HEADLINES:
MU reservation thu a kiphinna paizom zel
CCpur, Senapati leh Ukhrul ah tuni'n Rally pai uh
Lamka, Oct-26: Manipur University (MU) a reservation tawh kisai ATSUM leh MUTSU makaihna singtangmi student-te’n kiphinna aneih uh support in tuni’n CCpur joint student body- ZSF GHQ, KSO/CCpur, HSA Jt. Hq/CCpur leh MZP, Manipur makaih in school tuamtuam 13 akipan student te’n rally pai in DC/CCpur tungtawn in India President ading memorandum pia uhi. Rally a paite CCpur College ah kipankhia in Tipaimukh raod- Thangzam road- Tedim road- 27 Sector AR road zui in DC/CCpur office tan pai uh a, huai hun ah ATSUM President Joseph R. Hmar leh K. Zou, Convenor, Zo people’s for human Rights & Empowerment ban ah MUTSU member ahunkhop leng tel hi.
MU reservation tawh kisai Central Educational Institutions (Reservation in Admission) Act. 2012 dungzui in ST quota 31% bikhiah himahleh MU academic council te’n CEI (Reservation in Admission) Act. 2006 in a bikhiah 7.5 % zuih asawm ziakun singtangmi student-te’ kiphin uh a, ATSUM leh MUTSU gupna in Oct. 21 in Chandel ah student body-te rally pai uh a, Oct. 22 in in Tamenglong dist. ah, tuni’n Senapati, Ukhrul leh CCpur ah om hi’n kigen hi.
NPCB/CCpur saina in 17th World Sight Day zang
Lamka, Oct 26: Synod Hal ah tuni’n Programme for Control of Blindness (NPCB)/CCpur saina in ‘Universal eye Health, Prevention and Control of Emerging Eye diseases’chih thupi zang in 17th World Sight Day, 2016 zang uh a, Chief Guest Dr. Kim Simte, CMO pang in World Sight Day, 2016 hong hi.
Aman agenna ah tuni ni poimawhtak hi a, taksa pumpi lak ah mit poimawh petmah hi’n gen hi. Mitlaimungou (cataract) ziakin mitdel tam a, kuapeuh in mit kepbit poimawh hi’n gen hi. Nek-le-tak hoihtak nek in mit kembit a, Vitamin ‘A’ taksap ziak in mitdel leng tam hi’n gen hi. Piching leh tuailai te’n laizial tepchiang in mitlam buai omthei a, kuapeuh in laizial teplouh ding, student leh tuailaite’n akheng vala computer leh mobile zat ziakin mitlam buai tam a, pilvan poimawh chi hi. Zunkhum (diabetis) ziakin leng mitlam buai thei a, ahuntaka kikep poimawh ziakin kuapeuh in mit check-up zelding in chial hi.
Dr. VC Pau in World Sight Day message a genna ah kumteng in Oct kha 2na in World Sight Day kizang a, tukum fund zekai ziak in Oct 26, 2016 a kizang hi’n gen hi. Natna tuamtuam ziak in mitdel omthei a, naupang-te Vitamin ‘A’ taksap ziak un mitdel omthei hi’n gen hi. Khawvel pumpi ah 18 million vel mitlaimungou (cataract) ziakin mitdel (blindness) om uh a, India ah cataract ziakin mi 62.6% vel mitdel hi’n gen hi. WHO in a sui dan in khawvel a naupang mitdel teng lak ah Asia leh Africa a 75% tungzou hi’n taklang a, mitdel kichi ahuntak a etkol hileh 80% hihdam theih hi’n gen hi. Program bel mi poimawh tuamtuam in leng uap uhi.
PM Modi in World Bank’ report enkai di’n ngen
New Delhi, Oct-26: Prime Minister Narendra Modi in Central govt. nuaia Secretary leh State government nuaia Chief Secretary-te kiangah ‘Ease of Doing Business’ tawh kisai World Bank enkai ding in ngen hi. Government nasepna bawlhoih tuak omte suikhe dinga theisak kawm in, akisaipih te’n tunung kha 1 sung ngei report pe ding in ngen a, Cabinet Secretary in huai report-te suizui ding in thupiak bawl hi.
