MANIPUR EXPRESS | AUGUST 2, 2016

HEADLINES:
Gujarat govt. nasemte khalawh 14.60 % apan 25 % in pung
Gujarat ah nasemtu lakh 8.77 in 7th Pay hamphatpih
Ahmedabad, Aug-1: India a state 29 leh Union territory 7 laka masapen hiding in Gujarat state government nuaia nasemtu lakh 8.77 te’n tuni (Aug 1) apan 7th  Pay Commission  hamphatpih ding uhi. Gujarat chief minister's Office (CMO) thusuakin agendan in Chief Minister in 7th Pay Commission pomna abawl dungzui in state government employee lakh 4.65  leh pensioner lakh 4.12  valin tukha akipan in 7th Pay ngah ding uhi. Central government in July 25 a thusuah abawlna ah central government nuaia nasemtute’n January 1, 2016 apan 7th Pay Commission ngah ding uhi. State government nasemte’n August 1, 2016 apan 7th Pay Commission hamphatpih ding himahle uh, January 1 apan arrear ngahlou in August 1 apan in ngah ding uhi.

    Gujarat state government in khalawh apunsak ah nasemtute Class-4 apan class-1  kikalte khalawh 14.60 % apan 25 % kikal in pung a, central government in allowance abawl dungzui in Gujarat inleng state government nasemte kiangah allowance pe ding chihthu om hi. Thusuakin agendan in state teng in expenditure kiamsakna ding in e-governance apaipih uh ngai a, expenditure omte khantouhna (development) asuah theihna ding in e-governance zang ngeingei ding a theihsak hi uhi. Huai tawh kisai in Gujarat govt inleng employee-te job evaluation tungtang hoihtak in enkai ding a, performance record kichiantak in bawl ding chi uhi.
    Gujarat a 7th Pay Commission zat ding ziakin, state government in kumteng in Rs 6,000 crore  seng beh ding hi. Kum nawn a Assembly Election om ding ziakin ruling government in 7th Pay Commission puang uh hi’n leng thusuakin gen a, election hunah ruling government in mipite gupna adeih ziak uh hi’n opposition pawlin taklang uhi.


Morgue ah numeite tawh salphate’ zahna hunzang uh
ADC/CCpur te’n Council Day zatna in singnou suan
Lamka, Aug-1: Autonomous Dist. Council Day zatna kawm in tuni’n MDC-te’n kumdang banga zanglou in Dist. hospital a morgue ah salpha innkuante’ leh numei pawlte tawh hun zang uh a, huaizawh in Bungmual a Council complex ah singnou suan uhi. Zinglam in Lal Hossan, Vice Chairman makaih in morgue kongah hun zang uh a, Langkhanpau Guite, Chairman, ADC/CCpur in Aug 1 pen ADC Day in kum 1973 akipan zat himahleh tukum in gam leh nam adia hinna pia salphate’ suunna hun a zat hi’n gen hi. Manipur singtanggam a MDC te’n term 3 vaihawmna alet nung un 6th schedule phutna in kum 1984 apan election boycott in om chi hi.
    Kum 25 nungin state govt. in amendment bawl in kum 2010 apan election neih hi a, term 2na paitou lel ah leng heutu masate’ sulnung zuih hi’n gen a, 6th schedule ngahna din theihtawp a panlak ahi  chi hi. I gam bitna dingin 6th  schedule poimawh ahihman in UPF leh KNO theihpihna tawh kum 2014 in Central  ah memorandum piak hi a, huai  New Delhi a delhzui in dharna leng nei uh hi’n gen hi.
    Anti-tribal Bill 3-te’n Dist. Council thuneihna khoihse kha ahihman in theihtawp  a panlakna uh sutzop hidin Chairman in gen a, tribal martyr-te MDC te’n zahna sangpen pia in suunthu puang hi. Huai hun ah MDC nominate 2 telin 26 laka 19 paikhawm uh a, MDC khenkhat in leng thugen uhi. MDC te’n salphate’ zahna in hankuang kibawl tung ah pak pia uh a, misite’ innkuante’ puan 1 chiat a  silhsak ban uah Rs. 10,000/- chiat in kithuahpihna pia uhi. Sunnung in Bungmual a ADC Complex ah Council Day theihgigena in MDC-te leh staff te’n singnou 100 val suan uhi.


