HEADLINES:
Nute vualzawlna leh itna tuh hinkhua damsaktu ahi : Modi
PM Modi in tuni'n Rs. 3800 crore Scheme hong
Gandhinagar, Sept-17: Prime Minister Narendra Modi in tuni a apianchampha 66veina hunah Gujarat singtangmite adi’n Rs. 3,800 crore scheme hongkhia a, kum 97 a upa apianna nu Heeraben Modi tawh leng minute 30 sung hunzang khawm in anu’n vualzawlna ngetsak hi. Prime Minister in anu mai a kun a, vualzawlna ngetsak a a omlai lemlak Twitter ah khahkhia a, Nute vualzawlna leh itna in hinkhua damsak (A mother's love and blessings are the elixir of life) chi in Twitter ah khahkhia hi.
Prime Minister in Gandhinagar a atenna inn uh tuzing dak 7:00 in vapha a, anu leh asungkuante kimuhpih banah anu’n nektheih abawlte atapa nesak hi. Modi ahihleh anu it leh ngaina mahmah hi’n gen uh a, May 2014 a Prime Minister dia kichiamna aneih nung adia khatveina di’n Sept in a birthday hunah anu veh a, huai hun in anu’n Gujarat tawndan dungzui in Bhagavad Gita book leh Rs 5,001 pia a, huai sumte Modi in Kashmir tuilian thuakte panpihna di’n pekhia hi.
Gujarat Vanbandhu Kalyan Yojna makaih in Navsari a hunzatna ah Prime Minister in vualphalou (Divyangs) 11,000 adi’n vanzat tuamtuam Rs. 10 crore man hawmkhia in, singtangmite kiangah ‘land ownership document’ tuamtuam leng hawmkhia a, water management scheme 6 leh irrigation project 4 leng hongkhia hi. Huai huna Prime Minister in athugenna ah Gujarat mipite kianga masawnna tamtak omsak ding ahihdan gen a, mizawng leh dai-kilkal a omte adi’n huhna tamsem piak hiding chi hi. Water supply project tungtawn in singtang khua 960 apan minautang lakh 21 kiangah tuisiang piak hiding a, Dahod, Mahisagar, Narmada leh Chhotaudepur district telin settlement 23 inleng huai scheme hamphatpih ding uhi. Kadana-Karjan leh Kakrapar Reservoir a Lift irrigation project tungtawn in Dahod, Narmada, Mahisagar leh Surat district ah tuilou hectare 1,00,000 in tui ngah ding hi.
IMPHAL NEWS:
Justice T. Vaiphei kaisang
Lamka, Sept-17: Tripura High Court a judge hilel lai Justice Tinlianthang Vaiphei @ T. Vaiphei zan in India President in Tripura High Court a Chief Justice hi dingin koih(appoint) ahihdan Ministry of Law and Justice (Deptt of Justice), Govt of India a Joint Secretary Rajinder Kashyap in thupuan (notification) bawl hi. Thusuak in a taklatdan in aman Chief Justice hihna alak ni akipan huai dinmun len ding chih ahi hi.
Justice T. Vaiphei in a tungin Mizoram ah judicial officer len masa a, Parliament in North East Areas (Re-organisation) Act 1971 a pomkip zawh kum 2013 akipan Tripura, Manipur leh Meghalaya in High Court tuam nei uh a, huaima in Guwahati High Court etkaina nuai ah om uhi. May 16, 2016 in Tripura High Court ah Judge len a, huai a Chief Justice Deepak Kumar Gupta mun luah in acting Chief Justice hihna ana len ngei hi.
Pathian kiangah Gazette Order lan
Lamka, Sept- 17: Saikot Community Hall ah tuni sunnung in mipi kikhopna om a, Manipur govt. in Saikot Sub-division piching hidia a pomna govt in Gazzette order a suah Rev. Dr. Lalnghakthang Khawbung, Exe. Secy, RPC (NEI) in Pathian kiangah lan hi. Huai ah Hmar Inpui, Zomi Council, Manipur Peoples Convention (Manipur Group) leh Kuki Inpui, CCpur a President-te telin mipi tamtak paikhawm uh a, Inpi leh nam makai tuamtuam akipan thugen ngaihkhiak in om hi.
