HEADLINES:
April 1, 2017 apan gamsung pumpi ah GST Act zat hiding
State/UT 20 in GST a passed nung un President in tuni’n pom
 |
| http://www.thehindu.com/ |
New Delhi, Sept-8: President Pranab Mukherjee in Goods and Services Tax (GST) Constitution Amendment Bill tuni’n pomna bawl a, Bill pen Act a suahtheih ding ziakin Modi makaih central government in April 1, 2017 apan State 29 leh Union territory 7 ah zat di’n panla uhi. Tunitan in state/UT kigawm 20 in GST pom khinta uhi. President in gamsunga zat dia phalna (approval) abawl dungzui in GST Council dinkhiak hiding a, amaute’n Tax Rate, Cess leh Surcharge tuamtuamte bikhiah ding uhi.
Revenue secretary Hasmukh Adhia in GST tungtang a state tuamtuam in kithuahpihna apiak ziakun kipahthu gen a, ni 30 sunga 50% in pomna abawl ding ua lam-et himahleh ni 23 sunga lawhching thei hi’n gen hi. Union finance minister Arun Jaitley makaih a Central leh State finance minister-te kihelna GST Council kiangah Central govt in GST zat dingdan genkhawm di’n theisak ahihdan leng Revenue Secy in gen hi. Central GST, State GST leh Integrated GST tawh kisai Dan(Law) bawl di’n state leh Centre palaite chial in om uh a, amaute’n draft bill abawl uh Parliament Winter Session hunah passed hiding hi. CGST leh IGST leng model GST Law dungzui a bawl hiding a, state teng in SGST bawl ding uh a, state-based exemption tuamtuamte leng amau deihdan in bawlthei ding uhi.
GST tungtawn in gamsung pumpi ah ‘Single Indirect Tax’ vuak zat hiding a, Value Added Tax (VAT), excise duty, service tax, central sales tax, additional customs duty & special additional duty tax tuamtuam telin Central leh State in tax a lak teng uh GST in enkai ding hi. Parliament ah August 8 in GST Bill passed in om a, President in Constitution Amendment Bill lemsakna apiak theihna dia state 29 teng laka 50% tan in a passed uh ngai hi. State teng laka GST pomna bawl masapen Assam in Aug 12 in pom uh a, huaizom in Bihar (16 August), Jharkhand (17 August), Himachal Pradesh (22 August), Chhattisgarh (22 August), Gujarat (23 August), Madhya Pradesh (24 August), Delhi (24 August), Nagaland (26 August), Maharashtra (29 August), Haryana (29 August), Telangana (30 August), Sikkim (30 August), Mizoram (30 August), Goa (31 August), Odisha (1 September), Puducherry (2 September), Rajasthan (2 September), Andhra Pradesh (8 September) leh Arunachal Pradesh (8 September) in pomna bawl uhi.
Tamenglong ah 33rd foundation day- cum- Gen. Election om ding
MHJU in Senapati Dist HQ ah 32nd foundation day zang
Lamka, Sept-8: Senapati a Journalist tuamtuam zintunna in DRDA Conference hall ah zan in Manipur Hills Journalist Union (MHJU) 32nd Foundation Day lopna om a, Chief Guest in ML. Markson, Chairman, ADC/Senapati pang hi. Guest of Honour in DIPR Director Meghachandra Kongbam pang a, Functional President in Sothing Shimray, President, MHJU pang a, Special Guest in Ajaykumar Sharma, PRO/Defence Wing pang hi.
Chief Guest in agenna ah Manipur a teng community tuamtuamte’n khat-le-khat co-operation leh support kipiak mateng gamsung ah lemna leh muanna omlou ding chi’n gen hi.
Guest of Honour in English newspaper-te khawpi leh town confined ahihdan genkawm in journalist-te haksatna theihpih ahihdan gen hi. Journalist te'n sincerity, truthfulness leh impartiality a neih uh poimawh chi a, Hills journalist-te khantouhna dinga DIPR in theihtawp suah in panla ding a, hill area a journalism standard banah awareness om theihna dingin DIPR in amasapen dingin Senapati leh Ukhrul Dist. Hq ah Sept. sungin 7-Day Basic Course in News reporting program sai ding a, fresh candidate-te a ding in graduate ngai ding a, journalist semlel-te deihsakna tuam piak hiding uh chi’n gen hi. Valley dist. 2 telin hill dist teng ah DIPR in 3-day Information and Public Relations Festival sai ding hi’n leng gen hi. Prog zawh in MHJU member te'n meeting nei uh a, Tamenglong Dist ah 33rd MHJU Anniversary-cum-General Election 2017 neih ding in thupuk uhi.
