HEADLINES:
DoNER Ministry in Rs. 100 crore val khahkhia
 |
| http://www.orissadiary.com/ |
Imphal, Sept-14: Development of North Eastern Region (DoNER) Ministry te’n New Delhi ah tuni’n Union Minister of State (Independent Charge) for DoNER & MoS PMO Dr. Jitendra Singh makaihna in meeting nei uh a, huai hun ah Dr. Jitendra in tu financial year a kha 5 masa (April - August) sung in Manipur ah development project tuamtuam adi’n DoNER Ministry in Rs. 100 crore khahkhia hi a, Non Lapsable Central Pool of Resources (NLCPR) nuai a project tuamtuam adin Rs. 28.47 crore leh North Eastern Council (NEC) nuai a project-te adin Rs. 75 crore khahkhiak hi a, huai banah India govt. nuai a Ministry tuamtuam apan funding leh budget-te leng tel hi’n gen hi.
North East state teng lakah Manipur in Central Ministries tuamtuam apan huhna leh liberal funding lam ah hamphatna tam ngahpen a, Jiribam-Silchar rail link leh Jiribam apan Tupul tan a broadgauge rail track project tungtang leng gen in om hi. Aman a genzelna ah Imphal-Moreh leh Senapati-Imphal kikal a lampi four-lane hihna dia panlak hi a, Power sector tawh kisai in Ministry of DoNER panpihna in state govt. leh a kisaipih agenceis te’n Imphal ah buaina omlou in power supply pe thei uh chi hi. North East a district HQ 103 teng akinaihpih pen Highway tawh kikal lampi two-lane a bawl hiding a, huai tawh kiton in lampi khenkhat four-lane a bawl theihna dia a kintheipen a panlak hi’n gen hi. Northeast a tuailai te’n sports lam ah talent hoihtak a neih uh ngaihtuahna in Central Govt. in Manipur ah Sports University bawlkhiak ding puang uh a, himahleh gam thu tawh kisai a nawngkaina khenkhat om ziak in project zekai a, huai tungtang ah DoNER Ministry in Imphal a State govt. tawh panla khawm uh hi’n gen hi. Hiai hun Naveen Verma, Secy., DoNER, leh Ministry a senior official te’n uap uh hi’n kigen hi.
DC makaih in DLRC meeting om
Bank 9 kiang ah appreciation certificate pia
Lamka, Sept-14: Lunminthang Haokip, IAS DC/CCpur makaih tuni’n BRGF Resource Centre, DC Office ah Dist. Level Review Committee (DLRC) meeting om a, dist. a bank branch tuamtuam UBI, ICICI, Vijaya Bank, CBI/Singngat leh SBI/Loktak chih louh adangteng atel ban ah DIC leh Police apan Sangboi Gangte, MPS, SDPO/Thanlon tel uhi. Nengkhanpau Hauzel, LDM/CCpur leh G. Thangchinkhup, AGM, DDM/NABARD makaih in 1st Quarterly (June 2016) meeting thupukna enkik in Credit-Deposit Ratio tawh kisai genkhawm uhi. First Quarterly a CD Ratio 40% tungsaklou bank branch 6- SBI Thanlon, SBI Pearsonmun, Axis Bank, HDFC, ICICI leh UBI te’n 2nd Quarterly sunga tungsak dingin DC/CCpur in theisak a, Bank branch te’n khateng a 1vei bek Financial Literacy Awareness aneih ding un leng theisak hi.
Agriculture Loan tawh kisai leng 2nd Quarterly sunga 30% tan hawmkhiak ding, KCC loan applicant-te deihsakna tuam piak a, Self Help Group tuamtuamte kiang ah 30% chiang bek tungsak ding in thupuk uhi. ATM booth tuamtuam a sum omlou tawh kisai CCpur dist a currency chest nei UBI leh SBI kia ahihman in RBI apan currency note kiching ngahlou uh hidan in gen uh a, huai tawh kisai LDM in RBI a ding application gelh a, DC/CCpur tungtawn a khak ding in thupuk uhi. Banking tawh kisai a cyber crime omte Police deptt. in ngai poimawh a, ahunhun a saifel dingin inleng DC in representative kiang ah theisak hi.
