(Matthai 10:34,12:37; Luke 12:51-53; Deut. 30:15,19)
Written by: Pastor Dr. Hs. Chinsuanthang
THUMASA: Toupa Jesu’n “Leitunga lemna leng sak dinga hongpai ka hikei a, kidouna leh namsau lengsak dinga hongpai ka hizaw” a chi hi (Matthai 10:34-39). Mial leh vak kituaktakin a omkhawm theikei ua, vak omna peuh ah mial a taimang zel a, huchimah bangin, vak omlouhna mun peuhmah mial in a luah zel hi. Tuabang dan in, Christ nungzuite leh a zuiloute kalah kituahna a omthei ngeikei ding chih thu Jesu’n a nungzuite a sinsak hi. Tui leh kha a piangthak a, Christ nungzui hi taktakte mah Christian diktakte ahi ua, himahleh huchibanga piangthakloute’n Christ nung azui theikei ua, amau leh amau Christian ka hi kichi mahle uleng, Christian diktak ahihlouh ziak un van-gam a lutkei ding uhi. Huaibanah, mi kuapeuh tui leh kha a a pianthak keileh Juda Iscariot bangin Jesu Christ nung azui theikei uhi. Mi piangthakte peuhmah Christ kha in a sungten khum a, huai mite kia ahi uh Christian diktakte (Romete 8:9 cf. Nasepte 9:5) chih thu leh, mahni deihtelna leh mahni thu a ataktak gam tung Christian hinkhua leh a taktak gam tunglou Christian minpu ahih dan uh houlimkhawm lehang i chi hi.
KITUAHNA LEH LEMNA: Pathian khat, Toupa khat leh Khasiangthou khat bia a, A thupiakte zui mite lak kia ah lemna leh kituahna a om ding chih Laisiangthou in hon hilh hi (Eph. 4:4-6). Toupa Jesu hiai leitung ah ahong paina lungtang taktaka kipahpih a, Amah sang a, A thupiakte leh A thusinsak zuite kia lakah lemna a om ding chih i mu uhi (Luke 2:14). Huaiziakin, tui leh kha a piangthak mite leh Christ’ Kha sungtenkhum mite kia lakah kituahna leh lemna a om ding hi. Mi kuahiam in Pathian saptuam sunga dinmun hoihtak hiam leh poimawhtak a letkhak ziaka piangthak himawklou ahi chih i theih uh a deihhuai hi. Saptuam sungah leng jawlnei taklou tampi kum zabi khatna hunsunga leng ana lutkhin thamta ahi chih i theih uh a deihhuai mahmah hi. Huaiziakin Toupa Jesu’n leng a nungzuite kiangah jawlnei takloute akipan a pilvang dingin sinsak khinta hi (Mat. 7:15-19). Tulaia mite’n diktatna a tangkoupih lai ua tuabang mite dem a, soisel mite zaw ngia belamvun silh a saptuam sunga om jawlnei taklou chi a Toupa Jesu’n a gente ahi uh chi lehang i genkhial kei ding uhi. Huchibang mite tawh kilem dingin Toupa’n eite ahon sinsak kei hi. Jesu Christ a tangtawn hinna neite kia’ lakah kilemna leh kituahna a om ding chih Laisiangthou in ahon hilh hi. Aziakbel, amah lemna kumpipa ahi a, huai lemna kumpipa’ tate lak kia ah lemna om ding a hizaw hi (Eph. 4:3).
Huaikia leng hilouin Pa Pathian leh Tapa Pathian tawh kilemtaka omkhawmna leh kithuahkhawmna leng ahi zawmah hi (I John 1:3-4). Huaiziakin eite hon sungtenkhum Christ Jesu kha in eite Amah lungsim bang lungsim hon pusak a, kituaklou theilou leh eite kilemlou theilou in a hon pumkhatsak ahi zaw hi. Pathian a mithumte a kituak gige bang un eite mi tampi himahlehang huchibanga kituahna kha leh lemna kha hon neisak Pathian’ min i phat uhi. Pathian’ Khasiangthou in, eite ahon sungtenkhum ziakin diktatna i lunggulh un, i gilkial un leh i dangtak khawm thei uhi. Hiai khawngte Pathian’ tate i hihna uh khawvel muhtheih dia ahong kilatkhiakna ahi a, huaiziakin saptuam sung mah a om himahleh, khawvel mite’n ahon hua un ahon mudah uhi (Mat. 5:14). Pathian in hiai khawvel mite tawh dikloutaka kilem dingin ahon chikei a, Pathian’ tate (ei leh ei) diktatna, sianthouna leh khat leh khat ki-ittuah chiat a amah deihlam lungsim nei chiat a kilem dingin ahon chizaw hi. Huaidingin Pathian in A khasiangthou ei ah ahon pia a, huaiziakin, atak tak gam tung Christian i hong hithei uhi. Huaileng Pathian in mahni deihtelna leh mahni thu a huaibang tangthei dinga akoih ahi.