LOCAL NEWS:
BLO telin akisaipihte’n training nei
Lamka, Sept-8: Manipur ah kum 2017 bula Assembly Election ding tawh kisai a kisakkholhna pailel in Election deptt., CCpur saina in Tuibuong a DTC ah special summary revision 2017 tawh kisai in training om a, assembly constituency 6 apan block level officer, booth level officer, supervisor leh booth level agent-te tel uhi.
Dingluaia, Asst. Election Supervisor leh SDO te’n electoral roll a min omlou leh hihdik tuakte bawldik dingdan sinsak ua, BLO-te khut ah vanzat pekhe ngal uhi. Training hun ah Dingluaia leh S.Thienlaljoy Gangte, SDO/BDO CCpur te’n sinsak uhi. Special Summary Revision ahihleh Sept. 7- Oct. 7, 2016 sung hiding a, Jan 2017 tan a kum 18 ching ding te’n ngaihven theih ding a, BLO te’n form 6- inclusion, form 7- deletion, form 8- correction leh form 8-A transpotition/transfer zang ding uhi.
7th A/R te’n sisan unit 2 pia
Lamka, Sept-8: Headquarters Veng a om 7 Assam Rifles apan Hav. Rajan Gurung leh Rifleman PK Netam te’n Dist. hospital a natna tuamtuam nei etkol a om Pauminthang Guite (38) s/o (L) Tunzakham of Mission Veng a ding sisan unit 1 tuak tuni’n pia uhi. 7 Assam Rifles in kal 2 paita in mi tuamtuam kiang ah sisan unit 6 val peta uh hi’n kigen hi. Pauminthang ahihleh natna tuamtuam nei in zan zingkal in sisan lawkhia hi’n kigen hi.
School Carnival leh Annual Sports
Lamka, Sept-8: Nehru Marg a om The Pathway School in Sept. 10, 2016 in School Carnival leh Annual Sports nei ding uh a, Lunminthang Haokip, IAS DC/CCpur in Chief Guest a pangin zinglam dak 8:30 in hong ding hi. Huai ah student te’n stall bawl in thil tuamtuam zuak ding ua, sum muhkhiakte in school a ding sound system lei ding uh hi’n kigen hi. Tua banah Mercia, Asst. Teacher makaih in kichiamna (Pledge) leng gen ding uhi.
Teachers Day zang uh
Lamka, Sept-8: Phungkhothang Govt. H/S in tuni’n Teachers’ Day zang uh a, T. Hanglamthang, Headmaster in siamna, pilna kichi mihausate a ding kia hilou a, a zongzoute kia in nei ahihman in kuhkaltak a laisim ding in student-te hasuan hi. Hiai hun in Student-te’n super talent show leh Cultural Dance telin item tuamtuam lahna nei in teacher-te pahtawina in thilpiak tuamtuam pia uhi. Tua banah, hongtung ding Sept. 10, 2016 chiangin Bungmual a om L. Foundation School ten Teachers’ Day zang ding uhi.
YPA-te Spray 7 pia
Lamka, Sept-8: Thangkhosuanmung Guite, EM, ADC & Chief of Hiangtam Lamka in zan zingkal in YPA Lamka Unit makai-te kiang ah thoukang (mosquito) kapna ding spray 7 pia hi.
Ntl Lok Adalat leh Traffic Mobile Court
Lamka, Sept-8: CCpur dist Legal Service Authority saina in Sept 10, 2016 zinglam dak 11:00 akipan CJM Court/CCpur ah One Day National Lok Adalat om dinga, hiai ni mahin khawpi sung mun tuamtuam ah Traffic Mobile Courts nei ding uhi.
Trial selection adin kuan ding
Lamka, Sept-8: DYASO saina in Sept. 10-12, 2016 sungin Imphal a Khuman Lampak main Stadium ah numei leh pasal kum 14 leh 17 nuailamte a dingin State Level inter School games 2016-17 adi’n trial selection om ding a, CCpur dist. ai-awh a teldingte Sept. 9 zinglam dak 11:30 in New bazar bus parking ah kipankhe ding uhi.
