HEADLINES:
Kha 4 sung in Black Money Rs. 65,250 Cr puangkhia
New Delhi, Oct-1: Income Declaration Scheme tungtawn a gamsung mipite’n tax piaklouh sum aneihte uh puangkhe dia Centre in theihsakna abawl nung, kha 4 sung in Black Money Rs. 65,250 crore puankhiak (disclosed) in om a, centre in hun bikhiah apiakte zan a abei tan in mi 64,275 velin a summuhdan uh government kianga pelut uh hi’n Finance Minister Arun Jaitley in tuni’n gen hi.
Finance Minister in agendan in Tax Department te’n declaration kibawlte enkai lai uh a, huaite zawhsiang ahihchiang in tamtak a kibehlap lai ding hi’n gen hi. Aman agendan in, mikhat in Rs. 1 crore vel puangkhe tangpi uh a, hunchiam sunga pelut-te min puankhiak hilou ding chi hi. Income Declaration Scheme 2016 tungtawn a tax lak a om dingte Consolidated Fund of India paidan zui in, mipite adia zat hiding in Finance Minister in gen a, June 1, 2016 in huai scheme honkhiak pat in om mahleh lawhching tak a zawhsiang hita chi hi.
Official thusuakin agendan in summuhna puankhiaklouh (undisclosed income) etkaina dia kibawl, Income Declaration Scheme tungtawn in Centre government in Rs. 30,000 crore val musuah ding a, huai scheme in a huamkhak te’n government thupiak azuih ziakun tax piak theih zah lakah 45% niamzaw in pe ding uhi. Tunitan a sumnak (income) pelut te’n instalment dan in September 2017 tan in tax pe thei ding uh a, first instalment ah 25 percent, huaipen November 2016 a piak ding, March 31, 2017 tan in 25 percent, adangte September 30, 2017 tan a piak siang ding hi’n gen uhi.
Prime Minister Narendra Modi in Black Money neite kiangah vauna bawl in, September 30, 2016 nung in gawtna khauhtak tuak ding uh chi a, Income Declaration Scheme zahtakloute leng suangkulh a khum hiding un gen hi. Kumlui in gamdang a khawsa India mite kiangah Central government in asummuhna uh puangkhe ding in theisak a, huai hun apan Rs. 4,164 crore vel puankhiak in omta hi. Black money puangkhe tampente lakah Ambit Capital te’n Rs. 30 lakh crore vel nei uhi. Kum 1997 in United Front government in Tax Amnesty Scheme kichi pankhia uh a, huai hunah Rs. 33,000 crore vel puankhiak in om hi.
Tuni in YPA GHQ Hall ah ASHA Convention om
Lamka, Oct-1: Hiangtam Lamka a YPA GHQ Hall ah tuni zinglam in Dist. Health Society, NHM/CCpur saina in Dist.ASHA Convention zat in om a, Chief Guest in Lunminthang Haokip, IAS, DC/CCpur, Chief Host in Dr.Vumchinpau, DFWO/CCpurpanguhi. Imphal apan Imo Wahengbam, State Community Mobilizer & RRC N/E leh Harris, State ASHA Program Manager te’n leng uap uhi.
DC in agenna ah khua/veng tuamtuam a naupang, nupi naupai-te enkai ding a mohpuakna liantak govt in ASHA te pia hi’n gen hi. ASHA-te nasep ding tuamtuam taklang a, singtang ah naupang-te diet hoihtak nezoulou-te govt tawh pangkhawm a diet piakding chih ASHA-te mohpuakna hi’n gen hi. ASHA te’n anasep ding uh hoihtaka semzou uhiam chih kuapeuh ki-enthak chiat ding in ngen hi.
Dr VC Pau in ASHA convention zatna apan nasep ding kipan ngal hi’n gen a, mahni sepna munchiat ah hoihtak asemding, amun mahmah ah census la a, agal apat kuaman lanawnlou ding in theisak hi. ASHA-te lak ah nasem hoihpen-te Award piak hia, maban ah hoihzaw sema ASHA te’n panla ding in ngen hi.
