HEADLINES:
India leh Japan in Civil Nuclear Energy ah kilemna bawl
 |
| http://images.indianexpress.com/ |
New Delhi, Nov-11: India Prime Minister Narendra Modi leh Japanese PM Shinzo Abe in Tokyo khawpi ah tuni’n ‘Civil Nuclear Energy’ tawh kisai in kilemna bawl uhi. Prime Minister nih te’n Nuclear Energy tungtang ah Delegation Level Talks leng nei uh a, galvan bawlna a zatlouh ding in lemsa uhi.
Delegation Level Talks bei nung in PM nihte’n Civil Nuclear Agreement tungtang ah joint press statement suahkhia uh a, tuni a gamnihte kilemna tungtawn in, India leh Japan kala kizopna detdou ahihdan kilang hi’n PM Modi in gen hi. Prime Minister Modi in agenzelna ah economic engagement, growth of trade, manufacturing, investment, focus on clean energy, cooperation on infrastructure leh skill development ah leng gamnihte’ pangkhawm ding chi a, financial sector a kizopna omtheih ding ziakin, India inleng Japan masawnnate kopppih theita ding ahihdan gen hi.
Hiamgamna tawh kisai in cross-border terrorism etkai dia thupukna bawl uh ahihdan Modi in gen a, bilateral economic partnership hatsakna di’n training leh skill development lam ah pankhawm hiding chi hi. Japanese Prime Minister Shinzo Abe in ‘Act East Policy’ tawh kisai ah Prime Minister Narendra Modi pahtak thu gen a, Japan govt. in India a sumdawnna puahpha nuam ahihdan leng gen in, tax system leh GST tungtawn in India economy tuasang in khangtou zaw ding chi hi.
LOCAL NEWS:
Kiginni leh Pathianni kihong ding
Lamka, Nov-11: Reserve Bank of India in Kiginni & Pathianni (Nov 12 & 13, 2016) in India gam a bank om teng kihong (transaction bawlchiat) ding in thupia a, huai dungzui in Lamka khawpi a bank omteng leng Nov 12 & 13, 2016 in kihong ding a, transaction bawl ding uh chih thu om hi.
Nanl. Digital Literacy Mission
Lamka, Nov-11: Kevin, Dist. Co-ordinator makaih in CCpur Dist. ah National Digital Literacy Mission awareness campaign neih hiding a, hausa-te, V/A-te leh mipi’n kithuahpih ding in DC/CCpur in theisak hi.
Petrol litre 1 ah Rs. 100-150 in kizuak
Lamka, Nov-11: UNC te’n NH-te ah ni 10 val paisa apan economic blockade abawl ziak un Manipur ah petrol leh diesel haksa a, Lamka ah leng niteng in aman pungzel hi. Tuni zinglam in petrol litre 1 ah Rs.100/- in kizuak a, diesel litre 1 ah Rs.65 velin kizuak hi. Himahleh nitaklam in petrol litre 1 ah Rs. 100-150/- kikal leh diesel litre 1 ah Rs. 65-80 kikal in kizuak hi. Black athautui zuakte gendan in Lamka khawpi sung ah petrol leh diesel barrel 4/5 om teng leng Meitei te’n lei ngaivek in Imphal lam ah pawsuk uh hi’n gen uh a, Lamka a zuak ding petrol leh diesel muh zawh hinawnlou hi’n gen uhi.
Child trafficking hunkhakna om
Lamka, Nov-11: Child Welfare Committee (CWC)/CCpur te’n State Legal Service Authority panpihna zang in Child Trafficking tawh kisai 4-days Awareness Campaign aneih uh tuni nitaklam in SP/CCpur office chamber ah hunkhakna program om hi. Huai hun ah SP/CCpur in CWC/CCpur leh Anti-Human Trafficking Unit (AHTU) te’n Child Trafficking awareness neih kipahthu gen a, maban ah AHTU, Police leh CWC/CCpur te’n naksem a panlak leh pankhawm poimawh hi’n gen hi.
