HEADLINES:
Kha 2 nung in Cong in Arunachal khahsuah nawn
Arunachal Congress MLA 44 lakah 43 in PPA zom
Itanagar, Sept-16: Arunachal Pradesh a Congress Legislature Party (CLP) member 44 omte lakah 43 te’n party nusia in BJP nuaia om North East Democratic Alliance (NEDA) kahiang Peoples’ Party of Arunachal (PPA) zom uh a, kha 2 paisa a Supreme Court in ahingsak thak Congress govt beisiang nawn in, Chief Minister-lui Nabam Tuki vuakin Congress taisanlou hi.
Chief Minister Pema Khandu in state sunga regional party omsun azopna uh kisiamtan kawm in mipi deihdan zui uh hizaw in gen a, thil piangkhia omlouhna Arunachal Pradesh pen Centre huhna tawh khawsa zou hamham ahihman in, Politics thil ah centre tawh kimelma thei ding vual hilou hi’n gen a, state govt. in sum deficit aluahtouh(inherit) Rs. 3700 crore lakah Rs. 1200 crore te saifel hita hi’n gen hi. MLA teng in amau mimal deihtelna liauliau in Congress nusia uh a, centre apan development fund tamsem aluanglut theihna dia huai thupukna bawl uh hi’n leng Pema Khandu in gen hi.
Tuni a PPA zom te’n Arunachal Pradesh mipi maban ding khual tawh, amau ading leh mipi adia deihtelna hoihpen zui uh hi’n Deputy Chief minister Chowna Mein in gen a, Arunachal Pradesh ah Congress govt pen PPA govt hita ding a, Pema Khandu in Chief Minister mawhpuakna len zom ding chi hi. Arunachal Assembly a member 60 omna lakah tuma in Congress member 45 om uh a, Chief Minister-lui Kaliko Pul sihnung in 44 pha uhi.
Tuabang kalah NEDA convenor leh senior Assam minister Himanta Biswa Sarma in tuzing dak 9:00 in Chief Minister Pema Khandu apan phone call mu in, tuni a kikhekna thupitak om ding ahihdan zaksak a om hi’n gen a, tunitaklam dak 4:00 in huai thiltung theipan hi’n leng Guwahati ah thuthaksaite hilh hi. Congress MLA te’n PPA azopna un BJP tawh kisaikhakna neilou in, BJP panlakna ziak hilou ahihdan leng hilhchetna bawl hi.
Arunachal a thiltung tawh kisai in, New Delhi ah tunitaklam in Congress' chief spokesman Randeep Surjewala leh AICC General Secretary C P Joshi te’n Press Conference sam uh a, mipi kivaihawmna hihsiatna di’n BJP te’n People’s Party of Arunachal Pradesh zang uh hi’n ngawhna bawl uhi. Prime Minister Narendra Modi leh BJP President Amit Shah te’n sum zanga ‘Democracy spirit’ leh ‘Constitutionalism’ beisakna dia apanlakna uh kilang khia ahihdan hiai thiltung apan muhtheih chi uhi.
LOCAL NEWS:
Electoral politics a zatdin phallou
Lamka, Sept-16: JAC against Anti-Tribal Bills (JAC-AATB) in thusuah abawlna ah gam leh leitang humbitna dia hinna pia salpha 9-te mawka si hilou ahihman un electoral politics maimai a zatphal hilou uh hi’n taklang hi. Bill 3-te ziaka singtangmite kiphinna kum 1 valta ahihman in salpha 9-te’n hinna alatkhiak un lungtang athak a thaguan in, amaute zahna lian deudeuh hi’n taklang hi. Huchikal ah, political party khenkhat in amau party min hoih deih ziakin salpha 9-te kipiakna pikawi sawm in kipei uh a, maban election om ding etna in zahna penuam hidan in panla uh a, JAC in electoral politics a zatdia salpha 9-te phallou hi’n leng thusuah in taklang hi.
Essay compt. kipahman hawmkhia
Lamka, Sept-16: Dist. Legal Services Authority, CCpur saina in tuni’n Bungmual a Lalpuithluaii Foundation school ah One Day Legal Awareness tawh kithuah in essay writing competition kipahman hawmkhiakna om hi. Zakir Hussein, Advocate in ‘Child Rights’ tawh kisai in naupang bawlsiat ahihlouhna ding leh bawlse tung ah dan tawh kituak a gawtna piaktheih ahihdan sinsak ban ah Right to Education (RTE) Act, 2009 tawh kisai leng sinsak a, India constitution (eighty-six amendment Act, 2002 a Article 21-A nuai ah naupang kum 6-14 kikal-te free and compulsory education piak teitei ding ahihdan gen hi.
