Manipur Express | August 25, 2016

HEADLINES:
Nau deihloute Rs.10 lakh liausak nung in kum 10 jail tang ding
Union Cabinet in Surrogacy (Regulation) Bill 2016 pom
New Delhi, Aug-24: India gamsung a nupi naupai theiloute’n midang chi(sperm/egg) zanga naupai a lunggulh tungtang uh enkai di’n Union Cabinet in tuni’n Surrogacy (Regulation) Bill, 2016 pomna bawl a, huai tungtawn in sumdawnna dia chi kipiaktuahna(surrogacy) kham hiding hi. Midang chi zanga naupaina(Altruistic surrogacy) zangthei dingte ahihleh nupa kiteng khinsa, ta 1 tan neite hiding uh a, single parent, homosexual couple, live-in relationship couple te’n naupaina ding in midang chi zangtheilou ding uhi. Surrogacy (Regulation) Bill in aphalsakte bel kum 5 tan nupa hinkhua zang khinsate hi uh a, numei pen kum 23-50 kikal ahihding banah apasal pen kum 26-55 kikal ahih ngai ding hi. Huailou in nupi khat in midang chi zang in khatvei sang a tamzaw naupai theilou ding in gakna bawl hi.

    New Delhi a Cabinet meeting zawh in External Affairs Minister Sushma Swaraj in thuthaksaite kimuhpih in, National leh State Level ah Surrogacy Board dinkhiak hiding chi hi. Kuahiam in ta a deih beh hun in, a tanau naipente chi zang thei lel ding a, huai chi azat nung ua tapa/tanu aneih pen un, amau ta taktak hiam, midang ta a laksawn pen utawh gou(property) leh innkuan sunga thuneihna kikim nei ding uh chi hi. Kuahiam in tanu/tapa aneih khit ua adeihkei uleh kum 10 sung jail tang ding uh a, Rs. 10 liausak hiding hi. Gamdangmi banah Persons of Indian Origin (PIO) leh Non-Resident Indian (NRI) te’n Surrogacy bawl theilou ding uh hi’n leng Minister in gen hi. India gamsung muntuam tuam ah Surrogacy Clinic 2000 val om hi’n kigen a, hun tamzaw ah nupa khat in huai tungtawn a nau aneihte uh deihlou in thubuai tamtak piang hi’n thusuakin taklang hi.


LOCAL NEWS:
CEO leh Police Nodal Officer
Lamka, Aug-24: Chief Electoral Officer (CEO), Manipur leh State Police Nodal Officer in Aug 26, 2016 zinglam dak 11:00 in DC/CCpur office hongpha ding uh a, SDO/AERO-te, Nodal Officer-te, SP/CCpur, SVEEP Core Committee ban ah Election Deptt  kimuhpih ding  uhi. CEO in National Electoral Roll Purification, Dist. Election Management Plan, Systematic Voters’ Education and Electoral Participation leh Security Plan tawh kisai CCpur dist. a activities poimawhte hong enkhia in suizui ding hi. Huai hun ah SDO/AERO te’n election tawh kisai kisakkholhdan report peding in DC in theisak hi.


2016-17 sunga makai ding laklutna
Lamka, Aug-24: Tuibong/Tuibuong a Dist. Council office ah Aug 25, 2016 sunnung in Lions Club of CCpur Greater (Dist. 322-D) ah kum 2016-17 sung pawding Board member-te laklutna  program omding hi. Huai ah Chief Guest in Lion M. Gogendro, VDG-II pang ding a, aman Lions Club of CCpur Greater a Board member-te lalut ding hi. Huai ah  member-te telchiat dingin Lion James, Doungel, Gen. Secy. Lions Club of CCpur Greater (Dist. 322-D) in ngen hi.


