MANIPUR EXPRESS | AUGUST 1, 2016

HEADLINES:
Dist. hospital ah micro-biologist koih hiding-Commissioner (Health)
JE leh hitang-khawsik tawh kisai official team in enkhia
Lamka, July-31: CCpur Dist. ah Japanese Encephalitis (JE) leh hitang-khawsik natna tawh kisai enkhe dingin tuni’n Praveen Kumar Singh @ P. K. Singh, IAS Commissioner (Health & FW) Govt. of Manipur in Lamka hongpha a, Dr. O Ibomcha Singh, Director of Health; Dr. Dr. K.  Rajo Singh, Director of Family Welfare Service leh official tamkuamtak in hongzui uhi. Commissioner in Dist. hospital a MS Conference hall ah dist. medical deptt a semte’ kimuhpih a, huai ah DC/Cpur leng tel hi. Commissioner in Dist. hospital ah ‘Micro-Biologist’ koih hiding in gen a, huai koih hun chiang in laboratory diagnosis machine ‘ELISA’ leng koih hiding in gen hi.

    Health Commissioner in a gendan in JE hiileng omlai in a dalna damdawi kap phatuamlou ding a, a veisa kikap kha om  hileh damtheihna dia haksatna tunzaw ding hi’n gen hi. India govt norms dan in naupang leh piching kaptheihna dingin kikhen a, tulel a damdawi kizangte routine immunization ahihban ah light vaccine hi a, kum 15 nuailamte kapna ding hi a, piching adi’n bel gentheih hilou a, damdawi kikap sangin fogging lam bawl poimawhzaw chi hi. Huai tawh kiton in machine 3 piakbeh ding hi’n gen hi. JE dalna kikapna in kha 1 phakma 27% protect thei a, kha 1 tunglam bel 85% protect thei hi’n gen hi. Fogging leng mihing adi’n a poina om a, munteng pawngkap louh a, JE confirm case-na munte kia a kap hoih a, huaileng 45 degree sanga tunglam ah kaptouh ding, akhu kitheh sukte thoukang kha (wings) a tu-in si uh hi’n gen a, nuailam kap in thoukang hawldalhzaw hi’n gen hi.
    Dist. mipi’n hibang natna hiileng tuamtuam tuakphut sek ahihman in Dist. hospital in natna chetna tutan neilou a, Imphal naih ngaih gige tawh kisai a Press-te dotna a dawnna ah a Dist. hospital ah ‘Micro-Biologist’ koih hidin gen a, huai koih chiangin laboratory diagnosis machine ‘ELISA’ leng koih hiding in gen hi. Hiitang-khawsik tawh kisai damdawi leng dist. hospital ah akiching koih ahihman in damloute’ pataulou ding leh athawn a laktheih ding hi’n gen hi.
    Fogging adi’n CMO/CCpur in Commissioner kiang ah damdawi (pyrethrum) diesel leh petrol kiching ngen hi. JE pan kivenna dingin naungek kha 9 nuailam nei khempeuh in DIO office ah niteng in kaptheih ding in DFWO in ngen hi. Tutan in Dist. ah JE suspect 17 lak ah positive 3 theihchet hi a, huailak ah mi 2 dam hi’n kigen a, mi 2 case chet manlouh in si uh a, adangte case confirm hi nailou in kigen hi.


