Manipur Express | September 2, 2016

HEADLINES:
‘Lenna kia a Netaji si mah ahi’- Japanese Govt

http://s3.india.com/wp-content/uploads/2016/07/netaji3.jpg

New Delhi, Sept-1: India government banah Japanese government thusuakin  a gendan in, Indian National Army(INA) leader Netaji Subhash Chandra Bose sihna  tawh kisai in ‘Lenna kia ah Netaji si mah hi’ chi’n chiamteh(record bawl)  uh chihthu om hi. Kum 60 paisa akipan Japanese government khut a document omsate et detdet ahihnungin Netaji Subhas Chandra Bose sihna pen lenna kia  ziaka si mah ahihdan chetin om chi’n kitaklang  chih ahi hi. Japanese official document dungzui in Taiwan ah August 18, 1945 in lenna kia om a, tualak ah Bose leng tel ahi chihthu om hi. Japanese authorities in official taka hibang thusuah abawl uh khatveina hipan chih hi a, India government in leng official document hunkhop nei a, huaite thuguk (secret) banga akoih uh  himahleh kumlui akipan thil a muhdan uh suahkhia chih ahi hi.

    Japanese govt thusuakin a taklat behna ah report bangkim January 1956 in zawhsiang hi a, Tokyo a Indian embassy ah leng lehkha poimawhte piaklut in om a, Bose sihna tungtang  ‘seven-page report’ om a, huai pe’n Japan pau ngenin kigelh a, India (Hindi) pau a i lehkhiak  chiang in pek 10 dim  chi uhi. Sappau a kigelh dungzui in Netaji in August 18, 1945 in lenna ah accident  a,  Taipei hospital tut hipah mahleh si chi uhi. Official thusuakin agenbehna ah, huai ni in Bose tuanna lenna a lenkhiak phetin buaingal in kia a, tua ah Bose  liam a, kintakin damdawi inn tut himahleh phatuam nawnlou chi uhi. Record om dungzui in Bose lenkhiak hun  nitaklam dak 3:00  vel hi a, lenna a tuahsiat ziakin Nanmon Branch of Taipei Army Hospital tut hi a, nitak dak 7 (August 18, 1945) in a hinkhua bei chih ahi hi. Tualou in, August 22, 1945 in Taipei Municipal crematorium ah a luang haltumin om chi uhi.
    Tuaban ah lenna alenkhiak nung leitual akipan km 20 a sanga alenlai takin lenna kha (wing) veilam  buai  a, tua ziakin a lenna gikna pe’n dikloutakin om a, kituak (balance) loutak a a om phetin Pilot te’n theihtawp suah mahle uh leitual ah kesuk chi uhi. Tua hunin Bose taksa pum mei in kang a, Adjutant Rahmin (Colonel Habibur Rehman) leh passenger te’n kintakin a puan-ak  suah uh a, huchih lai in Bose taksa teng mei in ana kangman chih Japanese official investigation apan thusuak ahi hi. Huai hun lai in Netaji Subhash Chandra Bose pen kum 48 in upa chi uhi.


LOCAL NEWS:
Hospital ah ATM booth koih ding
Lamka, Sept.-1: Dist. hospital authority, CCpur in hospital huangsung a ATM booth khat koih dia panla in nasep pailel hi. Dr. J Son Goukham, Medical Supdt., in agendan in, nasep ahihleh kal paita in kipan a, kha 1 sunga zawhsiang lam-et thu gen hi. ATM ahihleh UBI/CCpur branch in lemsakpihna apiak dungzui in eastern block ground floor mal lampang ah koih hiding in gen hi. Hospital a ki-enkolte khualna ATM sawm hidan in gen a, sepsuahna dingin UBI/CCpur branch a Chief Manager lui Thangneisang Khaute in pan lakpih hi’n leng gen hi.


