HEADLINES:
ASEAN tungtawn in Act East Policy gahsuah ding: Kumar Reddy
PM Narendra Modi in ASEAN-India summit uap ding
New Delhi, Sept-6: Association of Southeast Asian Nations (ASEAN)-India Summit 14veina uap di’n Prime Minister Narendra Modi in zingchiang in Laos capital Vientiane zuan ding a, Nilaini inleng East Asia Summit 11veina uap ding hi. Tuni’n Vientiane khawpi ah ni 3 sung omding 28th ASEAN Summit kipan a, khawvel makaite’n ASEAN Community Blueprints 2025 tungtang genkhawm uhi. ASEAN a kikhai khawm Brunei, Myanmar, Cambodia, Indonesia, Laos, Malaysia, Philippines, Singapore, Thailand leh Vietnam makaite’n ASEAN dialogue partner - China, India, Japan, Korea, Australia leh United States makaite tawh leng issue tuamtuam genkhawm ding uhi.
ASEAN leh India kala palai(Ambassador) Suresh Kumar Reddy in tuni a gendan in Summit hunah Socio-Economic Growth tungtang genkhawm in om ding hi. ASEAN pawlpi a India akihel ziakin Act East Policy leng gahsuah thei ding in kilang chi hi. Huai summit hunah Prime Minister in gam tuamtuam makaite kimuhpih ding a, technology, resource leh Industry tawh kisai banah Agriculture, Climate Change, Non-traditional security area, cyber crime leh connectivity tungtang a, India leh gamdangte kizopna ahoihzawkna di’n panlak sawm hi.
ASEAN Summit 28veina hunah "Turning vision into reality for a dynamic ASEAN community" chih thupi in zang uh a, agenda genkhawm dingte lakah South China sea kituhna tawh kisai, counter-terrorism, trade leh human rights leng telkha hi. ASEAN makaite’n regional leh international issue tuamtuam genkhawmna China, Korea leh Japan tawh ‘ASEAN Plus Three Summit’ nei ding uh a, India, Japan, Republic of Korea leh United Nations tawh leng Summit tuam nei ding uhi.
LOCAL NEWS:
ADC Chairman in Orthotic Therapy Unit hong
Lamka, Sept-6: P. Kamdou Veng a Mercy Home ah Dist. a masapen hiding in Jan Vikas Samiti/ Liliane Foundation akipan huhna zangin guhlam natna nei naupangte therapy piakna ding Orthotic Therapy Unit kichi ADC Chairman Langkhanpau Guite khuallian a pang in hong a, Rev. Fr. Mathew Mundoly, Parish Priest, St. Mary’s Parish in Pathian kiang ah lan hi.
Chief Guest in agenna ah Catholic saptuam in naupang genthei leh haksate etkolna ding home a bawlkhiak pahtakthu gen a, vualphaloute hihtheihna tuam a piak hi a, kingaiselou din genpih a, midangte adia vualzawlna nak hithei dia panla dingin hasuan hi. Huai home ah Orthotic Therapy Unit exercise lakna vanzat tuamtuam Quadriser, Shoulder Wheel, Staircase, Parallel Bar, Gym Ball, Overhead Pulley, Static Cycle, Thread Mill, Therapy Mat leh Trampoline koih hi a, Cerebral Palsy neite ading deuh hi’n kigen hi. Mercy Home ah naupang 34 enkol uh a, St. Mary’s School ah a thawn in kai uh a, Joyce Maria in enkol hi.
Kha 1 sungin gari 130 kibehlap
Lamka, Sept-6: Dist. Transport Office ah Aug 2016 sung in gari 130 registration kibawl a, huaite 2-wheeler (bike/active) 94, auto-rickshaw 6, car 16, van 1, maxi cab 1, bolero 1, scorpio 2, tata sumo 3, light goods vehicle 2, medium goods vehicle 2, tractor 1 leh bull dozer 1 hi a, revenue Rs. 8,66,790/- mukhia uhi.
