HEADLINES:
Manipur pua a om state tuamtuam ah leng Black Day kizang
Tuibuong a Indoor Stadium ah Black Day zat in om
Lamka, Sept-13: Kuki Inpi, CCpur leh KSO/CCpur inntekna in tuni’n Tuibuong Peace ground a Indoor Stadium ah Sahnit Ni (Black Day) zatna om a, huai ah kum 1992-1997 hunlai a NSCN(IM) te’n Kuki mi 900 val mulkimna bei a a thahte uh suunna leh zahna hun zang uh chih ahi hi. Thangkhosei Haokip, President, Kuki Inpi Manipur (KIM) telin Kuki nam sung a political, social, student leh saptuam tuamtuam a makaite’ telin mi tamtak paikhawm uhi.
Rev. Dr. Thangboi Chongloi, Local Pastor, KBC Central Church, Tuibuong in hun patna dingin thumna nei hi. Rev. LB Angam, Director, ECA makaih in mipi paikhawmte’n nampi adia thumkhawmna leh misite suunna a neih ban uah Kuki Women Union (KWU) makaih in misite-te zahna in candle 905 hal (lighting nei) uhi.
Thangkhosei Haokip, President, KIM in a thugenna ah kum 1992-97 sungin NSCN (IM)-te khutlum in Kuki mi-le-sa saptuam makai leh numei naupang telin minautang 905-te huham taka thah in om a, tenna inn 360 val haltum kia hilou in tenna ding inn le-lou neilou mi 1 lakh val galtai hi’n gen a, huai tawh kiisai Manipur govt leh central govt. ah memorandum 66 val piak ahih ban ah Supreme court ah PIL tanpha piak in om mahleh Manipur a politics kihhuaitak ziakin ngaihsak hilou a, KIM in kituahna deih gige in tutan thudik mah paipih hi’n gen hi.
President, KIM in a genzelna ah mawhna neilou Kuki-te that a telte India danbupi dungzui a thudika thutanna om mateng India leh NSCN (IM) in kilemna neih sawm in panla mahle uh doudal ding ban ah pomtheih hilou din gen a, mulkimna bei a thah a om mihing 905 te’ tungthu hihveng ahih masiah Tribal Unity kichi gentheih hilou ding chi a, India govt in tutan a ngaihsaklouh Kuki-te India mi-le-sa hilou hiam chi’n dotna bawl hi.
Misite sisan in lawhchinna tun ngei ding a lam-et thu gen in Kuki-te buaina khawvel pumpi in a theih ban ah Pathian inleng thei ahihman in lungkelou a pang ding in mipi paikhawmte ngen a, khua 360 val luahkik theihna dingin hun paisa a kitheihsiam louhnate mangngilh a nampi damna dinga panla ding leh tuni akipan kituahna nei a, kimuhdahnate paikhe dingin kuapeuh ngen a, kituaka pankhawm ahihleh lungkiakna ding omlou chi hi. Huaizawh in President KIM in “Nampi Kitepna” makaih in mipi’n kichiamna nei uhi.
Sept. 13, 1993 in NSCN-IM gamtatna ziakin Tamenglong dist sung Tamei khawkiang ah Zoupi khawmi 108 (Aimol, Tamei ah pasal 87, Gelnel ah pasal 17) numei leh naupang tanpha thah in om uh a, Kuki tate’ sihtam nipen ahihman in Sept. 13 in SAHNIT NI (Black Day) puan hi a, huai dungzui in amaute theihgigena in kum tenga zat hi’n kigen hi.