Best ASHA 2016 ah mi 11 leh ASHA Facilitator 1 kiang ah kipahman leh certificate piak in om uhi. Amaute- Town area ah Chalngailien of Rengkai; Saikot PHC ah Caroline Nianghoihching of Gangpimual; Sagang PHC ah Alhing of Siden; Singngat PHC ah Hoilalnei of Tonglon (K); Behiang PHC ah Dimneihmawi of Ngaljang; Henglep PHC ah Neinu Gangmei of Sadukhoinoi; Parbung PHC ah Rotlingzo of Parbung; Senvon PHC ah Rothieng of Tipaimukh; Patpuihmun PHC ah Ramhnai of Kangrengdor; Thanlon PHC ah Espel of Thanlon leh Sinzawl PHC ah Niangkhanvung of Khajang hi uh a, Best ASHA Facilitator in S.Chinglian of Saikot telkhiat in om hi.
ZAA leh VAA in suunthu puang
Pateh nek khelh ziakin lasiam Kim Joycee si
Lamka, Oct-1: Gospel leh gam ngaihla sa a minthang mahmahte laka khat Kim Joycee (27) w/o Kungminlian @Lianboi Shoute of Lailam Veng in pateh (mushroom) nek ziaka sungkhawh in tuzing dak 5:00 velin Langol a Shija hospital ah si a, aluang Oct. 2, 2016 in Lamka hanmual ah kivui ding hi. Innkuante gendan in, Kim Joycee a pasal tawh Imphal a Lamphel Super Market ah khawsa hi uh a, Sept. 29, 2016 nitak meh in pa (mushroom) chikhat panai meh uh a, huai anek akipan khawllou in a sungkhawh hi. Zan in clinic khat ah damdawi nek theih ding dong a, amau drip ana khai uh a, sunuung dak 2:00 velin buaisia in khua phawklou a, a blood pressure (PB) tanpha muhlouh ahih takin RIMS ah paipih uh chih hi.RIMS te’n Shija hospital ah refer uh a, huai ah admit in om hi. Shija hospital ah treatment a piaksawm mahle uh lawhsam in, ICU a ventilator tanpha bulh himahleh phatuamlou a, kidney tanpha fail hi’n gen uhi. Amah kha 5 vel naupai(pregnant) ahih ban ah anau in ngeihlou hiding in gintak thu gen uhi. A pasal bel Syndicate Bank a PO sem hi a, Lamphel a Super Market ah inn luah in a nupa ua khawsa uhi.
Kim Joycee lasiam minthang banah laisiam hi a, adamlai in single album 2 (nih) abawl ban ah album tamtak ah leng tel a,Kut festival, Sangai festival leh adangdang ah performance nei hi. Aman Khawvaiphei Music Award, Lelte Music Award leh ZOLMA ah pahtawina sang a, laisiamna lam ah BA (Edn) NEHU a top 4 ahih ban ah Manipur University ah MA
(Edn) first class in zou hi. A pasal Kungminlian tawh tukum bul in dansiangthou in kiteng ahi uhi. Kim Joycee sihna tawh kisai in Zogam Artist Assn (ZAA) leh Vaiphei Artist Assn (VAA) telin pawl tuamtuam in sunthu puang uhi.
LOCAL NEWS:
Meeting zawh in singnou suan uh
Lamka, Oct-1: Rakesh Balwal, IPS, SP/CCpur in ama’ office chamber ah tuni zinglam in Addl SP-2, SDPO 2 telin Police Station tuamtuam a Officer i/c teng meeting neihpih a, maban panlak dingdan leh nasep dingdan kikuppih hi. Huai zawh in SP’ office campus ah Police Officer-te tawh singnou suanpih hi.
‘Mood Shelter’ hon in om
Lamka, Oct-1: Hope Baptist Children’s Home campus ah tuzing in Lamminlal Simte, SDO/Thanlon in ‘Mood Shelter’ kichi hongkhia a, Rev S. Kaikhanmang, Director of Missions, NTBCA in Pathian kiang ah thumna in lan hi. Mood Shelter ahihleh Th. Jamchinthang Simte, MDC/Thanlon in (late) T. Khupkholian Simte One Day Football Tournament om hun a bawlsak ding achih bawlzawh a om hi’n kigen hi.
