HEADLINES:
Hmar Inpui leh HYA makaite atel leh Hmar nam in movement support ahi- HI President
JAC inntekna in tuni’n Tribal Unity Day zat in om
Lamka, Aug-31: JAC against Anti-Tribal Bills (JAC-AATB) makaih in tuni’n CCpur College campus ah ‘Tribal Unity Day’ kum 1 chinna zat in om hi. Huaima zinglam dak 9:00 in license tawh kithuah thaunei tengin salphate’ suunna in innchiat uah gun salute dan in thau kapging uh a, zinglam dak 10:00 in Dist. hospital a morgue ah salphate’ zahna om hi.
Morgue ah hun zatna ah H. Mangchinkhup, Chief Convenor, JAC-AATB leh Romeo Hmar, Convenor, MTFD banah ATWU, ATML, TRVM Jt HQ Lamka, Tuailai Pro1434 leh YPA Gen HQ a makaite’n thugen uh a, salpha innkuante telin mi tuamtuam in pak pia uhi.
CCpur Govt. College ah main programme zatna ah Rev. Father Stephen Baite, Asst. Parish Priest, Good Shepherd Parish in thumna in hun hong a, salpha 9-te suunna hun makaih a, lasiam tuamtuam te’n ‘Salpha Ngalliam’ leh ‘we shall overcome’ chih lasa uhi.
Main programme zat hun in James YT Thadou, President Thadou Inpi Gen HQ in agenna ah Sadar Hills akipan Thadou Inpi nuai a kahiang tuamtuamte makaih in mi tamtak tuni a hong paite bandh ziakin hong paisuak theilou uh a, amah atel leh Thadou nam pumpi tanga pang hi’n gen hi. Bill 3-te tung ah Ibobi in lai a thapkhum tribal MLA leh Minister-te’n muchian thei nawnlou in amau ading kia ngaihtuah uh a, amau bawltu a singtangmipihte uh a ngaituahlouh ziak uh hi’n gen hi. Tribal unity ni a pangkhawm theilou tribal leh tribal against dia omte apan kiveng dingin mipi paikhawmte ngen a, ganhing lel inleng amau chi chiat kitheih uh a, mi hon sukmang sawmna puaknatdan theiloute lungkhamhuai petmah chi hi. Tulai in mi hausa leh hithei deuhte kia thulakin omta a, thudik gente gingta dingin mipi ngen a, Pathian tawh pangkhawm a kalsuan dingin singtangmite ngen hi.
Joseph Lalrothang, President Hmar Inpui GHQ in gam-leh-leitang adia hinna pia salphate zahna pia in aliamte’ a damsiang uh deihsakthu gen a, Unity Day kituaktak a zat theihlouh nasa petmah hi’n gen hi. Tuni a hongpai theiloute leng i melma hilou in i unaute mah ahihban uah pisual a a omziak uh hi a, maban ah amau leng ahong tel theihna ding ua pilvangtak a panlak poimawh mahmah hi’n gen hi. Hmar Inpui President leh Secretary banah HYA Gen HQ President-te tribal unity day zatna a atel uh Hmar nam majority in tribal movement a support chih chetna hi a, kipumkhatna kembit lehang nikhat chiangin suahtakna ingah ding chi’n gen hi.
Vanlalrinliana, President, MPC Hq Manipur in lungtup mualsuahna dingin tribal movement tawh kisai a panla makaite’n panpihna poimawh mahmah uh ahihdan kuapeuh in thei a nungthuap dia mansa a om gige dingin mipi chial hi.
Laldawnlien Varte, President HYA Gen HQ in pankhawmna ziak a thil tamtak sepkhiak a om hi’n gen a, i lak uah ngia belamvun silh a om ziaka kithutuaklou a kilang maimai hi a, tua i suallel uh MDC, MLA leh MP politics hilou in gam leh leitang banah dikna leh tanvou humbitna hizaw ahihdan gen hi. Kipumkhatna khahsuahlou dingin kuapeuh ngen hi. Salpha 9-te suunna leh tribal unity deih ziaka tuni ahun uap ahihdan gen hi.
Romeo Hmar, Convenor MTFD in singtangmite’ pauteng kim ban ah nam tuamtuam akipan mipi hizah zouzai paikhawmte tribal unity ahikei vachih theihvual hilou chi a, kithuak a I kalsuan zel leh i tup uh kivaihawmna tuam muhlouhna ding thu omlou hi’n gen hi. Tu dinmun a i thilnget kan uh singtangmite ading omlou a, ei adia omsa kingen ahihman in lauh ding omlou a, nikhat ni chiang a lawhching ngeingei ding ihi chi hi.
