MANIPUR EXPRESS | AUGUST 5, 2016

HEADLINES:
Cabinet meeting in thupukna poimawh bawl
Imphal, Aug-4: CM Secretariat ah tuni nitaklam dak 3:00 in Chief Minister O. Ibobi makaihna Cabinet meeting om a, huai ah Brazil khawpi Rio de Janeiro ah Aug 5-21, 2016 sung Olympic games om ding ah Indian Contingent a tel Manipur mi 6-te pahtak thu puang uhi. Olympic a gold medal la om leh kipahman Rs. 2 crore, silver medal adin Rs. 1.5 crore leh Bronze la adin Rs. 1 crore piak ding in thupuk uh a, medal alak kei uh leh leng kimawlna a telkha-te kipahman Rs. 25 lakh piak ding in puang uhi. Manipur apan Olympic games a telding kimawl mi 6-te bel Archery ah L. Bombayla Devi, Weightlifting ah Saikhom Mirabai Chanu, Hockey (women) ah P. Sushila Chanu (Captain) leh Thokchom Anuradha banah Hockey (men) ah Kh. Kothaljit Singh leh Chinglensana Singh hi uhi.  Govt. thupuangtu RD & PR Minister M. Okendro in a gendan in Olympic games a telkha Manipur kimawlmite hasotna kawm in a nu-leh-pa-te kiangah leng Rs. 2 lakh chiat piak ding in Cabinet in thupuk chi’n gen hi.

    Cabinet in Manipur ah OBC leh SC Directorate tuam bawlkhiak ding Cabinet in lemsa a, huai banah Manipur govt. nuai a dept. tuamtuam a tulel a appointment ‘ban’ khahkol in Fishery Dept. a Grade III leh Grade IV a ding post tuamtuam Direct Recruitment alak ding in  lemsa uhi. Huai banah AYUSH system phatuam theitawp a zat ding thupuk banah Lamphelpat mun ah Homeopathic Medical College khat hongkhiat hiding in thukim uh a, huai a poimawh ding post 41 creation bawl ding in leng Cabinet in thupukna bawl hi. JNIMS ah PG course 6 hontheih ding a India govt. apan phalna om dungzui in Cabinet in post 25 creation bawl ding thukim uh a, PG course tuamtuam Pathology, Microbiology, Pharmacology, Bio-chemistry, Physiology, Anatomy leh Forensic Science honkhiat hiding chi’n RD & PR Minister in gen hi. Manipur State Rural Roads Development Agency (MSRRDA) hihhatna ding in Agency a sem ding Dept. tuamtuam a deputation a kila staff-te leng MSRRDA ah laklut (absorb) ding in lemsa ua, huaite regularise ding inleng cabinet in thupukna bawl uhi.


7th SAARC Home Minister Meeting zousiang
Gam 1 adia terrorist-te freedom fighter hitheilou: HM
New Delhi, Aug-4: Pakistan capital Islamabad ah Aug 3-4, 2016 sung 7th South Asian Association for Regional Cooperation' (SAARC) Home/Interior Minister meeting om a, India ai-oh  a vatel Union Home Minister Rajnath Singh in tuni’n thugenna vanei hi. SAARC nuaia kikhai khawm gam 8 apan Home Minister-te mai a Rajnath Singh in athugenna ah terrorism tawisang louh ding ahi chi a, gam khatpeuh in hiamgamna leh sualna (terrorism) tawsawn louh ding chih adeihthu gen hi.
    Pakistan capital Islamabad a SAARC Home minister meeting  ah Rajnath Singh in terrorism tawh kisai uangtak in gen a, gamkhat adia terrorist-te, gamdang adi’n martyr leh freedom fighter hitheilou ding uh chi hi. Rajnath Singh in Pathankot, Dhaka leh Kabul a terrorist attack mawhpaih thu puang a, terrorism hihbeina dinga pankhawm poimawh hi’n gen hi. Terrorism leh terrorist tawh kisai International Community (UN) in zuih ding thukhun abawlte, gamkhat vaihawmtu te’n a zuih chiat ding uh hi’n leng Rajnath Singh in gen a, lam chituam tuam a international terrorism gupna petute action lakkhum hunta chi hi. Rajnath Singh in terrorism tawh kisai agente ah minlawh  tuam neikei mahleh Pakistan agenna hiding in gingta uhi.