1-Day Legal Awarness omding
Lamka, Sept.-1: CCpur United Clubs’ Orgn. (CUCO) saina in Zogal Memorial Hall Complex, Zoveng ah Sept. 3, 2016  zinglam dak 10:30 in ‘1-Day Legal Awareness Program’ omding a, Chief Guest in Letboi Valte, Chief of Z/Lamka pang ding hi. Functional President in S.K. Mangang, President, CUCO, Guests of Honour in V. Hangkhansuan, Head i/c Bijang Loubuk, Chinjakham, Vice President ZYO leh TK. Lun Haokip, Vice President HSO, CCpur pang ding uhi.  Huai ah Phulindro Konsam, Human Rights Activist,  Manipur leh M.Urmila Devi, Advocate leh George, Advocate te’n  Food Security Act., Right to Education, Protection of Children & Child Labour from Sexual Offences Act. (POCSO)  thupi zangin sinsak ding uhi.


Laibu suakthak hong
Lamka, Sept-1: Imphal a New Lambulance MPCS Church, Sunday School hall ah tuni zinglam in ‘Hinkhua Siamphatna’ kichi laibu suakthak Tongneilal Vaiphei, Secy, Vaiphei Literature Society (VLS) in hongkhia a, Rev. R. Lalawmpuia, i/c Impal Pastor bial MPC in lan hi. Laibu ahihleh Rev. Hv Thangpi in agelh N. Neihsial, IDAS in published abawl hi a, MPCS New Lambulane leh MPCS Office D. Phailian ah muhtheih ding hi’n kigen hi.


SK Oil litre 1 ah Rs. 17 hiding
Lamka, Sept-1: S.K Oil man khan ziak in Manipur govt order No.15/6/91-FCS (Pt-I) dated July 21, 2016 dungzui in Sept 2016 quota apan S.K Oil litre 1 ah Rs.17/- fixed hi’n DC/CCpur in thusuah bawl hi.


NFSA ading document submit ngai
Lamka, Sept-1: CCpur dist. ah National Food Security Act. (NFSA) tungtawn a Ration card ngah (beneficiaries) leh fresh applicant te’n Nov 2016 sung tan in thil poimawh tuamtuam DC office a Food & Civil Supply Deptt ah submit ding in DSO/CCpur in theisak hi. NFSA ration card ngah innkuan a lupen (head) in submit dingte- Aadhar card xerox copy, income certificate, domicile certificate, voter identity card xerox copy, mobile phone No.leh bank account No. hiding hi.


Guta te’n Activa gari gumang
Lamka, Sept-1: S. Letminthang Mate of  Happly Valley, Tuibuong zatlai Activa (white) MN02A-7707, Chasis No. ME4JF501BO1BD8077358, Engine No. JF50E80076713 zan sunnung dak 1:30 velin Torbung ah misi gal a hoh, lampi gei ah akoihlai gutate’n gumang uhi. Gari’ neitu in Police ah report bawl a, Police te’n gari muhkiksawm leh guta matkhiat sawm in suizui uhi.


YVA GHQ in Ambulance thak lei
Lamka, Sept.-1: YVA Gen Hq in damlou panpih ngaite’ zattheih dia  Ambulance a leikhiak Guwahati ah Board Chairman Lalkithang makaih in Board Member Dr. Seanboi Vaiphei leh Thanglemlal te’n tuni in vala uh a, buaina om keileh Sept. 2  in Lamka tut hiding in kigen hi. Board chairman in phone tungtawn a thuzakna ah tunitak in Guwahiti ah kipankhia uh a, zingchiangin Lamka tung ding uh hi’n gen a, Ambulance ahihleh accessories (Oxygen+ Cylinder, washing machine leh stretcher) telin 10 lakhs vel man hi’n gen a, Aug. khabul in Chennai a Ashok Leyland company ah order bawl in company in Guwahati tan hongkoih hi’n gen hi. YVA GHQ in damlou haksatna tuakte ngaihtuahna in Feb. 2016 a meeting resolution ah Ambulance Project Board dinkhia in, March 2016 in nasep in kipan a, miteng zattheih ding ahihman in mipi lak ah kiphal sum a khonkhawmte uh ban ah officer tuamtuam in a tuakkhawmte zanga leikhia uh hi’n gen a, tunung sawtlou in alatna om ding inleng gen hi.