CITOS parking kisuan ding
Lamka, Aug-24: CCpur- Imphal Taxi Owners Society (CITOS) pawlin ADC/CCpur kiang ah parking ngaihtuahsak dinga ngetna a bawl ziakun, EM (Town)/ADC in CITOS makaite parking ding enkhe di’n sawl a, ADC nuaia Town office leh IB Road - Tipaimukh Junction kikal lemchang dinga report a piak uh ADC/CCpur in pompih a, Henlianthang Thanglet, CEO Incharge in temporary parking dingin pia hi. Hiangtam Lamka Hausa G. Thangkhosuanmung, EM/ADCC inleng lemsa a, EM (Town) in kipahthu gen hi. CITOS in Nehru Marg junction a IB Road kipatna bul parking dingin zanglel uhi.


Salphate’ pumbuk ah tamtak tu
Lamka, Aug-24: JAC against Anti-Tribal Bills in V/A tawh kithuah in Hiangtam Lamka a Salphate’ pumbuk ah Bill 3-te deihlouhna in sit-in-protest  paizom zel a tuni’n Pearsonmun, Khominthang leh Gangpimual apan tamtak paikhawm uhi. JAC-AATB apan Thangzamang, Henkholun Gangte leh H. Mangchinkhup, Chief Convenor telin mi tuamtuam in thugen uh a, pthumkhawmna hun leng zang uhi.


Helicopter service ding buaipih
Lamka, Aug-24: Lamka-Aizawl kikal helicopter service om theihna di’n M. Gouzamang Guite, EM/ADCC  in a buaipih sunzom in zan in Pawan Hans Corporate office, Noida ah official-te mu in atak a semkhe di’n genpih chihthu om hi. Gyan Prakash, Sr. Manager (Marketing) leh Manish Rokade, Jt. Gen Manager (Marketing) in passenger lam-et zah, hun lut dingdan leh bangchibang helicopter  zat ding hiam chih leh kalkhat a service ding zah banah  a tuanman genkhawm uh a, thupukna kichian bel om nailou hi’n EM in gen hi. North East ah Assam leh Manipur chihlouh state dang teng in Pawan Hans Helicopter Service nei uh hi’n leng gen hi.


Aadhar card form submit ngai
Lamka, Aug-24: CCpur dist. ah NFSA tungtawn a Ration card beneficiary te’n Nov 2016 sung tan in Aadhar card telin thil poimawh tuamtuam submit ding la, hun bikhiah sunga submit loute NFSA beneficiary list apan cancel hiding uh a, Rationing Agent te’n amau FPS centre chiat ngai poimawh ding in DC in theisak hi. Aadhar Card submission form ah NFSA Ration card a kigelh innkuan a lupen khua/village min, FPS centre min, A/C, Aadhar card xerox copy, NFSA ration card No. leh mobile phone No. gelh in DC office a Civil Supply  ah submit ngai hi.


Course ching ane te’n laktheih
Lamka, Aug-24: Dist TB Centre in kum 2015 sungin TB natna vei 100 mukhia in, damdawi course chinga ne a dampihte leh damdawi hawmtu (DoTs Provider) te kiang ah honorarium  pia uh a, akisaipihte’n ngaihven theih hi. Kum 2015 sungin TB ki-test 200 val omlak ah positive 100 vel  mukhia uhi.  Course chinga ne a damte Rs. 250 leh damdawi hawmtu kiang ah Rs. 1,000 govt. in kipahman pia a, bangzah hiam in huai lata uhi. Huai dingin mahni i-card tawi ngai a , DOTs Provider te’n  duplicate card leh revenue stamp 1 tawi ngai hi’n kigen hi.


SSC saina in Online Exam omding
Lamka, Aug-24: Staff Selection Commission saina in Hill Town a NEILIT CCpur Extension Centre ah Computer Based Examination (Online) tungtawn in Combined Graduate Level (Tier-I) Examination, 2016 om ding hi. CCpur dist  apan candidate 901 om a, amau Aug 27 & 28, 2016 leh Sept. 3, 4 & 10, 2016 in exam ding uhi.