Th. Jamchinthang Simte in a genna ah govt apan fund hongpai hilou a, tagah, genthei, nu-le-pa neilou kepna mun ah ama mimal sum seng a Mood Shelter bawlsak hi’n gen hi. Mood Shelter kibawl thak mi tamtak in aphattuampih uh deihthu gen a, huai bawlna ding in DC/CCpur in sikzawl 10 leh cement bag 15 apiakziak in DC tung ah kipahthu gen hi.
EBC Singngat Divn. Kumsim Khawmpi
Lamka, Oct-1: Songtal khua ah zannitak in EBC Kumsim Khawpi kipan a, Pastor Daikhakhup, Pastor H Thangbiaklal,Pastor B Thangngaihmung leh Pastor Chinkhansuan te’n Pathian thu gen uhi. Devotion hun ah Pastor Thangzamang leh Pastor Vanlalhminglian te’n makaih uh a, Oct 2, 2016 sunnung in Seminar hun ah Pastor T. Kamkhanthang in makaih ding a, nitak kikhop tawp in khawmpi zouding uhi.
Police te’n Zebra crossing bawl
Lamka, Oct-1: District Police te’n tunitakin Tedim Road dung mun 3 ah Zebra Crossing bawlin rong nuh uhi. Rayburn College, Sielmat Christian Higher Secondary School leh Salt Brooke School lutna kong ah rong nuh uh a, Rakesh Balwal, IPS, SP/CCpur in School naupangte bitna dia Zebra Crossing abawlsak chihthu kiza hi.
Zillai Sugnu Block hih-hing thak
Lamka, Oct-1: Zillai (Vaiphei Students’ Assn) Gen Hq in tuni’n Standard English H/S, Sugnu (T) ah Zillai Sugnu Block hih-hing thakna (reinstatement) programme om a, huai ah 2016-18 sung makai ding guang uhi. Haominthang Vaiphei, President, Zillai GHQ in office bearer thak-te puangkhia in kichiamsak a, Rev. PK Lianmang, MPCS Sugnu bial in thumsak hi. Huai hun Khatkhotong Baite, President VPC GHQ; Ngamkhopao Baite, VPC K.Sabi Block; Ngamkholal Baite, EM, ADC/Chandel te’n leng uap in thugen uhi.
Zillai Sugnu Block makai thak-te President in Luis Jamkhomang Baite, V/President in Jilpao Baite, Gen. Secy. in Peter Thangkholun Baite, Jt. Secy., Jamkhominlen Baite leh Dominic Lhunkhosei Baite, Secy. Edn & Career Dev. in Ngamminlal Baite, Secy. Statistic in Samuel Douminthang Baite leh Samuel Jamminthang Baite, Secy. Fin.in Bosco Thangpao Baite, Secy. Social & Culture in Francis Seiminngam Baite leh Charmi Baite, Treasurer in Thethem Baite leh Tabitha Baite, Secy. Info. & Pub. in Letkhopao Suantak leh Mangneo Suantak ban ah Secy. Games & Sports in Lalpu Baite leh Peter Tongkai Baite hi uhi.
Dengue Awareness program om
Lamka, Oct-1: Dr. Liankhojam Guite, DMO makaihin tuni zinglam in CMO Mini-Conference hall ah Dengue Awarness thu ah intersectoral meeting om hi. Huai ah Dr.Gojendra, State Malaria Officer & State Nodel Officer, NVCDCP makaih in official bangzah hiam hongtel uh a, govt leh private school-te, NGO-te tel uhi. CCpur Dist.ah vuahtui tamziak in maban ah Dengue natna omthei ding in patauh huai a, Dengnue natna om hun a bangchi kiven ding, bang chi panlak ding chih kikum uhi.
Zotang Dist. Golden Jub. Tour khak
Lamka, Oct-1: Zou Presbyterian Church Synod (ZPCS) , Zotang Dist. in Golden Jubilee football tournament asai uh tuni sunnung in Muallum Playground ah closing ceremony om a, huai ah Chief Guest in P. Tongthang Zou, Special Contractor pangin thugenna leh kipahman pekhia hi. Chief Guest in Zotang Dist. Muallum kithauhpihna in Rs. Rs. 20,000/- a piak ban ah Artist-te Rs. 1,000 chiat pia in, Ebion School, Muvanlai-te Sound system leina ding Rs. 10,000 leng Seinou Guol YC-te Rs. 5,000 pia in thu genna zang hi.