New Bazar ah kidawhta ding
Lamka, Sept-6: Lamka-Imphal kikal line Bus leh Winger-te Aug 26, 2016 apan Tuibuong a kidawh in passenger alak uh ni 11 nungun Sept 7 akipan parking ngei mah a kidawh nawn ding uh hi’n kigen hi. CCpur-Imphal Transport Owner Society (CITOS) a President akipan kizadan in Student body tuamtuam telin Tedim Line Bus leh Winger-te’ tuni’n meeting uh a, mipi khualna in New Bazar a parking ngeimah a kinga nawn din thukim uh hi’n gen hi. JAC-AATB telin pawl tuamtuam in bandh/shutdown a bawl chiang un mipi leh passenger gari-te khualna in hun kichian bikhiah a, huaite mipi theihsakna bawl masa ding leh ut dandan a bawl nawnlou dingin leng ngen hi.
JAC Khugam Dam te’n thusuah
Lamka, Sept-6: JAC Khuga Dam Project te’n thusuah a bawlna uah Nov 12, 2010 in Sonia Gandhi in Khuga Dam project hong mahleh Dam a component bukimlou hi. KHD, Spillway leh Canal-I & II etkai ahihlouh banah canal kichip zel ziakin tuilou liantak ahihsiat ban ah Khuga Dam ah mi ahunkhop kelum uh a, govt in mihing sihna ding thang (trap) a kam uh tawh kibang hi’n taklang uhi. Huchi himahleh state govt in tunitan in enkai tuanlou hi’n JAC thusuak ah taklang uhi.
Sc GT apan AI in kaisang
Lamka, Sept-6: Sartuinek govt H/S a Science Graduate Teacher sem Andrea Niansanching, tuma zekin Asst. Inspector of Schools in kaisang a, aman zan in ZEO/CCpur kiang ah joining report pia hi.
DEIC building kibawldan hilhchian
Lamka, Sept-6: Dist. Hospital campus a Dist. Early Intervention Centre (DEIC) kibawl lungtun huailou ahihdan social media tuamtuam a kapkhiak tungtang ah tuni nitaklam in building bawlna enkaitu Bikash, Section Officer, MANIDCO in thil omdan enkhia hi. Huai hun ah Zomi Students Federation (ZSF) GHQ leh Tribal Rights Vigil Manipur (TRVM) Jt HQ makaite telin Contractor tawh blue print enkhawm uh a, ahi ding banga kibawl mah ahihdan taklang uhi. SO in leizul (ground level) a beam om ding a design ahihdan gen a, lei kuak omsa hukna ding a suang kisung hi’n gen a, ground level akipan feet 1.50 in foundation sang ding a, beam tungah teklei double a thuap in bawl hiding chi a, a hoihlouhna ding omlou chi
hi.
Huai building feet 90 square a kibawl ding himahleh amun kidaihlouh ziaka a sawng akibawl ding hi’n gen a, ground floor ah naupangte kimawlna ding, reception, anthropometry, nursing station, examination leh dental room om ding a, 1st floor ah Vision Impairment, Early intervention Occupational Therapy, Store Room, Hearing Impairment leh ECG lakna ding telin laboratory tuamtuam om ding hi. Building bawlna dingin National Health Mission in Rs. 1.10 crore sanction hi’n in contractor in gen hi. ZSF GHQ leh TRVM JHQ Lamka makaite’ building kibawldan hilhchet hi uh a, gamsung ah govt. nuai a dev. scheme tuamtuam kisemte quality enzui zel uh a, maban ah leng sunzom zel ding uh hi’n gen uhi.
