Manipur Express | August 27, 2016

HEADLINES:
Tuni in sun dak 12.00 tan Total Shutdown om
Diesel Auto Association pawlin Unity rally nei

Lamka, Aug-26: JAC against Anti-Tribal Bills makaih singtangmite’n Aug. 31 apan kiphinna kum 1 ching ding a, huai tawh kiton in tuni’n movement hatsem ding tupna in zing dak 6:00 apan sun dak 12:00 tan total shutdown om  hi.  Huai hunsung in khawpi sunga govt. office, school/college-te, bazaar, dukante kikhak a, veng tuamtuam ah sit-in-protest  om hi. Tuabangkal ah, All CCpur Dist Diesel Auto Owners Assn (ACDDAOA) makaih in khawpi sunga Diesel line tuamtuam in kiphinna danin auto rally nei uh a, huai ah Line Assn 17 akipan Diesel Auto 600 te’n rally nei uhi.  Rally a teldingte Kawnpui  playground a kingak in H. Mangchinkhup, JAC Chief Convenor in thugen a, Lt. Vanlalchulloua, Salvation Army, Thingkangphai Corps in thumsak in Paul Lalchhinhima, Secretary, JAC-AATB in khakhia hi.  Kawnpui- Tedim road- Sielmat leibul ah luttou in Lamka hanmual  tawn in Hiangtam Lamka a PTC GHQ office kianga  suakkhia in Salphate Pumbuk ah  salphate’ zahna  pia uhi.  JAC-AATB thusuak dan in Aug. 27 inleng sun dak 12:00 tan total shutdown om nawn ding a, huai in media house & telecom, electricity, medical emergency, entrance exams (SSC CGL Tier-I), khawmpi ding bikhiahsa banah airport a khak leh pingaite khahkol hiding a, hileleng chetna lai alahtheih uh ngai dingin taklang uhi.

Phaijang helpawl 8 leh govt. in MoU suai akaih uh kum 1 behlap
Manipur Cabinet in University thak bawl khiak lemsa
Imphal, Aug-26: CM Secretariat a Cabinet hall ah tuni nitaklam dak 4:30 akipan CM O. Ibobi makaihna in Cabinet meeting om a, huai ah Manipur a College minthang deuhte kigawmna ding University thak – The Dhanamanjuri university kichi hongkhiat ding in govt. in Assembly session Sept 2, 2016 om hun ah luikhiak ding in Cabinet in thupuk uhi. Cabinet meeting tawh kisai RD & PR Minister M. Okendro in a gennna ah Imphal khawpi sunga College minthang deuh-te DM. College of Science, DM College of Arts,, LMS Law College leh GP Women’s College kikhai khawmna ding Manipur a University khat bawlkhiakna ding, a poimawh bang dan bawl ahih theihna ding in Assembly session ah luikhiak sawm in govt. in panla ahihdan gen hi.
    Dhanamanjuri University kichi National Higher Education Mission a RUSA nuai a bawlkhiak hiding a, huai a ding a poimawh infrastructure bawlkhiakna ding in Rs. 55 crore, sanction ding un cabinet in thupukna bawl hi. Manipur University nuai ah Manipur a general degree leh professional college 87 vel affiliation om chih minister in a genkawm in college om zah a tam luat ziakin Manipur University kia in college om teng hoihtak a enkai zoulou ahihdan gen hi. Huaiziak in Manipur a College omte leh Higher Education dinmun puah hoihna ding in huai university thak kingakna  thamching ahih lamet thu minister in gen a, RUSA thuneite’n huai lem a sak uh leh huai state university ah Dhanamanjuri University of college education leh Hindi training college leng bawlkhiak  hiding chi’n M. Okendro in gen hi.
    Tuni a cabinet meeting in Manipur govt leh phaijang a helpawl 8 kal a peace talk om theihna ding in MoU a suai kikai leng maban kum 1 a hun belap ding in thupuk uh a, govt. tawh Mou a suai kai-te United Revolutionary Front (URF), KYKL (MDF-Athouba leh Achouba) group banah KCP/City Meitei, KCP- Taiban Nganba, UPPK, UTLA(SK Thadou), KCP/Nongdren Khongba leh KCP/NN Nganba hi uhi. MoU tawh kisai in India govt. a Ministry of Home Affairs leng tel chih om hi. Helpawl-te designated camp tuamtuam a om sak banah govt  in amaute khakhat in stipend Rs. 4000 zel pia a, 1st time financial assistance dan in Rs. 2.5. lakh pia uh hi’n kigen hi.
    Tuni a Cabinet Meeting in Manipur state Higher Education Council bawlkhiakna ding in bill leh dan tuamtuam maban a assembly session om hun ah luikhiak sawm chihthu om hi. Huailou in Dept. of personnel nuai a The Manipur Civil Engineering Service (PWD) rules 2016 leh the Manipur Electrical and Mechanical Service (PWD) rule 2016 leng bawlthak (amendment) ding in tuni a cabinet meeting in lemsa uhi.