Margareth, Advocate makaih in essay competition kipahman hawmkhia uh a, Category A (Class VIII- X) ah 1st in Rs.1500/-, 2nd Rs.1000/-, 3rd Rs. 800/- leh mi 10 kiang ah Consolation Rs. 500/- chiat pia uhi. Category-B ah 1st in Rs. 2500/-, 2nd Rs. 2000/-, 3rd Rs. 1500/-, mi 10 kiang ah Consolation Rs.700/- pia uhi. Hiai hun Kimneinieng Shoute, District & Session Judge leh Letkho Kipgen, CJM/CCpur telin mi poimawh tuamtuam in uap uhi.
BLO te’n Oct 7 tan in zou ding
Lamka, Sept-16: Manipur ah kum 2017 bul a Assembly Election ding tawh kisai a kisakkholhna pailel a, BLO te’n Special Summary Revision nei in Oct 7, 2016 tana zouding uh hi’n kigen hi. Veng/khua khenkhat ah BLO te’n nasep panta uh a, Jan 2017 tan a kum18 ching ding te’n ngaihven theih ding a, BLO te’n form 6-inclusion, form 7-deletion, form 8-correction leh form 8-A transpotition/transfer zang uhi. Final publication of Electoral Rolls ahihleh Jan 2, 2017 hiding in ECI thusuak in taklang hi.
YLS in Silver Jubilee chep lawkna leh exhibition nei
Lamka, Sept-16: Young Learners School in tuni’n school campus ah kum 25 chin (Silver Jubilee) cheplawkna leh exhibition nei uh a, huai ah YLS a hun sawttak ana sem Betty Khomang, Headmistress, VK Tawna High in school exhibition leh silver jubilee song book hongkhia in thu gen hi. Aman agenna ah Pathian in talent apiak sinsaktu (teacher) ahihdan muhkhiakna mun ahihman in, hiai school ama adia mangngilh vual hilou chi hi.
R. Tusing, Headmistress in kum 25 chinkum ahih tawh kiton in Silver Jubilee Year Celebration a puangin activity tuamtuam nei uh a, tuni a exhibition pen nanungpen hita chi hi. YLS in tukum Silver Jubilee year apuang tawh kiton in March 4, 2016 in hongkhia uh a, Inter-School Poetry, Story & Painting Competition aneih ban uah YLS Eco Club-te makaih in awareness walk nei in, khawpi sung ah dust-bin tamtak koih uh a, School Logo Designing Competition leh Inter-School Choreography Competition telin activity tuamtuam nei khin uh a, October 7, 2016 in Silver Jubilee lawm ding uh hi’n kigen hi.
Huai hun ah student te’n stall tuamtuam- Library, Art gallery, Photo Gallery, Memento gallery, Eco Club, Science Gallery, History Room leh Video Room bawlin a sepkhiaksate uh taklang uhi.
Biakinn thak mun ding ah suangphum
Lamka, Sept-16: Rev. V. Nenglian, Divnl. Supdt. EBC Lamka South Divn. in tuzing in Jordan Street, Vengnuam South a Biakinn thak munding ah suangphum in Pathian kiang ah thumna in lan hi. Pastor K. Pumsuanthang, Local Pastor, Pethuel EBCC makaih in Biakinn bawlna ah Deptt teng pangkhawm vek ding chih latsakna in Deptt. tuamtuam a President teng in Suangphum ah leisai vuk uhi.
Pethuel EBCC te’n Biakinn mun thak ding kum 2011 in Rs. 13 lakh bei in 72 x 130 feet alian lei uh a, 36 x 72 feet alian in Biakinn lam hiding a, Pethuel EBCC a inn 390 om lak ah inn 100 vel Biakinn thak ah inntuan khe ding uhi. Biakinn bawlna bel TBSUC te’n enkai ding uh a, mipi’n social work zel ding hi’n kigen hi.
