MANIPUR EXPRESS | JUNE 30, 2016

HEADLINES:
Union Cabinet in 7th Pay Commission recommendation pom
Centre govt employees leh pensioner-te’ lawh pung
New Delhi, June-29: Prime Minister Narendra Modi makaih Union cabinet tuni a meeting  in 7th Pay Commission-te’ thusun (recommendation) pom (approved)  uh a, huai dungzui in   Central government employee 47 lakh -te’ lawhleh pensioner 53 lakh-te lawh(salaries) 24% phialin pungding chih ahi hi. Huaite lakah Defence force asem 14 lakh leh pensioner 18 lakh tel uhi. Central government employee-te laka lawh tampen in kha tengin Rs 2.5 lakhs tan sang ding chihthu om hi. Union Cabinet thupukna dungzui in 7th Pay Commission recommendation bel January 1, 2016 akipan zat hiding hi.

    Union Finance Minister Arun Jaitley in a gendan in govt employee-te lawh khateng a Rs. 7,000/- akipan leng tu’n Rs. 18,000/- in kipan ding a, khalawh tampen Rs. 90, 000/- hisek leng tu’n Rs. 2,50,000/- hitou ta ding chi hi. Pensioner-te kha lawh niampen tulela Rs. 3,500/- leng tu’n Rs. 9,000/- hita ding a, annual increment rate bel 3% mah hiding a, gratuity ceiling leng Rs. 10 lakh akipan Rs. 20 lakh hita ding chi’n Minister in gen hi. DA 50% a a pun tengin gratuity ceiling leng  25 % in pung ding hi. 7th Pay Commission zat ziakin tu financial year sungin govt in Rs. 1.02 lakh crore vel sen behlap ding chih ahi hi.
    Union Finance Minister in a genzeldan in khalawh pung ziakin consumption leh demand leng kibehlap ding a, House Building Allowance (HBA) leng Rs. 7.5 lakh akipan Rs. 25 lakh hita ding chi hi. Defence personnel-te Military Service pay a rate leng categories tuamtuam dan in kha in Rs. 3,600/-, 5,200/-, 10,800/- leh Rs, 15,500/- in khansak hi a, allowance tawh kisai 7th Pay Commission recommendations leng Finance Secretary Committee in enthak ding uhi. Union Finance Minister Arun Jaitley in a genna ah central government nuai a semtute leh pensioner-te arrear leng tukum sunga piak hidin gen hi. Central govt nuai a semtute’ lawh punna ding tawh kisai 7th Pay Commission in recommend a bawldan uh Union Cabinet in ngentel taka a genkhawm  nung un pom in om chih ahi hi.


Terrorist te’n Istanbul airport attack: mi 41 si, 239 liam
Istanbul, June-29: Turkey khawpi Istanbul a Ataturk International airport zan nitak zansawt nungin ISIS terrorist pawl mi 3 in attacked uh a, huai ah mi 41 si in, 239  liam  uh hi’n City Governor thusuakin gen hi. Istanbul's international airport ah ISIS terrorist 3te laka tel suicide bomber khat in a taksa tunga bomb a puakte puakzak sak chih hi hi.Misi tamzawte Turkish-mi hi uh a, midang 13-te bel gamdangmi hi’n kigen hi. Governor office thusuakin agendanin, aliam  mi 239te  laka 109 te aliam nasat luat louh ziakun Hospital akipan pawtsakin om chi uhi. Thusuak khenkhat in agendanin, misite 41te lakah  Saudi Arabia mi 5,Iraq mi  2 banah  Tunisia, Uzbekistan, China, Iran, Ukraine leh Jordan akipan khat chiat hi  uh a, thiltung tawh kisai a kipuang om naikei mahleh Turkish authorities te’n bel Islamic State (ISIS) jihadists-te hidingin muangmawh uhi.