Independence Day a PM thugen ding ngaihdan piak theih
PM in AIR ‘Mann Ki Baat’ tungtawn in tuailaite hanthawn
New Delhi, July-31: Prime Minister Narendra Modi in tuni’n All India Radio tungtawn in ‘Mann Ki Baat’ kichi program neinawn a, PM ahihnung a AIR tungtawna mipi tawh kithuahkhawmna 22vei a neihna hita hi. Maban a Independence Day zatna ding ah Prime Minister speech abawlna ding tawh kisai leng mipi’n ngaihdan tuamtuam sung lut dingin ngen a, tuni a athugenna ah tuailai leh khangthakte hanthawn kawmin thuhilhna nei hi.
    Prime Minister Modi in khangthakte’ khawsuahna dingin government in lampi tuamtuam sial ahihdan gen a, tuaziakin technology lam pibawl dingin hasuan hi. Ngaihdan hoih leh athakthak piangkhesak ‘innovation, experiment leh entrepreneurship’ lamte ngai poimawh dingin khangthakte chial a, NITI Ayog (nidang a planning commission kichi) in Atal Innovation Mission tungtawnin khangthakte dopkangna dingin panla chi hi. Khangthakte ading ‘Atal Tinkering Labs’ kichi school khat peuh in a bawlkhiak leh kipahpihna in Rs 10 lakhs leh maintenance ading Rs 10 lakhs piak hiding chi hi.
    Modi in tulai khawvel tawh kituakin India dopsang hiding chi a, President-lui A P J Abdul Kalam zahtakna in Atal Incubation Centres adi’n Rs. 10 crore piak hiding chi hi. Damtheihna tawh kisai Modi in agenna ah, tulai in dengue kipan nawn hi’n gen a, doctor thuzak masalou a antibiotics pawngnek lou dingin gamsung mipi ngen hi. Naupai lai numei si tam mahmah a, tuabang sukkiam ahihtheihna dingin Pradhanmantri Surakshit Matritva Abhiyan kichi leng dinkhiak in om chi hi.
    Tuilian thuakte centre government in taisan mailou in, huhna omthei teng ah kithuahpih ahi chi a, tualou in singkung kepbitna ding in parliament in CAMPA law kichi passed a, huai dingin Rs 40,000 crore sehkhiak in om chi hi. Rajasthan, Andhra Pradesh leh Gujarat state-te’ nasepdan kuapeuh in etton dingin hoih mahmah a, state chihin singnou suan pibawl mahmah ni, chi in Prime Minister in AIR tungtawn in India mipi chial hi.


LOCAL NEWS:
V. Dongzathang’ bawl laibu hon hiding
Lamka, July-31: Capt V. Dongzathang, IRS (retd) in laibu (autobiography) a bawl ‘An Amazing Journey of  My Life’ kichi Aug 6, 2016 (Kiginni) sunnung dak 2.00 in New Lamka a Dorcas Hall’ Mini-Auditorium ah hon hiding hi. Capt V. Dongzathang in Army apan a khawl (retired) nungin Indian Revenue Service (IRS) a lut in President, Income Tax Appellate Tribal dinmun tanpha len hi a, kum tamlou paita in a sepna apan khawl (retired)  ahi hi.


ZNC pawl meeting (5veina) om ding
Lamka, July-31: Zomi National Congress (ZNC) pawlin Sim Veng a Simte Inn ah Aug 4, 2016 zinglam dak 10.30 akipan meeting 5veina nei ding uhi. Huai ah ZNC puahthak hoih hia, ZNC atel a sisate suangphuh leh pahtawina hih hoih ding hiam chih tungtang genkhawm hiding chi’n Information & Pub/ZNC akipan thusuak in taklang hi.


Joseph N. Sanate in M.Phil degree ngah
Lamka, July-31: Joseph N Sanate s/o (late) Pu Ngurdinglien Sanate (Ex Minister) leh Kim Sanate of  Dwarka, Delhi in ‘Centre for Canadian, US & Latin American Studies’, School of International Studies (SIS), Jawahar Lal Nehru University (JNU), New Delhi ah Master of Philosophy (M Phil) Degree ngah thak hi. Aman thesis in ‘Domestic Dynamics of  Civil Rights Legislation in the US (Role of Lyndon B Johnson)’ chi hi a, maban ah Ph D (Doctorate degree) sunzom ding hi’n kigen hi.


Hiitang-khawsik ki-ensak 100 val
Lamka, July-31: CCpur Dist. ah hiitang-khawsik hun bangtanhiam paisa in leng a, naupang tamtak in huai natna avei ban uah piching tanpha leng mankha hi. Huai tawh kiton in Dist hospital inn OPD lun mahmah in, niteng in ki-ensak mi 400-500 vel omzou gige hi’n hospital authority te’n gen uhi. Hiitang-khawsik veite etna ding atuam in COPD leh MOOD hon in om a, niteng in OPD hunsung in damloute’ en zel uh a, OPD hunsung lou in casualty ah leng en uhi. Children ward ah naupang damlou tam mahmah in, ward leng kidaihlou a, tamtak ward pua (veranda) ah om uhi. Tuni’n leng OPD kihong kei mahleh casualty ah hiitang-khawsik ki-ensak 100 val om in huailak ah tamtak admit in om uhi.