EVM checking hun ni 3 ngetbeh
Lamka, Sept-16: DC’s office ah Election Deptt, Political party-te leh Bharat Electronic Ltd. Bengaluru (Bangalore) apan engineer 2-A. Thirunavukarasu leh M. Vijayakrishna te’n Sept 14, 2016 apan EVM First Level Checking nei uh a, EVM 382 teng tuni tana zawh ding chih himahleh 200 vel zou uhi. DEO & DC/CCpur in tuni’n Chief Electoral Officer/Manipur kiang ah BEL engineer te’n EVM checking zawhsiang nang in ni 3 extend sak ding in ngen a, CEO/Mnaipur in phalsak hi’n kigen hi.
BJP ST Morcha Natnl. V/President
Lamka, Sept 16: BJP ST Morcha National Vice President Ramesh Chandra Meena in tuni zinglam in Lamka hongpha a, Lighthouse Lane a BJP office ah BJP CCpur makaite tawh houlim uhi. Ramesh ahihleh Imphal apan T.T Haokip, ex-MLA & former Dy Speaker, Manipur Assembly, Michael Dangmei, President,BJP ST Morcha Manipur, Mathew, Gen. Secy. BJP ST Morcha, Manipur te’n hon zui uhi.
Ramesh in agenna ah CCpur Dist. hong hoh a 2 veina hita a, Aug 31, 2015 a thil tung nuamlou asakthu leh Tribal Martyrs te thupitaka vuikhiat adeihthu gen hi. CCpur Dist. ah ground level a nasem hoihleh hatte BJP ticket pia hiding un gen a, screening hoihtaka bawl hiding in gen hi. Ticket tanlouh ziak a khasia leh party taihsat louhding thu telin maban ah party hatsem nang tawh kisai genpih hi. K. Vungzalian, President BJP/CCpur in vaidawnna thu gen in National Vice President in Lamka hongphak kipahthu gen hi. Huai hun ah intending candidate T.T Haokip, V. Hangkhanlian, Ngursanglur, Chinlunthang te’n thugenna nei uh a, BJP party apan MLA candidate sawm hunkhop tel uhi.
SDO/BDO khakna leh lopna om
Lamka, Sept-16: Thanlon SDO/BDO leh Mualnuam SDO/BDO thak ding leh alui khakna program tuni nitaklam dak 3:00 in Zion Street, Lamka ah om hi. Joel Haokip MCS, SDO/BDO Thanlon in hun paisa a mipi kithuahpihna tungah kipak petmah ahihdan genkawmin huai hun uap khaw hausa tuamtuam kiangah puansan (red blanket) silhsak a, Thangboi Gangte SDO/BDO Mualnuam inleng thugenna nei hi. Thanlon Area Chief Association inleng SDO/BDO nihte khakna neikawm in atung uah kipahthugenna nei uh chihthu kiza hi. Hiai hun ahihleh Thanlon MDC Th Jamchinthang leh Ngazam MDC T Paukhanlian te’n leng uap in thugenna nei uh a, SDO/BDO nihte’n hun sawtlou sungin Thanlon area ah development tawh kisai in chihtakna leh ginomna tawh kisai in nna tamtak semkhia uh chi uhi.
SSPP Jt. HQ Mzr in kipahpihna neiding
Lamka, Sept-16: Siamsinpawlpi Jt. HQ Mizoram te’n Oct 1, 2016 zinglam dak 10:30 in I & PR Auditorium, Aizawl ah Felicitation program neiding uh a, Awardees 15 te Khuallian hiding uh a, Khualzahtak huai in H. Rohluna, Education Minister, Mizoram pang ding hi. Pro. Pastor V. Khairoding, PCI Bethlehem Veng in Siamsinte thumsak ding a, Muana Hangshing, President PTC Mizoram in hasotna thu gen ding hi.
Meithai 70 val blanket pia
Lamka, Sept-16: Rev. Fr. Gena Vaiphei, Secy., Believers Church Manipur Diocesan leh Zabiaksang, President YVA Imphal Jt Hq makaih in Believers Church Staff-te'n tuni'n Kangvai khua ah meithai 70te kiangah a thawn in blanket pia in, vualzawlna ngetsak uhi.
Believers Church in community Dev. project nuai ah "Serving God and Humanity" thupi pansan kum 7/8 paita in mi genthei leh haksate kithuahta uhi. Huai hunah Believers Church staff-te YVA Kangvai unit in poimawh bangin kithuahpih uhi.
Kim Joe Gas kikhak ding
Lamka, Sept-16: Buaina khenkhat om ziak in Sept 17, 2016 in M/s Kim Joe Gas Service kikhak ding a, Proprietor in theisiam dingin customer-te’ ngen hi.