ZEO in Seminar neihpih
Lamka, Sept-6: ZEO in tuni sunnung in Synod Hall ah Headmaster/ Headmistress leh Principal-te Ministry of Sc & Technology, Deptt of Sc & Technology, govt of India leh National Innovation Foundation, India pangkhawm a kibawl Inspire Award Scheme tawh kisai Seminar neihpih hi. Inspire Award scheme ah class VI-X kikal student te’n Sc & Technology hamphatpih ding, innovative idea neih ding chih tup-leh-gim hi’n genpih a, CCpur dist. a school 165 omte’n ZEO tungtawn in www.inspireawards-dst.gov.in ah registration bawlthei ding uhi.
Dist. Level Sc. Seminar om
Lamka, Sept-6: Synod Hall, IB road ah tuni in ZEO/CCpur nuai a Science Superviser saina in “Pulses for Sustainable Food Security, Prospect & Challenges” chih thupi zang in 38th Dist. Level Science Seminar om a, St.Mary school, Don Bosco Hr Sec School, Gandhi Memorial H/S, JNV/Tuinom leh L.Foundation School apan student 11 tel uhi. Huai ah 1st in Emeli L.Thiennei of Don Bosco Hr Sec School pang a, kipahman Rs. 1200/-+ certificate +dictionary ngah hi. 2nd in Jubilee Vengvanghoih of St Mary’school pang a, Rs. 1100 +certificate+ dictionary ngah hi. Mi 4 kiangah consolation prize Rs. 800 +certificate + dictionary pia uh a, mi 5 Rs. 500/ + certificate + dictionary pia uhi. 1st & 2nd bel dist sikin Sept 15, 2016 in Lamyanba Sanglen,Imphal a State Level Students Science Seminar ah tel ding uh a, State ai-oh a telkhiat teng Oct 4, 2016 in Mumbai a Nehru Science Centre ah National Level Students Science Seminar ah tel ding uhi.
ATWU in cabinet keklian
Lamka, Sept-6: All Tribal Women Union (ATWU) pawlin tuni’n Cabinet keklian uh a, Vice President in Buonzamawi leh Ramthienghlim, Prayer Secretary- T. Gouzavung, Asst. Prayer Secy- Ningsial, Liannem leh Niangzaman; Secy, Information & Publicity- Lidya Lalpienghun; Asst. Info & Pub in Ngaihlun, Gouzavung leh Manngaihkim guang uhi. ATWU head office dingin Dorcas Veng a S. Ginzasuan’ inn zat hidin leng gen uhi. YPA GHQ makaih in Aug. 23 in 2016-17 sung vaipaw ding tel uh a, huai ah President in Nianglian, Vice President- Deborah Zou, Secretary- Kimzaching, Asst. Secy- Ngaikhanvung, Finance Secy- Ningkhanvung leh Treasurer-Lalmalsawm tel uhi.
One Day Legal Awareness prog
Lamka, Sept-6: CCpur United Club Orgn. (CUCO) saina in tuni’n Zoveng a Zogal Memorial hall complex ah ‘1-Day Legal Awareness Programme’ om a, Zenhang Lamka V/A Secy Ginkhenpau Valte khuallian in pang hi. Functional President in S.K. Mangang, President, CUCO; Guests of Honour in V. Hangkhansuan, Head i/c Bijang Loubuk school, Chinjakham, Vice President ZYO leh TK Lun Haokip, Vice President HSO pang uhi. Huai ah Zenhang Lamka leh akim veng tuamtuam akipan mi 200 vel paikhawm uh a, Phulindro Konsam, Human Rights Activist ; M. Urmila Devi, Advocate leh George, Advocate te’n thupi tuamtuam zangin sinsak uhi.
Police te’n bike 1 kem
Lamka, Sept-6: Zenhang Lamka ah zan nitak dak 7:00 velin Police te’n aneitu kitheilou Yamaha bike R-15 kichi No. MN07-0185 mukhia in Police Station ah kem uh a, a neitu in ngaihven theih ding hi’n gen uhi.
