HEADLINES:
PM in Black Money hahsiangna di’n mipi kithuahpihna ngen
Nekgukna doudal dia telching a om ka hi : PM Modi
 |
| http://i.ndtvimg.com/ |
New Delhi, Nov-13: Kum 70 paisa apan India masawnna ding daltu leh natna lauhuai, ‘Black Money’ beisakna di’n gamsung mipi’n Kha 70 (kum 5.8) ngaklai ding in Prime Minister Narendra Modi in tuni’n chialna bawl hi. December 30 nung in diktatloute tunga gawtna khauhsem piak hiding chi a, nekgukna ziaka gamsung mipi’n haksatna tamtak atuah nung un, huaite doudal dia Prime Minister luahthei dia telching a om ahihdan leng gen hi.
Prime Minister in Karnataka state sung Belagavi ah tuni’n KLE society pawlte’ Valedictory Centenary zatna uap a, huai hunah Black Money ziaka India gam hausa dinglai zawng mahmah hi’n gen hi. Aman agenzelna ah, mi zuauthei, dukdakloute banah lepchiah te’n kum 70 sung vingveng India gam ah hauhsakna kaikhawm uh a, himahleh solkal kiang a piakkik ding aneihte uh limsaklou in, sum-le-pai a kaihkhawmte uah Tax penuamlou uh chi a, amaute ziakin India economy niamkiak hi’n leng taklang hi. Tutung a sum note nihte sihsak hun in mivantang-te’n haksatna tuak mahle uh, black money teng lakkik ahihchiang in amaute mah in hamphatpih pen ding uh chi hi.
Tax piaklouh a om Black Money-te Indian economy a kaihlutna dia, sum note nihte beisak tungtang ah thupukna bawlkhelh aneih leh gawtna tuak dinga mansa hi’n PM in gen a, BJP government in vaihawmna alak nung un thiltup tuamtuam omte lakah nekgukna ngai poimawh pen hi’n gen hi.
Prime Minister in Goa a Bambolim mun ah tuni’n Mopa Greenfield international airport leh Tuem electronic manufacturing cluster hongkhia a, huai project nihte nekgukna sum tellou a kibawl ahihdan gen hi. Tutunga demonitisation om pen India khua-le-tui hihna nei, mi diktat-te’n diktatlouhna a kibualte azawh theihna ding omsun uh hi’n leng PM in gen a, huai tawh kisai sepsuahna di’n Kha 10 paisa apan aguktak a panlakna omta hi’n gen hi
Prime Minister Narendra Modi in tuni mah in Pune kianga Manjari ah Sugarcane Value Chain-Vision 2025 tawh kisai International Conference and Exhibition hun in thugenna nei a, loubawlmite lakah centre govt. in tax la ngeilou hi’n mipi paikhawmte lakah gen hi. ‘Corruption Free India’ bawlkhiakna dia mipi’n ni 50 ngaklai ding in ngen a, loubawlmite leh nektawm zongte’n sum tungtawn a kikhemna thuak tampen uh chi hi.
Govt. nasep puangkhetu ding a poimawhpen media-te ahi: CM
MHJU saina in One-day Seminar on role of Media kizang
Lamka, Nov-13: Directorate of Information & Public Relations (DIPR) akipan huhna zangin Manipur Hill Journalists' Union (MHJU) in zan in Hotel Imphal ah 'role of media for development in the hill areas of Manipur' thupi zang in ‘one day seminar ‘sai uh a, huai ah Chief Guest in Manipur CM O Ibobi pang a, Functional President in Gaikhangam, Dy. Chief Minister pang hi. Special Guests in Wangkhemcha Shamjai, President, All Manipur Working Journalists' Union (AMWJU) leh A. Mobi, President, Editors' Guild Manipur leh Y. Meghachandra, Director, DIPR pang uhi.