SUUNNA:
Jamkhat Langel (90) f/o Upa Thangzathawng Langel of Gangpimual, tuzing dak 8:00 velin teknat in si a, nitaklam in Gangpimual hanmual ah kivui hi.
Vahneilhing Singson (80) w/o (late) Dr. D. Singson of P. Kamdou Veng, Part- IV, tuni sunnung dak 2:40 velin teknat in si a, Sept 17, 2016 in Tuibuong hanmual ah kivui ding hi.
Hauthianlal Suantak (53) s/o (late) Khamtinthang Suantak of Chiimtung Veng, New Lamka, tuzing baihtak in BP Stroke in si a, sunnung in Pangjol khawsak a Vaiphei Cemetary ah kivui hi.
IMPHAL NEWS:
ECI team te’n Manipur hongpha ding
Imphal, Sept-16: Dr. Nasim Zaidi, Chief Election Commissioner makaih in Election Commission of India (ECI) full team in Manipur ah kum nawn Assembly Election ding tawh kisai a kisakkholhna enkhe din Sept 20, 2016 in Imphal hongtung ding uh hi’n kigen hi. ECI team te bel ninih om ding ua, Sept 20, 2016 sun dak 12:15 apan sun dak 12:45 tan Chingmeirong a Hotel Classic Grande ah press briefing nei ding uh a, Election Commissioner 2, Deputy Commissioner 3, Director 4, Principal Secretary 1 leh Secretary 1 te’n Chief Election Commissioner hon zui ding uh hi’n kigen hi.
43rd Foundation Day zang
Imphal, Sept-16: All Manipur Working Journalists’ Union (AMWJU) te’n Majorkhul a Manipur Press Club ah tuni’n ‘43rd Foundation Day’ zatna nei uh a, huai ah Chief Guest in Chief Minister O. Ibobi pang hi. Functional President in W. Shyamjai, President, AMWJU pang a, Guest of Honour in A. Madhumangol, Veteran Journalist leh K. Meghachandra, Director, Information and Public Relation-te pang uhi. Huai ah CM in a thugenna ah Manipur a nam tuamtuam 30 val teng khawm a, kuapeuh in amau nam chiat gum ut ding uh a, nam tuamtuam tenkhawmna ah Journalist te’n mipi adia nasem taktak uh ahi chi hi. Press omlou in khawtang mial tak in om ding a, khawtang adia khuam poimawh 4na Press ahihbanah lampi dik in khawtang makaih uh a, Journalists faculty-te hamphat pihna dia corpus fund bawlkhiak ngai a, huai ding tawh kisai a panpih ding in chiam hi. Aman a genzelna ah DIPR te’n tunai a state govt. nuai a Dept. teng adia press conference a sai un govt. leh mipi kizopna bawlhoih hi’n gen hi. DIPR Director in journalism puahnang leh Journalists faternity-te hamphatna ding in programme leh welfare scheme tuamtuam pan ding uh chi hi. Foundation Day zatna hun ah AMWJU member si khin-te suunna banah a innkuan-te kiangah thilpiak pia uh hi’n leng kigen hi.
Mi 150 te’n kidney transplant bawl
Imphal, Sept-16: Dr. Sanjeev Gulati, Director, Nephrology & Renal Transplant Medicine, Fortis Hospital in Manipur apan patient 150 te’n New Delhi a Vasant Kunj a Fortis Hospital ah lawhching tak in kidney (kal) transplant bawl uh chi’n Classic Hotel a press conference hun ah tuni’n gen a, kidney disease (kal natna) etkolna dia lampi omsun transplant hi a, dialysis in tomkhah daih a, kidney transplant poimawh-te kiangah a utte’n a kidney khat uh donate thei ding uh a, kidney khat kia ziak in taksa ah side-effect omlou chi hi. Fortis Hospital ah ki etkolsak man leng state govt. in reimbursement bawl thei a, Manipur a kidney disease kithang a huai zawh in kal a suang om leh BP sang hi a, Manipur ah Diabetes ziak in kal natna nei tamtak om a, tui dawn tamlouh ziak in kal a suang om ut hi’n gen hi.
