Manipur Express | August 21, 2016

HEADLINES:
ATWU pawlte makaih in tuni’n  Public rally om

Lamka, Aug-20: All Tribal Women Union (ATWU), Gen HQ/CCpur makaih in tuni’n Manipur singtanggam ah 6th schedule a kivaihawm phutna in public rally om a, mun tuamtuam akipan mi tamtak  paikhawm in Chairman ADC/CCpur leh  DC/CCpur tungtawn in Prime Minister ading memorandum pia uhi. Rally a paite Dist. hospital morgue ah Pastor Ginzatun, Local Pastor EBCC V. Munhoih in thumna in khakhia a, IB Road-Tedim Road-Tuibuong Forest Gate- 27 Sector Assam Rifles kong a lampi zui in  Dist. hospital tan  lampi zui in rally zou uhi.

    Manipur singtangmite hihna leh gam  humbitna din 6th Schedule provision omsa ahi ding banga piak ding phutna a rally sai uh hi’n ATWU makaite’n gen uhi. DC/CCpur leh ADC Chairman in ahibang in PM kiang ah memorandum tun ding uh a, tuni mah in fax tungtawn in thon dingin chiam uhi. Langkhanpau Guite, Chairman, ADC/CCpur  khut ah memorandum pia uh a, huai hun ah Lal Hossan, Vice Chairman; Genneikhup Vaiphei, EM; G. Thangkhosuanmung, EM; G. Suanchinpau, MDC leh V. Khaikhanmung, MDC telin member hunkhop ban ah staff-te tel uh a, Nianglian, Convenor, ATWU in rally paina ziak gen hi.
    Langkhanpau in Manipur  singtangmite’n 6th Schedule phutna ziakin Hill dist. tenga ADC  leng kum 20 val election boycott hi a, 6th schedule tawh kisai a panla khempeuh ADC in support  den hi’n gen hi. Centre govt. kiang ah Aug. 30, 2014 in memorandum pia uh a, tukum January in reminder penawn in, New Delhi tanpha ah dharna nei uh hi’n gen hi.  Rally ah pitek kum 60 tunglam hunkhop telin mipi tamtak pai uh a, rally a paite leh police-te tung ah ATWU in kipahthu gen hi.


India leh Russia kizopna thuksem in paitou ding: Modi
Russia Dy PM in Prime Minister Modi kimuhpih
New Delhi, Aug-20: Russian Deputy Prime Minister Dmitry Rogozin in New Delhi ah tuni’n  Prime Minister Narendra Modi kimuhpih a, gamnihte kizopna hoihtaka paitou lel pen hihhat sem dingin lemsa uhi. India adia lawm ginom leh kingakna thamching Russia ahihdan Narendra Modi in Dmitry Rogozin zasak a, President Vladimir Putin tawh Dec 24, 2015 a Moscow a kilemna tuamtuam abawlte uleng sepsuah a om chi in, sepsuah nailouhte zawhsiang ahihtheihna ding tuni’n kikum uhi. Russia in India kiangah galvan leh thil tuamtuam apiakte uleng Prime Minister in kipahthu gen a, tukhabul in Kudankulam Nuclear Power Plant Unit 1 honkhiak a om pen gamnihte kitanauna gah hi’n gen hi.
    India leh Russia kithuahkhawm a project tuamtuam kibawlte hoihtak a paitou ahihdan Modi in Dmitry Rogozin kiangah hilh a, tukum tawplam a Russia President in India hongvehna ding ngaklah ahihthu leng hilh hi. External Affairs Ministry thupuangtu Vikas Swarup in tuni a makai nihte kimuhna lawhching mahmah hi’n gen a, huai tungtawn in military leh economic thil ah Russia leh India in thuksem in kizopna neithei ding chi hi.
    Huaibang kalah, Nepal Deputy Prime Minister Bimalendra Nidhi inleng tuni’n Prime Minister Narendra Modi kimuhpih a, huai hunah Nepal a zinling thuakte panpihna sunzom di’n ngen a, Modi in Nepal Prime Minister in India veh di’n chial a, Nepal PM thak Pushpa Kamal Dahal Prachanda makaih democratic govt kipahpihthu khak in, gamsung vaihawmna detdou a neihtheih ding uh deihsakthu leng puang hi.