CM in a genna ah, govt. in dev. works a sepkhiakte mipi kianga puangkhe dia poimawhpen media-te hi a, mipi apan feed back a muhte un maban ah govt. naktak a panpih ding ahihdan gen in, diklou a news report khak ahih chiangin mi lungsim sukha a, thudik puankhiak linlou (hesitate) dingin hasuan hi. State govt. in singtang leh phaijang bial a khantouhna (development) kibang a om theihna dingin panla a, huai dingin MHJU leh AMWJU in mawhpuakna liantak nei hi’n gen hi. Union 2te kal ah kitheihsiamlouhna omlou a, gam bawlna dia pangkhawm ding in chial a, MHJU adia poimawh a om leh kisuanglahlou a govt. zasak (contact) ding in theisak hi.
MHJU in govt. kiang ah Imphal khawpi a Press Club mun ding allotment bawlsak dia proposal a piaklut leng akinlam a ngaihtuah hiding a, Revenue Minister kiang ah mun lemtang (convenience) zong dinga theihsak ahih ban ah AMWJU inleng lemsakpih dingin ngen hi. Dist. HQ teng ah Press Club koih ding leh Lamka a Press Club leng a kinlam a puahthak (renovate) hiding in gen a, CM in union huhna in Rs. 1 lakh pia hi.
Technical session ah resource person Dr. A. Ibomcha Sharma, News Editor AIR, Imphal in 'role of electronic media for development in the hill areas of Manipur'; Valleyrose Hungyuo, Editor, The Aja in ' Role of print media for development in the hill areas of Manipur' leh Sobhapati Samom, Correspondent, The Assam Tribune in 'role of electronic media for development in the hill areas of Manipur' thupi zangin sinsak hi. Huai hun zatna ah Chandel, CCpur, Senapati, Tamenglong leh Ukhrul dist. a MHJU nuai a om media house tuamtuam apan member 50 sanga tamzaw paikhawm uhi.
LOCAL NEWS:
UBI leh SBI ading sum hongtung
Lamka, Nov-13: Prime Minister Narendra Modi in Rs. 500 leh 1000 note zat nawnlouh ding a thupuan abawl nung govt in Rs. 2000 note bawlthak a, zanhal in Kolkata apan lenna in Imphal airport tan ah Rs. 2000 note tamtak honpua a, zan sunnung in UBI/CCpur leh SBI/CCpur ading akigawm in Rs. 8 crore hongtung hi. Lamka a Bank tuamtuam-te Rs. 2000 note thak piak in om uh a, tuni’n bank-te banah ATM booth teng ah sum draw khia mi tamtak om hi.
PCS in Paite Nampuan hong
Lamka, Nov-13: Paite Cultural Society (PCS) in Paite Nampuan (dress code) abawl uh zan zinglam in Hiangtam Lamka a YPA GHQ hall ah Inpipa L. Pumlianpau, President, PTC GHQ in hong a, Rev S.Vung Minthang, Gen. Secy. EBC in Pathian kiang ah lan hi. Huai hun ah Chief Guest in Langkhangpau Guite, Chairman ADC/CCpur pang a, Intekpa in T. Singneng, Ex-President PTC GHQ pang hi. Tualchin Neihsial in ‘Pupa hun apan tualsuak kicheidan”, Thallouh C. Hangshing, President, PLS in ‘Pula Ngeina kepbit apoimawh nate’ Thusapi T. Khailianthang, President YPA GHQ in ‘Pupa ngeina leh phattuam ngaihna’ chih leh Tanupi Lianzapau Samte, President, SSPP GHQ in ‘Siamsinna tawh kisai a i dinmun leh maban ding tungtang’ chih pansan in thugen uhi.
Children’s Day zang uh
Lamka, Nov-13: Dawn school te’n zan in Children’s Day zang uh a, tua hun in Korea, China, Japan leh Malaysia a kikhen in country dungzui in dress show nei uhi. Student group 4 teng Rubi, Enber, Savior leh Amerit a kikhensawn in Korea, China, Japan leh Malaysia te’ nek-le-tak leh thil tuamtuam koih in stall bawl uh a, huai a profit teng Nov.14, 2016 in Dist. Hospital a Children Ward ah damlou-te vehna nei ding uhi.