PMEGP tawh kisai beneficiary applicant te’n online tungtawn a apply ding, akisaipih DIC, KVIC leh KVIB kiang ah hard copy piak dingin thupuk uhi. Thanlon SBI branch tawh kisai genkhawm uh a, a kinlam a function sak dingin thupuk uhi. First Quarterly a hihhoih bank branch tuamtuam kiang ah appreciation certificate pia uhi.
LOCAL NEWS:
DC in Ruth Enterprise hong
Lamka, Sept-14: DC/CCpur in tuni zinglam in Lajangphai khua ah Ruth Enterprise kichi hongkhia hi. Ruth Enterprise ahihleh ICAR Research Complex for NEH Region, Manipur Centre, Imphal & KVK/CCpur etkai leh panpihna nuai a kihongkhia hi’n kigen hi.
Henlianthang in charge pekhia
Lamka, Sept-14: Henlianthang Thanglet, Addl. CEO & i/c CEO, ADC/CCpur in Aug 8, 2016 in T. Pamei, Commissioner (TA, Hills & SC) Govt of Manipur kiang ah kitawpna (resignation) pelut a, govt in pawmsak in T. Pamei in tuni’n terminate order suah hi. Nitaklam in Henlianthang Thanglet kiang ah terminate order tun ziak in Niangkhovung, Finance Officer, ADC/CCpur kiang ah i/c CEO, ADC/CCpur charge pekhia hi.
Henlianthang Thanglet in July 17, 2006- Oct 9, 2016 sung CEO/ADC,CCpur len a, Aug 1, 2016- Sept 14, 2016 sung i/c CEO, ADC/CCpur len hi. Aman kumnawn MLA election hun ah 60-Singngat A/C apan MLA candidate sawm ziak in govt. ah kitawpna pelut hi’n kigen hi.
Police custody ah Sept 22 tan omding
Lamka, Sept-14: Police te’n Ningthoujam Opendrajit (39) s/o N. Khelemba of New Bazar, Bus Parking mankhia in, tuni’n CJM court ah pawkhia uh a, court in Sept 22, 2016 tan Police custory ah omding in phalsak hi. Mang David in N.Opendrajit kiang ah gari 1 ah ni 1 khelhman Rs. 3000/- piak ding a gari 3 akoih hi a, Thounaojam Ningthem Singh s/o Th. Ibohal Singh of Luwang Sangbam Mamang Leikai, Imphal East kiang ah gari 7 leng ni 1 ah gari 1 zatman Rs. 3000/- piak ding in koih a, mi 2 te’n gari 10 teng mortgage in koihsak uhi.
Vangai leh Tipaimukh bial veh ding
Lamka, Sept-14: Dr. Gojendro Singh, State Malaria Officer, Manipur in in Sept. 20-23, 2016 kikal in Vangai Range, Patpuihmun PHC leh Sibapurikhal PHC te vehna nei ding a, Dr. Liankhawjam Guite, Dist Malaria Officer leh a staff-ten kithuahpih ding uh hidan in kigen hi.
Huai ding tawh kisai in NVBDCP nuai a staff te mahni posting mun chiat a om dingin DMO/CCpur in theisak hi.
India govt. in 2030 tan a gamsung pumpi ah malaria beisak a sawm tawh kiton in positive case muhkhiakna-te veh a panlak ding chih ahi. Manipur ah tulel in Vangai leh Tipaimukh ah malaria case tampen a chiamteh hi a, huai tawh kisai survey bawl dia state govt. in a theihsak dungzui a kuan ding uh hi’n kigen hi. Amau hiai hunin thousilen a hawmte uh mipi’n zang phatuam uh hiam chih enkhe kawm ding uhi.
