HEADLINES:
Lamka khawpi a niinte tungtang genkhawm uh
Lamka khawpi a niinte tungtang genkhawm uh
Lamka, Aug-22: ADC/CCpur sik-le-tang in M. Gouzamang Guite, EM, ADC/CCpur in tuni’n New Delhi a Manipur Bhavan/Tikendrajit House ah Sr Executive Environment & Biotech Divn., Excel Industries Ltd. Divendra Singh Soun kimuhpih a, Lamka khawpi a niinte etkai dingdan (solid waste treatment plan) banah Centralized leh De-Centralized Municipal Solid Waste Treatment tawh kisai houlim uhi. Environment & Biotech Division, Excel Industries Ltd. in Lamka khaw mipi’ ading in 20 tons capacity per day Solid Waste Treatment Plan ading project gelh dingin lemsa uh a, Lamka ah Centralized Process of Municipal/Town solid waste treatment poimawh ahihdan mukhia uhi.Huai project chi 3 in kikhen a, muatthei niinte ading Decomposting Plan om ding a, niinte leihoihna/urea suaksak ding hi. Pyrolosis plan ah plastic-te lawi thautui chikhat bawl khiakna ding a zatding dan hiding leh Incinerator plan ah diaper-te,bio-medical waste te, etc. hong process ding hi.
M. Gouzamang Guite in a genna ah India khawpi tuamtuam leh khawvel gam pumpi in a buaipihpen uh niin hi a, huaiziakin gim namsia leh natna hii tuamtuam i gam ah leng thei hi’n gen hi. Ngakik kianga ADC niin buakna leng thou (fly) tamgawp in akim leh kiang a omte’n a complaint ziakin amun kisuankhia hi. I gam ua ding project tuamtuam buaipih mahlehang mipi’ tawh hoihtak a i pankhawm keileh lawhchinglou ding a, kuapeuh in i niinte uh mawk paihthanglou a,a buakna ding mun bawl ban ah khawpi sianthouna ding in kuapeuh in panla chiat leh lawhchinna kichi Pathian apan ahi chih mangngilhlou ding in ngen hi.
Prime Minister in Kashmir a liam-le-baite thuakpih thu puang
Lemna tunding nawn michih mawhpuak ahi : Modi
New Delhi, Aug-22: Prime Minister Narendra Modi in Jammu & Kashmir a ni 45 buaina om hunsunga misite suun kawm in liam-le-baite thuakpihthu tuni’n puang a, lemna leh muanna omtheihna dia panlak ding michih mawhpuak hi’n gen hi. Political party teng in khekhat suankhawm a thubuai sukveng theih dingdan ngaihtuah di’n chial a, buaina aven theihna di’n kihouna(dialogue) poimawh ahihdan leng gen hi.
Jammu & Kashmir opposition party tuamtuam te’n CM-lui Omar Abdullah makaih in New Delhi ah tuni’n Prime Minister kimuhpih uh a, political party teng pangkhawm a state mipite thuzak ding in PM in huai hunah ngen hi. Lemna piching omtheihna di’n Indian Constitution tawn a kihouna a om poimawh chi in, J&K mipi awlmawh a opposition party makaite kalsuanna leng PM in kipahpihthu puang hi.
Omar Abdullah makaih opposition party delegation mi 20te lakah National Conference MLA 7 kihel uh in, Congress party-te J&K Pradesh Congress Chief G A Mir in makaih a, opposition party tuamtuam inleng PM tawh kimuhna ah palai sawl uhi. CPI-M MLA M Y Tarigami in Prime Minister kiangah tuzing in Kashmir phaijang dinmun lauthawn huai ahihdan zasak a, Omar Abdullah inleng meeting zawh in, Prime Minister kiangah political solution ngaihtuah pih dinga ngen uh ahihdan gen hi.
Kashmir buaina ah zan in tear gas ziaka liam, kum 25 mi khat Srinagar ah si nawn a, July 8 a Hizbul Mujahideen commander Burhan Muzaffar Wani kaplup nung in tunitan in mi 68 si uhi. Police-te gendan in Srinagar city sung Fateh Kadal area ah curew puan in om mahleh minautang tamtakin kiphinna nei uh a, amaute hawldalhna ding in security force-te’n tear gas leh pellet gun zang uh chi hi. Srinagar a hospital staff-te gendan in buaina kipatni apan tunitan in Pellet Gun ziakin mi 933-te mit liam a, a tamzawte’ mit mial hi’n gen uhi.