World Bank in Economy Ranking tawh kisai ‘Doing Business 2017’ kichi report abawlna uah, India in leitung a economy khangtou lel 190 lakah 130na luah a, leitung gam tuamtuam a local firm leh company te’n a etlahpen lak uah India in dinmun niamchik luah hi’n kigen hi.
New Delhi ah tuni’n PRAGATI (Pro-Active Governance and Timely Implementation) tungtang monthly meeting neih in om a, huai hunah central government nuaia programme leh scheme tuamtuamte dinmun genkhawmna om hi. Prime Minister in huai huna agenna ah project leh scheme sepkhiakna akipat baih theihna di’n Union Budget puaklutna leng ngeina sang a kipan baih zaw ding hi’n gen a, Labourer & Employees Provident Fund beneficiary tamtakte lungkimlouhna ngaihkhawk huai hi’n leng gen hi. Sardar Patel Jayanti tawh kisai in, state leh central govt. nuaia department chih in, amau website a huai tungtang suahkhe ding in Prime Minister in ngen a, Secretary leh Chief Secretary te’n government paidan, tuasang a thukzaw a enkai ding in chial hi.
Atal Mission for Rejuvenation and Urban Transformation (AMRUT) tungtawn in gamsung mipite kianga tuisiang piak hiding in Prime Minister in gen a, AMRUT in a huamkhak, khawpi 500 ah tuisiang dawn ding kidaih hiam chih report pe ding in Secretary-te kiangah theisak hi.
LOCAL NEWS:
CEO official te’n Lamka phading
Lamka, Oct 26: Chief Electoral Office, Manipur apan Biren Singh, Statistic Officer makaih in mi 5 in Oct 27, 2016 in Lamka hongpha ding uhi. Amau zinglam dak 11:00 in DC office ah Election tawh kisai Data Entry Operator teng meeting neihpih ding uh a, sunnung dak 1:00 in AERO (SDO/BDO-te), ZEO, CMO, Dist. Social Welfare Officer, PO (ICDS), Election official-te meeting neihpih ding uhi.
Numei naupang rape tute Jail ah koih
Lamka, Oct-26: Zion Veng, New Lamka a om numei naupang kum 10 vel Oct 14, 2016 in G. Thongliansang (37)s/o G. Kamkhanthang of Zion Veng in rape a, Singngat ah Oct 15, 2016 a numei naupang kum 7 vel ding mi rape-tu Nangmuanlal (23) s/o L. Suangchinkhup of Tangnuamte tuni’n Police te’n Special Judge (POCSO) ah pawkhia uhi. Special Judge (POCSO) in numei naupang rape tute Jail ah koih ding in thutankhum a, Police te’n Jail ah koih uhi. Mi 2 te Jail ah omnung kha 3/4 nung in trial kipan ding a, huai sung in Police te’n charge sheet submit ding uh hi’n kigen hi. Trial sung in Special Judge (POCSO) in thukhenna bawl ding a, mi 2-te bail khiat ahihkei leh Special Judge in kum hiai zah sung Jail tangding uh chi’n thukhenna bawl ding hi’n kigen hi. Mi 2-te tung ah Police in FIR No.4 & 5 (10) 2016 WPS-CCP U/S 376 IPC & 4/8 POCSO Act.2012 registered uhi.
Ni 14 nung in siluang tawhkhiat hiding
Lamka, Oct-26: Dist. Magistrate/ CCpur in Sector 176 (3) of Cr.PC 1973 tungtawn in Oct 14, 2016 vel asi Pamsialching (22) w/o Paukhawmlal of Thingkangphai village Oct 29, 2016 in a kivuina han akipan tawhkhiak banah forensic expert te’n post-mortem bawl dingin Police-te’ phalna pia hi. Huai ah Jangminlen Lupho, Executive Magistrate/CCpur in Police-te kithuahpih ding hi. Pamsialching’sih tawh kisai apa Kamsong of Palkhuang village in a tanu lupna gei ah awklum chih thu ah Oct 21, 2016 in Police ah complain bawl a, Police te’n UD Case No.6/CCP-PS/2016 U/S 174 Cr PC registered in siluang ni 14 nunga pholhkhiak hiding hi.
