Manipur Express | August 28, 2016

HEADLINES:
Tribal Unity Day zatna ding tawh kisai programme paitou zel
Ex-Servicemen, Widows leh Senior Citizen-te’ Rally pai

Lamka, Aug-27: JAC against Anti-Tribal Bills(JAC-AATB)  makaihna in Bill 3te ziaka singtangmite kiphinna kum 1 chinna, Salpha 9te sih champha banah Tribal Unity Day a manpha theipen a zatsawm in Aug 31 tan daih ding week-long protest pailel hi. Tuni’n Ex-Servicemen, meithai leh senior citizen kigawm mi 200 valte’n kiphinna danin khawpi sungah Rally pai uhi. Amau CCpur College apan Ricky Vanlallawm Guite, Principal, CCpur Govt. College in thumna in khakhia a, rally a paite’n banner ah ‘Total Separation from Manipur, the only Solution’ chih gelh in placard tuamtuam tawikawm in Tipaimukh Road -Red Cross Road -Tedim Road-Lamka Police Station-Tipaimukh Road zuitou in  Salphate Pumpuk ah zou uhi. Huai ah JAC makaih in sit-in-protest neite’n ana vaidawn uh a,  mi tuamtuam in thu gen uhi.  Huchikal ah veng tuamtuam ah leng amau lemtandan chiat in kiphinna danin dharna tu uhi.

US in kihouna tungtawn a lemna zong di’n chial
New Delhi/Washington, Aug-27: United States tawh gamdangte kizopna enkaitu, US State Department in Pakistan leh India kala lemna omlou hi a taklang kawm in kihouna tungtawn a lemna zong di’n gamnih makaite kiangah chialna bawl hi. US State Department thusuakin agendan in July 2016 apan Kashmir thubuai ziakin Pakistan leh India kalah kingawhtuahna piang in buaina sousang sem a, Kashmir tungthu ah US in guptuam neikei mahleh lemna a om ding deih hi’n taklang hi. India leh Pakistan official-te’n lemna omsak thei ding hilou kampau kilawmlou a zat-te uh tawpsan di’n US State Department in ngetna bawl a, tuabang kampaute ziakin buaina thupizaw piang thei gige chi hi. US in gamtuam tuam ah terrorism doudal di’n UN in a theihpih gamte kithuahpih a, terrorism tawh kizopna neiteng hih manthat ding US leh United Nations deihdan hi’n leng taklang hi.
    United Nations in Kashmir buaina a ngaihtuah theihna di’n Pakistan Prime Minister Nawaz Sharif in tuni’n special envoy 22  guang a, India solkal leh minister tuamtuam te’n mawhpaih in pomlou uhi. Minister of State for External Afairs MJ Akbar in huai tawh kisai agendan in Kashmir pen India gamsung a om ahihdungzui in international issue hilou a, United Nations a puaklut poimawhlou chi hi. Kashmir thubuai hihvengna di’n Pakistan leh India kalah kihouna(bilateral talk) om hileh thubuai saifel theih ding hi’n leng gen hi.
    Kashmir buaina ah ni 49 tan in misi 69  tungtou a, mipi sousan theihna dia tokthou-tu local leader 400 val mat di’n Central agency te’n zong lel uhi. Intelligence official-te gendan in buaina tawh kisai a mat dia chiamteh a omte lakah  Hizbul Mujahideen over-ground leh terrorist member tamkhop telkha uh a, local police tawh pangkhawm in central agency-te’n Srinagar leh mun tuamtuam ah zonglel uhi.