Programme kipat tungin Chief Convenor, JAC-AATB in keynote address gen a singtangmite’ melma ei-leh-ei hilou in Manipur govt.ahihdan kuapeuh in a theih deihthu gen hi. Aman tribal unity day declaration puang a, salpha liam operation kibawl mi 7-te kiang ah puan pia hi. Zomi Council Chairman B. Dongzalian Simte in a genna ah, Manipur govt in singtangmite a dinga hoihlou bill 1 pass sawmlai a, huai in leng singtangmite sukha veve hi’n gen hi. Manipur phaijang leh singtangmite kikal ah politics lian mahmah a, ngaihnep vual hilou in politics taktak ahi chih theih poimawh a, mipi’n makaite i nungthuap a, makai te’n leng mipite lungtunna tan ah nasem lehang i maban vangtuan mahmah ding hi’n gen hi. Rev. K. Kamchinkhup DS/ Imphal Divn in Nehemia’ thu pansan inTribal Unity Day message gen a, Pathian deihdan a kalsuan di’n mipi chialna bawl hi.
Programme ah Hmar Inpui, Thadou Inpi GHQ, Mizo Peoples’ Convention, Zomi Council makaite, VPC, PTC, UZO makaite leh Joint Philanthropic Org tuamtuam ban ah student orgn. tuamtuam a makaite telin College huangsung dim in mipi kikhawm uh a, a paikhawm teng 30,000 val ding hi’n kigen hi. Huchikal ah Tribal Unity Day zatna uap dia hongkuan Gaidon Kamei, President United Naga Council, Biswajit Daimary, MP leh Sadar Hills akipan Thadou Inpi Gen HQ leh Thadou Women Assn makaihna a mi 400 val hong kuante lamkal ah pawlkhat in adal ziakun paikik uh hi’n kigen a, huai tawh kisai in TWA Gen HQ a President Vahchiin Thadou in poisakthu gen hi. Delhi ah MTF-D makaihna in Jantar Mantar prog zatna om banah Shillong ah SSPP Jt HQ Shillong makaihna in Tribal Unity Day athupi thei bangpen a zatna om hi’n leng kigen hi.
LOCAL NEWS:
Chief Manager in kaisang
Lamka, Aug-31: S. Chinlianthang Ngaihte tulel in anager, Loan Processing Cell (LPC), Regional Business Office, SBI/Babupara, Imphal in zan zekin scale-IV ah promotion mu in Chief Manager in kaisang hi. Amah SK Ngaihte, EE/PWD (retd) tapa ahi hi.
KSO’ General Strike ding khawlsak
Lamka, Aug-31: Kuki Students Orgn. (KSO) CCpur in tuni’n Tedim Road ah tuailai khenkhat in JAC-AATB programme uap ding-te ana dal ziak un thil paidan in siatlam a nawt deihlouh ziakin tunitak zankim akipan dakkal 24 sung General Strike leh public curfew puang mahle uh Staff Selection Commission saina a exam leh CCpur dist a school khenkhat a exam atelte khualna in General Strike leh public curfew zukkik(called-off) uh hi’n thutut kingah uhi.
Doctorate ngah
Lamka, Aug-31: Mrs. Vungngaihlun @ Luni w/o S. Noel Lalrintluanga of Aizawl (d/o H. Haukung) in JNU, New Delhi a Centre for the study of Regional Development, school of social sciences ah Dr D.N Das, Associate Prof. panpihna in “Determinants of school dropouts in Elementary Education, a study of Manipur chih thupi zang in tunaizek in Doctor of Philosophy (Ph.D) ngah hi.
Mi 140 vel recruitment ah kuan
Lamka, Aug-31: Pangei a Manipur Police Training College ah 2013 batch Police recruitment te’n athak in recruitment pan uh a, zan leh tuni’n CCpur Dist. apan candidate te’n Physical Efficiency Test (PET) nei uhi. Tuni zingsang in SP office apan recruitment atelding candidate 140 vel te’n Police escort na nuai ah Pangei zuan uhi.