Diamond Jubilee Tourney khakna
Lamka, Sept-1: ZPYF Diamond Jubilee Celebration Committee saina in Sept 3, 2016 zinglam dak 11:00 in Singngat a MK Thomas Ground ah ZPYF Diamond Jubilee football tournament final match leh closing ceremony omding a, Chief Guest in P.Tongthang, Special Contractor pangding hi. Functional President in Grace Zamnu, EM, ADC (MDC-Muallum) leh Guest of Honour in T. Lunzamung, MPS panding hi. Fooball final ah ZPFY Lailam Veng leh ZPYF Singngat kimawl ding uhi.


Inspire Award scheme meeting om
Lamka, Sept-1: Ministry of Sc & Technology, Deptt of Sc & Technology, govt of India leh National Innovation Foundation, India pangkhawm a kibawl Inspire Award Scheme tawh kisai Aug 29 &30, 2016 in Guwahati a IIT campus ah meeting om a, NE state teng ban ah West Bengal leh Odisha state apan official te tel uh a, Manipur ah ZEO 11 tel uhi. Inspire Award scheme ahihleh class VI-X kikal student te’n Sc & Technology hamphatpih ding, innovative idea neihding chih tup leh gim hi’n kigen hi. CCpur Dist. ah online tungtawn in school 20 in www.inspireawards-dst.gov.in ah registration bawl uh a, school 165 te’n ZEO tungtawn in  registration bawl theih gige hi. Student khua hiam in thil hoih idea aneih pen gelhthoh in Guwahai a IIT ah thon ding a, technical expert te’n asuizui nung un thil hitheih ahihleh student kiang ah idea apiak tungtawna thil bawlkhiatna ding in Rs.20,000/- tan pia uh hi’n kigen a, CCpur Dist. a school 165 te’n registration bawl hileh student tamtak in phattuampih ding hi’n kigen hi.


Aug khasung in positive 13
Lamka, Sept-1: Dist. Malaria Deptt. te’n August 2016 sung in damlou mi 1953 sinsan test uh a, malaria positive 13 mukhia in huai lak ah malaria PF 9 om hi.


SUUNNA:
Letkholal (59) s/o (late) Thangdoulien of Tuipiveng, HQ Veng tuzing dak 6:40 vel in Dist. Hospital ah BP stroke in si a, nitaklam in YMA hanmual, HQ Veng ah kivui hi.


IMPHAL NEWS:
Manipur Assembly Session kipan ding
Imphal, Sept-1: Manipur Assembly Session 10na Sept 2, 2016 zinglam dak 11:00 in kipan ding a, hun masa ah MLA lui Kishore Thapa (Kangpokpi A/C) suunna hun (obituary reference) om ding hi. Huai zawh in Business Advisory Committee report leh Govt. Business banah financial committee 3 telna leh govt. bill luikhiak hiding hi. Sept 3 & 4, 2016 (kiginni leh Pathianni) sitting omlou ding a, Sept 5, 2016 (Monday) in om nawn ding hi. Tutung Assembly session ah ILP tawh kisai govt. in bill puaklut sawm himahleh ngaihdan tuamtuam lakkhawmna zawh ahih nailouh ziak in luikhiak hinailou ding hi.


Manipuri cinema in dinmun poimawhtak len– CM Ibobi
Imphal, Sept-1: Paona Bazar ah tuni’n Usha Cinema hall hongthakna (re-opening) om a, huai ah Chief Guest in O. Ibobi pang hi. Functional President in L. Surjakanta Sharma, Chairman, Film Forum Manipur pang a, Guest of  Honour in Meghachandra Kongbam, Director, DIPR banah Film Critic (National Awardee) pang hi. Huai ah CM in a  Manipuri Cinema in pawlam mun-te ah Manipuri tawndan minthansakna dingin dinmun poimawhtak len a, i tawndan uh kepbit leh thangsakna ding mipi  tungah kinga chi hi. Manipur State Film & Television Institute kihong thak in Manipuri Cinema sautak in puah hoih zou ding a, Manipur ah Cinema hall in kiam lam a nawt ngaih khawk huai sa a, hindi film tungah bandh bawl te’n a thupukna uh ngaihtuah thak di’n ngen a, mun tuamtuam ah thonkhiak theihna dia Manipur film tawh English subtitle kithuah poimawh chi’n gen hi. Hiai hun Speaker Th. Lokeshore Singh, Govindas Konthoujam, Minister leh Ksh. Biren Singh, Minister te’n uap uhi. Akigendan in Usha Cinema hall kum 1961 a hongkhiat hi a, kum 1970 apan film suah kipan a, himahleh November 2015 apan film suahkhiak khawlsan uhi.