Guite Road lampi bawlna enkhia
Lamka, Aug-27: Tribal Rights Vigil, Manipur Jt Hqtr makaihna in ATWU, ATML leh media- te kithuah in tuni’n Guite Road kibawl enkhia uhi. Amau zing dak 5:30 in Tuailai1434Pro apan Rev Pumsuanmung Naulak in Dorcas Hall kongah thumna tawh  khakhia hi. Singngat-Mualnuam kikal km 34.5 akipan km 103.1 kikal etkhia uh a, nasem a om Bharti Infra akipan Tiken, Project Manager leh Ramesh Sharma, Site Engineer ten  kithuahpih uhi. Amau gendan in lampi sukmaina (levelling) kipanta a, target distance sunga km 10 vel Tuima-Thuangtam kikal zou nailou uh a, mundang bel zouta uh a, lampi nuamtuam mahmah hi’n gen uhi.
    Lampi etkheten levelling portion pen nuamsawt mahmah a, himahleh suang kizangte duhthusam chinglou ahihdan gen in Project Manager leh Site Engineer kiangah nasepsate enkik din theisak uhi. Lampi a proposed specification –typical cross section (TCS) pansan a etkhiak hi a, official report leh akimzaw suahkhiak pah hiding chi’n lampi enkhe ten gen uhi.


LOCAL NEWS:
Mary Kom in Pine Apple festival hong
Lamka, Aug-27: Olympic Medalist banah Rajya Sabha a MP Mary Kom in tuni’n Khousabung DCC Headquarter ah ‘The 9th State Level Pineapple Festival’ hong a, hiai hun ah Langkhanpau Guite, ADC/CCpur; T. Pamei, IAS, Commissioner, Horticulture and SC/TD; Genneikhup Vaiphei, EM, ADC/CCpur leh Lunminthang Haokip, IAS, DC/CCpur te’n uap uhi. Huai ah Mary Kom in politics lam a lut ding ngaihtuah in neilou a, MP ahih tawh kiton in kimawlmite adia hahtak a pang ding hidan in gen a, pineapple ching tuten  tam semna dia Organizing Committee te’n panla ding in ngen hi.


Swachh Bharat rally flag-off ding
Lamka, Aug-27:India govt nuaia  Ministry of Drinking Water & Sanitation saina nuai ah  Dist. Admn leh EE, PHED/CCpur Divn.makaihna in Aug 29, 2016 sunnung dak 1:00 in Zenhang Lamka a Bijang Loubuk govt Jr. H/S akipan Tuibuong Peace Ground tan  ‘Freedom from Open Defecation’ chih thupi zangin Special campaign of Swachh Bharat rally om ding hi. Huai DC/CCpur in flag-off ding a, school tuamtuam akipan student 300 vel telding uh hi’n kigen hi.


VPC Gen HQ zatding Computer pia
Lamka, Aug-27: Henlianthang Thanglet, incharge CEO/CCpur in Vaiphei Peoples Council Gen HQ office a zatding computer set 1 leh table   leisak a, tuni sunnung in  Bethel Veng a VPC GHQ office ah piakkhiakna leh Pathian kianga latna om a, huai ah VPC GHQ makaite tel uhi. Henlianthanmg Thanglet in a gendan in tulai in computer poimawhna lian mahmah a, huai  awlmawhna ziaka thawh (donate) hi’n gen hi. Azi in VPC GHQ President Khatkhotong Baite’ khut ah pekhia a, Rev. H. Robert Vaiphei, Missions Director, EOC in Pathian kiangah lan hi.


KZP Joint Freshers meet om
Lamka, Aug-27: KZP Jt Fresher’s Meet Celebration Comm makaih in tuni’n Rayburn College, VK Tawna College, Don Bosco Hr. Sec School leh CCpur College a kaithakte kipahpihna in Simveng a Simte Inn ah Joint Freshers Meet  3veina nei uhi. Chief Guest in Th. Jamchinthang, MDC/Thanlon pang a, Functional President in B. Dongzalian Simte, President, Simte Tribe Council leh Chief Host in L. Dongchinthang, President, Simte Youth Org GHQ  pang hi.
    College 4 a freshers 96 omte Rev. K. Hangnung, Executive Secy, NTBCA in hasotna thugen in thumsak hi. H. Zamgamsiam, Information Secy in fresher-te mellahna nei in fresher-te’n self introduction leh  aim in life gen uhi.