LOCAL NEWS:
MLPO in kipahthu genna leh kipahpihna zang
Lamka, June-29: Munluo Phungpi Orgn HQ in tuni in Zomi Colony a Chinkham Modern School ah MLPO sunga line tuamtuam a lawhchingte kipahpihna leh kipahthu genna program sai uh a, huai hun session 2 in khen uhi. Session masa mipi’n thumkhawmna nei uh a, Pastor Khamkhansuan in maitam latna, IRS telin lawhchinna tuamtuam ngahte banah tukum a class X & XII passed-te Pathian kiang ah thumsak hi.
  2nd session ah kipahpihnaprogram zang uh a, Dominic K. Munluo, Secy. MLPO in lawhchinna ngahte pulak in  memento leh certificate pia hi. M.Thianzathang, President, MLPO ; Upa Chinkham, Chief of Zomi Colony, Dr. DK Mang leh Michael Ginzasuan, DSO/CCpur te’n hasotna thu gen  uhi. Munluo phungpi apan in tukum in  M. Thangsuansang Zou in UPSC nuai ah  IRS piak in om a, MPSC nuai ah M. Lawrence Kapkhenmang in MPS ngah hi. M. Edmund Kamminlun in Cabinet Secretariat ah Asst. Commissioner mu in, M. Khamsuanhang in Section Officer  Grade-I  ban ah M. Ginsuanmung leh Ruth Nemliankim te’n M.Sc. Lecturer mu in, M Jacob Vanlalbuatsaiha in Bank PO mu a, class X leh class XII exam ah ahunkhop  lawhchinga  uhi. Mipi paikhawmte’n lawhchingte adingin maitam bawlsak uh a, Upa Thongkhojang Munluo, Chief of Nivangphai in Pathian kiang ah lan a, Pastor Khamkhansuan in Pathian thu gen in Pastor leh Upa tengin huaite lutung a khut nga in thumsak uhi.


Meithai Fellowship ah 500 val tel
Lamka, June-28: Division Baptist Dorcas Fellowship, Lamka South Divn EBC saina in Lamka South Divn huamsung a om meithaite adingin tuni’n Zion EBCC ah meithai fellowship om hi. Huai hun Rev. V. Nenglian, Divisional Supdt, Lamka South Divn in hongkhia a, thugentu in Mrs. Chinzavung pang in, Pastor Chinzamang, Local Pastor, Zion EBCC in hun khak hi. Huai hun ah Biakinn 20 val akipan in 500 vel paikhawm uh hi’n kigen hi.


Cluster-te a di'n awareness prog
Lamka, June-29: Dist. Handloom & Textiles, CCpur saina in tusun dak 12:00 in Simveng a  Simte Inn ah New Lamka Cluster-te a ding in awareness programme nei uhi. Huai ah  Chief Guest in C. Rajasekharan Singh, Asst. Director (W), WSC, Imphal pang a, Guest of Honour in Chingtam Luwang, President, Handloom Promotion Council, Manipur leh ST Lalson, Board Member, Bijang Handloom Weavers Co-operative Society Ltd.  pangin Functional President in Th. Ibemcha Devi, Project Manger (Handloom), Dist. Handloom & Textile, CCpur pang hi.
Chief Guest in a genna ah puan zem tuamtuam kigankhete etlawm in hoih thei mahleh puankhau kizangte allergy om ut ahihman in deihbang zoulou a, cotton puan ngen akhek hunta hi’n gen hi.
S.T. Lalson in agenna ah niteng a siamgan a innkuan vakte’n sepna neilou dan a kikoihniam pen tawpsan a,  khawpi tuamtuam a omte kuhkal bang in semleng lawhchinglouh kuamah omlou ding chi hi. Puan gante’n puan tuamtuam agatkhiakte uh ladia/leiding in govt in Bijang Handloom Weavers Co-operative Society Ltd guang hi’n leng gen hi.