LOCAL NEWS:
Hmar Inpui makaih in genkhawm
Lamka, Aug-20: Hmar Inpui, Gen HQ makaih in tuni’n  NECH/NECA Auditorium, Bethlehem Veng, Rengkai ah ‘Manipur Regulation of  Non-Local People Bill, 2016’ tawh kisai Consultative Meeting om a, Rev. Fimțhasang Infimate in thumna in hong hi. Huai ah Hmar Inpui, Gen HQ nuai a affiliated body-te leh mimal lunglut te’n draft Bill hoihtak in genkhawm uhi. Manipur govt leh OMTF a piaklut ding in hihfel uh a, draft Bill tawh kisai govt ah deihdan leh deihlouhdan lehkha piaklut tungtang Consultative meeting a thupukna pen a paisuak keileh pawlkhat peuh in asai uh lemsa ding uhi.
Hmar Inpui, Gen HQ  theisakna bang a Bill draft tawh kisai soft/hard copy ah deihdan, deihlouhdan leh ngaihdan hoihtak Manipur singtangmite humbitna ding a panla leh makaite tungah kipahthu gen uhi. Huai hun a refreshment pawkhia Timothy L. Changsan Admn, NECH/NECA tungah kipahthu gen uhi. Manipur State Commission for Scheduled Tribe member dinga Manipur govt in  Dr. John H. Pulamte, former President, Hmar Inpui, GHQ kipahpihthu puang uh a, Manipur ah Scheduled Tribe-te’ ading a vualzawlna honghih deihsak thu puang uhi. Dr. John Pulamte in Govt. order pom in Commissioner, Tribal Affairs & Hills, Govt. of Manipur kiangah joining report pia hi.


Team CT Lian in damlou veh
Lamka, Aug-20: Team CT Lian in zan nitak in P. Goulian h/o Nuamngaihkim of  New Lamka, Emau Street damlou veh in kithuahpihna leng pia uh a, Rev. G. Paumuanthang  in thumsak hi. P. Goulian ahihleh New Lamka a Eimi Watch (Sana bawlna) neitu hi a, damlouh ziakin nekzong thei nawnlou a, tua ziaka veh uh hi’n kigen hi. Aug. 4, 2016 akipan cancer ziakin nasem theilou phot hi. A innkuante ama’ khut a kinga uh a, aman tapa 1 leh tanu 4 nei in alianpen leng kum 10 lel hipan hi.


GS in biakinn thak hong
Lamka, Aug-20:  TBSUC, EBCC/Zion makaih in tuzing in Nghathal a Dinthar Veng ah EBCC Nghathal biakinn ding Rev. S. Vung Minthang, Gen. Secy, EBC in hong in Pathian kiangah lan hi. EBCC Nghathal ahihleh Zion saptuam in a inntuan hi a, Local Secy, EBCC/Zion in Nghathal EBCC a Upa Committee Chairman  kiang ah biakinn chabi telin saptuam vanzat pekhia a, Upa Committee dingte mel lahna nei hi. Rev. V. Nenglian, Divnl Supdt, Lamka South Div in kichiamsak in thumsak hi. Rev. V. Nenglian, DS, Lamka South Divn. in biakinn bawlna ding suangphum April 16, 2016 in nei hi.


Kum 18 nuailamte agitation ah tel theilou ding
Lamka, Aug-20: N. Praveen Singh, Director of  Education (S) govt. of Manipur in ZEO, Headmaster/ Headmistress leh Principal-te kiang ah student kum 18 nuailamte  public agitation ah tel theilou ding leh atel a om leh Section 75 of Juvenile Justice Act, 2015 dungzui in  school thuneite tungah action lak hidingin theisak  hi. Huaiban ah Director of Education (S) in ZEO/CCpur kiang ah untrained in-service Elementary School Teacher bangzah om hiam, amin uleh  sepna mun tel in Aug 31, 2016 tan a report peding in theisak hi.


Go Green sepsuahna in singnou suan
Lamka, Aug-20:  TKSU in ‘Go Green’ minvuah in khawpi sungah singnou tam theilam suan sawm in ‘Environment Awareness Campaign’ patna in tuzing in Tuibuong  Peace Ground kim ah singnou suan uhi. James Doujapao, MCS, Tuibuong SDO/BDO in a honna in singnou suan a, Thangjang Haokip, President, KIC telin student leh social orgn. tuamtuam makaite telin singnou suan uhi.
    TKSU President in sing (tree) sat khiak ziakin khawlum-khawvot naktak in kikheng a, mihingte’n kithuak lawh ahihman in hiai tawh kisai hihbei tupna a campaign apat uh hi’n gen  a, hiai dingin Dist. Admn in singnou 1000 val pia hi’n gen hi.


