HEADLINES:
Tuni’n Assembly Session ah Govt.’ Bill 3 pass uh
Manipur Assembly Session tunitaklam in khawl
Imphal, Sept-5: Manipur Assembly term 10na a session 14 veina Sept 2, 2016 (Friday) ni a om, tuni’n sunzom nawn uh a, Education Minister Dr. Kh. Ratankumar in Sept 2, 2016 in house a puak lut Govt.’ bill 3 tuni’n genkhawm ahih banah pass uhi. Huai-te (i) The Manipur Technical University Bill 2016 (Bill No. 5 of 2016), (ii) The Dhanamanjuri University Bill 2015 (Bill No. 6 of 2016) leh (iii) The Manipur State Higher Education Council Bill 2016 (Bill No. 7 of 2016) hi uhi. Huailou in Assembly session ah Rajya Sabha leh Lok Sabha in Goods and Service Tax (GST) zat ahihna ding a, Constitution 122 Amendment Bill 2014 a pass leng Manipur Assembly in lemsakpih uhi.
Education Minister Dr. Kh. Ratankumar in bill 3-te pass ahih theihna ding a genkhawmna hun ah Manipur Technical University dinkhiakna ding in state consolidated fund zat hiding a, interim arrangement dan in ex-officio Vice Chancellor leng guan khit hi’n gen hi. Technical University ah 2016-17 session kipan khin a, Takyelpat a State Academy of Training mun temporary campus dia zat hi’n gen hi. Hiai University ah B. Tech course a Civil, Electrical, Computer, Electronics and Mechanical stream om ding hi’n gen hi.
Dhanamanjuri University tawh kisai Education Minister in a genna ah Rashtriya Uchchattar Shiksha Abhiyan (RUSA) nuai ah Higher Education lam puahhoihna ding a patkhiak hidin gen hi. India gam a University tuamtuam 200 omte lakah University 5 telkhiak masak hi a, huai ah Dhanamanjuri University tel ban hi’n gen hi. Manipur ah Higher Education a enrollment ratio niam mahmah a, kum teng a graduate 7,000 akipan 7,500 om lakah Manipur University in Post Graduate Course tuamtuam adin 1,240 lel la thei hi’n Minister in gen a, huaiziak in Dhanamanjuri University in Manipur University a seat tang banlou student tamtak sinsak thei ding hi’n gen hi. Manipur State Higher Education Council Bill tawh kisai in Minister in a gendan in Kerala State model zang a dinkhiak hidin gen hi.
Tuni’n Assembly Session ah M.K. Preshow, Dy. Speaker & Chairman of the Committee on Privileges and Ethics in 34th report luikhia a, huai zawh in Dr. I. Ibohalbi Singh, Chairman of The Public Accounts Committee in 47th Report on the report of the Controller and Auditor General of India for the year ended 31st March 2014 and suo moto examination conducted by the Committee on the Department of GAD, Home, MOBC and MDS a luikhiak banah 48th Report on Excess Over voted Grants and Charged Appropriation 2013-2014 leng luikhia hi.
Tuni a Govt’ Bill 3-te pass ahihbanah report tuamtuam luikhiak nung a, dotna dawnna tuamtuam hunzat khit in Assembly Speaker Th. Lokeshore in Assembly Session khak (adjourned sine die) hi.
Asia ah gamkhat lel in terrorist tamtak sawlkhia : Modi
Macroeconomic policy ah pankhawm di’n kilemna bawl
New Delhi / Hangzhou, Sept-5: G20 Summit a kihel khawvel makaite’n Leitungbup (Global) Economy khantouhna dia pangkhawm ding in kilemna bawl uh a, ni 2 sung kimuhkhopna hunah ‘Globalisation’ leh ‘Free Trade’ omtheihna di’n thupukna kichiantak bawl theilou uhi.