CCpur Dist. quota 53% in kiam
Lamka, Oct-26: DC/CCpur apan kizadan in Indian Oil Corpn (IOC) te’n CCpur Dist. S.K Oil quota 152 KL a piak uh 53% in hihkiam uh a, Oct quota apan 72 KL kia hongpia hi. SK Oil CCpur Dist. quota pen Dealers te’n kem phawt uh a, Nov. 2016 quota tawh hawmkhawm hiding hi’n gen hi. Govt in Nov, 2016 quota a issue hun in Oct & Nov 2016 quota hawmkhiat hiding a, Sub-Dealers, NGO leh Security, etc. te’n lading in theisak hi. SK. Oil man a khan ziakin Oct. 2016 quota apan litre 1 ah govt rate in Rs. 18 hiding in DC/CCpur in gen hi.
Meter box 13400 activate
Lamka, Oct-26: Electricity Deptt. (MSPDCL)/CCpur te’n khawpi sung ah zan tan in electric pre-paid meter box 15400 thuah (installed) uh a, huai lak ah 13400 activate uhi.
Kut T-Shirt leitheih ding
Lamka, Oct-26: Chavang Kut 2016 Celebration Committee makaih in Oct. 30- Nov. 1, 2016 sungin Tuibuong a Peace Ground ah ‘Chavang Kut’ zatna om ding tawh kisai munchih a omte’n lawhchingtak a Kut zat ahihna dia thumna phawk dingin celebration committee in ngen uh a,Kut zatna ah teltuam Manasseh suan tuamtuam a om tribe 70 val-te kimuhkhawmna ding ahih tawh kiton in ki-itna leh kipumkhatna hoihzaw sem omtheihna dia kuapeuh in a thaka panla di’n leng ngen uhi. Huchikal ah Kut Committee in fund drive nadia t-shirt abawl uh Tuibuong a Sumkong Kaimun ah Rs. Rs. 300/- piak in adeih te’n leitheih ding hi’n kigen hi.
Lanva Lei bul ah welcome gate bawl
Lamka, Oct-26: YPA New Lamka Block in Lanva lei bui a ‘welcome gate’ bawl sawm in tuzing in nasep pan in a khuam tung ding uh a, zawh baih hiding in kigen hi. Welcome gate bawlna din phatuamngai te’n sum a thawhte uh zanga nasep pat hi a, kal 1/2 zawh in welcome plate thuah hiding a, asandan feet 17 leh availam feet 30 asau hiding chi’n S. Manlian, Block President in gen hi.
NYK in kimawlna vanzat hawm
Lamka, Oct-26: Nehru Yuva Kendra (NYK), CCpur in centre apan youth club tuamtuamte a ding kimawlna vanzat tuamtuam hongpai-te tuni sunnung in Tuibuong a office ah hawmkhia uh a, huai ah MHJU nuai a om Daily News editor-te telin vanzat pekhia in hasotna thu gen uhi.
NYK ahihleh Ministry of Youth Affairs & Sports nuai a autonomous body khat dingin India in Silver Jubilee amuh kum 1972 a dinkhia hi a, Manipur ah 1981 kum velin implement hidan in kigen hi. Dist. a NYK nuai a block 10 apan affiliated youth club/team 40 val kiang ah vanzat tuamtuam - football, volleyball + net piak hi uhi.
Auto leh Yamaha FZ kiphutuah
Lamka, Oct-26: Khomawi lei (bridge) ah tunitak dak 5:00 velin D. Vaison akipan Lamka lam zuan Diesel Auto (Regn. No MN02B/0543) leh Lamka lam apan Tollen khua zuan Yamaha FZ (Regn No. MN02B/0091) kiphutuah kha uhi. Diesel Auto a tuang mi 3 leh Yamaha atuang 1 liam uh a, dist. hospital casualty tut himahle uh a serious lua omlouh ziakin dressing bawlzawh in paisak hi uhi. Diesel Auto ahihleh D. Amos Paokhothang (19) s/o Seipao of D. Vaison in ahek hi a, asung ah Hedim ((43) d/o Thanggin of B. Vengnom leh Lhinneichong (36) d/o Thangkhogin of Leimatak tuang uhi. Yamaha bel Haopu (28) s/o (late) Paolam of Mongjang, Sadar Hills tulel a Tollen khua om in ahek hi a, anung ah Seiginlal @Lalboi (22) s/o Paokam of Mongjang tuang hi’n kigen hi. Yamaha amailak sezek a, Diesel Auto lamlian sika kia in culvert tawh khoubang kikal ah kilumlet in om hi. Gari tam ziaka kipelbuaikha in tuahsia uh hi’n kigen hi.