LOCAL NEWS:
Singtangmite pangkhawm din chial
Lamka, Aug-22: JAC against Anti Tribal Bills (JAC-AATB) in tuni’n mipi kiang ah ngetna thusuah abawl in a taklatdan in, singtangmite kipumkhatna ni (August 31) kumkhat chin zatsawm uh a, Aug. 26, 2016 apan tribal martyr’s 9-te zahna tawh tribal movement kipatna Lamka ah week-long kiphinna patsawm uh a, huai hunsung in public meeting, torch rallies, pupa ngeina dan a thaukap (traditional gun salute) telin kiphinna tuamtuam neihsawm uh hi’n taklang hi. JAC in mimal, media house leh pawl tuamtuam in ‘Tribal Unity Day’ zatding tawh kisai a tribal movement gupna leh theihpihtu a pang leh publicity partner a panga “Tribal Unity’ thupi zangin singtangmi tenna teng ah banner leh poster takkhe ding in ngen hi.
Aug. 31, 2015 a State Assembly in singtangmite hihna, gam leitang leh tanvou sukha thei ding 3-Bill a passed ziaka kiphinna a tel salpha 9 in hinna a tan ban ah midang 50 val liam a, tuni tan movement khawl nailou in separate administration ngetna leng paipih den uh hi’n taklang a, maban paiding dan hun lemtang masapen ah suahkhiak hiding in leng taklang hi.
"World Class Computer Studio"
Lamka, Aug-22: Langkhanpau Guite, Chairman, ADC/CCpur in Dorcas Veng a New Lamka Upper Primary School ah Aug 23, 2016 zinglam dak 9:00 in “World Class Computer Studio” kichi hongding a, Chief Host in CT Lian Guite, MDC pang ding hi.
Mipi'n Khuga ring road bawl
Lamka, Aug-22: Saikot A/C leh Singngat A/C in a huamkhak Valpakaot, Khawpuibung, Muolbem, Dumsau, Tuaitengphai, Tuibul, Thenmol, Ngurte, Daijang, Khuangnung leh Tuikham khua kipawlkhawmte’n Khuga ring road Dev Committee kichi kum 2015 in phutkhia uh a, Dominic Amchinpau, Chairman makaih in tuni’n khua 11 pan mipi 500 vel te’n lampi bawl in nasep pan uhi. Hausate leh mipi’ kithawhkhawm sum zang in Valpakot apan Muolbem kikal lampi siatnate bawl in social work uhi.
Dominic in a gendan in khua/veng kichi tui leh lampi anop leh nuam hi a, Khuga ring road leng nek- le-tak puaklutna, student-te lampi leh Life Line hi’n gen hi. Kum 20 val Khuga ring road puahlouh in om a “Forgotten Area” hi’n gen hi. Thangso Baite, Singngat MLA ahihlai kum 2000 in Khopuibung apan Tuaitengphai lutna ding, "Welcome to Tuaitengphai" sign board kitakna mun tan black topping bawl hi a, kum 2015 in 2 vei mipi’n lampi bawl uh a, tuni’n DC/CCpur kiangah Khuga ring road bawlna ding fund guang ding in ngen uhi.
1-Day Legal Awarness omding
Lamka, Aug-22: CCpur United Clubs’ Orgn. (CUCO) saina in B. Vengnuom Community Hall ah Aug 23, 2016 zinglam dak 10:30 in ‘1-Day Legal Awareness Program’ omding a, Chief Guest in James Doujapao Haokip, Jr. MCS, SDO/BDO Tuibong hiding hi. Functional President in S.K. Mangang, President, CUCO, Guests of Honour in Sangremsiama, Jr MCS, BO, DC’s office, S.Thatkhogin Haokip, Chief of B.Vengnuom leh Letkho Kipgen, CJM/CCpur hiding uhi. Huai ah Phulindro Konsam, Human Rights Activist, Margret, Adcovate leh M.Iboyaima, Adviser, MMDC te’n Food Security Act., Right to Education, Protection of Children & Child Labour from Sexual Offecences Act. (POCSO) chih thupi zang in sinsakding uhi.