Final Match ah Phaiza Youth Club leh Mankhannuam Memorial Team kimawl uh a, Phaiza YC in 3-0 a zou in champion la a, kipahman Rs. 10,000/- leh runners-up in Rs. 5,000/- sang uh a, Chief Guest in pekhia hi. Huai tournament ahihleh Sept. 10, 2016 in kipan a, team 12 tel uhi.
Covenant School-te ednl. Tour pai
Lamka, Oct-1: G.Mualkoi a om Covenant School aClass VIII-X student-te’ tuni’n educational tour pai uh a, Imphal khawpi sung mun tuamtuam pha uhi. Amau teacher 16 leh student 71 hi uh a, tuzing in Pastor G. Vungsangmung, Local Pastor, PCI (R) Mualkoi in thumna in khakhia a, Kakching Garden, Science Centre leh Museum, War Cemetery, Rose Garden, Sendra leh INA Complex telin mun tuamtuam pha ua, a nitak in hong tungkik uhi. Educational tour ahihleh school khangthu adia masapen hilai hi’n kigen a, student-te’n a thu a thil a zilkhiakte uh a theihsem ding uh tupna paipih uh hidan in leng kigen hi.
ATWU makaih in meeting om
Lamka, Oct-1: All Tribal Women Union (ATWU) makaih tuni’nDorcas Veng, New Lamka a ATWU Office ah nam mamkai tuamuam te’n maban kalsuan dingdan tawh kisai in meeting nei uh a, huai hun ah thu tuamtuam genkhawm uhi. Meeting ah B. Dongzalian Simte, Chairman, Zomi Council; Joseph Lalrothang, President, Hmar Inpui; Vanlalrinliana, President, Mizo People Convention; KG Tungnung, Secy OTMF; Thangzamang, Secy UZO GHQ; Haukholian, Ex-MDC leh JAC-AATB apan palai hunkhawp tel uhi. Huai hun ah makai tuamtuam te’n maban kalsuan dingdan tawh kisai a ngaihdan neihte uh genkhawm uhi.
Namvai chih ding hizaw
Lamka, Sept-30: Paite Cultural Society (PCS) in siatni-phatni a silh theih ding Paite nampuan abawl chih tawh kisai ah L. Nengkhopau, Exe. Director in corrigendum abawlna ah nam vai a zat dia kibawl hidan in taklang a, kuapeuh in theisiam dingin ngen hi.
N. Neihsial, IDAS kaisang
Lamka, Oct-1: N. Neihsial, IDAS(1981 batch) s/o Tinpau of Delhi in Ministry of Defence (Finance) nuaia Defence Accounts Department ah Controller General of Defence Accounts len ding in Ministry of Defence in thusuah bawl hi. N Neihsial ahihleh 1980 in Ccpur Govt College apan Graduate a, kum 1981 a Civil Services (Indian Defence Accounts Service) gelhching in, huai hun apan kum 35 sung sem ta a, akaisanna pen Defence (Finance) adia post sangpen hi’n gen uhi.
Peace & Non-Violence Workshop
Lamka, Oct-1: Glocal Volunteer in Rayburn College, VK Tawna High, Discipleship Theological School leh Centre for Peace Education, Manipur tawh kithuah in tuni’n Rayburn College Auditorium ah Peace & Non-Violence Workshop 1veina nei uh a, zinglam in Rev. Khen P. Tombing, Principal, Rayburn College in hongkhia hi.
Progamme hunsung in Rev. Th. Mangthianlal, President & CEO, Glocal Volunteer in Devotional Talk nei in, mipi paikhawmte muh ding in Non-Violence tawh kisai documentary film lahna nei a, Dr. Leban Serto in Rev. Dr. Martin Luther King Jr. tangthu pansan in gamsung a lemna leh muanna om theihna ding tawh kisai sinsak a, gamsung ah diktatlouhna omte tawh kisai bawldikna dia saptuam in mawhpuakna liantak nei hidan in gen hi. Huai ah Saptuam, Social Orgn,. School leh College tuamtuam apan mi 50 val paikhawm uhi.