DPC alawhching mi 3 paikhia
Lamka, July-31: Ksh. Radharani Devi, CDPO, ICDS Project Saikot in Mini Anganwadi Workers sem ding in Sept. 2, 2014 in DPC sai a, Social Welfare deptt. Govt of Manipur letter No. 22/4/2013-S (SW) dated 16th Dec 2015 in mi 11 select in om uh a, Dec 21, 2015 in order suak hi. Himahleh CDPO, ICDS Project Saikot in order vide No. 2/EST/SKT/ICDS dated 23-12-2015 dungzui in Lalramsan Famhoite of  Sichung Veng (Saikot) paikhia in F. Rody Lalthakungi guang a, order vide No. 2/EST/SKT/ICDS dated 25-01-2015  suah nawn in Esther Laldinthar , ITI Veng (Saikot) paikhia in Jessy Lalremruati guang a, order vide No. No. 2/EST/SKT/ICDS dated 25-01-2015 dated 27-01- 2016 in order suah nawn in Lalcheimawi, Field Veng (Saikot) paikhia in Mercy Lalhmangaihi guang hi. Dec 21, 2015 a order suak bangin mi 3 te’n joining report piak kia hilou in nasem in survey report leng CDPO, ICDS Project, Saikot kiang 2vei pia uh hi’n mi 3 akipan kiza hi.
Ksh. Radharani Devi, CDPO. ICDS Project Saikot in DPC neihni Sept. 2, 2014 a Govt of Manipur letter No. 22/4/2013-S (SW) dated 16th Dec 2015 order pansan a Mini Anganwadi Worker mi 3 paikhia a, midang 3 aguan thu ah Saikot Village Authority in CDPO kiang ah complain bawl in copy leng Social Welfare Minister, MLA Saikot A/C leh Director Social Welfare, kiang ah pia uhi. Saikot V/A complain ziakin TN Haokip, MLA Saikot A/C in Ksh. Radharani Devi kiang ah U.O No.5/7/12-KJLA Saikot tungtawn in July 22, 2016 in lai pia a, Mini Anganwadi Wokers 3 te’n joining  report pezou uh a, amaute tang a CDPO, ICDS Saikot Project in midang 3 a guan thu enkai a hihfel ding in Director Social Welfare ah theihsakna pe mahleh tunitan bangmah sepsuah omlou hi’n kigen hi.


Panlak dingdan genkhawmna
Lamka, July-31: All Tribal Movement of Lamka (ATML) pawlin Aug 2, 2016 zinglam dak 10.00 in Hiangtam Lamka a YPA Hq Hall ah Consultative meeting om ding in thupuan bawl uh a, huai ah maban panlakdan ding tuamtuam genkhawm ding uh a, kuapeuh huai hun a tel ding leh ngaihdan gen dingin chial uhi.


SUUNNA:
Ginkhawting (95) m/o Upa Thianneilal of  Pengjang, tuzing dak 4:30 velin teknat in si a, nitaklam in Pengjang hanmual ah kivui hi.
Thangminlian Zou @ Bobon (29) s/o (late) Kapkhanpau of  Nehru Marg, zan zing baihtaka Sajiwa Central Jail ah buaina ziaka si, tuni’n aluang hongtung a, Aug 1, 2016 in Lamka hanmual ah kivui ding hi.
Donkhochiin (55) w/o Ngulzasiam of Lamlian veng, Bungmual tunitak dak 8:30 velin kalna in si a, Aug 1, 2016 in Bungmual hanmual ah kivui hi.


