Manipur Express | August 26, 2016

HEADLINES:
Kashmir milip 95% te’n lemna leh muanna deih uh - CM
HM leh J & K CM in state sung buaina genkhawm
New Delhi, Aug-25: Union Home Minister Rajnath Singh in zan apan Jammu & Kashmir veh in civil, police leh department tuamtuam a official-te banah khawtang makai tuamtuam  telin mi 300 val kimuhpih a, amau teng in lemna deih uh hi’n gen hi. Home Minister in Chief Minister Mehbooba Mufti tawh maban panlak dingdan genkhawm nawn uh a, tuni’n Srinagar ah Press Conference sam uhi. Kashmir mipi 95% te’n lemna leh muanna lunggulh in kihouna tungtawn a buaina hihveng deih uh ahihdan Chief Minister Mehbooba Mufti in huai hunah gen a, huchihlai in hiamgamna deih 5% te ziakin atamzawte deihdan paitheilou chi hi. Security force te’n July 8 a Hizbul Mujahideen commander Burhan Wani akaplup nung un Kashmir phaizang bial ah buaina sousangtak piang a, tunitan in mi 68 a sih banah midang 10,000 val liam uhi.

    Kashmir a mi tamlouchik lungkimlou-te’ ziakin state sung pumpi buai a, lampi diklou a khangthakte pikawi lou ding in Union Home Minister in amaute kiangah ngen hi. Indian Constitution nuaia kihouna tungtawn in Jammu & Kashmir ah lemna om nawn thei ding hi’n leng Home Minister in gen a, tunung sawtlou in All Party Delegation te’n Kashmir mipite haksatna enkhe di’n veh ding uh chi hi. Pellet Gun tawh kisai in Expert Committee te’n hiai galvan ziaka buaina thiltungte suizui uh a, ni 4 sung in centre ah report apiak hun un, J&K a Pellet Gun zat nawnlouh a, thildang a khekkhiak dingdan ngaihtuah ding uh chi hi. Tuabang kalah Press Conference hun in Journalist-te’n Chief Minister Mehbooba Mufti kianga state sung buaina omlai a panla lou hiam chih dotna bawl uh a, dotna dang tamkhop a bawlte  uh CM in dawng theilou in, Conference hun beima in pawtkhiak san chihthu om hi.


Aug 26 akipan Aug 31 tan Tribal movement tawh kisai paiding dan puang
JAC makaih in Aug 31 in Tribal Unity Day zat hiding
Lamka, Aug-25: JAC against Anti Tribal Bill a information & Publicity dept. in tuni a mipi-te theihsakna a bawl dan in Aug 31, 2016 in Manipur singtangmite’n Tribal Unity Day zat dingin puang uhi. Huai tawh kiton in Aug 26, 2016 akipan in Tribal Unity Day zatna ding tawh kisai in kal 1 sung daih ding kiphinna, public meeting, torch rally, traditional gun salute leh Tribal Movement tawh kisai kiphinna tuamtuam kipatkhiakna mun Lamka ah zat ding in puang uhi. Aug 31, 2016 in Manipur singtanggam pumpi ah total shutdown om ding a, zinglam dak 9:00 in traditional gun salute leh dakpi khet ging hiding a, dak 10:00 in District Hospital a Morgue ah Tribal Martyr-te zahna piak hiding hi. Huai zawh zinglam dak 11:00 in Tribal Unity Day hunpi zat kipan ding hi.
    JAC thusuak dungzui in Aug 26 & 27, 2016 zingsang akipan sun dak 12:00 tan total shutdown om ding a, nitak dak 6:30 in singtangmite innteng ah candle lightning om ding chih ahi hi. Huai hunsung in khua leh veng tuamtuam ah sit-in-protest om ding hi. Huailou in Aug 26, 2016 in CCpur District Diesel Auto Owners’ Union-te peaceful rally pai ding uh a, Aug 27, 2016 in Ex-Servicemen, Widows, Senior Citizens leh College Students (Uniform silh in) silent rally pai ding uhi. Aug 28, 2016 (Pathianni) in Biakinn kikhopna ah Tribal Unity leh Tribal Movement adia thumna om ding a, huai zawh nitak in innteng ah candle lightning thuah in singtangmite pu-leh-pa apan aluahna gam-te damna ding in Pathian kiangah innkuan thumna nei ding chih ahi hi. Aug 29 & 30, 2016 in zankim akipan total shutdown kipan ding a, nitak dak 6:30 in singtangmite innteng ah candle lightning om ding hi. Huailou in Aug 29, 2016 zinglam dak 10:00 in numei pawl silent rally pai ding uhi.  Aug 30, 2016 zinglam dak 10:00 in mipi rally pai ding a, nitak dak 6:30 in mipi thumna om ding a, huai zawh in numei pawl Salpha pumbuk akipan torch rally pai ding uhi.