S.K Oil lakkhiat nang mun bikhiah
Lamka, Sept-8: DC/CCpur in CCpur Dist. a S.K Oil Sub Dealer te’n Sept 2016 quota lakkhiat nang mun bikhiah a, Sub Dealer te’n Identity Card tawi ngai ding hi. 55-Parbung A/C te’n M/s Pudaite Traders kiang ah la ding uh a, 56-Thanlon A/C te’n M/s Paite, 57-Henglep A/C te’n M/s Z.T & Co., 58-CCpur A/C te’n M/s JHK Agency & ZT & Co., 59-Saikot A/C te’n M/s Pudaite Traders leh 60-Singngat A/C te’n M/s JHK Agency ah la ding uhi.
Political Conference-cum-Reception
Lamka, Sept-8: B. Vengnom ah Sept 9, 2016 zinglam dak 11:30 in BJP Political Conference-cum-Reception Program of Letzamang Haokip omding a, Rev Dr. Nguljathang, Pastor CFC in 57-Henglep (ST) A/C a MLA candidate sawm Letjamang Haokip’ ading in Pathian kiang ah thumsak ding hi. Huai ah Seilenmang, MDC, Thangmang Haokip, ex-MDC, Thienna Vaiphei, President, CDFRA, Paotinlal, Chairman, Henglep Area Chief Assn., Achung Kom, President, Komrem Union, Manipur, Paokholal Gangte, Chief of Bunglon leh Buijangpou Kamei, Chairman, New Canaan village te’n thu gen ding uhi.
Spot painting & article writing competition
Lamka, Sept-8: Divnl. Forest Officer; Southern Divn./CCpur saina in Sept 27, 2016 sunnung dak 1:00 in CCpur college ah spot painting leh spot article writing competition omding hi. Class V-VIII te’n “Great Indian Hornbill in its natural habit” chih thupi zang in spot painting competition neiding uh a, class IX-XII kikal te’n “Significance of Wildlife Conversation in CCpur Dist.” chih pansan in article writing competition nei ding uhi. School/College te’n category 2 ah mi 2 chiat nominate in Sept 17, 2016 nitaklam dak 3:00 tan in DFO/CCpur office ah piaklut theih ding hi. Oct 7, 2016 in MC Hall, Imphal a Wildlife Week, 2016 zat hun in cash prize leh certificate piak hiding uh a, thuchian kimzaw Divnl. Forest Officer; Southern Divn/CCpur ah kantheih ding hi.
‘Ka Lunggulhpen’ Gospel Album
Lamka, Sept-8: Rev. S.Vung Minthang, General Secretary, EBC in Sept 10, 2016 zinglam dak 10:00 in EBC Dorcas Jubilee Guest House a Mini Auditorium ah “Ka Lunggulhpen” kichi Gospel Music Video Album hong in Pathian kiang ah landing hi. Huai ah Pastor E. Chinzamang, Local Pastor EBCC Zion in la (song) phuaktute’ ading in thumsak ding a, inntek lam apan Upa K. Kaizalam leh K. Ginkhansiam te’n thugen ding uh a, laphuaktu K.Thangchinlian in Album pulakna nei ding hi. Huai album ahihleh Disc 2 hi a, la (song) 20 om in Ningmuanching, Mary Biakching, Hnunhoih, Ngaimuanching leh Ruth Chingmuankim te’n lasa uhi.
Guta te’n Pulsar bike gumang
Lamka, Sept-8: Kamlianding of Vengnuam, New Lamka zatlai Pulsar 200 NS (passion red colour) No. MN02B-1502, Engine No. JLZCEF11844, Chasis No. M02A36FZ0ECF20657, zannitak dak 7:00 velin Nghathal khua a, lampi gei a koihlai gutate’n gumang uhi. Gari’ neitu in Police ah report bawl a, Police te’n suizui uhi.