Biaksiamlian Trophy:
TFC ten champion la uh
FC Zion te saina a Nghathal playground a ‘The 1st (L) Biak-Siam-Lian memorial Open Football Tournament final match kimawlna tuni in om a, hiai hun V. Hangkhanlian, State BJP President in Chief Guest hihna tawh uap a, Functional President in Nengdouthang, Adviser, FC Zion leh Chief Host in T. Paula, Chairman, VDC, Zion veng pang hi. Final match ah TFC leh (L) G. Hauzalian Memorial Team te kimawl ua, huai ah TFC ten 3-0 a zou in champion la uhi. TFC akipan S. Pau, Minlun leh Jojoy ten goal khum uh a, Champion team in Rs. 20,000+ trophy + certificate sang ua, runners-up in Rs. 10,000/- + Trophy + Certificate sang uhi. Mimal award ah Lalminlun (TFC) in player of the tournament hihna la a, Mangzakhum (TFC) in bestkeeper leh Rama (NKT United) leh Muanlal (TFC) ten top-scorer sang ua, amau cash award Rs. 1000 + certificate sang uhi.
IMPHAL NEWS:
Tax Board Chairman din kichiam sak
Imphal, Oct-1: Raj Bhavan ah tuni zinglam dak 9:30 velin Manipur Governor Dr. Najma A. Heptulla in Manipur Municipality Property Tax Board a Chairman len di’n Sinam Sunderlal Singh, IAS (retd.) kichiamsak a, Chief Minister O. Ibobi, Chief Secretary O. Nabakishore, I. Hemochandra Singh, Minister (Revenue, Forest & Env., Law & Legislative), Md. Abdul Nasir, Minister (Agriculture and Fisheries) banah high ranking officer tuamtuam te’n huai hunzatna uap uhi.
NIT a Dy. Register tenna inn luh
Imphal, Oct-1: Central Bureau of Investigation (CBI) a SP rank khat makaihna in CBI team te’n National Institute of Technology (NIT) a Registrar Laikangbam Dorendro Singh tenna inn tuni’n luh uh chihthu om hi. Thusuakin agendan in CBI team-te zingsang dak 6:30 vel apan Nagamapal Kangjabi Leirak a NIT Registrar tenna inn ah valut in dakkal 6/7 sung gamtang uh a, huainung in NIT Complex a Dy. Registrar office leng luh nawn uh a, thiltung tawh kisai theihchet hikeimahleh NIT a financial leh staff lakna tawh kisai a diklouhna om-te leh Dy. Registrar’ neih-le-lam theih tupna hiding in gen uhi. Akigendan in Ministry of Human Resource Development, Govt. of India in NIT 10 a bawl thak na uah Manipur NIT leng tel kha a, huai ah Aug 1, 2010 in session masapen a kipat banah technical education lam tawh kisai a sinsakna hoihpen om theihna dia Central funding piak hi’n leng taklang uhi.
Gari 2 halsia
Student poll tawh kisai in buaina
Imphal, Oct-1: Govt. Hr. Sec. School khat astudent body election tawh kisai in Keishampat junction ah tuni nitaklam dak 4:30 velin buaina om a, student-te zat Activa gari 2 halsiat in om hi. Huai thu tawh kisai in DM Compound a All Manipur Students Union (AMSU) office ah press conference om a, Sanasam Subashchandra, President, AMSU in media-te tawh kimuhna hun ah buaina bawl-te DESAM gum-te ahihdan taklang kawm in ‘pre-planned attack’ hi’n gen hi. Keishampat a DESAM office ah leng press conference khat neih in om a, DESAM a Gen. Secy. Edison in Activa gari 2 halsiatna tawh kisaiDESAM-te ngawh ahih uh nial a, huaimun kianga omte gamtatna hidan in gen hi. Huai thiltung tawh kisai AMSU member khat gendan in, CC Higher Sec. ah post awng 5 hukdim na dia election hun ah AMSU-te’n seat 3 leh DESAM-te seat 2 ngah uh chi a, election hun in leng DESAM-te lungkim lou in student leh teacher-te vau uh chi hi. Election result puankhiak zawh in AMSU candidate khat in telching ahih lawm kawm in innlam zuan a, DESAM office leh amah paina akibat khak ziak in DESAM office gei ah DESAM volunteer te’n khoih in gari 2 halsiat sak uh chi hi. Huai tawh kisai DESAM pawlin tuni akipan ni 3 sung a hilhchetna a bawl ding in AMSU te’n theisak uh a, theihsakna apiak uh ngaihsak ahihkeileh mawhna nei-te matkhiakna dia police-te kiang tut hiding in gen uhi.