R. Lalkaisanga, Secy, Saikot Sub-divn Demand Committee (SSDC) in Sub-divn tawh kisai a panlakna leh thil omdan gen a, Chief Minister kiangah 2vei memorandum pia uh hi’n gen hi. Huai bawhzuina in kiphinna chituamtuam leng om hi. Dec. 13, 2014 a HSA Platinium Jubilee ah Manipur CM in Saikot pen Sub-divn piching a koih pah hidia a chiam bangin Aug. 29, 2016 in Gazzette Order suak a, September 2, 2016 in state govt in order suah hi’n gen hi. Timothy Z. Zote, Chairman, SSDC in agenna ah Sub-divn piching ngahna dingin CCpur dist. a innpi leh student pawl tuamtuamte’n a kithuahpih ban uah mipi leh hausate pankhawmna ziaka lawhching hi’n gen a, Sub-division thak ah khua 42 om hi’n gen hi. Committee te’n tuni’n Imphal ah Gazette Order vala uh a, Khawmawi ah mipi’n na vaidawn uhi.
SSPP Rayburn in fresher’s meet
Lamka, Sept- 17: SSPP Rayburn College (Hr. Sec. Section) in tuni’n Dorcas Veng a YPA hall ah fresher meet zang uh a, Chief Guest in M. Gouzamang Guite, EM, ADC/CCpur pang hi. Functional President in Lianzapau Samte, President, SSPP GHQ pang a, Lamkhankhual, President, SSPP JHQ Lamka telin mi tuamtuam in uap uhi. Chief Guest in siamsinte’n midangte tanpha in a phattuampih dia panla dingin hasuan hi. Tukum in freshers 229 om a, Dr. G. Suankhanhau, Lecturer, GBC in hasotna thugen in thumsak hi.
KZP in SDO/BDO kipahpihna nei
Lamka, Sept-17: Khangthah Zunpawl GHQ makaite’n tuni in Zion Street, Central Lamka a SDO/BDO camp office ah SDO/BDO thak Lamminlal Simte, MCS vaidawnna leh kipahpihna hun zatpih uhi. Huai hun ah Th Jamchinthang Simte, MDC (Thanlon) leng tel a, KZP GHQ makaite’n Khangthah Puandum silhsak uhi.
MCS officer 10 in join
Lamka, Sept-17: Tuma zeka IAS/MCS officer-te hunkhop transfer om ziakin tunitan in CCpur dist. ah MCS transfer mi 10 in DC office ah official in join-ta uhi. Amaute W. Ibohal Singh, i/c Addl. DC/CCpur & Project Director, DRDA/CCpur; Lamminlal Simte @ L.Simte, SBO/BDO, Thanlon; Mangminlian Vaiphei, SDO/BDO, Sangaikot; Lanjoy Thoudam, SDO/BDO, Kangvai; Lalthazam, AC to DC/CCpur; Jameson Sehlal Hangshing, SDO/BDO, Singngat; Ng,Noren Singh, ADC/Pherjol; Chunglienmang Kipgen, SDO/BDO, Henglep; S. Biren Singh, SDO/BDO, Parbung leh Seiminthang Lenthang, SDO/BDO, CCpur hi uhi. A hong join nailoute-L. Kunjo Singh, SDO/BDO, Mualnuam; Yumnam, SDO/BDO Vangai leh Soiminlien Lengen, i/c CEO/ADC, CCpur hi uhi.
Rendezvous Mega Musical Meet
Lamka, Sept- 17: CCpur College a Evangelical Union leh Rayburn College (Higher Section) kithuah in tuni nitaklam in Hiangtam Lamka a YPA GHQ hall ah Rendezvous Mega Musical Meet nei uhi. Huai ah Experience Worship, James Lalpu, LL Muona, Amos, Mami Sinate, Grace Moi Baite, Tracy Ngaihching leh Hope Cultural band telin lasiam tuamtuam te’n Pathian phatna lasa uh a, CCpur College Principal Ricky Vanlallawm Guite telin mi tuamtuam in uap uhi. Rendezvous Mega Musical Meet ahihleh Rayburn leh CCpur College a EU te’n Nov 2016 kha a Evangelical camp a neihna ding ua fund raise-na dan a asai uh hi’n kigen hi.