Black Day tuni’n Manipur state sung mun tuamtuam ah leng zat hi a- CCpur dist ah Tuibuong banah Leimatak leh Sangaikot; Imphal ah Khongsai Veng, Tamenglong dist ah Phaitol/Jiribam, Ukhrul dist ah Tuisomjang, Chandel dist ah Moreh, Sadar Hills ah Kangpokpi leh Saikul ah zat hi a, state dang Delhi, Shillong leh mun tuamtuam ah leng zat in om hi. Huai banah, Kuki Inpi Gunhom Lhang, Kangpokpi Town Committee, Kanggui Women Welfare Orgn leh Kanggui Youth-te saina in Kanggui Christian Church ah mipi kikhopna om a, Imphal a Khongsai Veng Community Hall a zatna ah Dr. T. Lunkim leh Thangkhokhup Kipgen-te khuallian in pang uhi. KIM leh KSO Tengnoupal Block-te saina in Tengnoupal Christian Church ah programme zatna om a, Pastor Th. Chongloi makaihna in misi-te leh lusuunna tuak innkuan-te a ding in thumsakna om a, mipi paikhawmte’n banner leh flag vom tawi in Biakinn Campus apan SDO office tan mass rally pai uh hi’n kigen hi.
South Kashmir ah helpawl leh kiphinte hahsiang hiding: Army
‘Operation Calm Down' adi’n Army 4000 sawllut
Srinagar/New Delhi, Sept-13: Kashmir phaizang a buaina in venlam anawt theihlouh ziakin ‘Operation Calm Down’ bawldi’n district 4 a Indian Army brigade omteng South Kashmir lut di’n tuni a sawlkhiak hi uh a, amaute kithuahpih di’n army personnel dang 4000 vel tuni mah a sawllut in om hi. July 8 apan helpawl member 100 valte gamgi kantan in South Kashmir lut uh ahihdan Indian Intelligence agency-te’n atheihkhiak ziakun Operation neih dinga thupukna bawl a om hi’n kigen hi. South Kashmir sung mun tuamtuam a buaina sousangtak omlai in, siluang kibehlap ding lauh ziakin security force tamkhop lakkhiak hi uh a, police personnel te’n Law & Order enkai mahle uh huai nung in helpawl te’n Pulwama district kantan in Central Kashmir a Budgam district tanpha fangkual uh hi’n intelligence pawlin theikhia uhi.
Helpawl tawh pangkhawm minautang pawlkhat te’n South Kashmir leh Srinagar kawmtuahna National Highway khaktan uh a, buaina pawtsan dia Srinagar zotsawmte leng sawlkik uh chihthu om hi. Amaute hahsiang ding in Army kiangah thuneihna sangtak piak in om a, ahitheitan a thagum tawm-theipen(minimum force) zang dia nget hi un official thusuakin taklang hi. Hizbul Mujahideen terrorist Burhan Wani nungzuite hatna bial, South Kashmir a Pulwama, Shopian, Anantnag leh Kulgam ahihleh buaina om huna sousangpen hi’n kigen a, Army pawlin Operation aneih hun uah CRPF leh State Police inleng kithuahpih ding uhi. Thusuakin agendan in lampi khaktan hahsiang masa ding uh a, helpawlte gamtatna ziaka minautang haksatna thuakte kiangah leng bitna(security) pe ding uhi. Army te’n Pulwama a Karimabad area ahahsiang(clear) khit chiang un Shopian leh Kulgam zuan nawn ding uhi.
Shopian district a Heff-Shrimal banah Pulwama district sunga Samboora, Lillahar, Pulwama town, Tral, Kakpora banah Anantnag district sunga Qaimooh leh Redhwani ah galvan tawh helpawl tamkhop om uh hi’n thusuakin taklang a, Operation Calm Down hunah Army thahatna zang in amaute leh anungzuite(sympathizer) uh betdaih hidi’n Army thusuakin taklang hi.
LOCAL NEWS:
UNICEF saina in Workshop omding
Lamka, Sept-13: National Health Mission, Manipur leh UNICEF, Guwahati Office saina in Sept 14-16, 2016 sung Hotel Imphal ah ‘3-Day state Communicaton Strategy Development Workshop on Social Behavior Change Communication’ omding hi. Manipur a Dist. teng apan DIO/DFWO, Dist. Program Manager, NHM leh Dist.Community Mobiliser teng telding uhi. Lamka apan Dr VC Pau, DIO/DFWO, Seiboi Mate, DPM, NHM leh Vung Mary, DCB, NHM telding uhi.