ECCI Women Deptt., in silver jubilee
Lamka, Nov-11: Evangelical Congregational Church of India (ECCI) nuai a women deptt. kiphuhkhiak nung kum 25 (Silver Jubilee) chin lopna tuni’n Nehru Marg a ECCI campus ah om a, Elder Er. Lalthanzam Amo, Chairman ECCI in jubilee suang hongin, Rev. Dr. Kaithinkap, Gen. Dir., DECCI in lan hi. Founding leh existing member teltuam mi 25 te’n dakpi khen uh a, Elder Dr. Lalthanzam Amo, Rev. Dr. Kaitinkap Vaiphei, Lunminthang Haokip, IAS DC/CCpur te’n thugenna nei uhi. Sunnung in mipi kikhawpna hun ah Chinboi, WD/ECCI in Secy report pia in, Rev. Thangjakap Chongloi, Chairman Uouth Deptt., leh Rev. Dr. T Jamkhothang Haokip, Principal ECT ten Pathian thu gen uhi. Huai hun ah S. Thienlaljoy Gangte, MCS in souvenir hong in, Rev. Dr. Th. Lamboi Vaiphei, Former Chairman, ECCI in lan hi. Women deptt., ahihleh 1991 a dinkhiak hi a, ECCI nuai a saptuam ECA-Thadou, EOC-Vaiphei, BBEC-Mizo, ESC- Gangte, EUC-Anal leh EAC- Hmar kikhaikhawm hi’n kigen hi.
CCpur Consumers’ Club President di’n SN John
Lamka, Nov-11: Tuni in New Bazar Bus parking a CDSU Administrative building ah CCpur Consumers’ Club (CCC) President lenlel Pausuanlal Kullai in file poimawh tuamtuam tawh President thak SN John kiang ah mawhpuakna pekhia hi. President thak in consumer hivek ahihna ah i rights leh mawhpuaknate theih poimawh chi a, mipi’n haksatna a neihte CCC tunpah di’n ngen hi. Govt. in consumer-te venbitna din dan (Act) hoihtak nei ahihman in, zatdan siam leh adik a zat poimawh a, i rights i theikawmin mawhpuakna leng thei din mipi ngen hi.Van ilei chiangin hun beisa, aman bikhiahsanga tamzaw a kizuak leh siangthou huntawk hina hiam chih thei a pilvang ding in leng ngen a, central govt. in Rs. 500 leh Rs. 1000 demonetize a bawl tungtang ah bank-te panlakna kipahpih in customer-te haksatna theisiam a, ahithei tan a counter kiching koih dingin ngen a, e-blockade suanlam in dukan bawlte’n vanman khangsaklou leh stock omsate selgu lou a zuak ding in ngen hi.
Kum 2016-19 sung CCC member ding guan hi a, V/President in Alex Guite, Secy in Justin Simte, Asst. Secy in Hauboi, Secy (Fin) in Symond Vaiphei, Secy (Info & Pub) in Hautungnungpau, Asst. in Pauminthang Guite, Secy (Market) in Thanglianmang Khuptong, member in Duang Neilut, Minlal Gangte, Mangmin Touthang, TS Muanlal Guite, S. Kammuanthang, James S Tunglut hi uh a, Advisor in Pausuanlal Kullai, ex-Prez leh Legal Advisor in Siamzading Valte guang hi.
Tribe leader te’n SP kimuhpih
Lamka, Nov-11: B. Dongzalian Simte, Chairman ZC, Thangjang Haokip, President, KIC; Joseph Lalrothang, President, Hmar Inpui leh Upa Vanlalrinliana, President, MPC HQ Manipur te’n Rakesh Balwal, IPS, SP/CCpur leh H. Balram, Addl. SP (Ops) kimuhpih uhi. Huai hun ah CCpur Dist. sung ah Bolero tel in gari tuamtuam kigumang thu kikum uh a, gari neitute’n document te gari sung ah koihlouh ding, gari neitute pilvang ding, Veng/khua tuamtuam te’ Police tawh pangkhawm a nitak duty ding in genkhawm uhi.
Gari mangthu ah tribe leader te’n SP/CCpur in naksem a panla ding in ngen uh a, SP/CCpur in khawpi sung mun bangzah hiam ah Police check gate/post honthak hiding in tribe leader te theisak hi. SP in agenbehna ah J & K ah khawchih in Village watchman/chowkidar bawlkhia in zan khawvak in duty uh a, amau khaloh ding mipi’n pia hi’n gen a, huai bangbang Veng/Khua chih inleng CCpur Dist. ah bawlkhiat theih hi’n tribe leader-te theisak hi.