Lamka-Aizawl kal a Helicopter service theihna ding ngaihtuah
Lamka, Aug-4: M. Gouzamang Guite, EM/ADC & (17-New Lamka East) in Lamka-Aizawl-Imphal kikal ah Pawan Hans helicopter service theihna ding ngaihtuah in Guwahati zin a, tuni zinglam in Guwahati a Pawan Hans Ltd.te’ office ah Siamzamuan Valte, Dy Director of Airworthiness, Civil Aviation deptt, DGCA, M/o Civil Aviation, Govt.of  India, LGBI Airport, Guwahati leh Sarbjit Singh, Jt. General Manager ( Engg. & Mats), Pawan Hans Ltd. incharge of  DGM kimuhpih hi. Huai hun ah Lamka-Aizawl-Imphal kikal ah kikawmtuahna nuam leh hoihzaw omtheihna dinga helicopter service ding thu genkhawm uhi. 
        Lamka leh khawpi dang kikawmna ding a helicopter service pat ding tawh kisai Pawan Hans Ltd.te’ kilawp mahmah uh hi’n kigen a, himahleh service pattheihna ding in state govt. panlakna ding liantak om a, huai dingin panlaktouh zel hiding a, maban a poimawh dangte kithuzak hiding in G. Gouzamang in gen  hi. Lamka leh khawpi tuamtuam ah kikawmtuahna hoihzaw leh nuamzaw omthei leh i gam ah tourism puah theih ding a, imi isa tamtak in hamphatpih ding chih lametna ziaka hibang sawm hi’n leng gen hi. Lamka-Aizawl-Imphal kikal helicopter service omthei leh helipad mun ding leng athawn a kipe ding hi’n M. Gouzamang in gen a, Siamzamuan Valte’ panlakna tung ah kipahthu  gen hi.


Numei-te’n athawn in LPG connection ngah ding
Lamka, Aug-4: India gama Below Poverty Line (BPL) innkuan apan numei kum 18-60 kikal te’n athawn a LPG gas connection ngahtheihna din Central govt in scheme thak Pradhan Mantri Ujjawala Yojana (PMUY) pankhia a, Manipur telin state tuamtuam ah zatpat in om hi. Huai tawh kisai Stephen Chinkhanson Guite, Dy. Manager, LPG Sales, Indian Oil Corpn leh Thangzamuan, Asst. Manager, Retail Sale in Lamka hongpha uh a, Tuibuong a ADC Office ah Chairman makaih MDC-te uh a, huaizawh in DC/CCpur leh  Gas Agency tuamtuamte  kimuhpih in thil omdan genkhawm uhi.
    Dy. Manager in CCpur dist. ah hiai scheme zatpat theihna dingin panlak hi’n gen a, innkuan khawsak haksa diak a meithaite telin numei kum 18 -60 kikal te’n athawn a Gas connection a ngah uh deihna in Central govt May 2016 a pankhia hi’n gen hi. Kum 3 sungin India gam pumpi ah mi crore 5 athawn in gas connection piak hiding a, Manipur ah mi 68 kiang ah leng piak hita chi hi. CCpur dist. ah tulelin innkuan 53,287 akipan milip 2.74 lakhs om laka 50% te’n  gas connection ngah nailou ahihman un naktaka panlak hidingin gen hi.
    An huanna dia sing (firewood) zat beina ding leh meikhu tungtawn a nek-le-tak bawl beisakna ding banah huihsiang a om deih ziaka patkhiak hi’n leng gen hi. Scheme ngahthei dingte’ BPL innkuan apan ahih ding ban ah SECC (Socio-Economic Caste Census) 2011 data a omkhate leh  Bank Account/Aadhaar number neite hiding  a, scheme in security deposit, pressure regulator, cylinder, hose pipe leh instruction charge kigawm Rs. 16,00/- a thawn hiding a, gas leh stove man loan in laktheih ding a, mi teng LPG connection piak tupna patkhiak hiding ahihman in a ngah theih dingte’n akinthei pen a kinaipih Agency/Distributor ah ngaihven dingin ngen hi.