STC/BSF ah attestation parade
Lamka, Aug-27: STC/BSF Mualkoi a constable (Tradesman) batch No.227 &228  taining te’n zou uh a, Aug 29, 2016 zing dak 8:00 akipan attestation (passing out) parade nei ding uh a, UC Hazarika, Dy. Inspector General (DIG) khuallian a pang in training zouthakte akipan salute l ading hi.


CCpur College Branch Freshers meet
Lamka, Aug-27: SSPP CCpur College Branch in tuni’n College campus ah Fresher’s Social Meet nei uh a, Chief Guest in V. Hangkhanlian, ex-Minister pang a, Guest of Honour in T. Paukhanlian, MDC( Ngazam) pang a, Functional President in Lianzapau Samte, President, SSPP Gen HQ  pang uhi. 
Chief Guest in kitaitehna sang mahmah ahihman in laizil hingal a sim taktakloute a dingin  lawhchin haksa a, kuhkal taka pangchiat din student-te hasuan hi. SSPP member 200 val  om uh a, Pastor D. Kamchinmang, Local Pastor, EBCC/Hiangtam Lamka in hasotna thu gen in thumsak hi.


NDAL ah Gun Licence data entry ngai
Lamka, Aug-27: Ministry of Home Affairs thusuak bang in National Database of Arms Licence (NDAL) Portal Generation of Unique Identifcation No. ading in DC office ah CCpur dist.a licence nei thaute data entry omlel a, April 1, 2016 tana licence nei thauteng data entry bawl ngai hi. April 1, 2016 ma a licences issued teng Aug 30, 2016 tan in DC office a pelut ding leh thuthak om masiah NDAL a data upload zawh masiah fresh gun licence, retainership, duplicate  issue hilou din Dist. Magistrate/ CCpur in thusuah hi.


Saptuam mipi’n social work nei
Lamka, Aug-27: PCI (R) Mualkoi  in biakinn a bawlna  uah  tuni’n saptuam mipi 80 vel paikhawm in social work nei uh a, atuang  ding sung uhi.Huao biakinn adung feet 100 leh avai feet 37 alian  hi a, June 2015 in nasep  pan uhi.   Mualkoi Presbyterian Church bel kum 1984 a dinkhiak hi a, innkuan 120 val om hi.


Bolero Camper gari kigumang
Lamka, Aug-27: Gutate’n tuzing dak 3:30 velin Sielmat khua akipan Bolero Camper gari (white colour) No. MZ-o1K-1330, Chasis No. MA1RU4GHKD3L59820, Engine No. GHD4L62236 gu uhi. Gari’ neitu in Police ah report bawl a, Police te’n gari muhkik asawm ban uah  guta matkhiat sawm in suizui uh a, FIR No. 43(8) 2016 CCP-PS U/S 379 IPC registered uhi.


IMPHAL NEWS:
Hunger Marcher’s day zatna om
Imphal, Aug-27: AMSU-te saina tuni’n ‘The 51st Hunger Marchers Day’ zatna om a, huai ah mipi paikhawm te’n state govt. thuneite anntang taksapna a bawltawm uh mawhpaihna in Aug 27, 1965 a kiphinna hun ah Chief Commissioner compound sung a Police-te gamtatna a si Promodini, Chaobal, Nabakumar leh Nilamani-te memorial site ah pak piakna hun zang uh hi’n kigen hi. Huai nung in student 1000 val ding leh mipi paikhawm te’n Pishum Chinga Macha mun akipan rally nei uh a, rally in Indo-Myanmar road, Keishamthong bridge, Keishampat, Wahang Leikai, Nagamapal, Khuyathong tawn in DM College campus tan pai uh a, buaina om khak ding venna in mun tuamtuam ah Police-te duty uhi.
DM College ah public meeting om a, huai ah Chief Guest in L. Saratchandra, ex-President, AMSU pang a, functional president in S. Subhachandra, President, AMSU pang hi. Special guest in Sinam Prakash, Gen. Secy., NESO pang a, Guest of honour in RK Itocha, ex-President AMSU leh Ph. Manibabu, Manipur Shahitya Parishad Hojai-te pang uhi. Hunger Marchers day tawh kizawi tawn in DM College Multipurpose Hall ah blood donation camp om a, huai ah mi 50 vel in sisan pia uh hi’n kigen hi.