Taitesena section day zang
Lamka, Aug-20:  YMA Lamka Branch nuai a Section 4-te lak a Taitesena section in tuni’n Synod hall ah section day zang uh a, Chief Guest in C. Lalhmingmawia pang hi. Guest of Honour in James Thlengliana Colney pang a, Functional President in Vanlalzawna, President, YMA Lamka Branch pang hi.
    Taitesena Section in member-te kitheihtuahna din nidang in Aug. 15 pen section day in zang uh a, kum 10 a zatlouh nung un tukum a zang pan nawn uh hi’n kigen a, hiai hun in YMA Lamka Branch Diamond Jubilee hun a kidemna tuamtuam a kipahman angahte uh lopna leh kisuklimna  kawm in zang uh a, member te’n special item tuamtuam lahna  nei uhi.


Nghathal Meitei Biakinn hong ding
Lamka, Aug-20: PCI (R)/PMF makaih in Aug 21, 2016 sunnung dak 1:30 in Rev. Khen P. Tombing, Chief  Coordinator, PCI (R) in Nghathal leh Kanaan Veng gamgi zula PCI (R) Nghathal Meitei Biakinn hong ding a, Rev M. Khamlianmang, Coordinator (Missions) PCI (R) in Pathian kiang ah lan ding hi.


Freshers’ Meet-cum-Career Guidance
Lamka, Aug-20: SSPP Joint HQ, Delhi te’n tuni in Convention Centre, JNU ah Siamsin Freshers’ Meet-cum-Career Guidance Program, 2016 nei uh a, Bill 3 ziaka si Tribal Martyrs 9-te’ suunna nei uhi. Huai ah Guest Speaker in Hoihnu Hauzel, Biaklun, G. Sanga, Grace Siamlianvung, Dorothy Niangkhannem Guite, Siamsang Vualnam, Dr. Rose Nembiakkim, Vumlunmang Vualnam, N. Chinsum, Khatchin Langel, Khamkhansuan leh Rev. Kamzamuan pang uhi.


HSA CCpur College Freshers Meet
Lamka, Aug-20: Hmar Students’ Assn. (HSA) CCpur College te’n tuni’n Muolhlum, Rengkai a Vocational Training Institute (VTI) ah Freshers’ Social Meet 2016 nei uh a, Chief  Guest in Ricky Vanlallawm Guite, Principal CCpur College leh Functional President in Lalhrillien @ Hrila Hmar, MDC (Saikot) pang uh a, Freshers’ student-te ICI Pastor Thangrolien in Pathian kiang ah thumsak hi.


DC/Chandel ah ngen
Lamka, Aug-20: ZSP Moreh Block a Secretary Khamliansang Zou in DC/Chandel kiang ah Myanmar Authority te’n Aug 7, 2016 in  Tamu Town ah student 2- Pausuanlam Ngaihte (32) s/o (late) Ginzadal Ngaihte  of  Moreh Ward No 2,  leh Gouminlun Zou (26) s/o Suanjagin Zou of  Moreh Ward No. 3 of Chandel dist. a mat (detained) uh khahkhiatna ding a panla ding in ngen uhi. Myanmar Authority te’n mi 2 a hentang uh ZSP member hi uh a, Aug 7 (Sunday) in vocation zang a Tamu a hawh hi uh chi’n taklang uhi.


SUUNNA:
V. Ngulthuam @ Taia (84) f/o Vungsuanmang Valte, EE/PWD  tuni nitaklam in Guwahati ah khawsik leh natna khenkhat ziakin si hi. Aluang Lailam Veng, Lamka ah  hong kipaw tung ding a, Lamka hanmual a vui hiding  hi. V. Ngulthuam in state govt nuaia VLW sepna akipan pension hi a, YPA Gen HQ ah CWC Chairman banah  organisation tuamtuam ah leng dinmun poimawh len ngei hi.