YPA Vangai Block hong ding
Lamka, Aug-24: YPA Gen HQ in YPA Vangai Block hon sawm a, Central Executive Committee leh Cabinet member te’n Aug 25, 2016 zingsang in Vangai area ah zin ding uhi. Hiangtam Lamka a YPA GHQ office ah zing dak 6:00 in S. Chin Ngaih Pau, Chairman, CEC, YPA GHQ in sawlkhia(flag off) ding a, gari 5 zang ding uhi. YPA Vangai Block hon zawh in Block makaite’n Vangai area a khaw tuamtuam ah YPA Unit hong ding uh hi’n kigen hi.


Swachh Bharat rally om ding
Lamka, Aug-24: Dist. Admn leh EE, PHED/CCpur Divn. saina in Aug 29, 2016 zinglam dak 11:00 in Lamka Public Ground-Tuibuong Peace Ground kikal ah ‘Freedom from Open Defecation’ chih thupi zangin Special campaign of Swachh Bharat rally om ding hi. Huai ah school tuamtuam akipan student 200 vel tel theihna ding in EE, PHED leh ZEO/CCpur in panla ding in DC in theisak hi.


Indefinite bandh call off
Economic blockade paizom ding
Imphal, Aug-24: All Manipur DPC completed Candidate of Police Constable (Male 2013) te’n zan nitak zankim apan Indefinite bandh a puang uh tunitaklam a thusuah a bawlna uah  call off  ua, ahihziakin  National Highway-te a Economic Blockade paizom ding a, Aug 25, 2016 apan govt. institution teng khaksak hiding in taklang uhi.
    Huailou in Cabinet in kum 2013 a Police Constable lakna ding tawh kisai a thak a sai ding thupukna a bawl uh zukkik ding phutna a bandh tawh kisai tuni a Imphal Hotel ah CM O. Ibobi leh Dy CM Gaikhangam te’n dawnna kichian tak bawl nuamlou uh a, CM in bandh om gige a, thil thak hilou chi a, Dy. CM in Aug 25, 2016 ni a dawnna pe ding in gen hi. Bandh ziak in mun khenkhat ah hindan nawngkai a, bandh supporter te’n tuni zingsang apan mun tuamtuam ah sing leh suangtum zang in lampi khak uhi. Kakching ah bandh supporter te’n Kakching Keithel telin dukan leh sumsinna inn teng khak uh a, Sadar hills ah TSA gupna in bandh khauh a, Imphal area ah zingsang in bandh a khauh louh ziak in diesel auto leh private gari tai muh ding hunkhop banah dawr leh dukan-te kihong a, himahleh nitaklam in bandh bawl te’n dawr leh dukan-te khaksak uh a, Govt. office-te ah nidang tawh teh in mi tamlou a, Police te’n Irilbung, Singjamei leh mun tuamtuam apan bandh bawl-te lakah mi 18 mankhia uh hi’n kigen hi.
    CCpur Dist branch inleng bandh gum in tuzing apan Koite hanmual kiang ah volunteer duty uh a, Diesel Auto (MN02A 5544) khat hihsia uh a, Police te’n la in station ah kem uhi. Nitak nungin Bijang ah Auto khat khense nawn uh hidan in kigen hi.


IMPHAL NEWS:
Manipur e-Dist Project hong
Imphal, Aug-24: Chief Minister O. Ibobi in Imphal Hotel ah tuni’n Manipur e-District Project hongkhia a, huai ah a govt. in Northeast bial a Information Technology (IT) hub dia Manipur ahih theihna ding a  ngaih poimawh a om hi’n gen hi. Aman a genzelna ah tuni a project hongkhiat  govt. in IT puah hoih tupna hi a, e-district tungtawn in singtang leh phaizang bial a omte’n govt. offices apan document banah thil tuamtuam muhna dia District HQ leh DC office-te a naih uh ngai nawnlou ding hi. Project hongkhiat in IT tungtawn a online service 35 te’n Manipur govt. nuai a deptt. 9 huam ding a, department dang-te leng awl a huamsak hiding in gen hi.
State govt. in IT Park, NIT Campus, MIT (Manipur Institute of Technology), ITSEZ leh IIIT koih khin ta a, mipi’n project a hamphatpih theihna ding un district teng ah DC te’n a nuai ua staff-te enkai ding leh chitak a nasem ding in ngetna bawl hi. India in kum 2020 tan a 24 hour power supply sawm mahle uh Manipur ah kum 2017 tan a 24 hour power supply om theihna dia panlak hi’n gen hi. Official te’n project hongkhiat tungtang a mipite’n Income Certificate, Birth Certificate, Schedule Caste & Schedule Tribe Certificate a muhtheih ding  banuah online tungtang in Electoral Roll ah a min uh register bawl thei ding uh hi’n gen uhi. Hiai hun Dy. CM banah official tuamtuam te’n leng uap uhi.