Evan. leh Missionary-te Seminar neihpih
Lamka, Aug-22: Manipur Presbyterian Synod Church (MPCS) nuai a Presbytery 3 apan Evangelist leh Missionary-te ading in tuni’n IB Road a Lamka Presbyterian Church ah Seminar Retreat 2016 om a, Rev. Vanmawia, Moderator in hong hi. Aman agenna ah MPCS in Presbytery tuamtuam a missioary leh evangelist-te akimeltheih tuah ua hoihtak a sepkhawm tupna kum 2007 apan nei uh a, hiai tungtawn in na tamtak leng sepkhiak in om chi hi. Rev. JF Lalropuia in “Church & its Mission” thupi zangin sinsak a, Rev. Yangkhongam in “Ministry and its Strategies” thupi zang in sinsak a, Tuithaphai Presbytery, Khuga-Sadar Presbytery leh Eastern Manipur Presbytery apan mi 40 val tel uhi.
Disaster Management tawh kisai sinsak
Lamka, Aug-22: Deptt. of Relief & Disaster Management, Govt. of Manipur saina in tuni’n Tuibuong a ADC Conference hall ah MDC leh Council staff-te adi’n kiven leh panlak dingdan sinsakna om a, huai hun Langkhanpau Guite, Chairman ADC/CCpur in hong hi. Training ah ADC Chairman leh Vice Chairman Lal Hossan telin EM leh MDC ban ah council staff hunkhop tel uh a, AK Ranjit Kumar, Documentary cum Research Officer, Relief & Disaster leh Sunil Mayangbam, Asst. Prof, NIT, Manipur te’n sinsak uhi. Chairman in agenna ah khawvel a siatna tungphutte pumpelh theih hilou a, kuaman abawl leng hilou ahihman in huai hun tun chianga pangkhawm a nasep theihna ding tupna a management panlakna chiangzaw sem a theihna ding a training kipahpih a, tamtak in a phattuampih lam-et thu gen hi.
STH tawh kisai training om
Lamka, Aug-22: IB Road a Synod hall ah tuni zinglam in block programme management unit makaih in Samulamlan block leh Sagang area a govt. leh private school a teacher-te’ ban ah ASHA facilitator-te’n soil transmitted helminthes (STH) tawh kisai in training nei uh a, Dr. Baby Lalnuntluangi, MO i/c CHC/Parbung damdawi neksakdan ding sinsak hi. National Deforming Day sepsuahna dana training om hi a, tutan in CCpur leh Henglep te’n neita uhi.
Khanpi khua ah thiltung omlou
Lamka, Aug-22: Satlienthang, Chief of Khanpi akipan thu kizadan in Aug. 21, 2016 a newspaper tuamtuam leh social networking a Khanpi khua (Henglep Sub-Division) ah ZUF helpawl leh Gorkha Regiment te kikaptuah uh chih kisuah tungtang ah Khanpi khua ah hichibang a kikaptuahna omlou hi’n sukdikna thusuah bawl hi.
IMPHAL NEWS:
Recruitment cancel ziak in total bandh
Auto Rickshaw 1 suksiat in om
Imphal, Aug-22: Constable DPC appeared candidate for 2013 te’n tuni a JCILPS meeting ding tawh kisai a bandh a sawm uh tawpkik thak mahle uh Thoubal district a Kakching area ah total bandh om hi’n gen uhi. Kakching area mun tuamtuam ah bandh supporter te’n tuni zingkal in gari paidan subuai uh a, Kakching police te’n mi bangzahhiam mankhia in mi 5 a soisa uh hi’n kigen hi. Bandh supporter-te soisak a om zak phet in nupi kipunkhawm te’n police-te gamtatna mawhpaihna in bandh bawl-te gupthu puang in Kakching lampi ah bench zang in lampi khak uhi. Bandh ziak in Kakching area ah school, college, dukan leh sumsinna inn teng kikhak a, bandh kalh chih ziak in bandh supporter te’n nitaklam dak 3:00 velin Auto rickshaw 1 suksiat sak uh hi’n kigen hi.