KIDOUNA LEH NAMSAU: Mi kuapeuh in Jesu Christ nung a zuih chiangin, a melma amah innkuan sunga mite mah ahi ding chih Toupa Jesu’n ahon hilh hi. Huai omdan bel, piangthakte leh piangthakloute kala kibatlouhna a om ding banah kidouna leng om ding ahihdan ahon sinsak hi (Luka 12:51-53). Pathian’ hihna (God’s attribute) tampi a om a, huaite laka khenkhatte, sianthouna, diktatna, itna, thutakna tengteng leh bangkim tunga muanhuaina chihte khawng ahi uhi. Huaite mi kuapeuh tui leh kha a a pianthakna tungtawn a Pathian leh Christ sungtenkhum mite kia in a neihtheih uh Pathian’ tate hihna leh omdan ahi (Romete 8:9, 14-16). Dan zuihna in kuamah Pathian’ ma ah dikna leh siamtansakna ahon pethei kei hi. Kuamah Pathian ma a diktat himhim a omkei a, khat lel leng a omkei chih i thei uhi (Romete 3:10-18).
Mihingte hoih i kisakna pente leng puansia kihhuai banglel ahi chih i thei uhi. Ethiopia mivom in avun ahih lamdang in, gialbem in a gial a khek lamdang thei ahia? Huchibang ahihleh, mikhialte’n thilhoih hihthei na ve uteh maw? (Jeremia 13:23). Huaiziakin, miteng mikhial (kha khial) i hihdan uh Laisiangthou in ahon hilhchian mahmah hi. Himahleh, mi kuapeuh tui leh kha a piangthak a, Pathian leh Christ Jesu kha in a sungtenkhum lebel, Pathian hihna bangbang huai, sianthouna, diktatna, thutakna, banah kha gah teng neithei vek uh chih Laisiangthou in kichiantak in ahon hilh hi (Galatia 5:22-23). Mi kuapeuh Christ Jesu mi leh sa hikhin a, Christ nungzui hi taktak te’n, khawvel thilte lunggulhna leh leitung duhgawlnate cross tungah Christ tawh a kilhlum zel uhi (Galatia 5:24). Toupa Jesu’n mi kuapeuh a cross pua a, ka nung hon zuilou zaw Christ mi leh sa ahi theikei achi hi (Mat. 10:38).
Huaiziakin, Toupa Jesu’n cross chi a a gen bangmah dang hilou in, hiai leitung-khawvel huaihamna leh duhgawlnate (mihing lui) sihsanna gen ahizaw hi. Huaiziakin, mihing lui in Pathian’ gam na a sem theikei a, mihing thak Christ Jesu sunga siamthak a om kia in Pathian’ gam na semthei in Christ nung a zuithei lel hi. Pianthakna leh hotdamna ngahna dingin Dan zuihna in bangmah omzia a neikei a, himahleh mi ahong pianthak tak chiangin, a sunga teng Pathian’ Khasiangthou in Dan teng zui dingin a pi a, a zuizou sak zel zaw hi. Huai khasiangthou mah in, Pathian’ tate hinkhua diktat leh a siangthou hinkhua ah Pathian leh Christ batna nei in api zel hi (Romete 8:14-17). Huaiziakin, mi kuaman diktatna na a sem theikei i chih lebel tua semthei dinga pitu Pathian Khasiangthou soisel leh dem i hikha ding chih a lauhuai mahmah hi.