India Prime Minister Narendra Modi in huai huna agenna ah, leitung makaite’n helna(terrorism) beisakna di’n theihtawp suah in panla mahle uh, South Asia ah gamkhat lel in helna tawsawn in, terrorist tamtak sawlkhia hi’n gen a, minlawh tuam neikei mahleh Pakistan agenna hiding chi uhi. Terrorism douna a International Community’ pangkhawm ding in Modi in chial a, helpawl leh helna tawsawnte koihtuam (isolate) a, gawtna (sanction) bawlkhum ding inleng chial hi. G-20 summit hun in Narendra Modi in British PM Theresa May telin makai tuamtuam kimuhpih a, Trade & Commerce tawh kisai a pangkhawm ding in chial hi.
China a Hangzhou khawpi ah G20 makaite’n ‘protectionism’ beisak ding deih in, fiscal leh sum-le-pai tawh kisai vuak hilou in kisumdawntuahna leng bawlhoih ding in thupuk uhi. International Trade & Investment masawnna di’n ‘multilateral trade’ gum ding uh ahihdan Chinese President Xi Jinping in gam hausa makaite kiangah gen a, tuhun a global trade niamkiak ahihman in, huai beisakna di’n gam hausa te’n lungsim lianzaw nei ding inleng chial hi.
LOCAL NEWS:
LICI/CCpur Branch ah Diamond Jubilee zatna
Lamka, Sept-5: Life Insurance Corpn of India (LICI)/ CCpur branch ah tuni’n kum 60 chinna diamond jubilee lopna leh 60th Insurance Week zang uh a, Special guest in Ibochouba, Manager UBI/CCpur Branch leh Noren Parvati, Manager, Axis Bank/CCpur branch pang uhi. Special guest te’n candle lighting nei in function hong uh a, LICI lapi ‘Nigam Geet’ la asak zawh un i. Lienjamang Lhouvum, Branch Manager, LICI/CCpur makaih in pledge gen uhi. Branch Manager in India govt. in Sept. 1, 1956 in nationalize a, huai hun ah LICI in Rs. 5 crore kia nei mahleh tu’n bel Rs. 22 lakhs crore val man assets (gou) nei hi’n gen a, Mumbai a head office nuai ah Zonal office leh Division office 113 om a,Branch office 248 banah Satellite office 1,401 leh Mini office 1,240 om a, gamdang14 ah branch om hi’n gen hi. Manipur ah LICI Branch 3 leh Carrier Agent Branch 1, Satellite office 2 om a, CCpur branch 1 telin staff 38 om hi’n gen hi. Kum 50 sungin mi tamtak sum deposit sak a, LIC Golden Jubilee Foundation tungtawn in mi tuantualte khualna din project 356 bawlkhiak hi aa, NGO-te zanga sepsuah hi’n gen hi. Huai ah hun ah staff leh agent tuamtuamte tel uh a, sunnung in Phailian a St. John School leh Molnom a Sunshine English School ah naupangte tawh singnou suan uhi.
School tamtak in Teacher’s Day zang
Lamka, Sept-5: India President-lui Dr. S. Radhakrishnan pian champha theihgigena kawm in tuni’n India gam ah Teachers’ Day kizang a, , CCpur dist sunga school tamtak ah leng zang uhi. New Lamka West DCC area sunga ADC school omsun New Lamka Upper Primary School ah leng bialtu MDC CT Lian makaih in zang uhi. Huai ah CT Lian zi Mrs. Moi in teacher-te nasep hoih kipahpihna in pakkhi awk-sak a, Lawmpi of Rayburn College in hasotna thu gen hi. Naupangte’n leng teacher-te pahtawina in card leh thilpiak tuamtuam pia in special item lahna nei uhi.
ZRO/ZRA akipan suspend
Lamka, Sept-5: Lt. Col. TK Zomi, Defence Director, Zomi Re-Unification Orgn (ZRO)/Zomi Revolutionary Army (ZRA) in thusuah a bawl dan in Secretary, Ministry of Defence, ZRO/ZRA deihna bangin Pvt. Thangsuanlian @ Jacob s/o (late) Thanmawi of Torbung Bangla (ZRA a 14th batch) lungsim buaina ziakin suspend a om hi’n taklang hi. Suspend ahih sungin organisation apan hamphatna ngahlou ding a, organisation min zang theilou ding chih ahi hi.