IMPHAL NEWS:
BJP in Executive Meeting nei
Imphal, July-31: BJP Manipur Pradesh saina in Hotel Imphal a Sangai hall ah tuni’n executive meeting om a, kum 2017 a general election hun ah BJP ministerial candidate puangkhiak ding a poimawh pen hilou hi’n gen uhi. Meeting zawh a media-te tawh kimuhna hun ah BJP Manipur Pradesh, Gen. Secy. (Northeast-in-charge) Ram Madhav in Manipur ah BJP govt. dinkhiak theihna ding leh constituency teng ah BJP hatna dia panla uh hi’n gen hi. Political programme tungtawn a Mandal apan Polling station level tan ah party member hih theihna dia maban kha 6 sung daih dingin programme bawl hi a, BJP in CM O. Ibobi makaihna a Congress govt. nekgukna-te puangkhiak ding leh Congress govt. khekkhiakna dia panla ding uh chi hi.
Aman a genzelna ah Centre a BJP makaihna nuai a NDA govt. in ILPS tawh kisai a kiphinna ngaikhawk a, hiai tungtang ah CSOs leh Political party makai-te Centre ah Union Home Minister telin mi tuamtuam mu uh a, Union Cabinet in a huntak a thupukna a bawl uh poimawh a, singtang leh phaijang bial a tualsuak mite humbitna ding a dan bawlkhiakna ah BJP in dinmun poimawhtak len ding hi. Mipi hamphatna dia Central funded scheme-te zat thelthang tawh kisai etkai hiding a, numei-te dinmun dawpsang ding, Digital India leh Act East Policy lawhching theipen a zat ding chih-te enkai ding uh hi’n gen uhi. Ram Madhav bel tunitaklam in Imphal nusia hi.


High Level enquiry pat ding phut
Imphal, July-31: Sajiwa jail sung ah zan zingsang baihtak dak 1:00 vel a buaina hun ah Saudi Arabia mi 2 – Yusuf (32) leh Abdul Salam(22) banah Thangminlian Zou @ Bobon (29) of CCpur-te sihna tawh report kimtak bawlkhiak ding Home Minister Gaikhangam in chiam hi. JNIMS hospital ah tuni a postmortem bawl zawh nung a Thangminlian luang lak hun ah a zi Zohreitui in apasal sihna tawh kisai a high level enquiry patding phutna bawl in apasal tawh gamdang mi 2-te bangchi dan a om khawm thei leh cell sung ah galvan nei thei uh hiam chih dotna bawl a, hiai tungtang ah jail thuneite’n hilhchetna a bawl ding uh chi a, banghiam zang in apasal lu (head) hihsiat leh a awm (chest) leh gil (stomach) ah liamna ma muhtheih hi’n leng gen  hi. Hiai tungtang tawh kisai in Dy. CM banah Home Minister-in-charge Gaikhangam in thiltung tawh kisai a suizuina pat ding, report bawlkhiak ding hi’n taklang hi.


KTC in Medical Dept kimuhpih 
Imphal, July-31: Kangpokpi Town Committee (KTC) te’n Japanese Encephalitis (JE) natna apan kiveng ding dan tawh kisai in tuni’n Kangpokpi Community Health Centre a Medical Officer kimuhpih uh hi’n kigen hi. Akigendan in Chonkam Kipgen, Chairman, KTC in Kangpokpi CHC a MO-in-charge tawh JE natna apan kiveng ding dan tawh kisai a panlak ding dan genkhawm uh a, Aug 1, 2016 ni in manbei a JE vaccination pat ding leh kum 15 nuai lam-te deihsakna piak ding chih-te tel a, fogging ahihleh a poimawh dungzui a pat ding hi’n gen uhi. Huailou in Kanggui We Care (KWCare) te’n Kangpokpi leh akim a khua-te ah cleanliness drive pat ding in thupukna bawl uh a, hiai hun a mipi a tamtheilam tel ding a ngetna bawl uh hi’n leng kigen hi.


HM leh Congress tungah boycott
Imphal, July-31: Tarao Students’ Union (TSU) te’n tunai zek a Chandel district adia ADC nominee telkhiakna tawh kisai in Congress govt. leh DK. Korungthang, Minister (Health) in amah bial sung mah ah minority tribe a theih khenlouh mawhsa uh a, Chandel district a constituency 2  ah Tarao tribe 1000 sang a tawmzaw te’n ADC election ah vualzawhna a ngah theih louh uh a theih ding hi’n leng gen uhi. TSU te’n namdang tungah khentuam neilou uh a, Chandel ADC member lakah Kuki tribe hunkhop om mahle uh nominated member dia T. Cilcilia Haokip leh amah (Dk. Korungthang) term sung mah in a 2vei Kom Tribe apan Mangte Alen Kom telkhiak hi’n gen uh a, hiai tungtang ah mipi palai Congress Party apan Dk. Korungthang in Minister (Health) leh Congress Worker-te tungah boycott puang uh hi’n leng taklang uhi.