IMPHAL NEWS:
Governor thak ding hongtung
Imphal, Aug-20: Manipur Governor thak ding Dr. Najma A. Heptulla tuni nitaklam dak 3:15 velin Indian Airlines AI-889 in Imphal Tulihal International Airport hong bawh a, huai ah Chief Secretary O. Nabakishore, L.M. Khaute, DGP, Ningthoujam Jeoffrey, DC/Imphal West,  Dr. A.K. Jhaljit, SP/Imphal West leh Rehanuddin Choudhury, Protocol Officers te’n ana dawn uh hi’n kigen hi. Huai nung in Raj Bhavan ah CM O. Ibobi, Dy. CM Gaikhangam leh top official tuamtuam te’n ana dawn uhi.
    Akigendan in Raj Bhavan a Darbar Hall ah Aug 21, 2016 zinglam dak 11:30 in Manipur High Court Chief Justice  Rakesh Ranjan Prasad in  Governor thak dingin Dr. Najma A. Heptulla kichiam sakna nei ding hi.


Sadbhavana Diwas zatna om
Imphal, Aug-20: Manipur govt. saina in 1st MR banquet hall ah tuni’n state level a Prime Minister-lui Rajiv Gandhi pianchampha a 72 veina banah Sadbhavana Diwas kichi zatna om a, huai ah Chief Minister O. Ibobi in ‘Sadbhavana pledge’ neisak hi’n gen uhi. CM in a thugenna ah gam pumpi a nam tuamtuam kalah kituahlouhna leh huatna banah buaina ziakin mi tamtak si a, sawtpek apan muang leh bittak a khawsak khawm pen tu in kihuatna leh kituah louhna in subuai hi. Nam tuamtuam kituak leh muangtak a khawsak khawm theihna dia miteng in kipumkhatna dia panla ding a kichiam di’n ngen hi.
Dy CM Gaikhangam in a thugenna ah Rajiv Gandhi in IT leh education sector lam ah kikhekna lianpi tun a, Punjab Accord, Assam Accord leh Mizo accord kihouna ah panlatu poimawh tak hi’n leng gen hi. Hiai hun Ministers, MLAs, Chief Secretary, DGP, Police leh Civil a top official te’n uap uh hi’n kigen hi. Huailou in BT Road a Congress Bhavan mun ah Manipur Pradesh Congress Committee (MPCC) saina a Sadbhavana zatna om a, huai ah TN Haokip, President, MPCC leh Dy CM. Gaikhangam-te makaihna in Congress leader leh worker te’n Rajiv Gandhi tungah zahtakna latsatna in pak piakna nei uhi.


CC Hr. Sec. School ah thubuai om
Imphal, Aug-20: CC Hr. Sec. School a student khenkhatte’n tuni’n Manipur ah ILPS zat ding phutna a kiphinna hun a tel dia Class-XII half yearly exam pailel a sukbuai ziak in student-te kalah buaina piang a, student bangzahhiam in liamna tuak uh a, Police-te tunnung a buaina khemdaih a om hi’n gen uhi.
Thiltung tawh kisai in New Checkon a Tribal Market mun ah press conference om a, huai hun ah Th. Suan Vaiphei, Gen. Secy. of  Hr. Sec. School, Joint Tribal Student Union in buaina kipan dan tawh kisai in thugenna nei a, KSO Imphal Branch President Thanglalson Baite in hunpaisa inleng tutung a tawh kibang in school dang ah buaina tam veitak om a, tribal-te lungsim kia hilou a taksa tanpha a soisak tuak uh ahihdan taklang a, school paidan tawh kisai a student body tuamtuam-te kigolh chiang a buaina thiltung om hi’n gen hi. Thiltung tawh kisai akisaipih thuneite’n akintheipen a enkai ding in ngetna bawl a, huai ahihkeileh maban a buaina a om nawn leh state govt. in mawh a puak ding uh hi’n leng gen a, DESAM a Vice President H. Anand in thiltung tawh kisai mawhpaih thupuang a, maban hun ah buaina om louhna dia state govt. in panlak ding in leng ngetna bawl hi’n gen uhi.