Line Bus leh Winger-te Tuibuong ah kidawhlai
Lamka, Sept-5: Lamka- Imphal kal a passenger service Line Bus leh Winger-te Aug. 26, 2016 akipan Tuibuong bazar ah kidawh uh a, CCpur -Imphal Transport Owners Society (CITOS) President in JAC AATB in total shutdown a puan apan Tuibuong bazar a kidawh uh hi’n gen a, huaimun pansan lai ding uh chi’n gen hi. New Bazar tawh teh in passenger tamlou a,a taikhiak hun uah passenger 10 tan ahih hun tam mahmah chih ahi hi. Half day total shutdown in a naktaka hihbuai ahihman un Tuibuong a kidawh lemchangzaw hi’n gen uh a, pawl khat in Tuibuong a kidawh tadih dia a theihsak ziakun parking ngei zat hun ding theih hilou chi uhi. Line Bus-te leng lamlian jul ah kidawh uh a, passenger bei a tai hun leng om hi’n gari handiman 1 in gen hi. Huchikal ah, Imphal hawhdingte’n khawpi sunga Diesel Auto-te a tuang in Bus/Winger kidawhna zuan uhi.
ZMA HQ President in Vungmuanching
Lamka, Sept-5: Zomi Council office ah tuni’n kum 2016-2019 sung Zomi Mothers’ Assn. (ZMA) HQ makai ding election om a, President in Vungmuanching telching uhi. V/President- Kim Mary, Secy- Ngaiphal, Asst.Secy-Mary Tombing, Finance-Chonghoih leh Treasurer- Vunghatkim ching uhi. Member-te Ngakneu, Chingngaihlun, Achong Kom, Lamzanei, Lamneikim, Mannu, Marina Lhingboi, Dimngaihching, Christina Lianlamching, P.Niangboi Zou, Luanngaihching, Ngaihlun, Lhingboi Zou, Chingngaihdon, Chingngaihkim, Moiniang, Joycee, H.Khawlching leh Neilam hi uhi. Makai telching thakte Rev Liankhanlal in Pathian kiangah thumsak hi.
Khawpi sung ah thautui haksa
Lamka, Sept-5: CCpur dist. a thautui (petrol & diesel) zuakna oil pump-te ah thau omlou chih ziakin kikhak a, black a lei ding leng bel om hi. Black market ah petrol litre 1 ah Rs. 90/- leh diesel litre 1 Rs.70 in zuak uh a, black market a zuakte’n leng stock haulou uh hi’n gen uhi. All Manipur Written Test Successful Candidates (AMWTSC) of Police Constable, Male 2013 batch pawlin NH ah economic a bawl uh Sept 3 in lakhia uh a, kiphinna a neih sung un gari leh driver bangzah hiam a soisak uh lungkim in gari driver- te nuak uh hi’n kigen hi.
Rendezvous Mega Musical Nite
Lamka, Sept-5: CCpur Govt. College a Evangelical Union saina in Hiangtam Lamka a YPA GHQ hall ah Sept. 17, 2016 in Rendezvous Mega Musical Nite om ding hi. Huai ah khawpi sunga gospel lasiam tuamtuam in lasa ding uh a, thugentu tuamtuam in gen ding uhi.Programme a tel utte adin Rs. 30 pia in saite kiang ah ticket laktheih ding hi.
Guta te’n KVK office luh
Lamka, Sept-5: Gutate’n zan zing baihtak in Pearsonmun a om KVK office luh uh a, Account-cum-Admn Section akipan computer monitor (flat) 1; CPU 1; UPS 1; UPS-621V 1; UPS-ZEB-U725 te 2; Amaron battery 2; stabilizer 1, lazar printer 1, xerox stabilizer 2 gumang uhi. KVK office staff te’n Police ah complain bawl uh a, Police te’n suizui uhi.
Orthotic Therapy Unit hong ding
Lamka, Sept-5: Langkhanpau Guite, Chairman, ADC/CCpur in Sept 6, 2016 zinglam dak 10:30 in P. Kamdou Veng a Mercy Home ah Orthotic Therapy Unit hong ding a, Rev Fr, Mathew Mundoly, Parish Priest. St. Mary’s Parish, Tuibuong in Pathian kiang ah lan ding hi. Orthotic Therapy Unit ahihleh Jan Vikas Samiti-Liliane Foundations, Mercy Home leh CCpur Dist. Disabled Union pangkhawm kibawl hi’n kigen hi.