Gutate’n ICTC Mobile Van luh
Lamka, Sept-14: Guta te’n zannitak in CMO office campus a kikoih ICTC Mobile Van luh uh a, vanzat hunkhop gumang uhi. Gutate’n DVD player 1, wall fan 1, acid battery 12 volts 1, UPS 1, jack liver 1, ring-range set 2, screw drivers set 1, chaka box 1 leh tyre liver 2 gumang uhi. Tuni’n Dr. Phirthanglien Buhril, DACO/CCpur in Police Station ah report bawl a, Police te’n suizui uhi.
BEL engineer te’n EVM check uh
Lamka, Sept-14: Manipur ah kum 2017 MLA election omding tawh kisai Bharat Electronic Ltd. Bengaluru (Bangalore) apan engineer 2- A. Thirunavukarasu leh M.Vijayakrishna te’n Lamka hongpha in tuni’n DC’s office ah Election Deptt-te leh Political party member-te tawh EVM First Level Checking nei uhi. Engineer te’n Sept 16, 2016 tan in EVM 382 teng check ding uh a, Sept 19-21 sung Ukhrul Dist. leh Sept 23-25, 2016 sung Imphal West a EVM-te check ding uhi.
MCS 5 in join ta
Lamka, Sept-14: Lalthazam, MCS in tuni’n AC to DC/CCpur lending in hong join hi. Kumnawn 2017 MLA election ding ziaka MCS transfer te lak ah W. Ibohal Singh, MCS i/c Addl. DC/CCpur & Project Director, DRDA/CCpur; Lamminlal Simte @ L. Simte, MCS, SBO/BDO, Thanlon; Mangminlian Vaiphei, MCS, SBO/BDO Sangaikot leh Lanjoy Thoudan, MCS, SDO/BDO Kangvai lending in hong join uhi.
Saikot SDO pen Independent tuk ahi : Saikot Sub-div Demand Comtt
Lamka, Sept-14: Saikot mipi adia SDO piak a om pen Independent bang tuk a hoih leh poimawh ahi chi in Saikot Sub Division Demand Committee pawlin tuni’n thusuah bawl uh a, Sept 17 in Khawmawi/M.Ramthar ah SDO Gazette Order Collection Team-te vaidawnna neih hun va uap dia mipite chial kawm in, sunnung dak 1:30 in Saikot Play Ground ah Saikot SDO latna programme om ding chi uhi. Thusuak kimu in agendan in demand area sunga hausa leh mipite telin inn chih a mi khat chiat in uap ding in ngen uh a, SDO thak ahihdungzui in Land Revenue, Patta, Electoral Roll, Bio-Metric Census, Birth, Residential, Income, Tribe leh certificate tuamtuam a haksatna omte beita ding chi uhi.
Kha 9 sung malaria positive 36 mu
Lamka, Sept-14: Malaria deptt. CCpur in January-August, 2016 tan report a suahkhiakna ah mi 12,245 sisan test a bawlna uah malaria positive 36 mukhia uh a, huai lakah PF 21 om hi’n taklang uhi. Report dungzui in January in 1,582 sisan testna ah positive omlou a, Feb in 1,868 sisan testna ah positive 2 mukhia uh a, March in 963 leh April in 642 sisan testna ah positive mukhelou uhi. May in 1463 testna ah PF 1 telin positive 5, June in 1,973 testna ah PF 8 telin positive 11, July in 2101 testna ah PF 3 telin positive 8 leh August in 1,953 testna ah PF 9 telin positive 13 mukhia uhi.