Online application hun kibehlap
Lamka, Sept-17: Gen. Manager, DIC/CCpur akipan kizadan in PMEGP 2016-17 online application Sept 16, 2016 tan ding chih himahleh Sept 29, 2016 tan hiding in ahun hihsau in om hi. Online application zawh in applicant te’n DIC office ah hard copy submit ngai ding a, a submit loute’ a cancelled/rejected hiding hi.
Hausa leh saptuam makaite adi'n mega fellowship
Lamka, Sept- 17: Evangelical Baptist Convention (EBC) Hq makaih in tuni’n EBC Mini-Auditorium, Dorcas Jubilee Guest House ah EBC saptuam omna khua a hausa leh EBC heutute adin ‘mega fellowship’ om hi. Huai ah Rev. S. Vungminthang, GS, EBC in hasotna thugen in, gamsung khantouhna dingin hausa leh saptuam makaite pangkhawm a corruption dou poimawh hi’n gen hi. Huai fellowship bel EBC saptuam sunga khua hausa leh EBC makaite kimeltheih a, Pathian nasepna ah hatzaw leh masawn ding tupna a sai uh hi’n kigen hi.
SUUNNA:
Tongkhothang Mate (93) of T. Jangnom village zan nitak dak 9:30 velin teknat in si a, tuni’n kivui hi.
IMPHAL NEWS:
BJP Prez in pangkhawm di'n ngen
Imphal, Sept-17: BJP National President Amit Shah in Manipur a hongphak tawh kiton in maban a Assembly election om ding ah party te kituaktak a pankhawm poimawh masa hidan in gen a, party ticket tang leh tangkhaloute peng party hatsemna ding a pangkhawm a khekhat om dingin ngetna nei hi. Amit Shah in October 1, 2016 akipan candidates sawmten mahni constituency chiat a panl dingin ngen a, party workers te kiangah door to door campaign nei ding, Wall painting campaign leh slogan campaign nei dingin ngen hi. BJP Manipur Pradesh in maban assembly election a ding ah candidate dingte min election om ma kha 3 bang a puankhe ding uh hidan in gen hi.
Cong makai 2 in Manipur hongpha ding
Imphal, Sept-17: Manipur a assembly election ding tawh kisai Congress makai nih in Sept. 18, 2016 in Manipur hongpha ding uhi. Thusuak kimu in a taklatna ah All India Congress Committee a Secretary Abhinash Pandey leh MPCC incharge CB Joshi ten assembly election ding tawh kisai in Manipur hongpha ding ua, tua hun in state Congress makaite tawh thil omdan houlim ding uh hidan in kigen hi. Congress makai khat in a genna ah, Congress makai kuateng in BJP zom ding uh hiam chih October 1, 2016 a kithei chiang ding hidan in gen a, national leaders ten Congress frontal Organisation te leng kimuhpih ding uh hidan in kigen hi.
UCM in June Uprising Day zang
Imphal, Sept-17: United Committee Manipur (UCM) makaihna in tuni in Kekrupat mun ah June Uprising Day zatna nei ua, tua hun in gam leh leitang humbit sawm a hinna pia mi 18 te han tung a pak piakna nei uhi. Hiai hun in UCM President Elangbam Johnson in UCM te Manipur state humbitna ding a chiklaipeuh a mansa gige hidan in gen hi. Aman a genzelna ah Indo-Naga talks pailel pen zawhsiang hipahta dingin ngen a, tua in Manipur state a hihkhak a leh UCM te dou ding a mansa hidan in gen hi. UCM in Manipur unity hihsiat khak a om a leh dai maimai lou ding a, maban ah gam leh leitang humbitna ding a Peoples movement pankhe ding uh hidan in gen hi. Manipur state sung a om nam tuamtuamte kituak tak a pangkhawm dingin chial hi.