TSA Kangvai block hongkhia
Lamka, Oct-26: Thadou Students' Assn. (TSA)/CCpur Branch a President Thangboi Baite makaih in zan in Ukhatampak khua a INA Memorial H/S ah TSA Kangvai block honna om hi. Huai ah kum 2 sung TSA Kangvai block vaipaw ding tel uh a, President in Thangminlun telching uhi. Vice President- Mangcha, General Secy. Lunminlal, Treasurer- Hoishi, Education & Statistic Secy.- Ginmang, Inf. & Pub.Secy- Thangkhohao leh Cutural Secy.- Lulun hi uhi. Makai telching thak teng Area Pastor Rev Sehkhojang, Ningthi Pastorate area in Pathian kiang ah thumsak a, Michael Lamjathang Haokip, President TSA Bengaluru in hasotna thugen hi.
MO i/c te meeting pih
Lamka, Oct-26: Dr. Kim Simte, CMO/CCpur in tuni’n CHC leh PHC a Medical Officer i/c teng meeting neihpih a, MO i/c te kiang ah staff om zah, staff kidaih hia? kidaihlou chih houlimpih in maban panlak dingdan kikum uhi.
Mrs Lhilhing Mate in Ph.D ngah
Lamka, Oct-26: Mrs. Lhilhing Mate w/o Dr. Jangkholun Mate of Gotengphai Village, Saiton area (CCpur) in tuni’n North Eastern Hill University (NEHU), Shillong ah Adult Education tungtawn in Ph.D ngah hi. Aman Dr. Bishnuprasad Sahu panpihna in thesis "A study of total literacy campaign in CCpur Dist. Manipur” chih gelh hi.
Mrs. Lhilhing bel Manglun Haokip’ tanu hi a, March 21, 1982 in piang a, kum 1999 in Nagaland Board of Sec. Education nuai ah class X passed hi. Kum 2001 in Morning Star College, Meghalaya Board of Sec. Education ah class XII passed a, kum 2004 in NEHU nuai a Women College ah BA zou a, kum 2006 in NEHU nuai ah MA (Education) zou in kum 2016 in NEHU nuai ah Adult Education tungtawn in Ph.D ngah hi.
SP in suty la, Addl. SP (Ops) charge pia
Lamka, Oct-26: Rakesh Balwal, IPS, SP/CCpur in tuni apan ni 10 sung suty la in akhua uh J & K zuan a, Addl SP (Ops) H.Balram, MPS kiang ah charge pekhia hi. SP in asungkuante pisawm hi’n kigen a, November 3, 2016 in Lamka hongtungkik ding hi’n kigen hi.
Antang lak theihna din RO lak ngai
Lamka, Oct-26: DSO (CAF & PD)/CCpur in National Food Security Act (NFSA) tungtawna Rationing Agent-te’n antang lakkhiatna ding Release Order lading in theisak hi. Oct 28, 2016 in Parbung A/C, Thanlon A/C leh Henglep A/C hiding a, Oct 29, 2016 in Saikot A/C, Singngat A/C leh CCpur A/C hiding hi.
SUUNNA:
Thuangnian @ Niangtawi (79) m/o T. Dongzasuan of Chiimtung Veng, New Lamka tunitak dak 6:25 velin zunkhum (diabetis) in si a, Oct 27, 2016 in YPA hanmual, New Lamka ah kivui ding hi.