Private School akaite tawh genkhawm ding
Lamka, Sept-8: SSA-IED/CCpur tungtawna govt apan Children with Special Needs (Disabled person) school kai te’n transports & escort allowance ngah uh a, govt rule thak dungzui in private school a kai te’n transport & escort allowance ngah nawnlou ding uhi. Huai thu ah Sept 9, 2016 zinglam dak 11:00 in SSA-IED CCpur Resource Centre ah SSA-IED/CCpur makai-te leh private school akai, disabled person’ nu-le-pa te’n govt rule thak tawh kisai genkhawm ding uhi.
School 12 in class X recognition ngah
Lamka, Sept-8: Board of Secondary Education, Manipur in Academic Session 2016-17 apan school 12 te’n class X tan ziltheihna ding in Provisional recognition pia hi. School 12 lak ah CCpur Dist apan Saviors Public School, Mission Veng; Sunshine English H/S, Molnom leh Logos English H/S, B. Vaiphei Veng telkha hi.
SUUNNA:
Upa MB Sanghnuna (84) f/o Lalremsanga of Lamka Vengnuam (Hiangtam Lamka) zan nitak dak 7:00 velin tuap cancer ziakin si a, tuni’n Lamka hanmual ah kivui hi. Amah Manipur Chief Secretary-lui HV Lalringa, IAS upa hi a, Lecturer pension ahihban ah Mizo Literature Society ah dinmun poimawhtak ana lensek hi.
Suakthuam @ Thuamnu (78) m/o T. Lamzamuan of Lamphelpat, Imphal, kum 2 vel paita apat Guhnatna ziaka damlou, zannitak dak 10:50 vel in RIMS ah si, tuni’n Christian Cemetry, Chingmeirong ah kivui hi.
Tinmuonthang (47) s/o Khuptinlam of Gangpimual, zan nitaklam dak 4:00 velin cancer in si a, tuni’n Gangpimual hanmual ah kivui hi.
Tingzahat (102) m/o (late) Kaitinkap, Chief of Mualhoihchiang, Thanlon sub-divn. tulel a Hmuia Veng a om, tuni sun in teknat in si a, Sept 9, 2016 in YVA hanmual, Pangjol ah kivui ding hi.
IMPHAL NEWS:
Sahnit Ni zatna om ding
Imphal, Sept-8: Kuki Inpi Manipur (KIM) thupiakna nuai a Kuki Inpi Sadar Hills (KISH) in thudik a vaihawm ding deihna leh nam tawh kisai thil hilou in Lhang Inpi 5 – Gunhom Lhang, Saikul Gamkai, Moltam Lhang, Twilang (IT. Road) Lhang leh Kanchup Twibul Lhang te’n amau bial chiat ah Sahnit Ni (Black Day) zang ding in thupia uh hi’n kigen hi. Hiai tawh kisai in N. Sehjalien Gangte, Gen. Secy., KISH in Th. Muivah makaihna in NSCN (IM) te’n kum 1992-1997 sung in Kuki mi 906 that uh a, Kuki khua 360 bul kalh in mi lakh 1 val ding te’n omna ding kichian tak neilou uh a, NSCN(IM)-te khut ah sisan bang-te kingaihdam leh kilemna om chiang in bei ding a, hiai tungtang ah Centre govt. in thudik a vaihawm ding a ngetna tunitan in ngaihsak lou a, Centre in NSCN-IM tawh kisai a thubuai sukveng ut zaw bang uh chi hi.
KISH te’n ngaihtuahna nei thei teng in mawhna neilou Kuki te’n thudik a vaihawmna amuh theihna ding ua panpih in ngetna bawl a, Lhang Inpi 5 te’n Sept 13, 2016 ni a Sahnit Ni zat chiang in inn chih ah flag vom tak ding leh puanvom a kithuam ding in theisak uh a, Sadar Hills a Lhang Inpi saina in KSO, KWU, Thadou Inpi, TSA, TYA, TWA leh CSO tuamtuam te’n kithuahpih ding in ngen uhi. Gunhom Lhang tawh kisai in Brig. Thomas Ground ah zat hiding himahleh khaw siatna a om leh Kangui a KCC mun ah zinglam dak 10:00 apan sunnung dak 1:00 tan zat hiding a, huai sung in NH-2 a gari paidan suk buai hilou ding a, namdang-te gari inleng black flag thuah ding in ngetna bawl uh a, Kanggui Youth Union-te saina in Kangpokpi ah nitak dak 6:00 in candle light service om ding hi’n leng taklang uhi.