LOCAL NEWS:
Ganhing adin JE dalna kibawllou
Lamka, Aug-1: Dr. N. Rajendro Singh, Dir. (Vety & AH) makaih team 1 in tuni’n Lamka  hongpha uh a, JE natna veite omna Go Cin Khup Veng, Bungmual leh Mualkoi pha uh a, meeting poimawh kin neih ziak in sawtlou nungin Imphal ah kik uhi. Dr. Ng. Ibotombi in CMO office ah Press-te kimuhpih a, JE natna tawh kisai in ganvulhte natna lawhsawn a pang uh ahihman in kep siangthou poimawh chi hi. JE natna mihing adi’n sihna khop tun himahleh  ganhingte lakah huchilou in, a veikhate leng a taksa ua kilanglou in poisa thamlou uh hi’n gen hi. JE natna tawh kisai ganhing adi’n damdawi (vaccine) bawlkhiak hi nailou chi hi. Kivenna dingin vok vulte’n abuk kep siangthou a, thoukang omtheihna dingte hahsiang ding leh thoukang kikeih sak louh damdawi hoihpen hi’n gen hi.


VENUS te’n suanghum sung
Lamka, Aug-1: Vengnuam United Soccer (VENUS) te’n tuni’n College Road a EBCC Vengnuam leh PT Sports complex kikal lampi kuakna munte suanghum sungin social work nei uhi. Bialtu MDC M. Gouzamang Guite in sunnung in enkhia, a panlakna uh phat-huai hi’n gen hi. Maban ah a thilhih peuhmah uh thuap ding hi’n gen a, kuapeuh in sianthouna ngai poimawh dingin ngen hi. Tractor 2 zangin suanghum trip 13 sung uh a, sen-le-pan teng bialtu MDC in seng a, zingchiang in Sahei Road ah sunzom ding uhi.


Bobon sihna thu ah ni 30 sung hunpia
Lamka, Aug-1: Manipur Central Jail, Sajiwa jail a mi 3-Thangminlian Zou @ Bobon (29) s/o Kapkhanpao of Muallum village, CCpur Dist. telin gamdang mi 2  sihna tawh kisai Special Secy (Home), Govt. of Manipur in  Dist. Magistrate, Imphal East kiang ah magisterial enquiry report ni 30 sunga pelut din theisak hi. Tuabang kal ah, Thangminlian zi Zohrietpui in CM kiang ah memorandum pia a, a pasal sihna tawh kisai a poimawh bang enquiry bawl a, a nutsiat innkuante’ panpihna kilawm huntawk ngaihtuahsak ding in ngen hi.


Block 12 ah nasepna ding sanction
Lamka, Aug-1: Executive Director, DRDA/CCpur in MGNREGS 2016-17 1st phase ah Job Card holder te’n ni 18 nasepna ding in July 28, 2016 apan tunitan in block 12 ah sum sanction hi’n kigen hi. Job Card holder  ni 18 sung nasepna ding sum sanctionte- Lamka block ah khua 60; Thanlon block ah 46; Singngat block ah 96 , Tipaimukh block ah 18, Tuibuong block ah 164, Samulamlan block ah 66, Henglep block ah 115, Kangvai block ah 123, Saikot block ah 43, Sangaikot block ah 105, Vangai block ah 35 leh Mualnuam block ah khua 18 hi’n kigen hi. Kum 2016-17 apan MGNREGS nasepna thaman ni 1 in Rs. 197 hiding a, kumlui 2015-16 sang in Rs. 7 in tamzaw hi.


GHQ leh Block makaih in social work
Lamka, Aug-1: YPA GHQ leh YPA New Lamka block kigawm in tuni’n  New Lamka a Damkam Bazar ah social work nei uh a, Mahajon Dongpi Langel in JCB  thawh a, huai zangin niin hahsiang uh a, Dist. Council Sanitary truck in niin pawkhia hi. Khailianthang Tongsing @ Thangte, President, YPA GHQ in agenna ah bazar pen  namselua a, JE natna tawh kisai natna a hoihlou om ding venna a social work kinei hi'n gen hi. Maban ah bazar neite leh vengsung mipi'n niin pai nawnlou a, sanitary truck ah pai zel dingin ngen a, Damkam bazar neite'n siangthou sem a kembit  dingin ngen hi. Bazar neite’n leng  kuaman bazar ah niin pai nawnlou ding in ngen uh a, a pai teitei a om leh liausak  hiding in gen uhi.


