HEADLINES:
Vatican City ah mi 1,20,000 val paikhawm
Pope in ‘Catholic Misiangthou’ in Mother Teresa puang
| http://www.trbimg.com |
New Delhi, Sept-4: Catholic makai lianpen Pope Francis in Vatican City ah ‘Misiangthou (Saint)’ hidi’n Mother Teresa puang a, huai dungzui in ‘Saint Teresa of Calcutta’ minvuah hita ding hi. Mother Teresa sihnung kum 19 chin hun tawh kituak a tuni sunnung dak 2:00 a Canonization piak hunah mipi 1,20,000 val paikhawm uh a, India akipan External Affairs Minister Sushma Swaraj, Delhi Chief Minister Arvind Kejriwal leh West Bengal Chief Minister Mamata Banerjee telin palai 12 inleng uap uhi. Pope Francis in huai huna athugenna ah saptuam-te’ kingai niam a, mizawng leh gentheite adia pang ding in chial hi. Mother Teresa nungzui Sister 250 banah mizawng leh gentheite tawh Pope Francis in huai hun zawh in annkuang umkhawm uhi.
Mother Teresa thumsakna tungtawn in, India ah numei khat in damna ngah a, amah tungtawn a thillamdang tamkhop a om ziakin Pope Francis in kumlui sung in ‘Saint’ a puan ahihtheihna di’n lampi bawl chi uhi. Mother Teresa in kum 19 a chin in India hongpha a, Darjeeling a school khat ah sinsaktu in pang hi. Huainung 1946 in Kolkata ah kisuan a, kemtu ding neilou naupangte kaikhawm in enkol hi. Kum 1950 in ‘Missionaries of Charity’ kichi pankhia a, leitung gam tuamtuam ah tunitan in huai Charity ah Missionary(Nun) 500 val om hi’n gen uhi. A nasep hoihte ziakin Nobel Peace Prize leng piak in om hi. Pope John Paul II in October 19, 2003 in Mother Teresa’ siansuah(beatification) a, huai hun in Bharat Ratna leng piak in om hi. Mother Teresa ahihleh September 5, 1997 in si a, tuni dong in khawvel mun tuamtuam ah minthang lai hi.
LOCAL NEWS:
Singtangmi’ lak ah rank 57 in pang
Lamka, Sept-4: Academic Session 2016-17 akipan MBBS/BDS course zil ding lakna ding in National Eligibility & Entrance Test-Under Graduation 2016 ah unreserved category a telpha Roll No. 62903687 Jennifer Kimnuntluangi d/o Thangsangvunga of Chiengkonpang in mark 452 mu in rank 57na ah pang a, singtangmi’ laka mark tam mupen leh rank sangpen in pang hi.
Khawpi sung ah mei vaklou
Lamka, Sept-4: Zan a kipan 132/33-11 KV Khengjang Power Sub-Station apan IB Feeder kisia dept,. te’n a siatna mun zong mahle uh mu zou nailou uh a, tuni (Sept 4) Pathianni ahihziakin na semlou uhi. Tuibuong area laka sia hidingin ginglel uh a, Sept. 5, 2016 in kisiatna mun zongnawn ding uhi.
Tuailai Pro saina Mega Workshop
Lamka, Aug-28: Tuailai 1434 Pro makaih in New Lamka a EBC Gospel Centenary Hall ah Sept 9-11, 2016 sung in mega workshop om ding a, Sept 9, 2016 nitak in Rev. V. Nenglian, DS, EBC Lamka North divn. in hong ding a, Rev K.Kamchinkhup, DS/Imphal in Pathian thu gen ding hi. Sept 10, 2016 zinglam in Upa B. Langkham (retd) PP, EHA in ‘NGO tawh kisai paidan dik leh pilvan dingte’ chih sinsak ding a, sunnung in S.Thienlaljoy Gangte, SDO/CCpur in ‘Govt. scheme tuamtuam mipi’ hamphatpih theih dingte’ sinsak ding hi. Sept 11, 2016 in Upa M. Thanglianmang, DSP/CBI in ‘Dan tawh kisai mipi nautang’ theih dia poimawhte’ chih sinsak ding hi. Huai hunsung in Tuailai1434 Pro in spot painting competition, laphuah leh article gelh kidemna kipahman hawm ding uh hi’n kigen hi.
