Ka Pa’ Damlai Suangphuh…

Written by: K. Lianthansang

Zinglam dak 8:30 velin Dorcas Veng (Chiimtung area) a om – ‘TAAM NEEM FAST FOOD’ kichihna lam ka zuantou hi. Awl in ka pai  a, Hotel(Taam Neem Fast Food) a hawh dia paitou hilou ka hihman in ka na sepna ding mun ah ka lut pah hi. Zinglam dak 9: 00 hong gin takin, inn neitu in nasem dia kisateng hon samkhawm in, thu saulou hon gen a, thumna tawh nasep kipan dingin hon lankhia hi. Nisa nuai ah nasem in ka om vingveng uhi. Singpi dawn hun a khawl chihlouh ka khawl ngeikei ua, nasep tha-it takin ka om chiat uhi.
    Huai hun a ka nasep uh inntung a suangneu(chip), cement leh leingoi kitokpolhkhawm sun ahi. Ka sep tunglam un, atunglam ah mi bangzah hiam in baltin in khaitou a(khau zangin); a nuailam ah bangzahhiam in ka na supply zel uhi. Baltin 2-3 khawng lel a kikhaitou a, kisung ahihman in ka nasep uh deih

bangin a paihoih kholkei(nasep lamzang lawlou) hi. A tokpolhtu ding in  machine(khawl)  kizang a, a kingang mahmah. Mihing’ thahatna a tokpolh ding hileh hun tam alut mahmah ding a, gim leng agimhuai mahmah ding hi. Huai  hun in bel a machine ah apoimawh ding teng pawlkhat in ana guanglut zel ua, khat in a machine control in lamzang takin nasep a pai ziahziah hi. Na sepna a kuankha teng a poimawhlou a omkei-poimawhna tuamchiat  ahizaw hi.
    

Nitaklam hong hi a, nisa khauh mahmah lai khamdai dingin meipi hongzing hi. Kou leng, leilawn(, kahlei/ladder) khat, inntung tanpha a kikhamsuak  khat ah ka kivual diudeu ua; baltin, khat-khit-khat a kikhaktuah deudeu kawmin na ka sem uhi. A machine lam apang atuam, a tokpolhsate baltin a luak(koihlut) atuam, huai apan a inntung lam a tuntheihna dia line khat a kivual diudeu leng atuam omlai. Huai louin, inntung lam ah ana  sungkhe zel ding leng a omlai banah a baltin hawm pen a nuailam ana tunsuk zel ding leng mituam om nawn hi. Vuah thuak khopa hongzuk selhselh zawhnung in, atam zawdeuh hongzu a; thuak mualsuahna dan omlou ahihman in kibuktheih nana ah ka kibu uhi.
   

 Vuah hongtheu nunga nnasep kipan nawn leuleu in ka panna mun chiat uah ka hih ding chiat uh ka hih seuhseuh uhi. Baltin kikhaktuah deudeu ka hihman un leh ka panna mun  ua poimawhna nei chiat ka hihman un lamzangtakin ka semthei uhi. Huai a semte lak ah kuva hai bang, tuibuk muam bang, laizial tep bang leng ka om uhi. A khangdawng deuhte ngial ki-limsuah in lampi a nungak hong paite khawng thawhkhak hun leng  om veve hi. Achang a tui ana dawn leng a om(tui dawnna ding hun  a khawl demduam chih omlou ahihna ah).
   

 Nasep lamzang taka pai ziahziah hinapi a lailak hiam a khat in laizial a tep dek ngeingei leh a khut awnglou a hihman in a baltin paisuak theilou hi. Huai hun chiangin a nunglam a teng leng a banban a khawl diudeu a ngai zel. A tunglam ate’n leng ana sun(sung) ding uh omlou ahihman in a khawl uh angai veve sek hi. Huchibang deuh in kuva, tuibuk, talab nek chihte ziakin bangtanhiam(sawtlou chik) nasep lamzang taka pailai  khawl angaihsek bang deuhin; nungak ana thawh in, a nasep pen hamhaih kha chihbang leng a om khamawh kei ding. Nisa leh vuahzu chihlouh a, nasep nawngkai sakthei tuate ahi deuh uhi.
    

Huai mahbang in khawvel a i khawsak theihna ding un i piankhiat masakpen uh poimawh hi(na sepna ding a om masak a ngaih bangin). I piankhiat ua kipan i  sih tanpha ua i phuttouh ding uh ana kivualtou diudeusa vek ahi hi. A changin lungkhamna leh gentheihna(nasepna a vuahzu-vuahzu nisa bangin) i tuak ding ua, huai apan kihepkhiat a ngaih hun leng a om ding(vuah atam ziak a kibuk angaih bangin). A changin bel haksa sim leleng khapet zen a pang a phut mualsuah a ngaih hun leng a om a ngai ding(lukhu in nisa khauh mahmah leleng athuak nuamsak- a nisa apan bel taikhia hilou).
   