KSO Chandel te’n hilhchetna bawl
Imphal, Sept-16: Chandel KSO leh TSA min zang a Moreh ah Tribe leader-te vau leh sum demand banah thaukap om chi a ngawhna tawh ksiai in KSO Chandel te’n hilhchetna bawl uhi. Huai tawh kisai a Mangboi Haokip, President, KSO-Chandel in student body 2-te min zang a social networking site, facebook leh whatsapp group-te ah press release kikhah khia banah state media te’n Sept 15, 2016 ni a thusuahna uah SoO group nuai a UG khenkhat-te thau kap in Moreh mipi patausak leh Tribe leader-te vau leh sum demand uh chih tawh kisai mipite pi kawi sawmna a thu bawltawm hi’n taklang uhi. Moreh a thau ging lam zak ahihlouh banah tribe leader te’n vauna tuak uh chih theikha lou uh a, voluntary social orgn. makai te’n mipi hamphatna ding in nasem uh a, maban ah akisai khakpih teng in voluntary social worker-te subuai nawn lou din ngetna bawl uhi.
MNRF te’n naupang lalut
Imphal, Sept-16: IGAR(S) thusuak in a gendan in Assam Rifles te’n MNRF a child recruitment-te thang ah awk naupang 3 hunkhia uh a, Ukhrul district ah mi 3-te a khua ua pan Moreh veh ding a chilna mu uh a, Moreh mun a tung un MNRF-te nasem dia mat tang in om uhi. 4-Assam Regiment te’n thuguk a muh uh dungzui in Chandel district a khua khat ah naupang 3-te va hunkhia uhi. Akigendan in naupang 3-te bel MNRF te khut akipan taikhia in Chandel district tung uh a, paina ding theilou a omlai hutkhiak hi uhi. Tua tawh kibang in April 2016 in Joupi area ah Myanmar a MNRF-te training camp apan naupang 3 taikhia in India gam honglut uh chi’n gen uhi.
PREPAK a Home Secy. zi mat in om
Imphal, Sept-16: Imphal West Police Commando te’n zan nitak zan sawt nungin Tera Loukrakpam Leikai ah PREPAK a Home Secy. N. Rakesh Singh zi a tenna inn ah va mankhia uh hi’n kigen hi. Mat a om Khagembam (N) Nameirakpam (O) Media @ Langlen @ Thadoi Devi w/o N. Rakesh hi a, Police thusuak in PREAK Home Secy. zi in kum 2001 a PREPAK zom in training a zawh banah Sergeant rank tan len a, PREPAK-te Raising Day Oct 9, 2016 ni a tung ding tawh kisai in fund kai khawmna ah kigolh hi’n gen uhi.
Lamphel-Langol lampi hun khak
Imphal, Sept-16: Uripok A/C MLA L. Nandakumar in Lamphel leh Shija Hospital kikal a lampi bawl hoih ding in chiam mahleh Shija Hospital leh Game Village kikal lampi bawlna dia fund omlou a chih ziak in Chingmi-Tammi Apunba Lup te’n tuni zingsang dak 8:00 akipan Lamphel-Langol kikal ah sing leh suangtum zang in lampi khak uh hi’n kigen hi. Kiphinna neite’n lampi 2-te Uripok A/C bial sung hi a, kum 15 paisa apan bawl louh a om hi’n gen uhi. Amau emergency leh sahkhua tawh kisai-te paisuak sak uh a, Dr. S. Ibomcha, Addl. SP/Imphal West in kiphinna tawpsak ding in va gen mahleh lawhsam hi. Uripok A/C MLA in nitaklam in kiphinna nei-te kihoupih ding a chiam ziak in sun dak 12:15 apan kiphinna khawlsan uh hi’n kigen hi.
TUNI THUPI:
“Abraham leh Isaak kianga ka gam piak na kiangah ka honpe ding, na om louh nung chianga na suante kiangah leng gam jaw ka pe jel ding, achia.”
– Genesis 35:12
EDITORIAL:
Modi leh Amit Shah huihnung
Term 3 vingveng Gujarat Chief Minister hihna ana len Narendra Modi in a state naktaka apuahnung in surplus budget hunkhop bawlpih a, ‘Chaiwala’ chih in om mahleh Indian Prime Minister dingin telkhiakin hong om hi. Prime Minister Narendra Modi in India ah lupen hihna hon letnung in socio-economy banah dan leh thupiak dinmun leh technology vai hon awlmawh in, aneulai hun a singpi zuak chi a ngawhna om pen khet lumlet in hong om a, leitung pumpi theihphak mihing khat hong suak hi.