Lions Club makai ding laklutna om
Lamka, Aug-25: Lion M. Gojendro, VDG-II in tuni’n Dist. Council office ah Lions Club of CCpur Greater (Dist. 322-D) ading kum 2016-17 sunga Board of Director-te lalut hi. Aman agenna ah kum 1970 a kiphutkhia  Lions Club of International in environment kepbit ding,  nek ding neiloute piak ding, mitlam buaite panpih ding, tuailaite lampi dika piding leh lai siamsak ding, panpihngai tamtheipen panpih ding chihte tup-le-ngim a telkha hi’n gen hi. Lions Club of CCpur Greater te’n activity aneih hun uah online a report bawl zel dingin theisak a, Board of Director te’n President kithuahpih a, CCpur dist. ah thilhoih leh thupi mipi ading asepkhiat uh lam-et thu gen hi.
    Kum 2016-17 sung adia makai thakte- President Lion Langkhanpau Guite, Secretary- Lion James Seikhogin Doungel, Treasurer- Lion T.Goukhomang, Joint Treasurer- Lion Lal Hossan, 1st Vice President- Lion Dr. T. Hatzaw, 2nd Vice President- Lion T. Thienkhomang Haokip, Chairman Public Relations- Lion Vanmawia, Lion Tamer- Lion Dr. Kim Simte, Tail Twister- Lion Dr. Zuii Hauzel, Chairman Member Extension- Lion N.Lhungdim hi uh a, Board of Director-te Lion SL Thanga, Lion Stephen Chinzathang, Lion TC Tungnung, Lion R.Sanga, Lion Ricky Vanlallawm, Lion M. Gouzamang Guite, Lion Kamsuanlun, Lion H. Mangchinkhup leh Lion Dr. Lachinkhai hi uhi.  Lion H. Subha Singh, Region Chairperson- Region X leh Lion Tejamani K, Zone Chairperson-Zone XXIII in leng huai hun uap uhi.


LOCAL NEWS:
Public Ground puahna nasep pailel
Lamka, Aug-25: NEC tungtawn in Special Contractor Vungkhum Guite @ V. Guite min a Rs.4.8 crores  zangin Lamka Public Ground puahphat lelin om hi. Nasemte’n YPA GHQ hall lam fencing zou uh a, tumlam  fencing bawl uhi. Nasem group 1 in CCpur College lam a VIP Gallery ding bawl uh a,huai ah mi 5000 vel tuthei din kigen a, player-te changing room, office leh toilet ding a, vualphaloute’a dingin ramp tanpha koih hidin kigen hi. Nasemte’n JCB, Tripper ban ah cement leh piaunel helkhawmna machine 2 zang uh a, mi 70 val in sem uhi.


Diesel Auto hihsiat thu ah FIR
Lamka, Aug-25: All Manipur DPC Completed Candidate of Police Constable (Malte 2013) te'n zanhal nitak apan indefinite bandh puang uh a, volunteer te’n zan zinglam in Koite hanmual kiang ah Diesel Auto (No. MN02A-5544) mailam glass ahihsiat thu uah Police te’n tuni’n FIR No. 42 (8) 2016 CCP-PS U/S 341/427/511 IPC registered uhi.


YPA Vangai block hong dingte zinkhia
Lamka, Aug-25: YPA Vangai Block  tung ding thak dingin YPA Gen HQ makaih YPA Lamka leh New Lamka block makaite tuzing ah in Jiribam zin uh a, Pastor D. Kamchinmang, Local Pastor, Hiangtam Lamka EBCC in thumsak a, S. Chinngaihpau, Chairman, CWC YPA Gen HQ in flag-off  hi. Amau Vangai block leh Jiribam unit hong in makai ding leng tel ding uh hi’n kigen hi.