LOCAL NEWS:
Stenography/Shorthand office hong
Lamka, Aug-4:  Bijang a Vety office kiangah tuzing in Alpha Institute of Stenography/Shorthand office ding T.N. Haokip, MLA Saikot & President MPCC khuallian a pang in hong a, Pastor  Jangkholun Mate, Tuibuong Christian Church in lan hi. Guest of Honour in Lunminthang Haokip, IAS DC/CCpur  leh Functional President in Dr. Rosangzuol Khawlum, Jt. Director, Vety pang uhi. Chief Guest in tuailai sepna zonga competitive examna a tel utte adingin stenography/shorthand theih poimawh hi’n a, tuailai tamtakin a phattuampih lam-et thu gen hi. Huai institution kum 2012 a kipankhia hi a, tutan in student 118 lak ah mi 7 in course zou uh a, amaute tuni’n Chief Guest in certificate pekhia hi. Huai hun ah khua a hausa 11 tel uh a, admission thak patpah hidin Proprietor in gen hi.


Kha 1 sung in gari 110  kibehlap
Lamka, Aug-4: Dist. Transport office ah July 2016 kha in gari tuamtuam 110 registration kibawl a, huai lak ah truck 2, van 7, car 9, jeep 5, autorickshaw 11, 2-wheelers 76 tel hi. April-July 2016 sung in gari tuamtuam 455 registration kibawl a, huaite truck 31, van 14, car 45, jeep 13, autorickshaw 28, 2-wheelers 323 leh others ah 1 tel hi. Huailou in July 2016 kha in revenue Rs. 9,90,916/- mukhia uh a, April-July 2016 sung in Rs. 29,05,135/-mukhia uh a, govt ah challan in submit uhi.


Monitoring Cell ah mi 28 ki-ensak
Lamka, Aug-4: CMO office campus a Disease Surveillance Unit/Integrated Disease Surveillance Program Centre ah Japanese Encephalitis (JE) leh Viral Fever ziaka Monitoring Cell kihong ah tuni'n Dr. O. Jotinkumar in damlou mi 28 en a, huaite lak ah muanmawh mi 5-te sisan sample la uh a, huaite Imphal ah test dia thot hiding hi. JE hidia kimuangmawhte leh Viral fever ziaka damlou kuapeuh ki-etsak theih ding a, muanmawhte’ sisan sample lak hizel di’n kigen hi.


Police te’n Activa kigu mukik uh
Lamka, Aug-4: Guta te’n Aug 2, 2016 zinglam dak 9:30 velin LB Japhet of  B. Aijalon compound a kikoih Honda Activa (white) No. MNO2B-1841 aguk mang uh zan in Police te'n Mandop Leikai ah mukik uhi. Police te’n tuzing in gari neitute' kiang ah pekhia uh a, guta bel mankhiak hilou hi'n Police lam apan kiza hi.


Free short term course training kipan
Lamka, Aug-4: Bijang a SBI-RSETI office ah tuailai kum 45 nuailam sepna neiloute a dingin Rural Entrepreneurship Development Programme (REDP) tawh kisai in free short term courses training tuni’n kipan a, mun tuamtuam apan 19  tel uhi.  Training ahihleh ni 12 sung hiding a, huai hunsung in CT Lian Guite, MBA in sumsin dingdan tawh kisai sinsak ding hi.


Mipi lak ah Belladonna-200 hawm
Lamka, Aug-4: Manipur a JE natna douna dia Directorate of AYUSH tungtawn a Project Belladonna- 200 kichi patkhiak ahih tawh kiton in tuni’n Dist. hospital a counter 3 hongin mipi lak ah hawmkhiak in om hi. Damdawi ahihleh sun dak 12:00 velin hawmbei uh a, hongtung nawn hun a sutzop hiding in kigen hi.


Siamsinna innte kihong nawnta
Lamka, Aug-4: CCpur Dist. ah kal 2 vel paita in Japanese Encephalitis (JE) leh viral fever hi-leng om ziak in damlou tamtak om a, huai natna student-te naktak in kilawhsawm uhi. Huai tawh kisai Dist. Administration in July 28, 2016 apan ni 7 sung school/college teng khak dia thupiak abawl  abei tawh kiton in tuni’n ngeina bangin school/college-te kihongin student-te kaipan nawn uh a, naupang tamzaw school kai uh chihthu kiza hi.


DAPCU in monthly review meeting
Lamka, Aug-4:  District AIDS Prevention & Control Unit (DAPCU) makaih in Dist. sunga NACP Facilities te’n tuni’n CMO Conference hall ah monthly review meeting nei uh a,  maban panlak dingdan kikumkhawm uhi.  Huai hun ah TI-NGO teng banah ICTC, DSRC, ART, Project Sunrise leh MSF apan palai 1 chiat ban ah North East Regional Office, Guwahati apan Gautam Salam, Co-Ordinator, NERO leh Imphal apan Abiram Mongjam, Jt. Dir., TI-NGO leh Deepak, Asst. Director, TI-NGO leh Nisi, Programme Officer, NGO-te kihel uhi. Huai hun ah T. Benjamin, Superviser, ICTC  in kha 3 sunga sepkhiak tuamtuamte pulak in, sepkhiak tuamtuamte enkhawm uh a, Strategic Information & Management System (SIMS) up-gradation tawh kisai genkhawm uhi.