Lei (bridge) bawlin social work
Lamka, Aug-1: Chiengkon-lui tung a L. Phainuom leh HQ veng kikawmna lei (bridge) tunaizek a tuilian in ahihsiat ziakin kikawmna buai a, tuni’n L. Phainuom mipi leh YMA Chiengkawn Branch, Joint Section makaih in mipi’n social work in bawl uhi.
Huai lei (bridge) bawlna dingin Thangkhosuanmung Guite, EM/ADC in Rs 10,000/-, Ngamhao Touthang, EM/ADC in Rs 5,000/- leh YMA Chiengkawn Branch in Rs 20,000/- in huh uhi. Lei (suspension bridge) bawlna in Rs. 2 lakh vel bei hi’n kigen hi.


Kuki Nampi Taona zat hiding
Lamka, Aug-1: Kuki Napi Taona (KNT) Committee te’n ‘Leng Thulhun’ chih thupi a zang in Christ tungtawn a muanna leh bitna banah kituaktak a hinkhawm ding deihna in Kuki inhabited area teng ah spiritual retreat programme zat ding thupukna a bawl uh dungzui in Tuibuong a B. Vengnom Community Hall ah Aug 8, 2016 zingsang dak 8:00 apan nitaklam dak 3:00 tan spiritual retreat programme zat hiding in gen uhi. Committee in Chairman ding in Evan. DK Samuel leh Resource Person din Rev. Chomlhun seh uh hi’n leng kigen hi.


HPB in anngawl thumna nei ding
Lamka, Aug-1: Halleluiyah Prayer Band, Town Area, CCpur in Aug. 4, 2016 zinglam dak 7:30 in Zoveng, Zenhang Lamka a ZCBC Church ah anngawl thumna nei ding uh a, huai hun Nl. Nengzachin, Careth in hong ding a, Rev. L. Tongminthang Haokip, Dir. Care & Concern Trust in thumna makaih ding hi.


DSO in Rationing Agent-te theisak
Lamka, Aug-1: CCpur Dist. ah National Food Security Act (NFSA) nuai a Rationing Agent te'n present quota antang hawmkhit zawh in khanawn (next month) a antang manding deposit ngai a, release order ahuntak a hawmkhiat theih leh buailouhna ding in Rationing Agent te'n advance a kha 1 antang man ding deposit ding in DSO/CCpur in theisak hi.


Jt. Director in vok kapding in theisak
Lamka, Aug-1: Dist. Hospital a Conference hall ah zan a PK Singh, Commisioner (Health) tawh CCpur Dist. ah Japanese Encephalitis thu ah emergency meeting a thupukna bang in Joint Director (Vety & AH), CCpur in khawpi sung leh asehvel ah vok (pig) te kap (vaccination) ding in DC/CCpur in theisak hi. Meeting hun ah Directorate of Veterinary & AH, Govt of Manipur in vok (pig) kapna ding damdawi (vaccine) a poimawh bangbang pe ding uhi.


Mualveng area ah fogging kap uh
Lamka, Aug-1: Dist. Malaria Office staff te'n tuni'n Mualveng area ah JE natna pua thoukang ‘Culex mosquito’ thahna ding in machine zang in meikhu (fogging) kap uh a, Lamka khawpi sung ah JE out-break om apan Dist. Malaria Office staff te’n khua/veng tuamtuam ah fogging kap uhi. Dist. Malaria office staff te’n August 2, 2016 in Imphal ah fogging material la ding in kuan ding uh hi’n kigen hi.


Nupa Camp ading in fund-raising
Lamka, Aug-1: EBC Pethuel a Dorka pawl te’n Nupa camp saisawm uh a, huai ding in tuzing in Dorka pawl makaih in EBC Pethuel huapsung ah thoukang kap in fund raise nei uhi. Thoukang kapding-te  kuankhiatma in Pastor K. Pumsuanthang, Local Pastor in thumna in khakhia hi.