CEO in Democracy Van khahkhia
Imphal, Oct-1: Vivek Kumar Dewagan, Chief Electoral Officer (CEO) Manipur in Secretariat South Block ah Systematic Voters’ Education and Electoral Participation (SVEEP) Campaign tawh kisai in tuni’n Democracy Van khah khiahi. Manipur a dia State SVEEP Core Committe tawh kisai a meeting masa pen ding Secretariat South Block a Conference hall ah tuni’n om a, maban Assembly Election 2017 ding tawh kisai a SVEEP tungtang, state level ah Govt. dept, educational institution, Youth Orgn leh CSOs palai te’n Core Committee tawh kithuzak in Nodal Officer (SVEEP) te’n CEO huh ding banah District level ah SVEEP plan lawhchingna dia DMs/DCs te’n pan alak ding uh chi’n genkhawm uhi. SVEEP Core Committee te’n Manipur pumpi ah SVEEP Plan enkai ding uh a, Election dept. in voter 100% te’n vote a khiak ding uh chi’n tupna nei uh a, voter 90% te’n vote a khiak ua leh lawhchinna khat hiding in gen uhi.
International Day of Older Person
Imphal, Oct-1: Social Welfare, Dept-te saina in Patsoi Part-II community hall ah tuni’n ‘International Day of Older Person 2016’ zatna om a, Chief Guest in AK. Mirabai Devi, Minister (Social Welfare & Co-operation), Functional President in Dr. K. Sobita Devi, Commissioner (Women)pang uhi. Guest of Honour in S. Sarat Kumar Sharma, Chairperson, Commission for protection of Child rights; Dr. R.K. Kumarjit Singh, Commissioner (Disability); J.C. Ramthang; Principal Secy., Social Welfare; J.C. Ramthanga; L. Nabakishwor Singh, IAS, Director, Social Welfare leh S. Naba Singh, Dy. Secy, Social Welfare-te pang uhi. Huai hun ah Chief Guest in Ministry of Social Empowerment and Justice nuai a Imphal East ah Old aged home 20, Imphal West a 4, Bishnupur ah 1, Thoubal ah 6, Senapati ah 1, CCpur ah 2, Tamenglong ah 2 telin Manipur ah Day-care centre 18 om hi. Huailou in Manipur ah National Social Assistance Programme tungtawn in kum 60-79 kikal a upa mi 61,935 te’n kha teng in Rs. 200 mu uh a, kum 80 tunglam mi 6225 te’n Rs. 500 chiat mu uh chi’n gen hi.
TUNI THUPI:
“Haksa sa unla, lungkham unla, kap un; na nuih uh lungkham suak henla, na kipah uh nguina suak hen.” – Jakob 4:9
EDITORIAL:
Pateh ziaka buaisiatna
Pateh (mushrooms) i chih singtangmite adia i mehlim penpen khat hi a, India adia Non-Vegetarian leh Vegetarian-te’ adia leng mehlim ahihdan kibang hi. Huchih dungzui in pateh a demand leng sang mahmah hi. Tuaziak mah leng ahiding a, Government in mushroom plantation hon pibawl ua, pateh bawlkhiakna (artificial mushroom) ding tanpha in sum ahunkhop sanction sek uhi. Ahi a, pateh ziakin eilawi in buaisiatna tuamtuam kituak sek a, lei apan hong poukhete inek ziaka kibuai hia ahihkeileh, abawltawm (artificial) inek khak leh leikhak ziak hia chih ithei kei hi.
Eimi bel atangpi in Non-Vegetarian ihi uhi. A om-om netheite ihi ua, iduh pe’n uh bel sa mah hiveve hi. Vaite’ laka leng akulmut taktak Vegetarian te’n aktui tanpha nelou ua, himahleh, lei apan piangkhia pateh telin meh chi tuamtuam duh mahmah uhi. India a singtangmite’n lei apiangkhia meh chi tuamtuamte ikipahpih mahmah ua, anteh-louhing ngaina mahmahte ihi uhi. Vaite’ lak ah sahing leh aktui tanpha nelou Vegetarian te’n leng tua mah in huan leh lou apiangkhia meh hing chi tuamtuam lunggulh uh ahihdan chet in om hi.