 YVA Leilon block honnna om
Lamka, Aug-25: YVA Gen HQ makaih in tuni’n L. Phaikawt (Leimakhong) community hall ah seminar tawh kithuah YVA Leilon block honna om a, Vungminthang Khaute, President YVA Gen HQ in hong hi. Seminar ah Genneikhup Vaiphei, EM ADC/CCpur in leh Dr. Thathang Vaiphei, Asst. Prof, MU in  thupi tuamtuak zangin sinsak uhi. Leilon block ah  President in Soikawm, Secy- Kamminlal, Vice President-Tualzakap, Asst. Secy-Lunsarael, Fin. Secy- Lemlian, Treasurer -Thanglianmang, Info Secy-Satliansong & Thanglemsang ban ah member in 23 guang uhi. Block nuai ah unit 15 om a, khaw 15 apan hausate tel uhi.


Joint unit freshers meet om ding
Lamka, Aug-25: Khangthah Zuun Pawl (KZP) Unit Joint Freshers Meet Celebration Committee saina in Aug. 27, 2016 sunnung dak 1:00 in Simveng a Simte Inn ah ‘Unit Joint Freshers Meet 3veina nei ding uhi. Huai ah Chief  Guest in Th. Jamchinthang, MDC/Thanlon pang ding a, Guest of Honour in T. Goukhomang, ZEO/CCpur, Functional President in B. Dongzalian Simte, President STC GHQ leh Chief Host in L. Dongchinthang, President SYO GHQ pang ding a Rev. K. Hangnung in Fresher-te thumsak ding hi.


Guite road kibawl enkhe ding
Lamka, Aug-25: Tribal Rights Vigil Manipur Jt HQ, Lamka makaih in All Tribal Women Union leh All Tribal Movement of Lamka makaite’n Aug. 27, 2016 in NH 102-B (Guite Road) kibawl enkhe din kuan ding uh a,  zing dak 5:00 in Dorcas Hall campus ah Tuailai Pro 1432 te’n thumna in khakhe ding uhi.


PCI saptuam in kipahpihna nei ding
Lamka, Aug-25: Presbyterian Church of India, Mizoram Synod, Manipur Area nuai a Panglian Pastor Bial Khristian Khanglai Pawlte’n Aug 26, 2016 sun dak 12:00 nungin Panglian Community Hall ah Class X & XII zouthak student-te kipahpihna program nei ding uhi. Huai ah Rev K. Jama Vaiphei, Bialtu Pastor in Pathiang kiangah  student-te thumsak ding a, Genneikhup, EM; Khatkhotong Baite, President VPC GHQ; Hauminthang Vaiphei, President Zillai, GHQ; Tongthang, Chief of Panglian; TK Hang, Chief of S. Zezaw; Boipu, Chief of B. Tuallian leh Kammuanpau, Chief of MT Geltam te’n uap ding uhi.


Guta te’n Pulsar bike gumang
Lamka, Aug-25: Onkhojang of Happy Valley, Tuibuong in a zatlai Pulsar bike (black) No. (UP15BA-5080), Chasis No. MD2A11CZ9CCC24384, Engine No. DHZCCC23793 guta pawlin Aug 6, 2016 zing baihtak in gumang uhi. Gari’ neitu in Police ah tuni’n report bawl a, Police te’n GD entry bawlnung un zan in FIR No.41 (8) 2016 CCP-PS U/S 379 IPC registered uhi.


SUUNNA:
Lamkhohau@ Hahau (40) s/o (late) Lumkholal of Belam veng, Headquarter tunitak lamin Dist hospital ah sungna in si a, Aug 26, 2016 in HQ veng hanmual ah kivui ding hi.
Chiinngaihlian (28) w/o Kamzadou Langel of Mimbung, Mizoram sinna ziaka Lamka ah ki-ensak ahongkuan tuzing baihtak in damzoulou in si a, College Veng, New Lamka ah a innpi uh pansan in sunnung in YPA hanmual, New Lamka ah kivui hi.