Tuni'n Town hall meeting om
Lamka, June-29: State Bank of India kum 210 chin chiamtehna in SBI/CCpur Branch in tuni sunnung dak 2:00 in Saikot a HYA Hall ah Loanee-te tawh Town Hall meeting nei uhi. CCpur Dist.  ah SBI/CCpur Branch akipan PMEGP leh Agriculture loan la, tunitan dinzoulou mi 300 val om in, Rs. 3 crores val tang lel hi’n kigen hi. Loan din zoulou te’n a dit theihna dingun 30 percent discount in kong zapi honsak uh a, hiaibang hamphatna om ahihlam thei a baihsamtak a loan ditzawh ding uh ngimna sai a om hi’n kigen hi. Tuni’n mi deihbang in paikhawm kei mahleh a hohte’n hamphatpih mahmah uh a, hibang hamphatna bawlsak ahihna uah kipak petmah uh hi’n kigen hi. 


Angels’ Place in kipahpihna nei ding
Lamka, June-29: New Lane, Bungmual a Angel’s Place in July 1, 2016 sunnung dak 2:00 in Lydia’s Hall ah tukum a Class X leh Class XII lawhchingte kipahpihna leh kipahthu genna nei ding uhi. Huai hun ah V. Englian, Supdt., in student lawhchingte mel lahna nei in Thanga Tonsing in hasotna thugen in thumsak ding hi.


Zillai GHQ in kipahpihna nei ding
Lamka, June-29: Zillai GHQ saina July 2, 2016 in zinglam dak 10:30 in Imphal a TRI Auditorium ah Class X & XII lawhchinna ngahte kipahpihna om ding hi. Huai ah Chief Guest in T. Manga Vaiphei, Minister PHED pang ding a, Guest of honour in Vungzagin Valte, Parliamentary Secy leh Functional President in Khatkhotong Baite, President, VPC GHQ pang ding hi. Special invitees in Soiminlian Lengen, MCS; Sokhongam Baite, MCS; Alfred Jamlallun Khaute, MCS leh Mangminlian, MCS-te pang ding uhi.


ZRO in suunna thu suah uh
Lamka, June-29: Calvin H., Secretary,MEA, Zomi Re-Unification Orgn(ZRO) in zan a New Delhi a si NSCN(IM) Chairman Isak Chishi Swu ahunlou taka a sih ZRO in sun mahmah ahihdan puang hi.Kum 30 val Naga movement makai in a sihtan gin-om takin pang a, Northeast bial mipite adiakin Manipur singtangmite adin asih manna thupitak hi a,a mizia leh hihna akipan ettontak ahihna liantak om hi’n leng taklang hi. Isak in kum 1997 akipan India govt tawh kala peace process paitou lawhchinna mu manlou a asih poisak thu genkawm in amah omlouh ziaka mun-awng hukdim haksa mahmah ding ahi a,Isac in a sihpih (cause) lawhchinna dingin Naga leader-te’n kiptaka pang din a lam-et thu leng Calvin H. in puang hi.


Pre-paid meter box 12550 tuahta
Lamka, June-29: Manipur State Power Distribution Company Ltd. (MSPDCL)/CCpur te’n khawpi sung ah zan tan in electric pre-paid meter box 12550 thuah (installed) ta uh a, huai lak ah 9550 activated uhi. Electric deptt te’n Sielmat leh Hmar Veng lak ah electric prepaid meter box thuahzou uh a, Rengkai area ah pre-paid meter box activate lel uhi.


Breast cancer screening leh diagnosis
Lamka, June-29: Dist. hospital leh Dist NCD Cell, CCpur saina in tuni’n hospital a seminar room ah CME on early breast cancer screening and diagnosis tawh kisai seminar a, huai ah Dr. Th Nirpendra, MD (Radiotherapy) in sinsak hi. Dr J. Samte, Medical Supdt., in NCD Clinic nuai a hospital ah diagnostic facility tuamtuam omte pulak in, Dr Y Premchandra Singh, Dist Nodal Officer , NCD Cell in district ah cancer screening programme neih poimawh ahihdan gen hi.