MA English 1st class in zou
Lamka, Sept-13: Miss Livia Tinglianhoih d/o Hauneilal, Chief of Munpi, Henglep TB block in NEHU nuai ah MA English final result suak ah 1st class in zou a, 5th position in pang hi. Livia Tinglianhoih bel asungkuante tawh tulel in Compound Veng ah om uhi.
Mortgage in gari 10 koihsak
Lamka, Sept-13: Mang David (38) s/o Zamkholian of Vengnuam, New Lamka in March & April 2016 in Ningthoujam Opendrajit (39) s/o N. Khelemba of New Bazar, Bus Parking kiang ah gari 3-Scorpio S10 (No. MN02B-1902), Bolero (No. MN01S-1910) leh Safari Storm (No. MN01S-0933), gari 1 ah ni 1 zatman ding Rs. 3,000/-in gari 3 koih a, N. Opendrajit in hoihtak in gari zatman leng pia hi’n kigen hi. Mang David in a sungkuante leh tanaute gari 7- Duster (No. MN02A-8332), Verna (No. MNO1X-4718)), Swift (No. ML05J-4874), Bolero (No. MN01S-2765), Maruti Car (No. MN02A-5472), Bolero SLX (no. ML05K-4978) leh Bolero A/F kigelh gari 1 ah ni 1 zatman Rs. 3000/- piak ding in Thounaojam Ningthem Singh s/o Th. Ibohal Singh of Luwang Sangbam Mamang Leikai, Imphal East kiang ah koih nawn hi. Himahleh Mang David theihlouh in Ningthoujam Opendrajit leh Thounaojam Ningthem Singh te’n gari 10 te mi tuamtuam kiang ah mortgage in ana koihsak uhi. Mang David in atheih in CJM/CCpur ah complaint khia a, CJM/CCP vide Meno No. CJM/CCP/2016/197 dated 6/9/2016 dungzui in CJM/CCpur in Lamka Police Station ah case suizui ding in pesawn a, Police te’n suizui in FIR No. 45 (9) 2016 CCP-PS U/S 420/406/34 IPC registered uhi.
Gospel Musical Concert om
Lamka, Sept-13: Evangelism & Mission Deptt., Chin Baptist Association (CBA) Tangnuam saina in tunitak dak 5:00 in Tangnuam khua ah “Husang thei khempeuh in Topa Phat un” thupi zangin Gospel Musical Concert om, huai ah L. Tuan Khan Lian, Chairman, LEM Tangnuam in thugen hi. Huai hunah, T. Pumkhothang, Glady Lalparzo Sanate, Florence Lianching, Tracy Ngaihching, Hnunhoih, Niangtanching leh Chingsonkim te’n lasa uhi. T. Pumkhanlian, Asst. Secy Evangelism and Missions Deptt in hiai a sum muhte zangin year plan tuamtuam sepsuah hidi'n gen hi.
Saikot SDO Gazette order collection team-te vaidawnna om ding
Lamka, Sept-13: Saikot Sub-Divn.Demand Committee (SSDC) makaih in Sept 17, 2016 sunnung dak 1:00 in M. Ramthar/Khawmawi ah Saikot SDO Gazette Order Collection Team-te vaidawnna om ding a, huai zawh sunnung dak 1:30 in Saikot Playground ah Gazette order latna program omding hi. Huai ah Guests of Honour in President, Hmar Inpui; Chairman,Zomi Council; President, MPC (M); President, KIC; President, Thadou Inpi/CCpur pang ding uhi. Timothy Z. Zote, Chairman, SSDC in govt. gazettee order simkhiatna nei ding a, Rev. & Dr. Lalnghakthang Khawbung, Executive Secy. RPC (NEI) in Pathian kiang ah landing hi. Guests of Honour in V/A Saikot leh SSDC a Adviser te pang ding uhi.
BJP member-te adi’n Bus
Lamka, Sept-13: BJP National President Amit Shah in maban Manipur Assembly Election ding tawh kisai ni 2 om ding in Sept 14, 2016 in Imphal hongtung ding a, Palace Compound a Hapta Kangjeibung ah zinglam dak 11:30 in election campaign patna ding in BJP election rally hun ah thu gen ding hi. Imphal program a hawhsawm BJP member-te’ ading in Family Lane a Dist. BJP office ah bus omding a, zinglam dak 9:00 in kuankhe ding uhi.