Huailou in Manipur Press Club ah tuni a press conference hun ah Constable DPC appeared candidate for 2013 a thupuangtu MD Zahir Khan in Police-te gamtatna ah mi 5 liam tawh kisai in mawhpaihtu puang a, Govt. in dikloutak a vaihawm ding uh hilou a, Cabinet in police recruitment 2013 tawh kisai a thupukna a bawl uh cancel thak ding leh Aug 30, 2016 ni a MPTC Pangei ah recruitment test om ding tawh kisai tawpkik sak ding in ngetna bawl a, huai ahihkeileh Police Constable thak lakna dia process teng subuai ding uh hi’n leng taklang hi.
Keithelmanbi kiangah truck 1 kihal
Imphal, Aug-22: Tuni nitaklam dak 6:00 velin in Dimapur lam akipan chini leh bawngnoi powder pua Imphal zuanlai truck (No. AS03 AC – 0921) Kangpokpi PS huamsung Keithelmanbi cemetery kiangah Constable Recruitment 2013 a blockade bawl pawlin mei in hal uh a, truck engine kangtum vek a, bawngnoi leh chini khenkhat leng kisai chihthu om hi. Huai thu ziak in state pawlam akipan Imphal lam zuan ding gari tengteng khawl vek uh chihthu om hi.
Delhi ah BJP Core team-te zin
Imphal, Aug-22: BJP Manipur Pradesh a Core Committee member te’n New Delhi a NDMC Hall ah Aug 23, 2016 ni a All India Core Committee hun ah tel ding in tuni’n New Delhi zuan in zinkhia uhi. Core Committee member laka tel Samulai Latpam Premananda Sharma in a genna ah Prime Minister N. Modi sapna dungzui a meeting om ding chi a, huai ah BJP Manipur Pradesh-te tawh maban a state assembly election hun ah BJP te’n Chief Ministerial Candidate koih leh koih louh ding tungtang banah Manipur thu tawh kisai kikup khawmna om ding chi’n gen hi.
MDU Hall ah Peoples’ Convention
Imphal, Aug-22: JCILPS saina in tuni’n Yaiskul a MDU Hall ah tuni’n ‘Manipur Regulation of Non-Local People (MRNP) Bill 2016’ ngenteltak a etkikna tawh kisai in Peoples’ Convention om hi’n gen uhi. Huai ah telte’n draft bill ah base year dia kum 1972 pomtheih ahihlouh ziak in base year dia kum 1951 pom ding in thupukna bawl uh a, NRC 1951 record, Census report 1951 leh Electoral roll 1948 & 1952 pansan a base year zat ding chi uh a, Chief Commissioner Himmat Singh in Nov 1950 a Manipur ah entry leh exit system a lak khiak nungin tualsuak mi hilou tamtak Manipur honglut uh hi’n gen uhi. Base year Jan 21, 1972 dungzui a ‘Local People’ tungtang kilemna bawl theilou uh a, himahleh recognised Schedule Tribes, Metei/Meitei Pangal, Meetei/Meitei –te Manipur People chih ding in thupukna bawl uhi. Govt. in draft bill thak MRNP minvuah a sawm un tualsuak mite adia phattuam nang a omlouh ziak in dal uh a, tualsuak miteng thuzak a govt. in kuapeuh pom theih ding bill bawlkhe ding in ngetna bawl uh hi’n kigen hi.
Kwatha ah health camp sai
Imphal, Aug-22: Royal Rider Manipur (RRM)-te Chandel district a Indo-Myanmar gamgi gei a Kwatha village taitung in huai ah free medical camp sai uh hi’n kigen hi. Kwatha village ahihleh Imphal apan km 90 vel a gamla hi a, Imphal mun apan RRM-te zan in kipan khia uh a, tuni a medical camp hun ah doctor 3 in mi 200 val en in manbei in damdawi hawm uhi.
State govt. ah thutawp pia
Imphal, Aug-22: Manipur People’s Party (MPP) Office ah tuni’n press meet om a, huai ah N. Sovakiran, President, MPP in Police Constable lakna dia 2013 DPC-te recruitment cancel tungtang ah state govt. in hilhchetna a bawl keileh Public Interest Litigation (PIL) file khum ding uh chi’n thutawp pia a, multi crore scam ahih ziak a koih dap hilou ding in gen hi. Manipur Governor 18na ding Dr. Najma Heptulla vaidawn banah kipahpih thu gen a, kum 2013 a police constable post 2000 lakna ding in physical test, written test leh viva voice tan in candidate 10,287 paisuak te’n final result ngak lel uh a, recruitment cancel tungtang mipi theih dia hilhchet bawl ahihkeileh PIL file bandh Governor kiangah memorandum pe ding uh hi’n leng taklang hi.