TAYC in Emi panpihna pia
Lamka, Aug-4: Tuibuang Area Youth Club (TAYC) te’n Emi Niangmuanching (6) d/o Lalrochan Hmar of Zion veng, Tuibuong/Tuibong vehna nei in, panpihna sum(1st phase) di’n Rs. 65,650/- pia uh a, Pauminlian Mate, Chief of Tuibong in thumsak hi.
Emi Niangmuanching ahihleh July 9, 2016 in Activa in a phukhak ziakin Shija Hospital ah ki-enkol a, Aug 1, 2016 in discharged in om a, Rs. 1 lakh vel beizou ding hi’n kigen hi.


SUUNNA:
Chingngaihning (71) m/o  P. Ginlian of Dorcas Veng, New Lamka tuni zinglam in zunkhum ziakin si a, sunnung in YPA hanmual, New Lamka ah kivui hi.
Gentinlam (69) f/o Letneikhup of Lingsiphai village tuni sunnung dak 2:30 velin TB natna ziakin si a, August 5, 2016 in Lingsiphai hanmual ah kivui ding hi.
P. Nangzathang (58) s/o (late) Luaizalam of Mata tuni nitaklam in cancer ziakin si a, August 5 in Mata hanmual ah kivui ding hi.


IMPHAL NEWS:
International Tourism Mart
Imphal, Aug-4: Ministry of Tourism, Govt. of India in North East bial adia 5th International Tourism Mart Nov 23-25, 2016 sung om ding ah zintuntu dia Manipur telkhia uh chi’n Nidhi Mani Tripathi, IAS, Secy. Dept. of Tourism, Govt. of Manipur in tuni’n DIPR campus a press conference hun ah gen hi. Aman agenzelna ah Tourism dept. in International Tourism Mart ding tawh kisai in United Kingdom, Thailand, Australia, Singapore, Germany, Russia leh Switzerland telin gam 35  apan delegate 3 chiat chial ding in thupuk uhi. Ministry of Tourism nuai a Swadesh Darshan Scheme tungtawn in light and sound show, Polo gallery, Exhibition park leh Kangla Fort a Tourist facilitation Centre-te puah hoih nangin nasep pan uhi.


SBI  branch 39 leh 40na ding  hong
Imphal, Aug-4: State Bank of India (SBI) in Manipur ah branch 39na ding Aug 2, 2016 in Ningthoukhong ah hongkhia uh hi’n kigen hi. Huai hun ah Chief Guest in G. Konthoujam, Minister (Commerce & Industries, Seri. & Vety. & Animal Husbandry) pang a, Functional President in Thangboi Lunkim, Asst. Gen. Manager, SBI Regional Business Office , Imphal pang a, Guest of Honour in O. Nabakishore Singh, Chief Secretary leh M. Prithviraj Singh, Parliamentary Secy. (YAS & Tourism)-te pang uhi. Tua zawh in Moirang ah branch 40na ding hongkhia uh a,  G. Konthoujam, Minister leh M. Prithivirah Singh, Parliamentary Secy., te’n uap uh hi’n kigen hi.


Police 2 telin mi 3 apan khamtheih man
Imphal, Aug-4: Guwahati a Beltola mun ah tuni’n Assam Police te’n Manipur police personnel 2 telin mi 3 apan khamtheih hunkhop mankhia uh hi’n kigen hi. Thusuak in khamtheih puaklut dan leh kigolhkhakna neite matkhiak tupna in Assam Police te’n thudotnna nei lel uh a, mat a om mi 3-te Manipur apan Manglemjao Singh, Inao Singh leh Saibom hi uhi.