‘Itna Tullou’ film hong ding
Lamka, Nov-13: Zoveng a Zogal Memorial Hall Complex ah Nov. 15, 2016 zinglam dak 11:00 in ‘Itna Tullou’ kichi film honkhiat hiding hi. Huai film ahihleh Suanlamthang in anu (late) Dimkhoniang leh a pa (late) M. Nenggoukham theihgigena dia Zou Film Company tawh abawlkhiat uh hi’n kigen hi.
Khawpi sung ah gari tawm
Lamka, Nov-13: UNC te’n NH-te a economic blockade a bawl ziakun niteng nek-leh-tak banah thautui hongtung lou a, oil pump a thautui omlouh banah black a zuakte a leng bei vek a, huaiziakin khawpi sung ah gari tai tawm zou hi. Tukal a nek-leh-tak leh thautui a hongtung kei a leh tamtak buai ding ua gintak ahihbanah, vanman nasatak in pung hi.
SSPP in Siamsin Award piak sawm
Lamka, Nov-13: Siamsinpawlpi Gen. Hqtrs. in 70th Siamsinpawlpi Foundation Day chiangin Siamsin Awards piak sawm ua, tua tawh kisai in award sang thei ding a chitna neiten Nov. 30, 2016 tan in application format omsa zui in mahni bio-data, certificate/marksheets leh passport copy nih tel in SSPP Complex, Bungmual ah nitaklam dak 3:00 tan in piak theih ding hi. Application form bel www.siamsinpawlpi.org ah muhtheih ding hi.
MGP in Upa 3 ordination pia
Lamka, Nov-13: Zomi Colony road a ZPCS Central Church ah zanhal nitak in Manipur Gam Presbytery (ZPCS) 61st Session kipan a, Rev PC Manga, Upa Tualkhanpau leh Rev Thangboi Khongsai in thu gen hi. Zan in Vaihawmna nei uh a, 2017 sum zatding in Rs.1,50,000/- passed uh a, 2017 sung MGP (ZPCS) makai ding leng hihfel uhi. Moderator- Upa Khamjathang of Tuibuong; Elect. Moderator- Upa Khuplam of Lailam Veng; Secretary (Sr) Upa T.Kaizalam of Zomi Colony; Secretary (Jr)- Upa Kapkhanhau of Bohlui; Finance Secy.- Upa Kapkhanthang of Tuibuong; Treasurer- Upa S.Nangkhanlal of Central Church leh Statistician-Upa Thangchinmang hi uhi. Tuni zing biakna hun ah Upa Khamjathang, Moderator in Liansuankap of Kanaan Veng; Mangkhanthang of V.Bethel leh Zamzakhup of Hiangzou te Upa ordination pia a, Upa Re-instate in Upa Goumang, Central Church, Upa Pumzadal of Hiangzou, leh Upa Thangzasuan of N. Kanaan Veng hi uhi.
Jt. Artist Assn saina in unity campaign
Lamka, Nov-13: CCpur dist. a Artist Assn-4 (Hmar Artistes Assn, Kuki Artistes Progressive Union, Mizo Zaimi Inzom leh Zogam Artistes Assn) kikaikhawmna Joint Artist Fellowship saina in ‘campaign for unity through music’ thupi a nei in Chengkonpang bazar leh Bungmual ah nei unity campaign cum road show nei uh a, huai hun ah lasiam tuamtuam in la-sa uhi.
Thanglalmuan, Chairman JAF in u-nau laizomte lak ah kitanauna hoihsem bawlkhiak a, gamsunga lemna leh muanna om a, kituak tak a tengkhawm ding tupna asai uh hi’n gen a, maban election om ding ah deihdan kibang veklou ding ahihna ah ki melmakna leh kipumkhatna sesak lou dingin mipi ngen hi.