Thau khahna ah numei 2 liam
Imphal, Sept-17: Imphal Langol Game village ah Sept. 16, 2016 nitak in pasal nih in thau a khahna uah numei liam ua, tua zawh in vengsung mipi’n pasal khat man in midang khat pen a khonung in police te kiangah kipekhia hi. Police thusuak kimu in a taklatna ah, N. Somorendro leh a lawm Y. Hemchandra te nitak dak 8:00 in Bolero (MN 01-7013) zangin Langol Housing Colony a Type-II a om numei a pasal tawh kikhensa kidnap a sawmna uah mipi’n thei man ua, tua phet in pasal nihten thau a khahna uah Meisnam Indrajit (23) a taw (buttock) ah kha in pailet a, kintak in Shija hospital puaktun in om hi. Huai banah Khaidem Memcha (53) leng a mailak thau in hihliam kha hi. Pasal nihten thau a khah phet un mipi thangpaiten Somorendro mantang man ua, Hemchandra bel kihemkhe man mahleh a khonungin police te kiangah Hemchandra a thau tawi tawh va kipekhia hi. Minihte Bolera zat ahihleh mipi kipunkhawmten hihsia uhi. Hiai tawh kisai in police ten FIR chiamteh uhi.
MU reservation issue ah buaina om
Imphal, Sept-17: Manipur University (MU) a reservation issue tawh kisai in students lungkimlouten Dean office tel in department tuamtuam hihsia uh hidan in kigen hi. Thusuak kimu in a taklatna in students kuate hiam in Dean Office a hihsiat zawh uh Anthropology department, Mathematics department leh Social Science old leh new block hihsia uhi. Students khenkhat in University a department tuamtuam a window te hihsia in signboard tanpha zan nitak a lakhia uh hidan in kigen hi.
Advanced excel training zousiang
Imphal, Sept-17: Institute of Co-operative Management, Lamphelpat te saina in kalnih sung programme on Advanced Excel neih a om tuni in zousiang uhi. Tuni a hunkhakna Director, Planning Deparment Dr. Th. Minindro Singh in Chief Guest hihna tawh uap a, Functional President in L. Tompishak Singh, Chairman Institute of Co-operative Management, Imphal pang hi. Hiai Advanced Excel bel Institute of Advanced Excel mun ah Sept. 5, 2016 in kipan a, huai ah trainees mi 23 vel ding kihel uhi.
Tuni a hunkhakna ah Chief Guest Dr. T. Munindro Singh in hiai bang programme ICM in a sai uh kipahpihthu taklang kawm in Computer knowledge miteng a dingin poimawh ta a, tua tungtawn a excel in bangteng hih thei hiam chih theih a zatsiam poimawh hidan in gen hi. Director, Insitute of Co-operative Management, Imphal Dr. N. Ranjana Devi in Institute in computer, entrepreneurship, skill development project tawh kisai training nuamte kiangah chilaipeuh a training pe theigige hidan in gen hi. Tua banah vocational training courses leng trade tuamtuam adingin pia, chi hi. Training a telte kiangah certificates piak in om hi.
Cleanliness drive nei
Imphal, Sept-17: BJP Manipur Pradesh ten tuni in PM Narendra Modi 66 birthday tawh kituak in Imphal khawpi sung ah cleanliness drive nei uhi. BJP Manipur workers ten Imphal khawpi sung mun tuamtuam hahsiangna nei uhi.
Bar Assn te'n silent protest nei ding
Imphal, Sept-17: Manipur a bandhs, blockade leh General strikes a om gige mawhpaihna in hongtung ding Sept. 19, 2016 in All Manipur Bar Assn. leh High Court Bar Assn. ten in silent protest nei ding uhi. Silent Protest bel zinglam dak 11:30 in Cheirap Court Complex ah kipan BT Road tawn ding in Ima Keithel ah legal awareness nei ding ua, tua hun in Manipur a bandhs, blockade leh general strikes in niteng hindan a hihkhak dan tawh kisai tangkou ding uh hidan in kigen hi.
TUNI THUPI:
"Lungmuanna kim ka nei hi, Pathian aw, lasa in ka hon phat ding hi:
-Sam 57:7
EDITORIAL:
Vualphaloute adi’n lametna om
Tulai tak in Brazil khawpi Rio de Janeiro ah vualphalou leh piangsualte ading bik in Paralympic games kichi om a, hiai tungtawn a kimawlna tuamtuam in piangsual leh liamna neite’n kidemna nei uh a, hoihtak a i et a leh vualphalou leh piangsualte adingin lametna lianpi om a theih in om hi. Eilam ah bel vualphalou leh piangsual banah taksa a bukimna neiloute bangmah dia zat theihlouh himhim in i koih uh a, ahihziakin Paralympic games tungtawn in vualphaloute leng maimai lou ahihdan uh muh in om hi.