Guta te’n TVS gari khat gu
Lamka, Sept-4: Gutate’n zan nitak dak 9:00 velin Hmuia Veng a om Tualbiaklian in a zatlai TVS Jupital (2-wheeler) 2016 model, Chasis No. MD626BG43F1P75366, Engine No. BG4PF1775316 inn kong a kikoih gukmang uhi.Huai a thak registration kibawl nailou, A/F kigelh hi a, gari neitu in Police ah report bawl a, Police te’n muhkhiat a sawm ban uah guta matkhiat sawm in suizui uhi.
Dist. Level Sc. Seminar om ding
Lamka, Sept-4: ZEO/CCpur nuai a Science Superviser saina in Sept 5, 2016 zinglam dak 10:00 in Synod Hall ah “Pulses for Sustainable Food Security, Prospect & Challenges” chih thupi zang in 38th Dist.Level Science Seminar om ding a, Headmaster/Headmistress leh Principal te’n mahni student-te telsak dingin ZEO in ngen hi.
BYF LN khawmpi 8veina zou
Lamka, Sept- 4: BYF Lamka North divn in Sept 2 apan EBCC Bungmual ah BYF khawmpi 8 veina aneih uh tuzan mipi kikhop tawp in Upa Dr. J. Son Go Kham, Chairman, DWC in khak hi. Khawmpi sung in biakna kikhop tengin Rev. K. Kamchinkhup, DS/Imphal Divn in thugen hi.Tuni sunnung in seminar ah Jimmy Ginbiakthang in sinsak hi. Khawmpi ah biakinn 18 apan tuailai tamtak paikhawm uh a, Solo, Musical Band, Lapawlpi leh Bible action ah kidemna nei uh a, lapawlpi category-A ah BYF Hiangtam Lamka te’n khatna la ua, BYF Bethany leh BYF Bungmual te nihna leh thumna in pang uhi. Category-B ah Immanuel BYF HQ Veng in khatna la uh a, BYF Zoan leh BYF D. Phailian-te nihna leh thumna in pang uhi. Solo (pasal) ah Joshua Nangchinhau (BYF Bethany) khatna in pang a, Tuansonmuan (BYF Zenhang) leh Paunkhanlun (Immanuel BYF) te nihna leh thumna in pang uhi. Solo (numei) ah Chingngaihlian (BYF Moria) khatna in pang a, Mary Kimbiaklun (BYF Central Lamka) leh Chinglunmoi (BYF Bungmual) te nihna leh thumna in pang ua, Musical band ah BYF Bethany-te khatna in pang uh a, BYF Zenhang Lamka leh BYF Central Lamka-te nihna leh thumna in pang a, Bible Action ah BYF New Lane in khatna la in, BYF Hiangtam Lamka leh BYF Pearsonmunte nihna leh thumna in pang uhi.
Stakeholder-te tawh PMSMA thugen ding
Lamka, Sept-4: CMO/CCpur office ah Sept 6, 2016 zinglam dak 11:00 in Stakeholder-te tawh Pradhan Mantri Surakshit Matritva Abhiyan(PMSMA) tawh kisai meeting omding hi. Huai ah Reproductive Maternal Neonatal Child and Adolescent Health tawh kisai stakeholder-te Med Supdt. Dist. Hospital; Lamka Nursing Home; People Health Foundation, ; Nazareth Nursing Home leh Sielmat Christian Hospital a Managing Director-te ban ah CHC/Parbung; PHC/Sagang; PHC/Saikot; PHC/Singngat leh PHC/Behiang a Medicial Officer i/c te tel ding uhi.