Public Prosecution cum Govt. Advocate office mei in kang
Imphal, Aug-27: Meltheihlouh pawlkhat in North AOC a  PCTC Oil depot gei a Old High Court Complex a Public Prosecution cum Govt. Advocate office mei in halkuang uh hi’n kigen hi. Tua ah office sung a om Computer 17, printer 15, Xerox machine, NSA  detention case tawh kisai a file, state govt. employee service record, cash record leh document tuamtuam kang tum a, Senior Govt. Advocate RS Reisang office ahihleh 90% kangsia a, huai ah mi 54 in nasem uhi.  Akigendan in tuni zingsang dak 1:00 velin meikang om a, mi bangzahhiam te’n fire brigade-te phone mahle uh phone la om lou a, Khoyathong a Police om te’n fire brigade-te a theihsak nung ua meikuang va phelh mit uh chi uhi. Tuni a thiltung tawh kibang in zan in Thoubal a District Transport Office mei a va hal om hi’n leng gen uhi.


IMC-te nin paihding kham
Imphal, Aug-27: Khabesoi a omte’n Isirou Loukol a Imphal Municipal Corporation (IMC)-te nin paihna mun ah tuni akipan nin paih ding kham uhi. Akigendan in IMC te’n nidang a nin a paih chiang un lei in vuk mang uh a, himahleh tulai a IMC te’n nin a paih-te uh ahi bangbang a akoih ziak un namsia a, huai kim a lou nei te’n leng a lou-te uh khou theilou hi’n gen uhi. Hiai thu tawh kisai in Khabesoi a nupi khat in nin paihna mun a siangthou louh banah IMC te’n a etkai louh ziak un damtheina huailou hi’n kigen hi.


Hospital apan Sharmila pawtkhe ta
Imphal, Aug-27: Manipur ah AFSPA lakkhiak ding phutna a Sharmila in anngawl nuakna a neih ziak in JNIMS hospital a security ward ah kum 16 sung khum nungin anngawl nuakna  tawpsan nung in tuni’n security ward apan pawtkhia hi’n gen uhi. Sharmila in media-te tawh kimuhna hun ah AFSPA doudalna dia office hongkhiat ding a ut thu gen a, Chandigarh a Sept 27- Oct 2, 2016 sung a Global Youth Peace Festival va uap ding in gen a, maban Assembly election adia kisa hi’n gen hi. Sharmila in JNIMS hospital a pawtsan nung in Kangla ah thumna va nei a, huai apan Langol a Nature Cure Ashram ah ni bangzahhiam om ding a, North East Forum of International Solidarity (NEFIS)-te saina a mass campaign hun uap ding a, Ukhrul ah amah gum tute kimuhpih ding a phak sawm hi’n leng gen hi.


DIET candidate-te huamlou ding
General strike ziakin hindan nawngkai
Imphal, Aug-27: All Senapati District Candidates Parents Body of Manipur Police Constable 2013 Batch te’n Senapati district ah zan nitak zankim apan dakkal 48 sung general strike a puang un hindan nawngkai sak a, National Highway-2 (Imphal-Dimapur) ah gari tai muh ding omlou a, Senapati DHQ ah sumsinna inn, dukan leh dawr teng kikhak a, Sadar Hill leh Senapati a govt. office-te ah akai mi tamlou a, educational institute-te huamsak hilou hi’n gen uhi. Maram, Karong, Senapati DHQ, Keithelmanbi, Kholep, Motbung leh Gamgiphai-te ah volunteer om uh a, Karong Bridge gei ah volunteer te’n Dimapur akipan Imphal zuan a Tomato pua DI Tata (No. AS02AC-0478) hihsia uh a, Senapati Police te’n gari vala  in kem  uhi. General strike sung a medical tawh kisai, media, power, Airport pai ding-te leh sahkhua tawh kisai a thilte huamsak lou uh hi’n kigen hi.