Manipur ah Rayburn College kia in hamphatpih
Degree student 200 in HPCL Scholarship ngah
Lamka, Aug-26: Hindustan Petroleum Corpn Ltd (HPCL) apan Rayburn College in scholarship angah uh tuni sunnung in Auditorium ah hawmkhia uh a, degree student 200 kiang ah cheque in pia uhi. Huai ah Chief Guest in KS Shetty, Head-Human Resources (Marketing)/HPCL  pang a, Avijit Batacharjee, Sr Regional Manager- Guwahati Retail; PA  Asitkanta Khuntia, Head-Human Resources, East Zone; Nrusingha Charan Dhal, Senior Officer- Human Resources, East zone; H. Lalzirliana, Manager -Ops leh Lalawmpuia Ngaihte, Area Sales Manager- Retail tel uhi.
    Chief Guest in HPCL kichi khawvel pumpi theihphak a minthang ahih dungzui in kumlui sung kia in leng sum pung (net gross) Rs. 3 lakh crores ngah uh a, tuate zangin innkuan niamchik a laisimte  scholarship pia  uh hi’n gen hi. India gam state tuamtuam a college 250 val in scholarship ngah uh hi’n gen a, student te'n degree zawhnung in bang lampi zuihsawm uh hiam chi’n dotna bawl hi. College hoih a kaitheihna di’n tuchiangin 60 % marks tan ngai ahihman in, student te’n discipline vision hoih neikawm a laisim dingin hasuan hi. HPCL in maban ah leng Rayburn college  ah scholarship pelai ding uh a, pass 100%  ngahzou a om leh Library leng bawlsak dingin chiam hi. Manipur  a Rayburn college kia in scholarship hamphatpih a, kumlui in student 73 piak hi uh a, tukum in degree student 45-49 % ngah student 14 kiang ah Rs. 4800/-, 50-64 %  ngah student 134  kiang ah Rs. 5300/- leh 65-84 % ngah student 52 kiang ah Rs. 5900/- pia uh a, 85-100 %  ngahte kiang ah Rs. 6500/- piak ding chih himahleh a ngah omlou hi. HPCL scholarship hamphatpihsa student 2 Langsuanmung leh Nianglunching te’n testimony gen uh a, cultural show lahna leng om hi.


LOCAL NEWS:
CEO makaih in Election thu meeting
Lamka, Aug-26: Vivek Kumar Dewangan, Chief Electoral Officer (CEO), Manipur leh LM Khaute, IPS, DGP & State Police Nodal Officer in tuni zinglam in Lamka hongpha uh a, DC’s office chamber ah DC/CCpur makaih in SDO/AERO-te, Nodal Officer-te, SP/CCpur, SVEEP Core Committee banah Election Deptt te tawh meeting nei uhi. Huai ah National Electoral Roll Purification, Dist. Election Management Plan, Systematic Voters’ Education and Electoral Participation leh Security management tawh kisai genkhawm uhi. CEO in CCpur dist. ah  MLA election tawh kisai kisakkholhna khenkhat dotna bawl a, DC leh SDO/AERO-te’n dawnna pia uh a, sunnung in CEO leh State Police Nodal Officer kiknawn uhi.


ZSF GHQ makaite Thanlon bial ah
Lamka, Aug-26: Zomi Students’ Federation (ZSF) GHQ makaite Thanlon Sub-Divn huapsunga ZEO leh ADC nuai a school omte enkhe dingin tuni sunuung in kipankhia uh a, T. Goukhomang, ZEO/CCpur in khakhia hi. ZSF makaite ahihleh President Vanlallian Khaute makaih in member 8 hi uhi.


