Manipur Express | August 15, 2016

HEADLINES:
India gamsung pumpi ah Independence Day 70veina lop hiding
President in mipi chibai buk;PM in Red Fort ah thugen ding

New Delhi, Aug-14: India in British vaihawmna nuai apan zalenna a ngah nung kum 70 chinna Independence Day tuni(Aug 15) in gamsung muntuam tuam ah thupitak a lop hiding a, President Pranab Mukherjee in huai tawh kisai in tuni nitakin India mipite chibai buk in zalenna dinga hinna pia salphate zahna pia hi. New Delhi a Red Fort ah zinglam dak 7:30 in Prime Minister Narendra Modi in national flag kaipalh(unfurl) ding a, mipite lakah India Independence thugen ding hi. Manipur ah State Level in Imphal a 1st Bn. Manipur Rifles parade ground ah zinglam dak 9:30 in zat hiding a, Chief Minister O. Ibobi in National flag kaipalh ding hi. Nitaklam dak 4:30 in Imphal a Raj Bhawan ah Independence Day tawh kisai Reception om ding a, huai hun uap di’n CM O. Ibobi leh a zi O. Landhoni Devi, MLA in VIP leh official tuamtuam-te banah media-te chial uhi.

    President Pranab Mukherjee in I-Day hun ah mipite chibai buk kawm in, India zalenna dinga hinna pia, theihphak a omte leh phawk phaklouh a omte zahna sangpen pia hi.  Mipite kianga President hihna tawh I-Day chibai abuk 5veina hita chi a, huai hunsung in democracy detdou tak om ahihlam muhtheih in kilang chi hi. India a mipi kivaihawmna pen justice, liberty, equality & fraternity tungtawn in khang semsem a, tutung a GST constitution amendment bill passed a omte’n India a democracy pichinna langsak chi hi.  Terrorism ziakin gam tuamtuam ah buaina huaisetak om a, helna leh hiamgamna hihbei dinga mipite pangkhawm di’n President in chial a, gamsung mipite lungmuangtak a akhawsak theihna ding ua armed force leh paramilitary force-te kipiakzawhna ziakin atuamdeuh in amau tungah kipahthu gen hi.
    Ccpur district ah leng Tuibuong a peace ground ah zinglam dak 9:00 in programme kipan ding a, Lunminthang Haokip, IAS, DC/CCpur in National flag kaipalh in March pass a tel contingent tuamtuam-te akipan salute la ding hi. CCpur district a sub-divisional HQ khenkhat leh Manipur a District tuamtuam ah leng Independence Day lopna om ding hi.
    National capital a Independence Day zat ding ziakin security hihkhauh in om a, Red Fort munah amasapen di’n Paraglider leh drone detector koih in om hi. Home Minister Rajnath Singh in tuni’n security dinmun etkhiakna nei in, National Security Advisor Ajit Doval, Union Home Secretary Rajiv Mehrishi, leh intelligence agency chief tuamtuam te’n J&K telin state tuamtuam a security dinmun report pia uhi. Independence Day ding kuan in muntuam tuam ah kisakkholhna tamtak om a, Madhya Pradesh a freedom fighter Chandrashekhar Azad  pianna khua ah leng Prime Minister Tiranga in Yatra khahkhia hi.