Hmar Inpui Executive meeting om
Lamka, June-29: HSA Campus ah tuni zinglam dak 11:00 in Hmar Inpui Executive meeting om a, thupukna bangzah hiam nei uhi. Hmar Returnee Association (HRA) ngetna bang in Hmar namsung a pawl/saptuam/mimal calendar bawl teng in May 16 “Hmar Martyrs Day” poimawh ngaih a, asan (marked red) ding in thupuk uhi. JAC against Anti-Tribal Bills ah HSA lungkimlouh thu tut ding leh tulel sang a JAC hatzaw sem a paitheih dingdan ngaihtuah ding, Outer Manipur Tribal Forum ah Hmar Inpui represent ding in Robert L.Hmar of Rengkai guang uhi. Isak Chisi Swu, Chairman, NSCN-IM sihna tawh kisai Hmar Inpui suun thu puang in nam leh gam adia manna thupitak hi’n puang uhi.


AMTWUte’n ahohna san uh taklang
Lamka, June-29: All Manipur Tribal Women Union (AMTWU) makaite’n tuzing dak 7:30 in morgue ah Press-te kimuhpih uh a, July 27, 2016 a  Chief Minister O. Ibobi  a kimuhpihna ziak uh puang uhi.Nianglian, Convenor in agendan in, Manipur singtangmite buaina tawh kisai a Chief Minister in bang ngaihdan nei hiam chih thei-ut in kimuhpih uh hi’n gen a, dakkal 1 val a kihouna uah Manipur Govt in singtangmite constitutional rights ahih buchinsak masiah kiphinna khawlsan louding uh ahihdan AMTWU pawlin gen uh chi hi. Bill pen bawlthak hileleng singtangmite adia zatna omlou ban ah Manipur apan atuam a kivaihawmna  poimawh uh hi’n gen hi. CM in Bill 3te’n singtangmite sukhalou ding chi’n genpih mahleh pomtheilou uh ahihdan theisak uh chi a, singtangmite sukhalou ding ahihleh bangziaka Bill dang pass  ngai hiam? singtangmite adia hinna pia salphate gal a kalsuanlou a, tuni tan singtangmite buaina ngaihsaklouh  a om hiam chih dotna bawl uh a, singtangmite leh phaijangmite kala kideidanna omlou ahihleh buaina akinlam a hihveng a, singtangmite ading liauliau a constitution in apiak Sixth Schedule recommend din ngen in theisak uh hi’n gen hi.
    Convenor in a genbehna ah, AMTWU mimal khat ngaihdan a pai hilou a, banghiam tupguk nei a kiphutkhia leng hilou a, kuamah akipan lam-et neilou leh mahni mimal metnang zong a kalsuan ngeilou leh kalsuan ngei ngeilou ding uh hi’n gen hi. Manipur  CM tawh kihouna a leng thudang bangmah gen ahihlouh ban ah thukimna bawl dia kuan leng hilou uh ahihdan kuapeuh in theihpih di’n ngen hi.


EO/Town kiang ah enkai di’n theisak
Lamka, June-29: MDC member te’n June 14, 2016 a sitting aneih hun ua thupukna khenkhat sepsuah ding te kha 1 sung a sepsuah ahihtheihnang I n CEO/ADC, CCpur in EO, Town kiang ah enkai ding in theisak hi. MDC sitting a thupukna sepsuah dingte lampi dung a phalna tellou a, aksa zuakte, aksa glass container a koih a, thil dang tawh zuakkhawm louh ding, voksa zuakte amul bohkhiat thawh ding, trader teng in weighing scale azat uh electronic weighing machine a khekkhiat vek ding chih te tel hi. EO/Town leh staff te’n enkai ding uh a, June 14, 2016 apat kha 1 zawh a dan kibawlthak zuiloute action lak hiding in kigen hi.


Workshop on Mother and Child Tracking System
Lamka, June-29: Dist. Health Society/CCpur saina in tuni zinglam in CMO Conference Hall ah One Day Workshop on Mother and Child Tracking System & Health Management Program System om hi. Huai ah Ibomcha, State Data Manager, NHM in sinsak a, i/c Medical Officer-te, DPMU staff te ban ah Private Hospital a Managing Director te tel uhi.