Guta te’n van tamtak gumang
Lamka, Sept-13: Guta te’n zannitak in Mualveng a om Thangthanlian Guite’ inn luh in innsung apan vanzat tamtak- TV, gas cylinder, inverter 2, cushion 12, .inverter battery, blanket 5, stabiliser 1KV, aluminium danbel, induction heater gumang uhi. Inn neitute’ Imphal ah om ziak un guta te’n nuamtaka gukhia uh hi’n kigen hi.
SSPP JHQ Imphal Prez election
Lamka, Sept-13: SSPP Ghq makaih in Sept. 30, 2016 in Imphal, Chingmeirong a Tribal Research Institute ah SSPP JHQ Imphal Presidential election om ding hi. SSPP JHQ Imphal makaite kiang ah form muhtheih ding a, Sept. 25 nitak dak 4:00 tan in nomination file theih ding a, huani mah in piaklut theih ding hi. Sept. 26, 2016 zinglam dak 10;00 in scrutiny om ding a, JHQ huapsung a branch tengin vote 7 (seven) tan neithei ding uh a, Sept. 25, 2016 nitak dak 4;00 tan a voter list pelut dingin D. Thangchinmawi, Election Commissioner, SSPP GHQ in theisak hi. Standing Committee, SSPP GHQ Dan-bupi Bung II, Article 4, 2(d) na a “Kumpi naseem ahihlouh ding ahi” chi a kigelh pen election ah zat hilou dingin kigen hi.
6th Schedule tawh kisai genkhawm
Lamka, Sept-13: All Tribal Women Union (ATWU) makaih in tuni’n dist. hospital morgue ah kikhawpna om a, huai ah Khupchinpau Guite, Advocate in 6th schedule tawh kisai gen in sinsak hi. Zingsang apan ann-ngawl thumna nei uh a, mun tuamtuam apan mi 150 val paikhawm uh a, gam leh leitang a dia Pathian buan in thumkhawmna a neih banuah mi tuamtuam te’n lungsim a puakgik a neihte uh gen uhi.
Khupchinpau Guite, Advocate in 6th schedule tawh kisai agen banah mipi apan dotna tuamtuam omte dawng a, 6th schedule singtangmite adia poimawh leh bitna omsun ahihdan gen in, demand dangte hihbuai khalou chi’n gen hi.
SUUNNA:
Songhoiting (90) m/o Khailianlal of Hill Town, tuzing dak 4:00 velin teknat in si a, nitaklam in New Christian Cemetery, HQ Veng ah kivui hi.
IMPHAL NEWS:
CM in dawng nuamlou
Mun tuamtuam ah Id kizang
Imphal, Sept-13: Manipur a mun tuamtuam a Muslim-te omna bial a Mosques leh Eidgahs teng ah tuni’n Id-Ul –Zuha zatna om a, Thoubal district a Sangaiyumpham a Eidgah mun a Id-Ul-Zuha zatna hun ah Chief Minister O. Ibobi in zingsang in kithumna hun va uap a, huai zawh in Eidgah kim ah singnou suan hi. Huai nung a media-te tawh kimuhna hun ah Wangkhei A/C a MLA Yungkham Erabot in Manipur Pradesh Congress Committee (MPCC) leh Congress MLA hihna apan kitawpna a piak tawh kisa a dotna a bawl uh CM O. Ibobi in dong nuamlou a, politics tawh kisai hilou in sahkhua tawh kisai a Id uap ahihdan gen hi.