DLSA in compt. prize hawmkhe ding
Lamka, Sept-14: Dist. Legal Services Authority, CCpur saina in Sept. 16, 2016 sunnung dak 1:00 in Bungmual a Lalpuithluaii Foundation School ah July 10, 2016 a Essay Writing Competition asai uh Prize hawmkhiakna tawh kithuah One Day Legal Awareness om ding hi. Huai hun in Category ‘A’ ah Siamthianngai (Cl-X) of Young Learners School in 1na la a, Thangzuanlian Langel (Cl- IX) of Young Learners School leh Chingmalsawm (Cl-IX) of Lalpuithluaii Foundation School, Donlunching (Cl-IX) of Young Learners school leh Vungnunsiam (Cl-X) of Lalpuithluaii Foundation school te 2na leh 3na hi uhi. Category ‘B’ ah Hoihlunvung (Cl-XII) of Rayburn College in khatna la a, Thenhoi Kipgen (Cl-XI) of Sielmat College leh Tunminsang Khuptong (Cl-XII) of Rayburn College te 2na leh 3na in pang uhi. Kidemna a tel mi 10 tuak kiangah consolation prize piak hiding hi.
SUUNNA:
Ehjapao Chongloi (101) f/o Sonmang of Zomi Villa, Imphal, zan sunnung in teknat in si a, tuni’n Chingmeirong Christian Cemetery ah kivui hi.
H. Zamzachin (65) s/o (late) H. Nengzathang of Bethel Veng, New Lamka tuzing dak 6:00velin Shija Hospital, Imphal ah kalna in si a, Sept 15, 2016 in YPA hanmual, New Lamka ah kivui ding hi. Amah Statistic Deptt. govt of Manipur ah Asst. Director in pension (retd) ah, Bethel Veng a Obadyah School neitu ahi.
Hav. T. Pauneh (56) h/o Lhingvah of Tuibuong, zannitak in heart attack in buaisia a, RIMS puaklut himahleh damzoulou in tuzing dak 4:00 velin si hi. Amah 1st IRB a sem hi a, hun sawttak Ginsuanhau, MLA escort commander in pang a, Sept 15, 2016 in Tuibuong hanmual ah kivui ding hi.
Goukhanthang (25) s/o Nemlianniang of Pearsonmun, Venglai tuzing dak 3:30 velin kalna in si a, nitaklam in Pearsonmun hanmual ah kivui hi.
IMPHAL NEWS:
Manipur Poll ah BJP in vualzawhna tang ding – Amit Shah
Imphal, Sept-14: Manipur ah ni 2 om ding in BJP National President Amit Shah tuni zinglam dak 11:30 in Imphal Tulihal International Airport hongtung a, Union HRD Minister Prakash Javadekar; Prahlad Patel, Manipur in-charge, BJP; Ram Madhav, BJP National Gen. Secy. leh Hemanta Biswas Sharma, Assam Finance Minister te’n hon zui uh a, BJP Manipur Pradesh te’n ana dawn uh hi’n kigen hi. Huai nung in BJP Manipur Pradesh-te saina in Hatta Kangjeibung ah State Level Karyakartas Sammenlan hun va uap uhi. Huai ah Amit Shah in BJP supporter mi 3000 val mai ah maban 2017 general election hun ah BJP in mipi support na tungtawn in vualzawhna ngah ding uh a, Manipur ah corruption beisakna dia ‘Congress free state’ suahsak ngai ding a, BJP supporter te’n Delhi a Rahul Gandhi tanpha in a zak theihna dia Manipur ah BJP in govt. bawlkhe ding ahihdan slogan bawl ding in gen hi.
Prime Minister N. Modi makaihna nuai a BJP govt. in North East bial teng development engine suah ding a, Manipur ah BJP-te telching ahihleh fund bikhiah-te a hiding bangtak a zat ding leh scheme tuamtuam-te sepsuah hiding in chiam hi. Congress makaihna a govt. in mipite adia Central scheme leh hamphatna tuamtuam omte bangtan negu lai ding uh hiam chih dotna bawl a, Congress in Rs. 5000 crore zatna tawh kisai a work completion certificate pelut lou a, hiai tungtang ah fund-te bangchi bang a zat hihiam chih hilhchetna a bawl ding uh chi hi. DoNER Ministry in North East bial puah hoihna ding in crore tamtak a sunglut-te a hiding bangtak a kum paisa apan zat hilou a, Manipur a sportsperson te’n International Level tanpha ah India tunpih theih nang in siamna nei uh a, Manipur leh Haryana a sportsperson-te modern high tech facilities zang a training piak hile uh India in Olympic medallists tamtak bawlkhe ding chi hi. Union HRD Minister in Manipur ah BJP-te vaihawmna lensak ding in mipi-te kiangah ngetna bawl a, Manipur ah nekgukna leh dikloutak a vaihawmna dou hiding in gen hi. Hiai hun BJP Manipur Pradesh President Ksh. Bhavananda leh state leader tuamtuam te’n uap uh hi’n kigen hi.