Prime Minister Modi in India gam leh leitang awlmawh pipen a aneih kawmkawm in gamdang tawh kizopna (foreign affairs) lam pibawl a, Modi leh Amit Shah impact in India ah gen nei mahmah dingin kilang hi. North India, Central India banah South India tanpha ah BJP in masawn mahmah hi’n kilang a, tu in India malsuahbial hon nawkkha ban a theih ahi. Arunachal Pradesh state buai mahmah lela, Congress party apan MLA dia telching a om tengin leng BJP pawl zom uh hidanin kigen hi.
Huchi kawmkalah, Modi leh Amit Shah huihnung in bangchibang in India malsuahbial hon nawk dia chih theih hilou hi. I gen taksa dungzui un North East ahihleh India a state dangte tawh kibanglou a helpawlte’ hatna bial ahi hi. Tu in Manipur state ah ILP issue ah thubuai liantak om a, singtangmite’n 3 bills tungtang ah kiphinna sousangtak neikawm in siluang 9-te vui hinailou chi ua, tuapan ni tamlou nungin Imphal ah Meitei/ Meetei pawlin Schedule Tribe (ST) demand na ziakin mega rally thupitak neihsawm lai uhi.
BJP Chief Amit Shah in zan a Imphal khawpi a thugenna hun aneihna ah, kumnawn a state assembly election om dingah, BJP candidate-te vawk ching ahih ngeingei leh Manipur State gamgi akekkei ding chi hi. Huchi kawmkalah, Assembly speaker in NPF MLA 5-te leh Congress MLA (Y Irabot) kitawpna pom a, huai in valley versus hills chih hon piangsak dingin gintakhuai leuleu hi. Ahitakin, NPF MLA te’n ahihleh Naga movement a zom mahmah ding uh chih chiangsa hi a, Y Irabot bel Manipur territorial integrity tawh kisai in theihtawp asuah ding chih theihsa ahi. Manipur phaizang bialin MLA 40 nei ua, singtangmite’n MLA 20 nei uhi.
Vaihawmna lentheiding in MLA hau penpen party hidinga, tua ziakin BJP Chief Amit Shah in Manipur phaizang mipi mitmei veng ahihdan chianga, Nagaland hiam ahihkeileh, Ukhrul, Chandel, Tamenglong leh Senapati munte ah thugenna va neikha bang hitaleh bangteng ava sekhe dia chih theih hilou hi. Amit Shah leh Modi apan huihnung tuamtuam in thil tamtak peilum let mahleh maban a Manipur state assembly election paizia ding theihbut haksa mahmah lai bangin kilang hi.
India malsuahbial adia tualsuakmi (Indigenous people) milip sah mahmah leh sahpen phial dia gintak Bodo-te hi ua, Assam mallam a Brahmaputra river piau tumlam pangteng luahdim zou in Bhutan banah Arunachal Pradesh telin state dangdang tawh kigamgitna ah leng omkha uhi. Bodoland i chih Manipur state chia apha mahmah chih theih hi. Modi vote campaign tungtawnin amau pawlin Assam state assembly election ah BJP ana gum uh chih ahi hi. BTC in centre govt tungtawnin bangteng hamphatna atuakta ding uam ah?
Hmar Peoples’ Convention (Democratic) leh Mizoram Government in kihouna (political talks) neilel ua, huai pen bangtan hong tunding hiam, centre government bangtan ah hong kigolh dia chih theih hilou hi. Mizoram state assembly election leng hong sawtnawn kei dinga, tua hun pen BJP makaih centre government in bangtan a hon bildawh leh semkhe ding uam chih theih hilou hi. Bodo te’n bangziaka BJP hon gum phut mawk uhiam chih ngaihsutna piaktak a, a kipan tung BJP govt nasepna mi tamtakin bildawh hi. Amit Shah in Manipur phaizangte’ maipha etna ziaka kampau aneihin Manipur singtangmite a sukkhak ngeingei leh Modi/Amit Shah thugen-te’n Manipur state ah BJP leitual zepkha theimawk hi. Assam’ Bodo leh Manipur singtangmite’ paidan hong kibang khollou maithei hi. PM Modi leh Amit Shah huihnung in maban a state tuamtuam 5 a Assembly election om dingah bangtan thil asukha a chih et ut huai mahmah hi.
No comments:
Post a Comment