JNV a Class 8 zil pasal 27 taikhia
Lamka, Aug-31: Tuinom a JNV school ah Class VIII zil pasal 27 te’n Class XI-te’ ragging thuak zawh nawn louh in zan nitak zankim dak 12:00 am lak vel a taikhia uh hi’n kigen hi. Thiltung tawh kisai in student te’n tuni zingsang in a nu-leh-pa/guardian-te uh theisak uh a, HSA GHQ a Asst. Gen. Secy. leh HSA JHQ a Gen. Secy te’n tusun dak 12:40 velin JNV school vapha in Principal S. Sanamacha Singh va kimuhpih uh hi’n kigen hi. Huai hun ah Principal in thiltung poisa in saifel ding a ut thu gen a, student nu-leh-pa banah guardian-te nitaklam dak 3:00 a kimuhpih ding a sawm chi hi. Principal in thiltung tawh kisai in Class VIII leh Class XI nu-leh-pa banah guardian-te Sept 1, 2016 zinglam dak 11:00 a kimuhpih nawn ding hi’n gen uhi. Akigendan in JNV a Principal di’n July 4, 2016 in S. Sanamacha Singh in zom a, hun sawtpek apan Senior student te’n Junior-te tungah ragging a bawl sek uh Principal in a theih ziakin vengtu (watchman) ding tanpha ana koih a, vengtu tanpha soisak banah vauna mu hi’n gen uhi.
TKSU Freshers’meet-cum-Felicitation
Lamka, Aug-31: Thadou-Kuki Students’ Union (TKSU) CCpur College te’n Sept 2, 2016 zinglam dak 9:30 in B.Vengnuom Community Hall ah ‘Decade Anniversary-cum-Freshers’ Meet and Felicitation program nei ding uh a, Chief Guest in L. Mangkhogin Haokip, IPS, SP/CCpur pang ding hi. Guest of Honour in Lamkhosiem Khongsai, DTO/CCpur leh Functional President in James Doujapao Haokip, Jr. MCS, SDO/BDO Tuibuong pang ding hi. Pastor Kamkholun, ECA, ECCI in Freshers’ te Pathian kiang ah thumsak ding a, Paojalhun Haokip in Decadal Souvenir hong ding hi. Hiai hun cultural troupe bangzahhiam apan cultural dance omding hi.
Petrol leh Diesel man pung
New Delhi, Aug-31: Tunitak zankim apan Petrol man litre khat ah Rs 3.38 leh diesel man litre khat ah Rs 2.67 in pung a, kha 2 sung thautui man a kiam nung in tuni’n khangtou hi. Huai dungzui in Delhi ah Petrol litre 1 in Rs 63.47 man ding a, tuma a diesel Rs 50.27 hisek pen tunitak apan in Delhi ah Rs 52.94 hiding hi.
IMPHAL NEWS:
Gaidinlui memorial function uap
Imphal, Aug-31: Union Home Minister of State for Home Kiran Rijiju tuni’n Tulihal Airport hongtung a, huai ah Ksh. Bhabananda, President, BJP Manipur Pradesh leh BJP makai tuamtuam te’n ana dawn uh hi’n kigen hi. Union Home Minister in helicopter zang in Tamenglong district a Nungjao village ah freedom fighter Rani Gaidinlui memorial function zatna om ding chih himahleh khaw siat ziak (bad weather) in Chingmeirong a Tingkao Rangkao Temple mun ah function om a, huai hun va uap hi’n kigen hi.
Huai hun ah Union Home Minister in a thugenna ah Prime Minister N. Modi thupiakna dungzui a India gamsung a freedom fighter-te theihna ding a program sai hi a, freedom fighter-te pension leng 20% a pung hi’n gen hi. Manipur a tuailai talent hoihtak nei-te phathuai a sak thu gen a, gamsung a ding in kipe zou uh a adiak in sports lam ah chi hi. Himahleh Central govt. in hamphatna tuamtuam a bawl-te Manipur a mi genthei diak te’n a muh lou uh tawh kisai in mawhsakthu gen a, CSOs leh political party te’n in Manipur ah bitna leh muanna om theihna dia pan alak khawm uh ngai hi’n gen hi. Hiai hun K. Bhabananda, President, BJP Manipur Pradesh, Th. Chaoba, ex-President, BJP, M. Ashnikumar, Vice President, BJP Manpur Pradesh leh Tingkao Ragwang Chapriak Kamson, Gen. Secy, BJP Manipur Pradesh te’n uap uhi.