Workshop on Peace Building om
Lamka, June-29: KKL Complex ah tuni zinglam in Thadou-Kuki Students' Union GHQ leh Indo-Global Social Service Society  saina in‘One Day Workshop on Peace Building’ om hi. Huai ah Rev. Dr. Kh. Khaizakham,(retd) Principal, ECT in ‘Religious perspective on peace and reconcilation (Factors that Hinder Peace Building)’ gen a,Lalramsang Infimate, MCS/ADC Bishnupur in ‘Peace withour justice is only a mirage’ chih zang in thugen hi.
    Rev.Dr. Kh. Khaizakham lemna leh muanna omna dingin Pathian leh mihing kikal ah relation hoihtak bawl phot ngai hi’n gen hi. Lamka khawpi ah lemna deih mi bangzah om hiam? buaina om in, omkei leh hinkhua zang mi bangzah omhiam chih data kikaikhawm leh lemna leh muanna bawlna dinphatuam ding chi hi. I gam ah lemna leh muanna  omna ding in Sunday School a naupangte oihtakin ki-train leh phatuam mahmah ding in gen hi.
    Lalramsang Infimate in  lemna kichi koimah dang a hong kipan ding hilou in mahni lungsing leh ngaihtuahna a hong kipat ngai chi hi. Lemna leh muanna om theihna din kuapeuh in social-economic justice a muh ngai chi hi.


SUUNNA:
Lamzating (95) m/o Rev.T.Zuanlal of New Lamka (G), tuni sunnung dak 12:30 velin teknat in si a, nitaklam in Vaiphei Christian Cemetary ah kivui hi.


IMPHAL NEWS:
Kum tengin Electric 1350 MU poimawh
Imphal, June-29: JERC for Manipur and Mizoram,  MSPCL leh MSPDCL-te saina in Classic Grande Imphal ah tuni’n ‘Electricity and Related Issues Redressal’ thu tawh kisai in conference om a, huai ah CM O. Ibobi in Imphal leh district HQ teng ah 24x7 a mei (electric) a paitheihna dingin kum teng in 1350 Mega Unit (MU) vel poimawh a, himahleh tulel a Central Power Sector Unit (CPSU) apan mei muh zah 1000 MU lel hi’n gen hi. Consumer-te lungkimlouhna enkai ding in Lamphel telin Customer Care Centre (CCC) in town 13 huamkha a, online web-portal tungtawn a prepaid recharge, online bill generation, post paid bill payment leh govt. nasemte adia no-due certificate lak theih a, Aggregate Technical & Commercial (AT & C) loss kiamsakna ding in unauthorized consumer-te regularized banah first time recharge man Rs. 200 kia la in prepaid meter thuah sak hi uh hi'n gen hi.


Chairman-lui thahna ah mi 5 man
Imphal, June-29: 7th Manipur Rifles complex sung ah June 21, 2016 nitak a PREPAK (VC) a Chairman lui N. Nabachandra @ Nongdren khomba (57) s/o N. Iboyaima Singh of Thangmeiband Lourung Purel Leikai leh a driver L. Sanjit @ Chingkhei (41) s/o L. Lalsing Singh of Thangmeiband Heijam Dewan Leikai-te thahna tawh kisai in Police te’n KCP- (KK Nganba) group a Chairman telin mi 5 man uhi. Hiai tawh kisai in L.M. Khaute, DGP in media-te tawh kimuhna hun ah PREPAK (VC) a Chairman lui leh Driver thahna tawh kisai in June 25, 2016 in Khabesoi a 7th MR camp sung mah ah om KCP (KK Nganba) self styled Segt. Major Thokchom Gouri @ Iboungo man uh hi'n gen hi. Aman KK Nganba thupiak dungzui in amah tel a A. Kingson @ Yaiphaba (23) leh L. Naocha @ Malangba (23) te’n PREPAK(VC) a Chairman lui leh a driver va kaplum uh hi’n puang hi.