Seniority list ading doc submit ngai
Lamka, Aug-1: Director of Education (S) thusuak dungzui in Education Deptt  ah kum 2006 ma a, appointment mu leh sem Grade IV/Matron/Mother/chowkidar/Lab Attendance/Peon-te ‘seniority list bawlna ding in Directorate of Education (S) ah August 10, 2016 tan in documents CPIS profile, regular appointment order, education certificate submit ngai hi.


Mi 331 in NFSA ration card pekik
Lamka, Aug-1: DC office a Food & Civil Supply Deptt. ah tunitan in National Food Security Act. (NFSA) ration card nei, himahleh govt in NFSA ration card nei ding a criteria abawl tawh kituah louh ziak in mi 331 te'n ration card pekik (surrender) uhi. NFSA ration card neihna ding in govt criteria ah kum 1 income Rs 1 lakh phaklouh ding, innkuan 1 ah govt. sepna nei omlouh ding, 4-wheeler gari neihlouh ding chihte telkha hi.


SUUNNA:
Tv. Khaiminthang (55) s/o (late) Khuptinsong of S. Kawtlian Village tuni sunnung dak 12:30 in cancer in si a, Aug. 2, 2016 in kivui ding hi.
Thangkhangen Suantak (82) f/o Upa Thangkhokam of Go Cin Khup Veng zan nitak dak11:00 vel in cancer in si a, tuni’n Pangzawl a VCC hanmual ah kivui hi.


IMPHAL NEWS:
Tuni’n Cabinet Meeting om
Imphal, Aug-1: CM O. Ibobi makaihna nuai ah tunitaklam a cabinet meeting om hi’n kigen a, huai hun ah August kha tawp lam a assembly session om hun ah ILPS tawh kisai a bill thak bawlkhiak ding tungtang genkhawm uhi. Hiai thu tawh kisai a Dy CM Gaikhangam in Ministers te’n bill thak  phattuamna ding leh a phattuam louh nang genkhawm uh a, bill thak tawh kisai a draft leng zawhsiang hipah ding chi hi. Bill thu tawh kisai a New Delhi a expert-te ngaihdan la Law dept. a official-te hongtung in report leng pelut uh a, bill thak ding tawh kisai in JCILPS leh JACAATB-te ngaihdan lakkhawm hiding a, assembly session hun ah bill thak puaklut hiding chi hi. JCILPS a convenor lui Kh. Ratan tungah ‘Wanted tag’ tawh kisai a thubuai Court ah om lel a, govt. in Court thutanna zahtak ding hi’n leng taklang hi.


Official-te tungah complain bawl
Imphal, Aug-1: All Manipur Students Union (AMSU) te’n District Administration official te’n income, domicile or caste banah certificate tuamtuam lak khiak hun ah sum la uh chi’n Chief Secretary kiangah gelh thawh a complain pelut uh hi’n kigen hi. Hiai thu tawh kisai in DM College compound a AMSU office ah tuni’n press conference om a, huai hun ah M. Sarangthem, Gen. Secy, AMSU in SDP, SDC, SDM telin District Administration officer te’n tax, fees dan in certificate tuamtuam lak hun ah student leh kam zong-te (jobseeker) apan sum khon uh a, hiai tungtang Chief Secretary theihsak hi a, ni 10 sung a official leh staff-te tungah action lak ahih keileh kiphinna pan ding in gen uhi. Aman agenzelna ah OBC/ST/SC certificate piakna ding in Rs. 300-700 kikal leh Domicile banah income certificate adin Rs. 50-100 la uhi.


Thangal bazar ah combing operation
Imphal, Aug-1: Th. Vikramjit Singh, Addl. SP (Ops)/ Imphal West makaihna a City Police te’n 70th Independence Day hun ah buaina omkhak ding kivenna in Thangal Bazar a Dharamasal area ah tuni’n oepration nei uh a, huai hun ah mi 10 vel ding-te a hihna uh theihtumna dia City Police Station tut hi uhi.