Centre 8 dinkhiak beh hiding
Imphal, Aug-4: Mutum Ibomcha Singh, Controller of Technical Education in Moirangkhom a DIPR complex a press conference hun ah Manipur a district teng huap in Polytechnics Centre 8 phutkhiak hiding a, tulel in Govt. Polytechnic 1 kia Imphal West ah om hi. Technical Education, Govt. of Manipur in Engineering, Architecture leh Pharmacy institutes Manipur leh state dang ah Diploma zil ding-te adia Entrance Examination sai uh chi hi. Huai dungzui in Civil Engg a dia seat 60, Arch. Engg. 5, Electrical Engg. 40, EEE 10, Mechanicals 20, E. Tele. Engg. 7, E.C. Engg. 3, Mining Engg. 1, D. Pharmacy 30, Multimedia 2, printing 1, Photography 1 leh textile process adia seat 3 hi a, seat 180 te’n Manipur sung leh seat 31-te state dang ah zil ding uh chi a, Seat allotment ahihleh state govt. reservation policy leh 200-point roster dungzui hi’n taklang hi.


NH-2 ah gamkek-te thutawp pia
Imphal, Aug-4: Naga people’s orgn. (NPO) te’n Senapati district a NH-2 ah mi khenkhatte’n mimal hamphatna ding a gamkek leh drainage system subuai te’n akintheipen a tawpsan ding in theihsakna bawl uh hi’n kigen hi. Ch. Parang, Convenor, NPO Grievances Cell in inn bawl ding suanlam a NH-2 ah buan leh suang koih te’n lampi a suksiat banah traffic lam ah nawngkaina tun a, vuahzuk hun  in guam omte bing sak hi’n gen hi. Hiai thu tawh kisai a NPO in theihsakna tamveitak bawlta a, highway leh nulla-te ah buan, suang leh suangthem sung te’n akintheipen a lakhe ding in ngetna bawl ua,  kitheihsakna omlou a action lak hiding in taklang uhi.


4th Sadar Hills veteran sports meet
Imphal, Aug-4: Sadar Hills District Sports Veteran Association Manipur (SHDSVAM)-te saina in Oct 1, 2016 in ‘4th edition of Sadar Hills Veteran Sports Meet, 2016’ om ding a, hiai  tawh kisai in N.S. Lien Gangte, Gen. Secy., in SHDSVAM nuai a registered veteran club teng  tel ding uh chi hi. Aman a genzelna ah Veteran club register bawl thak-te kiangah uniform set piak hiding chi a, Aug 15, 2016 apan Rs. 3000 pia in Sports meet adia entry bawl theih ding a, open tournament hun a Champion, 2nd, 3rd leh 4th te kiangah Rs. 50,000, Rs. 30,000, Rs. 15,000, Rs. 5,000 banah citation, affiliation certificate, best discipline team award leh individual prize tuamtuam om ding hi’n leng taklang hi.


MJS Grade-III Officer-te seniority list
July 27, 2016 in  High Court of Manipur a Full Court Meeting thupukna dungzui in Manipur Judicial Service (MJS) Grade-III Officer-te’ seniority list anuai a banga bikhiah in om hi.
1. Ms N. Lanleima
2. Ms Monalisa Maibam
3. Ms A. Shanta Devi
4. Mr Alex Muivah
5. Mr. Nepram Sonykumar
6. Y. Somorjit Singh
7. Mr. Lamkhanlal Kipgen
8. Janggoulen Haokip
9. Mr. Ashem Tarunakumar Devi
10. Mr. K. Nirojit Singh
11. Mrs. Masana Evangeline Panmei


TUNI THUPI:
“Ka damsung nite uh simdan honhilh in, pilna lungtang ka neihlawh hialna ding un.” -Sam 90:12