Kh. Ratan bail in khahkhia
Imphal, Sept-8: Imphal West Chief Judicial Magistrate Court ah tuni’n JCILPS a convenor lui Kh. Ratan in bail a ngetna tawh kisai in hearing om nawn a, huai hun ah Judge M. Manojkumar Singh in bail nget tawh kisai a thutanna ah nget pomsak ahih tawh kiton in tunitaklam dak 5:00 velin JNIMS hospital mun apan Kh. Ratan khahkhiak hi a, Ratan gumtu leh JAC against ‘Wanted Tag’ on Ratan-te saina in Singjamei Kehtri Leikai ah vaidawnna programe om hi. Huai hun ah Ratan in ILPS tawh kisai a campaign pat nawn ding leh JCILPS tawh kisai a kiphinna tuamtuam omte ah panlak ding a ut thu gen hi.
Akigendan in June 2, 2016 nitak 6:30 velin social media-te ah Kh. Ratan in UNLF-te flag khoih kawm a kichiamna a neihna limlak a kitheh zak ziak in Police Dept. te’n a tungah ‘Wanted tag’ puang uh a, Keishampat ah Aug 17, 2016 nitak a kiphinna hun ah mankhia in Jail ah koih uh a, BP lam tawh kisai a buaina a neih ziak in JNIMS ah koih nawn uhi.
NHRC-te suizui ding nial
Imphal, Sept-8: Manipur ah fake encounter a mi 1500 val sih tawh kisai a National Human Rights Commission (NHRC) te’n suizui a sawm uh tawh kisai in Attorney General Mukul Rohatgi in tuni’n Supreme Court a bench Justice MB Loukur leh UU Lalit-te mai ah nialna bawl a, suizuina in Army-te lamah siatna tun ding a, helpawl tamna mun J & K leh Manipur a Army-te panlakna gupthu leng gen hi. Huai hun ah Supreme Court in Manipur ah human rights dan kalhna ngaihkhawk zaw ahi chi uh a, NHRC Counsel Gopal Subramanium in suizuina pan ding a mansa a om uh hi’n gen hi. Attorney Gen. in NHRC-te kalh in Army-te mah in suizuina nei ding a, Centre kia in suizuina pat theihna ding in thupe thei a, NHRC-te thuneihna tan ah recommendation kia bawl theih uh a, Parliament in huai recommendation a pom leh pomlouh ah ki nga lai chi’n gen hi. Supreme Court in Oct 26, 2016 ni a hearing om nawn hun ah thutanna bawl ding uh hi’n kigen hi.
DC/Imphal East office luh sawm
Imphal, Sept-8: Keirao A/C MLA K. Thamarjit in NFSA agent-te khekkhiak a sawm mawhpaihna in Keirao Gram Panchayat Ward. No. 1, 2 & 5 a mipi kipun khawm te’n DC/Imphal East office luh sawm uh a, himahleh police-te panlakna ziak a lawhsawm uh hi’n kigen hi. Hiai tawh kisai in N. Lata in a thugenna ah MLA K. Thamarjit in hilhchetna bangmah bawl lou in Keirao Gram Panchayat Ward No. 1, 2 & 5 a NFSA agent-te khek khe ding in DC/Imphal East thupia a, Ward 3-te ah buaina omlou in anntang hawmkhia uhi. NFSA agent khek khiak sawm tungtang bial mipite’n pomlou ding uh a, MLA in pan a lak teitei leh a tungah boycott puang ding uh hi’n gen uhi.
Non-Local' Drive pan thak nawn
Imphal, Sept-8: State govt. in ni bangzah hiam paisa a Monsoon session hun ah ILPS tawh kisai in Bill luikhiak neikei mahle uh JCILPS te’n drive pan nawn uh hi’n kigen hi. JCILPS a volunteer, Meira Paibi leh local Club member te’n Pheidinga area ah tuni’n gari taite a checkna uah document kichian tak neilou non-local mi 35 vel ding mankhia uh a, Sekmai Police-te khutah pekhia uh hi’n kigen hi. Akigendan in non-local mi 35 vel ding-te Mani @ Ashutosh kichi in Leimakhong Army Hospital bawlna mun ah labourer ding a puaklut hi’n gen uh a, JCILPS te’n Ashutosh kiangah thutawp pia in bus neitu in leng JCILPS office ah non-local-te puak tungtang ah Sept 11, 2016 tan a hilhchetna bawl ding in theisak uhi. Huailou in JCILPS te’n Manipur tualsuak mite humbitna ding leh Manipur honglut-te etkai theihna dia state govt. in Sept 21, 2016 tan a assembly session om hun ding bikhiak ding in phut uh a, huai ahihkeileh kiphina tuamtuam pan ding in taklang uhi.