IMPHAL NEWS:
DPC-2013 tawh kisai in hilhchian
Imphal, Aug-25: International Society for Krishna Consciousness (ISKCON) Manipur-te saina in Sangaiprou a Mani Mandir ah tuni’n ISKCON Golden Jubilee leh Janmastami zatna om a, Dy. CM. Gaikhangam, G. Konthoujam, Minister ( Commerce & Industry), A.K. Mirabai, Minister ( Social Welfare) leh official tuamtuam te’n uap uh hi’n kigen hi. Huai hun ah media-te tawh kimuhna a Police Constable recruitment DPC-2013 tawh kisai a dotna Dy. CM in a dawnna ah High Court a complain bawl om a, recruitment process ah nelhsiah theihlouh thil diklouhna muhkhiak hi a,  High Level enquiry report ah diklouhna tamtak muhkhiak banah post lak ding zah sang in khengval a, mi tamluat ziak a recruitment process a thak apat dia govt. in thupukna bawl a, himahleh recruitment process thak hun ah DPC-2013 candidate-te adia kum leh qualification ah relaxation bawl hiding a, PET ding tawh kisai a state wise a ding hunbikhiah suahkhiak hipah ding in gen hi.
    Huailou in Home Dept. in tuni a thusuah a bawlna uah kum 2013 a Police Constable lakna ding tawh kisai in complain om ziakin  High Court in Oct 18, 2015 ni a result puangkhe lou a selection process khawlsak leh ngawhna tungtang ah enquiry pat dia state govt.  theisak a, state govt. in enquiry officer ding in J.C. Ramthanga, IAS, Principal Secretary to Govt. of Manipur guang a, enquiry committee report ah thil diklou tamtak mukhia hi’n gen uhi. Report ah PET a qualified candidate-te mark gelh lut ahihlouh banah disqualified candidate hunkhop leng qualify lak ah tel uhi. Written test hun ah minimum qualifying cut-off mark bangmah omlou a, candidate mark niamtak ‘0’ or ‘2’ mu-te leng a ching om uh a, mark sangtak mu ‘21’ lak mu-te a chinglou om banah candidate-te mark muh zah score sheet ah gelh lut hilou a, candidate khat min a answer script 2 om himahleh handwriting kibang lou leng written test ah ching hi. Candidate te’n mark a muh zah uh khek ahihdan leh PET banah Written test exam result puankhiak theihna dia Proceedings/Tabulation sheet ah DPC member te’n suaikai lou uh a, candidate lak ding zah sang in a leh 5 a candidate tamzaw-te interview ding in ching uh a, ratio bikhiah tawh kituak lou hi’n leng taklang uhi.


Unao get together nei
Imphal, Aug-25: Motbung a Presidency College Jubilee Hall ah tuni’n Thadou Inpi-GHQ saina in ‘Strengthening Relationship’ chih thupi a zang in Unao get together om a, huai ah Non-Naga tribe 6 apan YT James Thadou, President, Thadou Inpi GHQ; Joseph Lalringthanga, President, Hmar Inpui; Thangjamang, Secy., United Zou Organization; D. Angam, President, Gangte Tribe Union; Lalringliana, President, Mizo Peoples Convention, Doukhanmang, Secy., Simte Tribe Council leh Mangchinkhup, Chief Convener, JAC Against Anti Tribal Bill (JAC-AATB) leh mi tuamtuam te’n uap uhi. Chingnu Kipgen, Manching Guite, Hoiching Mante leh Jacob Lallengthanga te’n lasakna nei uh a, huai hun ah non-Naga tribe lakah kitanauna khauhsak sem na ding, kum teng a Unao Get Together saiding, Organisation min dia Unao zat ding leh Paite Tribe Council in kum nawn a Unao Get Together zintun ding banah Inpi level tankia hilou a youth, student leh women level tanpha a Unao Get Together sai ding in thupukna bawl uhi. Huai nung in nam 6 apan palai leh JAC-AATB te’n Unao lakah kituahna leh kitanauna hih hatsemna dia nasem ding in ‘Saba/Sabak’ (kichiamna dia sa tang kizang) in kichiam uh a, ann nekhawm uhi.


Dakkal 48 sung general strike puang
Imphal, Aug-25: State govt. nuai a Home Department in kum 2013 a Police Constable 2000 lakna dia recruitment  thak sai ding thupukna a bawl uh tawh kisai in hilchetna bawl mahle uh All Manipur DPC completed Candidate of Police Constable (Male 2013)  te’n Imphal-Jiri lampi leh Imphal-Dimapur lampi-te ah economic blockade sunzom uh hi’n kigen hi. Blockade ziak in Jiribam gei a Leingang Pokpi area ah Oil tanker telin van tuamtuam pua truck 200 vel koltang uhi. Huailou in zan in Senapati Mini Stadium Ground ah joint meeting om a, huai hun ah parent body phuhkhiak banah maban a panlak ding dan genkhawm uh a, govt. in recruitment a thak a sai dia thupukna a bawl uh doudal ding leh a bulpatna ding in Aug 26, 2016 zankim apan dakkal 48 sung Senapati district ah general strike puang uh a, tuni akipan economic blockade sukkhauh sem hi’n gen uhi. All Senapati District Candidates Parents Body of Manipur Police Constable 2013 Batch te’n September kal masapen a fresh recruitment hun ah DPC appeared candidate apan kuamah tel lou ding in gen uhi.  K. Kabib, IPS, SP/Senapati makaihna a Police te’n Officer-in-Charge office sung ah kiphinna hun ah mi 3 a matkhiak-te uh soisak tungtang mawhpaih thupuang uhi.