RIMS Foundation Day zatna uap
Imphal, Sept-14: RIMS Jubilee Hall ah tuni’n RIMS 45th Foundation Day zatna om a, huai ah Chief Guest in Manipur Governor Dr. Najma A. Heptullah pang hi. Functional President in D. Korungthang, Minister (Health & Family Welfare) pang a, Guest of Honour in N. Singh, ex-Professor of Obs. And Gynae, RIMS pang hi. Huai hun ah Chief Guest in a thugenna ah khawvel pumpi a health care system hoihpen Cuba’s Health care hi a, Manipur in a etton ding a deihthu gen hi. Cuba-te bang in Manipur in leng helicopter/air services zang in ki kawm tuahna leh kithu zaktuahna lampi a buai chiang in singtang dawn a omte Medical lam ah enkai thei ding uh chi hi.
Prof. Ch. Arun Kumar Singh, Director, RIMS in annual report a genna ah kum 1972 a RIMS phutkhiak ahih nung apan khangthou zel in tu’n semtu mi 1,800 om a, RIMS ah MBBS degree course banah course tuamtuam nei uhi. Hiai hun Prof. A. Mahendra Singh, Reception Sub-Committee leh Prof. M. Amuba Singh, Medical Superintendent te’n leng uap uhi.
Student 2-te scholarship ding laksak
Imphal, Sept-14: Kuki Students’ Orgn. (KSO) Imphal Branch te’n Langol a Gulmohor Yoga and Naturopathy Research Academy a Principal in ST scholarship tawh kisai a student 2 khem hi’n gen uhi. Student 2 te’n ST scholarship form a piaklut hun uah amau SBI account tuak gelh uh a, himahleh huai Academy a Principal in student 2-te theihpihna tellou in Allahabad Bank, Porompat Branch ah student 2-te min in Bank Account hong a, scholarship form a student-te SBI account kigelh leng Allahabad bank account in khek khia hi. Department te’n scholarship a hawmkhiak hun uah Principal in Allahabad bank ah student 2-te min in Rs. 22,080 lakhia a, hiai tungtang ah student 2 te’n Principal kiangah dotna a bawl hun uah Principal in vau a, scholarship sum pekhe ding in KSO Imphal Branch te’n phutna bawl uh a, huai ahihkeileh KSO Imphal Branch te’n a poimawh bang in panla ding uh hidan in taklang uhi. KSO Imphal Branch ten bangchidan a student 2-te theihna tellou a Principal in Account honsak a om tungtang ah Bank in hilhchetna a bawl keileh dan dungzui a panlak hiding in gen uhi.
Minister in Edn dinmun suizui
Imphal, Sept-14: Union Minister of Human Resource Development Prakash Javadekar in tuni nitaklam dak 4:00 velin North AOC a Hotel Classic mun ah Education Dept. a official-te tawh Manipur Education system dinmun tawh kisai suizui na ding in kihou khawmna nei uh hi’n kigen hi. Huai hun ah Centre in education system adia scheme tuamtuam a piak-te uh tawh kisai a masawn dan review bawl a, Dept. official te’n govt. school leh college-te a Class X leh Class XII passed out-te position leh result tawh private institution-te enkak ding in theisak a, na hoihtak a sepkhiak ahihleh fund lam ah buaina omlou ding hi’n leng theisak hi. Hiai hun Vinnet Joshi, Commissioner, Higher and Technical Education; S. Sumant, Secy., Education (S) leh Education Dept. a subordinate officer tuamtuam-te tel uh hi’n kigen hi.