TUNI THUPI:
“Hauhsakna leh pahtawinate na kiang akipan ahi, bangkim tungah thu na nei a, thilhihtheihna na khutah a om a; na khut ah mi tengteng thupina leh hatna piak theihna a om hi.” – I Kronikil 29:12
EDITORIAL:
Leigou hauhsakna leh kikawmna
Imphal Tulihal Airport phakma Malom khua ah thautui kholna munpi om a, huchi kalah tulai in petrol leng omlou chih hi a, omlou taktak hiam chih bel theihbut hilou hi. Imphal area a Oil pumpi-te ah thautui omlou in black in litre ah Rs 150 in kizuak ziahziah hi. Bangziaka thakhathu a thautui bei guih ahi ding chih ngaihtuahna ah om sek a, bandh hiam ahihkeileh economic blockade ding tungtang genkhak ahih chiangin thautui rate leng khang pahpah ahi chihtheih in om hi.
Thautui man a khandan leh a kiamdan tawh kisai taklang mai lehang; atangpi in kha lailak teng hiam ahihkeileh khathak/ khabei kuan nitakin bawl danglam in om sek a, tuape’n oil company te’n theilaw mahmah ua, thautui zuakna munte’n mitgau zenin ensek uh chi lehang genkhial saulua i hikei maithei hi. Manipur in Malom mun a thautui kholkhawmna (Oil storage dingin mun za mahmah nei uh a, huchi kalah, tua thautui bei kichi thil omthei himah hiam chihtheih hi.
Kuapeuh in a theihdia hoih ahihleh Manipur khawpi Imphal ah rail(train) hongtun chiangin Malom a thautui kholkhawmna mun ah thautui kiningching mahmah ding a, economic blockade kha 2/3 om leleng Manipur ah thautui taksap ziakin mipi buai nawnlou ding chih ahi. Thu vantang khat gen zual lehang, Railways tawh kisai in kum 1881 in India malsuahbial(northeast region) ah railway line hong lutta chih hi a,huai British-te’n India hong opkhumlai hun ah hi a, Assam Railways and Trading Company te’n nasep ana pan in Dibru-Sadiya line banah Dibrugarh-Margheritta kal ah train service om a, singpite leh suangmeihol pua in train ana kivialleh hi. Tua train in singpite leh suang meiholte Kolkata ah ana khe ziahziah a, Assam Bengal Railways nasepdan pe’n India malsuahbial adingin mangngilh vual hilou ding chihthu om hi. Train tawh kisai a connectivity om pe’n Tripua state in leng ana hamphatpih mahmah uh a hun sawtlou nungin national railway map ah tuansakin om ngal chih hi.
BJP government in railway services tawh kisai in Bangladesh leh Myanmar gam ah chik chiangin a lutsakzou ding uhiam chihzaw gen ngam naikei hang. Union Railway Minister Suresh Prabhu in tuma a thu honggente a hong tangtung taktak ding leh tu apan kha 5 sungin bel India a train lutkhak louhna munte telin India malsuahbial ah train hong lutsuak vekdingin gintak ahi hi. Railway Ministry in India malsuahbial adingin Imphal, Aizawl leh Shillong khawpi ah train lutsak hiding chi uhi. Railway minister in tua dingin Dhansiri leh Kohima kal a railway track bawlna dingin sum Rs 2.315 crore sanctioned hita chi a, huai Dhansiri-Kohima railway track bel km 88 in sau ding a, project bangkim zawhsiang hita chi uhi.
Jiribam-Tupul-Imphal line chik chiangin hih buchin ahiding a chih i gen ngamkei a, himahleh, mipite’n kipoimawh mahmah ahihdan state leh centre government in thei mahmah dingin gingta hang. Adiakin hiai route tawh kisai in thil chiamtehtak hunkhop om ding a, train taitheihna dingin kawhawm hunkhop khuakin om a, leitung pumpi a train taina dinga lei (bridge) sangpen tanpha tunkhiak hiding chi tel uhi. Mual hunkhop vuhvang hi a, mual leh mual kikal ah rail atai theihna ding lampi khuat hi a, tunnel banah lei tampi bawlin om a, bawl touhzel lai hiding chi uhi.