D. Tualzakam (52) h/o Lhimpui of Paite Veng, Imphal tuzing 4:00 velin Imphal Hospital ah kalna in si a, aluang Vengnuam, New Lamka ah hong kipua in Oct 27, 2016 in YPA hanmual, New Lamka ah kivui ding hi. Amah Pastor D. Kamchinmang, Local Pastor EBCC Hiangtam Lamka sanggam ahi hi.
IMPHAL NEWS:
Gov. in Annual Freshers cum Literary & Cultural Meet uap
Imphal, Oct-26: Imphal a Tamphasana Girls Hr. Sec. School ah tuni’n Annual Freshers cum Literary & Cultural Meet-2016 zatna om a, huai ah Chief Guest in Governor Dr. Najma A. Heptulla pang hi. Functional President in I. Hemochandra Singh, Minister pang a, Guest of Honour in Smt. O. Landhoni Devi, MLA-te pang uhi. Huai hun ah Governor in student te’n education banah singing, dancing telin extra curricular tuamtuam ah akigolh uh tawh kisai in kipahpih a, student te’n a hinkhua uah education poimawh pen a koih din theisak a, gam khantouhna dia education in dinmun poimawh tak a let ziak in a kisaikhak pih teng in education paidan subuai lou ding in ngetna bawl hi. Landhoni in nidang lai bang a nu-leh pa te’n numei leh pasal tungtang khentuamna a neih nawn louh ziak un tulai a numei-te hampha uh a, tunung a khangthak ding-te nu ahih ding ziak un siamsinna piak ding banah a phak tupna uh tangtun na dia lampi dik zui ding leh hobby ding a sports la ding in theisak hi. Hiai hun school tuamtuam a Principal, Education dept. a officer leh mi tuamtuam te’n uap uhi.
Civil Aviation Minister in hongpha ding
Imphal, Oct-26: DoNER Minister Dr. Jitendra in ni 1 paisa a Imphal honphak hun in Manipur ah Mobile Air Dispensary patkhiak ding a gen nung in Civil Aviation Minister Ahok Gajapathi Raju in Nov 3, 2016 in Imphal hongpha ding a, huai hun ah state govt. tawh helicopter tungtawn a regional connectivity patkhiak tungtang gen khawm ding ua gintak hi a, Udan scheme nuai ah MoU suaikai maithei uh hi’n gen uhi. Civil Aviation Ministry a top official 6 in Aviation Minister hon zui ding uh hi’n kigen hi. Huai banah Aviation Minister in Manipur hongphak ding ziakin Imphal leh Aizawl kikal ah Air India Service omsun leng Oct 30, 2016 ni apan service khawlsak himaithei a, huai tungtang Ministry kia in thei a, Mizoram CM in leng Air India service khawlsak ding tungtang ngaihtuah thak din ngetna ana bawl hi’n leng gen uhi.
Rural Media Workshop
Imphal, Oct-26: Press Information Bureau (PIB) Imphal-te saina in Manipur Press Club ah tuni’n “One-day Rural Media Workshop” om a, huai ah khuallian in K. Radhakumar, Commissioner of Information and Public Relation (IPR) pang in workshop hongkhia hi’n gen uhi. Functional President in K. Meghachandra, Director, IPR pang a, Guest of Honour in Manibabu Likmabam pang hi. Huai hun ah K. Radhakumar in media-te adia workshop leh awareness programme sai zel ding poimawh chi a, media te’n govt. nuai a flagship leh welfare programme tuamtuam-te kichiantak a theih uh ngai a, “Make in India” leh “Made in India” banah “Look East Policy” leh “Act East Policy” kibatlouhna leng a theih ding uh hi a, huai ahihkeileh mipite’n diklou tak a let kha theih uh a, media fraternity te’n balance reporting leh ‘Media and Ethics’ a zui ding uh chi’n gen hi.