Mapithel Dam tawh kisai in thupia
Imphal, Aug-31: Prime Minister Office (PMO) in Sept 2, 2016 ni a Mapithel Dam hongkhiat a om ding tawh kisai in hilhchetna hoihtak bawl ding in state govt. kiangah ah theihsak uh hi’n kigen hi. Thusuak in a gendan in huai thu tawh kisai a Union Ministry of Power in state govt. kiangah Mapithel Dam zat theihna dia nasep teng khawlsak ding in thupia uh a, Shivani Choudhary, Executive Director, Housing and Land right Network Delhi in PMO ah complain a bawl tungtawn a thupiak hi a, complain ah thagum zang a Mapithel dam bawl ziak in a kim a teng-te tungah human rights dan kalhna leh Thoubal river paidan a subuai ding a, kum 2008 a expert review committee kibawl khia te’n nasep sunzom thak ding leh rehabilitation banah resettlement omlai-te leh ERC report dungzui a Mapithel dam in a sukkhak ding-te enkai ding in ngen a, Manipur govt. in Dam tuamtuam a bawl-te uh zat theih ding om lou chi’n gen hi. PMO office in Manipur a mega dam kibawl-te enthak ding leh suizui ding in ngetna bawl a, Khuga Multipurpose hydro-electric project, Khoupum dam, Singda multipurpose hydroelectric project leh Loktak multipurpose hydroelectric project-te hi a, Mapithel dam tawh kisai a UN special Rapporteur in 2009 a recommendation a bawl zat ding in leng ngetna bawl hin taklang uhi.
BJP MLA 2-te khahkhia; bandh sunnung dak 1:00 in bei
Imphal, Aug-31: BJP Manipur Pradesh te’n zan in Pangei a MPTC ah kiphinna makaih ziak in police te’n BJP MLA 2- Kh. Joykishan leh T. Bishwajit-te a mat uh mawhpaihna a tuni zingsang dak 6:00 apan nitak dak 6:00 tan bandh a puang un hindan nawngkai sak a, BJP worker, Manipur Police Constable Recruitment appeared candidate leh bandh supporter te’n Imphal area a mun tuamtuam ah gari tai ding kham uhi. BJP worker te’n flag tawi in Keishampat junction ah lampi khak uhi. Sagolband Bijoy Govinda area ah tyre hal banah electric pole zang in lampi khak uh a, Wahengleikai a Jiri Parking area ah leng BJP worker te’n gari tai ding kham uhi.
Imphal West, Imphal East leh Thoubal district ah bandh supporter te’n lampi khak uh a, zingsang in dukan leh dawr-te kihong mahleh BJP worker leh Police Constable appeared te’n khaksak uh a, himahleh bandh in Union Home Minister Kiran Rijiju programme subuai khalou hi’n gen uhi. Thusuak in state govt. in Central govt. lam apan nawhna a muh ziak un BJP MLA 2-te tungah FIR zukkik thak in khahkhia uh a, huai tawh kiton in dakkal 12 bandh ding kichi leng sunnung dak 1:00 apan bandh besak hi’n gen uhi.
Congress-te vaihawmna a beina ding kipan : Kiran Rijiju
Imphal, Aug-31: Nityaipat Chuthek a BJP Manipur Pradesh office ah tuni’n press conference om a, huai ah Union Minister of State for Home Kiran Rijiju in zan a BJP MLA 2 mat a om tawh kisai in Manipur ah Congress-te vaihawmna a beinang kipan leh Manipur ah BJP govt. hat ding hi’n taklang a, Manipur ah mi 1 in kum 14 ½ sung a vaihawmna hun ah nekgukna teh kak theih vual hilou chi hi. Nekgukna hat luat ziak in govt. sepna muhtheihna ding in mi tamtak te’n gam leh innmun zuak uh a, BJP in vaihawmna a let chiang in Manipur ah govt. fund zat thelthang leh diklou taka vaihawmna bei pan ding a, Centre a BJP govt. tungah nekgukna ah ngawh theih ding omlou banah thuneihna zang khial lou uhi.
Aman agenzelna ah maban state assembly election ding tawh kisai in Congress party sangin BJP-te’n masawn zaw uh a, vaihawmna let utna ziak in Congress te’n sumtak a neih uh tungtawn in thil ahih theih ziak un BJP-te pilvang ding a theisak hi’n leng gen uhi.
ILP tawh kisai bill luikhe thei nailou ding – Home Dept.