Laibu thak hoihtak suak: tuni’n honna om 
Lamka,Aug-15: (late) Paoneikhai Suantak, ex-Minister leh T. Gin Khan Thang, SDC(retd) in kum 20 val vingveng thu poimawh (document) tuamtuam kaikhawm a laibu a bawl uh Tributary Hill Polity (Chiefs and Overlords in Chin Hill) kichi Delhi a Mittal Publications in a sutkhiak tuni nitaklam dak 3.30 in New Lamka(G) a T. Gin Khan Thang’ tenna inn ah Rev Dr Sut Khan Thang, Executive Secretary, CBA in honna leh Pathian kianga latna nei hi. Laibu bawl 2te laka a damlai T. Gin Khan Thang a damtheihna lam a buai ziakin thugen haksa sa a; laibu bawlkhiakna dinga India, Burma leh London akipan material poimawh tuamtuam kaihkhawmpihna a ana kithuahpih banah a sutkhiakna ding tanpha a panlakpih St Paul’s Institute neitu Haukhen in laibu bawlkhiakna ziak leh thil omdan tangpi taklang a, huai huna tel mi tuamtuam in laibu manpha leh Zomite adia gou(asset) kia hilou in politics adia kibulphuhna hoihtak hiding ahihdan leng gen uhi.
    Huai laibu hoihtak kuapeuh adia nei a sim dia hoih hi a, bu 1 zel in Rs. 1,200/- man himahleh mi tamtheipen in  sim a thil omdan a theih uh deihna ziakin tunung zekin concessional rate in zuak hiding hi. Manipur Express ah leng tunung sawtlou in Book Review dan in hong kisuah ding hi.


LOCAL NEWS:
Dist. mipi I-Day message khak 
Lamka, Aug-14: Dist. Admn makaih in Aug. 15, 2016 in Tuibuong a Peace Ground ah Dist. level ‘70th Independence Day’ lopna ding tawh kisai Lunminthang Haokip, IAS, DC/CCpur in mipi message (thuchah) khak a, Independence day tungtawn in dist. mipi’n kitanauna hoihsem a neih deihsakthu gen in, gamsung ah muanna leh bitna omtheihna dia kuapeuh in panla dingin ngen hi.


AMWTSCPC-2013 batch meeting  
Lamka, Aug-14: All Manipur Written Test Successful Candidate of Police Constable Male -2013 batch (AMWTSCPC-2013)  pawlin govt kiang ah Aug 15, 2016 tan in recruitment result suahkhe dingin thutawp a piak uh tangtunsak ahihkeileh Aug.16- 23, 2016 sung National Highway khaktan in economic blockade patsawm uhi. CCpur branch in leng huai gupthu puang uhi.CCpur branch in Aug. 16, 2016 sunnung dak 12:30 in Tuibuong community hall ah joint meeting nei ding uh a, member-te ban ah nu-le-pa  atam theilam telding in chial uhi.


Zu zuak kham bikbek di’n thupuk 
Lamka, Aug-14:  Zenhang Lamka V/A’  phalna in tuni’n Joint Committee (ZLYC, ZLNP & YPA), Zenhang Lamka makaih in V.K. Montessori school hall ah public consultative meeting om a, huai ah vengsung ah zu telin khamtheih tuamtuam zuak tawh kisai genkhawm uhi. Meeting paikhawmte’n vengsung ah zuzuak leh huan himhim kham bikbek dingin thupuk uh a, thupukna pen zuih ngal hiding chi uhi.


School teacher-te training  ding 
Lamka, Aug-14: India govt. in gamsunga  hut chikhat Soil Transmitted Helminthes (STH)  kichi beisakna dingin  flagship program ‘National Deworming Day’ kichi pankhia a,  tukum Feb. in  1st round zawh nungin 2nd  round ading leng hon hita hi. Prog sep suahna dingin Lamka Block huamsunga school tuamtuam a teacher te’n Aug. 17, 2016 in Hiangtam Lamka a YPA GHQ hall ah ADC leh CCpur Dist Private Schools Assn nuaia teacher te training  ding uh a, sunnung dak 1:00 apan dak 3:00 sung ZEO, Mission School, Kendriya Vidyalaya, JNV, Special School leh Pre-school a sem teacher-te’ training ding uhi. Huai hun ah hutlou ‘Albenezole’ kichi poimawhdan leh naupangte neksak dingdan sinsak hiding hi.