MGP Diamond Jubilee lawm uh
Lamka, Nov-11: Rev. Thangboi Khongsai, Moderator, MGP in tuni’n ZPCS Compound, Zomi Colony ah Manipur Gam Presbytery (Zou Presbyterian Church Synod) kum 60 chin Diamond Jubilee suang hong in Pathian kiang ah thumna in lan hi. Huai zawh in ZPCS Central Church, Zomi Colony road ah Jubilee lopna program om a, Elder leh Pastor te’n Jubilee dakpi 60 vei khen uhi. Rev. Stephen Chinzathang Executive Secy. ZPCS in Souvenir hong a, Rev. Tualzachin, Sr. Executive Secy. ZPCS in Pathian thugen in MEP, ZTP, TTP, KSP, EMP, MELC, ZCBC leh TBC te’n Jubilee greeting nei uhi.
JAF in Unity Campaign sunzom ding
Lamka, Nov-11: Joint Artistes Fellowship pawlin Zingchiang (Nov 12) in Chiengkawnpang leh Bungmual ah ‘Unity Campaign-cum-Road Show’ sunzom nawn ding uhi. Ccpur district sunga lemna leh muanna omtheihna di’n ‘Campaign For Unity Through Music’ chih thupi zang uh a, sunnung dak 3-5 sung YMA Chiengkawn inntekna nuai ah neih hiding a, nitak dak 6-8 kikalin YPA Bungmual inntekna nuai ah sunzom ding uhi. Huai ding tawh kisai in, hun bangtan hiam paisa apan Lamka khawpi sunga lasiam tuamtuam te’n Lengtonghoih Recording Studio ah la zilna leh recording bawl uh a, Gamngaihla, U leh Nau ki itna laa banah Pathian laa leh atuamtuam sa ding uhi.
DFWO saina in training
Lamka, Nov-11: DFWO/DIO, CCpur saina in tuni’n IB road a Synod hall ah Dist. a nurse & block data manager-te adin ‘special workshop on immunization and reporting’ om a, huai hun ah CMO leh DFWO nuai a CHC/PHC tuamtuam a regular leh contact a sem nurse-te kihel uh a, Dr. Kim Simte, CMO in hong hi.
Dr. VC Pau Tonsing, DFWO/DIO, Nalini Devi, Dist. Public Health Nursing Officer, Mrs Zenngaihlun leh Panthoi, Dist. Data Operator te’n immunization tawh kisai sinsak uh a, electronic Vaccines Intelligence Network ( eVIN), cold chain maintenance leh mother child trafficking system paidan kikhek dungzui in mawhpuakna neikha-te injection/immunization bawl dingdan sinsak uh a, mi 100 val tel uhi.
Unit President di'n Hensei
Lamka, Nov-11: Manipur National Democratic Front (MNDF) President in CCpur Dist. Unit a President lending in Hensei Haokip s/o (late) L. Haokip of Bijang Aizalon appointment order pia hi’n N. Jayantakumar Singh, Gen. Secy (Adm), MNDF in taklang a, Hensei Haokip in mohpuakna la ngal ding hi.
MGP in 61st Session nei ding
Lamka, Nov-11: Zomi Colony road a ZPCS Central Church ah tunitak in Manipur Gam Presbytery (ZPCS) 61st Session kipan a, Rev PC Manga, Upa Tualkhanpau leh outgoing Moderator in thugen ding hi. Nov.12, 2016 in vaihawmna nei ding uh a, Nov 13, 2016 zing biakna program ah ordinator service omding hi.