Olympic day run khahkhia
Imphal, June-29: Manipur Olympic Assn.(MOA) leh DYAS saina in Khuman Lampak main stadium ah tuni’n Olympic Day Run om a, huai ah Mary Kom khuallian a pangkawm in khahkhia hi. Huai hun ah Manipur Olympic Assn. a President I. Hemochandra Singh, Minister (Revenue, Law & Legislative Affairs and Forest & Env.) makaihna a High ranking officer- R.K. Dinesh, Commissioner, MAHUD; N. Ashok Kumar, Secy. to Chief Minister leh Dingku, boxer; Ibomcha, boxing coach; Hockey player Thoiba leh Tiken-te telin sportspersons 700 vel ding te’n Khuman Lampak apan Dingku Road – Khongnang Ani Karak – North AOC – MMTA tawn in Khuman Lampak ah tai lut nawn uhi.


Brigadier in Sainik School vehna nei
Imphal, June-29: PIB (Defence Wing) thusuak in Brigadier HS Cheema, Commander Zakhama Brigade in June 27, 2016 in Imphal a Sainik School vehna nei a, huai hun  Brigadier in ‘Life in Olive Green’ thu tawh kisai in lecture nei hi. Aman cadet-te kiangah NDA ah lut theih ding leh Armed forces a officer kilak dan banah mipi vaihawmna (democracy) a armed forces-te panmun tawh kisai sinsak hi.


Combine team in helpawl a tel 1 man
Imphal, June-29: PRO (Police Department) thusuak in a gendan in Imphal East police commando leh 17-A/R combine team te’n helpawl om chih thuguk a muh uh dungzui in zan in Nongren area ah search operation a bawlna uah Nongren Community hall ah KCP (Maoist) cadre 1 man uhi. Mat  a om Hijam Nawang Singh (25) s/o H. Nando Singh of Nongren Mayai Leikai hi a, amah apan 9mm tang 5 mukhia ua, Lamlai Police station ah pekhia  uhi.


Free Eye Camp om
Imphal, June-29: Shija Eye Care Foundation, AMAKHAK leh WFC-te saina in Sagolband ah zan in Free Eye Camp om a, Dr. K. Romen, Consultant Ophthalmologist in mi 200 vel in, huai lakah mi 15 te’n cataract leh mi 2 te’n pterygium lam tawh kisai in buaina nei uh hi'n kigen hi.


TUNI THUPI:
“Toupa na Pathian un huai namte awl-awlin a hon delhkhiaksak geihgeih ding a; amau na hihmangpah ding uh ahi kei, huchilou in zaw gamsate’n nou a honbawm kha ding uhi.” – Diuteronomi 7:22