 Hun hongpai zel ding a, zi-le-ta nei a khawsak ahih chiangin mahni ai-tuam ding kia ngaihtuah a hithei nawnkei dia; innkuan khawsakna ding leh kibulphuhna ding ngaihtuah khawm vek ngaita ding hi. Tate kep a, innsung etkaina, salam khawsakna tawh kisai, khalam dinmun tawh kisai leh a tuamtuam ngaihtuah kimvel a ngai ding. Nupa hinkhua lamzang taka a pailai in, pasal pen in nungak dang ana buaipih taleh (nasepna mun a nungak thawh a ana buaikha zual bangin), a innkuan sung uh kise ding hi. Huai kia hilou in, a tate tanpha un leng a thuakpha ding ua, innkuan kisong-sawlawi hongsuak kha ding hi.
    Salam genlouh in khalam leng en ni. Van-gam tunsawm a kisa ngen ihi uh chilehang  ikhial kei ding. Missionary leh Pastor te’n leng mi tampi van-gam a lut ding chih a tuppen uh ahi. Pathian hing bia kichi tengin leng i tup uh ‘Van-gam’ ahi. Huai a i luttheihna ding un i hih masak ding uh ana kivual deudou hi. Khamtheih  in van-gam lampi i zotna uh  nawngkaisak hiam(nasepna a laizial leh a dangdangte ziaka nasep neuchik sung a nawngkai bangin) ahihkeileh tuibuk muamziak lel in i damtheihna a kisiat lawh hia? Pathian kiang ah damtheihna ngen ngen a, en damtheihlouhna ding thilte i hih teitei lebel ‘chiamnuihna a damtheihna ngen’ kisuak khathei ahi.
  

  Pi-le-pute hunlai ah kik phing lehang; nidanglai in tapa neiloute a sih chiang un a khanggui uh mangmai ding ahihman in khawsung mipi’n  khawmual ah suang ana phuhsak sek uh (tapa neilou a sipa’ adi’n) chi’n putek khenkhat in a gen uhi. Tapa neilou a ana site’ khanggui bel huai sungphuh tan a tawplel a hita mai. Huchi ahihleh tapa neite asih chiang un khawmual ah suang ava phuhsak  sese kei ding uh chihna ahi mai hi. I sih chiang un i kivuina tung ah suang kiphut mahleh  han chiamtehna lel ahi hi. Han tungah gold a kibawl ‘cross’ vaphut lehang leng a phattuamna ding a om vak kei- i vangtahviau leh mi’n hon guksak ding hilai. Suanghoih penpen te kiphuhsak lehang leng a phuh ni hiam, mi a vapaikhak ni chiang hiam in a hansuang hoihdan a gen lel ding ua, anuai a kivuitu’ min kuamah in a loukha kholkei ding. Hansuang hoihtak in kibawl zetzat mahleleng a sipe’n aguh-atang teng muatgawp in a om veve ding hi.
   

 Huaiziakin, tapa nei khat a si leleng khanggui suitheihna dia suangphuh omsun bel a tapate ahi hi. A tate’n a kivuina tungah han chiamtehna thupitak abawl thei uh. Himahleh  a tate a omdan uh ahoih tuankei leh misisa apa’ min a kigen chiangin thuhoihlou tawh a kigenkhawm mun mahmah ding hi. Kei ngei leng ka pa a damlai. Ka pa damlai mahleh suangphuh a nei hi. ‘Ka Pa’ Damlai Suangphuh’ ahihleh kou a tapate ka himai uh. Nu-le-pate’ mualliamsansa mi tampitak a omta. A kivuina ua suang hoihtak vaphuh sangin(a phutzoute’n bel phuh luat ding mah uh hithei), a suangphuh uh(tate) zunhoih sawm zaw ni. Ka pa’ suangphuh hoih hen i chihleh a han tunga suang pen vazol sak kilkel ding a hituan sese kei a, atate(adiak a tapate) hoihtak a om zawk ding ahi.
   

 Khawvel a damsung in haksatna tuaklou a om kei ding. Pathian’ tapa nangawn in leng a tuah ahi. Innsung kepna ah leng, ‘ka tate hoih uhen’ i chihleh nu-le-pa’n hoihtaka panlak ding ahi. Mosi a neulai in anu’n donlou a Pharo’ sikhate’n don hi zenzen le uh Aigupta a saltang Israel-te pikhetu in apang kholkei ding! Huaiban ah ka suangphuh hoih hen i chihleh i tate’ omdan-gamtatdan i etkai mahmah uh ngai hi. Suangphuh hoihlai leng a sethei a, a sesa leng a hoihthak thei hi. Nu-le-pa’ suangphuh hoihna ding zaw tate’ tunga a mawhpuakna uh  ahi.
 

Laigelhtu’ Lungsung Pan:
Hiai thugelh in a taklatnop pen ahihleh, khawvel a siat theihna tampite lak ah nu-le-pate’ minhoihna ding tate’ mawhpuak  ahih banah nu-le-pa’n leng tate lamdik a piding chih a hipen hi. Nasepna mun a kuva hai, tuibuk muam leh laizial  tepte ahihleh etsakna dinga gelhkhak lel ahi zaw. Ka Kipak
(Thaikawi Tongluan)