PPF te’n Saudi 2-te luang laksawm
Imphal, Aug-1: Manipur Secretariat (South Block) a Dy. CM office chamber ah tuni’n press conference om a, huai hun ah Dy. CM banah Home Minister portfolio len Gaikhangam in Sajiwa jail a buaina hun ah Manipur apan mi 1 leh Saudi Arabia mi 2  si tawh kisai suizuina pan ding in DC/Imphal East makaihna nuai a magisterial inquiry team bawlkhiak hi a, kha 1 sung a report bawlkhe ding uh a, Home Ministry leh External Affairs Ministry ah initial report piaklut di’n gen hi. Saudi Arabia 2-te a jail tang hun uh June 23, 2014 in bei a, Joint Secretary State Home Dept. in April 2, 2014 in mi 2-te puakkhiak (deport) theihna dia Joint Secretary External Affairs ah letter pelut mahle uh tunitan a dawnna omlou chi’n gen hi.
    Huailou in Al-Sati, Saudi Ambassador to India in mi 2-te Saudi Arabia gammi hilou dan a thusuah a bawl tawh kiton in Pangal Political Forum (PPF) te’n Islamic tawn dan a mi 2-te adia ‘Zanaja Namaj’ bawlsak ding deihna a siluang laktheihna ding in CM, Dy. CM leh Addl. DGP (Prison) kiangah tunitaklam in ngetna bawl uh chi’n Mufti Abdul Karim, Cultural Secy., PPF in gen a, misi-te tulel in JNIMS morgue ah om a, ni 5 sung a misi la a om keileh govt. in koih khe ding chi’n gen hi.


Term 5na-te anniversary zang
Imphal, Aug-1: Kangpokpi a ADCC ah tuni’n ADC Sadar Hills a term 5na-te kum 1 chinna leh nominated member-te vaidawnna hun zatna om hi’n kigen hi. Huai hun ah Pastor J. Lunkim, Chairman, Kangpokpi Town Churches Fellowship in ADC member-te adi’n thumsakna nei a, Addl. DC/Sadar hills leh District Council Sadar Hills Administration te’n ADC Sadar Hill-te anniversary tawh kisai in Haokholal Hangshing, Chairman, ADC Sadar Hills leh nominate member 2- Thangkam Lupheng leh Milan Pradhan-te kipahpihna in thilpiak nei uhi.


Helpawl a tel 1 mankhia
Imphal, Aug-1: IGAR(S) thusuak in a gendan in 8-A/R te’n Sanjembam area ah July 30, 2016 nitak in KCP cadre 1 mankhia uh hi’n kigen hi. Mat a om S. Ibomcha (48) s/o (late) Shamu of Sanjenbam Maning Leikai hi a, veng mipi te’n loukhou mi hidan a gen in khahkhiak ding a nget hun uah amah apan sum demand na akizang KCP letter head muhkhiak hi a, Police khut ah piak khiak hi’n leng taklang uhi.


Bomb dia gingtak in mipi patausak
Imphal, Aug-1: Kawakeithel Thounaojam a Dr. Mangi residence kong ah tuni’n polythene bag sung ah  bomb hiding a gingtak muhkhiak ziak in veng mipi patausak hi’n gen uhi. Police-te theihsak dungzui in polythene va enkhia uh a, huai sung ah kikhem nang a kizang (hoax) bomb lem mukhia uh hi’n kigen hi.


TUNI THUPI:
“Na bil hon dawh unla, ka kiangah hong pai un; za unla, huchi’n na kha uh ahing ding.” -Isai 55:3