Police-te’n Jail ah koih
Lamka, Sept-6: Lianzakhup (29) s/o Haupi of Thingkangphai in Sept 1, 2016 zinglam in a innsung uah buaina bawl in a sanggamnu Manngaihching (34) thah sawm in sek (hammer) in alu khet sawm mahleh khen khalou hi. Huai thu Police ah report bawl hi a, Police te’n Lianzakhup man in tuni’n CJM Court ah pawkhia uh a, court thupiak bang in Police te’n Jail ah koih uh a, FIR No. 44 (9) 2016 CCP-PS U/S 307 IPC registered uhi.
Sept 8 in News suaklou ding
MHJU kiphuhkhiakni zat ding ziakin Sept 7, 2016 in MHJU atel Newspaper office teng kikhak ding a, Manipur Express telin MHJU atel Newspaper teng Sept 8, 2016 in suaklou ding hi. Sept 8 in office hon hiding a, huaiziakin issue masa Sept 9, 2016 in hong suak ding hi.
SUUNNA:
Gousuanlal Buansing (23) s/o B. Go Lian Mang, IPS of Tribal Colony, Imphal tu zing dak 6:30 velin OD in si a, tuni’n Chingmeirong Christian Cemetery ah kivui hi.
Tomba Muanthang (54) h/o Chingngaih of Langol Housing complex tuni nitaklam dak 4:10 velin RIMS ah BP stroke ziakin si a, Sept 7, 2016 in Chingmeirong a Christian Cemetary ah kivui ding hi.
IMPHAL NEWS:
Chief Minister kimuhpih
Imphal, Sept-6: Chief Minister Office Chamber ah tuni’n N.S. Kang, IAS, Secy & D.G. NACO Ministry of Health & Family Welfare in CM O. Ibobi va kimuhpih a, huai hun ah Manipur a Health and Family Welfare tawh kisai state govt. panlak dan leh Centre in a poimawh bang a kithuahpih theihna ding omte a panla ding hi’n Secy & D.G. NACO in Chief Minister O. Ibobi gen pih chih thu om hi. Huai nungin CM in N.S. Kang kiangah souvenir pia hi.
Army-te gamtatna mawhpaih
Imphal, Sept-6: NSCN-K cadre te’n Aug 29, 2016 nitak a IRB personnel-te thau a suhsak nung ua Tamenglong district a Sibilong village ah combing operation hun a Assam Rifle personnel te’n numei-te a hihbuai banuah nautang-te a soisak uh tawh kisai in mawhpaih thu puang uhi. Hiai thu tawh kisai in Manipur Press Club ah tuni’n Press Conference om a, huai ah Panti Golmei, President, Rongmei Luh Phwam (AMN) in a thugenna ah 23-A/R personnel te’n women police-te kithuahpihna tellou in Sibilong village ah search operation bawl uh a, PIB (Defence) thusuak in Sibilong khaw mi Kabigai leh Numkhaolung-te NSCN-K cadre hidan a puang uh nial a, NSCN-K a MIP in mi 2-te tawh kizop khakna neilou uh ahihdan puang khin uh chi hi. 23-A/R te’n Aug 30, 2016 nitak in Sibilong village umkual in in search operation pan uh a, A/R te’n mi 2-te pikhiak sawm mahle uh nautang ahih ziak in mipi te’n dal uhi.
A/R te’n mi 2-te innsung khat ah dakkal 3 sung kihoupih ding a ngetna a bawl uh a, security force ten mipi-te tungah chiang zat khum uh a, lampi dal a om nupi pawl-te’n leng soisakna tuak uh a, mi 22 liam in mi 12-te Nungba health Care centre ah puaklut in om uhi. Rongmei Naga Council Manipur, Rongmei Luh Phwam, Rongmei Naga Youth Orgn. leh Rongmei Students’ Orgn. a palai te’n Sibilong village etkhiakna va nei uh a, a kintheipen a mi 2-te khahkhiak ding, A/R-te soisakna a liamna tuak-te compensation piak ding leh nautang tungah a khengval a gamtang security force-te tungah action lak ding chih-te telin Dy. CM Gaikhangam kiangah memorandum pia uh a, Sept 10, 2016 tan a thilphut-te piching sak ahihkeileh kiphinna tuamtuam pan ding uh hi’n taklang uhi.