CDVDFWA pawlin general meeting 
Lamka, Aug-14: CCpur Dist. a VDF Welfare Assn (CDVDFWA) pawlin  tuni’n  KKL complex ah general meeting nei uh a, huai ah  Imphal apan L. Deben Singh, President, All Manipur VDF Welfare Assn makaih member 5 leng  tel  uhi. L. Diben Singh in CCpur dist. a VDF personnelte kituahna kipahpih a, VDF pawlte  haksatna tawh kisai in Oct. 28, 2015 a cabinet thupukna akinlam a buchinna din central committee in move lel uh hi’n gen a, hakksatna tuamtuam aneihte uh govt. in Sept. 2016 a monsoon session  hun ah pawlut a hihveng dingin ngen a, govt. a ngetna ngaihsak ahihkeileh kiphinna tuamtuam pan ding uh hi’n gen hi. Meeting a paikhawmte’n thupukna tuamtuam bawl uh a, huailak ah VDF personnel sihna tuak a om leh  galna Rs. 1 lakh  piak ding in thupuk uhi. Manipur ah tulel in VDF personnel 10,050 om hidan in gen hi.


Bungmual hausa adinga thumna
 Lamka, Aug-14: H. Nungkhanpau, Chief of Bungmual apan kizadan in Aug 15, 2016 (Seppatni) zing dak 6:30 in Bungmual a YPA Hall  ah Pastor V Khamvum, Local Pastor EBCC, Bungmual in ‘Hausa ading in  thumsak ding hi. Hiai hunah H Lianzathang in pate’ thugenna, Pastor (Dr) Hs Chinsuanthang in pute’ thugenna banah Hausa  H Nungkhanpau in thugen ding  hi.
T. Pamei IAS, Commissioner (Tribal Affairs  & Hills), govt of Manipur in Aug 5, 2016 in Bungmual Hausa dingin  Hausa asita H Thuamkhanmang’ tapa (late) Tualminthang’ tapa H Mangliansiam guang a, amah  kumchinglou (minor) ahihlai ziakin a paneu(guardian) H Nungkhanpau in Hausa hihna len dingin mawhpuakna pia hi’n ‘order’ ah taklat in om hi.


IMPHAL NEWS:
Gov. in cultural program hun uap 
Imphal, Aug-14: Song and Drama Division, Ministry of Information and Broadcasting, Govt. of India, NER, Imphal Centre saina in ‘Azaadi 70 years : Yaad Karo Qurbaani’ chih thupi a zang in zan in Raj Bhavan a Durbar Hall ah Cultural Programme om hi’n gen uhi. Hiai hun ah Song and Drama Division a artist te’n Bande Mataram (National Song), Jana Gana Mana, Laiharaoba Dance, Wangna Pairi chih-te telin item tuamtuam 13 pulakna nei uh a, hiai hun Governor V. Shanmuganathan, Chief Secretary O. Nabakishore, L.M. Khaute, IPS, Director General of Police (DGP) leh official tuamtuam te’n uap uhi.


Award sang dingte min puangkhia
 Imphal, Aug-14: Home Ministry in President’s Police Medal for ‘Distinguished Service’ sang ding in Manipur a Police officer khat leh ‘Meritorious Service Award’ sang ding in Police Officer 6 telkhia uh hi’n kigen hi. Adhikarimayum Ghanashyam Sharma, Sub-Divisional Police Officer (SDPO) Imphal in Police Medal for Distinguished Service leh Hijam Gyaneshwar, Dy. Commandant, 7th Manipur Rifles; S. Guni Singh, Sub-Inspector (CID/SB); Songlianthang Vaiphei, Inspector, MPTC; Lungkhosei Haokip, Havildar, 2nd Manipur Rifles; Khundrakpam Debananda Singh, Sub-Inspector (CID/SB) banah AS Masongam Shimray, Inspector, Senapati district te’n Meritorious Service Award sang ding uh a, Independence Day lawp hun ah award piak hiding uh hi’n  kigen hi.