Manipur state in leigou hauhsakna hunkhop a nei a, huai kalah leilung hauhsakna pawkhe dingin government kiman mahmah danin om zel a, tua in mipite hong pei lung-am ahi chih leng ngaihdan piangthei mawmawk hi. Akoi abang hileh, i leilung hauhsakna leh gou i neihte gamdang ah puakkhiak ahi zongin hauhsa hihna gam leh leitang humbit kisam mahmah hi. I gamsunga gou kiphumgu tuamtuamte khaw hausa kuapeuhin venbit kawmin kikawmna adiak in tele-communication lam pibawl mahmah lehang ut-huai mahmah hi.
SPORTS NEWS:
IOC President in Rio Olympics khak
Kum 4 hal zel a gam tuamtuam akipan kimawlmite kimuhkhawmna Olympic tutung in Brazil khawpi Rio de Janeiro in zintun uhi. Rio Olympic bel August 5-21, 2016 sung neih hi a, tua hunsungin USA te’n medal tam la pen uh a, China te’n nihna luah ding ua gintak himahleh niamkiak in thumna luah uh a, Great Britain te’n mailam nawt in nihna luah uhi. Tuni zingkal baihtak in closing ceremony om a, International Olympic Committee President Thomas Bach in Rio de Janeiro a ni 16 sung a gam 205 akipan kimawlmi 11,000 te’n discipline tuamtuam 42 a kidemna a neih uh khak in 2020 chiang a Japan khawpi Tokyo mun a ding tawh kisai in Tokyo Governor Yuriko Koike kiangah Olympic flag pia hi. Hiai hun Japanese PM Shinzo Abe inleng uap a, Japan in 2020 chianga Olympic zintun a sawmpen lawhchingtak a neih a hihna ding a pan naktak a lak hiding in gen hi.
Closing ceremony parades ah Olympic kipatna mun Greece te’n makai uh a, India-te flag ahihleh wrestling a bronze medal la Sakshi Malik in tawi in makai hi. Hiai hun in Olympic khangthu a khatveina dingin refugee team kihelte program saulou piak in om uh a, amau kideidanna omlou a pangkhawm chiat dingin chial uhi. IOC President Thomas Bach in Rio Olympic lawhchinna ding a volunteer, athlete’s leh Refugee Team tel in panla tengteng kiangah kipahthu gen hi. Aman a genbehna ah, Aug. 5 in Brazil ah guest dan in ka hongpai uh a, tu in lawmta hoihtak a tawh kikhen ding ihi uh a, ka lungsim tawng un ka hon phawk gigeta ding uh, chi hi. Rio Olympic Organising Committee Chairman Carlos Arthur Nezman in, tulaitak in khawvel a mi kipak pen ka hi a, tua ziakin a nuam theipen in lawm ni, chi hial hi.
Rio Olympics, 2016:
FINAL Medal Tally
Country G S B T
1. USA 46 37 38 121
2. Great Britain 27 23 17 67
3. China 26 18 26 70
4. Russia 19 18 19 56
5. Germany 17 10 15 42
6. Japan 12 8 21 41
7. France 10 18 14 42
8. South Korea 09 3 9 21
9. Italy 08 12 8 28
10. Australia 08 11 10 29
11. Netherlands 08 7 4 19
12. Hungary 08 3 4 15
13. Brazil 07 6 6 19
14. Spain 07 4 6 17
15. Kenya 06 6 1 13
16. Jamaica 06 3 2 11
17. Croatia 05 3 2 10
18. Cuba 05 2 4 11
19. New Zealand 04 9 5 19
20. Canada 04 3 15 22
21. Uzbekistan 04 2 7 13
22. Kazakhstan 03 5 9 17
23. Colombia 03 2 3 08
24. Switzerland 03 2 2 07
25. Iran 03 1 4 08
26. Greece 03 1 2 06
27. Argentina 03 1 0 04
28. Denmark 02 6 7 15
29. Sweden 02 6 3 11
30. South Africa 02 6 2 10
31. Ukraine 02 5 4 11
32. Serbia 02 4 2 08
33. Poland 02 3 6 11
34. North Korea 02 3 2 07
35. Belgium 02 2 2 06
36. Thailand 02 2 2 06