CCpur ai-oh dingte Sept 9 in kuan ding
Lamka, Sept-4: Tuibuong Peace Ground ah Sept 2, 2016 in numei leh pasal kum 14 nuailam football trial-cum-selection ah CCpur dist. ai-oh dingin mi 18 telkhiat hi uh a, Sept 5, 2016 in Imphal a State Level Trial-cum-Selection ah kuan ding uh chih himahleh ahun kisuan ziakin Sept 9, 2016 zinglam dak 11:30 in Bus Station akipan kuankhe ding uh hi’n DYASO/CCpur apan thusuak om hi.
Sinsaktu Khawmpi zou
Lamka, Sept-4: EBC Divn. Baptist Children deptt. Lamka South Divn. saina in EBCC Pethuel, Vengnuam South ah zan in EBC Divn. Baptist Children deptt. Lamka South Divn. saina in Sinsaktu Khawmpi 9veina leh Vaihawmna om hi. Khawmpi sung in Dr G. Suankhanhau in Pathian thu gen a, tuni sunnung in ‘Naupang etkolna leh Tulai dinmun’ chih thupi zangin Muani Tombing, Director Lainat Ministry in Seminar ah sinsak hi. Tunitak biakna program zawh in Local Pastor K.Vungsuanthang in khawmpi khak hi.
SUUNNA:
Thongkhansong Guite (74) h/o Ningkhozam of Mission Veng, Hiangtam Lamka tuni nitak dak 7:00 velin GB Pan Hospital, Delhi ah lungtangna ziakin si a, aluang hong kipaw ding hi. Aman Education deptt ah Hindi teacher pension hi a, CCpur Dist Teachers’ Assn a Secy(Information)alet lai in leng mifel leh mawhpuakna zou mahmah ahi hi. .
Driver Thangcha (60) h/o Vungtom of Singngat zan nitak dak 11:00 velin cancer in si a, tuni’n Singngat hanmual ah kivui hi.
Hnunsuanmung Valte (43) s/o Thanglian Valte of Lailam veng tutela CISF a Inspector sem, Kolkata a Post Trust Hospital ah Hepatitis-C ziaka ki-enkol zanhal nitaklam dak 5:13 vel a si, a luang zan nitaklam in Lamka puaktung hi a, tuni’n Lamka hanmual ah kivui hi.
Thangnunzau s/o G.Lianbuang of Mimbung, Mizoram zan in Silchar apan Guwahati zuanlai tuzing in Lumding khawkiang ah sisa in kimukhia hi. Diphu Police te’n siluang la in post mortem bawl uh a, Mimbung ah puak hiding hi.
IMPHAL NEWS:
Sept 5 in Assembly session bei ding
Imphal, Sept-4: Manipur Assembly Monsoon session Sept 2, 2016 a sitting om Sept 5, 2016 (Monday) zinglam dak 11:00 in sunzom nawn ding uh a, Assembly a ding list of business dan in Sept 5, 2016 a sitting zawh in session khak hiding chihthu om hi. Sitting om sung in Education Minister Dr. Kh. Ratan Kumar in bill 3 a puaklut (i) The Manipur Technical University Bill 2014 (Bill No. 5 of 2016), (ii) The Dhanamanjuri University Bill 2015 (Bill No. 6 of 2016) leh (iii) The Manipur State Higher Education Council Bill 2016 (Bill No. 7 of 2016) genkhawm ahihbanah Assembly in pass ding a gintak ahi. Assembly Session hih buai om ding a gintak ziakin tuni zankim akipan in Session zawh masiah Manipur Legislative Assembly apan km 1 kimkot sung ah 144 CrPC (curfew) puan in om hi. Law & order enkaitu Govt. agencies, media persons leh Manipur Legislative Assembly a session pailel ah kisai khakna nei govt. functionaries-te huamkha lou ding a, kitenna leh sivuina ding tawh kisai a procession pai ding te’n SP/Imphal West ah phalna a lak uh ngai ding a, thunei-te kiangah phalna lalou a procession sailou ding in theisak uhi.