EDITORIAL:
Huih niin(Air pollution)
Delhi khawpi ah Gari a tamluat ziakin huihniin(air pollution) nasa mahmah a, adiakin diesel auto leh gari tuamtuam a kizang diesel khu ziakin school kai student khe a saulou paite tanpha leng diesel khu a diklut khak ziakun student 80,000 velin tuap natna(lung ailment) vei leh nak(breathing) haksa sa in buai uh a, huaite laka 30,000 vel etkol ziaka leng hoihzou nawn tuanlou ding hi’n doctor te’n gen uhi. Diesel khu mihing kichi damtheihna adi’n huchi khopa hoihlou leh lauhuai ahi ngei ding a, Parliament session om chiangin leng MP(Member of Parliament) khenkhat amau omna Quarter leh Parliament House kikal gari a taite tanpha leng awmna (chest problem) a nak haksa leh a tuap uh buai om zekzek hi’n kigen hi.
    Huaiziak mah in Chief Minister Arvind Kejriwal makaihna Delhi a Aam Aadmi Party(AAP) govt in Delhi khawpi a tai(service) gari-te sehkhen (Odd-Even formula) in a service theih ding nite uh bikhiahsak hial hi. Huaikia hilou in Delhi khawpi a gari omte himhim kum 10 sanga upazaw zat theih nawnlouh ding in dan khauhtak bawl in zang uh a, diesel-auto  himhim leng Dehi khawpi sunga service thei nawnlou ding in thupuan bawl uh chihthu om hi. Delhi khawpi ah huihniin ziakin ni tengin misi 80 si om chi’n Environment Minister Prakash Javadekar in tuma zekin Parliament a Rajya Sabha ah gen hi. India gam pumpi leng huihniin leh thanghuai(air pollution) dik khak ziakin kum tengin mi 50,00,000 si chih ahi hi.
    Manipur ah leng Pollution Control Board kichi om a, huai ah Chairman in MLA 1 pang a, Secretary in bel govt officer khat pang hi. Kum tamlou paisa in gari neiteng in Pollution Control Board-te Gari a thau khu(oil emission) tamlua hia ahihkeileh gari zattak lai mah hiam chih gari teng in fitness certificate lakchiat ding chihthu om ngeitham hi. Himaleh tuni chiangin Pollution Control Board te’n bang sem uhiam chih tanpha theihphak hi nawnlou hi. Ahimhim in Manipur ah diktatna himhim omlou bang khop in omsek a, gari ading fitness certificate bang leng sum a leitheih mai ahih ziakin mi’n ngaidau deuhdeuh uh ahi diam chih theih dingin om hi.
    Lamka khawpi ah leng tuma deuh a kipan in Delhi a registration number hong kibehlap tamsim mawk a, kum 10 vala upa ahihziak un a neite’n Delhi a zang ngam nawnlou in kiman taktak a azuak khiakte uh Lamka lam hongtung uh ahi diam chih ngaihsut theih in om hi. Lamka khawpi ah bel gari-lui chi tuamtuam tamtak leh diesel-auto gin ngaih taktak adim in service zungzung uh a, mihing damtheihna dinga hoihlou hiam natna tunthei thilte tanpha leng poisakna himhim neilou tampi omkhawmna bang hi. Gari tuamtuam hi’n diesel auto hileleng a luiluat tak ziaka service tak nawnlou muhtheih ding a hunkhop om hi.
    Imphal leh Lamka kikal a van chituamtuam pua a tai Truck/Shaktiman/Tata leh passenger Bus service khenkhat a luiluat tak ziakun diesel khu potkhe lunglung a, anung ua taikha gari-te adi’n thuak haksa mahmah chi a gen a hunkhop om hi. Diesel kizang Gari luiluate akhu singtanglou kihal chianga meikhu tawh kibang khop a thupi om a, huai dik khate adi’n tuap natna leh awmna a nak haksa mai hilou in natna lauhuai pipi veilawh theih ahihdan doctor te’n gen uhi. Huchi ahihman in District Transport office lamte’n leng amau panlak theihna tan bek ah pan alak kin uh poimawhlua hi.
    Manipur ah diktatna a omlou tawh kibang khopa thil apai ziakin thuaklouh ding tantan thuak hiam natna veilouh ding tanpha vei a hunkhop om dingin patauh-huai hi. Tuma kum 2 paisa in Transport deptt in Supreme Court thusuak chih pansan in Manipur a taithei engine nei gari tengin ‘High Security Registration Plates’ thuak vek ding akum nawn akipan police te’n gari check vek ding a, High Security Registration Plates thuahloute matkhiak leh liausak kia hilou in gari leng service thei nawnlou khop a koih hiding chi hial uhi. Huchi ahihleh chi’n gari nei tamtak in High Security Registration Plates thuahsak uhi. Himahleh a kumnawn in a thuah leh thuahlou khauhtak a etchet leh action lak hiding chih thupuan om leng kum 1/2 nungin leng etzui hituanlou a, tuni chiangin High Security Registration Plates kithuahlou tamtak om veve hi. Huai leng govt in a thuahtu private firm-te akipan sum a nek khit chianga panlak ding himhim phawk ban nawnlou uh ahi maimah diam chih ut-huai hi.
    Huchi mah bangin Pollution Control Board-te’n panlalou a a om maimai uh mihing tamtak damtheihna adia siatna tuntu asuak maimah diam, ahihkeileh etchet ngai selou in sum sensen mai ding pumpelhna houh ahizaw maimah diam chihtheih hi.