MPP’s bank A/C-te gakna bawl
Imphal, Aug-24: Imphal West a Court of Civil Judge Senior Division in Manipur Peoples Party (MPP)-te bank account 2 gakna bawl uh hi’n kigen hi. Akigendan in MPP President a kigen Akoijam Sanaton Singh in Nongmaithem Sovakiran tungah lawsuit file khum a, huai tawh kisai a Akoijam in a genna ah Jan 30, 2016 in kum 3 sung President len ding in telching in om a, March 12, 2016 in N. Sovakiran term bei mahleh President nasep ding-te semlai a, MPP-te Bank Account apan mimal hamphatna ding a sum lakhia in by-law zuilou in sum-te kizat a, Election Commission of India (ECI) ah annual account statement leng pelou chi’n gen hi. Court in lawsuit tawh kisai a hearing nung in MPP-te bank account Imphal Urban Co-Operative Bank a Current Account No. 3632 leh 4235-te freeze sak uh a, Sept 2, 2016 ni a hearing om nawn ding hi’n taklang uhi.


Tripura a thiltung mawhpaih
Imphal, Aug-24: North East Dialogue Forum (NEDF) a  Secretariat, Centre for Research and Advocacy Manipur (CRAM) leh North East Indigenous People Co-Ordination (NEIPC) te’n Tripura a Agartala mun ah zan a Tripura tualsuak mi lakah Borok namte’n soisakna a tuah uh tawh kisai in mawhpaihthu puang uhi. Hiai tawh kisai in Manipur Press Club ah tuni’n press conference om a, huai ah U. Nobokishore, NEDF, Convenor in zan a stable ground ah Indigenous People Front of Tripura (IPFT)-te saina a ‘Tipraland Demand Rally’ hun ah thiltung hi’n gen a, huai ah nam lianzaw te’n rally pai-te bottle leh suang dengkhum in naupang kha 6  leh nupi gailai khat telin mi 6  liam uh a, thiltung ziak in Agartala khawpi a mi tamtak koltang uhi. Tripura govt. in thiltung suahkhiak louhna ding in media tungah ban puankhum a, hiai tungtang ah NEDF leh CRAM te’n Tripura govt. mawhpaih uh chi’n gen hi. Huailou in NEIPC-te saina in press conference dang ah Co-ordinator N. Lancha in zan a thiltung tawh kisai Tripura CM Manik Sarkar in mawh a puak ding chi a, rally hun ah sualluihna tuak leh si hunkhop om hi’n gen hi.


ADC by-election om ding
Imphal, Aug-24: State Election Commission thusuak dungzui in ADC Sadar Hills biala 8-Wakotphai ADC Constituency ah Sept 17, 2016 in ADC member 1 telna dingin by-election om ding hi. Aug 22, 2016 tan in candidate te’n nomination file uh a, zan in huaite scrutiny om hi. Candidate kizukkik utte Aug 26 in kizukkik thei ding uhi. Sept 17, 2016 zingdak 8.00 akipan nitaklam dak 4.00 tan vote khiak hiding a, Sept 28 tan in election process zawhsiang hiding hi.


Written Exam hun ding kisuan
Imphal, Aug-24: Manipur Secretariat ah GAD in Office Assistants lakna dingin Aug 25, 2015 in written examination om ding in bikhiah mahle uh bandh ziakin mun gamla leh singtang bial apan candidate-te adia lemtanglou ding hi a theih ziakin thuthak om ma adin ahun suan uhi.