37. Slovakia 02 2 0 04
38. Goergia 02 1 4 07
39. Azerbaijan 01 7 10 18
40. Belarus 01 4 4 09
41. Turkey 01 3 4 08
42. Armenia 01 3 0 04
43. Czech Rep. 01 2 7 10
44. Ethiopia 01 2 5 08
45. Slovenia 01 2 1 04
46. Indonesia 01 2 0 03
47. Romania 01 1 3 05
48. Bahrain 01 1 0 02
49. Vietnam 01 1 0 02
50. Chinese Taipei 01 0 2 03
51. Bahamas 01 0 1 02
52. Ind. Oym. Ath. 01 0 1 02
53. Ivory Coast 01 0 1 02
54. Fiji 01 0 0 01
55. Jordan 01 0 0 01
56. Kosovo 01 0 0 01
57. Puerto Rico 01 0 0 01
58. Singapore 01 0 0 01
59. Tajikistan 01 0 0 01
67. India 00 1 1 02
Dipa Karmakar vaidawnna om
India mi Olympic a gymnast a kihel omsun Dipa Karmakar tuni in New Delhi akipan Tripura state tung a, CM Manik Sarkar makaih in Agartala airport ah thupitak a vaidawn in om hi. Hiai hun in mi tamtak paikhawm uh a, Agartala airport akipan City stadium ah reception ceremony om hi. Hiai hun in Dipa Karmakar in mipi paikhawmte mai ah 2018 Asian Games ah gold medal lak teitei hiding in gen a, maban ah tuasang a hahpan zaw ding hidan in gen hi. Tripura CM Manik Sarkar in Dipa Karmakar in medal la kei mahleh medal la tawh kibang a, India mi Olympic gymnast a kihel omsun hi a, tua ziakin kisaktheihpih huai petmah hidan in gen hi. Tripura CM Manik Sarkar in Sports Officer akipan Assistant Director a kaisang sak hidan in gen a, Coach Nandi ahihleh Assistant Director akipan Deputy Director a kaisang sak hidan in gen hi.
Tripura Education Minister Tapan Chakraborty in Dipa Karmakar kipahpihna in Aug. 23, 2016 pen state holiday in puang hi. CM Manik Sarkar in Tripura state akipan Dipa Karmakar tamsem bawlkhiak sawm a panlak hilel, chi hi. Hiai hun ahihleh Agartala Municipal Mayor Prafullajit Sinha, Coach Nandi, Dipa pa Dulal Karmakar, Coach Nandi zi Soma Nandi leh anu Gauri Devi tel in mi poimawh tamtak in uap uhi. Hiai hun in school students 300 ten lam tuamtuam lahkhiakna nei uhi.
PV Sindhu India hongtung
Rio Olympic a silver medal la PV Sindhu leh Coach Pullela Gopichand tuni zingkal in Brazil akipan in India a Hyderabad hongtung uha, Hyderabad mun ah mipi tamtak in ana dawn uhi. PV Sindhu in Badminton singles a silver medal alak tawh kiton in India mi Olympic a silver medal la omsun ahih banah naupang pen leng hi zaw mah hi. Amah bel kum 21 lel hipan hi. Sindhu leh Coach P. Gopichand te bel double decker bus tung ah tuang uh a, mipi tamtak muhtheih ding in om uhi.
Tendulkar in Sindhu kiangah BMW pekhe ding
Olympic a India numei Badminton singles a medal la omsun PV Sindhu kiangah Hyderabad Badminton Assn. President V. Chanundeswaranath in BMW piak a sawm pen Master Blaster Sachin Tendulkar in pekhe ding hidan in kigen hi. V. Chanundeswaranath in tumalam inleng London Olympic a bronze medal la Saina Nehwal kiangah BMW ana pe ngeita hi. 2012 Asian Youth U-19 Championship a PV Sindhu in champion alak lai inleng Tendulkar in Maruti Swift ana pe khinta hi.
1st SIKTUI-VENGNUAM LEAGUE,2016
Aug 22 | Result:
1. EUS 0-1 KHIMKHEM FC
2. KHANGLAI 3 - 1 VKMFT
Aug 23 | Fixture:
1. Milaar Blue FC v Pethuel FC 2:45pm
2. Kanaan YC v Munhoih FC 4:00pm
No comments:
Post a Comment