Helpawl tuamtuam in I-day boycott
 Imphal, Aug-14: Northeast biala helpawl tuamtuam in Independence Day (kum 70 chinna) Aug 15, 2016 a lopna ding boycott puang uhi. Huaite laka  United National Liberation Front of WESEA (UNLFW); Co-ordination Committee (CorCom) Manipur; Garo National Liberation Army (GNLA) leh  Hynniewtrep National Liberation Council (HNLC) pawlin boycott a puan ban uah  public &  private transportation teng khawlvek ding leh Aug 15, 2016 zingsang dak 1.00 akipan nitak dak 6.00 tgan dukan/shops,bazar leh education institution teg khak hidin puang uhi. Huaite banah Manipur a helpawl Kangleipak Communist Party (Poirei Meitei faction) leh KNF(Nehlun) pawlin leng bandh puang uh hi’n kigen hi.


NFSA tawh kisai campaign pan ding 
Imphal, Aug-14: Manipur ah National Food Security Act (NFSA) zatdan kituaklou leh hawmkhiakna lam ah diklouhna doudalna ding in CPI (Manipur state Council) te’n ‘Campaign for Proper implementation of NFSA in Manipur’ chih thupi a zang in campaign pan dia mansa uh hi’n gen uhi. Hiai  tawh kisai in Dr. Moirangthem Nara, CPI(M) Chief in Irabot Bhawan a press conference hun ah CPI(M) in Manipur ah NFSA a hi ding bangtak a zat ding deih uh a, Minister leh MLAs khenkhat-te ziak a NFSA hawmkhiakna lam ah diklouhna report om ziak in July 17, 2016 in campaign pan uh chi’n gen hi. Minister leh MLA te’n NFSA zatdan a tawkbuai uh scheme tungtawn a provision in phal lou hi. Campaign committee te’n Aug 18, 2016 in Imphal East district ah public rally nei ding uh a, huai hun ah DC leh DSO kiangah memo piak hiding a, Chief Minister in scheme hongkhiatni a thuchiam a bawl-te a tak in semsuah hen chi a, huai ahihkeileh MLAs, Minister leh Official-te summuhna dia scheme suak ding hi’n leng gen hi.


Media sensitization programme om 
Imphal, Aug-14:  All Manipur Working Journalists’ Union leh Town Planning Dept.-te saina in Manipur Press Club ah tuni’n ‘Swachh Survekshan 2017 & Housing for All-2020’ tawh kisai in ‘One day long media sensitization programme’ om hi’n gen uhi. Huai hun ah Ng. Uttam, Jt. Director, MAHUD leh Peter Salam, District Coordinator, MAHUD te’n Swachh Survekshan tawh kisai in thugenna nei uh a, State Chief Town Planer Neprem Gitkumar leh Asst. Town Planner Y. Narmada te’n Housing for all-2020 thu tawh kisai in thugenna nei uhi. Student-te adia ‘Swachh Survekshan 2017’ thupi a zang in painting competition tawh kisai a prize hawmkhiakna leng om hi.


Old Lambulane Community Hall hong
 Imphal, Aug-14: Old Lambulane ah tunitaklam in Old Lambulane Community Hall hongkhiatna leh 24-IMC a Councillor leh Ward member-te vaidawnna program om a, huai ah Chief Guest in RK. Imo, Sagolband A/C MLA pang in community hall hongkhiatna nei hi. Huai hun ah Chief Guest in a thugenna ah BJP Manipur Pradesh makai te’n Congress a Minister khenkhat telin mi 28 te’n BJP zop sawm uh chih thuzuau hi’n gen a, political party paidan kalhna ahihziak a makaite’n thuzuau bawltawm tawpsan ding in ngen hi. Manipur Pradesh Congress Committee a Gen. Secy. (Administration) RK Imo in a genzelna ah election hun chiang in mipi it (love) makaite kithei pan ding a, NFSA tawh kisai Congress govt. in Centre ah kum 2013/14 in ana pan uh a, Manipur ah sum lam ah haksatna ziak in hun bangtan hiam a zekai nung in state govt. in apaisa April kha in pan uh a, card kidaih louh ziak in haksatna tuamtuam lakah MLAs-te panlakna in paizom theizel a, kuaman politics ziak a kimawlna a zanglou ding in leng ngetna bawl hi. Huai nung in Councillor Ward 24 G. Bino leh Ward Member Lhingnu Thangjom-te kipahpihna hun zatna om hi.