DMO leh makaihin Behiang area pha
Lamka, Sept-5: Dr Liankhojam Guite, DMO makaih in Malaria deptt. te’n Behiang area ah Long Lasting Insecticide Net/Insecticide-Treated Net (LLIN/ITN) kichi thousilen kihawmte a kizang hina hiam? chih amun ah enkhia uhi. DMO leh teamte’n Behiang, Sialsih, Likhai, Hangsum, Pangmual, Tangpijol, Hiangtam ‘K’ leh Ngaljang khua pha uhi.
Koite a OFC kisia bawl hoih uh
Lamka, Sept-5: Zan sunnung in Koite ah BSNL internet kizatna Optic Fibre Cable (OFC) kisiat ziak in BSNL tungtawn a Internet kizang teng sia a, tuni nitaklam in deptt te’n bawlhoih uhi. Tuni a BSNL internet zattheih ahih ma in bank-te leh LIC te buai mahmah uh a, bank khenkhat in nasem theilou in kikhak hi.
SUUNNA:
Thiannem (80) m/o S. Pauzalam of Kanan Veng, New Lamka tuni nitaklam in sungna in si a, Sept 6, 2016 in YPA hanmual, New Lamka ah kivui ding hi.
Tongkhohen Doungel s/o (late) Lhunkhojang Doungel of T. Chavangphai damlouh ziaka Dist. Hospital a ki-enkol dam zoulou in tuni zinglam in si a, akhua uah kivui hi. Amah ‘Kum 10 kilungsetna’ film a co-star ban ah kungfu siam in pang hi.
Thongkhansong Guite (74) h/o Ningkhozam of Mission Veng, Hiangtam Lamka zan nitak in Delhi a GB Pan Hospital a om lungtangna in si a, Sept 6, 2016 nitaklam dak 3:15 velin Imphal Airport hong tung ding hi. Lamka puaktun hun a program zat hiding a, huai zawh in a inn compound a han kitou ah vui hidin kigen hi.
ASSEMBLY NEWS:
Bill tawh kisai hilhchian
Imphal, Sept-5: Chingmeirong a Assembly Secretariat ah Manipur Assembly term 10na a session 14 hun ah tuni a zero hour hun in opposition MLA tuamtuam te’n dotna a bawl uh tawh kisai CM in a dawnna ah Manipur tualsuak mite humbitna dia nam tuamtuam pom theihna dia bawlkhiakna di’n hun kidaih lou a, govt. in bill a luikhiak ding Manipur a om teng pom theih ahih ngai a, Manipur kichi mini-India banah nam tamtak tenkhawmna hi a, bill bawlkhiak thak in mi tuamtuam kalah kituah louhna a tut louh ding chi hi.
Kumlui a ILPS tawh kisai a Bill 3 ziak in CCpur district a JAC kibawlkhiak banah kiphinna hun ah mi 9 site luang lak hi nailou a, India President in ‘The Protection of Manipur People Bill 2015’ lemsakna pe kei mahleh JAC te’n kiphinna tawpsan nailou uh a, hiai bang dinmun ahihziakin govt. in mipi lam apan ngaihdan lakkhawm theihna dia public domain ah bill koihkhiak masak ngai hi. Govt. in ngaihdan lakkhawm hun sung ding Aug 24, 2016 tan bikhiah mahleh huai nung tanpha in ngaihdan pia om a, JCILPS te’n leng bill tawh kisai in draft proposal Aug 29, 2016 ni in pelut uh a, draft proposal tawh kisai a mipi ngaihdan lak theihnang in mipi muh ding a koih ngai hi. Draft bill zawhsiang chiang in ngaihdan lak khawm theihna ding in public domain ah koih khiak hiding a, maban session nawn hun ah govt. in luikhe ding hi’n taklang hi.