Mi tamtak guang tawh kisai soisel
Imphal, Sept-6: BJP Manipur Pradesh a Vice President Moirangthem Hemanta, ex-Minister in Thoubal district a Phundrei ah BJP Political conference hun ah Congress govt. in mipi’n sum tamtak seng a member 60 omna Manipur Legislative Assembly Secretariat ah nasem ding mi 500 val a guang uh tawh kisai soisel a, Meghalaya leh Tripura Legislative Assemblies te’n nasem mi 300 leh 250 tuak nei uh chi’n gen hi. Member 289 om na Maharastra Legislative Assembly in staff 750 nei a, 294 member om na Andhra Pradesh Assembly in leng staff 294 tawh nasem uh a, tun govt. in Dept. tuamtuam a nasem ding tamtak lakna dia thusuah a bawl uh leng election ah vualzawhna ngaih theihna ding ta tupna uh chi hi. Chief Minister O. Ibobi makaihna nuai a govt. in Manipur Legislative Assembly a monsoon session ah sitting ni 2 kia a om tawh kisai leng soisel a, Manipur ah Congress te’n kum 14 a vai hawm sung un nekgukna, diklou tak a thilsai leh job recruitment-te ah thil diklou tuamtuam muhtheih a, BJP te’n congress-te diklouhna-te a puangkhiak khak ding Congress te’n lau uh a, huai ziak a sitting ni 2 kia om a, mun dang-te ah zak khak ngeilou himahleh Manipur kia ah sitting ni 2 sung lel om thei a, Congress govt. in member 60 lakah MLA 47-te gupna ngahmahleh opposition a BJP MLA 2-te maituah ngam lou uh chi’n taklang hi.
NRL oil pump kihong nawn
Imphal, Sept-6: Manipur ah NRL retail outlet (oil pumps)-te kha 2 vel ding a kikhak nung in zan in kihong nawn a, Numaligarh Refinery Limited (NRL) in NRL pump-te ah thautui pia a, BPCL in thautui puak man a tawm luat ziak in July 1, 2015 akipan Manipur ah thautui piak ding a khawlsak apan NRL pump-te kikhak hi’n gen uhi. BPCL thunei-te leh Transporter te’n kihou lemna a neih uh dungzui a NRL pump-te kihong nawn a, BPCL nidang a NRL kichi te’n Manipur a IOC nuai a oil pump 71 sang a tam zaw-te ah thautui pia uh a, state oil market ah BPCL in din mun poimawh tak luah kei mahleh NRL thautui deih a tam ziak in maban ah oil market luah ding dan ngaihtuah uh hi’n kigen hi. Manipur Oil market ah Indian Oil Corporation (IOC) in percentage tam luah pen a, BPCL share tam kei keimahleh ESSAR in leng oil pump khenkhat nei uhi. Manipur ah kum 2015-16 sung in thautui kizang teng lakah BPCL/NRL thautui 40.3% kizang hi. BPCL te’n nidang in thautui kipuak na lam leng sai uh a, himahleh oil pump-te apan transporter-te tungah complain tamtak om ziak in Oil pump te’n a tanker-te uh zang a thautui kipuak ding in kilemna om hi. Kum 3 paisa sung a transportation charge bawl thak louh in kizang tou den a, BPCL a Dy General Manager in Manipur ah til om dan enkhia a, huai apan transportation lam tawh kisai a kihou lemna om hi’n gen uhi.