YPA Vangai Block hongkhia
Lamka, Aug-26: Tuni zingsang in Paukhanmawi Guite, CEC Vice Chairman, YPA GHQ in Buangmun khua ah YPA Vangai Block hongkhia hi. Tunitakin kum 2016-2018 sung YPA Vangai Block makai ding election nei uh a, President in G. Thongkhanpau telching uhi. Secretary-P. Chinthianmuang, Finance Secy- Goulalmuan Guite, Treasurer- G.Thangkhanlal hi uhi. Vice President, Asst Secy leh adang mun (post) awng (vacant) te telching thak te’n Sept. 2016 khasung a guanfel din mohpuakna pia uh a, election neihzawh in makai telching thak teng tawh maban pai dingdan genkhawm uhi.


57/Henglep A/C Workers Meet om
Lamka, Aug-26: Synod hall ah tuni’n BJP Manipur Pradesh a permanent invitee leh executive member thak Thangzalam Haokip, Ex- Dy. Speaker kipahpihna leh 57/Henglep A/C Workers Meet om a, Upa Dr. LS Gangte in Thangzalam Haokip thumsak hi. Thangzalam in maban  assembly election ah BJP  lawhching ding ahihdan gen in gam leh nam bawlna dingin pankhawm poimawh chi hi.  Huai hun ah Henglep A/C sunga hausa bangzah hiam telin mi tamtak paikhawm uhi.


Aug 31 tan kikhak ding
Lamka, Aug-26: Kim Joe Gas service Aug 31, 2016 tan kikhak ding a, Sept 1, 2016 in kihong nawn ding hi. A kikhak sung consumer te’n theisiam ding in ngen uhi.


Anngawl thumna nei uh
Lamka, Aug-26: Baptist Dorcas fellowship, Lamka South Division makaih in tuni’n EBCC V. Munhoih ah ‘Anngawl Thumna’ om a, Rev. V. Nenglian, Divisional Supdt., LSD in hongkhia a, mi 200 val paikhawm uhi.  Huai hun ah All Tribal Women Union, JAC-AATB, ATML leh MTFD-te a ding ban ah gam leh nam adi’n thum uhi.


Dist. Level Sc. Seminar neih ding kisuan
Lamka, Aug-26: ZEO/CCpur nuai a Science Superviser saina in Aug 30, 2016 zinglam dak 10:00 in Synod Hall, IB Road ah “Pulses for Sustainable Food Security, Prospect & Challenges” chih thupi zang in 38th Dist. Level Science Semimar omding chih himahleh bandh om ziak in Sept. 5, 2016 aneih ding in ani kisuan (postponed) hi.


1-Day Legal Awareness Programme
Lamka, Aug-26: CCpur United Clubs’ Orgn.(CUCO) saina in Aug 27, 2016 zinglam dak 10:30 in Thingkangphai Community Hall ah ‘1-Day Legal Awareness Programme’ om ding a,Chief Guest in Chinkhanniang, Chief of Thingkangphai panding hi. Functional President in S.K. Mangang, President, CUCO leh Guest of Honour in Ching Khan Mang, Headmistess Thingkangphai JB school leh L.Tiken Singh, Gen, Secy. MYO/CCpur pang ding uhi.
    Phulindro Konsam, Human Rights Activist, M. Iboyaima, Advisor, MMDC leh Urmila Devi, Advocate te resource person a pangin Food Security Act (PDS), Right to Education leh Protection of Children & Child Labour from Sexual Offence (POCSO) Act tawh kisai sinsak  ding uhi.


Tribal martyr-te lem tak
Lamka,  Aug-26: ATML te'n in tunitak in khawpi sung mun tuamtuam ah tribal martyr-te lem tuanna banner tak uhi. ATML pawlin New Lamka a Petrol Pump kiang telin Hospital campus ah 2, police station ah 1, Lailam lei (bridge) ah 2 leh Lanva lei (bridge) ah 1 telin banner 7 tak uhi. Tribal movement kumkhat ching ding ahih tawh kiton a tribal unity om ding deihna leh movement pailel ah tribal-te lungsim thathawh sakna ding tupna  hidan in ATML pawlin gen uhi.