Manipur's Independence Day zang
 Imphal, Aug-14: Coalition of Indigenous’ Rights Campaign (CIRCA) Manipur-te saina in tuni’n Sana Konung (Royal Palace) ah ‘Manipur Independence Day’ zatna om a, Manipur Titular king Leishemba Sanajaoba in Manipur national flag ‘Malem Puba Paphal Tongba Phiral’ kaipalh hi’n gen uhi. Sanajaoba in a thugenna ah Manipur Independence Day lawpna in India dan bupi kalh kha lou a, Anglo-Manipur war 1981 nung tanpha in Manipur in sovereign political status hamphatpih a, himahleh India in Independence a muh nung a India Independence Act 1947 akipan India Union ah Manipur laklut hi’n gen hi.
    Ningthou Lancha, CIRCA in Independent Manipur khangthu leh India/British India khangthu te’n kizopna bangmah a neih khak louh ziak un theih khelh hithei lou a, ‘Merger Agreement’ a thupukna-te hoihtak a etchet hileh Manipur pen pre-merger status piak hiding a, India govt. te’n external affairs, defence, communication leh transport lam ah mawh apuak ding hi a, CIRCA leh pawl tuamtuam te’n Manipur ah Sept 20, 2016 tan Manipur Independence Day zang ding uh chi’n gen hi. Huailou in CTOC-te saina in Manipur Dramatic Union (MDU) auditorium ah tuni’n ‘Custom & Traditional Day’ zatna om hi.


Indian Freedom fighter-te zahna pia 
Imphal, Aug-14: Kum 1947 a India Independence tawh kisai Indian freedom fighter-te tungtang Sadar Hills a tuailai-te theihsak ding tupna in Bishnulal Govt. High School leh Nehru Yuva Kendra Kangpokpi a Charhajare-te saina in Kanglatongbi War Memorial Park (KWMP) ah tuni’n Tiranga Yatra –Yaad Karo Qurbani (70th years of Aazadi) zatna om a, huai hun ah Chief Guest in W. Thiumai, member ADC Sadar Hills pang hi. Functional president in Kharga Prasad Parsian, Headmaster, Charhajare High School pang a, Guest of Honour in Robert Misao, Principal, Ideal Hr. Sec. School pang hi.


TUNI THUPI:
“Huchi’n, mi khat tatlekna in mi tengteng adinga siamlouh tanna atut bangin, mi khat diktatna thilhih in mi tengteng adingin suahtakna leh hinna a hontun hi.” – Rome-te 5:18