World Cup Archery ah tel ding
Imphal, Sept-6: Denmark gam ah Sept 24-25, 2016 sung in World Cup Archery Individual Compound Final hun ah Manipur apan Archer Paonam Lily Chanu tel ding a, India adia tel masapen ding in gen uhi. Akigendan in Lilly in Archery tawh kisai in kum 2003 a Indian Round Archer ah a tel masakna pen hi a, kum 2012 in Shanghai a Compound Team Event hun ah bronze medal la a, kum 2013 in Taipei a Compound Mixed Event hun ah Gold medal la hi. Kum 2014 in 3rd Archery World Cup Championship Team Event hun ah Bronze medal la a, huai kum mah in Bangkok Grand Prix Archery Championship hun ah Asian Record khat bawl khia hi’n gen uhi.
School thunei-te hilhchetna nial
Imphal, Sept-6: Game Village Zone-II a Residential Kids’ Care School a class VI zil Tongbram Suresh @ Malangba (14) s/o T. Bira of Bishnupur Toupokpi Ward-2 sihna tawh kisai in school a Managing Director W. Chingkei in ahilhchetna ah school a soisakna tuak student kuamah omlou a, Tongbram leng kum 2013 apan a student uh hikha nawnlou chi hi. Hiai tawh kisai in tunitaklam in Manipur Press Club ah press conference om a, huai ah JAC of Tongbram Sureh leh a innkuan te’n Managing Director hilhchetna nial uhi. Tongbram pianna nu Th. Pishakmach in thiltung hun in leng a tapa uh Residential Kids Care School a student hi a, a sih ding tanpha in leng school fee pia uh a, himahleh a khen chiang in sum haksat ziak a fee batsa teng tawh kha 3/2 a ding a piak khop hun om a, huai school ah atapa student hilou ahihleh bang ziak a fee la uh hiam chi hi. Chandragopal, Convenor, JAC in thiltung tawh kisai a govt. in a kintheipen a panlak a nei keileh kiphinna khauhtak pan ding uh chi hi.
Bail ngetna tawh kisai in hearing om
Imphal, Sept-6: JCILPS a convenor lui Kh. Ratan in Imphal West a Chief Judicial Magistrate ah bail ngetna a piaklut tawh kisai in hearing tuni’n om hi’n gen uhi. Huai hun ah Judge te’n bial ngetna tawh kisai in thutanna bawl ding khamkhawl (reserve) in koih uh a, bail ngetna tawh kisai a hearing Sept 9, 2016 ni a om ding in thutanna bawl uhi. Akigendan in High Court ah Ratan tungah ‘Wanted Tag’ tawh kisai complain bawl a, Court in dan dungzui in Police Dept.-te taihilh in ‘Wanted Tag’ lakhe ding in thupia a, himahleh Keishampat a kiphinna hun ah Kh. Ratan mat a om khahkhiak hinailou a, a tungah ngawhna (charge) dang omte tawh kisai hearing pailel hi’n gen uhi.
TUNI THUPI:
“Huchi’n a tualthahna uh, a mibumna uh, a kingaihna khelhna uh leh a guktakna uah a kisik tuan kei uhi.” - Kilakna 9:21
EDITORIAL:
Guktakna leh uingol gamtat
Guta pawlkhat in Pearsonmun khawsak a om KVK office luh in computer monitor (flat) 1; CPU 1; UPS 1; UPS-621V 1; UPS-ZEB-U725 2; Amaron battery 2; stabilizer 1, laser printer 1 leh xerox stabilizer 2 gumang uh chih newspaper ah kisuah hi. Tualou in zanhal mahin guta pawlkhat in nitak dak 9 velin Hmuia Veng ah TVS Jupital 2016 model khat gu uhi. Sept 1,2016 in Tuibuong a Happy Valley ah Honda Activa khat kigumang chih ahi hi.. Kal paisa in leng Bolero tanphaa gukmang om a, guta kibehlap semsem hi’n kilang hi. Tuma lam in mi khat in Tedim Road a Axis bank kong ah four wheeler gari akoih meltheihlouh pawlkhat in a mailam glass teng khetsiatsak mawk uhi. I kheldan uh lamdang mahmah a, khelh gamtatna leng hong uang semsem ding ahi diam chihtheih hi. Akhente’n lah khawpi cheina leng hikawm dinga Waiting shed kilawmtak a bawl uh a glass teng va khense khemkhem, Waiting shed a tutphah kidawh tunga vadaileng khenkhat in lah zunbuk chih thei gegu kawm a daileng veve chih bang om a, omtou zel lai ding in gintak-huai hi.