TKSU- CCpur College branch election
Lamka, Nov-11: Thadou-Kuki Students’ Union (TKSU) GHQ makaih tuni’n KKL Complex ah CCpur College branch in 2016-17 sung vaipaw ding kitelna om a, member paikhawm te’n President dingin Letminthang Haokip, V/President in Francis Lien, Gen. Secy in Thangminlen Touthang, Fin. Secy in TL Joseph Khailenlal Haokip, Treasurer in Heshi Chinneithem, Games & Sports Secy in Ngamjahao Chongloi, Social & Culture Secy in Niengneithem , Education Secy in TL Kimte Haokip leh Info. Secy in Jangkhohao telching uhi. Maikai thak dingte Lalkhohao Chongloi, President, TKSU GHQ in kichiamsak a, Pastor Tongkai Haokip, ECA/ECCI in thumsak hi.
Police te’n Jail ah koih uh
Lamka, Nov-11: Police te’n ND & PS Court/Bishnupur ah tuni’n Luthoihkim (40) w/o (late) Ginzamuan pawkhia uh a, court in Jail a omding in thutankhum a, Police te’n Sajiwa Jail ah koih uhi. Luthoihkim bel Nov. 6, 2016 in Police te’n khamtheih No. 4 (heroin) gram 10 leh khamtheih WY kichi tang 713 tawh amatkhiat uh hi a, FIR No.54 (11) 2016 CCP-PS U/S 21/22 ND & PS Act registered uhi.
IMPHAL NEWS:
JNIMS ah Cancer Care Unit bawl khaik hiding : Union HFW Minister
Imphal, Nov-11: Palace Gate, Imphal a City Convention Centre ah State health Society National Health Mission-te saina in tuni’n One Day workshop on ‘Dissemination of Information on Programme and Scheme Run by the Ministry of Health & Family Welfare’ om a, huai ah Chief Guest in Union Health & Family Welfare Minister Jagat Prakash Nadda pang hi. Functional President in D. Korungthang, Minister (Health & FW) pang a, Guest of Honour in Sudhir Kumar, Jt. Secy. (Policy), Ministry of Health & Family Welfare-te pang uhi. Huai hun ah Chief Guest in India govt. in kum 3 paisai in Manipur health sector a ding in Rs. 274 seng in infrastructure, human resources, vanzat leh thil tuamtuam ah panpih a, maban hun a leng panpih touzel ding hidan in gen hi. Porompat a JNIMS ah Rs. 45 crore bei in Tertiary Centre Care Unit bawlkhiak hiding a, cancer care unit bawlkhiak ma in lupna 20 om theihna Neo-Natal Intensive Care Unit phuhkhiak ding banah JNIMS a lupna behlap hiding a, mipi hamphatpihna dia National Health Mission scheme tungtawn a free medicine list-te District Hospital, Community Health Centre leh Primary Health Centre-te ah suahkhiak hiding chi hi.
Zu mankhe din thupia
Imphal, Nov-11: Commissioner of Excise, Manipur in tuni a thusuah a bawlna ah Manipur Liquor Prohibition Act 1991 kalh in mun khenkhat ah dan phallou in mimal leh illegal vendor te’n Indian Made Foregin Liquor (IMFL)/Beer/Country liquor zuak ziak in mipi tungah dan kalah sualna, hihbuaina leh gitlouhna tun chih muanhuai tak apan thutut om a, maban state Assembly Election Feb. 2017 kha bul a om hun ah buaina omlou a election zawh theihna dia IMFL/Beer/Country liquor-te etkai banah a kikoihna munte luhkhiak hiding in gen hi. Special Enforcement Excise Staff te’n Excise check post leh Border Check post-te ah inter-state gari-te enkai ding leh Excise Dept. a Excise 39 te’n Dy. SP, Excise makaihna a panla ding in theisak a, Excise dept. ah semtu kidaih louh ziak in District Police Officer te’n liquor zuakna leh koihna mun-te luh leh matkhiakna ah Excise staff-te kithuahpih ding leh van matkhiak-te a kisaipih Excise Station a Dy. SP, Excise/Officer-in-charge kiangah pekhe ding a thusuah bawl uhi.
Sum note thakte tuni’n Imphal tung
Imphal, Nov-11: Security vengbitna nuai ah flight tungtawn in tunitaklam in Imphal ah sum Rs. 2000 note a vek a gawm in Crore 100 leh Rs. 100 note a vek a gawm in Crore 7 vel hong tung hi. Security vengbitna nuai ah heavy-laden square box sung a sum note thak kikoihte bank tut hi a, tunitaklam ahih keileh Nov 12, 2016 ni a ATM tuamtuam ah kikoih ding a gintak ahi.