Amit Shah vaidawn di'n kisakhawl
Imphal, Sept-13: Manipur ah ni 2 om ding in Sept 14, 2016 ni a BJP National President Amit Shah hongtung ding tawh kisai in state BJP worker te’n amah thupitak a vaidawn ding in kisa khawl uh hi’n kigen hi. Ajay Jambal, NE-in-charge, BJP; Prakash Javedkar, Minister of Human Resource; Ram Madhav, National Secy., BJP; Hemanta Bishwas, Union Minister leh Prahar Patel, in-charge of Manipur, BJP te’n Amit Shah hon zui ding uhi. Akigendan in New Delhi ah Sept 14, 2016 zingsang dak 7:45 velin Indigo flight (6E-939) in Amit Shah hong kipan khe ding a, zinglam dak 11:45 vel a Imphal hong bawh ding in kigen hi.
Imphal hongtung tawh kiton in maban Assembly election ding tawh kisai in BJP Manipur Pradesh makai-te tawh panlak ding dan genkhawm ding uh a, tua zawh in BJP Manipur Pradesh-te saina in Polo ground ah public meeting hun uap ding a, huai hun ah tulel a sitting MLA khenkhat-te BJP ah laklutna dia lemsakna a puangkhiak ding banah MLA kitawp a BJP zom thak Y. Erabot vaidawnna nei ding hi’n gen uhi. Sept 14, 2016 nitak in Imphal Hotel ah zan giak ding a, Sept 15, 2016 zinglam dak 9:45 velin Indigo flight (6E-222) in New Delhi zuan ding hi’n gen uhi.
Thoubal District-te PET ah tel uh
Imphal, Sept-13: Pangei a Manipur Police Training Center (MPTC) ah Sept 11, 2016 akipan in Thoubal district a candidate-te adi’n Physical Efficiency Test (PET) om a, huai ah candidate 572 tel uhi. Thoubal district a candidate te’n Sept 14, 2016 tan zinglam dak 8:00 akipan nitaklam dak 4:00 sung PET sunzom lai ding uhi.
Kikaptuahna ah ZUF cadre 1 si
Imphal, Sept-13: Tamenglong district ah zan nitaklam dak 5:30 velin Taodaijang village ah NSCN(IM) leh Zeliangrong United Front (ZUF)-te dakkal 1 sung vel ding kikaptuah uh a, huai ah ZUF cadre 1 kaplup a om hi’n gen uhi. Police thusuak in NSCN(IM) leh ZUF-te zan in Taodaijang village ah kituak kha in kikaptuah uh a, tuni zinglam dak 11:00 vel a ZUF cadre 1 sisa in kimu a, a taksa tungah thau tang lutna ma muh theih ding om hi. Kikaptuahna mun leh a kim-te ah security force te’n helpawl-te hawl khiakna ding in combing operation pan uh a, NSCN(IM) te’n India govt. tawh ceasefire agreement bawl mahle uh Manipur huamkha lou a, Tamenglong district ahihleh Nagaland tawh kigamgi ahihziak in helpawl 2-te a chang a Manipur hong lut zel uh hi’n kigen hi.
Minister escort te’n mi 1 soisa
Imphal, Sept-13: Shumang Lila Artist banah Transgender Huirem Bisesh in zan nitak in Yaiskul ah M. Okendro, Minister (Rural Development & Panchayati Raj) muh in a escort te’n soisa uh chi hi. Huai tawh kisai in tun’n press meet om a, huai ah Hirem Bisesh in a gendan in amah leh a lawm-te khat Car in zan nitak a Yaiskul Chingakham Leirak mun ah Minister M. Okendro leh a escort-te tuak uh a, Chingakham Leirak ah lampi neu ziak in amau Car leh Minister convoy-te ki pelh theih louh ziak in tang uhi. Gari a heksiam louh ziak in escort-te kiangah a gari va hekkhiak sak ding in gen a, Escort-te lakah mi 1 in va heksak a, gari a hekkhiak sak zawh nung in vuak tawh thuah hi’n gen hi. Escort te’n Shumang Lila artist ahihdan uh thei ua, thau sial phei a tat khumna ziak in a mai lak liam a, thiltung hun ah Minister leng om mahleh etthoh hi’n gen hi.