Teacher day tawh kisai in thukhah
Imphal, Sept-4: Manipur Governor Dr. Najma A. Heptulla in Teacher Day 2016 ding tawh kiton a adiak in Manipur mipi-te deihsakna thukhah bawl a, huai ah kum teng in Sept 5 ni India gamsung ah India President lui Dr. Radhakrishnan, piangchampha ni Teachers’ Day a zat hi a, education lam ah mi thupi ahih banah educationist minthang mahmah khat hi a, amah phawk gige na dia Teachers’ Day zat a om hi’n gen hi. Dr. Radhakrishnan in maban hun a khawtang adia khuam poimawh tuailai-te bawl phatna ah teacher-te mawhpuakna a poimawh dan thei a, teacher te’n tuailai-te maban ding bawlhoih tu banah gam leh khawtang bawl hoihna ah dinmun poimawhtak a luah uh kuapeuh in a theih ding uh chi hi. Teaching fraternity-te a ding in leng deihsak thukhah bawl a, khawtang adia chitak leh ginom banah kuhkaltaka nasem zom zel ding in ngen hi.
Govt. leh Private Inst. teng suty ding
Imphal, Sept-4: Manipur Govt. thusuak dungzuiin Sept. 5, 2016 a Teachers’ Day ziakin Govt. leh private educational institution teng suty hiding hi. Manipur Chief Secretary O. Nabakishore in a gendan in, Govt. school, college leh private educational institution teng Teachers’ day ziakin govt. in suty puang ahihdan gen hi.
Moreh Trade Centre building dengdel
Imphal, Sept-4: Manipur tawh Myanmar gamgi a Moreh mun ah Moreh Trade Centre building hun sawtpek apan etkol ahih louh ziak in vuahzuk hun in mun tamtak ah tui leak a, building mailam leng niteng a kisia hi’n gen uhi. Myanmar a official, VIP, VVIPS leh mi tuamtuam te’n Trade Centre sawng (floor) 1na pen meeting na mun ding in zang uh a, huai ah ceiling tung a leak theih banah tuang tung ah tuichim a, hiai tungtang Manipur govt. theihsak himahleh etkaina bangmah omlou hi’n gen uhi. Moreh Trade Centre ah meeting neite’n nawngkaina tuak uh a, Moreh Trade Centre building ahihleh Sept 28, 2003 a Industry Ministry Th. Debendra leh Power Minister Phungzathang Tonsing te’n a hongkhiat uh hi’n kigen hi.
CEO in Nodal Officer 9 sep
Imphal, Sept-4:Manipur Election Authority te’n maban a Manipur Legislative Assembly election kum 2017 bul a om ding tawh kisai in Nodal officer 9 sep (appoint) uh hi’n kigen hi. Election Commission of India (ECI) thupiakna in Chief Electoral Officer (CEO) Manipur in State Assembly Election 10 veina ding tawh kisai in kisakkholhna pan a, Manipur govt. in election ding tawh kisai a kisakkholhna enkai ding in Manipur Civil Service (MCS) leh Manipur Finance Service (MFS) apan Nodal officer ding in 9 sep uhi.
Manipur govt. thusuahna ah Somorjit Salam in Manpower management len ding a seh hi a, Dy. Secy. (Transport) Dr. Rangitablai Waikhom in helpline leh complaints redressal, Joint Director (CAF & PD and MD MSCB) Ranjan Yumnam in observer, Administrative Officer (Medical) T. Manihar Singh in implementation, Director SLUB & Dy. Secy. Revenue Y. Rajen Singh in Welfare of polling personnel, Under Secy (AR) and Dy Director SAT A. Shivadas Sharm in Training Management, Joint Director/IPR Dr. N. Johnson Meetei in media Communication; Jt. Director (finance commission) L. Badalkumar leh Dy. Finance Advisor (Agriculture) P. Premjit Khuman in Expenditure monitoring len ding hi’n kigen hi.