EDITORIAL:
70th Indian Independence Day
Suahtakna thupi: suahtakna lamdang!
India in kum 69 paisa in British-te apan zalenna ana ngah ua, kumteng August 15 in India leh Pakistan in hibang zalenna a ngah uh lopna thupi taktak in neisek uhi. Tukum 2016 in kum 70 mel i muta ua, kipahhuai petmah chih ding ahi. Chihtakna, hangsanna leh kuhkalna tawh galpi poimawh mahmah ana sual uh ahihdan theihtheih in om a, khangthakte’ adingin laibu a isim khak hi a, huchi lou in, hiai hun ana tuakkha pi leh pu bangzahhiam in bel hon dampih laisam ding un gintak huai hi. Christianity vai ah gen le hang Jesu Kris in khelhna apan mihingte a hon tatkhiakna leh khelhna apan suahtakna i ngahtawh tehvual hikei mahleh, hibang suahtakna i ngahpen ki naih mahmah dingin up huai hi.
    India in British te apan zalenna angahna thu ah khangthu a mangnawnlou ding mi poimawh diak mi a sanga sim omkha dinga, huchi lak ah, Mahatma Gandhi, Pandit Jawaharlal nehru, Subhash Chandra Bose leh adang tampitak om hi. Tualou in, tuni chiangin state 29 laka makai kumlui tampitak leng ‘Freedom fighter’ ana om uhi. 1930s hunkhawng a Nehru, Gandhi leh mi poimawh tuamtuamte’n Delhi Red Fort muna a thugente uh, Subhash Chandra Bose in tuailai khangthakte ana suk phur dan leh thugelh siam tuamtuam in a thiltuahte uh ana taklatna thute uh tuni chiangin document poimawhtak suakin khangthakte’ adingin siamsinna kongah laibu poimawh petmah hong suak hi.
    1929 kumin Jawaharlal Nehru in Congress President hihna ana len a, tua hunin gam-le-nam itna ziak liauliau in ‘Poorna Swaraj’ (total independence) om dingin sapna ngah a, British colonial rule apan India in suahtakna poimawh ahihdan sapna (calling) thupitak ngahkha hi. Khangthu (history) tawh kisai gen taktak ding chi le hang, ama in January 26 pe’n Indian Independence Day dingin bikhiah hi a, himahleh, 1950 apan January 26 pe’n Republic Day azat ding leh August 15 pe’n Independence Day azat dingin thukimna hong om leuleu chih ding ahi hi. A ziakbel January 26, 1950 pe’n British thuneihkhumna (Dominion) apan omnawnlou ding chihna ziakin Republic Day dan a kumteng azat ding chih hi a, August 15,1947 pe’n British te’ nuai apan suahtakna azat ding chih ahi. Lord Mountbatten in Indian Independence Bill tawh kisai British House of Commons ah July 4, 1947 in luikhia a, August 15, 1947 apan India ah British rule hihbei dingin bill passed in om hi.
    Suahtakna (freedom) kichi lehdan tamtak om dinga, salam a suahtakna leh khalam a suahtakna tawh kisai leng ei Christian sahkhaw zuite adingin ki naih mahmah hi. Salam leh khalam kichipen thakhat a paikhawm helhel (parallel) ahi chih theihin om a, salam a i koltannna tamtak om dinga, huai kawmkawmin khalam a i koltanna leng liantak om thei hi. British te’n India telin gam tampitak thagum in opkhum ua, Christian te’ adia melma lianpen Setan in leng thagum mahin mi tamtak opkhum in a ut dandan in kai hi. Setan tungtawnin khelhna pianga, khelhna apan suahtakna (freedom) i muh chiangin mihingte khelhna apan ‘Cross’ a tankhetu Jesu Kris belhin om a, huchi’n suahtakna bukim ngah in om hi. British-te leh Setan tehkak ihizaw kei a, himahleh, thagum a ki opkhumna tawh kisai gen ihi zaw hi. Gamtaang theilou ding khop a henbi chilh a om India in zalenna amuh bangbangin Christian te’n leng Jesu Kris vangin Setan apan suahtakna i ngah chih chiang ngoihngoih hi.
    Akoi abang hileh, India in tuni chiangin British-te apan zalenna a ngah uh kum 70 bang chingta a, huiai k awmkawm in Ministry of Defence thusuak danin, Lord Mountbatten, Edwina Mountbatten , Mahatma Gandhi ahihkeileh Jawaharlal Nehru-te mangngilh vual hilou chi thouthou hi. India adingin salam leh khalam vai ah suahtakna thupi-suahtakna lamdang i chilou theikei hi. La khatin ‘khelhna kolbut kitanta e, kei ka suakta suakta’ chihdan ahi diam?  Indian Independence Day kum 70 chinna August 15, 2016 a program zangding tengteng chibai i kibuk hi.