Khurai A/C MLA boycott sawm
Imphal, Sept-8: Khurai A/C bial mipi’n NFSA tungtawn a Kairam, Khumidok Panchayat Ward. No. 3/5 & 3/6 bial a beneficiary-te kiangah anntang hawmkhiak ahih keileh Khurai A/C MLA tungah boycott puang ding uh hi’n kigen hi. Nupi pawl te’n anntang bikhiah zah hawmkhiak ahih keileh Court tun ding uh hi’n gen uhi.
Misi luang la ding
Imphal, Sept-8: Suresh sihna tawh kisai a JAC kibawlkhia leh a innkuan te’n Dy. CM Gaikhangam tawh zan a kihoulemna om dungzui in Suresh siluang la ding uh hi’n kigen hi. Hiai thu tawh kisai in Manipur Press Club ah tunitaklam in press meet om a, huai ah RK Tombisana, Co-Convenor, JAC in a thugenna ah JAC member leh Dy. CM & Home Minister in-charge Gaikhangam in zan a kihouna hun ah tualthatna a kigolh-te tungah action lak ding a chiam ziak in JAC leh Suresh innkuan te’n Sept 9, 2016 in siluang la in vui ding uhi. Govt. lam apan thuchiam sepsuah ahih keileh JAC te’n kiphinna pan nawn ding uhi.
TRANSFER & POSTING
Jr. MCS/Sub Deputy Collector (SDC)
1. Lalsuong Gangte, SDC, SDC/ CCpur as SDC/Moirang
2. Jangminlen Lupho, SDC, DC/CCpur as SDC/CCpur.
TUNI THUPI:
“Nou numeite aw, Toupa thu ngaikhia unla, a thugente limsak un. Sun ding dan na tanute uh hilh unla, na lawmte uh sivui la sakdan ding sinsak un.”
- Jer. 9:20
EDITORIAL:
Separate admn/state/6th Schedule adi'n i man uhiam?
Tulai a i buaina tawh kisai in pawl tuamtuam kiphutkhia a, huaite’ thiltup leh ngim a hun hongsawt aleh kibanglou hileh kilawm a theih in om a, khenkhat a kizukkik pawl bang leng om hile uh kilawm hi. Hibang buaina i tuahna uh abul kibangvek mahleh JAC Against Anti-Tribal Bills(JAC-AATB) te makaihna deuh ahihziakin amaute hong paipihdan i paidan ding uh hileh kilawm mahleh amau’ demand tawh kibanglou thil ngen pawlbang om zel hi.
Ahitak gen in JAC-AATB kichi a makaipen hiding a, adangte amau kahiang hiding in kilang mahleh a, JAC-AATB makaite muanlouh ziak hia ahihkeileh a paidan uh deihlouh ziak ahizaw diam JAC-AATB banga pawldang kibawlkhiaten JAC-AATB te choubawl hile uh kilawm in om mawk uh a, hibang khop a kituaklou i hihleh bangchi’n i thilphut uh muthei ding la? Hiaithu leh tulai a i dinmun ngaihtuah huai petmah suak hi. Tribal movement i chihsek uh i kiphinna kum khat val hialta a, siluangte leng koihkhiak hi nailou a, amaute’ innkuante adia a haksat ding dan genvual hilou hi.
Gam leh nam itna ziaka siluang tanpha ana pe ngamte ziaka banghiam kilkhat a hamphatna zong i hih aleh vualzawl huai hetlou ding hi. Huaiziakin, i buaina ziaka kibawlkhia JAC-AATB makaihna deuh a movement paipih i hih ngal leh numei pawlte bang leng ATWU kichilou in ‘JAC-AATB Women Wing’ chih hihenla, ATML-te bang JAC-AATB Students’ wing chi in kiminvuah kha hile uh thil paidan dik mahmah ding in gintak-huai hi. Huchi hilou a, mahni hoihsakdan a pawl kibawlkhia, eimah ut dan leh hoihsakdan a pai mawk, nung leh ma khual hetlou a bingphut ding a kisa, ahihziaka a taktak gam a lah bangmah tan tunpih thei tuanloute ihih khak ding lauhuai hiveh aw!