Public Curfew kipan
ILPS tawh kisai in Torch rally om
Imphal, Sept-4: JCILPS-te sponsor na in tunitak dak 7:00 in phaizang bial ah torch rally om a, Arjun Telheiba, Co-Convenor, JCILPS in govt. in Assembly session pailel ah bill luikhiak banah genkhawm a sawmlou uh mipi adia vangsiat huai hidan in gen a, govt. omdan mipite’n kipom theilou chi hi. Torch rally hun ah nupi leh mi paikhawm te’n ILP bill pass lou a assembly session a bei louh ding, Manipur ah ILP zat hi hen, Manipur damsawt hen chih-te banah slogan tuamtuam sam in kikou uhi.
Huailou in JCILPS te’n Manipur Assembly Session pailel ah ILPS tawh kisai a bill pass ding phutna in tunitak zankim akipan Sept 7, 2016 nitak dak 6:00 tan public curfew puang uh hi’n kigen hi.
MFDC Hall ah Teachers’ Day lopna
Imphal, Sept-1: Manipur govt. nuai a Departments of Education (Schools), Higher & Technical Education, Adult Education, State Council for Educational Research & Training, Directorate of Language Planning & Implementation leh Board of Secondary Education Manipur (BSEM)-te saina in Palace Compound a MFDC Hall ah Sept 5, 2016 zingsang dak 7:30 in ‘Teachers’ Day 2016’ zatna om ding a, huai ah Chief Guest in Chief Minister O. Ibobi Singh pang ding hi. Functional President in Dr. Kh. Ratankumar, Minister (Education & Transport) pang ding a, Guest of Honour in Dy. CM Gaikhangam pang ding hi. Huai hun ah India President lui Dr. S. Radhakrishnan phawk gige na in candle lighting leh pak piakna om ding hi. Tua zawh in State Teacher Awards hawmkhiakna om ding hi.
BJP te’n Election Campaign pan
Imphal, Sept-4: Manipur Pradesh BJP te’n maban a Assembly Election ding tawh kisai a kisakkholhna in tuni’n Langthabal Constituency a ding in Lilong Chajing mun ah Somorjit in election campaign pan hi’n kigen hi. Langthabal A/C apan MLA tuh ding a gintak Phukhrambam Somorjit, President, Bharatiya Janata Yuva Morchan Manipur Pradesh in kum 2017 general election zawh chiang a BJP te’n govt. bawl ding uh a, Langthabal Constituency te’n Assembly ah opposition MLA a sawl lut sek ziak un mundang tawh teh in tuantual diak a, BJP candidate dia telkhiak ahihleh election tuh ding a, huai ahihkeileh BJP party in candidate dia a telkhiak uh gum ding chi hi. Huai banah Manipur Pradesh BJP te’n Imphal West district a Naoriya Pankhangba A/C ah election rally nei uh a, huai hun BJP worker leh supporter te’n uap a, S. Manaton Singh, in BJP ticket tungtang a election tuh ding a gintak hi’n gen uhi.
Bail a khahkhe lou di'n ngen
Imphal, Sept-4: JAC against the Brutal Killing of Md Abdul Rahman te’n thutawpna din thutanna bawlma a tualthattu bail a khahkhe lou ding in thuneite kiangah ngetna bawl uhi. Huai tawh kisai a Md. Roman Shah in media-te tawh kimuhna ah Moijing Thoubalmayum Leikai akipan Md. Riyaj Khan, Md. Afikur Rahaman leh Md. Zakaor Rahaman te’n June 30, 2016 nitak in Md. Abdul a that ziak un Police te’n jail ah koih uhi. Md. Afitur Rahaman leh Md. Zakaor Rahaman te’n bail a khahkhe ding in Court ah ngetna bawl uh ahihdan JAC te’n theikhia uh a, Thoubal Court ah bail ngetna tawh kisai in hearing om ding a, thudik a vaihawmna dia thutanna om masiah thuneite’n khakhe lou ding in ngetna bawl hi. Thuneite’n tualthat mi 2-te a khahkhiak ua leh JAC te’n Moijing ah kiphinna banah Thoubalmayum Leikai te’n tualthat-te a gup ziak un huai veng luh ding uh hi’n leng gen a, veng mipite’n tualthat-te tawh kizopna neilou ding in theisak a, khaw 2 kalah buaina om thei hi’n leng taklang uhi.