VC thak panlak dan kipahpih
Imphal, Aug-25: Manipur University a Vice-Chancellor in-charge thak M. Dhaneshwar Singh in Aug 21, 2016 ni a 2016-17 session kipan pah ding leh infrastructure development tawh kisai mipi theih dia taklat ding a chih tawh kisai KSA te’n phat huai asak dan uh gen uhi. KSA office ah tuni’n press conference om a, huai ah M. Lakhman, President, KSA in MU thuneite’n teaching staff lakna ding tawh kisai in selection process zousiang pah ding uh a, Reservation policy tawh kisai a UGC dan a zuih ding uh chi a, UGC in Central Education Institution (Reservation in Admission) Act 2015 banah kum 2012 a khek dungzui a provision omte Central University teng kiangah zuih dia theisakna a bawl uh hi’n gen hi. Akigendan in Minority Educational Institution huamlou in teaching leh non-teaching staff banah admission tawh kisai a  Reservation policy dungzui in SC te’n 15%, ST te’n 7% leh OBC te’n 27% reservation mu ding uh chih ahi hi.


ATSUM in thutawp pia
Imphal, Aug. 25: ATSUM te’n state govt. in a chiam-te August khasung a supiching ding in thutawp pia uh a, huai ahihkeileh thil hoihlou tung ding hi’n gen uhi. ATSUM te’n thusuah a bawlna uah kum 2012 apan Adhoc teacher-te sepna regularize sak ding phut uh a, June 16, 2016 ni’n Director in July tawp tan a verification process zousiang di’n chiam hi. Assembly secretariat a post 190 lakna ding a ST-backlog-te adia post 43 reserve hi a, kha 2 sung a ST backlogs-te sukdim chiam himahleh huai tawh kisai a notification/advertisement a suahkhiak hun banah board members/recruitment board tawh kihou lemna dungzui a Dept. apan tribal-te appoint/nominate suahkhiak hunta hi’n leng taklang uhi.


Ukhrul ah Chilli festival kipan
Imphal, Aug-25: Ukhrul district a Sirarakhong village ah Sirarakhong Sinao Long-te saina in ni 3 daih ding in tuni’n ‘7th Edition of Hathei Phanit (Chilli Festival)’ kipan a, khawsung a malta chi tuamtuam piangkhia-te mundang ah thehzak leh puangzak ding tupna a sai hi’n gen uhi. Hiai  hun ah Dr. Yaronsho Ngalung, Chairman, Ukhrul Autonomous District Council in Sirarakhong khua ahihleh Imphal apan km 60 vel in gamla a, Tolloi tawn in Mahadeva leh Pfuzero kizopna mun poimawh tak hi a, mipi te’n socio-economy development kia a zang lou ding leh malta tuamtuam om-te puah ding in ngetna bawl hi. Chilli festival ahihleh kum 2010 akipang kizang a, tuni a festival hun ah malta chi tuam dan thei te’n mun tuamtuam apan delh uh a, farmer leh scientist-te adia workshop om ding hi’n leng taklang uhi.


Hand grenade mukhia
Imphal, Aug-25: Imphal West Police Station in a huamkhak sung a om Thangmeiband a THAU Ground ah tuni zinglam dak 11:00 velin veng mipite’n hand grenade 1 mukhia uh hi’n kigen hi. Police-te theihsak dungzui in bomb expert te’n sunnung in grenade vala khia uh a, Lamphel area ah sunnung dak 1:00 vel in susia uhi. Akigendan in grenade muhkhiakna mun ahihleh State Assembly Complex apan meter za bangzah hiam a gamla hi’n gen uhi.