India a state 29na dingin June 2, 2014 in Telengana state piangkhia hi. Telengana state bangchibang a piangkhia a, bangziaka piangkhia hiam i chih leh a kiphinna uh kum 1955 in kipan khin a, kum 2014 in state tuam mupan uhi. Ahihleh kum 1955 leh 2014 kikal in kum bangzah a kivei zou aleh ? Huaiziakin eipawl’ kiphinna pen kumkhat hipan a, tamtak alunglel leh lungliap a om, kigensetuah zawmah lai. Telengana state omna dingin kum 60 bang kiphinna nei uh a, tua hunsung in students 73 si in students 1812 vel mahin state tuam piak ahih kei ualeh amau leh amau kithat ding in vauna bawl uh a, tua banah kiphinna nei mipi 1000 vel ten mei a kihal lup sawm in pan ana la uhi.
Eipawl kiphinna tawh enkak in tehkak zual lehang na lungsim ah bang na ngaihtuah a le ? Tawmchik i hihlam kiphawklou in kituaklou zawmah lai,i thilphut uh bangchi muh ding la. Tunitan aleng Manipur govt’ ik ah i kiphinna nam nailou hileh kilawm in bangmah gen nei nailou zawmah hi. Bangziak hi’n na gingta ale ? I kituahlouh ziak uh ahi a, kituak tak a pangkhawm a kiphinna nei hilehang kum nawn election ahih tawh kiton a Manipur govt. leng patau mahmahta ding a, patau dak leng khen khinta maithei ding hi’n gintak-huai lou hi.Huai banah khawbing khat hiam khawpi khat lel hiam leh nam(community) tamloute kiphinna ziaka i deih muh ding hipha deklou a, singtangmi teng pankhawm alou theilou a poimawh ahi hi.
Huai banah kiphinna himhim nektawm zongte leh kilawh a innkuan enkolte hihbuai louhdan ding ngaihtuah hunta hi. Bazar leh lampi kianga mehzuak pawlte soft target a neih pen govt. adin poiban hetlou a, ei leh ei kal ah kitheihsiamlouhna omsakzaw hi. Ei lak khoihlou in govt. lam bangchinawk a hoih ding chihte en in makaiten leng huai lam focus zaw le uh hoihzawlou ding hiam, chi i hizaw hi. Tua i kiphindan a hoihkei chikhang, ahihziakin kiphinna pen niteng nektawm zongte hihbuailou ahih teitei ding chi nuam i hizaw hi. Koimun hiam a bandh i bawl chiangin nam tuamtuam tengkhawm chih mah khat leh nih i khoihkhak chiangin thu hoihlou kithehdalh hat mahmah a,koimun teng tung pah in huaite thangpai zel in, namkal buaina piangthei ding khop in thil omsek hi. Tua ziakin CCpur district ah bandh chih himhim om nawn keileh kituahna a omzaw diam? chih in om hi.
Telengana state phutna in Telengana akipan Ministers leh MLA-te kitawp ngam mawk uhi. Huai kia hilou in Union Minister hi’n Parliament Member (MP)te tanpha kitawp uh a, Telangana issue ziakin Lok Sabha session a buaizak hun leng omtham hi. Amau bel mipite’ palai ahihdan uh kitheichian uh a, tua ziakin mipite poimawh leh deihdan a om hoihsa in mipite lam ah pang uhi. Eilam ah bel mipite palai dinga telchingte in a teltu (mipi) simmawh leh nuaisiah uh hi’n kilang a, Bill 3 tawh kisai in gen le sak om mahleh kuk-e-kak-e leng chilou uh hihtuak hi. Ami leh sate uh khemzou ding kisa mahle uh a gintak sang un serious zaw in thil hongpai hi. Ei palai i telchingten tunitan in Assembly hiam Parliament ah kamkhat leng pau nailou ua theih in om hi. Hibang khawngte palai ding a i sawl uh ahihziakin kuapeuh adin maban ah pilvanhuai mahmah ding hi.
No comments:
Post a Comment