World Diabetes day zatna om ding
Lamka, Nov-13: DNO/NCD Cell, Dist. Hospital/CCpur saina in Nov. 14, 2016 zinglam dak 8:00 leh dak 10:00 kikal in Dist. hospital a casualty block ah World Diabetes Day zatna dan in kum 30 tunglamte adin ‘free diabetes and hypertension screening camp’ om ding hi.
Hmuia Veng Diamond Jubilee lawm
Lamka, Nov-13: Hmuia Veng kum 60 chin Diamond Jubilee lopna zan zinglam in YMA Hall, Hmuia Veng ah om a, Chief Guest in Lungmuana IAS, Principal Secretary, Govt of Manipur leh Jubilee Pa A. Thanpuia, Chief of Hmuia Veng pang hi. Chief Guest in Jubilee suang ahon zawh in Jubilee Dakpi 60 vei khen uhi. Paul Lalchhanhima, Secy. in report pia a, Upa PC Thangchhuana in Member mualliansate suunna hun makaih hi. Chief Guest in Hmuia Veng a teng kum 80 tunglamte pahtawina thil pia a, A. Thanpuia, Chief of Hmuia Veng in Phatuamngai mi bangzah hiam kiang ah Pahtawina thilpiak pia hi.
Chief Guest in agenna ah Pathian in khawpi avenbit kei leh aventute hakthawn lel uh a, huaiziak in Vengsung khantouhna ding in Pathian apoimawh pen hi’n gen hi. Govt. in khawsung khantouhna ding in MGNREGS telin fund tuamtuam hon pia a, chihtak leh gin-om taka sepsuah poimawh hi’n gen hi.
Kha 1 sung in ni 12 TB apan damsiang
Lamka, Nov-13: Revised National TB Control Programme/CCpur ah Oct. 2016 sungin OPD case 1556 om a, mi 111-te’ khaksuah (sputum) a thak in test uh a, mi 44-te’ khaksuah alui test (follow-up) uhi. Huai hunsung in TB positive 4 muhkhiat hia, mi 12 te TB natna apan damsiang uh a, mi 9 te damdawi in enkol thak uhi.
The Ngaihtes’ laibu hon in om
Lamka, Nov-13: St. Peter’s School Auditorium ah zan sunnung in Dr. S. Lianzathang Ngaihte in agelh The Ngaihtes (Ngaihte Geneology book) kichi Th. Jamchinthang, MDC (Thanlon) in hong a, Rev. L. Kham Kho Lun in Pathian kiang ah lan hi. Huai ah Functional President in B. Dongzalian Simte, Chairman, Zomi Council, Special Guests in Prof. M. Jitendra Singh, MU leh Prof. Laldena, MU pang uhi.
Paite -English New Testament Bible
Lamka, Nov-13: Grace Bible College a Jelshyam Chapel ah tuni sunnung in Rev V. Thangkhangin, Director of Missions, EBC in ‘Paite-English Parallel News Testament with Psalms & Proverbs’ kichi hongkhia in Pathian kiang ah lan hi. Huai hun ah Rev V. Thangkhangin leh Dr. Lalrinmawi Pudaite, Global Ambassabor and co-founder , Bibles for the World in Pathian thu gen uh a, Bible hon thaka Translator Rev. Dr Luaichinthang in kum 6 val paisa in English apan Paite in translate bawl a, Bible for The World panpihna in Thadou-Kuki-English Parallel News Testament with Psalms & Proverbs kichi leng tuni a kihongkhia hi’n gen hi. Bible thak ahihleh chi 2 hi a, Rs. 400 leh Rs. 200 in Convention Book Room ah leitheih ding hidan in gen hi.
Die-in-Harness Convenor in Gin Za Kham
Lamka, Nov-13: ADC/CCpur nuai a Die-in-Harness applicant te’n kum 2016-2017 sung Convenor ding in Gin Za Kham telching uh a, aman Forum sik-le-tang in Die-in-Harness pending case teng govt. lam ah enkai leh apoimawh bang in bohzui ding hi’n kigen hi.