Petrol leh Diesel man kiam
New Delhi, July-31: Indian Oil Cooperation te’n tuni’n thautui man enthak uh a, tukha sunga 3vei akiamna dingin July 31 leh Aug 1 zankim akipan Petrol man litre ah Rs.1.42 leh diesel man litre ah Rs.2.01 in kiamsak uhi. Huai dungzui in Delhi ah Petrol man litre ah Rs.61.09 hiding a, Diesel in litre ah Rs.52.27  man ding hi’n Indian Oil Corp apan thusuakin gen hi. Thautui man ahihleh May khabul apan thautui man 4vei khangtou a, July khasung in 3vei kiamsak in om hi. IOC thusuakin in thautui man tungtang international oil market leh Rupee-USD exchange rate dungzui a khansak leh hihkiam hiding a, IOC in market paidan enzui in thautui rate bikhiah zel ding hi’n gen hi.


Miss Manipur Transgender 2016
Imphal, July-2016: Hotel Yaiphaba ah Transgender-te adia Miss Manipur Queen 2016 kitelna ding tawh kisai in audition om a, huai hun ah kum 18-23 kikal mi hunkhop tel uh hi’n kigen hi. Audition zawh in sahkhua, political leh khawtang tawh kisai a film ‘UNFREEDOM’ kichi screening om a, Manipur ah transgender-te dikna tawh kisai campaign leh khangsak ding tupna hi’n gen uhi.


World Hepatitis Day rally om
Imphal, July-31: Shija Hospita and Research Institute-te saina in Kangla ah tuni’n World Hepatitis Day rally om a, huai ah Dk. Korungthang, Minister (Health) khuallian a pang in rally khahkhiakna nei hi’n gen uhi. Rally ahihleh Kangla ah kipan khia in Imphal area ah mun tuamtuam tawn in THAU ground tan pai uhi. Rally hun ah Apunba Fitness Centre, Manipur Shumang Leela Council, Manipur Mountaineering and Trekking Assn., Film Forum Manpur, Thangmeiband Athletic Union leh  Shija Hospital and Research Institute staff-te tel uh a, huai nung a THAU ground ah ‘Free Hepatitis Screening Camp’ om hi’n leng gen uhi.


‘Know Your Army’ display om
Imphal, July-31: Loktak Brigade nuai a Noney Battalion-te saina in Haochong mun ah tuni’n ‘Know Your Army’ display om a, huai hun ah Noney Battalion te’n sepaih-te galvan tuamtuam lahkhiakna nei uh hi’n kigen hi. Haochong Hr. Sec. School apan student 65 leh teacher-te kiangah Armed Forces tawh kisai sinsakna nei uh hi’n leng kigen hi.


Orphanage ah panpihna pia
Imphal, July-31: Red Shield Division nuai a Jwalamukhi battalion te’n July 29, 2016 in Leimakhong a Mission veng a ‘Royal Child Home’ ah panpihna in van tuamtuam pia uh hi’n kigen hi. Amau stationery item, tutorial chart, nek-leh-tak banah niteng van zat poimawh tuamtuam pia uh hi’n kigen a, hiai tungtan gah orphanage a naupang om-te leh staff te’n kipahthu puang uh hi’n kigen hi.


TUNI THUPI:
 “Pianken thak, diktatna leh sianthouna a Pathian batpih a siampen silh un.” – Ephesate 4:24