Kidney transplant masapen lawhching
Imphal, Aug-20: Manipur khangthu adia masapen ding in Shija Hospital nuai a Shija Institute of Renal Science te’n kidney transplantation lawhchingtak a zou uh hi’n kigen hi. Hiai thu tawh kisai in Shija Hospital ah tuni’n press conference om a, huai ah Bishnupur Ward No. 3 apan kum 29 a upa patient khat in kum 2013 apan chronic renal failure leh steroid induced diabetes mellitus lam ah buaina a neih ziak in a damtheihna dia lampi omsun kidney transplantation hi’n gen uhi. Shija hospital a  Dr. Somorendro Paonam leh Yasoda Hospital a Dr. Sananda Bag-te makaihna a Aug 14, 2016 in patient tungah Living Related Renal Allograft Transplantation (LRRAT) lawhching tak a zawhsiang ahih tawh kiton in Manipur a dia Kidney transplantation masapen hi a, patient leng damsiang hi’n gen uhi. Press conference hun ah operation tawh kisai a video sau lou suahkhiakna om hi’n leng gen uhi. Akigendan in Shija Hospital te’n Transplantation of Human organs (Ammendment 2011) a section 14 & 15 tungtawn a Kidney leh Cornea transplantation bawl theihna dia phalna a nget uh Manipur govt. in April 22, 2016 ni a lemsakna a piak ziak ua transplantation bawl thei uh hi’n leng kigen hi.


NSG te’n safety protocol enkhia
Imphal, Aug-20: National Security Guard (NSG) a Captain khat makaihna nuai a member 4-te tuni zingsang in Imphal hongtung uh a, Chingmeirong a Manipur Legislative Assembly ah security dinmun tawh kisai etkhiakna nei uh hi’n kigen hi. Huai ah NSG team te’n helpawl-te apan state assembly luhna a om leh safety calculation, safety protocol leh counter-terrorist task ding tawh kisai etkhiakna nei uh hi’n kigen a, NSG team te’n Aug 21, 2016 in Imphal nusia in zinkhe ding uhi. Akigendan in Ministry of Home Affair nuai a Indian special force unit lakah Counter-terrorism lamah siamna nei NSG-te kum 1984 a phuhkhiak hi a, Bangladesh a Dhaka mun ah July 1, 2016 a terrorist attach ah mi 29  si ua, tuanung in India ah terrorist attach apan kivengna dia mun tuamtuam ah security dinmun etkhiakna om hi’n leng taklang uhi.


KIM makaih in draft Bill genkhawm ding
Imphal, Aug-20: Kuki Inpi Manipur (KIM) makaih in Aug 23, 2016  zinglam dak 11:00 in Imphal a Kuki Inn  ah ‘Manipur Regulation of  Non-Local People Bill, 2016’ tawh kisai Consultative Meeting om ding hi. Huai ah KIM nuai a kikhaikhawm constituent body-te, hausate, constitutional expert-te, lawyer-te, intellectual-te telding uh a, draft bill tawh kisai panlak dingdan genkhawm ding uhi.


Rio Olympic hunkhakna om ding
Brazil khawpi Rio de Janeiro a summer Olympics Aug. 5, 2016 akipan Aug. 21, 2016 in hunkhakna Maracana Stadium ah om ding hi. Brazil timing in Aug. 21, 2016 nitak hi a, Indian timings ah bel Aug. 22, 2016 zinglam dak 2:30 in kipan ding hi. Closing ceremony tawh kisai a mipi mai a lahkhiak dingte Brazilian professor of Scenography Rosa Magalhaes in a bawl vek hiding a gen in om a, volunteers 3,000 leh professional actors 200 kihel ding uhi. Closing ceremony ah IOC President Thomas Bach in 2020 Olympic zintun ding Japan ahih tawh kiton in Governor Yuriko Koike kiangah Olympic flag pekhe ding hi.
    Brazil interim President Michel Temer bel opening ceremony a mipi paikhawmten a booed khum ziakun closing ceremony uap lou ding a, damlouhna ziaka opening ceremony uap theilou Brazil football legend Pele in closing ceremony uap ding hi. Closing ceremony a dingin tickets 41,233 zuak khiak a omta hidan in Organising Committee spokesman Mario Andrada in gen a, tamtak zuak khiak hilai dingin leng kigen hi.


TUNI THUPI:
“Huchi’n  amah mahin, a kiang uah, chihtaktakin ka honhilh ahi, hiaia ding a khente  Pathian gam thilhihtheihna tawh hongtung a muh ma un, sihna chiamlou hial ding a om uh, a chi a.” – Marka 9:1