Bandh 2 kizom ding
General strike in hindan nawngkai sak
Imphal, Sept-1: Kangleipak Communist Party (KCP-Poirei Meitei) te’n JNIMS a Director in-charge Dr. L. Deben leh P.K. Singh, Commissioner (Health), Govt. of Manipur te’n Jawaharlal Nehru Medical College of  Science ah nekgukna sai uh chi’n ngawh in  mawhpaihna in tuni zingsang dak 6:00 apan general strike in Imphal area ah hindan nawngkaisak hi. Paona bazar leh Thangal bazar-te ah dawr, dukan leh sumsinna inn-te akikhak banah govt. office a nasem akai tamlou a, himahleh niteng nektawm zongte’n haksatna a tuah-te uh ngaihtuahna ziak in sun dak 12:00 apan bandh beisak uh hi’n kigen hi.
    Huailou in Central leh state trade union and employee orgn.-te kipawl khawmna Co-ordinating Body of Trade Union te’n India pumpi ah Sept 2, 2016 zingsang dak 6:00 apan dakkal 12 sung bandh puang dia thupukna a bawl uh tawh kiton in Manipur ah leng bandh om ding hi. Huai banah All Manipur Surrenderee Welfare Assn. (UNLF, PLA, KYKL, PULF, UPPK, KCP (KK Nganba)) te’n state govt. tawh MoU a kaihna uah khateng a kha lawh Rs. 4000 piak ding leh panpihna dan a Rs. 3.5 lakh piak tawh kisai in kum 3 paita mahleh tunitan  govt. lam apan sum mu kuamah omlou uh a, govt.  mawhpaihna in Sept 2, 2016 zingsang dak 5:00 apan Sept 5, 2016 nitak dak 6:00 tan dakkal 65 sung bandh puang uh hi’n kigen hi.


June kha tan in case 38 chiamteh
Imphal, Sept-1: Narcotics and Affairs of Border (NAB) te’n Jan 2016 apan June 2016 tan in dan phallouh thil paw gu (smuggling) leh khamtheih pua (drug trafficking) tawh kisai in case 38 chiam teh uh hi’n kigen hi. Huai tawh kisai in NAB/District Police te’n heroin 1.364 kg; Ganja packet 48 leh kg 118.5 a gik; opium kg 26.610; Nitrosun (N-10) strip 8 leh tablet 466; Amphetamine tablet 140; Cough syrup carton 18 leh bottle 533; SP strip 298 leh capsule 15,333; Brown sugar gram 96.6; Pseudo-Ephedrine tablet 20,000; WY tablet 2,575; Halontrec tablet 20 leh Drug capsule 18 mankhia uhi. Huai hun sung mah in NAB, District police leh security force combine team te’n Chandel, Ukhrul, CCpur leh Senapati district-te ah opium chinna mun acre 455, ganja chinna mun acre 18 leh poppy chinna mun acre 437-te susia uh hi’n kigen hi.


Bank, Transport leh Telecom  pawlin strike nei ding
New Delhi, Sept-1: Central Trade Union (CTU) 10 in Labour Law tawh kisai khek lamdang dia ngetna abawl uh lawhchin louh ziakin zingchiang (Sept 2) a nationwide strike  puang uh a, nasemtu crore 18 valin nasep akhawlsak ding ziakun Banking, Public Transport leh Telecom sukha ding hi’n kigen hi. Trade Union Coordination Committee (TUCC) General Secretary S P Tiwari gendan in central public sector - Coal India, GAIL, ONGC, NTPC, OIL, HAL leh BHEL inleng strike gupna pia uh a, amau leng nasep khawlsan ding uhi.