Maj. Gen. SS Mishra in Lamka hongpha
Lamka, Aug-26: Major General SS Mishra, VSM GOC 57 Mtn. Division in tuni in Army HQ Leimakhong akipan in helicopter zang in 27 Sector, Assam Rifles HQ, Tuibuong, hongpha a, tua hun in Conference Hall ah Inpui/Council makaite banah Anti-tribal bills 3 tawh kisai a movement pailel a JACAATB makaite kimuhpih hi. Hiai hun in Chairman ADCC; District Officers leh dan leh thupiak enkawl police te leng kihel uhi. Maj. Gen. in CCpur Dist. a Army recruitment neih hiding in gen hi.


IMPHAL NEWS:
Student te’n mawhpaihna in rally nei
Imphal, Aug-26: DESAM nuai a student tuamtuam te’n Thoubal District HQ ah Manipur a bandh, blockade, strike leh kiphinna tuamtuam mawhpaihna in rally pai uhi. Huai hun ah volunteer te’n bandh leh blockade banah kiphinna tuamtuam in school leh college paidan subuai a, Manipur ah student te’n education lam ah sinsakna hoihtak a muh louh ziak un  state dang a student-te phakna ding omlou a, DESAM te’n leng bandh leh blockade bawl-te tungah PIL khelut ding uh ahih dan taklang uhi. DESAM te’n kiphinna tuamtuam bawl hun ah education institution-te khahkol ding in ngen uh a, state govt. in buaina om louhna dingin a kinthei pen a anti-bandh bill ahihkeileh anti-bandh regulation bawlkhe dingin ngetna bawl uh hi’n leng kigen hi.


Helpawl hunkhop taikhia
Imphal, Aug-26: Manipur govt. in helpawl tuamtuam tawh kilemna a bawl nung un thuchiam hunkhop sukpichin louh ziakin helpawl hunkhop taikhia uh hi’n gen uhi. Hiai thu tawh kisai a Kaji Umar, ex-Chairman, PULF in agendan in kum 2011 akipan tunitan in helpawl tuamtuam apan cadre 493 te’n galvan koih khia uh a, govt. lam apan thil chiam tawh kisai in meeting tuamtuam nei uh hi’n gen hi. Aman agenzelna ah state govt. in kha teng in stipend dan in Rs. 4000 leh khawtang ah kum 3 sung omte a dia fixed deposit account Rs. 3.5 lakh hong khiak sak ding banah leh sepna piak ding chiam uh a, himahleh state govt. lam apan thil chiam-te sepsuah bangmah om lou hi’n gen hi.


Court in ni 15 om di’n thutan khum
Imphal, Aug-26: Imphal West a Chief Judicial Magistrate in JCILPS a Convenor-lui Kh. Ratan ni 9 sung police custody ah a om nung in tuni’n ni 15 sung police custody ah om ding in thutan khum uh hi’n kigen hi.  Akigendan in Kh. Ratan ahihleh Aug 17, 2016 nitak dak 11:00 velin Keishampat a relay hunger strike hun ah matkhiak hi a, Manipur high Court a divisional bench Justice N. Koteswar leh Justice Kh. Nobin Singh te’n Kh. Ratan tungtang tawh kisai a case ngaih khiak hunah ‘Wanted tag’ puang theihna dia dan tuamtuam-te zui dingin Police Dept. theisak uhi. Court in Kh. Ratan ngetna dungzui in ‘Wanted’ banah ‘absconding’ ahih louh dan tanglang hi’n leng gen uhi.


TSA-GHQ te’n general strike gum
Imphal, Aug-26: TSA-GHQ te’n state cabinet in kum 2013 a Police Constable post 2000 lakna ding tawh kisai a recruitment process a thak apat dia thupukna a bawl uh zukkik ding a phutna in All Manipur DPC completed Candidate of Police Constable (Male 2013) te’n Senapati district ah Aug 26, 2016 zankim apan dakkal 48 sung general strike a puang uh gupthu puang uh hi’n kigen hi. Lamminlun Singsit, President in state govt. in kum 2013 a police constable candidate-te maban ding bang mahlou suah uh a,  state govt. in a kinthei pen a thubuai suveng ding a ngetna bawl hi’n gen uhi.