EDITORIAL:
Theihna sangzawte poimawh
Manipur Deputy Chief Minister Gaikhangam in Bill 3  tungtang ah Manipur phaizangbial mipite leh singtangbial mipite thudotna neih masak hiding a chih thudik mahmah ahi hi. Ama in hibang a thu ana omkha hileh hiaiteng kituak lou ding hi a maw chih theihin om hi.Akhawnung thil chihtheih mahleh  Dy. CM banah state Home Minister Gaikhangam in a thugen  kipahhuai himhim chih ding suak a, tuading in tribal-te’ adingin kisakkholhna (preparation) poimawh mahmah ding chih chiangsa ahi hi. Theihna sangzaw i chih bel mipi vangtangte sanga dan(legal expert) leh constitutional expert i chihte tuhun adin  gam in nial vuallouh a i poimawhte hi uh a, dan siam leh lehkhasiam banah Manipur maban ding kum tamtak mubante a kisak khiak uh poimawh mahmah hi. JAC against Anti-Tribal Bills pawlin bangteng hon satkhe ding uhiam chih bel i theikei a, President in Bill huaisepen leh deih huailoupen 3te laka khat ‘The Protection of Manipur People Bill, 2015’ en lemsakpihna pe tadihlou ahihman in, ei sung ah discussion hoihtak a om teitei poimawh dingin kilang hi.
    Dan(law) tawh kisai theihna banah maban sautak mengmuhna (vision) tulai in i poimawh uh a, Nagate’n zan(June 28, 2016) in a makai uh poimawh  mahmah Isac Chishi Swu  a chan uh a, amau bel Naga movement tawh kisai a paitouh dingdan ngaihsutsa in koih uh hikha maithei hi. Eilawi politics leh Nagate’ politics bel tu dinmun tehkak in kikhai mahmah ahi diam chihtheih dinghin om  hi. Ahi a, leitung kikhendan leh paidan et in tulaitak a i poimawh pente uh lak a khat ahihleh dan leh dun banah lehkhasiamte leh theihna sangtakte’ khuak poimawh mahmah hihang. ILP issue hitaleh issue tuamtuam banah diktatna leh sianthouna tawh kisai a bangbang hiam ah pro-group tanpha hong piangkheta a, tuaziak in dan siam leh thil saupi mubante’ adingin kidangkoih hun hilou hi. Heutu tuamtuamte’n leng dottham ching heutute ava rawn(consult) zekzek uh leng alou theilou in deihhuai mahmah a, bangchibang a maban kalsuan ding ihiam chihte chiang kilkel leh kigingsa a i om uh poimawh petmah dinmun ah omta hihang.
     sangzawte i poimawh i chih kawmin, i awlmawh thu tuamtuam genkhawm lehang, ahoihlam leh ahoihlou lam ah khantouhna muhtheih in khanghat mahmah a, sualna leng uang hiaihiai hi. Hun paisa in bel i gam ah Dan khauhtak in kizang ngeilou a,hileleng huai hunte ah leng  Vaigam ah bel chiklaipeuh in dan  zahtak leh tungnunsak in om gige a, huai mah pansan in India Constitution ah leng dan tunga thuneizaw kuamah omlou ahi chih  kitaklang hi. Government in dan a zah mahmah a, dan tungtawn in mipite’n theihtuak tuamtuam omte zalen leh baihlamtak a a theihna ding uh ngimna ziak in kum 3 vel paisa apkian Rights to Information kichi zat in a om hi.
    Diktatna i genchiang in bangziak a Mizogam genkha sek i hihiam chih bangleng dotna poimawhtak hisek hi. Mizoram ah bel Centre  ahihkei leh international agency tuamtuam akipan panpihna paite himhim government in atangpi in mipi theihding in puangkhia uh a, thuguk omlou in chiangkuau in taklang sek uhi. Meithai khat  in leng Minister/MLA te maikawk ngam uh a, ‘bangziak in meithai-te’ adia sum hong pai nang ne mang maimah e,’ chihkhum zialzial ngam uhi. Huaiziak in eite’n leng  lam tuamtuam a khantouhna ngahna ding un leng dan theihna poimawh  hita e chih in om hi.
    I gam ah thil awlmawhhuai tam mahmah a, huai kawm in lehkhasiam makai muanhuai leng i kisam ua, ngaihtuahna sangtak nei a nam it leng i poimawh uhi. I gam neuchik himahleh tuni tanpha in leng vangtahhuai takin  khantouhna (development) mah i  taksap uleh i poimawh uh hi lailai hi. Tuni dong hibang development semkhetu ding piang nailou hiam chi lehang  lah ahehthei ding hunkhop om zel a, unau Mizo-te bangin Manipur state tangkha maizen le uh Singapore city tawh kibang khawpi thupitak suahta lou ding uhiam? Tang/kawl selak a khawpi khat a bawl thupi theih ualeh phaizang ah khawpi thupitak adinsuah thei mahmah ding uh chih ngaihtuahna ah piangthei mawk hi.Bill  3 tungtang leh development thil semkhetu dingin i gam in dan thei leh lehkhasiam banah i maban ding uh sautak mubante i poimawh pen uh suak hi.