PPCM te’n CM leh Governor kiangah memorandum pia
Imphal, Sept-1: Schedule Tribe list lakah Meitee/Meetei community-te telsak ding  phutna a movement pailel deihlouhna in CSOs tuamtuam kipawl khawmna Protection and Preservation Committee of Manipur (PPCM) te’n Chief Minister leh Governor kiangah tuni’n memorandum pia uh hi’n kigen hi. Huai tawh kisai in Wahengleikai a PPCM office ah tuni’n press conference om a, huai ah Dr. Y. Mani Khuman, Convenor, PPCM in a genna ah ST list a Meetei/Meitei-te telsak ding phutna in maban ah hoih lamsang a hoihlou tun zaw ding a, Demand Committee-te panlakdan in nam tuamtuam kalah kituah louhna tun zaw ding a, maban a intra-social leh inter-ethnic lam ah hoihlouhna tun ding hi’n gen hi. Manipur ah sepna neilou tamtak om tawh kisai state govt. ah sepna tamlou leh central govt. establishment in leng suveng theilou ding a, Demand committee te’n thiltup 4 – socio-economic and identity development, co-existing communities in terms of economic benefit and social status, protection of territorial integrity of Manipur leh declaration of  Manipur as Hill chih-te politics lam in sai uh a, hoihtak a suizui leh research bawl ahihlouh ziak in mipi tamtak pikawi chi hi. ST demand tawh kisai doudalna in PPCM te’n lampi ah rally leh sit-in-protest bawl ding utlou uh a, PPCM ahihleh Manipur a ST Demand Committee-te thilphut deihlouhna a CSO 27 kipawl khawmna hi’n leng taklang hi.


Indo-Myanmar gamgi thu gen ding
Imphal, Sept-1: India thuneite leh Myanmar govt. thuneite’n Indo-Myanmar gamgi tawh kisai a thubuai omte Sept 5-7, 2016 sung in Dehradun ah genkhawm ding uhi. Huai tawh kisai in Ministry of External Affairs, Govt. of India in  Manipur govt. palai te’n meeting uap ding in chialna bawl a, hiai hun Survey of India a top authorities te’n leng uap ding uhi. Akigendan in Myanmar govt. apan palai-te Sept 4, 2016 in New Delhi tung ding uh a, huai ah Survey of India a official, MEA leh Myanmar Embassy  te’n ana dawn ding uh a, Sept 5, 2016 in Dehradun zuan ding uhi.


Numei sualluihna a panpihtu mankhe di’n ngen
Imphal, Sept-1: Imphal West a Haorang Sabal Leikai a local club leh Meira Paibi te’n Konthoujam (O) Nanao w/o K. Gandhi in numei kum chinglou 2 sualluihna tawh kisai a ngawh a om apasal kithuahpih chih ziak in Nanao matkhiak ding phut uh hi’n kigen hi. Hiai thu tawh kisai in Manipur Press Club ah tuni’n press conference om a, huai ah Ibungo, President, Unity Development Club of Haorang Sabal Leikai Irengbam in a genna ah (late) K. Ibomcha tapa – Nando Konthoujam (44) leh K. Gandhi (33) te’n a sanggampa uh tanu 2 – kum 11 leh kum 17 vel  tuak kum 2 sung sualluih ta uh a, a tapa-te uh kum chinglou 2-te leng sualluih sak uh a,  thiltung tawh kisai Aug 8, 2016 ni a theihkhiak hi a, veng mipite’n pasal 4-te police khut ah pekhia uhi. Aman a genzelna ah K. Gandhi zi Nanao in numei 2-te Imphal a clinic khat ah nau vasuk siatpih ahihdan theihkhiak hi a, amah kipuanna ah a pasal leh a pasal sanggampa banah atate pasal 2 in numei 2-te a soisak dan teng uh thei hi’n gen hi. Local club leh meira paibi te’n akintheipen a Nanao matkhiak leh gawtna piak ding banah mi sualluihtu mi 4-te capital punishment piak ding phut uhi.


