hi.
    NSCN(IM) te’ kivaipuakdan i theikei a, Naga mite adia a suanpen uleng ahithei a, a chairman uh Isak Chishi Swu in sisanta ahihmanin NSCN(IM)  Chief hihna kua’n a len diam chih ngaihsut tham pha hi. Mi pau tamlou, chitak, ginom leh Nam adia vawkkhiak a om ding NSCN(IM) Vice President thak NSCN(Khole-Kitovi) pawla Chairman-lui Khole Konyak  in huai dinmun a pawzou diam ahihkeileh, tulela General Secretary  Thuingaleng Muivah in a pawtou diam chih leng gen haksa mahmah hi.
    Nagate’ adingin NSCN(IM) Chief Isak a sih  poi mahmah dingin kilang a, suai kaih a omsa FRAME WORK tawh kisai nakpitakin sukha lai ding hi. A kuahiam zakdahlouh dingin gen lehang NSCN(IM) sunga thil paidan etin Isak sangin Muivah poimawhzaw bang a, tu in Muivah leng upa mahmahta ahihman in  Government  in ‘Flag/Currency’ leh adangdang tuam neih dingin hon phalsak uh chi mahle uh a takin sepsuah bangmah omlou hi. NSCN(IM) Chairman  Isak in a taktak hun ah thiltungte ngak manlou a a mipite sihsan eive maw chihtheih in om hi. Ahi a, Isak si mahleh, Indo-Naga peace talks pe’n Th Muivah, Rh Raising, VS Atem leh heutu tuamtuamte’ makaihin paitou thei zelding in bel kilang hi.
    Th Muivah  abultung akipan mi khauh mahmah ahi kichi a, tu in ‘Chairman’ a sih ziakin  akhut taklam kitan bang khop a ngaihtheih  hita hi. Isak sihna pe’n Naga mipite’ adingin thil poitak hi a, Muivah lung-am mahmah dingin gintak-huai hi. Huaiziak mah in  Indo-Naga Peace talks maban ding leng theih haksa mahmah suak hi. Ahihkeileh Framework tawh kisai agreement zawh ahita a, Isak Chishi Swu sihma ngei a thuchian bawlkhiak ding i chih  na zekai(delay) sak ziakun hiai teng tung ahita chi’n NSCN(IM) pawlin kiphinna dangkhat hon pan maimah uhiam chih leng theihbut  hilou hi.