Imphal, Aug-31: M. Yaiskul Meitei, Special Secretary (Home), Govt. of Manipur in tuni a thusuah a bawlna ah State govt. in Aug 9, 2016 in draft bill ‘The Manipur Regulation on Non-Local Bill 2016’ tawh kisai in Aug 24, 2016 tan a ngaihdan pekhom ding in mipi kiangah theihsakna bawl uh a, hunbikhiah beinung in mi 91in ngaihdan sung in JCILPS te’n Aug 29, 2016 in draft bill dang ding ‘The Regulation of Non Manipuri People Bill 2016’ kichi pe lut in stake holder-te ngaihdan kaikhawm ding leh Assembly session hun ah luikhe ding in ngetna bawl uhi. State govt. in bill tungtang ngai poimawh in draft bill 2-te original bill tawh a kibat louh ziak in stake holder teng ngaihdan a lak khawmna dia mipi kiangah taklat ngai a, Sept 2, 2016 in Manipur Legislative Assembly 10na a Session 14na kipan ding hi.
Constitution provision dungzui in sitting nanung hun apan sitting nawn ding pen kha 6 in a hal louh ding chih ziak Assembly session suan gamlat hitheilou a, draft bill tawh kisai a stake holder leh mipi ngaihdan lakkhawmna ah hun lut ding ziakin Assembly session hun ah luikhiak hithei lou ding chi hi. Hiai tawh kisai in mipi theihsakna in Sept 2, 2016 ni a bill luikhiak hithei nailou ding a, state govt. in akisaipih-te banah mipi teng pomtheih ding draft bill bawl zawh chiang in akintheipen a Assembly Session ah puakluat hiding in taklang hi.
NPF Chandel unit te’n sit-in-protest nei
Imphal, Aug-31: Samuel Risom, NPF/MLA tenna inn ah bomb puak mawhpaihna in Chandel district HQ ah Naga People’s Front (NPF) Chandel Divisional Unit office kong ah tuni’n NPF party worker, NPF ticket a Chandel ADC a elected member te’n sit-in-protest nei uhi.
Huai hun ah placard ‘Stop the act of terrorism’, ‘we strongly condemn bomb blast at NPF office Imphal’ chih-te tawi uh hi’n kigen hi. Ts. Molarsing, Unit President, NPF Chandel Divisional Unit in thiltung tawh kisai mawhpaih uhi.
General Strike ding call-off
Imphal, Aug-31: Outer Manipur Tribals’ Forum (OMTF) leh Joint Action Committee Against Anti-Tribal Bills (JACAATB) te’n Aug 28, 2016 ni a thupukna a bawlna uah Sept 1, 2016 zankim apan Sept 5, 2016 zankim tan daih ding general strike bawl a sawm uh tawh kisai in pawl tuamtuam apan ngetna om dungzui in general strike zukkik uh a, himahleh pawl 2 te’n thil paidan leh Manipur govt. panlak dan enkhe ding uh a, Manipur a tribal om teng pilvang ding leh maban a thil bang hiam a om khak ding kisakhol ding in ngetna bawl uhi.
MPS akipan IPS in kaisang
Ministry of Home Affairs, Govt. of India, a under Secy. in tuni a thupuan a bawl dungzui in Manipur Police Service (MPS) Officer 2 tuni akipan in Indian Police Service (IPS) Officer in kaisang uhi. Amau-te
1. Ningshem Vashum
2. B. Go Lian Mang
TUNI THUPI:
“Suahlam leh tumlam a kigamlat bangin, i tatleknate ei akipan in a koih mangta hi.” -Sam 103:12
EDITORIAL:
I gam lungzin huai!
Salpha 9-te gam leh nam adia a kipumpiakna uih a manphatdan tawh kisai telin thu poimawh tuamtuam taklat hisek a, hun paisa ah leng Manipur Express in naktakin taklang khinta hi. Tu’n maban a Sept 2 & 5, 2016 in Manipur Assembly session om ding a, huai hun ah Inner Line Permit tawh kisai in ‘The Manipur Regulation of Non-Local People Act
2016’ kichi draft Bill thak Assembly a puaklut ahihban ah passed hiding chi’n kigenkhol khinta hi. Huai draft bill thak leng tuma zeka India President in a lemsakpihlouh ‘The Protection of Manipur People Bill, 2015’ bangpi kilamdanna om tuanlou chih ahi hi. Kilamdanna omsun bel bill masa ah cut off year 1951 pen tutunga pen ah kum 1972 a khen hiding chih ahi lel hi.