EDITORIAL:
Saptuam leh Election
Manipur  assembly election ding tungtang hong kigen nawn panpanta a, tulel a Assembly hun(term) March 16, 2017 a bei ding ahihman in maban a assembly election ding leng a zekaipen in February 2016 kha om ding in ginhuai hi. Hiai tawh kisai in political party tuamtuamte kisingsa panpanta uh a, election a ki-candidate ut mi tuamtuam in panla in kisakhol uhi. Political party leh kitelna a candidate ut mi tuamtuamte’n policy leh campaign a zat ding (election manifesto) tanpha bang zat hoih ding hiam chih a buaipih lai un election ah saptuam a kigolh uh hoih hia ahihkeileh bangchibangin eipawl in election i paipih zel uhiam chih genkholh  haksa mahmah hi.
    Adiakin Ccpur district a voter omteng lakah Christian 90% sanga tamzaw ahih gintak-huai hi. Himahleh, MLA election a om tengin innkim-innkiang kisiatna, tanau- laina kikawmlouhna tanpha hon tunkha sek bang a, poithei mahmah hi. Mipi’ vaihawmna leh zalenna(democracy) gam a teng ihi uh a, i democratic rights uh palsatna leh kipalsat sakna leng om khasek hi. Mimal deihtelna kizahtaksak chiatin, secret ballot/ voting compartment ah mahni deihtelna liauliau in vote khesek lehang chih deihhuai hi.
    United States of America(USA) in tuma deuh a kipan in November 2016 vela om ding US  Presidential election a neidek uh a, mipi ma ah public debate nei tuahtuah mai uh a, Republican versus Democratic ahi tangpi uhi. Amaute’n mimal zalenna leh deihtelna zahtak mahmah uh a, tuaziak mahin amau election a neihdan uh siangthou mahmah a, kinak, kisel leh kibal chihte omlou tawh kibang  hi. Atamzaw Christian-te tenna CCpur ah leng kum thak bul a Assembly election om dingah siangthoutak a mipi deihpen mah telching a a om theihna dingin plan, policy leh program guan hun mahmah hita hi.
    Mi tamtakte’n election ah saptuam a kigolh uh poimawhlou chih ngaihdan nei maithei uh a, himahleh, saptuam in candidate kuahiam gum leh sponsored hen chi i hikei a, bangchileh mipi’ lak a buaina omlou in siangthoutak a election omthei ding hiam chih policy leh program  guangthei le uh bang achi dia? Tuban kum 2 chihbel kum 2018 chiangin Nagaland ah assembly election om ding a tuading in Nagaland Baptist Church Council (NBCC) tu akipanin panla uh a, mipi lakah buaina omlou leh election siangthoutak a a om theihna dingin kalbi dawh panta uhi.
    Nagaland ah election hun chiangin helpawl faction bangzahhiamte’ ziakin buaina om mun mahmah a, amau buaina leh eilawi buaina bel kibang khollou maithei ding hi. NBCC in election siangthoutak a a omna dingin panlalou hileh buaina nasatak leh mulkimhuai tanpha piang thei din kigen hi. Tutunga bangziaka saptuamte poimawh hiam i chih leh i bill minthang 3-te ziakin maban a election hong om ding ngaklah huai hetlou bang hi.
    Democracy gam ah MLA hilelte’n election a tuh theikei ding uh chi a thuneih khum leng dik dingin gintak huailou a, amau’ rights palsatsak theih mawk ahi diam chihtheih hi. Sitting MLA-te boycott puankhum lehang leng amau election a tuhthei keiding uh chih dan om tuanlou a, huai kia hilou in sitting MLA ahihman un sih ngam a gumding (supporter & worker) mihing tampi om veve thei ding hi. Election pen siangthoutak a neih ahih a, vote mu tampen mah a chin i Christian hihna tawh kituak ding a, i tangkoupih uh ‘Diktatna’ sukha pen leng hidingin ngaihsut theih hi. Tu dinmun etin sitting MLA-te boycott puankhum mahlehang Manipur singtangmite laka community/tribe tengin boycott taktak ding uhiam chih tanpha gintak huailou a bat hun om sek a, huai in i kituaklouhdan a taklang zaw phing diam chih ngaihdan omthei mai zawmah hi.
    Huchi kalah i gam a election paidan leng  a sianthou zawksem theihna dingin saptuam lam leng  kigolh deuh mai uhenla, Mizoram, Meghalaya leh Nagaland a saptuamte’n guidelines a bawl piandeuh uh eilak a candidate, voter leh party-te a zuih ding uh bawl hileh chihhuai hi. Election campaign dan siangthou kichi om henla, saptuam makaite bial (constituency) tuamtuam ah kithehdalh le uh bang impact a om diam chih theih ut-huai hi. Tualou in vote khiakni (polling day) ni in Pastor hiam ahihkeileh ordained Upa khat in thumna in vote khiak ding hun hong henla, thumna mah tawh khak theih hihen la, saptuam makaite mah leng polling station tuamtuam ah  duty sak hile uh phatuam mahmah maithei hi. Candidate, party leh voter-te’ ading Election Commission of India(ECI) in dan tuamtuam abawlte uh ban ah  saptuamte’n leng election siangthou omna ding tawh kisai zuih ding in dan bawl le uh kizahtak dingin gintak-huai hi.