ATSUM te’n thusuah bawl
Imphal, Nov-11: Micah Kamei, Info. & Pub. Secy., ATSUM in tuni a thusuah a bawlna ah Manipur University a reservation thubuai tawh kisai a kha 2 vel paisa in student bodies te’n India danbupi a tribal-te tanvou phutna hun ah tribal mipi gupna ziak a kipumkhatna tungah kipahthu gen uh a, MU thuneite apan Vice Chancellor leh Registrar i/c te’n ATSUM, DESAM, KSO-GHQ, ANSAM banah MUTSU-te tawh Nov 7, 2016 ni a CEI (Reservation in admission) Act 2012 zuih dia MoU a kaih ziak un MU a PG courses tuamtuam a dia selected list a tel te’n a kintheipen banah Nov 16, 2016 tan a admission bawl ding in theisak uh a, MU thuneite’n leng University sianna leh kipumkhatna omsa gupna banah High Court of Manipur thupiak bang in Oct 8, 2016 ni a Academic Council meeting hun ah thupukna a kintheipen a bawldik ding in theisak uhi.
Driver pimang in om
Imphal, Nov-11: Senapati district a Sapermaina Police Station in a huamkhak Singda village ah helpawl hiding a gintak te’n Simplex Company-te tipper driver pimang uh hi’n kigen hi. Police thusuak in Kuki militant group dia gintak te’n zan nitak dak 10:30 velin Tipper driver Manichandra Singh of Phayeng village, Imphal West pimang uh a, Singda village a lampi bawlna ah Simplex Company-te labourer M. Singh telin mi 30 giahbuk kibawl tawm sung ah om uh a, helpawl te’n M. Singh va pikhia uh a, Simplex Company tungah sum demand tawh kisai a driver pimang a om hiding in gintak kigen hi.
Student pua gari te’n service khawlsak
Imphal, Nov-11: Manipur a National Highway-te ah Economic blockade ziak in Oil depot ah Petrol leh LPG stock teng zan in beisiang a, student-te pua gari tuamtuam te’n petrol lei zawh louh ziak in tuni apan service khawlsak uhi. All Manipur School Students’ Transporter Assn. (AMSSTA) te’n Oil pump-te ah Petrol om masiah tuni apan school van service khawlsak uh a, economic blockade om mahleh school van-te taisak uh a, Oil depot a stock beisiang banah black market ah petrol kizuakte lei zawh louh ding ziak a service khawlsak uh chi’n taklang uhi. Economic blockade banah Rs. 500 leh Rs. 1000 note zattheihlouh in Manipur mipi adin haksatna tun a, market-te ah niteng vanzat tuamtuam hunkhop beisiang hi’n leng taklang uhi.
Huailou in NH-2 in a tawt khak Sadar Hills leh Senapati a Oil pump-te ah thautui beisiang a, black market ah leng thautui muh hak hi. Kangpokpi a dawr nei khat in economic blockade kal 1 a omlai leh sumsinna inn teng ah nek-leh-tak banah niteng vanzat tuamtuam beisiang ding chi a, wholesaler-te akipan van man a khang ziak in Kangpokpi mun ah leng van man khang hi’n taklang hi.
TUNI THUPI:
“Huchi’n mi khat tatlekna in mi tengteng adinga siamlouh tansakna a tut bangin mi khat diktatna thilhih in mi tengteng adingin suahtakna leh hinna hontun hi.” –Rome-te 5:18
EDITORIAL:
Media-te’ adia zalenna
NDTV a Hindi channel ‘ban’ tawh kisai in gen-le-sak tamtak om a, media-te’ zalenna ni khat sung maimai ‘ban’ ahih ziakin buai mahmah hi. Leitung gam tuamtuam akipan press/media-te’n mawhpaihna (condemnation) puang uh ua, huai tungtang ah kigen minthang mahmah hi. Ministry of Information and Broadcasting(I & B) in bangchidan a Media-te’ zalenna hihbuai hiam chih ahi hi. Huai thu Supreme Court in ngaihtuah ding uh chih ahi hi. I & B ministry in Assam a News channel ‘News Time Assam’ tungah leng bangziak in November 9, 2016 a News suah theilou ding a ‘ban’ uhiam chih dotna om hi. Khenkhat in Pakistan ahong kipan helpawl in Punjab a Indian Air Force(IAF) base a atttack utawh kisai India adia hoihlou, national security tanpha hihbuai thei ding thu a suah ziak uh hidia ginthu gen uhi.