New Bazar a bazar nupite mehzuakna dawhkan tung peuh a ek vatha, ahihkeileh meh zuakna dawhkante zan nunga lampi lai khawnga ana koihsak chih khawng om mun mahmah a, niin kholkhawmna munte ah vokpul/ganpul khawng pai maimahte ihi lai ua, hibang a i uingol gamtatna un i hihna taklang mahmah a, un-civilized I hihdan uh gentam ngailou in chiang mai hi.
Guktakna tawh kisai gari mang tamzawte bel police ah report ahi ngei ding a, police a report louh leng tamkhop om ding hi. Police a dingin leng panlak haksa mahmah ding a, bangchileh gari mang tawh kisai matkhiak pahpah theihna dingin police lamin pan lathei le uh chih mi tamtakte ngaihdan hi a, ngaihdan hoihpipi neite’n police ah suggestion bang pethei lehang amau panpihtu i hi khading hi. Amasa in police te’n intelligence networking lam a hatsak mahmah uh deihhuai a, a zom in mun poimawh deuhte ah check point/post honbeh hileh choih huai hi.
Gari kia ahikei a, gas cylinder, computer leh adangdang niteng in vanmang om zou gige a, Lamka khawpi a vanmang 100 laka 70 bang Kwakta biallam tung baih mahmah ahi chi a genpawl om a, dik dingin leng gintak-huai hi. Moirang police te’n Phouchakhai ah check post a koih uh phatuam zek a, Peace ground bul a Army te’ omna mun leng hong phatuam zek hi. Himahleh, huai check post 2te pelh theihna ding lampi om ding in gintak-huai zel hi. Tua ziakin police te’n ngaihtuah vengveng kawma gutate’n lampi zuih tangpi a suikhiak uh poimawh mahmah om hi.
Lamka khawpi sungah tuailai khamtheih hih tam deuhdeuh a, khamtheih chi tuamtuam zuaknate lah zalen deuhdeuh uhi. A khente’n a innkuante un a it mahmah uh puansilh-niikten, khedap ahihkeileh electronic van tuamtuam gukhe sekin New Bazar khawngah kiman takin zuak uhi. Tuma deuhin mobile gutu bangzahhiam police te’n mankhia uh a, tualou in Kwakta area ah leng gari mang hunkhop vamukhia uh a,kipahhuai lua!
I diktatlouhna mahmah uh thildang khat ahihleh Diesel Auto sungah purse/wallet ahihkeileh Mobile phone bang i kesak mun mahmah ua, a mukhate’n kintakin switch off sek mai uhi. Akhente’n lah kintak a midangte’ purse/wallet te pawmang mamah ! Mi’ sum bawm sung ah Identity card, Aadhaar Card, ATM card leh thil poimawh tuamtuam koih uh a, a sum sangin leng tuabang document-te it huaizaw tamtak om hi. Huchi ahihleh, a sumte kilak lelin a wallet pe’n midangte’ muhtheih dingin koih lehang, a neite kipak mahmah ding un gintak -huai hi. I tenna Christian gamah diktatlouhna leh guktakna tuamtuam uang deuhdeuh a, A’ Ber kha hong kipat tawh kiton in hibang gamtatn te hong uang semsem lai ding a, dan leh thupiak (law & order) enkoltu tuamtuamte’n thathak a lak uh deihhuai mahmah hi. Mipi lamin leng theih ding a poimawh khat ahihleh, mi van-guk ilei aleh a gutu tawh kibang ihi chih i theih ngeingei ding ahi.
No comments:
Post a Comment