HM in dawnna lungtun huailou
Imphal, Sept-5: Opposition MLA Th. Bishwajit in tuni a assembly session a call attention hun ah Manipur Police Constable recruitment DPC 2013 tawh kisai a thak a recruitment bawl leh DPC 2013 cancel tungtang banah recruitment hun ah thil diklou tak a sai kuamawh hiam chih dotna a bawl tawh kisai Dy. CM banah Home Minister in-charge Gaikhangam dawnna lungtun huailou chi’n gen uh a, Dy. CM in recruitment masapen tawh kisai a govt. in hih theih bangmah neilou a, Th. Radheshyam, SP/Bishnupur makaihna nuai a member in MPA leh MCS officer 1 tuak-te saina nuai chi hi. High Court in Court lemsakna tellou in recruitment result puang louh ding in thupiak banah recruitment tawh kisai in govt. in leng inquiry bawl a, huai ah thil diklou tamtak muhkhiak ziak in kum 2013 a recruitment cancel hi’n gen hi. Himahleh Home Minister in a diklouhna-te a gen chiang louh banah mawhna neite taklang lou a, candidate-te ngaihtuahna a recruitment thak zawhsiang hipah ding chi hi. Kh. Joykishan in proceeding dan dungzui a calling attention la lou chih ziak in Speaker Th. Lokeshore in a pau ding phal nawn lou a, huai nung a Kh. Joykishan in house pawtkhiak san hi.
IMPHAL NEWS:
District Level Control Room hong
Imphal, Sept-5: N. Geoffrey, District Election Officer, Imphal West District in tuni a thusuah a bawlna ah All recognised National/State Political Party leh mipi-te theih ding in Lamphel a Deputy Commissioner/DEO a G-15 (1st floor) ah Special Summary Revision of Photo Electoral Rolls ding tawh kisai in District Level Control Room (Ph. No. 9089899008) hongkhiat hi a, electoral roll revision tawh kisai theih beh nuamte’n Control Room thuzak thei ding uh chi hi.
MFDC ah Teachers’ day zatna om
Imphal, Sept-5: Palace Compound a Manipur Film Development Co-operation (MFDC) mun ah tuni zingsang dak 7:30 in Departments of Education (Schools), Higher & Technical Education, Adult Education, State Council for Educational Research & Training, Directorate of Language Planning & Implementation leh Board of Secondary Education Manipur (BSEM)-te saina in ‘Teacher’s Day’ zatna om a, India President lui Dr. S. Radhakrishnan phawk gigena in a limlak ah pak piakna nei uhi. Huai ah Chief Minister O. Ibobi in Manipur a Education system bawl hoihna ding a stakeholder teng in ngaihdan sungkhawm ding in ngen hi. Govt. school-te ah student a kiam tawh kisai ngaikhawk a, teacher hoihtak tam mahleh student-te hip theilou a, teacher-te leng hoihtak a kai ding leh gin om tak leh kuhkaltak a panla ding in ngen hi.
Huai hun ah teacher 10-te kiangah State Teachers Award 2016 piak hi a, Aided School Graduate Teacher 31, Primary taeacher 98, LDC 4 leh Chawkidar 1 kiangah appointment letter piak in om hi. Dy. CM in khawtang bawl hoihnang in teacher te’n dinmun poimawh tak luah uh chi hi. Education Minister Dr. Kh. Ratankumar in Sarva Shiksha Abhiyan (SSA) nuai ah primary leh upper primary teacher ding lak hi a, Rashtriya Madhyamik Shiksah Abhiyan (RMSA) nuai ah Girls residential school 11 leh district 9 ah resident school bawl hi’n gen hi.
Assembly Session suk buai sawm
Imphal, Sept-5: JCILPS volunteer leh Women’s Wing te’n state govt. in assembly session pailel ah ILPS tawh kisai a bill luikhiak louh mawhpaihna in session pailel sukbuai sawm uh hi’n kigen hi. Akigendan in Keishampat a JCILPS office apan Women Wing a volunteer mi 100 vel ding te’n Assembly manawh in tuni’n slogan ‘we want ILPS in Manipur’, ‘Assembly session cannot conclude without passing the fresh ILP bill’ chi’n kihou uh a, huai hun mah in JCILPS student wing nuai a student te’n Thangmeiband area a mun tuamtuam apan Legislative Assembly luh sawm uhi. Laxman Moirangthem makaihna nuai a student Wing volunteer leh Police-te Assembly gate apan meter 200 vel a gamla Moji Leirak Thangmeiband mun ah kinawk tuah uh hi’n kigen hi. Tuni zingsang apan student wing volunteer-te Moji Leirak Community hall ah kipun khawm uh a, huai apan Assembly manawh uh a, police te’n student-te hawl khiakna ding in mock bomb leh tears gas zang uh hi’n kigen hi.