Compensation kilawm huntawk ngen
Imphal, Sept-4: Affected Land Owners’ Welfare Assn. of Yurembam, Changangei leh Malom (ALOWAYCM ) te’n state govt. in a gam uh alak theihna ding in compensation kilawm huntawk pe ding in ngetna bawl uhi. Hiai tawh kisai in tuni’n Manipur Press Club ah press conference om a, huai ah Akoijam Nimai, President, ALOWAYCM in a genna ah Manipur govt. in Tupul leh Imphal kikal a Broad Gauge Railway Line bawlna ding in Imphal West a khua 13 ah tuilou leh tenna gam hunkhop la uh a, khua 13 lakah Yurembam, Changangei leh Malom te’n khawdang tawh teh in gam man ah sum tawm muzaw uh a, mundang tawh teh in lei hoihna mun banah haichi tuhna ding in hoih a, ALOWAYCM te’n Sept 10, 2016 tan a khaw dang-te tawh kibang in compensation man bawl dik thak ding in ngetna bawl a, huai ahih keileh kiphinna tuamtuam pan ding uh hi’n gen hi.
Nutrition Week zang
Imphal, Sept-4: Herbal Life Centre Club of Imphal Area te’n Brahmapur Nahabam a Dharmalaya Social Welfare Centre ah tuni’n National Nutrition Week zatna nei uh hi’n kigen hi. Huai hun ah Club member paikhawm te’n ‘Fun Run’ chih thupi zang in Singjamei Market apan Brahmapur Nahabam tan rally pai uhi. Salam Bhimo, Associate Member, Herbal Life in tulai a natna tuamtuam apan kivenna dia nutritious food leh exercise poimawh chi’n gen hi.
TUNI THUPI:
“Huchi’n Christ thu bulte gen i tawpsan ding uh a, pichin lam i nawt ding uhi.” -Hebrute 6:1
EDITORIAL:
Solid Waste Treatment Plan
Lamka khawpi in kong bangkim a khantouhna a neihna dingin akisam tamtak omlai ahi chih i thei a, abiktakin lampi keklet ding banah residential area leh commercial area bik neih ding chihte leng poimawh hi. Huaibanah midangte adiakin mundang akipan hong khualzinte muh a akilawmna dingin a sianthou mahmah leng poimawh a, khawpi sung niin leh lampi khu lunglung banah mun tuamtuam a ni’n kipai chihte’n khawpi etlawmna subuah mahmah banah sewerage system hoihtak i neih uh poimawh ahihdan kichiansak hi.
Tuma in damtheihna dingin kim-le-kiang sianthou a poimawhdan i genta a, kim-le-kiang sianthouna dingin niin omte paih poimawh hi. Tuaziakin, a paihna ding mun kichiantak a omlouh ziak leng ahimai thei; nullah peuh, guam peuh, lui peuh ah niinte kipai ahihman in, damtheihna ading in leng poiban hi.
Huai tawh kisai in M. Gouzamang Guite, EM, ADC/CCpur in Aug 22, 2016 in New Delhi ah Divendra Singh Soun, Sr Executive Environment & Biotech Divn., Excel Industries Ltd. kimuhpih a, Lamka khawpi a niinte etkai dingdan (solid waste treatment plan) banah Centralized leh De-Centralized Municipal Solid Waste Treatment tawh kisai genpih ahihdan News ah leng taklat ahi hi. Amau 20 tons capacity per day Solid Waste Treatment Plan adi’n project gelh lemsa uh a, huai kipahhuai a, sepsuah a a om hun ding ngaklah huai petmah hi. Akigendan in huai project ah chi 3(thum) om a; khatna ah a muatthei niinte adi’n Decomposting Plan om a, huai in niinte leihoihna/urea suaksak ding hi. Nihna ah Pyrolosis plan kichi a plastic-te thautui chikhat bawlna dia zatding leh thumna ah Incinerator plan kichi a, huai in diaper-te, bio-medical waste tuamtuamte hong process ding hi’n kigen hi.