BJP te’n member 3 nawhkhia
Imphal, Sep-14: Sadar Hills a BJP Saikul Mandal te’n tuni’n primary membership ahihna apan mi 3 nawhkhia uh hi’n kigen hi. Hiai tawh kisai a BJP Sadar Hills te’n thusuah a bawlna uah BJP Saikul Mandal a primary membership hihna apan Seikholet Singson, Khuplun Khongsai leh Seijahen Singsit-te kum 6 nawhkhiak a om uh ahihdan taklang uhi.
Human Right & Law’ laibu hong
Imphal, Sept-14: Advanced Legal Forum Manipur-te saina in Manipur Press Club ah tuni’n Naoribam Pramod Singh, LLM, PhD in laibu a gelh Human Rights in Manipur (Vol.1) leh Global Justice & Rule of Law kichi Chhattisgarh Chief Justice lui W. A. Shishak in hongkhiatna nei hi.
NH-2 ah mi 3 apan thau mankhia
Imphal, Sept-14: Senapati Brigade nuai a Maram Battalion te’n NH-2 in a tawt khak Karong village gei ah Sept 12, 2016 in Imphal apan Dimapur zuan Truck (No. NL-01K1180) a checkna uah wooden box sung a kisel AK-47 rifle 1 leh pistol 2 mukhia uh a, huai tawh kisai in Assam a Bokajan akipan Driver Sonary Singh Basumatry (40) s/o K. Basumatry, Co-Driver Rajkumar Tati (32) s/o Basudev Tati leh helper Swapan Rai (27) s/o Ratan Rai-te mat in om uhi. Galvan muhkhiak-te tawh mi 3-te Senapati Police Station ah piak khiak hi uhi.
Transfer & Posting
(IAS/MCS Officer)
1. L. Nabakishwar Singh, Director, Social Welfare as Director Social Welfare and Registrar, Co-operative Societies in addition.
2. Dr. Harmit Pahuja, IAS, Director/YAS, Registrar, Co-operative Societies and Joint Secy. (Labour) as Director (YAS) and Joint. Secy. (Labour).
3. Rachel N. Guite, MCS, Dy. Secy (Sc. & Tech.) & Deputy Director (Tourism) as Dy. Secy (Sc. & Tech.).
4. Kimjalhai Kipgen, MCS, Dy. Secy./(Arts & Culture) as Dy. Secy (Arts & Culture and Tourism).
5. S. Thienlaljoy Gangte, MCS, SDO/BDO, CCpur (under transfer as AC to DC/Senapati) as AC to DC/CCpur.
6. Daryal Juli Anal, MCS, SDO/BDO, Machi (under transfer as Under Secy. Transport) as Deputy Director/Tourism.
7. Muhammad Asghar Arzad, MCS, Probationer (under transfer as AC to DC/Imphal West) as SDO/BDO, Haochong.
8. N. Brajamohon, MCS, on promotion (under transfer as AC to ADC/Jiribam) as SDO/BDO, Phaibung.
TUNI THUPI:
“Huchih hun chiangin gam nuaia sing tengtengin TOUPA ma ah nuamsa in la a sa ding ua, lei vaihawm dingin lah a hongpai sin ngala.”
– I Kronikil 16:33
EDITORIAL:
BJP leh Assembly Election
Senior Congress leader Y Irabot Singh in abial (Wangkhei) mipite’ deihna bangin BJP zom chihthu om a, huai in kumnawn 2017 assembly election om ding bangtanin Congress party a sukha dia chih mi tamtakin study bawllel ua theih ahi. State zawngkhal mahmah Manipur ahihleh centre ah kingalian mahmah a, 99% centre funding ahi chi leng le dik kha mawhlou ding hi. Centre ah tu a vaihawmna len BJP hi a, North East ah a chik achikin BJP hatkei mahleh tutung in Assam ah vualtungtuanna thupitak (landslide victory) hon ngah ua, huai in ma sawntou zel dingin kilang a, Manipur state assembly election om ding mi tamtakin mitsuan ua, BJP leader tamsem in Manipur state hong veh ding uh chih haihvual hilou hi.