Hawker 1 in soisakna tuak
Imphal, Aug-24: Manipuri dailies a hawker Khumanthem Achouba in tuni zingsang dak 4:30 velin Langthabal Phuramakhong ah bandh supporter mi 20-te soisakna a tuah tawh kisai in ‘Editor’ Guild Manipur (EGM) te’n mawhpaih thupuang uhi. EGM te’n thiltung ngaikhawk in bandh bawl lam a office bearer te’n thubuai suk vengna dia EGM a editor-te kimuhpih ding in theisak uh a, office bearer te’n hawker-te subuai lou ding a bandh supporter te’n theisak ding in ngetna bawl uh a, media-te tungah complaint bawl ut te’n kitheih siam louhna a om louhna ding in EGM member-te thuzak ding in theihsakna bawl uh hi’n leng kigen hi.


Lamlaba village ah medical camp
Imphal, Aug-24: PIB (Defence) thusuak in a gendan in Red Shield Division nuai a Tamei Battalion-te saina in Lamlaba village ah Aug 22, 2016 in medical camp om hi. Huai ah Tamei Battalion a RMO leh PHC Tamei a Medical Officer te’n damlou mi 66 vel en uh a, camp sung in medical consultation leh treatment piak banah manbei a damdawi hawmkhia uh hi’n kigen hi.


NH-39 keklet hiding
Imphal, Aug-24:  State govt. in NH-39 a Lilong leh Moreh banah Wangjing leh Khudengthabi kikal ah lampi keklet nang a gam leikhiakna dia poimawh teng zousiang uh hi’n kigen hi. Thusuak in a gendan in DC/Thoubal leh DC/Chandel te’n gam a sukkhak ding-te direct purchase tungtang a leikhiak ding leh aman ding tungtang enkai ding uh a, Ministry apan fund tungtawn in National Highway Infrastructure Developent Corporation Ltd. (NHIDCL) te’n compensation pe ding uhi. Govt. thusuak in Lilong leh Wangjing kikal 4 lane banah a dung lam meter 30 a sau leh paved shoulder hiding a, Heirok tawn a Wangjing leh Moreh kikal bel 2 lane hiding in taklang uhi.


Transfer and posting
(P.W.D. OFFICERS)
1. Nengkhanpau Guite, i/c EE/CCpur Divn as i/c Surveyor of Works to Supdt Engineer-1, PWD/Manipur.
2. T. Jangkhongam Haokip, i/c AE, Sub-divn No. 1, CCpur Divn as i/c EE/CCpur Division.
3. V. Jamkhanmang, Section Officer, Sub-Divn No. 1, CCpur Divn as i/c AE, Sub-Divn No. 1, CCpur Divn.


TUNI THUPI:
“Dahna a na om louhna dingin, na hauhsaknate a hun diam, ahihkeileh na hatna thilhihtheihna tengteng?”
– Job 36:19