EDITORIAL:
Angmasialna tellou in aw
Manipur state ah tulelin buaina tuamtuam tampi om a, adiakin 3-bill tungtang ah kitheihsiamlouhna liantak om a, bill 3-te  deih leh deihlou kal ah leng kikantuahna lianpi om hi. Outer Manipur Tribal Forum(OMTF), Innpi-te, JAC leh JPO banah civil society tuamtuamte  adingin thil haksapi a om ding chih haihvual hilou a, abikin a makaite ading mahmah inleng khuaksat-huai mahmah ding hi. Huchihlai in Armed Forces Special Power Act(AFSPA) lakkhiak ding phutna a sihtanpha an-ngawl tuma deuh a khawlsan Irom Sharmila tawh kisai case omlai a, JNIMS hospital a etkol ahihna mun apan thubuai tungtangin leng thu tamtak hong dengtou zeldingin kilang hi.
    Manipur gam leh leitang ah ILP zatding deihlouhna ziakin kumlui August 31 in kiphinna thupitak ana om a, misite tuni dong vui hilou a, tua ziakin kumkhat mawngmawng siluang vuilouh a a om pen chiamtehtham thil ‘World Record’ hidingin uphuai zawzen hi. Maban ah bangchibangin ikal suanding ua chih heutute’ adingin khuak sa vitvit kawma ngaihsut hun mahmahta hi. Siluang vuikhiak baih hoihpen hia ahihkeileh i tribal issue uh ahatsemna dia siluang a dinkhawl zek poimawh hia chihkal in gen nei mahmah dingin kilawm a, JAC in leng mipi nautang theiding a a stand point uh asuklat (clear) uh poimawh mahmah hi’n leng theihtheih in om hi.
    Tuni in numei pawlpite makaihin lampi zuihna om a, tua ah sixth schedule tungtang tangkoupihin om hi. Numei pawlin leng a phuttheih uh a phuding uh a, JAC inleng aphuttheihna teng uh a phuding uh a, tribal interest in a kihuailou leh apangkhawm lou ding om khang, himahleh, mimal lungput tuam (private interest) dan in bangmah omkei thei hamham leh chih huai mahmah hi. Private genlouh vested interest tawh kisai a thil hong piangkhia om ngeingei leh huaite doudal tu dingin mi tam law mahmah ahihdan leh theihthak deihhuai mahmah hi.
    Kuapeuhin i theihsa bangun kumnawn 2017 February kha velin Manipur state assembly election om dinga, huai ding tawh kisai leh ikiphinna (protest) uh a kizawitawn khak ngeingei leh huai in bangmahlou hon suah ding ahihdan theihtheih in om hi. MLA/Minister-te tenna inn hunkhop halsiatin om a, government office tuamtuam tamtak halsiat hinawn a, a zangtu kua hihiam chih gen tam ngailou in chiang mahmah hi. Government office hunkhop halsiat a om ziakin kuate koi office ah a kai uh a, kuate’n office bel dingin order a suak a le? Mipi palai teng boycott in om mahleh kuatengin a bial constituency a vehthei ua? Hibang kimawlna in kum bangzah hon daihtou lai dia? A changchiangin mimal kihuatna leh chiamnuih bawlna abat ton leng om mawk hi.
    Thil paidan i et vengveng chiangin, i tribal unity pen MDC/MLA/MP hihsawmte’n hon  tawsawn leh hihbuai khak dinguh kuapeuh adingin pilvanhuai mahmah isa hi. Ahitakin MLA election a nai mahmahta a, Manipur state govt a vaihawmna len lah Congress hi a, BJP in lah masawn zungzung a, bangchidanin Manipur state hong kipei hiam chih theih but hilou a, bangteng hileh sum-le-pai ah heutu hi a koihsate hong kizuak uh deihhuai hetlou hi.
    Galvantawi helpawlte’n anuam-ahaksa bangzahphu uh a, kuateng tawh eite hon khualna ziak ua a zu-aham thuak a kikaptuah uhiam chihte leng ngaihsut poimawh mahmah hi. I lakah siah (tax) nidang hunte in don in om veu a, midang khut ah lut tam law mahmah chih ahi. Kuate hong kipat ziaka hiai teng hong bei ahiding chihte leng mi chihin ngaihsut poimawh mahmah a, Maoists/ Naxalites te’n bangziaka India singtanggam teng humbit sawm ahi ding uh, Muslim helpawl ISIS te’n Abraham khang apan aluahna gamteng uh bangziaka humbit sawm uh ahi ding chihte hisap vengveng poimawh a, MDC/MLA/MP hih ut ahihkeileh politician ginaloute te’ gen dandan maimai a om ding ihiam? Eilawi maban ding theih haksa mahmah in kilanga, mimal angmasialna tellou in panla chiatni maw...!