Ministry of Information and Broadcasting in November 9, 2016 in January 2016 a Pathankot a terror attack thu zalentaka a suah uh ngaisiamlou chih hi a, News Times in ahihleh naupang kum chinglou soisak a omna thu a khahkhiak uh government in theisiamlou chi uhi. Pathankot a Air Force Base attack thu kuapeuhin atheih hi a, Media-te’ zalenna nelhsiah ahihna a omna pen govt adingin theihsiamlouhna ding bangmah omlou a, media te’n thil a muh bangbang uh a suahkhiak uh amau rights hi a, government adingin thangpaihna ding bang om hiam chihtheih mah ahi hi.
NDTV kia hilou in TV channel tuamtuam leh Newspaper hunkhop in huai thiltungte suahkhia uh a, bangchidan a NDTV kia ‘ban’ a om sese hiam chih dotna liantak ahi hi. Editors Guild of India (EGI) om a, huai EGI in India gamsunga media-te’ dinmun hoihtaka enkai ding a mawhpuakna piak a om ahi uhi. EGI in tuni tanin gamsung pumpi a media te’ dinmun enzui den a, media-te’ zalenna hihbuai in a om hiam chihte tanpha telin thil tamtak enkai uhi.
Dan kalh vachih hial ding zaw ahi kei a, rule of law 6(1) (p) nuaiah cable TV Network (Regulation) Act 1995 dungzui in media te’n anti-terrorist operation a cover theikei ding uh kichi hi. NDTV in hiai dan palsat chih dingin lah helpawlte tawh a kikaptuahna taktak uh a laklam uh theih hilou a, a thil theihbaih (informative) ziak ua ava naihkhak pen uh mawhsak leh nawlkhin a om theiding hiam chih ngaihdan khat om nawn hi.
Government in National Security dinmun etna ziakin NDTV te ni khat sung ‘ban’ ahi chi uh a, himahleh huai in ‘freedom of Media’ khoihkha a theihin om hi. Media-te’n mit a a muh uh a gelhkhiak uleh suahkhiak uh government in theisiamlou ahihleh ngaihsut tham ching hi. Prime Minister Narendra Modi in black money dalna dingin Rs 500 note leh Rs 1,000 sisak a, media te’ tungtawn in thehzak a hong hi hi. National security dinmun etzuina dingin media-te’ poimawhna liantak om chihna hizel hi.
South East Asia gam mun tamtak ah Pressmen tamtak thah leh kaplup in om uh a, Manipur state ah leng media person hunkhop in thah in om uhi. Tua kia hilou in, vau leh soisakna tuak media a sem mi tampi omta a, i gam ah media-te’ zalenna theilou security force-te telin helpawlte a omsek uh poi mahmah hi. NDTV banah ‘News Time Assam’ te ni khat sung lel government in a ‘ban’ ziakin thil bangzah a poikha ban aleh chih i ngaihsut uh deihhuai hi. Information technology tawh kisai thupi bawl lou i hihleh huai in i gam sung maban ding uh sautak hon khoihkha ban dingin kilang hi.
The Fourth Estate i chih sek uh Media-te zalentak a i khahkol uh poimawh a, thudik, thutak leh thuthak a puankhiak zel uh deihhuai a, amaute hihbuai hetlouh poimawh hi. Eilak bang ah lawh tawmchik kipezou hamhamte i hi a, regional leh national paper ahihkeileh Labour ministry guidelines zuizoute i hikei uhi. I mit a i muh, ibil a zakte suah theihna ‘rights’ om a, NDTV telin ‘News Time Assam’ te’n thil amuhdan uh a suahkhiakte uh thudik mah ahihdan mipi’n leng pompih poimawh hi. Media-te’ zalenna hihbuai louh teitei deihhuai hi.
No comments:
Post a Comment