EDITORIAL:
Summer Olympics, 2016
International Olympic Committee (IOC) in kum 4 kihal zela a sai uh Summer Olympics kichi a masapen  April 6-15, 1896 in Greece khawpi Athens ah om hi. Huai hun in mihing 100,000 in Opening Ceremony hun uap uh a, gam tuamtuam 14 kimawlmi tamtak paikhawm uhi. Greece akipan  kimawlmi atel tampen mahle uh  USA te’n medals tam lapen uhi.  Greece gam ah Summer Olympics masapen a om ziakin  ‘Birthplace of the Olympic Games’ chih minvuah in om hi. Tunitan in gam tuamtuam 18 in Summer Olympics zintun khata  uh a, tukum 2016 in Brazil khawpi Rio a om ding Olympics bel South American continent adia masapen hilai a, huai Aug 5-21,2016 sung om ding hi.
    Summer Olympics zintun kha gam tuamtuamte lakah United States of America(USA) in 4vei ( 1904, 1932, 1984 leh 1996)  zintun kha uh a,  azintun munpen hi uhi. Amau zom in Great Britain in 3vei (1908, 1948 leh 2012) zintun uhi.Khawpi 3 in 2vei chiat zintun kha uh a,huaite bel  Los Angeles (1932 & 1984), Paris (1900 & 1924) leh Athens (1896 & 2004)hi uhi. Tunitan in Summer Olympics om tengin gam tuamtuam 5-Greece, Australia, France, Great Britain leh Switzerland  tel gige lai uh a,  Great Britain  a kimawlmite’n atel teng un gold medal lakha lai uhi.
    Kidoupi IIna zawh in Germany leh Japan-te telsak hilou uh a, kum 1979 a Soviet Union in Afghanistan a opkhum ziakin USA, Cananda, West Germany leh Japan te’n kum 1980 a om Summer Olympic Games boycott uh a, huai kum a pen duhthusam bang  in thupi hetlou a gen in om hi. Tua zawh kum 1984 in Soviet Union in Los Angeles a om pen boycott uh a, ahihziakin China bel huai kum in Summer Olympic Games ah kihel pan hi.
    Kumteng in kimawlna a tem gam kibehlap touzel in kimawlmi leng tam deuhdeuh a, kimawlna  discipline leng behlap in om zel a, Summer Olympic Games in masawn zel in kleitung a  gam tuamtuam in ngai poimawh deuhdeuh in tel teitei sawm in panla uhi. Tuni chiang in mahni ut thu in Summer Olympics ah tel theih hi nawnlou a, qualifying paisuak zawh masak ngaita hi. Qualifying a paisuakte kia tel theita uhi. India a kimawlmite kum 1900 kum akipan in Olympic ah tel  pan uh a, huai kum in athletes displine ah India akipan atel Norman Pritchard in silver medal 2 la hi. Tuazawh kum 1920  in India in kimawlmi sawl ua, tua kum akipan  Summer Olympic om tengin telden  uhi. India te’n tunitan in Olympic ah medal 26 ( gold 9, silver 6 leh bronze 11) la uhi. India te’n medal a lakzah  sang un Olympic ah atel khakna zah uh tamzaw lai hi. Huai bel Olympic Games ah 32vei tel uh a, tua lakah medal 26 la zoupan phet uhi.
    Summer Olympics om tengin India in masawn zel a,kum  2008 in  Beijing ah a om hun in kimawlmi 56 tel uh a, tutung in  100 val tel ding uhi. Huaiziakin  India in leng Olympic Games masawnna in ana zang chihna suak hi. Aug. 5, 2016 in Brazil khawpi Rio de Janeiro mun a Summer Olympics Opening ceremony om hun ah  gam tuamtuam 207 akipan kimawlmi 11, 239 tel  ding uh a, amaute kimawlna chi tuamtuam(displine)  28 ah kidem ding uhi.  India kimawlmite  Olympic ah tam akihel masak kum pen uh hilai chi a chiamteh in om a, tua tawh kiton in a tawmpen in medal 10 tan teitei lak hiding in gen uhi.
    London Olympic a Bronze medal la MC Mary Kom bel tutung a dingin qualify zoulou a,  melmuh hilou ding hi. Ahihziakin India kimawlmite bel medal 10 val la dingin kigingta veve uhi. Bangteng hileh India in Olympic hamphatpih mahmah a, kimawlna lam ah khanlawhna neih lawh chi lehang igenkhial lawmlawm kei ding hi. Olympic ziak khawng in discipline tuamtuam ah kimawlmi tamtak hong piangkhia a, tutung ngial in Gymnastics ah India mi tel  thei ding omta hi. Amaute ziakin khawvel gam tuamtuam in  India gam  theihlawh uh a, huai in kimawlna a poimawhdan langsak  hi. Bangteng hileh Rio Olympic om ding ah India kimawlmiten medal 10 val lading a lam-et uh a lazou ding uam?
    Huai tawh kisai  Goldman Sachs kichiten’ Olympics and Economics’ report a bawlna uah India in gold medal 1 tel in medal 8 la ding uh hi’n genkhol uhi. Associated Press in bel Sania Mirza leh Rohan Bopanna ten mixed doubles tennis ah bronze medal la ding uh hidan in gen a, Sports Authority of India (SAI) ten bel medal 10 tan bek lak kilamen uhi. India-te bel khawvel a mihing tamna mun 2na hi a, tua ziakin medal tamtak la ding ua gintak himahleh  medal 10 tan kan lazou ding un gintak haksa chipawl om hi.