Khamtheih puakna ah kigolh khalou
Imphal, Aug-26: Manipur Golden Travels (MGT) neitu Kulwant Sing Cheema in tuni a media-te tawh kimuhna hun ah helpawl khenkhat te’n khamtheih puakna tawh kisai a MGT-te kigolh hidan a ngawhna a bawl utawh kisai in nial a, Manipur sung leh pawlam ah khamtheih puakna tawh kisai a kigolh khakna neilou ahihbanah gawtna tuak dia mansa hi’n gen a, a tung uah ngawhna pansan bei leh thu diklou hi’n gen hi. Aman a genzelna ah MSRTC te’n kum 1952 a service a pat ma un MGT te’n kum 1950 in service pan uh a, khamtheihlam ah gamsung siatna dia panla kha lou ahihdan banah amah tungah ngawhna thudik ahih leh gawtna tuamtuam tuak dia mansa hi’n taklang hi.


PDS tawh kisai ngawhna bawl
Imphal, Aug-26: Keishamthong A/C sung a IMC Mayor banah Ward No. 9 a Councilor Sunil Singh in tuni a media-te tawh kimuhna hun ah PDS tawh kisai a local MLA L. Ibomcha in van tuamtuam hawmkhiak hun ah kha bangzah hiam sung lel diah ding hawmkhia hi’n gen uhi.
    Hiai thu tawh kisai in IMC Mayor office a Keishamthong A/C sung a Councilor 4 te’n press conference sai uh a, huai hunah Sunil in February leh March kha adia BPL leh AAY banah kum 4 sung daih dia APL quota tawh kisai in dotna bawl a, BPL adia 578.58 quintal/month, AAY a dia 304.85 quintal/month leh APL a dia 222 quintal/month hi a, Keishamthong A/C sung a mipi te’n chini 120 quital/month a muhlouh utawh kisai in dotna bawl uh hi’n kigen hi.


Candidate te’n meeting nei ding
Imphal, Aug-26: Chandel Indoor stadium ah All Manipur DPC completed Candidate of Police Constable (Male 2013) a candidate leh guardian te’n Aug 27, 2016 in joint meeting nei ding uh hi’n kigen hi. MK. Ramjanglen, President, JAC in tuni a thusuah a bawlna ah Aug 27, 2016 zinglam dak 11:00 in meeting om ding a, huai ah indefinite bandh in Medical leh Electricity huam khalou ding a, joint meeting hun ah bandh khahkol ding himahleh meeting zawh nung a bandh kipan nawn ding hi’n taklang hi.


TUNI THUPI:
“Sunglam a mihingte’ lungtang a kipan in ngaihtuahna gilou bang a hongpawt nak hi” – Marka 7:21