Journalism course sai ding
Imphal, Sept-1: Directorate of Information and Public Relation (DIPR) a state Institute of Journalism te’n ni 7 sung daih ding ‘Basic Course in News Reporting’ sai ding uh a, September 2016 kal 2na in Senapati leh Ukhrul district-te a sai ding uhi. Huai tawh kisai a Basic News Reporting zil nuam-te lakah fresh candidate-te a niampen in Graduate ahih uh ngai ding a, Working Journalists-te deihsak tuam hiding a, selection ahihleh ‘first come first serve’ hiding hi. Huai adin seat 20 kia telkhiak ahih ding ziak in telkhiak a omte’n  district chiat ua District Information Officer kiangah Rs. 3000 a sung uh ngai ding a, candidate-te Course material piak hiding in gen uhi.]


Admit card hawmkhiak hiding
Imphal, Sept-1: Manipur Secretariat a group D sem ding lakna ding a, apply candidate-te a di’n Admit Card hawmkhiak kipanta hi. Tuni (Sept 1, 2016) in Imphal West leh Manipur University  te a kihawm a, Sept 2, 2016 in Thoubal, Senapati, Tamenglong, Ukhrul, Chandel, Jiribam, Kangpokpi leh Saikul  te hawmkhiak hiding a, Sept 3, 2016 in Imphal East, CCpur leh Bishnupur ah kihawm khiak hiding hi. Interview ni ding leh a mun banah Roll No.-te tunung a puangkhiak hiding chi’n Under Secy. (GAD), Govt. of Manipur in thusuah hi.


Khawpi hahsiang-te khahkol di'n ngen
Imphal, Sept-1: Imphal Municipal Corporation (IMC) a Mayor Soram Sunil in IMC office ah tuni’n press te kimuhpih a, tua hun in akisai khak pih teng in bandh leh strike hun ah khawpi sung hahsiang-te khahkol ding in ngetna bawl a,  kiphinna chiang a saptuam tawh kisai, emergency leh essential service-te khahkol bang a, amau leng khahkol poimawh chi hi. Smart city competition ah Manipur position 15na in om a, bandh hun chiang in khawpi sung ah nin thangtak tampi om in mipi adin nawngkaina tun hi. Imphal khawpi kepsiang theihna dia bandh/strike hun ah IMC employee-te’n buaina omlou nasep theihna dia khahkol  poimawh hidan taklang hi.


TUNI THUPI:
“Pathian’ thuhilh guk na zata hia? Huchi’n pilna na kikoih hoih hia?” – Job 15:8