Congress leh BJP kia hinawn ding 
Imphal, Aug-27: ADC Sadar Hills biala 8-Wakotphai ADC Constituency a MDC Haokholun Chongloi a sih ziakin State Election Commission in MDC 1 telna dingin Sept 17, 2016 in by-election om din bikhiah a, candidate ut tengin Aug 22, 2016 tan  nomination file uhi. Zan in candidate kizukkik nuamte kizukkik theihna hun hon sungin independent candidate 3 kizukkik uh a, tu’n BJP candidate R. Stone leh Congress candidate Seilen Lhoujem kia candidate om uhi. Sept 17, 2016 zingdak 8.00 akipan nitaklam dak 4.00 tan vote khiak hiding a, Sept 28 tan in election process zawh hiding hi.


MI drainage bawlna ding zang thelthang hi’n ngawh
Imphal, Aug-27: Bishnupur district a Thinungei Gram Panchayat sung a Angoupumkhong apan Teddim Road tan MGNREGS fund tungtawn a Rs. 9,38,567 bei a MI Drainage bawlnang zat thelthang a om hi’n maban Assembly Election a BJP candidate ding Moirangthem Rajen in gen hi. Hiai thu tawh kisai in Rajen leh a team te’n MI Drainage bawlna mun etkhiakna va nei uh a, huai hun ah nasep bangmah omlou ahihdan mukhia uh a, fund zat thelthang kichi mipi nelhsiahna tawh kibang a, kiphinna tuamtuam pat hiding in  gen hi. Hiai hun ah Bishnupur Mandal apan Secy. T. Bhegyachandra, spokeperson Tomba leh BJP official tuamtuam-te leng tel uhi.  Huailou in Manipuri Muslim Political Mandal te’n BJP Manipur Pradesh a Vice-President dia AR Khan, IAS (retd.) guang ahih tawh kisai in BJP Manipur Pradesh a Core Committee leh Office bearer-te kiangah kipahthu gen uhi.


TUNI THUPI:
“Huchi’n TOUPA na Pathian uh na nasem ding ua, aman na annek uleh na tuidawn uh a honvualzawl ding hi; huchi’in na lak ua kipanin chinatna ka lamang ding hi.”– Eksodas 23: 25