Kumnawn February 2017 velin Manipur ah kitelna om nawn dingin kilanga, hiai ding tawh kisai in Election Commission of India (ECI) apan top official hunkhop in Manipur state hongvehta ua, zan mahmah inleng hong zin om uhi. Manipur tel a state tuamtuam 5 a assembly election om ding pe’n centre a vaihawmna len BJP adia etkhiakna poimawhtak hidinga, Manipur pe’n state neuchik ahih hangin India malsuahbial adia state poimawhtak hi a, BJP in Uttar Pradesh a awlmawh bangbang un Manipur leng poimawh ngaih dingun kilang hi.
Election Commission of India (ECI) in election code and conduct bang honchi puan dia chih kithei nailou hi. Himahleh, observer hunkhop hon sawllut ta ua, a poimawh leh security lam leng khauh mahmah dingin gintakhuai hi. ECI deihna leh thupiak bangin ni 2/3 paisa apan IAS/MCS leh officer tuamtuamte suankual vengvung ua, apaidan pangai leng ahi dinga, state government adingin ut-le-dah a gamtat theihna kichi hong keniam mahmah ding hi. Politician kuahiam in helpawlte’ thahatna tungtawna MLA kaisawmna kichi leng hong keniam hiai-hiai dingin kilanga, security-te’ venbitna nuaiah mipite’n zalentakin vote khethei ngei dingun lamet huai hi.
Maban 2017 a 11th Manipur state assembly election om ding ah, candidate te’n sum leh thagum (money & muscle power) a zat theihlouhna ding un dan chi tuamtuam, khauh taktak, India khangthu a om ngeilou bangzahhiam hon pawlut lai ding uh chih ahi. ECI in election code of conduct puangkhe nailou a, December 2016 ahihlouh tawp in January 2017 nipi kal masatanin hon puangkhe ding un lamethuai hi. 10th Manipur state assembly election paidan en vengveng kawmin ECI in bangteng thupuan hon nei ding chih itheih louh hangin, phaizang bial a security dinmun leh singtanggam a security poimawhdan thei kawmin pan honla mahmah ding un gintakhuai hi.
Congress a senior leader Irabot in BJP azop guih ziakin mi tamtak kiguihsak a, Congress party adingin leng puksiatna hong hithei hi. Y Irabot in nungzui mi tamtak aneih kawmkawmin Chief Minister tanpha tuhthei khat in Congress MLA te’ lakah nungzui mi bangzah anei dia chih theih hilou hi. Kumnawn a state assembly election om dingah BJP in vualtung tuanna ala ding chih pen gen ngam khang, ahihziakin, Ibobi government in mipite khualna ziakin development lam ana pibawl khalou mah uh ade aw chih theihin om hi.
Dan leh thupiak tungtang, development thil, damtheihna leh adangdang ah Chief Minister Okram Ibobi Singh Government hoih louhna leng om hi. Niteng-hun teng a bandh om, strike/total shutdown/economic blockade kichi om den a, state government tunga kiphinna neithei pawlpi tam law mahmah a, huai in mipi nautang nawkkha hi. Tuni a Manipur state capital Imphal veh a hongzin BJP national President Amit Shah leh a team te’n maban a assembly election om ding ah gen nei ban mahmah ding un gintakhuai hi. ECI in sum’ thilhihtheihna (money power) nakpitakin hon dal ding ua, ‘Free and fair election’ kichi hon tangkoupih nawn ding ua, ahihziakin, khuak nei mahmah Ibobi khawnbawl upate’n bang ‘tactic’ hon kimawlpih ding uam chih bel theih haksa mahmah lai hi.
No comments:
Post a Comment