Huchikawm kalah, bangziaka eilawi laka lei apan piangkhia pateh chi tuamtuam ‘guihna’ hichi tam lawmlawm ahi ding chih ngaihsuttham ching hi. Kum tamtak paisa in pateh gui chih tungtang Newspaper ah hong suak mun mahmah a, a na nungpen dingin zanzek in numei gailai khat in pateh nekhial in si hi. Amah ahihleh, lasiam ahihbanah lehkha lam ah leng mi suanhuaitak hi a, poi petmah chih louh gending omlou a, suunhuai mahmah hi.
Pateh nekkhelh ziaka hichi sihsih mawk chih pe’n bang gu (poisonous) om zouzai adiam chih theih uthuai hi. Mihingte’n i sih hunding banah idam kum ding ithei kei ua, Pathian seh bangbanga thil paizel ahihdan bel ihaihkei hi. Technology hia ahihkeileh scientific tawh kisai a hiai tungtang kisinsakna kipiak a poimawh zezen diam chih ut huai hi. Pa/ Pateh nekkhelh ziaka damdawi inn a puaklut a om, damlouh lawh chih leng adangdang case om touden a, hiai in mi nautang hon lungphawng sak mahmah hi.
Mi tamtakin a genna uah, Pa/Pateh himhim ngari ahihkeileh sathu tawh ihuan khop nak ua leh huai in itaksa sukhalou ahi chi ua, hiai pe’n leng medical proof om tuanlou bang hi. Hichibang case hong om toutou ding ahihna ah, Chief Medical Officer (CMO) makaih a mun tuamtuam ah awareness program neihngal dingin kilang hi. Pateh nuai ah pa chii tamtak om a, pa chiing tuangduai, pa naai, pa vom, pa paak, pa tokto nol leh adangdang om a, hiaite tawh hiaite ineek khop leh mihingte’ adingin lauhthawnghuai chihte tangkoupih ngaileh kilawm in kilang hi.
Tamtakte gendanin, hiai pateh ‘psilocybin mushrooms’ ahihleh chi 200 bang valzou ahi chi ua, eilawi in bel ut dandan in salads, malta gawi leh atuamtuam adingin ihel sek uhi. Atangpi thu en zual le hang, pateh nekkhak ziaka buaina nei khempeuh (hallucinogenic effect) te minute 20-30 kikalin kilang khe ngal ua, a lawkhe theite hampha ua, alaw theiloute buaise nak khem uh chih hilai hi. A ngaihtuahna uh leng buai tangpi a, a mi muh uh chianglou in a taksa uh pumliin chi uhi. Medical tawh kisai a Doctor siam khenkhat te’ gendanin, pateh kichi lim mahmah a, ahihziakin, nek tamluat pe’n itaksa soina leng hi nuam mahmah chi leuleu ua, pateh kichi nekkhelh baihsam mahmah a, a nekhial vanglakte tamtak a nuui zawngin pai ua, himahleh, angaihtuahna uh hamhaih (confuse) ahi chi uhi.
Pateh nekhial peuhmah atangpi in a lu uh nna ahi chi ua, medical term a gen didan zaw theitam khang himahleh, hibang thil igam ah atam luat mahmah tak ziakin, pateh tawh bangbang ki tuaklou hiam chih mipite’ kiangah kitheihsiamna piak poimawh mahmah hi. Tu in pateh hong tam deuhdeuh dinga, tua hun chiangin pateh ziaka case hong kibehlap sem dingin kilang hi. Pateh leh aktui ki tuaklou hia, ahihkeileh pateh mindeuh a huan poimawh hiam chihte telin medical department in mipi lakah pilvanna ding thupil hon luikhiak uh poimawh sakna om mahmah hi. Mimal pilvan louhna ziak hiam ahihkeileh igawl in aduh iva chep cheuh ziaka sihna tanpha hon tunthei ineek apan guihtheih tamtak om hita e chih hon ngaihsun sak hi.
No comments:
Post a Comment