I theihsa bangin tulel a Lamka khawpi a niinte ADC te’ panlakna in Ngakik kianga buak hisek a, himahleh huai leng akim leh akiang atengte adingin damtheih huailou ahihman in kisuan a, tulelin Khuga Dam gal a Sehken/Khianglam a ADC gam ah buak hilel chih ahi hi. Mun gamla zaw leh mundang ah suan hileleng ahoih zawkna ding tuan om di’n gintak huailou hi. Aziak ahihleh vuahzuk hunin niinte lak apan tuiluangte lui ah luanglut ding a, huaipen lui a om ganhingte banah mihing mahmah ading inleng damtheih huailou suak hi. Tua ziakin, Solid Waste Treatment Plan mah damtheihhuai in hoihpen di’n gingtak huai hi.
Khawvel khantouh dungzui in khawpite lun deuhdeuh in khangthou hiaihiai ahihman un ut thu hilou in mihing leng kibehlap deuhdeuh ding a,huai pen amawk a nelhsiah theih hilou ahi chih thudik ahi hi. Huaiziak mahin ADC-te panlakna sepsuah hun ding ngaklah huai mahmah hi. Govt lam a panla theite’n pan alak kawm un mipi’n leng khawsung kepsiangthouna dingin i hihtheih uh bang om ding hiam chih i ngaihtuah uh poimawh hi. Pupa satsa gam i chi a, i kisuan pih mahmah a, nam lianzawte’n hon khoihsak ding na i sa mahmah uhi. Huchibang ahihziakin neitu i hihleh azun leng i zun uh kisam hi. Mahni a kivaihawmna bang i lunggulh uh a, i rights uh leng ahi him a, himahleh, i ngaihtuah ding ua deihhuai bel i khawpi neihsun uh nasan siangthoutak a kem theiloute’n Political status hoihzaw leh a sangzaw nei lehang leng i khantouhpih luatna ding uh om tuan di’n gintak huailou hi. I ngaihtuahna ah huaite gal-et kawm in eikhut a vaihawmna om hun a siangthou taka khawpi i kep theihna ding ua kisingsat hun hilou hiam chinuam ihi uhi.
Tuhun in i gam a mun lianzawte eikhut ah om a, eimah in i enkol uh chi ni. Gam neiloute’n leng mi’ gam a tengin in huai gam a i ten tantan ei a bangin i kemthei uhi. Huaiziakin, niin leh deihlouh paihna tawh kisai in inn chih adiakin compound sung khat a khawsa khawmte’n lei toukuak in halmang thei lehang nullah peuh inn geite huangsung peuh a paih ngailou ding a, midang leh kim-le- kiang niinsak hetlou in niinte uh hahsiang theih dingin gintak huai hi. A neizou deuhte’n cement a bawlin hoihtak in a niinte uh halsiang thei uh a, hichibang a hih mi hunkhop leng om ding chih leng i thei hi. Himahleh, luita leh nullah/guam khong a niin kipai muh ding omlai ahihman in huchibang munte ah niin pai nawnlou in, i niinte eimah in ki-etkai lehang ADC-te dawnzang khai leng i hi ding hi.Khawpi taktak suahna dingin zaw a kisam leh ei mahmah in leng pa mi lakna ding tamtak omlai a, a kisamte sem kheding kuadang hilou in mipi mah i hi uh chih i kiphawk chiat uh poimawh hi.
No comments:
Post a Comment