BJP worker leh police-te kinawk
Imphal, Sept-5: Manipur Pradesh BJP worker te’n state Cabinet in Manipur Police Constable recruitment 2013 cancel tawh kisai a thupukna uh zukkik ding leh Home Minister kitawp ding phutna in tuni’n Assembly a monsoon session pailel suk buai sawm uh hi’n kigen hi. BJP worker-te zinglam dak 10:30 velin Thangmeiband a BJP MLA Kh. Joykishan tenna inn ah BJP worker-te kipunkhawm uh a, huai apan Assembly Complex manawh in pai uhi. Khuyathong junction ah zinglam dak 11:30 velin police te’n a dal ziak un kinawk tuahna piang a, huai ah liam hunkhop om hi’n gen uhi. Huailou in DGP lui Y. Joykumar makaina in BJP worker te’n Sanakeithel area akipan Assembly manawh in pai uh a, Sanakeithel Junction ah Police te’n ana dal uh hi’n kigen hi.
Transfer & Posting
(Post Graduate Doctors)
1. Dr. P. Hegin Tungdim, MS(Ortho) as MO Ortho, District Hospital/CCpur.
2. Dr. Zamlienmang Gangte, DPM as MO (Psychiatry), Moreh Hospital.
3. Dr. Ayekpam Anil Meetei, MS(Surgery) as MO (Surgery), District Hospital/CCpur.
4. Dr. T. Tunlalmuan, DLO as MO(ENT), District Hospital/CCpur.
5. Dr. Oinam Rahul Singh, MD (Medicine) as MO (Medicine), District Hospital/CCpur.
TUNI THUPI:
“Mi hoihte a si ua, kuaman a theisiam kei ua, awl leng a awlmawh sekei uh.”- Isai 57:1
EDITORIAL:
Savdhan India:India Fights Back
TV a Life OK Channel a suak zel “Savdhan India: India fights back” kichi serial a tak a thiltung alem a hong chinnawn uh hi a, eilak ah unau Mizo-te’n amau pau a letkhia in Vaipau theiloute adingin leng nuamtak in et-theih a, tua ziakin Savdhan India pen minthang mahmah hi.Tamtak in hoih a saklouh thu uh article hong gelh khin uh a, ahihziakin thil himhim negative leh positive a om bangin ahoih leh hoihlouhna om mah hi. A hoihlam a late a dingin et nuam petmah a, ahihziakin a hoihlou lam a late ading in mulkimhuaipipi om a, et ut-huai hetlou serial ahi, chihtheih hi. Huai tawh kisai i gen utpen bel a paidan uh i et vengveng leh thubuai leh tualthahna hiam guktakna banah dikloutaka kikhemna pen police te’n case register pah in suizui ngal uhi. Police te’n hoihtak in suizui uh a, huai a matkhiak ua leh ‘Dan’ tawh kituak in gawtna pia uhi.
India a khawpi tuamtuam ah sepaih i chidiam army-te kimu manglou phial uh a, hileleng police tamtak om uh a, amau dan leh thupiak(law & order) mawhpua uhi. Tua ziakin mipi’n police-te mah lau in muang mahmah uh a,huchi’n police-te a thuneihna uh leng lian hi. Tualthahna hiam gukta tawh kisai thiltung a om chiangin police mah muang in police station ah tailut pah in report va bawl teitei sek uhi. Tua hun ah police ten case registered uh akul leh poimawh banga panla in suizui pah uhi. Eilam tawh kibang hetlou hi.