EDITORIAL:
Theihdia poimawh tuamtuam
 Kum paisa 2015 in Manipur state assembly in bill 3 a passed uh a, tua bill 3te Manipur singtangmite’ adia bill lauhuai ahi chih ziakin i gam ah buaina mulkimhuai tak hongtung a, buaina kipatna mun (epicentre) Lamka khawpi a thiltung in koi munpeuh zelsuak hi’n kilang hi. Manipur singtangmite kisingsa in singtanggam district tengah buaina om vengvung a, tuni tanpha salpha misi 9-te luang vui hinailou hi.
    State govt in singtangmite a nelhsiah ziaka genpih leh sakpih hong neihlouh kia hilou in Hill Areas Committee (HAC) singtanggam tawh kisai singtangmi MLA teng kikhaikhawmna tanpha thudot(consult) chih himhim omlou in bill a passed uh ‘The Protection of Manipur People Bill, 2015’, ‘The Manipur Land Revenue & Land Reforms (7th Amendment) Bill, 2015’ leh ‘The Manipur Shops and Establishments (2nd Amendment) Bill, 2015’ te singtangmite hihna leh  maban ding dinmun dengdel taka koihsawmna ahih banah gam-le-leitang tunga neihtu hihna leh thuneihna teng state Cabinet thuneihna nuai a om din koihvek sawm hi.
    Zan in Lamka khawpi ah Manipur state govt mawhpaihna kawmin August 31, 2015 a bill 3 passed tungtang leh siluang 9-te suunna leh zahna kawmin ‘Tribal Unity Day’ zat hi a, huai a paikhawm mipi a tawmpen in leng 30,000 val ding hi’n kigen hi. Mipi paikhawmte tamdan akipan in mipi’n leng thil omdan pawna mahmah ahihdan kilang hi.  Leitung gam tuamtuam a singtangmi omte’n leng Tribal Unity Day zatna hun nei uh  chihthu zak ahi hi. Huai program in bangtan a khawng (impact nei) ding hiam chih bel gen ngam tadih kei hang, himahleh Manipur singtangmite’ lakah kigawmkhawmna ni hong om hun om ngeidingin lam-et huai hi.
    Huai bill 3-te mawhpaihna in Parliament House ah MP bangzahhiam kikou uh a, Bill 3te zukkik ding Centre in singtangmite ading kivaipuakna tuam a bawlsak phutna in Delhi a om singtangmi tamtakte kiphinna ah Delhi police-te tawh kinawktuahna tanpha om a, a liam-le-bai leng bangzahhiam a om chih i thei! CCpur, Senapati, Chandel, Tamenglong, Ukhrul, Sadar Hills leh mun tuamtuam ah Bill 3te deihlouhna a kiphinna  a om chihte kuapeuh in i theihsa ahi hi. Tu in state govt in  bill thak bawlkhiak a huaite Manipur Assembly in a pom(passed) dingin hahtakin panla lai uhi. Himahleh singtanga mipi kiphinna husa ziak hidia gintak himahleh Bill et-thakna pen zawhsiang hilou chi’n Bill thak pen tutung Assembly session ah luikhiak hinailou phot ding chi’n  state home department in thusuah bawl a, akisaikhakpih(stake holders)te apan ngaihdan lakkhawm hilai ding chi uhi.
    Singtangmite’n i thiltuah utawh kisai in NE state tuamtuam a CM tamzaw in Manipur singtangmite gupna paukam zang uh ahi de aw chihtheih in om a, Nagaland CM TR Zeliang, Mizoram CM Lal Thanhawla banah NE CM tuamtuamte’ kampau khauhthei mahmah hi. Northeast apan civil society tuamtuam a leader-te’n leng hong thuap mahmah uh a, a document bukim JAC-AATB pawlin ding un gintakhuai hi. Hichi zahta a mite’n hong thuap uh a, Vaigam a tribal MP leh MLA te’n hong kithuahpih thei uleh ei sungah kigensiatna, kituahlouhna leh kibaibulik sawmnate beithei hileh chih huai petmah hi.
    Huai kawmin, i theih ding ua poimawh mahmah dang khat bel eilak ah leng Inner Line Permit (ILP) tawh kisai introduce dinga i ngetni uh hong om kha diam chih ngaihsutna om thei hi. Thuthang khenkhat in a gendan in, Vaigam ah Manipur singtangmite’ pau kisinsakna om chipawl om a, thudik ahihleh hihlouh bel theihchet hilou hi. Lamka ah Bihar-mi tam  mahmah uh a, amau state a nek-le-tak zonna thil ah state dang zuan souhsouh uh kichi hi. Bihar state kia ahi kei maithei! Eilak ah biakinn telin tenna inn building tuamtuam bawlte local mi tawm hiaihiai a, market dominate-te leng nidang chianga ‘foreigners’ i chih ding ngen hi maithei uhi.
    Chiamnuih a ‘heavy duty’ chi a i gen uh gari neu ‘Luna’ a tai a van supply apangte lah pung deuhdeuh mai, Thanlon/ Bukpi ahihkei leh mun gamlapipi ah  dawr van ding supply tute lah pung deuhdeuh, Manipur phaijang mite’ tuah bangbang eilawi leng i maban ding leng hithei  hi. Bangziaka Honda Activa khawng zanga km 200 phial a gamla ah nektheih leh van tuamtuam supply thei uh ahi dia le? Sik-sia la a cycle a paite lah kibehlap deuhdeuh mai, Vaite dawr bawl lah pung deuhdeuh, khawpi sunga building neite kiangah inn luahman dia sum a lakh alakh a deposit ngam ziahziah mai uh chih ahi! Tua bill 3-te nang mahni hang, huai kawm in phaijangmite’n a gengen uh ILP deihthu leng eite’ i maban hithei ahi chih leng ngaihsutna neih poimawh hi.