Aman a genzelna ah Thailand a Miss International Queen Contest of Transgender hun ah Manipur min in kuan sawm chi’n gen hi. Thiltung hun a om Bisesh lawm Khumanthem Rohit in thiltung tawh kisai in Shumang Lila Council a President Khumanthem Rohit in Rural Minister kiangah thubuai sukveng na dia liamna tuak Artist leh Council-te mu ding in theisak a, Minister in ngaihdam ngen dia Council-te a thuzak keileh kiphinna pan ding uh chi’n gen hi.
Recruitment Rally ah telthei ding
Imphal, Sept-13: Senapati ah Army Recruitment Rally ding tawh kisai in Online application bawlna hun ding Sept 30, 2016 tan hi a, ARO Rangapahar in thusuak a bawl thakna ah House Keeper/Mess Keeper lakna dia education qualification niam pen Class VIII hiding a, Manipur apan Candidate Class VIII pass teng banah Oct 1, 2016 tan a kum 23 ching te’n online tungtawn in Tradesman category apply thei ding uhi.
Oct 1, 2016 akipan Admit card hawmkhiak hiding a, Candidate-te admit card tungtawn a screening bawl hiding a, admit card neilou-te rally hun ah telsak hilou ding in gen uhi. Senapati ah Oct 16-20, 2016 in recruitment rally om ding a, Senapati apan mun gamla a omte a ding in District administration te’n candidate-te pai nang ngaihtuah sak ding uh a, huai tawh kisai a thuchian theinuam te’n ARO Rangapahar ahih keileh contact No. 8729987931 /9862877598 ah thuzak theih ding hi’n gen uhi.
Neroca FC team-te hongtung
Imphal, Sept-13: Manipur Football Club New Delhi a 128th Durand Cup Football Championship ava khel NEROCA FC te tuni in Imphal Airport hong tung uh a, huai hun ah Imphal International Airport a office, NEROCA member leh football fans te’n ana dawn uhi. Akigendan in NEROCA FC te’n 128th Durand Cup ah final lut ua, final ah Army Green te penalty in zoulou uhi. Amau vuallel mahle uh cash prize Rs. 20 lakhs sang veve uhi. NEROCA FC te’n Sept 14, 2016 nitaklam dak 2:00 in Polo ground a 11th Manipur State league hun ah FC Zalen-te tawh kimawl ding uhi.
Doctor suankhiak mawhpaih
Imphal, Sept-13: Yaingangpokpi Lamjing Nupi Lup (YLNL) te’n Yaingangpokpi Primary Health Centre (PHC) ah Doctor kisam mahleh huai PHC apan Doctor 2 suankhiak a om mawhpaih thu puang uhi. Hiai thu tawh kisai in Manipur Press Club ah press meet om a, huai ah K. Inaobi Devy, Secy, YLNL in Ukhrul, Senapati leh Imphal East district a damlou teng ki-etsakna mun Yaingangpokpi PHC himahleh bangthu a akisaipih Dept. te’n Doctor 2 suankhia uh hiam chih dotna bawl hi.
TUNI THUPI:
“Huan, lei a sia a a vuak kia ahi; tui thukpi tung a mialin a mial hi. Pathian khain tui tungte a opkhum hi.” – Genesis 1:2
EDITORIAL:
Tui tawh kisai a buaina
Supreme Court in Cauvery luitui tawh kisai thusuah abawl tungtang ah state nih- Karnataka leh Tamil Nadu state kal sousang mahmah a, tua ziakin luang akikham banah gari tampitak halsiatin om hi. Tui (water) pen michih adingin poimawh a, Tamil Nadu leh Karnataka state chauh hilou in state tamtak buaina leng ahi.
Mihingte leh thilsiam ganhingte’ adingin chiklai peuhin tui poimawh hi. Huaibang kalah, vaigamte ah tui taksapna nasa mahmah a, abiktakin dawn ding chauh hilou in lou bawlmi (farmers) te’ adingin tui poimawh diaka, tuichinna (Dam) apan tui kiningching khahkhiak ahihlouh chiangin a loubawlna uh lawhsam sek hi. Khawkeu (drought) ziakin a louma uh mi tamtak lawhsam in, amau leh amau kithat chih vaigam ah zak ding om gige hi. Supreme Court in leng tui tawh kisai ngaikhawk a, Karnataka leh Tamil Nadu te’ kala thubuai ‘Cauvery issue’ tungtang ah- inn vengna hi ua, hingkhawm, takhawm in om un chi’n thupiak ana nei uhi. SC thupiak in gen nei mahmah hi’n theihtheih a, state 2 te’ kalah kitheihsiamna lampi asial uh poimawh dingin ngaihsut huai hi.