TUNI THUPI:
“Pianken thak, diktatna leh sianthounaa Pathian batpiha siampen silh un.” – Ephesate 4: 24


EDITORIAL:
Maban kalsuanna ding
Thugen thei itam mahmah a, ngaihdan sungkhia theileng i tam mahmah hi. Huchi kawmkalah Sovereignty leh separate administration tungtang ah gentheih ding tamtak omkha dingin gintakhuai hi. Sovereignty tawh kisai ahihleh mahni in i gam kivaihawm ding, zalenna bukim nei bangin ngaihsut theih a, thil thuk mahmah ahihbanah Englishte pau khelzual lehang ‘fundamental differences between unrepresented peoples and States’ himai hi. Zalenna bukim ngah Sovereignty gam a kivaipuakna ding leh state khat apan vaihawmna tuam a state danga kivaipuak ding ‘Separate Administration’ kal leng thu sangtak om hi.
    English te’n ‘Sovereignty’ kichi kammal anei uh a, ahih ziakin bang chibang a kilet hiam chih itheikei a, himahleh, zalenna banah mahni kitoudelh theih dinga lampi sialna chih bangin leng laktheih ding hi. Ei singtangmite’n pate’ gou kiluah sawn in kipai a, huai banah tousa gawh leh adangdang i nei uh a, pupa apan suahtakna chikhat tawh leng teh theihding hi. I nam paidan et in khangthu tawh kisai in tate’n pupa’ gou aluah ding uh chih ahi a, khuk in kha khengthei lou chih hilai hi.
    Centre government makaihin Indo-Naga peace talks neihin om lel hi. Frame work agreement nei mah le uh leng ‘sovereignty’ in bangteng huam ding hiam chih gentanna aneithei kei uh chih kuapeuh theih ding in hoih hi. Nagate bel final stage tungta in ki ngaihsun ua, huai kawmkawm in Government of India in leng Nagate’ tungthu ngaihsun mahmah hi. A ziak bel Westphalian language tawh kisai gen le hang ‘sovereignty’ in gamdang tawh kisai international affairs tanpha genphaban chih hi a, zalentaka mahni kivaihawmna (polarizing perceptions) sukhaban mahmah ding chih ahi.
    August 26, 2016 apan in CCpur pansan a om JAC against Anti- 3 bills pawlin ki phinna patsawm uhi. Singtangmi numei pawlpi te’n New Delhi ah Manipur singtangmite’ adia Sixth Schedule piak ding chih telin demand tuamtuam va bawl ua, JAC in leng Manipur mi ka hinawn kei uh, ki vaihawmna tuam  hon pia un chi’n demand bawl uhi. Thu om dan i theihtheih chiang in Manipur state ah ki khettuamna (polarization) chikhat hong om adiam chihtheih in om a, phetlou in a guk-agal a ki beihna chi khat (cold war) om nawn hiam chihtheih in om hi. Sovereignty kammal leh I gam thiltung ibelh khawmkhawm a hiai pe’n nautang haksatna ahihdan theih poimawh hi. A poimawh penpen bel Economic Sovereignty leh Political Sovereignty chauh ahi hi.
    Manipur Government in 3 bills tungtang ah draft committee te’ thusun hon bawlkhia ua, mipi muhtheih dingin hon lakkhia ua, Innpi makai tuamtuam in genkhawmna nei uhi. Hiai thusun hoihsa leh hoihsa lou kal leng a om tham hi. Himahleh, Draft bill pe’n Manipur state Assembly election 2017 ah bang hongchi ding a chih theihin om hi. UPF/KNO in ataktakin  mahni a kivaihawmtheihna ‘Sovereignty’ a lunggulh mahmah ding uh chih haihvual ahikei a, himahleh, thil hithei dingin igingta kei a, ULFA/ NSCN (IM) thiltup pe’n leng ahi hi. Himahleh, separate administration ahihkeileh Union Territory ading in lampi om thei diam  chih thil paidan apan muhtheih in om hi.
    Sovereignty leh Separate Administration tungtang leng ngaihtuah vengveng poimawh mahmah a, Sovereigty i chih vet leh India khua leh tui apan pawtkhe ni chihna hikha maithei a, Separate Administration demand ibawl vetl eh Manipur state mi ka hikei uh, kivaihawmna tuam (UT/State) hon pevet un chihna leng hi maithei hi. Bangteng hileh i omna gam apan ‘clear cut’ deuhin ngetna (demand) bawl le hang hoih mahmah dingin gintakhuai hi. A ki mawhsa om khang, a paisa pen apaisa hita, maban bangchidan in kal i suantou zel ding ua le?