Eilam ah bel tualthahna hiam khut kha a om chiang in police te’n poimawhna bangmah neilou uh chihtheih khop in ei leh ei i kivaihawm sek uh a, innsung dongta level a kihou in kilemna i bawl zel uhi. Alehlam ah Police-te’ nasep ding teng dawnzangkhai i suak a, police te’n hih ding neilou uhi. Khawpi liante ah bel huchibang chih phet louh huaisang a case neuzaw tanpha leng police-te kiang ah report bawl uh a, police te’n suizui in thudik in vaihawm sek uhi.
Tamtak in Savdhan India pen hoihsalou uh a, ahihziakin thil a hoih a om leh asia leng a om chih bang deuh in a hoihlam pen kibawlhoihna dingin zang lehang ei ading in hoih hi mai ding hi. Savdhan India akipan in sinlai tamtak theih leh muhkhiak in om hi. Tuate bel, police te’n tualthahna leh guktakna suizui in dan tawh kituak in mawhna neite gawtna pia uh; Vaite society siatdan leh hoihlouhdan taklang, eilam tawh lei-le-van a kikhia,amau tawh zi leh pasal a kinei thei vuallou ihihdan kitheikhia a; duh-amna, zulhzauna leh kideidanna taklatna hi a, huaite akipan kibawlhoihna ding tampi muhkhiak theih in om hi. Vaite zi leh pasal kal ah thangtat leh gin-omlou uh ahihdan taklatna; duh-am ziaka pianpih sanggam leh nu leh pa ngoihngoih uh tunga khutkhak poisak louhna nei mawk uh ahihdan i theikhia hi.
Huai mai hilou in zuaugen a poidan hoihtak in taklat in om hi. Zuaugen a mikhem leh zuauthu a thilhih peuhmah in zuau ngen a paipih uh ngai a, khatvei zuau na gen a leh aban ah leng na gen zel ngai ahi chih theihkhiak in om hi. Tualthahna hiam guktakna pen khenkhat in im sawm mahle uh police te’n case a registered ua leh suikhe mawk uh a, a report bawltu khenkhat in leng hahpantak a pang in suikhe sak teitei uhi. Vaite’ film khenkhat ah police te ginatlouhdan leh thulimlouhdan kitaklang sekte khenkhat adik om ding Savdhan India i et akipan in kithei mawk hi. A ziakbel police te’n case khenkhat register nuamlou uh a, mi a simmawh deuhte uh ava pai chiang un ngaihsaklou uh a, mihausa leh MLA-te mai-et in huaite thunuai ah om uhi.
Khenkhat leuleu lah diktat petmah uh a, mihausa leh MLA-te nuai ah lut nuamlou in mizawngpen in complaint a thehlut ale leng hoihtak in suizui sak uh a, thilhih theitak leh vengsung a mihausate’ tanpha lau hetlou in dan tawh kituak in atung uah gawtna pe veve zel uhi. Huaiziakin, diktatna zaw koimun-koimun ah leng ana val hetkei a, mi diktat leh gin-om a a ngak zouten a tawp in thudik mah mukhe veve uhi. Eilam ah leng tualthahna hi’n guktak laktakna leh thil tuamtuamte police-te’ khut a pekhia in i kiivaipuakna uh customary law zang sek keizaw lehang thil l a pai dikzaw diam chih in om hi. Mawhna neite sum khawng a kingaidam zel, huaite’n lah kibawlhoihna dinga zang tuanlou in kiphasak deuhdeuh uh hileh kilawm hi. Tu adan a i paizel aleh i lakah sum in vai hawm ding a, azawng leh ahau kal ki gamla deuhdeuh ding a, Hindu sahkhua zuite kikhendan a caste system a kikhenna om thei dinmun ah i om uhi.
Huaiziakin, police a case i registered a leh police-te’ khut a nga in va hihbuai nawnkei zaw lehang bang a chi dia ? Mawhna neite a mawhna dan un gawtna piak hileh bel zongsang nawnlou bangzah hiam om ngei ding ua gintak ahi hi. Savdhan India en nailoute’n en chiat lehang thil hoihlou hih a hoihlouhdan tamtak muhtheih in om ding hi.
No comments:
Post a Comment