EDITORIAL:
Secret Open:
JAC adin ngaihtuahna piak hun
Manipur Assembly session ah singtangmite’ adia ngaihdah huaitawp chihtheih bill 3 a passed ziakun singtangmite’n gam-le-nam khual salpha 9te hinna kichan hi.Tutan siluang 9te vuikhiak theihlouh khop in om a, poi petmah in kuapeuhin i suun chiat lam-en hang. August 31, 2016 chiangin salpha 9-te sih nung kumkhat ching ding hi. JAC against Anti-Tribal bills te’n siluang 9-te suunna leh zahna kawmin Aug 31, 2016  ni ‘Tribal Unity Day (Singtangmite’ kigawm/kipumkhatna Ni) chih minvuah in kal 1 sung hun zatdan ding puang uh a, huai ahiding mah chihtheih hi. Tribal Unity Day kichi zat ding ahihdan JAC in a puankhiak hun ah ni tamkuamtak paita a, Newspaper ah leng kisuahmunta ahihman in kuapeuh in huai hun zat ding thu mangngilh ding un gintak huailou hi.
Himahleh JAC-AATB in ni 1/2 bek mipi theihsakna leh hilhkholhna omlou in thakhat thu a ‘Total Shutdown’ hong puan-guih mawk uh thil kilawm ahi diam? Aug 26, 2016 akipan Total Shutdown om ding thu mipi tamzaw in a theihkholh hetlouh ziakin buaina(chaos) leh thiltung pumpelh theih ding hizenpi  a tung(incident)  om kiza zekzek mawk hi. Adiakin document a omthei Newspaper-te ah leng tuni issue a kisuahkhiakna masa hipan chihtheih hi. I theihsa bangin Manipur ah puankholhlouh bandh/general strike om guihguih sek a, zingthawh huna bandh om chih ahihmawk ziakin khualzin khe dinga kisakholsa buaizak, bandh/general strike omguih hoihsalou, kilawm salou in genkhop i phasak uhi. Zan(Aug 26) a Total Shutdown leng  huai tawh kilamdanna a omlouh ziakin mi tamtakin pichinhuailou leh  chin dia hoihlou sakthu gen vengvung uh a,theihkholhlouh ziaka a thuakkhak(victim) bangzahhiam omkhate adin puaknat huai in lungsim nasak mahmah ding hi’n kilang hi.
Manipur singtangmi tamzaw in Bill 3te  deihlou chih i haihkei a, govt in bill thak ‘the Manipur Regulation of non-Local People bill ,2016’kichi  Assembly a pass dingin ‘draft bill’  a bawl uh state govt in velkhawm lai uhi. MTFD in leng bill thakin omzia neilou ahih taklang khin uh a, singtangmite’ lakah huai bill thak a kipahpih om ding in gintak huai tuanlou mah hi. Ahi a, hiai bill thak tawh kisai a kiphinna i neih uleh maban panlakdan  ding pen ngaihtuah taktak hun hi. Kiphinna (agitation) tawh kisai leng policy, plan leh program bangchidan in i nei a chih ngaihsut-huai hi. Zan in zingchiang a bandh/total shutdown om ding chih puanphut pen naupanhuai deuh bang in kilang a, thamlou in mipi’ adingin buaina liantak tunzaw bangin kilang hi. Zan mah in News ah India a mi hausate’ tanchin i taklang a, tua lakah i economy dinmun leng i gen a, a taktakin India ah mi hausa sangin mizawng tamzaw i hihdan uh i taklat utziak ahi hi.
Niteng a nektawm zonga kipei bazar kai numeite hehpihhuai mahmah a, a thilzuak ding uh meh ding chi tuamtuamte hun sawtlou sungin vul mansek a, bandh leh strike ineih dek chiangin media tungtawn in emergency lua ahihkei nak leh ni 2/3 advance in theihsakna bawl lebang achi dia? Huai kawm in ‘tribal unity’ chih thupi i zat ding ziakin koi bialteng ah bandh leh strike i bawl zou a le chih bangin leng mi tamtak ngaihtuahna honvut zou mahmah hi.
Gim-le-tawl khawksalou a panla JAC-AATB makaite phatthamching ahi uh a, himahleh  agitation i neihdan uh a gelthak uh deihhuai hi. Bill 3 te’ ziakin student bangzahte’ academic career ah bangzahta manna a tunhiam, naupangte’ tuition fee off om tuanlou a, teacher te’n  lawh a muh ding zah mah  uh mu uh a, school te’n asum muh ding uh a pangngai mah in mu uhi. Leitung pumpi in education tawh kisai buaipih mahmah ua, India in leng naupangte’ school kaitheih ding buaipih in plan leh policy tuamtuam neih behbeh uhi.
    Siamsinna (education) lama kitaitehna sang mahmah a, technology ah leng ki-elna nasa mahmah hi. UPSC nuai a sepna tuamtuam ngah zoukei mahlehang, MPSC pen ikinepna suak hi. MPSC examna tungtawnin tamtakin MCS/MPS/MFS leh adangdang ngah theilehang  chihhuai mahmah hi.Huchi kalah  siamsinna hihbuai theiding in bandh leh adangdang bawlkei thei lehang gam-le-nam bawltu leng suakding hihang. Student te’ lungtang leh ngaihtuahna subuai zaw ihih khak ding lauhuai mahmah a, amaute tunung chianga i nam kingakna hong hih hun uh om ding chih achiangsa ahi hi. 
    Bazar nupite hihbuaitu, school naupangte hih buaitu ahihkeileh ei-le-ei kihih buaitu bandh/strike/ total shutdown chihte ching tamkei lehang chih ut-huai a, plan leh policy tuamtuam bawlte’ tungah mei-am hong kilehbut thei ahi chih leng ngaihtuah poimawh hi. Huai kawm in 3-bills tawh kisai a kibawl khia JAC-AATB makaite’n leng ngaihtuahna thukzaw a piak uh poimawh isa hi. Hotel houlimna banah a bengvak mipi houlimna leng ngaihsut hoih ding hi. Tribal Unity paizel henla, Lamka khawpi kia hilou in singtangmite’ kipumkhatna in gamteng huam leh i chilai hi.