Bill luipen hi’n tutunga puaklut thak ding bill zat ahih aleh Manipur pumpi a zat hiding chih ahi a, huai bill dungzui in Outer Manipur (singtanggam) leh Inner Manipur (phaijang gam) khentuam hilou chihna suak a, hun paisa ah Manipur singtanggam a dan kizang kha dingte himhim Hill Areas Committee(HAC) kichi singtangmi MLA teng a telna a totkhak teitei ding chih bang leng palzut in om hi. Huai bill in HAC hi’n District Council hileleng bangmahlou in koih a, gam-le-leitang thu ah Manipur Cabinet thuthu hong hita ding a, singtanggam kivaipuakna tuam hiam British-te hun akipan patta tuam neia singtanggam a hausa(chief) om bang leng abei tawh kibang khop in gam-le-leitang tungah singtangmite thuneihna teng leng abei ding suak hi…
Huailou in Manipur mi diktak chetna dingin kum 1972 hiding chihthu ah govt in a pansan ding kum 1972 a Electoral Roll hi a, huaia telkhate leh a tu-le-tate uh ahih ding chih hazel hi.I theihsa bangin kum 1972 hunlai tan in electoral roll ah singtangmite’ min telkim hina hiam chih ginlelh-huaipi suak hi.Kum 1972 hunlai velin singtangmite lakah electoral roll kichi ngaih poimawhluat hinailou bang hi. Huai hunlai mai hilouin huai hunma a khua omkhin tham mi leng a hunkhop om,himahleh Polling station omna ahihlouh ziaka electoral roll a min tuangkhaloute’ tu leh ta tamtak omta ding hi. Huchi ahihman in kum 1972 hunlai a Manipur a piang leh khawsa khintham, hileleng electoral roll ah min omkhalou singtangmi tamtak om ding hi.
Atunga tamlou chik i taklat a kipan lel in leng Bill-lui hi’n a thak hileleng singtangmite adin bomb hattak tawh kilamdanna omlou bang hiding hi.Huchi ahih lebel phaijangmite bel ngentel takin kisui hetlou ding uh chih thudik selguk vuallouh hi a,kumlui 2015 sunga state dang hiam gamdang akipan Manipur honglut thakte leng amau mi ahih phot leh huchi mah hiding hi.Himahleh non-local mite tungah danthak zat masak hong hiding a, huaizawh hipah thethu kei leleng tuban kum tamlou nungin singtangmite tung ah zat hong hiding chih kichian mahmah hi.Huchi ahihman in aminpu in ILP chih minvuah himahleh ataktak in tutunga Bill thak sunga thu omte leng ILP sang mah in Manipur akipan kinawhkhiakna tupna thuguk kiselgu dan in kilangzaw hi.
Mihingte’ paizia ahihleh, i kimuh mun a, nekhawm, takhawm a i om mun ua leh, ki- itna leh kingaihnatna piangsak hi. Manipur ah bel singtangmite leh phaijang mite kalah sahkhua, nek-le-tak, thilchin leh paidan ah kilamdanna lianpi om a, huaiziak mahziak mah in Manipur gam hizenpi singtangmite luahna bial singtanggam teng Outer Manipur(Manipur pawlam zawk) chih in om a, phaijang bial phaijangmite tenna teng Inner Manipur(Manipur gam a sungnung) chih in om a,Manipur in MP 2 a neihte leng Outer leh Inner in kikhen hial hi. Singtangmite lakah leng Non-Naga Tribe-te suangtu kibang,beh-le-phung leng kibang hizenpi pau-le-ham neuchih kibatlouhna omzekte pansan a kituam koih maimaite i hi uhi.
Huaiziakin Manipur Assembly session Sept 2 & 5 om hun sungin ‘The Manipur Regulation of Non-Local People Act 2016’ kichi draft Bill thak puaklut ahi ngei ding a, vote lak hun ah phaijangmi MLA 40 omte alou theilou in pangkhawm ding un kilang a,singtgangmi MLA 19 sanga tamzaw ngeiloute adin vote a zawh vual ding hikei mahle uh singtanggam dengdel sak ding leh singtangmite hihna palzut ding Bill bang hong suah ding uhiam mipi in mitsuanpen a nei ding hi’n kilang hi.
No comments:
Post a Comment