EDITORIAL:
Gam hausa: India!
New World Wealth (NWW) pawlin leitung pumpi a gam hausa penpente atelkhiakna uah top 10 lakah India leng telkha chih hi a, kiguih zezen in om hi. Population basis apan telkhiak ahi ngeiding chih bel haihvual ahikei a, top 10 lakah a 7-na a apan velvual pen thil lamdang (miracle) ahidiam chih theihin om a, ikipah kawmkawmin nalh lah deuh abatna chiang om h’n i thei a, ‘technical’ taka etzui dingleng om di’n i gingta hi.
    Topper United States ahihleh a economy dinmun uh theihsa hi a, kuamah phakvual ding leng hilou khop in khangtou uhi. Tualou in, gam hausa penpen telkhiaka omte’ lakah, US zom in Japan, China, United Kingdom, Germany, France, Canada, Australia banah Italy chihte leng ahi hi. Milip sahdan etin China zom ah India ahi a, India ah population a khan hat mahmah ziakin kum 2050 tanin India in leitung pumpi ah milip haupen ding chihna ahi. Hiai survey/study tawh kisai en vengveng lehang 2050 chiangin India pen leitung a gam hausapen hong hihmawk leh dik theiding hiam chih theihin om hi. Mimal hauhsakna abel dik kha maithei, himahleh, NWW in bang ‘angle’ pansan a nei adiam chihtheihin om hi.
    India gam hausa penpente lak a 7-na a pang ban chih khawng mang aleng matphak hilou hi. Government hausa lou a, mimal hausa chih a chianna mahmah ahi hi. Leitung pumpi theihphak banah India gam adia mi hausapen a chiamteh Mukesh Ambani in state tamtakte’ kumkhat budget nei zou a, a sanggampa Anil Amabani leng huchi bangmah in hausa hi. Tualouin India mi mihausa genthamching aza asim om hi.
    I tenna Lamka khawpi sung maimai en lehang mi hausa suanhuai mahmah khutzung in a daihlouh ding om hi. Sumtang/sumhul a koih kiihkeih mi bangzah a om a, gou (assets) sim senglouh phial a tam neileng i om ding. Manipur state ah tuabanga mi hausa bangzah a om dia? India malsuahbial ah leng tam mahmah dinga, India gamsung pumpi abel population tamziak leng ahi ngeidinga, mi hausa a kiphoulak leh phoulak lou tam mahmah dingin gintakhuai hi.
    NWW in study hoihtak bawl a hon puankhiak utawh kiton a bangchi leh i economy dinmun dopkang a om theiding ahia chih leng ngaihtuah poimawh mahmah hi. Mipi/ minautang zawng deuhdeuh, government pang sawkkha theite hausa deuhdeuh chih bangleng omthei lua hi. Air Condition gari a kitholh ziahziah, AC inn a teng, AC omna office akai mi tampitak i om lai in ‘khua lumna lawmlawm e, ki vom hulhul mai’ chithei mi tamtak i om a, khawlum thuak anop theihna dingin lui tui ah va kidiah hiam ahihkeileh singlim bel tanpha mi simsenglouh ki-om hi.
    Vaigam ah slum area kilchih ah om a, huai a omte bang chidan a khawlum ziaka tampipi si uh ahidia ahihkeileh khawvot thuaklah a kumteng a si om gige ahi dia le? Gam hausa kihi taktak mah adiam? Mi hausate’n nek senglouh buh-leh-bal nei mahle uh, nekding zong tawm a khutdawh adim in omlai hi. Leitung gam koipeuh abel khutdawh a om vek dinga himahleh India tuk a khutdawh tamna omlou hi. Swiss Bank a sum (black money) kikoih tampi a om ziak a, India leng gam hausa top 10-te lakah telkha ahihleh bel mipi vangtahna hikha maithei a, leitung theihin i record uhoih leleng economy vai ah mipi kivangtah toutou ding bang hi.
    Leitung ah bangchituk in hausa in niang-le-tai in om in, ut dandan in hinkhua zang mah lehang leng ei Christian-te ginna dungzui banah thudik mahmah ‘Simlei luahden ding om khang’ ineih le lam banah goute (property) vangam ah pawlut theiding leng om khang, tua ziakin mizawng leh gentheite’ adia i damsung mah ah panpihna ipiak pen vangam ah i lawmman leng hikha thei hi. NWW in mi hausa gamte apuan lai in India in ‘Poverty Elevation’ – zawnna hihbei sipsip ding chih kum tamtak paisa akipan in ‘slogan’ a neih hita hi. Hindu-te a sih chiangun a kihal uh a, Muslim-te leh Christian-te a sihchiang in kivui/phum uh a, huai pen i leitung hinkhua beina himai hi. I sihkhit chiangin koimun peuh ah i gou-le-gam i neihte pawlut thei ding ki-omlou hi. Tua ziakin i sanga zawngkhal zaw leh panpih ngaite panpih di’n kisa leng bang a chi dia? Thudik mahmah khat ‘Mihingte’ adingin pianni ni khat, sihni Ni 1’ himai hi.