Healthy Baby Show, 2016
Lamka, Nov-13: Child Health, NHM, CCpur saina in Nov 16, 2016 zinglam dak 10:00 in Dist Hospital campus ah Healthy Baby Show Competition, 2016 om ding a, category 1 ah kha 6-11, category 2 ah kha 12-23 leh category 3 ah kha 24-36 tel thei ding uh hi’n kigen hi.
TKSU in ngetna bawl
CCpur district mipi sum in buaisak
Lamka, Nov-13: Central govt. in Rs. 500/- leh Rs. 1,000/- note a beisak ziakin gam mipi sum buai uh a, bank-te sum deposit leh withdrawal bawl ut tham thei mahmah in, tuni leng khawlni himahleh bank kihong in staff-te’n nasem uh a, ATM leh bank-te lun mahmah hi. Tua bangkalah CCpur dist. a school khenkhat in sum note lui-te pomlou uh a, ‘tuition fee’ sung ding student tamtak in haksatna tuak uh a, huai tawh kisai a final exam theihna dia school te’n sum note lui-te pomlai dingin Thadou-Kuki Students’ Union (TKSU) GHQ in thusuah bawlin ngen hi.
8th Seikam:
Final match ah Ganggam SC leh Utd Khawzim Brothers’ kimawl ding
Kholmun Youth Club (KYC) saina a Kholmun playground a 8th Seikam Memorial Open Football Tournament-2016 neih aom Nov. 14, 2016 (Monday) in final match leh closing function zinglam dak 10:00 in om ding hi. Hiai hun T.N. Haokip, President MPCC (I) in Chief Guest hihna tawh uap ding a, Functional President in Khaipao Haokip, ADC/CCpur leh Guest of Honour in Lunminthang Haokip, DC/CCpur pang ding a, Chief Host in Mr. & Miss HSO te pang ding uhi.
Final match ah Ganggam SC leh United Khawzim Brothers’ (UKB) te kimawl ding uhi. Semi-final match ah Ganggam SC in L. Semol YC te 2-1 in zou ua, tua zawh in UKB leh B. Aijalon te kimawl ua, tua ah kibei thei mahmah ua, ahihziakin half zawh nungin UKB ten nuamtak in 5-1 in zou uhi. Semi-final match kimawlna bel timing 45 minutes kipia a, tua ziakin B. Aijalon te half zawh minute 20 tan daih hamham ua, tua nungin puksia in UKB ten goal a ut hunhun ua khum thei mah bangin goal 5 khum uhi. Final match kimawl ding Ganggam leh UKB te bel group match akipan vuallel kha hetlou a final lut hi ua, tua hunsungin UKB ten goal 22 khum in 2 kia khahsuah ua, Ganggam ten ahihleh goal 18 khum in 4 khahsuah uhi. Ganggam SC striker Ginminthang in tunitan in goal 9 khum in top-scorer hi a, a pha thei om nawnlou uhi.
Road to the Final :
Ganggam SC
1. Defeated HAYDA 2-1
2. Defeated NBYC 5-1
3. Defeated KYU 5-0
4. Defeated HAYDA 2-1
5. Defeated KYC 2-0
6. Defeated LSYC 2-1
UKB
1. Defeated Zonou FC 1-0
2. Defeated LPFC 4-0
3. Defeated DHYO 7-0
4. Defeated SNKL 1-0
5. Defeated SHAY 4-1
6. Defeated BASC 5-1
SUUNNA:
Lalkhoniang (95) w/o (late) Hanggin of Nehrumarg, zan zingbaihtak in teknat in si a, Lamka hanmual ah kivui hi.
T. Khuphang (78) f/o Dr. Chinthianding Tombing of Zion Veng, New Lamka tuni zinglam dak 11:00 vel in zunkhum natna in si a, nitaklam in YPA hanmual, New Lamka ah kivui hi.
Nengkhovah Haokip (68) w/o L. Helthang Haokip of Kholmun village tunitaklam in Lungtang natna in si a, Nov. 14, 2016 in Kholmun hanmual ah kivui ding hi.