EDITORIAL:
I thiltuah touhtouhte uh
Tulai in i gam ah natna hiileng tuamtuam  atam a, Japanese Encephalitis(JE)  natna banah Dengue leh a tuamtuam mulkimhuai tamthei mahmah a, hibang thil i tuah ding mah uh ahi diam ahihkeileh i pilvanlouh ziak, i sianthoulouh ziak leh i kiven siamlouh ziak uh koipen ahi diam chih ut-huai hial hi. Adiakin tukum bulin zinling hat mahmah in i gam hong hihbuai a,inn-le-lou, school building, community hall leh biakinn tanpha zinling ziaka khang(crack),kisia leh chimsia tanpha om hi. Huchi kalah natna hiileng tuamtuam in hon nawklai a,kumbul a zinling hilou  i theihlouh kalin zinling 3/4vei bang hong omlai a, hileleng huaite ziaka thil poilua I tuahlouh uh kipahhhuai mahmah  hi.
    I thiltuah touhtouhte uh i etzui  vengveng chiangin nisa leng khauhlaw mahmah a, maban ah hibang thil bangtan i tuak lai ding ua chih theihbut  hilou hi. Global warming leh climate change ‘nisa leh lum-le-vot’ huaise deuhdeuh kichi sekte nidang in gamdang a dan lelin i ngaihsun uh a,tuni chiangin ei gam mahmah ah leng i genkhop uh pha thiltung taktak hong hita hi.Global warming kichi leitung pumpi ah sisal eh khawlumdan uang deuhdeuh a, nisa khauhluat ziak leh khawlumlua ziakin i gam India a state khenkhat ah leng tuni chiangin misi gen ding a hunkhop om maimahta hi.Hiai khawlumdan uang deuhdeuh i gam kia hilou in leitung gam tuamtuam in a buaipih hita mai hi.
    Diktatna hia ahihkeileh bangchidan hiam chih i theikei a, i gam ah National Food Security Act (NFSA) hong kizat tawh kiton in mipi nautang lakah antang  kiman chik a hawmkhiak ahi ding chih hi a, tua lakah NFSA ration card ngahte’ lakah  Kaikhanlian Guite  a pekik(surrender) masapen hidingin gintak-huai a, tua nungin mi aza asim in surrender uhi. Diktatna leh gin-omna a neih uh phat-huai mahmah hi. Tualou in NREGES tungtawn a job card  surrender mi gin-om ahunkhop om nawn hi. NFSA ration card /job card leh adangdang ah thildik hong paitouh ilam en a, DC –Via- SDO leh Village Authority tan ah leng thudikin vai ahawm igingta mahmah ta hi.
    CCpur dist sunga milip a tamzaw in Below Poverty Line (BPL)  card neiding himahle uh a neiding tamzaw thamte'n BPL card neilou ua, hiai pen thudik im vuallouh ahi hi. Above Poverty Line(APL) hizenpi  BPL Card deih teiteite'  Pathian in maban ah a khawsakna uh buai semsem in koihthei a, zawng sak semsem ding hi a a ginthu leng gen chih ahi hi. APL hinapi in  BPL te’ kia in a ngettheih uh Medical Re-embursement sum ngen tanpha om chih hi a, Pathian in phuba hon lak hun ding ngaihngam huailou hi. Pathian zahtak leh gingta ngen ihi a, igam ah etzui tuak ding tamtak om chihtheih in om a, poi mahmah chih ut huai hi. 
    Ei lak ah alamdang mahmah bel mi hausapipi bangziaka ki zawng ut sak teitei uh ahia chih ngaihsut tham ching hi. BPL card chauh leng ahikei, Job card tawh kisai leng officer leh elected tate tanpha a ngahthei om mawk chih ahi. Hiai pen daan tawh kikalh hi a, mizawngte’ adia hamphatna tamlou paite a hau leh chetheite’n va etlah sak guigui chih pen hamsiatna kipatna leng hithei hi. Midangte tawh teh a sum le pai neithou hingal lah BPL card 2/3 tawi tektuk bang i om leh kintak a tuabang card te i surrender ngeingei ding ahi. Centre government bangin singtangmite, namniamte leh mizawngte dopsangna dingin policy, program leh scheme tuamtuam bawlsek ua, himahleh asepsuahna lam ah chalak bulom iki polhkhak ziak uh adiam hichimai sek hi. Supervisor leh Enumerator te'n leng census abawl hun un innkuan sunga nekzongpen leh dot tuak khenkhat omte zahtakna tellou a adot ua, ahi bangbang a gelhkhiak uh kisam hi.
    Huchikawmkalah, eilak ah leng kivelna ding om khenkhat ahihleh, leitung khawsakna ah sum omlou a khawsa theilou i hih dungzui un, sum zondan siam a, a zatdan leh siam mahmah ding ahi. Zawnna (poverty)  kichi eilak ah chik mah chiang in i subeithei kei ding a, mi zawng te’n leiba mulou deuhdeuh in a hausa leh hausa kikawm hiaihiai ding society ihi ta uhi. I gam a thil paidante en vengveng ni, a haute hau deuhdeuh azawngte zawng deuhdeuh chih khawng ihihman un lungkhamhuai mahmah a, kuapeuh adingin khanlawh hun mahmahta chih kan igen theih omlou hi.