Police te’n ‘Lagao’ tawh kisai in drive pan
Bazar ah gari lutsak hilou ding
Imphal, Oct-26: Imphal West District Police te’n gambling (Lagao) doudalna ding in drive pan uh a, huai hun ah dice sets 220 leh pieces 39 mankhia in Nov 1, 2016 tan drive sunzom ding hi’n gen uhi. Huai tawh kisai in Imphal West District Police-te Conference hall ah tuni’n press conference om a, huai ah N. Herojit Meetei, IPS, SP/Imphal West in Imphal district sung a mun tuamtuam ah dice hunkhop mankhia uh a, kumlui in leng sets 300 leh pieces 28 mankhia uh a, gambling kimawl pen dan bawhsiatna ahihziak in mipite kimawl lou ding in theisak hi. Aman a genzelna ah Commando Unit-te telin Police Officer teng kiangah gambling kimawl doudalna dia drive pan din thupia a, gambling kimawlna a kizang dice mankhia Officer-te reward (kipahman) piak hiding a, Singjamei Police Station kia in leng dice set 92 mankhia uh a, Ningol Chakkouba festival zawh chiang a dice-te hihsiat hiding chi hi.
Huailou in Ningol Chakkouba ding tawh kisai a mipi khualna in Oct 29 - Nov 1, 2016 tan in Khwairamband Bazar, Thangal Bazar leh Paona Bazar-te ah zinglam dak 7:00 apan nitak dak 6:00 tan gari lut ding kham hiding a, gari gute, pick pocket leh sualna tuamtuam apan mipite pilvang ding a theihsak hi’n leng gen uhi. Hiai hun Th. Vikramjit, Addl. SP (Ops), Dr. S. Ibomcha, Addl. SP (L/O) leh Police officer tuamtuam te’n uap uh hi’n kigen hi.
Miss Kut 2nd Screening om
Imphal, Oct-26: District Level Chavang Kut Committee, Sadar Hills nuai a Miss Kut Sub Committee-te saina in Kangpokpi Community Hall ah tuni’n Miss Kut 2nd Screening om a, huai hun ah contender 18 te’n jury 6 leh audience-te mai a ramp tungah a siamna uh pulakna nei uh a, modern dance contender leh songster adia screening bawl uh hi’n leng kigen hi. Akigendan in Kangpokpi a Thomas Ground mun ah Nov. 1, 2016 nitak in contender 17-te Miss Kut title la ding in kidem ding uh a, title tawh cash prize Rs. 50,000 paikhawm ding hi’n leng taklang uhi.
Speaker in langva hawmkhia
Imphal, Oct-26: Manipur Legislative Assembly a Speaker Th. Lokeshwar in Khundrakpam Kendra Development Committee tungtawn in Khundrakpam A/C a 1/2 Molkon a innkuan 43-te kiangah langva hawmkhia hi’n gen uhi. Huai tawh kisai in Molkon Village Committee a Gen. Secy. Namarai in a genna ah local MLA Th. Lokeshwar in langva a hawmkhiak banah Community hall khat bawl in a vangkim in health camp sai a, huai teng ziak in Molkon village te’n local MLA maban hun ah lawhchinna a ngah ding deihsak thu taklang uhi.
TUNI THUPI:
“Huchi’n, numei in, singgah nektheih ahi chih leh, mihiptak ahi chih leh, mi pilsak ding a singgah etlahhuai ahi chih a theih in a gah khenkhat a lou a, a neta; huchi’n, a pasal kiangah leng apia hi, aman leng a neta hi.” – Genesis 3:6
EDITORIAL:
Numeite’n pasalte phalou ding?
India gamsung telin leitung mun tuamtuam ah tulai in numeite hat mahmah in women’s reservation tawh kisai naktakin tangkoupih uh a, numei leh pasal siamtu kibang ahi chih vekin United States Presidential election om ding tawh kisai inleng numei candidate Hillary Clinton hat lel hi. Amah ahihleh, US President-lui Bill Clinton zi leng leng hi a, tua kia hilou in US adia mi poimawh mahmah banah Secretary of States (Prime Minister) leng ahi hi. Numei ahihhang in pasal sangin a ngaihtuahna khauhzaw atheih hi a, gam tuamtuam tawh kizopna thuktak leng nei ahi hi.