IMPHAL NEWS:
Counter blockade kipan
Petrol litre 1 Rs. 300 in kizuak
Imphal, Nov-13: United Naga Council (UNC) te’n NH-te ah economic blockade a bawl uh ni 13 chingta a, Oil tanker leh van tuamtuam pua gari-te Manipur a lut theih louh ziak in Oil depot teng ah thautui taksapna leh niteng vanzat tuamtuam beipah ding hi’n leng gen uhi. UNC Volunteer te’n NH-1 leh NH-37-te ah van tuamtuam pua gari-te khawlsak uh a, blockade paizom zel in van tuamtuam pua gari-te khawlsak ahihleh niteng vanzat banah nek-leh-tak tuamtuam bei ding hi’n gen uhi. Thusuak in black a thautui zuak khenkhat te’n Petrol litre 1 Rs. 300 in zuak ta uh a, Oil depot teng ah petrol beisiang phial mahleh bang chidan a black a thautui zuak te’n thautui muthei uh hiam chih dotna om hi.
Manipur pumpi ah oil depot 37 om a, Senapati district mipite’n thautui lam ah haksatna tuak lou hi’n gen uhi. IOC official te’n thautui laklut theihna dia Commissioner CAF & PD kiangah security convoy ngaihtuah sak ding in ngetna bawl uh a, Chingmeirong oil depot ah Motor Spirit (MS) 133 KL lel om mahleh Indian Oil Corporation (IOC) te’n Nov 10, 2016 apan mipi lakah khawm khiak ding khawlsak uh a, Sekmai-BP Bottling mun ah leng stock bei ziak in Nov 7, 2016 apan nasep khawl uh a, himahleh High Spirit Diesel leh Superior Kerosene Oil hawmkhiakna paizom zel hi’n gen uhi.
Huailou in UNC-te economic blockade thukkikna in Club leh orgn. tuamtuam banah Meira Paibi Lup te’n Imphal-Ukhrul road leh Imphal Senapati road-te ah Counter blockade pan uhi.
ISBT zat theih di’n puangkhia
Imphal, Nov-13: Kh. Ratan, Minister (Transport) in Kuman Lampak gei a Dingku Road ah kum 5 paisa a honkhiat nung in tuni’n Inter-State Bus Terminus (ISBT) zat theih ding a puangkhiat tawh kiton in passenger vehicle-te khahkhia hi’n gen uhi. Kh. Ratan in a genna ah India Prime Minister lui Dr. Manmohan Singh in Dec 3, 2011 in ISBT Complex hongkhia a, huai hun ah UPA Chairperson Sonia Gandhi leng tel hi. ISBT Complex hongkhiat nung sawtlou in govt. thuneite’n kum 5 sung nusia uh a, a ziak ding diktak taklang kei mahle uh thu tuamtuam ziak chi a, bandh leh blockade om gige ziak in ISBT complex bawlna ah sum hunkhop mangthang a, Jan 4, 2016 zingsang a 6.7 magnitude a hat zinling ziak a ISBT nutsiat in om a, state govt. in NSCN-IM leh India govt. kal a peace-talk ah interlocutor R. N. Ravi thuzak banah kigolh ding a ngetna bawl chi’n leng taklang hi. Transport dept. a official te’n hiai hun uap uh hi’n leng kigen hi.
Search operation ah mi 9 pawkhia
Imphal, Nov-13: Kh. Robinson, DSP, CDO leh Deben, DSP makaihna leh B. Lunthang Vaiphei, Officer in-charge, CD huhna in Imphal East Police Commando te’n thil deih huailou tunkhak ding venna in tuni zingsang dak 5:00-6:00 tan Mahabali Kabui Khul area lak search operation bawl uh hi’n kigen hi. Huai hun ah mi 300 vel ding-te a tenna inn ua pan sam khia in kivual in dingsak uh a, verification hun ah ID-card kichian tak neilou numei 4 telin mi 9-te hihna diktak suichet ding in Porompat Police Station tut in om uhi.