Mi piangthaklou in, diktatna na a sem theikei bilbel i chihleh bel thudik ahi. Diktatna na semthei ding a Christ Jesu sunga pianthakna hon pia Pathian ziakin, ei Christ sunga piangthakte’n diktatna na i semthei uhi. Thamlouin huchi ding in Pathian in Christ Jesu sunga pianthakna a piak a, A khasianghtou a sungtenkhumsak mite bel a hinkhua uah ahong diktat zel uhi. Huchi hilou hileh Laisiangthou in pianthakna thu agen bangmahlou hi ding hi. Kuapeuh in pianthakma hinkhua leh pianthak nung hinkhua, mahni kisiamtanna ding leh mahni khelhna khuhmangna dingin gen polh kei lehang deihhuai ding hi.
THUKHITNA: Pathian zaw legal mahmah leh justice mahmah Pathian ahihmanin, khelhna kisik a ngaihdam ngenloute ngaidam ngeilou Pathian ahi chih i theih chiat uh deihhuai hi. Huaiziakin, mihing kalah leng, khelhna kisik a thupha tawina a omlouhna ah lemna leh kingaihdam tuahna a omthei kei chihleng thei in, Pathian thu ahihna bangtaka gen in zuichiat lehang a deihhuai hi. Pathian in a tate khawvel mikhialte tawh kilem a om dingin ahon deih kei himhim hi. Midiktatte leh midiktatloute’n misiangthoute leh misiangthouloute’n; mithutakte leh mithutakloute’n; leh Pathian’ tate leh Diabol tate’n chikmah chiangin kituahna leh kilemna a nei ngeikei ding uh chih i theih chiat uh a deihhuai hi. Huaiziakin, ei, Pathian’ ta kichite’n vak leh mial kituahsak i sawm teitei ding uh hilou hi. Kituahna leh kilemna om naksangin, kidouna leh namsau lengsak dinga hongpai ka hizaw chi in Toupa Jesu’n a gen hi.
Huaiziakin, unaute aw! Thil gilou hihte ziakin ei Pathian’ tate i kihih lungkham ding uh ahi keia, amaute loupa bangin atpaih in a ompah ding ua, loupa hing bangin a vuaimang pahta ding uhi (Sam 37:1-2). Khawvel mite’n gitlouhna na asep lai un, Pathian in ei a tate, amah nei a hiai leitunga i damsung ua hing thei dinga khasiangthou sungtenkhumna ahon piakte i hihman un i damsung un thihoih leh na hoih i semzaw ding uhi. Tuabang kalah, Christ neihma hinkhua leh neihnung hinkhua (a kikhek hinkhua) nei kha ngei nailou na hihle bel khawvel mite tawh na kituak ding hi. Thamlouin, huchibang mite meltheih leh lawm hih leng na ut ding hi. Na mi polhnop, na migup leh na mi ngaihsangte tungtawn in mite’n na khalam hihna diktak hon muchian uh ahi chih na theih a poimawh hi.
Tu a i thugente pansan in, ataktak gama lut Christian na hi na hia? na kivelchian inla, hun tomchik na neihlai in na deihtelna tungtawn in (na thu tungtawn in) a taktak gam a lut Christian hih sawmin chi’n Jesu Chrsit min in ka hon chial hi (Deut.30:15,19). Huchiin hiai khawvel huaihamnate leh duhgawlnate sihsan Christian diktak na hong suak ding a, huchi’n, gawtmun meidil hilouin, van-gam nanga hong hizaw ding hi. Na thu in siam ahon tangsak ding a, na thu mah in siamlouh ahon tangsak ding chi’n Toupa Jesu’n a gen hi. Huaimah bangin tulai in boycott chih bang i thangsak viau ua, mihingte’n mi kuamah i boycott taktak theikei uhi, thamlouin Pathian in leng kuamah a boycott ngeikei hi (Matthai 12:37).
Leitunga mihingte i deihtelna un eimah leh eimah hon boycott ahi zaw chih thei in, i sih chianga van-gam lutlou din eimah leh eimah i ki-boycott khaklai ding a lauhuai a, a Legal leh Justice petmah Pathian kiangah i khelhnate kisik in ngaidam ngen lehang chi in Jesu Christ min in i kichial uhi. Kisik a ngaihdam ngenloute Pathian in ngaidam ngeilou banah mihingte’n leng ngaidam ngeilou ahi. Leia na hen van ah hen ahi ding a, leia na phel van ah leng phel ahi ding chi’n Toupa Jesu’n a mite hon sinsak hi (Matthai 16:19).
Courtesy: Manipur Express
No comments:
Post a Comment