Himahleh, telsuimi tamtakin a suikhiak danun, leitung gam tuamtuam ah numei leh pasalte’ ngaihsutna a kizopna tuahna ding hun sawt mahmah lai a, Women’s rights kichi hat leleng ngaihtuah a kibat hunding gamla lai chi uhi. Adiakin nek-le-tak zonna tawh kisai in ‘economic equality’ kichi kum 2186 in apiangkei ding chi uhi. Nidang hunin bel China, Sri Lanka, India leh gam tuamtuam in numeite atuambawl in nakpitakin ana soisa uh a, numei leh pak tehkhitna thu in thu tuamtuam ana puangzak ua thupil (proverbs) hunkhop leng ana bawlkhia uhi.
Numei leh pasal kal kideidanna (gender gaps) in kumzabi (century) tanpha uap a, ahih ziakin, India ah kikhenna (change) chi tuam mahmah hong om ziakin betdaih theihin hong om vanglak hi. World Economic Forum thusuak danin bel tuapan kum 170 tanin numeite leh pasalte’ ngaihtuahna kikim (equivalent) theiding chipan uhi. Telsuimite’ gendan a dikkei i chikei a, i pompih lua chihna ding leng a om tuankhol kei hi. Tulai in numei laisiam i gam ah pumdimta a, nidang in numei i chihte tuitawi ding, buhsu ding, ann huanding ahihkeileh, inn nna tuamtuam a sepkhit nung chiang ua loukuan dinga isawl uh ahi hi.
Numeite’n ahihleh tuni chiangin nuamsa law mahmahta uh a, inn zutna dingin company in abawl uh innzutna zang ziahziahta uh a, annhuan na dingin Gas zang uh a, puansawpna dingin washing machine zangin tuitawi ngaita lou in inn ah tui hong kai a, puannawtna dingin meihol ngaita lou in electric tungtawnin puannawt ta uhi. Numeite’ ngaihtuahna leh pasalte’ ngaihtuahna tua pan kum 118 nungin kibang panding chi a telsuimite’n a genkhiak theih uh thil lamdang leng hi a, ‘annual gender gap index’ tungtawn a a etkhiak uh hingei dingin leng gintakhuai hi.
Pasal-te leng Pathian bawl hi a, numei-te leng Pathian bawl ahi chih Laisiangthou ah i muthei hi. Eden huan ah Adam leh Evi om a, Pathian in Eden huan laizanga om singgah nektheihlouh a chih om a, Adam leh Evi in huai anek ua pan khelhna hong kipan chih ahi. Laisiangthou sinmi leh siam hikei mahle hang, huai hun apan leitung ah numeite’ vuallelhna hong kipan toutou ade aw chih ut huai hi. Tuni chiangin numeite nuaisiahna aziazia omta ade aw chihin om hi. WEF in a suidanin Iceland leh Finland gamte ah numei bawlsiatna nasa mahmah a, himahleh, siamsinna (education) lam ah khanglou mahmahta uh chi uhi. Norway, Sweden ahihkeileh Rwanda ah leng economy telin lam tuamtuam ah numeite khanglou mahmah uh a, ahihziakin numeite’n pasalte’ ngaihtuahna aphakna ding uh kum 100 val bangin samlai chi leuleu uhi.
Leitung pumpi ah numei vaihawmtu hunkhop omta mahleh, pasalte’ ngaihtuahna pha zou mi vang lai chih hi a, parliamentarians hi’n mipi palai (MLA) hunkhop numei om mahleh pasal-te’ ngaihsutna tawh amaute’ ngaihsutna kilamdang lai chih research tungtawna muhsuahin om hi. Numei leh pasal kala ‘political empowerment’ tungtang a ngaihdan kikhe mahmah a, numeite’ sangin pasalte’ ngaihtuahna ana piching zaw himhim chih muhsuah ahi chi uhi. November 8, 2016 chiangin United States President telna (final) omta dinga, Democrat Hillary Clinton leh Republican Donald Trump kibeiding uhi. Hiai hunah Clinton ahong chin leng i lamen a, aman leitung a numeite’ dinmun hon bawldik banleng gintakhuai hi. India ah leng numei Chief Minister hunkhop om a, AICC Chief leng numei mah hi a, UPSC/CBSE a topper hihna leng numei mahin luahtou den a, WEF muhsuahdan pen dikmah ding hiam chih chetsem ut huai hi.
No comments:
Post a Comment