Theatre rejuvenation Workshop om
Imphal, Nov-13: North East Zone Cultural Centre, Ministry of Culture leh Dept. of Arts & Culture, Govt. of Manipur-te saina in Palace Compound a Maharaja Chandrakirti Auditorium ah tuni’n ‘Theatre Rejuvenation Scheme of NEZCC’ tawh kisai in workshop om a, huai ah Chief Guest in K. Radhakumar Singh, Commissioner, IPR pang hi. Huai hun ah W. Lokendrajit Singh, choreographed leh directed na nuai ah K. Padmakumar in play production a bawl lahkhiakna om a, NE theatre artist-te puah hoih leh North East pawlam ah phousuah ding tupna hi’n gen uhi. Kshetri Jugindro, L. Kishorjit Singh, Dr. S. Thaninleima, Ranjit Adhikarmayum, Dr. N. Premchand Singh leh W. Lokendrajit Singh te’n uap uhi.
Meira Shunglen hongkhia
Imphal, Nov-13: Yaiskul A/C a MLA Elangbam Chand in Local Area Development Fund zang in Imphal East a Wangkhei Pujah Lampak ah Wangkhei Durga Pujah Lampak Women Welfare Orgn.-te adia abawl Meira Shanglen hongkhiatna nei hi’n gen uhi. Huai hun ah Chief Guest in Loukrakpam Tombi, Corporator, IMC Ward No. 20 pang hi. Functional President in Yumlembam Lukamani, Corporator, IMC Ward No. 19 pang a, Guest of Honour in Nhakpam Ongbi Dhananta Devi, President, Wangkhei Durga Pujah Lampak Women Welfare Orgn.-te pang uh hi’n kigen hi.
Eye screening camp om
Imphal, Nov-13: Lions Club, Imphal Valley-te Centennial Celebration Project nuai a ‘Save Vision’ tungtawn in Ragailong a Brighter English High School ah tuni’n ‘Eye Screening Camp’ sai uh hi’n kigen hi. Huai hun ah Nursery apan class X tan a student 100, school staff leh a kim a khua apan mi 24-te screening bawl uh a, huai hun ah mi 16 te’n mit lam a buaina nei uh ahihdan muhkhiak hi’n gen uhi.
Ni 3 nung in siluang mukhia
Imphal, Nov-13: Loukrakpam (O) Kebisana of Arong Mayai Leikai leh a tate Thoibi (3) leh Loukrakpam Rajeshwori (14) te’n Nov 10, 2016 nitaklam dak 3:30 velin Imphal West leh Thoubal district kikal a Imphal River tung ah sing a kibawl Arong Leirembi Bridge akan lai un sing pek omlouhna kikal ah Thoibi kia a, a tanu hutkhiak sawm in Kebisana leng lui ah tawm lut a, mi 2-te tui ah kelum dia a kilat ziak in Loukrakpam Rajeshwori (14) in mi 2-te hunkhia in tuipang tan tun mahleh tui in amah taimang hi’n gen uhi. Huai nung muhkhak hi nawnlou a ni 3 nung tuni zinglam dak 11:00 velin Arong Leirembi Bridge apan mun gamla lou ah veng mipite’n Rajeshwori luang mukhia uh a, thiltung tawh kisai a Arong village a mipi thangpai te’n nuta-te kiatna lei halsia uh hi’n kigen hi.
TUNI THUPI:
“Naupang na hihlai in na hihlai in na tai ah na kigak a,na utna peuh ah na hawh a; himahleh na upat hunchiang in na khut na jak ding a, midang ahon gaksak ding uh a,na utlouhna lamlam ah ahon kai ding uh.” -Johan 21:18
EDITORIAL:
Children’s Day:
NAUPANGTE’ NI
Children Day 2016 kichi Nov 14, 2016 in India gam mun tuamtuam ah program zat hiding a, school tengin bangchibang in program a zangding uhiam chih genkholh theih hikei mahleh, naupangte’ lunglutna ding program tuamtuam zangding un gintak-huai hi. Hiai Naupangte’ ni tawh kisai saulou genkhawm ut-huai hi.