Paralympic games bel 21st century laipek a om khin hi a, eilam te’n i theikha vak kei uh a, tunaizek in kitheipan hileh kilawm a theih in om hi. Paralympic Games ah khut langkhat omlou, khe (leg) neilou a games tuamtuam kimawlte i et a leh pianken a piangsualna neiloute sang mah a leng siamzaw tamtak om uh ahi chih theih thak in om hi. Paralympic bel International Olympic Committee (IOC) in Olympic games tawh kizom in nei zel uhi. Tua ziakin Summer Olympic Games leh Winter Olympic Games om bang in Summer Paralympic Games leh Winter Paralympic Games leng om hi. 2001 kum in IOC leh International Paralympic Committee (IPC) te’n kilemna suaikai uh a, Olympic zintun te’n Paralympic leng zintun zom ngal dingin lemsa uhi.
Rio Paralympic Games ah gam tuamtuam 161 akipan kimawlmi 4300 paikhawm in kimawlna tuamtuam ah kidemna uh a, Sept. 7-18, 2016 sung om ding a, Sept. 18 (Sunday) in hunkhakna om ding hi. Amau bel piangsual hetlou leh bukimlouhna nei hetlou bang in kimawl thei uh a, akimawl uh et thanuam huai petmah a, khut leh khe neilou a hiai bang a om thei chih i ngaihtuah chiangin naktak in hon hanthawn thei mawk hi. Khut langkhat kitan khat in shot put hiam, javelin throw a hon bawl chiangin piansualna nei hetloute sang a leng hatzaw phial in hih zou mawk a, wheelchair zang in Tennis, basketball leh Table Tennis nalhtak in kimawl thei mawk uhi. Poihlongna nei hetloute hih theih teng hih thei uh chihna suak hi. Hiai a dingin India inleng kimawlmi 19 sawl uh a, tunitan in medal 4 bang lata uhi. Amau te’n India min naktak in minthangsak uh a, paralympic games tungtawn in khawvel gam tuamtuam in India theih lawh ding ua gintak in om hi.
Eilam ah bel nidang in piangsualte, poihlongte leh bukimna neiloute inn khawng a om maimai din ngaihdan i nei uh a, paralympic games tungtawn in amau te’n leng siambik ana nei uh ahihdan muh in om hi. Lametna kichi thilteng ah ana om a, eilak ah leng vualphalou leh poihlongna neite tuam koih mailou in banghiam a siam uh chi in zonsuah sawm leng banghiam a zat theih ngei ding uh ahi chih theih poimawh hi. Paralympic games ah va kihel uh heh chi khang ahihziakin amau a siam khat bek nei ngei ding ua gintak ahi. Pathian in mi a siamna ziak banghiam om ngei ding ahi. Mi a mawkna a siam gintakhuailou a, pianken a poihlong om mahleh a khawnung a kihih khak ziaka poihlong chih bang leng om thei veve hi. Huaiziakin, IPC in Paralympic games a kihel thei ding tawh kisai in ‘dan’ (rule) bawl uh a, huai a chitna neite kia kihel uhi. Paralympic games i et akipan in hiai bang a siamna dingin bangtan kizil in akisin ding ua, chih lungsim in ngaihtuah thei hi. Khe a liamna neite a ding bik in wheelchair basketball, wheelchair tennis chih bang om a, hoihtak a et vengveng a leh vualphalou leng pianken a mi phaloute a dingin hanthawnna hoih mahmah hi a muh in om hi. Vualphalou leh pianken a piangsualte leng ana maimai lou ahi uh chih hon theisak a, eilam ah leng tuabangte talent zongkhe thei leng hoih mahmah din gintakhuai hi. Paralympic games tungtawn in vualphalou leh pianken a poihlongte a dingin lametna lianpi om hidan a muh in om hi. Huaiziakin, na mi batlouhna pen zumpih kenla banghiam ding a Pathian in a hon siam ahihdan kuapeuh in theih chiat poimawh zaw hi.
No comments:
Post a Comment