Mainland India telin state tuamtuam ah tui tawh kisai in buaina ana om mun mahmah chih haihvual ahikei. Tu in, eilawi in bangmahlou in ngaimah lehang leng, eilawi maban ding himaithei hi. I gam keu deuhdeuh, sing-leh-gua ki phukphuk mai, khawlum lah nasa semsem, luiguamte thuk deuhdeuh, tuiluang kiam hiai-hiai ahi. Vaigamte’n tui tawh kisai a haksatna atuah uh eilawi maban ding leng hithei. Irrigation tawh kisai a ikinep pih uh Khuga Dam lah kingakna tak chinglou in canal omte chimchim mai, i tuilou neih sunsunte tui supply tu dingin hiai Khuga canalte muanhuai taktak mah ding hiam chih ngaihsut huai hi.
State dangte’ buaina eilak ah leng a hong tungkei ding chi hetkei ni. Tuisiang dawn ding leh tuilou a tui petu ding nidang chiangin itasam thei uhi. Tu in bel houchik in ngaihtuah mahle hang, tuapan kum 10 tanin bang i chi ding ua chihte gentheih louh hi. I lakah PHED in tui tawh kisai in Zone 3 nei a, Koite Lui, Lanva lui leh Khuga Dam-te ahi hi. Hiaite mipite’ adingin bangtan kingakna tham hong hiding ahia chih theih hilou hi. Mi bangzahhiam in tuisiang dawn ding athawn a angah lai in, Lamka khawmi tamtakin niteng in tuidawn ding lei gige mai hi. Tui tawh kisai haksatna in i maban uh hon bawm touzel dingin gintakhuai a, tuachauh hilou in tui nopna mun i chih a tengte leng tui kituh a kisual phialphial ki omta chihthu bangleng om hi.
Interstate River Water Disputes Act, 1956 (IRWD Act) kichi ana om a, hiai Act ahihleh Parliament of India in Dan bupi (Constitution of India) a Article 262 a ana henlut uh ahi hi. Luitui tawh kisai in state tamtakin buaina ana tuah ziakin parliament in ngaikhawk hi. Lui/guam tungtawn a tui luang peuhmah tou luan theilou in aniamna lamlam manawh chih kuapeuh theih ahi. Huchi kawmkalah, angsung theihna kichi bangleng ana om law mahmah a, a innsak pa’n a innkhangpa pe’n tui a ngolhna dinga a dantan mawk leh huai leng dan kalhna liantak ana hi. Karnataka leh Tamil Nadu state kal leng tuabang mah ana hingei dingin gintakhuai hi. Hun paisa in tui tawh kisai a buaina ziakin state khat leh khat kalah Godavari Water Disputes Tribunal, Krishna Water Disputes Tribunal, Narmada Water Disputes Tribunal, Ravi and Beas Water Disputes Tribunal, New Krishna Water Disputes chihte dinkhiakin ana om a, tu in Cauvery Water Disputes thupitak om nawn hi.
Tui kichi mihingte’ damtheihna dingin alou theilou hi a, huai kawmkawmin, gensa bangin Irrigation, industrial leh adangdang ah zatna ding tamlaw mahmah hi. Bangchibang in eilawi in leng tui humbitna ding tawh kisai in pan ila ding ua chih i ngaihtuah lawk uh hun mahmah ta hi. Lui luang i neih sunsunte uh ikepbit uh poimawh a, i population khan dungzui in Lanva lui, Koite lui leh Khuga Dam pe’n nidang hun chiangin kingakna tham hong ching hetlou dingin gintak huai hi.
No comments:
Post a Comment