Hiai Children’s day kichi ‘Bal Divas’ chih in leng om a, kumteng a November 14 in kizang gige hi. Theih ding a poimawh mahmah bel hiai ni poimawhni in naupangte’ dikna, chihtakna banah bangchi a naupangte kep ngaih poimawh ding hiam (rights, care and education of children) chih sinsak ding chih ahi hi. Eilak ah school hunkhop in hiai ni poimawh ‘Children’s Day’ zatna kawmin school ah puang ding uh a, ataktak in nu-le-pa sapkhawm a naupangte’ dinmun hilhfiah poimawh mahmah ahi hi.
I gensa bangin, tulel a naupangte ahihleh tunung hun chiang in gam leh nam banah saptuam lama makai ding ngen ahi uhi. Tuni chiangin khantouhna (development) hat law mahmahta a, naupang kum 2/3 tanpha ‘preparatory’ class tanpha in leng smart phone/ touch screen ut dandan in khoihthei ziahziahta uhi. Vaigam leh gamdang mun mun tuamtuam a technology hatdan i gente’n i gam hon banta ahihdan chiang mahmah hi.
Naupangte i chih bangmah theilou (innocent) hi uh a, Pathian apan i goutan liauliau (God gifts) ahi uhi. Tua kia hilou in gou manpha(precious pearls) chih khop manpha a minlawh hi uh a, hiai naupangte’ hih thanghuai hetlouh deihhuai hi. Kuapeuhin naupangte’ sianthouna zahtak a, khemhai a pisual hiam, a selam a koih ding hilou hi. Tuma zekin auto- pu khat in numei naupang 3 lungsim tuampi nei in pimang sawm a, huai thu tunitan Lamka Police station ah buaipih uhi.
Bangziaka November 14 pen Naupangte’ Ni bang a ngaih a om hiam ichih leh Pandit Jawaharlal Nehru pianni ahi hi. Amah Indian prime minister masapen hi a, India in zalenna a ngah nung a Prime Minister len masapen ahi hi. Chacha Nehru chih a leng om Nehru pian champha ‘Children’s Day’ Ni in gen tamtak nei a, Nehru in naupangte a itdan, naupangte’ adia hinkhua a zatdan leh a nasepdan sut ding tamtak om hi. Tua kia hilou in India in zalenna a muhna ding a hun a piakdan, naupangte’ lungsim a zawhdan leh adangdang gen ding tamtak om hi.
Naupangte’ adingin siamsinna leh masawnna (education & progress) poimawh mahmah a, India ah mizawng leh genthei tam petmah hi. Amaute hihna bawl changkanna dingin government akipan scheme tuamtuam hong pai poimawh hi. Chacha Nehru in numei-naupangte mihing khat suah ding chih naktaka a tangkoupih ziakin ama birth day ahih tawh kitonin Prime Minister Narendra Modi in schme tuam liuliau khat bawlkhia hileh chih deihhuai mahmah hi. Nehru in Naupangte khualna ziakin educational institution tuamtuam, Indian Institutes of Technology, All India Institute of Medical Sciences,Indian Institutes of Management leh adangdang dinkhia a, tu in amah sulnung zui in sinlai leh naupangte khualna in bangbang hiam dinkhiak ahih deihhuai hi.
Nehru pen India kia hilou in leitung pumpi in a ngaihdsang ahi hi. Amah a damlai in India a naupangte’ maban ding khualna in free primary education, ahihkeileh naupangte’ lakah athawn a an leh bawngnawi hawm ding chih tanpha ana pawlut hi. Pandit Jawaharlal Nehru in naupangte a itdan leh a ngaihnatdan sut but hilou khop in om hi.
Amah zahna leh ngaihnatna ziak mah in kumteng a November 14 in a pian champha zat gige hi a, a, Government kia hilou in non-government organization (NGO) tuamtuam, schools, private bodies leh mi tuamtuam in zangsek uhi.
No comments:
Post a Comment